11-زەرتتەۋ ماقالاسى
129-ٵن تاباندى بولامىز
قيىندىقتا دا ەش بەرىلمەي قىزمەت ەتە الاسىز
«مەنىڭ ەسىمىم ٷشىن كوپ قيىنشىلىققا ٴتوزدىڭ» (ايان 2:3).
نەگىزگى وي
ٶزىمىزدىڭ نە وزگەنىڭ قاتەلىگىنە قاراماستان، ەحوباعا ٵرى قاراي دا قىزمەت ەتە الامىز.
1. ەحوبانىڭ ۇيىمىندا بولعانىمىزدىڭ ارقاسىندا قانداي باتالارعا كەنەلىپ ٴجۇرمىز؟
اسىرەسە سوڭعى كۇندەرى ەحوبانىڭ ۇيىمىندا بولۋ ٴبىر باقىت! دۇنيەدەگى جاعداي قيىنداپ جاتقاندا، بىزگە ٵردايىم كومەككە كەلەتىن باۋىرلاستارىمىز بار (ٴزاب. 133:1). سونداي-اق ەحوبانىڭ ارقاسىندا وتباسىمىزدا باقىت-بەرەكە بار (ەفەس. 5:33—6:1). ال وزىمىزگە كەلسەك، ەحوبانىڭ سيلاعان تۇسىنىگى مەن دانالىعىنىڭ ارقاسىندا جانتىنىشتىعىنا يەمىز.
2. ٴبىز نە ىستەۋىمىز كەرەك جانە نەگە؟
2 دەسە دە ەحوباعا ادال قىزمەت ەتە بەرۋىمىز ٷشىن كوپ كۇش سالۋىمىز كەرەك. ويتكەنى مۇنى قيىنداتاتىن جايتتار بار. مىسالى، كەيدە 1) باۋىرلاسىمىز رەنجىتەدى، 2) جۇبايىمىز رەنجىتەدى، 3) وزىمىزدەن كوڭىلىمىز قالاتىن كەزدەر بولادى، اسىرەسە ٴبىر قاتەلىكتى قايتا-قايتا جاساي بەرگەنىمىزدە. بۇل ماقالادا وسى ٷش قيىندىققا جەكە-جەكە توقتالىپ، كيەلى كىتاپتاعى ادال قىزمەتشىلەردەن نە ۇيرەنەتىنىمىزدى قاراستىرامىز.
باۋىرلاسىڭىز رەنجىتكەندە بەرىلمەڭىز
3. ەحوبانىڭ قىزمەتشىلەرى قانداي قيىندىققا كەزىگۋى مۇمكىن؟
3 قيىندىق. كەيبىر باۋىرلاستاردىڭ كەمشىلىكتەرى اشۋىمىزعا ٴتييۋى مۇمكىن. ال باسقالارى كوڭىلىمىزدى قالدىرۋى، ويلانباي ارەكەت ەتۋى نە دورەكىلىك تانىتۋى مۇمكىن. يا بولماسا ۇلگى ەتىپ جۇرگەن اقساقالدار قاتەلىك جاساپ قوياتىن شىعار. سوندايدا كەيبىرەۋلەر «مەن ٶزى شىنىمەن قۇدايدىڭ ۇيىمىندا ٴجۇرمىن بە» دەپ كۇماندانادى. ولار بەرىلمەي، قۇدايعا باۋىرلاستارمەن «يىق تىرەسە» قىزمەت ەتە بەرۋدىڭ ورنىنا رەنجىتكەن ادامدارمەن ارالاسپاي قويادى نە ٴتىپتى قاۋىمعا كەلمەي كەتەدى (ساف. 3:9). ٴبىراق بۇل دۇرىس پا؟ قازىر سونداي جاعدايعا كەزىككەن كيەلى كىتاپتاعى ٴبىر كەيىپكەردىڭ مىسالىن قاراستىرايىق.
