ٴسىز بىلگەنسىز بە؟
نەگە ٴداۋىت پاتشانىڭ اسكەرىندە جاتجەرلىكتەر دە قىزمەت ەتكەن؟
ٴداۋىتتىڭ اسكەرىندە امموندىق سەلەك، حەتتىك ۇريا، موابتىق يەتماح سياقتى جاتجەرلىكتەر بولعان a (شەج. 1-ج. 11:39، 41، 46). سونداي-اق ٴداۋىتتىڭ اسكەرىندە «كەرەتتىكتەر، پەلەتتىكتەر مەن عاتتىقتار» قىزمەت ەتكەن (سام. 2-ج. 15:18). كەرەتتىكتەر مەن پەلەتتىكتەر فىلىستىرلەردىڭ جاقىن تۋىستارى بولعانعا ۇقسايدى (ەزەك. 25:16). ال عاتتىقتار فىلىستىرلەردىڭ عات قالاسىنان شىققان بولۋى مۇمكىن (ەشۋا 13:2، 3؛ سام. 1-ج. 6:17، 18).
نەگە ٴداۋىت ٶز اسكەرىنە جاتجەرلىكتەردى العان؟ ٴداۋىت ولاردىڭ وزىنە، ەڭ باستىسى، ەحوباعا ادال ەكەندەرىنە سەنىمدى بولعان. مىسالى، كەرەتتىكتەر مەن پەلەتتىكتەرگە قاتىستى كيەلى كىتاپتىڭ ٴبىر سوزدىگىندە بىلاي دەلىنگەن: «ٴداۋىتتىڭ بيلىگىنىڭ ەڭ قيىن شاعىندا ولار وعان ادال بولعان» (”The New Interpreter’s Dictionary of the Bible“). ولار ادالدىقتارىن قالاي كورسەتتى؟ ەكى جاعدايعا توقتالايىق. ٴبىرىنشى، «كۇللى يسرايلدىكتەر» ٴداۋىتتى تاستاپ، «شەبا دەگەن ٴبىر بالەقۇمار كىسىنىڭ» بۇلىگىنە ەرگەندە، كەرەتتىكتەر مەن پەلەتتىكتەر ٴداۋىتتىڭ جاعىندا بولىپ، شەبانىڭ بۇلىگىن توقتاتۋعا كومەكتەستى (سام. 2-ج. 20:1، 2، 7). ەكىنشى، ٴداۋىتتىڭ ۇلى ادونياح تاقتى تارتىپ الۋعا تىرىسقاندا كەرەتتىكتەر مەن پەلەتتىكتەر داۋىتكە ادال بولىپ قالىپ، ەحوبا تاڭداعان سۇلەيمەن پاتشانى تاققا وتىرعىزدى (پات. 1-ج. 1:24—27، 38، 39).
داۋىتكە ادال بولعان تاعى ٴبىر جاتجەرلىك عاتتىق يتتاي ەدى. ٴداۋىتتىڭ ۇلى ابەسسالوم «حالىقتىڭ جۇرەگىن جاۋلاپ» اكەسىن تاقتان تۇسىرمەك بولعاندا، يتتاي ٶزىنىڭ 600 ساربازىمەن بىرگە ٴداۋىتتى قولدادى. يتتاي جاتجەرلىك بولعاندىقتان سوعىسپاسا دا بولار ەدى. ٴداۋىت تە وعان تۋرا سونى ايتتى. ٴبىراق بۇعان يتتاي: «ٴتىرى قۇداي ەحوبا مەن پاتشا يەمنىڭ الدىندا شىن ايتامىن، پاتشا اعزام قايدا بارسا، مەن دە سوندا بارامىن. قىزمەتشىڭىز سىزبەن بىرگە ولۋگە دە دايىن!»— دەپ جاۋاپ بەردى (سام. 2-ج. 15:6، 18—21).
يتتاي ەحوبانىڭ مايلانعان پاتشاسى داۋىتكە ادال بولدى
كەرەتتىكتەر، پەلەتتىكتەر مەن عاتتىقتار جاتجەرلىكتەر بولسا دا، ولار ەحوبانى شىنايى ٴتىرى قۇداي دەپ، ال ٴداۋىتتى ەحوبانىڭ مايلانعان پاتشاسى دەپ مويىنداعان. جانىندا وسىنداي ادال كىسىلەردىڭ بولعانىنا ٴداۋىتتىڭ ريزا بولعانى داۋسىز!
a مۇسانىڭ 5-جازباسى 23:3—6 تارماقتاردا جازىلعان زاڭعا ساي، «ەشبىر امموندىق تا، موابتىق تا ەحوبانىڭ قاۋىمىنىڭ مۇشەسى بولا المايتىن». بۇل دەگەنىمىز ولار زاڭدى تۇردە يسرايل ەلىنىڭ ازاماتى بولا الماعان جانە ولاردىكىندەي قۇقىقتارى بولماعان. ٴبىراق ولارعا يسرايلدىكتەرمەن بىرگە تۇرۋعا، ولارمەن ارالاسۋعا تيىم سالىنباعان. «كيەلى جازبالاردى ٴتۇسىنۋ» ەڭبەگىندەگى (حانزۇشا) «اممونيتيانە»/«براكي س يزرايلتيانامي» دەگەن تاقىرىپتى قاراڭىز.
