13-زەرتتەۋ ماقالاسى
بالاعا جاراتىلىستارعا قاراپ، ەحوبانى تانۋدى ۇيرەتىڭىز
«ونداعى جۇلدىزداردى كىم جاراتتى؟» (يشايا 40:26).
11-ٵن جاراتىلىستار ەحوبانى داڭقتايدى
اڭداتپا a
1. ٵربىر ٴماسىحشى اتا-انا نەنى قالايدى؟
ٵربىر ٴماسىحشى اتا-انانىڭ ارمان-تىلەگى — بالالارى ەحوبانى جاقىننان تانىپ، ونى جاقسى كورگەنى. ٴبىراق قۇداي كوزگە كورىنبەيدى عوي، ەندەشە، قالاي ٴسىز بالاڭىزعا ونىڭ شىنىمەن بار ەكەنىن كورە بىلۋگە جانە ونىمەن دوس بولۋعا كومەكتەسە الاسىز؟ (جاق. 4:8).
2. اتا-انالار بالالارىنا ەحوبانىڭ قاسيەتتەرىن قالاي تانىستىرا الادى؟
2 بالالاردى ەحوبا قۇدايعا جاقىنداتۋدىڭ بىردەن-ٴبىر جولى — ولارمەن كيەلى كىتاپتى زەرتتەۋ (ٴتىم. 2-ح. 3:14—17). ٴبىراق كيەلى جازبالاردا ەحوبا تۋرالى ٴبىلۋدىڭ تاعى ٴبىر جولى ايتىلعان. ناقىل سوزدەر كىتابىندا اكەسى ۇلىنا تابيعاتتان كورىنىس تاپقان ەحوبانىڭ قاسيەتتەرىن ەلەۋسىز قالدىرماۋدى ايتادى (ناق. س. 3:19—21). ولاي بولسا، اتا-انالار بالالارىنىڭ نازارىن جاراتىلىستارعا اۋدارا وتىرىپ، ەحوبا جايلى قالاي ٴتالىم بەرسە بولاتىنىن قاراستىرايىق.
جاراتىلىسقا نازار اۋدارىپ، قالاي ٴتالىم بەرۋگە بولادى؟
3. اتا-انا بالاسىنا نەنى كورۋگە كومەكتەسۋ كەرەك؟
3 قۇدايدىڭ «كوزگە كورىنبەيتىن قاسيەتتەرى... دۇنيە جاراتىلعاننان بەرى ايقىن. بۇلاردى ونىڭ جاراتىلىستارىنان كورىپ، تۇسىنۋگە بولادى»،— دەيدى كيەلى كىتاپ (ريم. 1:20). اتا-انالار، سىزدەر بالالارىڭىزبەن بىرگە دالادا سەرۋەندەگەندى ۇناتاسىزدار ما؟ سونداي كەزدەرى بالالارىڭىزعا ەحوبانىڭ جاراتىلىستارىنان ونىڭ تاماشا قاسيەتتەرىن كورۋگە كومەكتەسە الاسىزدار. وسى ورايدا يسا قانداي ۇلگى كورسەتكەنىن قاراستىرايىق.
4. يسا جاراتىلىستار ارقىلى شاكىرتتەرىنە قانداي ٴتالىم بەردى؟ (لۇقا 12:24، 27—30)
4 بىردە يسا شاكىرتتەرىنىڭ نازارىن قارعا مەن لالاگۇلگە اۋداردى (لۇقا 12:24، 27—30 وقىڭىز). سان الۋان جانۋارلار مەن وسىمدىكتەردىڭ ىشىنەن نەگە يسا ٴدال وسى قۇس پەن گۇلدى مىسالعا كەلتىردى؟ ويتكەنى شاكىرتتەرى ۇشىپ جۇرگەن قارعالار مەن دالادا ٶسىپ تۇرعان لالاگۇلدەردى كۇندە كورەتىن. سولار تۋرالى ايتىپ جاتقاندا يسا قولىمەن نۇسقاپ كورسەتكەن دە شىعار. ال سوسىن نە ىستەدى؟ قارعالاردى اسىراپ، ادەمى لالاگۇلدەردى كيىندىرگەنىندەي، ەحوبا ٶزىنىڭ ادال قىزمەتشىلەرىن تاماقپەن جانە كيىممەن مىندەتتى تۇردە قامتاماسىز ەتەتىنىن ايتتى. وسىلاي ەحوبانىڭ جومارت ٵرى مەيىرىمدى اكە ەكەنىن ۇمىتىلماستاي ەتىپ ۇيرەتتى.