4. ەلشى پاۋىل قانداي قيىندىقتارعا كەزىكتى؟
4 كيەلى كىتاپ كەيىپكەرى. ەلشى پاۋىل باۋىرلاستاردىڭ دا قاتەلەسەتىنىن مويىنداعان. مىسالى، ول يسانىڭ شاكىرتى بولىسىمەن-اق كەيبىر باۋىرلاستار ونىڭ سىرتىنان تون ٴپىشتى (ەل. ٸس. 9:26). كەيىنىرەك بىرەۋلەر ونىڭ سىرتىنان ٴسوز تاسىپ، ابىرويىنا داق تۇسىرمەك بولدى (قور. 2-ح. 10:10). ال بىردە پاۋىل ٴبىر اقساقالدىڭ وزگەنى سۇرىندىرەتىن قاتەلىك جاساعانىنا كۋا بولدى (عال. 2:11، 12). باسقا جولى ونىڭ جاقىن سەرىكتەسى مارقا ساپاردا ونى جارتى جولدان تاستاپ كەتتى (ەل. ٸس. 15:37، 38). وسى باۋىرلاستارعا قاتتى رەنجىپ، پاۋىل ولارمەن بەت كورىسپەي كەتسە بولار ەدى. ٴبىراق ول ولاردى ٵرى قاراي دا باعالى سانادى جانە ەحوباعا قىزمەت ەتۋىن دوعارمادى. سول جاعدايلاردا بەرىلمەۋگە پاۋىلعا نە كومەكتەستى؟
5. باۋىرلاستاردان ٷمىتىن ۇزبەۋگە پاۋىلعا نە كومەكتەستى؟ (قولوستىقتارعا 3:13، 14) (سۋرەتتى دە قاراڭىز.)
5 پاۋىل باۋىرلاستاردى جاقسى كورگەن. وسى سەزىمىنىڭ ارقاسىندا ول باۋىرلاستاردىڭ كەمشىلىكتەرىنەن گورى جاقسى قاسيەتتەرىنە كوبىرەك ٴمان بەرگەن. بۇعان قوسا، پاۋىل قولوستىقتارعا 3:13، 14 تە (وقىڭىز) ٶزى جازعان سوزدەرگە ساي ارەكەت ەتكەن. مىسالى، ٴبىرىنشى ميسسيونەرلىك ساپارىندا مارقا ونى تاستاپ كەتسە دە، ول رەنىش ساقتامادى. كەيىنىرەك، قولوستىقتارعا جازعان حاتىندا پاۋىل مارقانى «تىرەگىم» دەپ ماقتاپ، باعالايتىنىن كورسەتتى (قول. 4:10، 11). ال ريمدە تۇرمەدە وتىرعاندا مارقانى ٶزى شاقىرتتى (ٴتىم. 2-ح. 4:11). كورگەنىمىزدەي، پاۋىل باۋىرلاستارىنان ٷمىتىن ۇزبەگەن. ودان نە ۇيرەنەمىز؟
6، 7. باۋىرلاستاردىڭ كەمشىلىكتەرىنە قاراماستان، ولارعا سۇيىسپەنشىلىك تانىتا بەرۋگە نە كومەكتەسەدى؟ (جوحاننىڭ 1-حاتى 4:7)
6 ۇيرەنەرىمىز. ەحوبا ٴبىزدىڭ باۋىرلاستارعا بەرىلمەي سۇيىسپەنشىلىك تانىتا بەرگەنىمىزدى قالايدى (جوحاننىڭ 1-حاتى 4:7 وقىڭىز). ەگەر الدەكىم ماسىحشىگە لايىق ارەكەت ەتپەي جاتسا، ول ٴبىزدى ادەيىلەپ رەنجىتپەگەنىنە جانە كيەلى كىتاپ پرينسيپتەرىن ۇستانۋعا تىرىسىپ جۇرگەنىنە سەنىمدى بولايىق (ناق. س. 12:18). ەحوبا ادال قىزمەتشىلەرىن كەمشىلىكتەرىنە قاراماستان جاقسى كورەتىنىن ۇمىتپايىق. قاتەلەسكەنىمىزدە، ول بىزدەن باس تارتا سالمايدى، اشۋ دا ساقتامايدى (ٴزاب. 103:9). كەشىرىمدى اكەمىزگە ەلىكتەگەنىمىز قانشالىقتى ماڭىزدى دەسەڭىزشى! (ەفەس. 4:32—5:1).
