17-زەرتتەۋ ماقالاسى
ەحوبا سىزگە توسىن قيىندىقتاردان وتۋگە كومەكتەسەدى
«ٵدىل جان قيىندىققا كوپ كەزىگەدى، ٴبىراق ەحوبا سونىڭ بارىنەن ازات ەتەدى» (ٴزاب. 34:19).
44-ٵن جانى كۇيزەلگەننىڭ دۇعاسى
اڭداتپا a
1. ٴبىز نەنى جاقسى بىلەمىز؟
ەحوبا ٶزىنىڭ قىزمەتشىلەرىن سۇيەتىنىن جانە ولارعا ەڭ جاقسى ٶمىردى تىلەيتىنىن بىلەمىز (ريم. 8:35—39). ونىڭ كيەلى كىتاپتا جازىلعان پرينسيپتەرى پايدالى ەكەنىنە دە تالاي كوزىمىز جەتكەن (يشايا 48:17، 18). دەگەنمەن كەيدە اياق استىنان بولاتىن قيىندىقتارعا دۋشار بولىپ جاتامىز. سونداي جاعدايلاردى قالاي قابىلداعانىمىز ٴجون؟
2. ٴبىز قانداي قيىندىقتارعا كەزىگەمىز جانە سوندايدا قانداي ويلار كەلۋى مۇمكىن؟
2 قيىندىق باۋىرلاستاردىڭ بارىندە دە بار. بىرەۋلەرى ەحوباعا بارىن بەرىپ قىزمەت ەتەيىن دەسە، اۋرۋ اياقتارىنان شالادى. باسقالارىن وتباسىنداعى جاقىندارى رەنجىتىپ، كۇيىندىرەدى. تاعى ٴبىر باۋىرلاستار تابيعي اپاتتان جاپا شەگىپ جاتىر. وزگەلەرى بولسا، سەنىمى ٷشىن قۋعىن-سۇرگىن كورىپ ٴجۇر. مۇندايدا ەرىكسىز: «نەگە مەنىمەن بۇلاي بولدى؟ قانداي جازىعىم بار؟ ەحوبانىڭ باتاسىنان ايىرىلىپ قالعانىم با؟»— دەگەن ويلار كەلەر. ٴسىز دە بۇلاي ويلاعان بولساڭىز، ەش مويىماڭىز. ەحوبانىڭ كوپتەگەن ادال قىزمەتشىسى وسىنداي كۇي كەشكەن (ٴزاب. 22:1، 2؛ ابق. 1:2، 3).
3. ٴزابۇر 34:19 دان نە بىلەمىز؟
3 ٴزابۇر 34:19 وقىڭىز. بۇل تارماقتا ەكى ماڭىزدى وي بار: 1) ادىلدەر قيىندىقتارعا كەزىگەدى؛ 2) ەحوبا ولاردى قيىندىقتارىنان قۇتقارادى. قالاي؟ بىرىنشىدەن، ەحوبا وسى دۇنيەدەگى ٶمىردىڭ شىندىعىنا تۋرا قاراۋىمىزعا كومەكتەسەدى. ول وزىنە قىزمەت ەتسەك، قۋانىشقا كەنەلەتىنىمىزدى ۋادە ەتكەنىمەن، ەش ۋايىم-قايعىسىز، جايباراقات ٶمىر سۇرەسىڭدەر دەگەن جوق (يشايا 66:14). ول ٴبىزدى ٶزى سيلايتىن الداعى ماڭگىلىك ومىرگە نازار تىگۋگە شاقىرادى (قور. 2-ح. 4:16—18). ال ازىرگە ەحوبا بىزگە قيىندىققا قايىسپاي، ٵربىر كۇندى وتكەرۋگە كومەكتەسەدى (ەرم. ز. 3:22—24).