5. بالالارىنا ەحوبا جايلى ٴتالىم بەرۋ ٷشىن اتا-انالار قانداي جاراتىلىستارعا نازار اۋدارسا بولادى؟
5 قىمباتتى اتا-انا، سىزدەر ٴدال وسى ٴتاسىلدى قالاي قولدانساڭىزدار بولادى؟ ٴسىز دە بالاڭىزعا وزىڭىزگە ەرەكشە ۇنايتىن جانۋار نەمەسە وسىمدىك جايلى ايتىپ بەرىڭىز. سوسىن مىندەتتى تۇردە ەحوبانىڭ ٴبىر قاسيەتىن اشىپ كەتۋدى ۇمىتپاڭىز. كەيىن ونىڭ وزىنە قانداي وسىمدىك يا جانۋار ۇنايتىنىن سۇراپ كورىڭىز. بالاڭىزعا ۇنايتىن جاراتىلىس ارقىلى ەحوبانىڭ قاسيەتتەرىن كورسەتسەڭىز، ول ٴسىزدى قىزىعا ٵرى مۇقيات تىڭدايدى.
6. كريستوفەردىڭ اناسىنان نە ۇيرەنەمىز؟
6 سوندا اتا-انالار ەحوبا جايلى ٴتالىم بەرەمىن دەپ قانداي دا ٴبىر جانۋار نە وسىمدىكتىڭ قىر-سىرىنىڭ ٴبارىن زەرتتەپ كەتۋ كەرەك پە؟ جوق، بۇلاي ەتۋ شارت ەمەس. بايقاساڭىز، يسا قارعالار نە جەيتىنىن، قالاي قورەكتەنەتىنىن، بولماسا گۇلدەردىڭ جاسۋشالىق قۇرىلىمىن ۇزاق ٴتۇسىندىرىپ جاتپاعان. ارينە، بالاڭىز بۇنداي تەرەڭ بىلىمگە قۇشتار دا شىعار، ٴبىراق كەيدە سول جاراتىلىستان ٴبىر بايقاعانىڭىزدى ايتقانىڭىز يا سۇراق قويعانىڭىزدىڭ ٶزى جەتكىلىكتى. مىسالى، كريستوفەر دەگەن باۋىرلاسىمىز بالالىق شاعىن ەسىنە الىپ بىلاي دەدى: «انام ٴبىر-ەكى اۋىز سوزبەن-اق اينالامىزداعى جاراتىلىستاردى باعالاي بىلۋگە ۇيرەتەتىن. مىسالى، تاۋ جاققا بارىپ قالساق، ول: — قاراشى، مىنا تاۋلار قانداي بيىك، قانداي ادەمى! ەحوبا كەرەمەت قۇداي، ٴيا؟— دەيتىن. ال مۇحيتتىڭ جاعاسىندا جۇرسەك: — مىنا تولقىنداردىڭ كۇشىن قاراشى! قۇداي قانداي قۇدىرەتتى، ٴيا؟— دەپ قوياتىن. انامىزدىڭ وسىنداي قاراپايىم، ٴبىراق ويلاندىراتىن سوزدەرى ماعان دا، باۋىرلارىما دا قاتتى ىقپال ەتتى».