7 مىنانى ۇمىتپايىق، وسى زاماننىڭ سوڭى تاياعان سايىن باۋىرلاستارمەن قارىم-قاتىناسىمىزدى نىعايتۋىمىز كەرەك. قۋعىن-سۇرگىن كۇشەيمەسە، ازايمايدى. سەنىمىمىز ٷشىن تۇرمەگە جابىلىپ جاتساق تا، تاڭعالمايمىز. سونداي جاعدايعا ٴتۇسىپ قالساق، باۋىرلاستارىمىزدىڭ كومەگىنە ٴزارۋ بولاتىنىمىز انىق (ناق. س. 17:17). يسپانياداعى جۋزەپ a دەگەن اقساقال باسقا ەر باۋىرلاستارمەن بىرگە بەيتاراپتىعى ٷشىن تۇرمەگە جابىلادى. ول بىلاي دەيدى: «تۇرمەدە وزىمىزبەن-ٶزىمىز، وڭاشا بولا المادىق. باۋىرلاستارمەن توپىرلاپ ٴبىر جەردە وتىردىق. ايتەۋىر بىرەۋدىڭ بىردەڭەسى ۇناماي، ىزاعا تيەتىن. بىزگە ٴبىر-بىرىمىزبەن سيىسىپ، كەڭ پەيىلمەن كەشىرۋدى ۇيرەنۋ قاجەت بولدى. وسىنىڭ ارقاسىندا تاتۋ بولدىق جانە ٴبىر-ٴبىرىمىزدى قامقورلاي الدىق. تۇرمەدە ٴبىزدىڭ توپتان باسقا ەشكىم ەحوباعا قىزمەت ەتپەيتىن. ٴبىر جاعدايدا جاراقات الىپ، قولىمدى تاڭىپ تاستادى دا، ەشتەڭە ىستەي الماي قالدىم. سول كەزدە قاسىمداعى ەر باۋىرلاستاردىڭ ٴبىرى كيىمىمدى جۋىپ، باسقا دا تىرلىكتەرىمدى ىستەپ ٴجۇردى. مەن اۋاداي قاجەت كەزدە شىنايى سۇيىسپەنشىلىككە بولەندىم». باۋىرلاستارىمىزبەن ارامىزدا قانداي قيىندىق بولماسىن، ولاردى قازىردەن شەشىپ العانىمىز دۇرىس!
جارىڭىز رەنجىتكەندە بەرىلمەڭىز
8. نەكەدەگىلەر قانداي قيىندىقتارعا كەزىگەدى؟
8 قيىندىق. بارلىق نەكەدە قيىندىقتار بار. كيەلى كىتاپتا نەكەلەسكەن جۇپتار «جاڭا قيىندىقتارعا كەزىگەتىنى» اشىق ايتىلادى (قور. 1-ح. 7:28). ويتكەنى نەكە — ەكى كەمەلسىز ادامنىڭ وداعى. ولاردىڭ مىنەزدەرى دە ٵرتۇرلى، ۇناتاتىن-ۇناتپايتىن نارسەلەرى، العان تاربيەلەرى مەن مادەنيەتتەرى دە ٵرتۇرلى بولۋى مۇمكىن. تويدان كەيىن ەشقاشان كورسەتپەگەن قىلىقتارىن كورسەتە باستاۋى مۇمكىن. وسىنىڭ بارلىعى نەكەگە سوققى بولىپ تيەدى. سوندايدا اركىم ٶز قاتەسىن مويىنداپ، قيىندىقتى ٴبىراۋىزدان شەشۋدىڭ ورنىنا كەي جۇپتار كىنانى ٴبىر-بىرىنە جاۋىپ جاتادى. اقىرىندا ولار بولەك تۇرۋى نە اجىراسا سالۋى مۇمكىن b. ٴبىراق بۇدان جاعدايلارى شىنىمەن جاقسارا ما؟ قازىر كيەلى كىتاپتان كۇيەۋى كۇن كورسەتپەسە دە، قۇدايعا ادالدىق ساقتاعان ٴبىر ايەلدىڭ مىسالىن قاراستىرايىق.
