16-زەرتتەۋ ماقالاسى
64-ٵن ەگىن جيناۋعا قۋانا اتسالىسۋ
قىزمەتىڭىزدى قۋانىشپەن اتقارىڭىز
«ەحوباعا قۋانا قىزمەت ەتىڭدەر» (ٴزاب. 100:2).
نەگىزگى وي
بۇل ماقالادا قىزمەتىمىزدى قۋانىشپەن اتقارۋعا كومەكتەسەتىن كەڭەستەردى قاراستىرامىز.
1. كەيبىرەۋلەر قىزمەتتە وزدەرىن قالاي سەزىنەدى؟ (سۋرەتتى دە قاراڭىز.)
ٴبىز كوكتەگى اكەمىزدى جاقسى كورگەندىكتەن جانە ول جايلى باسقالار دا بىلگەنىن قالاعاندىقتان، ىزگى حاباردى ۋاعىزدايمىز. نەگىزى، ۋاعىز ٸسىن كوبىمىز قۋانا اتقارامىز، ٴبىراق كەيبىرەۋلەرگە بۇل قيىن بولىپ جاتادى. نەگە؟ باۋىرلاستاردىڭ كەيبىرى وتە ۇيالشاق بولسا، كەيبىرىنە سەنىمدىلىك جەتىسپەي جاتادى. تاعى بىرەۋلەرى تانىمايتىن ادامنىڭ ۇيىنە بارۋعا ىڭعايسىزدانادى. حابارىمىزدى تىڭداماي قويسا شە دەپ قورقاتىندار دا بار. ال كىشكەنتايىنان ەشكىممەن داۋلاسپا دەپ تاربيەلەنگەن باۋىرلاستار «قىزمەتتە بىرەۋ قارسى سويلەسە نە ىستەيمىن» دەپ ۋايىمداۋى مۇمكىن. بۇل باۋىرلاستار ەحوبانى قاتتى جاقسى كورسە دە، قىزمەتتە بەيتانىس ادامدارعا ىزگى حاباردى ايتۋدان تارتىنادى. سوندا دا ولار بۇل ٸستىڭ ماڭىزدىلىعىن ٴتۇسىنىپ، جۇيەلى تۇردە قىزمەتكە شىعادى. وسىنداي التىن باۋىرلاستاردى ەحوبا قالاي عانا جاقسى كورمەيدى؟!
ۋاعىزدان قۋانىش الىپ ٴجۇرسىز بە؟ (1-ابزاستى قاراڭىز)
2. قىزمەتتەن قۋانىش الا الماي جۇرسەك، نەگە كوڭىلىمىز تۇسپەۋ كەرەك؟
2 وسىنداي سەزىمدەر سىزگە دە قىزمەتتەن قۋانىش الۋعا كەدەرگى جاساي ما؟ ەگەر سولاي بولسا، كوڭىلىڭىز تۇسپەسىن. ٴسىزدىڭ ۇيالشاقتىعىڭىز كىشىپەيىلدىلىگىڭىزدىڭ بەلگىسى بولۋى مۇمكىن. بالكىم، ٴسىز وزىڭىزگە نازار اۋدارتقىڭىز كەلمەيتىن شىعار، يا بولماسا وزگەلەرمەن ٴسوز تالاستىرعىڭىز كەلمەيتىن بولار. ونىڭ ۇستىنە، بىرەۋگە جاقسىلىق جاساعاندا بەتىڭدى قايتارسا، بۇل ەشكىمگە دە ۇنامايدى. كوكتەگى اكەڭىز ەحوبا ٴسىزدىڭ قانداي سەزىمدەرمەن كۇرەسىپ جۇرگەنىڭىزدى جاقسى بىلەدى جانە ول سىزگە كومەكتەسكىسى كەلەدى (يشايا 41:13). بۇل ماقالادا ٴبىز جاعىمسىز سەزىمدەردى جەڭىپ، قىزمەتتەن كوبىرەك قۋانىش الۋعا كومەكتەسەتىن بەس كەڭەستى قاراستىرامىز.
