11-زەرتتەۋ ماقالاسى
شومىلدىرۋ راسىمىنە قالاي دايىندالۋ كەرەك؟
«شومىلدىرۋ راسىمىنەن وتۋىمە قانداي كەدەرگى بار؟» (ەل. ٸس. 8:36).
50-ٵن باعىشتالۋ دۇعاسى
اڭداتپا a
الەم بويىنشا جاستار مەن ۇلكەن كىسىلەر رۋحاني قادامدار جاساپ، شومىلدىرۋ راسىمىنەن ٶتىپ جاتىر (1، 2-ابزاستاردى قاراڭىز)
1، 2. شومىلدىرۋ راسىمىنەن وتۋگە ٵلى دايىن بولماساڭىز، نەگە مۇڭايۋدىڭ قاجەتى جوق؟ (مۇقاباداعى سۋرەتتى قاراڭىز.)
شومىلدىرۋ راسىمىنەن وتۋگە ىقىلاستى بولساڭىز، سىزگە «جارايسىز!» دەگىمىز كەلەدى، ويتكەنى بۇل — ومىردە ۇمتىلۋعا تۇرارلىق ەڭ كەرەمەت ماقسات. شومىلدىرۋ راسىمىنەن وتۋگە دايىنمىن دەپ ويلاساڭىز، ٵرى اقساقالدار دا بۇل شەشىمىڭىزدى قۇپتاسا، وندا جاقىن ارادا بولاتىن كونگرەسكە جوسپارلاي بەرىڭىز. وسىلايشا باقىت پەن قاناعاتقا تولى ٶمىر جولىنا اياق باساسىز.
2 ال ەگەر «ماعان شومىلدىرۋ راسىمىنەن وتۋگە ٵلى ەرتە، ٴبىراز رۋحاني ٶسۋىم كەرەك» دەپ ويلاساڭىز شە؟ نەمەسە بىرەۋ سىزگە وسىلاي ايتسا، نە ىستەسەڭىز بولادى؟ ەش مۇڭايماڭىز. قانداي جاستا بولساڭىز دا، رۋحاني العا باسىپ، وسى ماڭىزدى قادامدى جاساۋعا لايىق بولا الاسىز.
«قانداي كەدەرگى بار؟»
3. ەفيوپيالىق كىسى فىلىپكە نە دەدى جانە ٴبىز قانداي سۇراقتى قاراستىرامىز؟ (ەلشىلەردىڭ ىستەرى 8:36، 38)
3 ەلشىلەردىڭ ىستەرى 8:36، 38 وقىڭىز. ەفيوپيالىق ساراي قىزمەتكەرى ۋاعىزداۋشى فىلىپكە: «شومىلدىرۋ راسىمىنەن وتۋىمە نە كەدەرگى؟»— دەگەن. بۇل كىسى شومىلدىرۋ راسىمىنەن ٶتۋدى قاتتى قالاعان كورىنەدى. ٴبىراق ول وسى ماڭىزدى قادامدى جاساۋعا شىنىمەن دايىن بولدى ما؟
ەفيوپيالىق قىزمەتشى ەحوبا جايلى كوبىرەك بىلە بەرگىسى كەلگەن (4-ابزاستى قاراڭىز)
4. ەفيوپيالىق كىسى شىندىق جايلى ٴبىلىمىن مولايتا بەرگەنىن قايدان بىلەمىز؟
4 بۇل كىسى «يەرۋساليمگە قۇدايعا عيبادات ەتۋ ٷشىن» بارعان (ەل. ٸس. 8:27). دەمەك، وزگە ۇلتتىق بولسا دا، ول ياھۋدي ٴدىنىن قابىلداعان كورىنەدى. ول ەحوبا جايلى ەۆرەي جازبالارىنان بىلسە كەرەك. ەفيوپيالىق كىسى «باستى ىلىمدەردى بىلسەم جەتەدى» دەپ قويماي، كوبىرەك ٴبىلىم العىسى كەلگەن. بۇنى قايدان بىلەمىز؟ ٴفىلىپ ونى جولدا كەزدەستىرگەندە، ول نە ىستەپ وتىرعان ەدى؟ ول يشايا پايعامباردىڭ سوزدەرى جازىلعان شيىرشىقتى وقىپ وتىردى (ەل. ٸس. 8:28). ال بۇل كىتاپتا رۋحاني قاتتى تاعام جازىلعانىن ەسكەرسەك، ەفيوپيالىق كىسى تەرەڭ بىلىمگە قۇشتار بولعان دەي الامىز.