7. بالالارىڭىزعا جاراتىلىسقا ٴمان بەرىپ قاراۋدى قالاي ۇيرەتە الاسىز؟
7 بالالارىڭىز وسە كەلە ولاردى جاراتىلىسقا كوبىرەك ٴمان بەرىپ، ەحوبانىڭ قاسيەتتەرىن تانۋدى ۇيرەتە الاسىز. بۇل ٷشىن قۇدايدىڭ كەرەمەت ٴبىر تۋىندىسىن مىسالعا الىپ: «وسىدان ەحوبا جايلى نە بىلۋگە بولادى؟»— دەپ سۇراپ كورىڭىز. ونىڭ ٴسىز كۇتپەگەن جاۋابىن ەستىگەندە، تاڭعالىپ قالاسىز (مات. 21:16).
جاراتىلىسقا نازار اۋدارىپ، قاشان ٴتالىم بەرۋگە بولادى؟
8. بالالارىمەن جول جۇرگەندە يسرايلدىك اتا-انالاردا قانداي مۇمكىندىك بولعان؟
8 يسرايلدىك اتا-انالار «جول جۇرگەندە دە» بالالارىنا ەحوبانىڭ زاڭ-تالاپتارىن ۇيرەتۋ كەرەك بولعان (مۇس. 5-ج. 11:19). ال يسرايل ەلىندەگى جولداردا ٵر ٴتۇرلى جانۋارلاردى، قۇستار مەن گۇلدەردى كورۋگە بولاتىن. سول كەزدە اتا-انالار ٷشىن بالالارىن ەحوبانىڭ جاراتىلىستارىنا قىزىقتىرۋدىڭ ورايى تۋاتىن. اتا-انالار، سىزدەردە دە جاراتىلىستارعا قاراپ، بالالارىڭىزعا ٴتالىم بەرەتىن وسىنداي مۇمكىندىكتەر بار. قازىر كەيبىر اتا-انالاردىڭ ۇلگىسىن قاراستىرايىق.
9. پۋنيتا مەن كاتيا باۋىرلاستاردىڭ سوزدەرىنەن نە ٴتۇيىپ الدىڭىزدار؟
9 ٷندىستاننىڭ ٸرى قالاسىندا تۇراتىن پۋنيتا ەسىمدى انا بىلاي دەيدى: «اۋىلعا تۋىستارىمىزعا بارعاندا، ەحوبانىڭ كەرەمەت جاراتىلىستارىن تاماشالاۋعا مۇمكىندىك اشىلادى. كوشەلەرى ىعى-جىعى، كولىكتەرى كەپتەلىپ جاتقان قالادان شىققاندا بالالارىمىز تابيعاتقا تەرەڭىرەك ۇڭىلەتىنىن بايقادىق». بالالار تابيعات اياسىندا اتا-انالارىمەن بىرگە وتكىزگەن ۋاقىتتى ادەتتە ەشقاشان ۇمىتپايدى. مولدوۆادا تۇراتىن كاتيا ەسىمدى باۋىرلاس وسىنى قوشتاپ بىلاي دەيدى: «بالا كەزىمدە اتا-اناممەن تابيعات اياسىندا وتكىزگەن ساتتەرىم كۇنى كەشەگىدەي ەسىمدە. اتا-انام بالا كۇنىمنەن باستاپ ەحوبانىڭ جاراتىلىستارىن دەن قويىپ باقىلاۋدى جانە سول ارقىلى ەحوبانىڭ قاسيەتتەرىن تانىپ-ٴبىلۋدى ۇيرەتكەنىنە قاتتى ريزامىن».
قالالى جەردە دە بالاڭىزعا ەحوبا جايلى ۇيرەتەتىن جاراتىلىستاردى تابۋعا بولادى (10-ابزاستى قاراڭىز)
10. قالانىڭ شەتىنە شىعۋعا مۇمكىندىگى بولماسا، اتا-انالار نە ىستەي الادى؟ (« اتا-انالارعا كومەكشى قۇرالدار» دەگەن قورشاۋدى قاراڭىز.)