4. بۇل ماقالادا نە تۋرالى قاراستىرامىز؟
4 بۇل ماقالادا ەحوبانىڭ ەجەلدەگى جانە قازىرگى زامانداعى ادال قىزمەتشىلەرىنىڭ ۇلگىلەرىن قاراستىرامىز. ولاردىڭ وقيعالارىنان ومىردە كۇتپەگەن قيىندىقتارعا كەزىگۋىمىز مۇمكىن ەكەنىن، الايدا ەحوباعا سەنىم ارتساق، ول ٴبىزدى ارقاشان قولداپ-دەمەيتىنىن كورەمىز (ٴزاب. 55:22). سول مىسالداردى قاراستىرعاندا بىلاي دەپ ويلانىڭىز: «سونداي جاعدايعا تاپ بولسام، مەن قالاي ارەكەت ەتەر ەدىم؟ ولاردىڭ وقيعالارىن وقىپ، ەحوباعا دەگەن سەنىمىم نىعايا ٴتۇستى مە؟ وزىمە ساباق بولاتىن قانداي تۇستارىن بايقادىم؟»
ەجەلگى زاماندا
جاقىپ ارامدىق قىلعان تۋىسى لابانعا 20 جىل بويى اشتى تەرمەن جۇمىس ىستەدى. الايدا سول كەزدە دە ەحوبا وعان باتاسىن توكتى (5-ابزاستى قاراڭىز)
5. جاقىپ لاباننان قانداي قيىندىقتار كوردى؟ (مۇقاباداعى سۋرەتتى قاراڭىز.)
5 ەجەلدە باسىنا كۇتپەگەن قيىندىقتار تۇسكەن قۇداي قىزمەتشىلەرىنىڭ ٴبىرى — جاقىپ. اكەسى وعان ەحوباعا سەنەتىن تۋىسى لاباننىڭ ۇيىنە بارىپ، سونىڭ قىزدارىنىڭ بىرەۋىن ايەلدىككە الۋدى ايتادى ٵرى ەحوبا ونى مولىنان جارىلقايتىنىنا سەندىرەدى (مۇس. 1-ج. 28:1—4). سودان جاقىپ شالعايعا، لاباننىڭ ۇيىنە قاراي جول تارتادى. لاباننىڭ ليا جانە راحيلا دەگەن ەكى قىزى بولاتىن. جاقىپ كىشىسى راحيلانى ۇناتىپ، ونى ايەلدىككە الۋ ٷشىن لابانعا جەتى جىل قىزمەت ەتۋگە كەلىسەدى (مۇس. 1-ج. 29:18). ول ٴبارىن دۇرىس ىستەگەنىمەن، توبەسىنەن جاي تۇسىرگەن ٴبىر جاعداي بولدى. لابان قۋلىققا بارىپ، ونى راحيلاعا ەمەس، ۇلكەن قىزى لياعا ۇيلەندىرىپ جىبەرەدى. ال راحيلاعا تەك ٴبىر اپتادان كەيىن ۇيلەنۋگە رۇقسات بەرگەنىمەن، ول ٷشىن تاعى جەتى جىل قىزمەت ەتۋدى تالاپ ەتەدى (مۇس. 1-ج. 29:25—27). بۇل ازداي، جاقىپ ودان ىسكەرلىك ماسەلەدە دە ادىلەتسىزدىك كورەدى. لابان باس-اياعى جيىرما جىل ونى جۇمىسقا جەگىپ، ەڭبەگىن پايدالانادى! (مۇس. 1-ج. 31:41، 42).