قۇداي سوزىنەن كۇش الىڭىز
3. ەرەميا پايعامبارعا ۋاعىزداۋعا نە كومەكتەستى؟
3 ەجەلدە ەحوبانىڭ قىزمەتشىلەرى قيىن تاپسىرمانى اتقارۋ ٷشىن قۇدايدىڭ حابارىنان كۇش العان. سولاردىڭ ٴبىرى — ەرەميا پايعامبار. ەحوبا وعان ۋاعىزداۋ تاپسىرماسىن بەرگەندە، ول قورقىپ: «مەن جۇرت الدىندا سويلەي المايمىن، ٵلى جاسپىن عوي»،— دەدى (ەرم. 1:6). سەنىمدىلىك جەتىسپەگەن ەرەمياعا باتىل بولۋعا نە كومەكتەستى؟ وعان قۇداي ٴسوزى كۇش بەرگەن. ەرەميا: «ونىڭ ٴسوزى جۇرەگىمدە جانعان وتتاي، سۇيەكتەرىمدە قامالعان جالىنداي بولدى. ونى ۇستاپ تۇرامىن دەپ شارشادىم»،— دەگەن (ەرم. 20:8، 9). قيىن اۋماققا تاعايىندالسا دا، ەرەميا جاريالاپ جۇرگەن حابارىنان كۇش العاننىڭ ارقاسىندا قىزمەتىن اتقارا العان.
4. قۇداي ٴسوزىن وقىپ، وي جۇگىرتۋدىڭ پايداسى قانداي؟ (قولوستىقتارعا 1:9، 10)
4 بۇگىندە ماسىحشىلەر دە قۇداي سوزىندەگى حاباردان كۇش الادى. ەلشى پاۋىل قولوستاعى قاۋىمعا حات جازعاندا، تۋرا ٴبىلىم «ەحوبانىڭ ەسىمىنە لايىقتى ٶمىر ٴسۇرىپ،.. ٵربىر يگى ىستە جەمىستى بولۋعا» كومەكتەسەتىنىن ايتقان (قولوستىقتارعا 1:9، 10 وقىڭىز). ال يگى ىسكە ىزگى حاباردى ۋاعىزداۋ دا جاتادى. دەمەك، قۇداي ٴسوزىن وقىپ، وي جۇگىرتسەك، ەحوباعا دەگەن سەنىمىمىز ارتادى جانە پاتشالىق جايلى حاباردى ۋاعىزداۋدىڭ ماڭىزدىلىعىن تۇسىنەمىز.
5. كيەلى كىتاپتىڭ مەيلىنشە كوپ پايداسىن كورۋ ٷشىن نە ىستەۋىمىز كەرەك؟
5 قۇداي ٴسوزىنىڭ مەيلىنشە كوپ پايداسىن كورۋ ٷشىن ونى وقىپ، زەرتتەپ، وي جۇگىرتۋگە جەتكىلىكتى ۋاقىت ٴبولىڭىز. اسىعىس-ۇسىگىس وقۋدان اۋلاق بولىڭىز. ەگەر قانداي دا ٴبىر تارماقتى تۇسىنبەي جاتساڭىز، ودان ٶتىپ كەتپەڭىز. «كۇزەت مۇناراسى باسىلىمدارىنىڭ كورسەتكىشى» مەن «ەحوبا كۋاگەرلەرىنىڭ ىزدەنىس قۇرالىن» پايدالانىپ، سول تارماق قالاي تۇسىندىرىلەتىنىن قاراپ كورىڭىز. زەرتتەۋگە جەتكىلىكتى ۋاقىت بولسەڭىز، قۇداي ٴسوزىنىڭ شىندىق ەكەنىنە كوزىڭىز جەتە تۇسەدى (سال. 1-ح. 5:21). ال كوزىڭىز جەتكەن سايىن، بىلگەندەرىڭىزدى باسقالارعا قۋانىشپەن ايتاسىز.
قىزمەتكە جاقسى دايىندالىڭىز
6. نەگە قىزمەتكە دايىندالىپ شىعۋىمىز كەرەك؟
6 قىزمەتكە دايىندالىپ شىقساڭىز، ادامدارمەن سويلەسكەندە قاتتى ۋايىمداماي، ٶزىڭىزدى ەركىن ۇستايسىز. كەزىندە يسا دا شاكىرتتەرىن ۋاعىزعا جىبەرمەس بۇرىن، ولاردى دايىنداعان (لۇقا 10:1—11). يسانىڭ ۇيرەتكەندەرىن قولدانعاننىڭ ارقاسىندا شاكىرتتەر كوپ ٸس اتقارىپ، قۋانىشپەن ورالعان (لۇقا 10:17).