10 ال ەگەر قالانىڭ سىرتىنا شىعىپ، تابيعاتتى تاماشالاۋعا مۇمكىندىك بولماسا شە؟ ٷندىستاندا تۇراتىن امول باۋىرلاسىمىز مىناداي ٴبىر ٴتيىمدى ٵدىسىن ايتتى: «ٴبىزدىڭ جاقتا اتا-انالار ەرتەدەن قارا كەشكە دەيىن جۇمىس ىستەيدى. ودان قالسا، بالالارىن قالانىڭ سىرتىنا الىپ شىعۋدى قالتالارى كوتەرە بەرمەيدى. دەسە دە امال جوق ەمەس. بالالاردى شاعىن ساياباققا اپارىپ يا بالكونعا شىعارىپ-اق ەحوبانىڭ جاراتىلىستارىن كورسەتىپ، ونىڭ قاسيەتتەرىن ايتىپ بەرۋگە بولادى». دەمەك، اينالامىزعا زەر سالىپ قاراساق، ۇيدەن الىسقا كەتپەي-اق بالالارىمىزعا كورسەتىپ، ەحوبا جايلى ٴتالىم بەرەتىن جاراتىلىستار كوپتەپ تابىلادى (ٴزاب. 104:24). مىسالى، قۇستار، قىبىرلاعان جاندىكتەر مەن وسىمدىكتەردىڭ ٴتۇر-ٴتۇرى بار. گەرمانيادا تۇراتىن كارينا: «مەنىڭ انام گۇلدەردى جاقسى كورەدى. كىشكەنتاي كەزىمدە مەنى ەرتىپ كەلە جاتىپ، ٴبىر ادەمى گۇلدى كورىپ قالسا، ماعان بىردەن كورسەتەتىن»،— دەيدى. بۇعان قوسا، ٴبىزدىڭ سايتىمىزدا جاراتىلىس تۋرالى ۆيدەولار مەن ادەبيەتتەر بار. سولاردى قولدانىپ تا بالالارىڭىزعا ٴتالىم بەرە الاسىزدار. ٴيا، جاعدايىمىز قانداي بولماسىن، بالالارىمىزدىڭ نازارىن ەحوبانىڭ جاراتىلىستارىنا اۋدارۋعا مۇمكىندىك جوق ەمەس. ال وسىلاي ەتكەندە ەحوبانىڭ قانداي قاسيەتتەرى تۋرالى ايتىپ بەرسەك بولادى؟
ەحوبانىڭ «كوزگە كورىنبەيتىن قاسيەتتەرى ايقىن»
11. بالالارى ەحوبانىڭ سۇيىسپەنشىلىگىن كورۋ ٷشىن اتا-انالار نە ىستەسە بولادى؟
11 بالاڭىز ەحوبانىڭ سۇيىسپەنشىلىگىن سەزىنۋ ٷشىن وعان قۇس ٶز بالاپانىن، مال ٶز ٴتولىن قالاي ايالاپ، باۋىرىنا باساتىنىن كورسەتسەڭىز بولادى (مات. 23:37). سونداي-اق اينالامىزداعى جاراتىلىستاردىڭ سان تۇرلىلىگى مەن ادەمىلىگىنە نازار اۋدارساڭىز بولادى. الدىڭعى ابزاستا ايتىلعان كارينا بىلاي دەيدى: «سەرۋەنگە شىققاندا انام مەنى توقتاتىپ، ٵربىر گۇلدىڭ وزىنشە ەرەكشە، وزىنشە سۇلۋ ەكەنىنە نازارىمدى اۋداراتىن. بۇل سۇلۋلىقتان ەحوبانىڭ سەنى جاقسى كورەتىنىن كورە ٴبىل دەيتىن. قانشاما جىل وتسە دە، مەن ٵلى كۇنگە دەيىن گۇلدەردىڭ سان الۋاندىعىنا، ٴپىشىنى مەن تۇسىنە تامسانىپ قارايمىن. ولارعا قاراعان سايىن، ەحوبا ٴبىزدى قاتتى جاقسى كورەتىنىن سەزىنەمىن».