6. جاقىپ تاعى قانداي تاۋقىمەتتەر كوردى؟
6 جاقىپتىڭ ٶمىرىنىڭ كولەڭكەلى تۇستارى بۇل عانا ەمەس ەدى. ول كوپ بالالى بولعانىمەن، ۇلدارىنىڭ اراسىندا تاتۋلىق بولمايتىن. ۇلدارى ٴتىپتى ٶز باۋىرلارى ٴجۇسىپتى قۇلدىققا ساتىپ جىبەرەدى. ال شيمون مەن لەۋى بولسا اۋلەتتەرىن قارابەت قىلاتىن، ەحوبانىڭ اتىنا كىر كەلتىرەتىن سۇمدىق ٸس جاسايدى. بۇل ازداي، اياۋلى جارى راحيلا ەكىنشى ۇلىن بوسانىپ جاتىپ قايتىس بولادى. ال كەيىن ەلدى زۇلمات اشتىق جايلاپ، شاشى اعارعان شاعىندا جاقىپ جات ەلگە كوشۋگە ٴماجبۇر بولادى (مۇس. 1-ج. 34:30؛ 35:16—19؛ 37:28؛ 45:9—11، 28).
7. ەحوبا جاقىپقا رازى ەكەنىن قالاي ٴبىلدىردى؟
7 باسىنا نەبىر قيىندىق تۋسا دا، جاقىپ ەحوباعا دەگەن جانە ونىڭ ۋادەسىنە دەگەن سەنىمىن شايقالتپاعان. ال ەحوبا وعان رازى ەكەنىن ٴبىلدىرىپ وتىرعان. مىسالى، لابان ادىلەتسىزدىك جاساپ جاتسا دا، ەحوبا جاقىپتىڭ مال-مۇلكىن كوبەيتتى. سونداي-اق جىلدار بويى ٶلدى دەپ ويلاپ كەلگەن سۇيىكتى ۇلى جۇسىپپەن قايتا قاۋىشقاندا، ەحوباعا مىڭ العىسىن جاۋدىرعان شىعار! ەحوبامەن جاقىن دوس بولعانىنىڭ ارقاسىندا جاقىپ نەبىر قيىندىقتان قايىسپاي ٶتتى (مۇس. 1-ج. 30:43؛ 32:9، 10؛ 46:28—30). ٴبىز دە ەحوبامەن ايىرىلماس دوس بوپ قالا بەرسەك، كوپتەگەن قيىندىقتارعا قاسقايىپ توتەپ بەرە الامىز.
8. ٴداۋىت پاتشا نە ىستەۋگە ۇمىتتەندى؟
8 ٴداۋىت پاتشا ارمانداعان قىزمەتىنە جەتە الماي قالعان. ول ەحوباعا ارناپ عيباداتحانا سوعۋدى قاتتى قالاعان ەدى. وسى نيەتىن ول ناتان پايعامبارعا دا اشىق ٴبىلدىردى. سوندا ناتان پايعامبار: «كوڭىلىڭ قالاعانىن ىستە، شىنايى قۇداي ساعان جار»،— دەگەن بولاتىن (شەج. 1-ج. 17:1، 2). پايعامباردىڭ وسى سوزدەرى وعان قانات ٴبىتىرىپ، ارمانداعان عالامات جوباسىنا ٴداۋىت بىردەن كىرىسكەن بولار.
9. كۇتكەنى ورىندالماي قالعاندا، ٴداۋىت قالاي ارەكەت ەتتى؟
9 الايدا «سول ٴتۇنى» ەحوبا عيباداتحانانى ٴداۋىت ەمەس، ونىڭ ۇلدارىنىڭ ٴبىرى سوعاتىنىن ناتانعا ايتادى (شەج. 1-ج. 17:3، 4، 11، 12). قۇلشىنىپ تۇرعان ادامنىڭ قاناتىن سىندىراتىن بۇنداي حاباردى ٴداۋىت قالاي قابىلدادى؟ ول بەيىمدەلىپ، ەندى باسقا ماقساتقا ۇمتىلدى. ول بار كۇشىن سۇلەيمەنگە عيباداتحانا سوعۋعا قاجەتتى قاراجات پەن قۇرىلىس ماتەريالدارىن جيناۋعا جۇمىلدىردى (شەج. 1-ج. 29:1—5).