7. قىزمەتكە قالاي دايىندالساق بولادى؟ (سۋرەتتى دە قاراڭىز.)
7 قىزمەتكە قالاي دايىندالساق بولادى؟ الدىمەن، ادامدارعا نە تۋرالى ايتامىن جانە ونى ٶز سوزىممەن قالاي جەتكىزەمىن دەپ ويلانىڭىز. سونداي-اق ۋچاسكەدەگى ادامدار ٴجيى نە دەيتىنى جايلى ويلاڭىز. سوسىن «بىلاي دەسە، بىلاي ايتام» دەپ، بىرنەشە جاۋاپ ويلاستىرىپ قويىڭىز. ال كەيىن ادامدارمەن اڭگىمەلەسكەندە، ٶزىڭىزدى ەركىن ۇستاپ، كۇلىمدەپ سويلەسىڭىز.
ۋاعىزعا جاقسىلاپ دايىندالىڭىز (7-ابزاستى قاراڭىز)
8. قاي ماعىنادا ماسىحشىلەر پاۋىل ايتقان قىش ىدىستارعا ۇقسايدى؟
8 ۋاعىز ىسىندە ٴبىزدىڭ قانداي ٴرول اتقاراتىنىمىزدى كورسەتۋ ٷشىن، ەلشى پاۋىل: «وسى قازىنانى قىش ىدىستاردا ساقتايمىز»،— دەگەن (قور. 2-ح. 4:7). ول قانداي قازىنا جايلى ايتقان؟ بۇل — ادامداردىڭ ٶمىرىن ساقتايتىن قۇداي پاتشالىعى جايلى ۋاعىزداۋ ٸسى (قور. 2-ح. 4:1). ال قىش ىدىستار ىزگى حاباردى ايتىپ جۇرگەن قۇدايدىڭ قىزمەتشىلەرىن بىلدىرەدى. پاۋىلدىڭ زامانىندا ساۋداگەرلەر قىش ىدىستاردى تاماق، شاراپ، اقشا سياقتى باعالى زاتتاردى تاسىمالداۋ ٷشىن قولدانعان. تۋرا سول سياقتى، ەحوبا دا بىزگە وتە باعالى حاباردى سەنىپ تاپسىرىپ وتىر. وسى حاباردى وزگەلەرگە جەتكىزۋ ٷشىن ەحوبانىڭ ٶزى بىزگە كۇش بەرەدى.
باتىلدىق سۇراپ دۇعا ەتىڭىز
9. ۋاعىزدا قورقىنىشىمىزدى قالاي جەڭسەك بولادى؟ (سۋرەتتى دە قاراڭىز.)
9 كەيدە ٴبىز ادامداردىڭ وزىنەن قورىقساق، كەيدە حابارىمىزدى تىڭداماي قويادى دەپ قورقامىز. سونداي قورقىنىشتاردى قالاي جەڭسەك بولادى؟ مىسالى، ەلشىلەردىڭ جاعدايىن الايىق. ۋاعىزداۋعا تيىم سالىنعان كەزدە، ولار قورقىنىشقا بوي الدىرماي، دۇعا ەتكەن. ولار ەحوبادان: «ٴسوزىڭدى باتىل جاريالاي بەرۋگە كۇش دارىتا كور»،— دەپ سۇراعان. ەحوبا ولاردىڭ دۇعاسىنا بىردەن جاۋاپ بەردى (ەل. ٸس. 4:18، 29، 31). ٴبىز دە ادامداردان قورقىپ، ۋاعىزداي الماي جاتساق، دۇعا ەتىپ، ەحوبادان كومەك سۇرايىق. دۇعادا: «ادامداردان قورىقپايىنشى، قايتا، ولاردى جاقسى كورەيىنشى»،— دەپ سۇراساق بولادى.