قۇدايدىڭ دانالىعىن كورسەتۋ ٷشىن بالاڭىزعا دەنەمىزدىڭ قانداي كەرەمەت جاراتىلعانىن ايتساڭىز بولادى (12-ابزاستى قاراڭىز)
12. اتا-انالار بالالارىنا قۇدايدىڭ دانالىعىن قالاي تۇسىندىرە الادى؟ (ٴزابۇر 139:14) (سۋرەتتى دە قاراڭىز.)
12 جاراتىلىستارعا قاراپ ەحوبادان اسقان دانا تۇلعا جوق ەكەنىن تۇسىنەمىز. ەندەشە، بالاڭىزعا ونىڭ دانالىعىن دا كورە بىلۋگە كومەكتەسىڭىز (ريم. 11:33). مىسالى، قالاي سۋ كوككە كوتەرىلىپ، ماقتاداي بۇلتقا اينالادى، ال كەيىن بۇلتتار سول سۋدى ارقالاپ، ارى-بەرى قالىقتاپ كوشىپ جۇرەدى؟! (ٵيۇپ 38:36، 37). يا بولماسا ادامنىڭ دەنەسى تاماشا جاراتىلعانىنا كوڭىل اۋدارىڭىز (ٴزابۇر 139:14 وقىڭىز). ۆلاديمير باۋىرلاس وسى ٴتاسىلدى قولدانعان ەكەن: «ۇلىمىز بىردە ۆەلوسيپەدتەن قۇلاپ، تىزەسىن جاراقاتتاپ الدى. ەكى-ٷش كۇننەن كەيىن ونىڭ جاراسى تەز-اق جازىلىپ كەتتى. وسى جاعدايدى پايدالانىپ، ايەلىم ەكەۋمىز وعان: — قاراشى، ەحوبا ٴبىزدىڭ دەنەمىزدى ٶزىن ٶزى ەمدەي الاتىنداي ەتىپ جاراتقان. ال ادامدار ولاي جاساي المايدى. مىسالى، كولىك سىنىپ قالسا، ٶزىن-ٶزى جوندەي المايدى عوي. بايقادىڭ با، ەحوبا قانداي اقىلدى!— دەدىك. بۇل اڭگىمەدەن بالامىز ەحوبانىڭ دانا قۇداي ەكەنىن ٴتۇسىندى».
13. اتا-انالار بالالارىنا قۇدايدىڭ قۇدىرەتىن تۇسىنۋگە قالاي كومەكتەسە الادى؟ (يشايا 40:26)
13 ەحوبا ٴبىزدى اسپانعا كوز تاستاۋعا جانە قۇدىرەتىمەن جۇلدىزداردىڭ ٴبارىن ٶز ورنىندا قالاي ۇستاپ تۇرعانى جايلى ويلانۋعا شاقىرادى (يشايا 40:26 وقىڭىز). ٴسىز دە بالالارىڭىزدى جۇلدىزدارعا قاراپ وي تۇيۋگە تالپىندىرىڭىز. تايۆاندا تۇراتىن تين-تين ەسىمدى ايەل باۋىرلاس بالالىق شاعىنان بىلاي دەپ سىر شەرتەدى: «انام ەكەۋمىز تاۋعا شىعىپ، پالاتكادا تۇنەگەن كەزىمىز ەسىمدە. قالانىڭ جاساندى جارىقتارى كەدەرگى بولماعاندىقتان، تۇنگى اسپاندا جۇلدىزدار انىق كورىنىپ تۇردى. سول كەزدە انام: — مىنا جۇلدىزداردىڭ ٴبارىن جاراتقان ەحوبانىڭ قۇدىرەتى جايلى ويلانشى. ەحوبا سول قۇدىرەتىمەن ساعان مىندەتتى تۇردە كومەكتەسەتىنىن ۇمىتپا، سوندا سەن كەز كەلگەن سىناقتى جەڭىپ شىعا الاسىڭ،— دەدى. سول ۋاقىتتارى مەن قۇربى-قۇرداستارىمنان قىسىم كورىپ، ەحوباعا ادال بولىپ قالا المايتىن شىعارمىن دەپ ۋايىمداپ جۇرگەن ەدىم. ٴبىراق سول دەمالىستا ەحوبانى تاني تۇسۋگە ىقىلاسىم ارتتى ٵرى وعان قىزمەت ەتە بەرەمىن دەگەن شەشىمىم بەكي ٴتۇستى».