10. ەحوبا ٴداۋىتتى قالاي جارىلقادى؟
10 ەحوبا عيباداتحانانى ٴداۋىت سوقپايتىنىن ايتقان سوڭ، ارتىنشا-اق ونىمەن كەلىسىم جاساسادى. ول ٴداۋىتتىڭ ٴبىر ۇرپاعى تاقتا ماڭگى پاتشا بولىپ وتىراتىنىن ۋادە ەتەدى (سام. 2-ج. 7:16). يسانىڭ مىڭجىلدىق بيلىگى كەزىندە ٴداۋىت ٶزىنىڭ ۇرپاعىنان شىققان پاتشانىڭ قول استىندا ٶمىر ٴسۇرىپ جاتقانىن بىلگەندە، قانداي سەزىمدە بولاتىنىن ويلاپ كورىڭىزشى! بۇل جاعدايدان تۇيەرىمىز: ەحوبا ٷشىن ىستەگىمىز كەلەتىننىڭ بارىنە قول جەتكىزە الماساق تا، ونىڭ بىزگە ساقتاپ وتىرعان مۇلدەم باسقا ٴبىر باتاسى بولۋى مۇمكىن.
11. كۇتكەن ۋاقىتتارىندا قۇداي پاتشالىعى كەلە قويماسا دا، ەحوبا ٴى عاسىرداعى ماسىحشىلەردى قالاي جارىلقادى؟ (ەلشىلەردىڭ ىستەرى 6:7)
11 ٴبىرىنشى عاسىرداعى ماسىحشىلەردىڭ دە ۇمىتتەرى اقتالمادى. ولار قۇداي پاتشالىعىنىڭ كەلۋىن اسىعا كۇتكەنىمەن، بۇنىڭ قاشان بولاتىنىن بىلمەدى (ەل. ٸس. 1:6، 7). سوندا ولار نەمەن اينالىستى؟ ۋاعىز ٸسىن بار قارقىنمەن اتقارا بەردى. ناتيجەسىندە ىزگى حابار كەڭىنەن تاراپ، ەحوبا ولاردىڭ ەڭبەكتەرىنە باتاسىن اياماي توگىپ جاتقانى ايقىن كورىندى (ەلشىلەردىڭ ىستەرى 6:7 وقىڭىز).
12. اشتىق جايلاعاندا، ٴبىرىنشى عاسىرداعى ماسىحشىلەر نە ىستەدى؟
12 ٴبىرىنشى عاسىرداعى ماسىحشىلەردى ٶمىردىڭ تاعى ٴبىر توسىن سىناعى كۇتىپ تۇردى. «بۇكىل جەرجۇزىن قاتتى اشتىق جايلادى» (ەل. ٸس. 11:28). سول كەزدە وتاعالارى بالا-شاعاما ەندى ناندى قالاي تاۋىپ بەرەمىن دەپ ۋايىم كەشكەن شىعار. ال قىزمەت اياسىن كەڭەيتەمىن دەپ جوسپارلاپ جۇرگەن جاستار نە سەزىندى ەكەن؟ جوسپارىمىزدىڭ ٴبارى كەيىنگە قالاتىن بولدى دەپ كوڭىلدەرى تۇسكەن بولار. ٴبىراق بۇل ماسىحشىلەر جاعدايعا قاراي بەيىمدەلە ٴبىلدى. ولار ٴتۇرلى امالىن تاۋىپ، ۋاعىزداي بەردى جانە ياھۋدەياداعى باۋىرلاستارىنا قول ۇشىن سوزىپ، بارلارىمەن قۋانا ٴبولىستى (ەل. ٸس. 11:29، 30).