باتىلدىق سۇراپ دۇعا ەتىڭىز (9-ابزاستى قاراڭىز)
10. ەحوبا ٶز كۋاگەرلەرىنە ٶزى جايلى كۋالىك ەتۋگە قالاي كومەكتەسىپ جاتىر؟ (يشايا 43:10—12)
10 ەحوبا ٴبىزدى ٶزىنىڭ كۋاگەرى ەتىپ تاعايىنداعان جانە ول بىزگە باتىل بولۋعا كومەكتەسەمىن دەپ ۋادە ەتەدى (يشايا 43:10—12 وقىڭىز). ول سوزىندە تۇرىپ، بىزگە كوپتەگەن جولمەن كومەكتەسىپ جاتىر. سولاردىڭ تورتەۋىنە توقتالايىق. بىرىنشىدەن، ىزگى حاباردى ۋاعىزداعان كەزدىڭ بارىندە يسا بىزبەن بىرگە (مات. 28:18—20). ەكىنشىدەن، ەحوبا بىزگە كومەكتەسسىن دەپ پەرىشتەلەر تاعايىنداپ قويعان (ايان 14:6). ۇشىنشىدەن، ەحوبا بىلگەندەرىمىزدى دەر كەزىندە ەسىمىزگە ٴتۇسىرىپ تۇرۋ ٷشىن كيەلى رۋحىن بەرەدى (جوح. 14:25، 26). تورتىنشىدەن، قاسىمىزعا سەرىك بولسىن دەپ اكەمىز باۋىرلاستاردى دا بەرگەن. كورىپ وتىرعانىمىزداي، ەحوبا مەن باۋىرلاستارىمىزدىڭ ارقاسىندا قىزمەتىمىزدى جەمىستى اتقارۋ ٷشىن بىزدە قاجەتتىنىڭ ٴبارى بار.
يكەمدى بولىڭىز، دۇرىس كوزقاراس ساقتاڭىز
11. قىزمەتتە كوبىرەك اداممەن سويلەسۋ ٷشىن نە ىستەسەك بولادى؟ (سۋرەتتى دە قاراڭىز.)
11 ۋاعىزدا ادامدار ۇيلەرىندە بولماسا، كوڭىلىڭىز تۇسە مە؟ سونداي كەزدە: «ۋچاسكەمدەگى ادامدار قازىر قاي جەردە جۇرگەن بولۋى مۇمكىن؟»— دەپ ويلانىپ كورىڭىز (ەل. ٸس. 16:13). بالكىم، ولار جۇمىستا نە ساۋدا ورتالىقتارىندا جۇرگەن بولار. وندايدا كوشەمەن ۋاعىزداپ، كوبىرەك اداممەن سويلەسە الاتىن شىعارسىز. دجوشۋا ەسىمدى ەر باۋىرلاس بىلاي دەيدى: «بايقاعانىم، ساۋدا ورتالىقتارى مەن كولىك تۇراقتارىندا كوبىرەك اداممەن سويلەۋگە مۇمكىندىك بولادى». ايەلى بريدجەتپەن تاعى ٴبىر بايقاعاندارى، ۋچاسكەدە ادامدار ۇيلەرىندە ٴجيى كەشكە قاراي نە جەكسەنبى تۇسكە تامان بولادى ەكەن (ەفەس. 5:15، 16).
ۋاعىزدايتىن جەرىڭىز بەن ۋاقىتىڭىزدى وزگەرتىپ كورىڭىز (11-ابزاستى قاراڭىز)
12. ادامدار نەگە سەنەتىنىن، نەنى ۋايىمداپ جۇرگەنىن قالاي بىلسەك بولادى؟
12 ادامدار حابارىڭىزعا قۇلاق اسا بەرمەيتىنىن بايقاساڭىز: «ولار نەگە سەنەدى؟ قانداي ۋايىمدارى بار؟»— دەپ ويلانىپ كورىڭىز. دجوشۋا مەن بريدجەت ادامدارمەن سويلەسكەندە، اڭگىمەلەرىن بۋكلەتتىڭ سىرتىنداعى سۇراقتان باستايدى ەكەن. مىسالى، ولار «ٴسىز كيەلى كىتاپ جايلى نە ويلايسىز؟» دەگەن بۋكلەتتى كورسەتىپ: «كەيبىر ادامدار كيەلى كىتاپتى قۇدايدان كەلگەن كىتاپ دەسە، كەيبىرەۋلەر بۇنىمەن كەلىسپەيدى. ال ٴسىز بۇل جايلى نە ويلايسىز؟»— دەيدى ەكەن. ٴجيى بۇنداي سۇراقتار جاقسى اڭگىمەگە ۇلاسادى.