14. اتا-انالار بالالارىنا ەحوبانىڭ باقىتتى قۇداي ەكەنىن تۇسىنۋگە قالاي كومەكتەسسە بولادى؟
14 ەحوبانىڭ قولىنان شىققان تۋىندىلاردان ونىڭ كۇلكى-قۋانىشتى جاقسى كورەتىنىن بايقايمىز. عالىمدار جانۋارلاردىڭ كوبىسىنىڭ، سونىڭ ىشىندە قۇستار مەن بالىقتاردىڭ ويناي الاتىن قابىلەتى بار ەكەنىن ايتادى (ٵيۇپ 40:20). بالاڭىز كۇشىكتەردىڭ ٴبىر-ٴبىرىنىڭ ۇستىنە شىعىپ اۋناپ جاتقانىن، مىسىقتىڭ توقىما ٴجىپتىڭ ارتىنان قۋالاپ جۇرگەنىن كورگەندە ٴماز بولىپ كۇلگەن شىعار. ول تاعى ٴبىر جولى قانداي دا ٴبىر جانۋاردىڭ قىلىعىن قىزىقتاپ، كۇلىپ جاتسا، باقىتتى قۇدايعا قىزمەت ەتىپ جاتقانىمىزدى ەسىنە سالىپ قويىڭىز (ٴتىم. 1-ح. 1:11).
وتباسىڭىزبەن جاراتىلىستاردىڭ قىزىعىن كورىڭىزدەر
تابيعات اياسىندا بىرگە بولعاندا بالاڭىز ٶزىن ەركىن سەزىنىپ، سىزگە ىشىندەگىسىن ايتا الادى (15-ابزاستى قاراڭىز)
15. اتا-انالار بالالارىنىڭ كوڭىلىندە جۇرگەن ويلاردى قالاي بىلسە بولادى؟ (ناقىل سوزدەر 20:5) (سۋرەتتى دە قاراڭىز.)
15 كەيدە بالالار قيىندىقتارى مەن ۋايىمدارىن اتا-انالارىنا اشىلىپ ايتا بەرمەيدى. وسىندايدا ولاردىڭ ىشىندەگىسىن سۋىرىپ شىعارۋعا نە كومەكتەسەدى؟ (ناقىل سوزدەر 20:5 وقىڭىز). كەيبىر اتا-انالاردىڭ ايتۋىنشا، تابيعات اياسىندا جۇرگەندە بالالارى سىر شەرتۋگە بەيىم كەلەدى ەكەن. بۇنىڭ ٴبىر سەبەبى تابيعاتتا اتا-انالاردى دا، بالالاردى دا الاڭداتاتىن نارسەلەردىڭ ازىراق بولۋىندا. ال ەكىنشى سەبەبىن تايۆاندا تۇراتىن ماساحيكو ەسىمدى ەر باۋىرلاس ايتىپ بەردى: «دەمالۋعا شىققاندا، مىسالى تاۋعا كوتەرىلگەندە نە جاعاجايدا سەرۋەندەگەندە، بالالار وزدەرىن الدەقايدا ەركىن سەزىنەدى. سونداي كەزدە ولاردى اڭگىمەگە تارتىپ، ويلارىندا جۇرگەن نارسەنى ٴبىلىپ الۋعا بولادى». جوعارىدا ايتىلىپ كەتكەن كاتيا بولسا بىلاي دەيدى: «ساباقتان شىققان سوڭ، انام مەنى ادەمى ٴبىر ساياباققا الىپ كەتەتىن. سونداي وتە جايلى، مامىراجاي ورتادا مەكتەپتە نە بولعانىن، مەنى نە مازالايتىنىن ايتۋ جەڭىل بولاتىن».