13. اشتىق كەزىندە باۋىرلاستار قانداي باتالارعا كەنەلدى؟
13 اشتىق جايلاعان ۋاقىتتا ماسىحشىلەر ەحوبانىڭ قانداي باتالارىنا كەنەلدى؟ باسقا باۋىرلاستاردان گۋمانيتارلىق كومەك كەلىپ جەتكەندە، الگى ماسىحشىلەر ەحوبانىڭ قولداۋىن تىكەلەي سەزىندى (مات. 6:31—33). وزدەرىنە كومەكتەسۋگە كەلگەن باۋىرلاستارمەن دە دوستاسىپ، ەرەكشە جاقىن بولىپ كەتكەن شىعار. ال اشتىقتان زارداپ شەككەندەر ٷشىن ساداقا جاساعان نەمەسە باسقا دا جولمەن كومەكتەسكەن باۋىرلاستار بەرۋدىڭ قۋانىشىنا كەنەلگەن (ەل. ٸس. 20:35). توسىننان كەلگەن جاعدايعا بەيىمدەلە بىلگەن قىزمەتشىلەرىنىڭ بارلىعىن ەحوبا جارىلقادى.
14. ەلشى پاۋىل جانە بارنابامەن نە بولدى جانە مۇنىڭ ارتى قانداي جاقسىلىققا ۇلاستى؟ (ەلشىلەردىڭ ىستەرى 14:21، 22)
14 ٴبىرىنشى عاسىرداعى ماسىحشىلەر كوپ قۋعىن-سۇرگىن كورگەن. كەيدە بۇل ويلاماعان جەردەن بولاتىن. پاۋىل مەن بارنابانىڭ ليسترا توڭىرەگىندە ۋاعىزداپ جۇرگەن كەزىن الايىقشى. العاشىندا جۇرت ولاردى جاقسى قابىلداپ، ۇيىپ تىڭدايدى. ٴبىراق قارسىلاستار «جۇرتتى ۇگىتتەپ»، پاۋىل مەن بارناباعا ايداپ سالعاندا، الگى تىڭداپ تۇرعان ادامداردىڭ كەيبىرى سولارعا قوسىلىپ، پاۋىلدى تاسپەن اتقىلايدى دا، ٶلىمشى كۇيدە تاستاپ كەتەدى (ەل. ٸس. 14:19). ٴبىراق پاۋىل مەن بارنابا ول جەردەن كەتىپ، باسقا جاققا بارىپ ۋاعىزداي بەرەدى. ناتيجەسىندە، ولار «ٴبىراز ادامدى شاكىرت ەتەدى» ٵرى ٶز ۇلگىلەرىمەن جانە سوزدەرىمەن باۋىرلاستاردىڭ سەنىمىن نىعايتادى (ەلشىلەردىڭ ىستەرى 14:21، 22 وقىڭىز). بارنابا مەن پاۋىلدىڭ قۋدالانسا دا كەرى شەگىنبەي، ۋاعىزداي بەرگەندەرى كوبىسىنە پايداسىن تيگىزدى. دەمەك، ٴبىز دە ەحوبا تاپسىرعان ٸستى قايتپاس قايسارلىقپەن اتقارا بەرسەك، مىندەتتى تۇردە باتاسىنا كەنەلەمىز.