9. ابيگەل قانداي قيىندىق كوردى؟
9 كيەلى كىتاپ كەيىپكەرى. ابيگەل نابال دەگەن قاتال ٵرى جامان ادامنىڭ ايەلى بولاتىن (سام. 1-ج. 25:3). ونداي اداممەن ٴبىر شاڭىراقتىڭ استىندا تۇرۋ ادام توزگىسىز قيىن بولعان شىعار. نابالدان قۇتىلۋدىڭ مۇمكىندىگى تۋعاندا، ابيگەل نە ىستەدى؟ مىسالى، ٴداۋىت نابالدىڭ قورلىق سوزدەرى ٷشىن ونى قىرىپ جىبەرۋگە كەلگەندە، ابيگەل الىسقا قاشىپ كەتىپ، كۇيەۋىنىڭ ولگەنىن كۇتىپ وتىردى ما؟ (سام. 1-ج. 25:9—13) جوق، ابيگەل اراشا ٴتۇسىپ، داۋىتتەن نابالعا راقىم ەتۋىن ٶتىندى (سام. 1-ج. 25:23—27). ول نەگە بۇلاي ارەكەت ەتتى؟
10. نەكەدەگى قيىندىقتارىنا قاراماستان، ابيگەلگە بەرىلمەۋگە نە كومەكتەستى؟
10 ابيگەل ەحوبانى جاقسى كورگەن جانە نەكەنى ەحوبا سياقتى قۇرمەتتەگەن. ول العاشقى جۇپ ادام مەن حاۋانى قوسقاندا، قۇدايدىڭ ولارعا نە دەگەنىن جاقسى بىلسە كەرەك (مۇس. 1-ج. 2:24). نەكەنىڭ ەحوبا ٷشىن قاسيەتتى ەكەنىن بىلگەندىكتەن، ابيگەل قۇدايعا ۇنامدى بولۋدى ويلاعان. سوندىقتان ول ٷي ٸشىن، سونىڭ ىشىندە كۇيەۋىن دە امان الىپ قالۋ ٷشىن قولدان كەلگەننىڭ ٴبارىن ىستەدى. نابالدى ٴداۋىتتىڭ قىلىشىنان ساقتاپ قالۋ ٷشىن تەز ارەكەت ەتتى. ول وزگەنىڭ كۇناسىن ٶز موينىنا ارتۋعا دا دايىن بولدى. ەحوبا وسى قايسار، جانقيار ايەلدى قاتتى جاقسى كورگەنىندە داۋ جوق! ايەلدەر دە، كۇيەۋلەر دە ابيگەلدەن نە ۇيرەنە الادى؟
11. ا) ەحوبا ەرلى-زايىپتىلاردان نە كۇتەدى؟ (ەفەستىكتەرگە 5:33) ٵ) كارمەن باۋىرلاستان نە ۇيرەندىڭىز؟ (سۋرەتتى دە قاراڭىز.)