16. وتباسىلارى بىرگە دەمالىپ، كوڭىلدى ۋاقىت وتكىزۋ ٷشىن نە ىستەسە بولادى؟
16 ەحوبانىڭ جاراتىپ بەرگەن تابيعاتىندا وتباسىلارى دەمالىپ، كوڭىلدى ۋاقىت وتكىزە الادى، وسىلايشا ارالارى جاقىنداي تۇسەدى. كيەلى كىتاپتا دا «كۇلەتىن ۋاقىت»، «بي بيلەيتىن» نەمەسە ويناپ، سەكىرەتىن ۋاقىت بار ەكەنى ايتىلعان (ۋاع. 3:1، 4). جاسامپاز اكەمىز ەحوبا وزىمىزگە ۇنايتىن ىستەرمەن اينالىسا الاتىن كوركەم جەرلەردى بەرىپ قويعان. مىسالى، كوپ وتباسىلار كوڭىلدى ۋاقىت وتكىزىپ، سەرگىپ قايتۋ ٷشىن، ساياباقتارعا، تاۋعا، سۋدىڭ جاعاسىنا يا اۋىلدى جەرلەرگە شىعىپ تۇرادى. ول جاقتا بالالار اسىر سالىپ وينايدى، جان-جانۋارلاردى باقىلايدى، سۋعا شومىلادى. اشىق اسپان استىندا ەحوبا جاراتقان سۇلۋ تابيعاتتىڭ راقاتىن كورىپ، دەمالا الاتىنىمىز قانداي تاماشا!
17. اتا-انالار نەلىكتەن بالالارىنا ەحوبانىڭ جاراتىلىسىنىڭ قىزىعىن كورۋدى ۇيرەتۋلەرى كەرەك؟
17 اتا-انالار مەن بالالار ەحوبانىڭ جاراتقاندارىنىڭ ناعىز قىزىعىن كورەتىن ۋاقىت الدا، ياعني قۇدايدىڭ جاڭا دۇنيەسىندە بولادى. ول كەزدە ٴبىز جانۋارلاردان ەش قورىقپايمىز، ولار دا بىزدەن ۇرىكپەيتىن بولادى (يشايا 11:6—9). سول كەزدە ەش ۋاقىت ساناماي، ەحوبانىڭ جاراتىلىستارىنىڭ قىزىعىن شەكسىز كورە بەرەمىز (ٴزاب. 22:26). ٴبىراق سول ۋاقىتتى كۇتپەي-اق، قازىردەن باستاپ بالالارىڭىزعا ەحوبانىڭ جاساعان تۋىندىلارىن قىزىقتاۋدى ۇيرەتە بەرىڭىز جانە سولار ارقىلى ەحوبا تۋرالى ٴتالىم بەرۋدى دە ۇمىتپاڭىز. سوندا ولار دا ٴداۋىت سياقتى شىن جۇرەكتەن: «ۋا، ەحوبا... سەنىكىندەي ىستەر جوق»،— دەپ ايتا الادى (ٴزاب. 86:8).
134-ٵن بالالار — قۇدايدىڭ اماناتى
a بالالىق شاقتارىندا اتا-اناسىمەن بىرگە تابيعات اياسىندا ۋاقىت وتكىزگەندەرى كوپ باۋىرلاستىڭ ٵلى كۇنگە دەيىن ەسىندە. سول كەزدەرى اتا-انالارى ولارعا ەحوبانىڭ قاسيەتتەرى جايلى ٴتالىم بەرگەن ەكەن. ٴسىز دە سول اتا-انالار سياقتى بالالارىڭىزعا جاراتىلىستار ارقىلى ەحوبانىڭ قاسيەتتەرىن تانىپ-ٴبىلۋدى قالاي ۇيرەتە الاسىز؟ بۇل ماقالادان سونى بىلەمىز.