قازىرگى كۇندەرى
15. ماكميللان باۋىرلاس سىزگە قاي جاعىنان ۇلگى-ونەگە بولدى؟
15 1914-جىلدىڭ قارساڭىندا ەحوبانىڭ حالقى سول جىلدان زور ٷمىت كۇتتى. الەكساندر ماكميللان باۋىرلاس تا جۋىق ارادا كوككە كەتەمىن دەپ ويلادى. 1914-جىلدىڭ قىركۇيەك ايىندا ماكميللان باۋىرلاس بايانداما ايتىپ تۇرىپ، تىڭدارماندارىنا: «بالكىم، بۇل مەنىڭ سوڭعى باياندامام شىعار»،— دەگەن. ٴبىراق ولاي بولماي شىقتى. «كەيبىرىمىز بىردەن كوككە كەتەمىز دەپ، تىم اسىعىس ايتقان سياقتىمىز. ەندى بىزگە بار كۇشىمىزدى ۋاعىز ٸسىن بەلسەنە اتقارۋعا جۇمىلدىرۋ كەرەك بولدى»،— دەپ جازىپ قالدىردى ماكميللان باۋىرلاس. ول راسىندا دا الدىنا جان سالماي قىزمەت ەتتى. مىسالى، بەيتاراپتىعى ٷشىن تۇرمەدە وتىرعان ەر باۋىرلاستارعا بارىپ، جىگەرلەندىرىپ ٴجۇردى. قارتايىپ، بويىنان قۋاتى كەتكەن شاعىندا دا، قاۋىم كەزدەسۋلەرىنەن قالمادى. كوكتەگى ٷمىتىن كۇتە ٴجۇرىپ، ۋاقىتىن بارىنشا ٴتيىمدى قولدانعان ماكميللان باۋىرلاس بۇنىڭ قانداي جەمىسىن كوردى؟ ول 1966-جىلى قايتىس بولار الدىندا بىلاي دەپ جازدى: «مەنىڭ سەنىمىم ٴدال بۇرىنعىداي بەرىك قالپىندا قالدى». ۇمىتتەنگەنىڭىز ٴسىز ويلاعاننان دا ۇزاق ۋاقىتقا سوزىلىپ كەتسە، ماكميللان باۋىرلاستىڭ كوزقاراسىن ۇلگى ەتىڭىز! (ەۆر. 13:7).
16. حەربەرت دجەننينگس باۋىرلاس پەن جۇبايى قانداي كۇتپەگەن جاعدايعا كەزىكتى؟ (جاقىپ 4:14)
16 كوپ باۋىرلاستاردىڭ اياق استىنان دەنساۋلىقتارى ناشارلايتىن جاعدايلار دا بولادى. سونداي جاعدايعا حەربەرت دجەننينگس b باۋىرلاس كەزىككەن. جۇبايى ەكەۋى گانادا ميسسيونەرلىك قىزمەتتى قۋانا اتقارىپ جۇرگەندە، حەربەرت باۋىرلاس ٴبىر اۋرۋعا شالدىعادى. ول — كوڭىل كۇيدىڭ كۇرت وزگەرۋىن تۋدىراتىن پسيحيكالىق اۋرۋ. حەربەرت باۋىرلاس ٶز جاعدايىنا جاقىپ 4:14 ٴتى (وقىڭىز) كەلتىرىپ: «ەرتەڭ ومىرلەرىڭدە نە بولاتىنىن بىلمەيسىڭدەر» دەگەن وسى ەكەن عوي»،— دەدى. «امال جوق، بىزگە شىندىققا تۋرا قاراۋ قاجەت بولدى. ٴسۇيتىپ، ەمدەلۋ ٷشىن ٴبىز كاناداعا قايتىپ كەتتىك. گاناداعى قىزمەتىمىزدى دە، جاقىن دوستارىمىزدى دا تاستاپ كەتۋگە ٴماجبۇر بولدىق»،— دەيدى ول. ٴبىراق ەحوبا حەربەرت باۋىرلاس پەن ونىڭ ايەلىنە وسىنداي قيىنشىلىقتارعا قاراماستان قىزمەتتەرىن ادالدىقپەن اتقارا بەرۋگە كومەكتەسىپ كەلدى.