11 ۇيرەنەرىمىز. جۇبايىمىز قيىن ادام بولسا دا، ەحوبا بىزدەن نەكەنى قۇرمەتتەيدى دەپ كۇتەدى. ەرلى-زايىپتىلاردىڭ نەكەدەگى قيىندىقتاردى شەشۋ ٷشىن بارىن سالىپ جۇرگەندەرىن جانە ٴبىر-بىرىنە جانقيارلىق، سۇيىسپەنشىلىك پەن قۇرمەت تانىتىپ جۇرگەندەرىن كورگەندە، ەحوبا قاتتى ريزا بولادى (ەفەستىكتەرگە 5:33 وقىڭىز). مىسالى، كارمەن دەگەن ايەل نەكە قۇرعانىنا 6 جىل بولعاننان كەيىن كۋاگەرلەرمەن زەرتتەپ، سوسىن شومىلدىرۋ راسىمىنەن وتەدى. ول بىلاي دەيدى: «كۇيەۋىم كۋاگەرلەرمەن زەرتتەگەنىمدى مۇلدەم جاقتىرمادى. مەنى ەحوبادان قىزعانا باستادى. ول ماعان اۋىر سوزدەر ايتاتىن، تاستاپ كەتەمىن دەپ قورقىتاتىن». ٴبىراق كارمەن ەش بەرىلمەدى. ول 50-جىلدان بەرى كۇيەۋىن سۇيۋگە، قۇرمەتتەۋگە بارىن سالىپ كەلەدى. «كۇيەۋىمنىڭ قاس-قاباعىنا قاراپ، جۇمساق سويلەۋدى ۇيرەنۋ ٷشىن ماعان جىلدار كەتتى. نەكەمنىڭ ەحوباعا قاسيەتتى ەكەنىن بىلگەندىكتەن، ونى ساقتاۋ ٷشىن قولىمنان كەلگەننىڭ بارلىعىن جاساۋعا تىرىستىم. وسى جىلدارى قانداي قيىندىقتار تۋماسىن، نەكەمنەن ەشقاشان باس تارتقان ەمەسپىن، ويتكەنى مەن ەحوبانى جاقسى كورەمىن»،— دەيدى كارمەن c. مىناعان نىق سەنىمدى بولىڭىز: نەكەڭىزدە قانداي قيىندىقتار بولماسىن، ەحوبا ٴسىزدى قولدايدى، ەش بەرىلمەۋگە كومەكتەسەدى.
وزىڭىزدەن كوڭىلىڭىز قالعاندا بەرىلمەڭىز
12. اۋىر كۇنا جاساعاندا، قانداي كۇي كەشۋىمىز مۇمكىن؟
12 قيىندىق. اۋىر كۇنا جاساعاندا، «ەندى ٴبارى ٴبىتتى» دەپ وزىمىزدەن كۇدەر ٷزۋىمىز مۇمكىن. مۇنداي كۇيدى كيەلى كىتاپ «جارالى، كۇيزەلگەن جۇرەك» دەپ سيپاتتايدى (ٴزاب. 51:17). روبەرت دەگەن باۋىرلاستى الساق، ول قىزمەت كومەكشىسى بولۋ ٷشىن جىلدار بويى كوپ كۇش سالعان. ٴبىراق كەيىن ول اۋىر كۇنا جاسايدى. ەحوباعا وپاسىزدىق جاساعانىن تۇسىنگەن ول بىلاي دەيدى: «مەنى ار-ۇجدانىم قيناپ، ۇستىمنەن ٴبىر توننا جۇك باسىپ تۇرعانداي بولدى. ٸشىم ٴبۇرىپ، جان دۇنيەم ورتەندى. ەحوباعا ەڭىرەپ تۇرىپ دۇعا ەتتىم. سول كەزدەرى «ەحوبا ەندى مەنى ەستىمەيتىن شىعار، ەستىپ قايتسىن، مەن ونى ساتىپ كەتتىم عوي» دەپ ويلايتىنمىن». كۇنا جاساعاندا، كۇيزەلگەن جۇرەگىمىز «ەحوبا مەنەن كۇدەر ٷزدى» دەگەنگە يلاندىرۋى مۇمكىن. سوندىقتان ٴبىز دە وزىمىزدەن كۇدەر ۇزە باستاۋىمىز مۇمكىن (ٴزاب. 38:4). وسىنداي كۇيدە جۇرسەك، كيەلى كىتاپتاعى ٴبىر كەيىپكەردەن نە ۇيرەنە الاتىنىمىزدى كورەيىك.