13. ادامدار ۋاعىزىمىزدى تىڭداماسا دا، نەگە قىزمەتىمىز جەمىستى بولا بەرەدى؟ (ناقىل سوزدەر 27:11)
13 قىزمەتتە جەمىستى بولۋىمىز ادامداردىڭ تىڭداعان-تىڭداماعانىنا بايلانىستى ەمەس. ويتكەنى ٴبىز ەحوبا مەن ونىڭ ۇلى نە ايتسا، سونى ىستەپ جاتىرمىز، ياعني كۋالىك بەرىپ جاتىرمىز (ەل. ٸس. 10:42). بىردە-ٴبىر اداممەن سويلەسە الماساق تا، حابارىمىزدى ەشكىم تىڭداماسا دا، ٴبىز قۋانىشىمىزدى جوعالتپايمىز. سەبەبى كوكتەگى اكەمىزدىڭ بىزگە ريزا ەكەنىن بىلەمىز (ناقىل سوزدەر 27:11 وقىڭىز).
14. قانداي دا ٴبىر باۋىرلاس ۋچاسكەسىندە قىزىعۋشىلىق تانىتقان ادامدى تاۋىپ جاتسا، نە ٷشىن قۋانامىز؟
14 قانداي دا ٴبىر باۋىرلاس ۋچاسكەسىندە قىزىعۋشىلىق تانىتقان ادامدى تاۋىپ جاتسا، ٴبىز قاتتى قۋانامىز. بىردە «كۇزەت مۇناراسىندا» مىسال كەلتىرىلگەندەي، ٴبىزدىڭ ۋاعىز ٸسىمىز جوعالعان بالانى ىزدەۋ جۇمىستارىنا ۇقسايدى. مىسالى، ونى تابۋ ٷشىن كوپ ادام جۇمىلىپ، جان-جاقتان ىزدەيدى. بالا تابىلعاندا، ونى تاپقان ادام عانا ەمەس، ىزدەگەندەردىڭ ٴبارى بىردەي قۋانادى. سول سياقتى شاكىرت دايىنداۋ ٸسى دە — جۇمىلا اتقاراتىن ٸس. سوندىقتان اۋماعىمىزدى تۇگەل وڭدەۋ ٷشىن قاۋىمدا ٴبارىمىز كەرەكپىز. ەگەر قاۋىمعا جاڭادان بىرەۋ كەلە باستاسا، بۇل ٴبارىمىزدىڭ قۋانىشىمىز.
ەحوبا مەن وزگەلەردى سۇيەتىنىڭىزدى كورسەتىڭىز
15. ۋاعىزداۋعا دەگەن ىنتامىزدى ارتتىرۋعا نە كومەكتەسەدى؟ (ماتاي 22:37—39) (مۇقاباداعى دە قاراڭىز.)
15 ۋاعىزداۋ — ەحوباعا جانە وزگەلەرگە دەگەن سۇيىسپەشىلىگىمىزدى كورسەتۋدىڭ تاماشا جولى (ماتاي 22:37—39 وقىڭىز). وسى جايلى ويلاساق، ۋاعىزداۋعا دەگەن ىنتامىز ارتادى. ويلاپ كورىڭىزشى، تاپسىرعان ٸسىن اتقارىپ جاتقانىمىزدى كورىپ ەحوبا سونداي قاتتى قۋانادى! ال ادامدار كيەلى كىتاپتى زەرتتەي باستاسا، ومىرلەرى باقىتقا تولادى. ونىڭ ۇستىنە، شىندىققا قۇلاق اسقاندار امان قالىپ، ماڭگى ٶمىر سۇرەدى (جوح. 6:40؛ ٴتىم. 1-ح. 4:16).
ەحوبا مەن وزگەلەرگە دەگەن سۇيىسپەنشىلىگىمىز جايلى ويلانۋ قىزمەتتە قۋانىشىمىزدى ارتتىرادى (15-ابزاستى قاراڭىز)
16. ۇيدەن شىعا الماعان جاعدايدا قىزمەتتەن قۋانىش الۋ مۇمكىن بە؟ مىسال كەلتىرىڭىز.