17. حەربەرت باۋىرلاستىڭ ٶمىربايانى باسقالارعا قانداي پايداسىن تيگىزدى؟
17 حەربەرت باۋىرلاستىڭ ٶز ٶمىربايانىن ەش بۇكپەسىز، اشىق ايتقانى كوپ باۋىرلاسقا پايداسىن تيگىزدى. ٴبىر ايەل باۋىرلاس بىلاي دەپ جازدى: «ەشقانداي ماقالا ماعان وسىنشالىقتى اسەر ەتپەگەن. حەربەرت باۋىرلاس ەمدەلۋ ٷشىن، تاعايىندالعان قىزمەتىنەن باس تارتقانىنا قاراپ، مەن ٶز جاعدايىمدا تارازى باسىن تەڭ ۇستاۋدى ۇيرەندىم«. ال ٴبىر ەر باۋىرلاس بىلاي دەدى: «پسيحيكالىق اۋرۋعا شالدىققاندىقتان، ون جىل بويى اتقارىپ كەلگەن اقساقالدىق قىزمەتىمنەن باس تارتۋعا تۋرا كەلدى. سول ٷشىن ٶزىمدى جەگىدەي جەيتىنمىن. ال باسقا باۋىرلاستاردىڭ ٶمىربايانىن وقىعاندا ودان بەتەر مۇڭعا باتاتىنمىن. ٴبىراق حەربەرت باۋىرلاستىڭ تاباندىلىعى مەنىڭ ەڭسەمدى كوتەرىپ تاستادى». دەمەك، توسىن قيىندىقتارعا توتەپ بەرسەك، باسقالاردى جىگەرلەندىرە الامىز. ٶمىرىمىز ٶزىمىز كۇتپەگەن ارناعا بۇرىلىپ كەتسە دە، ٴبىز باسقالارعا سەنىم مەن تاباندىلىقتىڭ ۇلگىسى بولا الامىز (پەت. 1-ح. 5:9).
ەحوباعا سەنىم ارتساق، كۇتپەگەن قيىندىقتار، قايتا، ٴبىزدى وعان جاقىنداتا تۇسەدى (18-ابزاستى قاراڭىز)
18. نيگەرياداعى ايەل باۋىرلاستان نە ۇيرەندىڭىز؟ (سۋرەتتە بەينەلەنگەن.)
18 19-COVID پاندەمياسىنىڭ سالدارىن كوپ باۋىرلاسىمىز كوردى. مىسالى، نيگەريادا تۇراتىن ٴبىر جەسىر ايەل باۋىرلاسىمىز سول كەزدە ازىق-تۇلىكتەن تاپشىلىق كورگەن ەكەن. بىردە تاڭەرتەڭ قىزى اناسىنان: «قازىر سوڭعى ٴبىر كەسە كۇرىشىمىزدى جەسەك، كەيىن نە جەيمىز؟»— دەپ سۇرايدى. سوندا اناسى وعان ازىق تا، ازىق الاتىن اقشا دا بولماعانىمەن، سارەپتالىق جەسىر ايەلگە ەلىكتەۋ كەرەكتىگىن، ياعني سوڭعى استى دايىنداپ، ارى قاراي ەحوباعا تولىقتاي سەنىم ارتۋلارى كەرەكتىگىن ايتادى (پات. 1-ج. 17:8—16). ەكەۋى تۇسكى استىڭ قامىن ۋايىمداپ ۇلگەرمەي جاتىپ-اق، باۋىرلاستار ۇيىمداستىرعان كومەك كەلىپ جەتەدى. قاراسا، ىشىندە ەكى اپتاعا جەتەرلىك ازىق-تۇلىك بار ەكەن. «ەحوبا قىزىما ايتقان سوزدەرىمدى مۇقيات تىڭداپ تۇرعان ەكەن عوي»،— دەپ تاڭعالدى بۇل ايەل باۋىرلاس. راسىندا دا، ەحوباعا ارقا سۇيەسەك، ومىردەگى توسىن قيىندىقتار، قايتا، ٴبىزدى ەحوباعا جاقىنداتا تۇسەدى (پەت. 1-ح. 5:6، 7).