13. پەتىر قانداي اۋىر كۇنا جاسادى جانە بۇعان نە الىپ كەلدى؟
13 كيەلى كىتاپ كەيىپكەرى. يسانىڭ ولەر الدىنداعى ٴتۇنى ەلشى پەتىر بىرنەشە قاتەلىك جاسادى. ولار ونىڭ ومىرىندەگى ەڭ ۇلكەن وكىنىشكە اكەپ سوقتىردى. الدىمەن، پەتىر وزىنە تىم سەنىمدى بولىپ، يساعا: «ٴسىزدى ٴتىپتى ٴبارى تاستاپ كەتسە دە، مەن تاستامايمىن»،— دەدى (مار. 14:27—29). سوسىن گەتسيماني باعىندا پەتىر سەرگەك وتىرماي، قايتا-قايتا ۇيىقتاپ كەتتى (مار. 14:32، 37—41). كەيىن ٴبىر توبىر ادامنان قورقىپ، يسانى تاستاپ، قاشىپ كەتتى (مار. 14:50). سوڭىندا ٷش رەت «يسانى تانىمايمىن» دەپ وتىرىك ايتتى. وسى وتىرىگىنە سەندىرۋ ٷشىن ٴتىپتى انت ٸشتى (مار. 14:66—71). قانشالىقتى اۋىر كۇنا جاساعانىن تۇسىنگەندە، پەتىر نە سەزىندى؟ ول ٶز-ٶزىن ۇستاي الماي، وكسىپ جىلاپ جىبەردى (مار. 14:72). بىرەر ساعاتتان كەيىن يسا ولىمگە كەسىلگەندە، كۇيرەگەن جانى ودان بەتەر سىزداعان شىعار. پەتىر ٶزىن تۇككە تۇرعىسىز، وڭباعان ادام ساناعان بولار.
14. پەتىرگە ەش بەرىلمەي، ەحوباعا قىزمەت ەتە بەرۋگە نە كومەكتەستى؟ (مۇقاباداعى سۋرەتتى قاراڭىز.)
14 پەتىرگە ەش بەرىلمەي، ٵرى قاراي دا قىزمەت ەتە بەرۋگە كومەكتەسكەن بىرنەشە جايت بار. بىرىنشىدەن، ول وزگەلەردەن وقشاۋلانعان جوق، قايتا، باۋىرلاستارعا بارىپ، ولاردان جۇبانىش تاپسا كەرەك (لۇقا 24:33). بۇعان قوسا، وعان قايتا تىرىلگەن يسا كورىندى. يسا مۇنى پەتىردى جىگەرلەندىرۋ ٷشىن ىستەسە كەرەك (لۇقا 24:34؛ قور. 1-ح. 15:5). سونداي-اق يسا اياۋلى دوسىن قاتەلىكتەرى ٷشىن سوكپەدى، قايتا، بۇرىنعىدان دا كوپ جاۋاپكەرشىلىك سەنىپ تاپسىردى (جوح. 21:15—17). پەتىر ٶزىنىڭ وتە اۋىر كۇنا جاساعانىن مويىندادى دا، ەش بەرىلمەي، ەحوباعا قىزمەت ەتۋىن جالعاستىرا بەردى. نەنىڭ ارقاسىندا؟ ول ۇستازى يسانىڭ ودان كۇدەر ۇزبەگەنىنە سەنىمدى بولدى. سونداي-اق باۋىرلاستارى وعان ۇزبەي قولداۋ كورسەتە بەرگەن ەدى. ٴبىز پەتىردەن نە ۇيرەنەمىز؟
15. ەحوبا ٴبىزدىڭ نە نارسەگە سەنىمدى بولعانىمىزدى قالايدى؟ (ٴزابۇر 86:5؛ ريمدىكتەرگە 8:38، 39) (سۋرەتتى دە قاراڭىز.)
15 ۇيرەنەرىمىز. ەحوبا ٴبىزدىڭ مىناعان سەنىمدى بولعانىمىزدى قالايدى: ول ٴبىزدى سۇيەدى جانە كەشىرۋگە دايىن تۇرادى (ٴزابۇر 86:5؛ ريمدىكتەرگە 8:38، 39 وقىڭىز). كۇنا جاساعاندا، ٶزىمىزدى جامان سەزىنەتىنىمىز كادىمگى نارسە. ٴبىراق ەحوبا ٴبىزدى جاقسى كورمەيدى، ەندى ول ٴبىزدى كەشىرمەيدى دەپ ويلاماۋىمىز كەرەك. ونداي كەزدەرى دەرەۋ كومەك ىزدەۋ كەرەك. الدىندا ايتىلعان روبەرت باۋىرلاس: «ازعىرۋعا ٶز كۇشىممەن توتەپ بەرە الامىن دەپ ويلاعاندىقتان، مەن كۇنا جاسادىم»،— دەيدى. ول اقساقالداردىڭ كومەگىنە جۇگىنۋ كەرەكتىگىن ٴتۇسىندى. «اقساقالدارعا جولىققانىم جاقسى بولدى. سول كەزدە مەن بىردەن ەحوبانىڭ مەنى جاقسى كورەتىنىن سەزىندىم. اقساقالدار مەنەن ٷمىتىن ۇزبەدى. ولاردىڭ ارقاسىندا ەحوبا مەنى تاستاپ كەتپەگەنىنە كوزىم جەتتى»،— دەيدى روبەرت. ٴبىز دە مىناعان سەنىمدى بولساق بولادى: كۇنالارىمىزعا وكىنسەك، اقساقالداردان كومەك ىزدەسەك جانە قاتەلىگىمىزدى قايتالاماۋعا نىق بەكىنسەك، ەحوبا ٴبىزدى جاقسى كورەدى جانە كەشىرەدى (جوح. 1-ح. 1:8، 9). وسىنى تۇسىنگەنىمىز سۇرىنگەندە نە ٴتىپتى قۇلاعاندا، وزىمىزدەن كۇدەر ۇزبەۋگە كومەكتەسەدى.