16 قانداي دا ٴبىر سەبەپتەرمەن ۇيدەن شىعا الماساڭىز، نە ىستەسەڭىز بولادى؟ «ەحوباعا جانە وزگەلەرگە دەگەن سۇيىسپەنشىلىگىمدى كورسەتۋ ٷشىن ٶز جاعدايىمدا نە ىستەي الامىن؟» دەپ ويلانىڭىز. مىسالى، سامۋيل مەن ايەلى دانيا 19-COVID پاندەمياسى كەزىندە ۇيدەن شىعا الماي قالعان. سول قيىن شاقتا ولار جۇيەلى تۇردە تەلەفونمەن ۋاعىزداعان، حاتتار جازعان جانە ”Zoom“ ارقىلى كيەلى كىتاپ زەرتتەۋ ساباقتارىن وتكىزگەن. سامۋيل قاتەرلى ىسىگىن ەمدەۋ ٷشىن اۋرۋحاناعا بارىپ جۇرگەندە دە كۋالىك بەرۋگە تىرىسقان. ول بىلاي دەيدى: «ونداي كەزدەرى جۇيكەڭ توزىپ، ٴتانىڭ شارشاپ، رۋحاني كۇيىڭ السىرەيدى، ٴبىر سوزبەن ايتقاندا، بارلىق جاعىنان ٴجۇنجىپ كەتەسىڭ. سوندىقتان ەحوباعا قىزمەت ەتۋدەن قۋانىش تابۋ وتە ماڭىزدى». جىعىلعانعا جۇدىرىق بولىپ، سول كەزدەرى دانيا دا قۇلاپ قالادى. ٴسۇيتىپ، ٷش اي توسەك تارتىپ جاتادى. كەيىن تاعى التى اي مۇگەدەكتەر ارباسىندا وتىرادى. ول بىلاي دەيدى: «جاعدايىما قاراي قولىمنان كەلگەننىڭ ٴبارىن ىستەۋگە تىرىستىم. ۇيگە كەلىپ جۇرگەن مەدبيكەگە ۋاعىزدادىم، ٵرتۇرلى تاپسىرىستارىمىزدى ۇيگە جەتكىزىپ جۇرگەن ادامدارمەن سويلەستىم. سونداي-اق مەديسينالىق كومپانيادا جۇمىس ىستەيتىن ٴبىر ايەلمەن تەلەفون ارقىلى سويلەسىپ تۇردىم». سامۋيل مەن دانيا مۇمكىندىكتەرى شەكتەۋلى بولسا دا، قولدان كەلگەنىن جاساپ، سودان قۋانىش الدى.
17. بۇل ماقالانىڭ بار پايداسىن كورۋ ٷشىن نە ىستەگەنىمىز ماڭىزدى؟
17 بۇل ماقالانىڭ بار پايداسىن كورۋ ٷشىن بەرىلگەن كەڭەستەردىڭ بارلىعىن بىردەي قولدانىڭىز. بۇل كەڭەستەردىڭ ٴارقايسىسىن تاماققا قوساتىن ازىق-تۇلىكپەن سالىستىرۋعا بولادى. قاجەتتى ازىق-تۇلىكتىڭ ٴبارىن قوسىپ دايىنداسا، وتە ٴدامدى تاماق شىعادى. تۋرا سولاي، بەرىلگەن كەڭەستەردىڭ ٴبارىن قولدانىڭىز، سوندا جاعىمسىز سەزىمدەردەن ارىلىپ، قىزمەتتەن الدەقايدا كوپ قۋانىش الاسىز.
قىزمەتىمىزدى قۋانىشپەن اتقارۋعا كەلەسى جايتتار قالاي كومەكتەسەدى؟
-
جاقسىلاپ دايىندالۋعا ۋاقىت ٴبولۋ
-
باتىلدىق سۇراپ دۇعا ەتۋ
-
ەحوبا مەن وزگەلەرگە دەگەن سۇيىسپەنشىلىگىمىز جايلى ويلانۋ
80-ٵن «ٴدامىن تاتىڭدار دا، ەحوبانىڭ ىزگىلىگىنە كوز جەتكىزىڭدەر»