19. الەكسەي باۋىرلاسىمىز قانداي قۋعىن كوردى؟
19 سوڭعى جىلدارى باۋىرلاستارىمىزدىڭ باسىنا تۇسكەن تاعى ٴبىر كۇتپەگەن قيىندىق — قۋدالاۋ. بۇعان ٴبىر مىسال — رەسەيدەگى الەكسەي ەرشوۆ باۋىرلاسىمىز. ول 1994-جىلى شومىلدىرۋ راسىمىنەن وتكەن. سول كەزدە رەسەيدەگى ەحوبا كۋاگەرلەرىندە ٴبىرشاما ەركىندىك بار ەدى. ٴبىراق سوڭعى جىلدارى رەسەيدە جاعداي وزگەرىپ، ىسىمىزگە شەكتەۋ قويىلدى. 2020-جىلى قۇزىرلى ورگاندار الەكسەي باۋىرلاستىڭ ۇيىنە باسا-كوكتەپ كىرىپ، ٴتىنتۋ جۇرگىزىپ، كوپ مۇلكىن تاركىلەيدى. ال بىرنەشە ايدان كەيىن وعان رەسمي تۇردە ايىپ تاعىلادى. بۇدان دا سوراقىسى، بۇل ايىپ ٴبىر جىل بويى كيەلى كىتاپتى زەرتتەگىسى كەلەتىندەي سىڭاي تانىتقان ادامنىڭ ٴتۇسىرىپ العان بەينەجازباسىنا نەگىزدەلگەن. نەتكەن ساتقىندىق!
20. الەكسەي باۋىرلاس ەحوبامەن دوستىعىن قالاي نىعايتتى؟
20 الەكسەي باۋىرلاس كەزىككەن قۋعىن-سۇرگىننىڭ ٴبىر جاقسى ناتيجەسى بولدى ما؟ ٴيا. ونىڭ ەحوبامەن دوستىعى بەكي ٴتۇستى. الەكسەي بىلاي دەيدى: «ٴبىز ايەلىم ەكەۋىمىز كوپ دۇعا ەتەتىن بولدىق. ەحوبا كومەكتەسپەسە، بۇل جاعدايدى كوتەرە المايتىن ەدىم. ال جەكە زەرتتەۋ رۋحىمدى سىندىرماۋعا كومەكتەسەدى. ەجەلدەگى ەحوبانىڭ ادال قىزمەتشىلەرى جايلى وي جۇگىرتەمىن. سابىر ساقتاپ، ەحوباعا ارقا سۇيەۋگە ۇيرەتەتىن ۇزىندىلەر كيەلى كىتاپتا وتە كوپ».
21. بۇل ماقالادان نە تۇيدىك؟
21 بۇل ماقالادان قانداي ويلار تۇيدىك؟ مىنا دۇنيەدە ٶمىر تۇراقسىز ٵرى توسىن قيىندىقتارى كوپ. ٴبىراق ەحوباعا ارقا سۇيەسەك، ول ارقاشان دا بىزگە قول ۇشىن بەرەدى. نەگىزگى تارماعىمىزدا ايتىلعانداي، «ٵدىل جان قيىندىققا كوپ كەزىگەدى، ٴبىراق ەحوبا سونىڭ بارىنەن ازات ەتەدى» (ٴزاب. 34:19). ەندەشە، باسىمىزعا تۇسكەن قيىنشىلىقتاردى ەمەس، ەحوبانىڭ قالاي قولداپ، كۇش بەرىپ جاتقانىن باستى نازاردا ۇستايىق. سوندا ٴدال ەلشى پاۋىل سياقتى: «ماعان كۇش-قۋات بەرۋشىنىڭ ارقاسىندا ٴبارىن دە ىستەي الامىن»،— دەيتىن بولامىز (ٴفىلىپ. 4:13).
38-ٵن قۇداي ساعان كۇش بەرەدى
a اۋمالى-توكپەلى مىنا زاماندا كۇتپەگەن قيىندىقتارعا دۋشار بولۋىمىز عاجاپ ەمەس. وندايدا ەحوبا ادال قىزمەتشىلەرىن مىندەتتى تۇردە قولداپ-دەمەيدى. بۇعان ەجەلدەگى جانە بۇگىندەگى قىزمەتشىلەرىنىڭ مىسالدارى كۋا. ەحوبا ولارعا قالاي كومەكتەسكەن؟ بۇل مىسالدار ەحوباعا ارقا سۇيەسەك، ول ٴبىزدى دە قولدايتىنىنا سەنىمىمىزدى ارتتىرادى.