16. ەحوباعا ەش بەرىلمەي قىزمەت ەتۋگە نە ٷشىن بەكىندىڭىز؟
16 وسى سوڭعى كۇندەرى اتقارىپ جۇرگەن قىزمەتىمىزدى ەحوبا قاتتى باعالايدى. ونىڭ كومەگىمەن وزىمىزدەن دە، وزگەلەردەن دە كوڭىلىمىز قالعاندا، ەش بەرىلمەي قىزمەت ەتە الامىز. سونداي-اق باۋىرلاستار رەنجىتىپ قويعاندا، ولاردى كەشىرىپ، ولارعا دەگەن سۇيىسپەنشىلىگىمىزدى نىعايتا الامىز. نەكەڭىزدە قيىندىقتار تۋىنداعاندا، ولاردى شەشۋ ٷشىن بارىڭىزدى سالساڭىز، ەحوبانى سۇيەتىنىڭىزدى جانە نەكەنى قۇرمەتتەيتىنىڭىزدى كورسەتە الاسىز. ال كۇنا جاساپ قويعاندا، ەحوبادان كومەك ىزدەيىك، ول ٴبىزدى جاقسى كورەتىنىنە، كەشىرۋگە دايىن ەكەنىنە سەنىمدى بولايىق. سوندا ول قىزمەتىمىزدى ٵرى قاراي دا جالعاستىرا بەرۋگە كومەكتەسەدى. وسىلاي «جاقسىلىق جاساۋدان ەش تالماساق... ٶز ۋاقىتىندا ونىڭ ٶنىمىن ورامىز» (عال. 6:9).
مىنا قيىندىقتاردا ەش بەرىلمەي، ەحوباعا قىزمەت ەتە بەرۋگە نە كومەكتەسەدى:
-
باۋىرلاسىمىز رەنجىتكەندە؟
-
جارىمىز رەنجىتكەندە؟
-
وزىمىزدەن كوڭىلىمىز قالعاندا؟
139-ٵن جۇماقتا جۇرگەنىڭدى ەلەستەت
a كەيبىر ەسىمدەر وزگەرتىلگەن.
b قۇداي ٴسوزى ەرلى-زايىپتىنىڭ بولەك تۇرۋىن قۇپتامايدى. وندا بولەك تۇرۋ ەرلى-زايىپتىعا قايتا نەكە قۇرۋعا قۇقىق بەرمەيتىنى انىق ايتىلعان. الايدا كەيبىر ماسىحشىلەر سالماقتى سەبەپتەرمەن بولەك تۇرۋدى شەشۋى مۇمكىن. «ماڭگى باقي ٶمىردىڭ راقاتىن كورىڭىز!» كىتابىنىڭ «بولەك تۇرۋ» دەگەن 4-تۇسىندىرمەسىن قاراڭىز.
c وسىعان ۇقساس وقيعانى jw.org سايتىندا «جالعان تىنىشتىق جاڭىلدىرماسىن! داررەل جانە دەۆورا فريزەنگەر» دەگەن ۆيدەودان كورە الاسىز.