5. ەفيوپيالىق كىسى ٴبىلىم الىپ قانا قويماي، تاعى نە ىستەدى؟
5 بۇل كىسى «ەفيوپيالىق پاتشايىمنىڭ بۇكىل قازىناسىنا قارايتىن جوعارى لاۋازىمدى قىزمەتكەر» بولعان (ەل. ٸس. 8:27). دەمەك، ول موينىنا كوپ جاۋاپكەرشىلىك ارتىلعان جۇمىسباستى ادام بولعان. سوعان قاراماستان ەحوباعا عيبادات ەتۋگە ۋاقىت تاپقان. ول شىندىقتى ٴبىلىپ قانا قويماي، سوعان ساي ٶمىر سۇرگەن دەپ ايتا الامىز. نەگە؟ ويتكەنى ەفيوپيادان سوناۋ يەرۋساليمدەگى ەحوبانىڭ عيباداتحاناسىنا دەيىن ۇزاق جول ٴجۇرىپ بارعان. بۇنداي ساپار كوپ ۋاقىت پەن ٴبىراز شىعىندى تالاپ ەتسە دە، ەفيوپيالىق كىسى ەحوباعا عيبادات ەتۋ ٷشىن ەشتەڭەسىن اياماعان.
6، 7. ەفيوپيالىق كىسىنىڭ ەحوباعا دەگەن سۇيىسپەنشىلىگى قالاي كۇشەيە ٴتۇستى؟
6 ٴفىلىپ ەفيوپيالىق كىسىگە وتە ماڭىزدى شىندىقتاردى اشىپ، ٴماسىحتىڭ كىم ەكەنىن ٴتۇسىندىرىپ بەردى (ەل. ٸس. 8:34، 35). يسانىڭ ول ٷشىن قانداي قۇرباندىققا بارعانىن بىلگەندە، جۇرەگى تولقىپ كەتسە كەرەك. بۇدان كەيىن ول نە ىستەدى؟ ول ياھۋدي ٴدىنىن قابىلداعان ابىرويلى كىسى بولىپ قالا بەرسە بولار ەدى. ٴبىراق ەحوباعا دا، ونىڭ ۇلىنا دا سۇيىسپەنشىلىگى كۇشەيگەندىكتەن، ول بۇكىل ٶمىرىن وزگەرتەتىن شەشىم قابىلداۋعا دايىن بولدى. ول يسا ٴماسىحتىڭ شاكىرتى بولىپ، شومىلدىرۋ راسىمىنەن وتەمىن دەدى. دايىن ەكەنىن كورگەن ٴفىلىپ ونى شومىلدىرۋ راسىمىنەن وتكىزدى.
7 ەفيوپيالىق كىسى سياقتى ارەكەت ەتسەڭىز، ٴسىز دە شومىلدىرۋ راسىمىنەن وتۋگە دايىن بولاسىز. بۇل ٷشىن ول سياقتى مىنا ٷش قادامدى جاساۋىڭىز كەرەك: 1) ٴبىلىمدى مولايتۋ، 2) سول بىلىمگە ساي ارەكەت ەتۋ، 3) ەحوباعا دەگەن سۇيىسپەنشىلىكتى تەرەڭدەتە بەرۋ. قازىر وسى ٷش قادامدى جەكە-جەكە تالدايمىز.
ٴبىلىمىڭىزدى مولايتا بەرىڭىز
8. جوحان 17:3 ٴسىزدى نە ىستەۋگە شاقىرادى؟
8 جوحان 17:3 جانە سىلتەمەسىن وقىڭىز. يسانىڭ وسى سوزدەرى كەزىندە ٴسىزدى كيەلى كىتاپتى زەرتتەۋگە تالپىندىرعان با؟ كوبىمىزگە وسى سوزدەر قوزعاۋ سالعان. الايدا يسانىڭ ٴدال وسى سوزدەرى ٴبىلىمىمىزدى ٵرى قاراي دا مولايتا بەرۋگە شاقىرادى. ويتكەنى وندا جالعىز شىنايى قۇداي تۋرالى «ٴبىلىم الا بەرۋ كەرەكتىگى» ايتىلعان (ۋاع. 3:11). ٴبىز مۇنداي ٴبىلىمدى ماڭگىلىك بويى الامىز. ەحوبا قۇداي تۋرالى ٴبىلىمىمىز مولايعان سايىن، وعان جاقىنداي بەرەمىز (ٴزاب. 73:28).
9. نەگىزگى ىلىمدەرمەن تانىسقان سوڭ، ٵرى قاراي نە ىستەۋىمىز قاجەت؟
9 ارينە، ەحوبانى تانىپ-ٴبىلۋ ٷشىن سىزگە الدىمەن نەگىزگى ىلىمدەرمەن تانىسۋ قاجەت. ەلشى پاۋىل ەۆرەيلەرگە جازعان حاتىندا بۇل ىلىمدەردى «باستاپقى ىلىمدەر» دەپ اتاپ، كىشكەنتاي سابيگە ٴنار بولاتىن سۇتكە تەڭەگەن (ەۆر. 5:12؛ 6:1). ٴبىراق ول ٴبىزدى باستاپقى ىلىمدەرمەن شەكتەلىپ قانا قويماي، ودان دا تەرەڭ شىندىقتاردى بىلە بەرۋگە شاقىرعان. ال ٴسىز قۇداي ٴسوزىن تەرەڭىرەك قازۋعا ىنتا-ىقىلاسىڭىزدى ارتتىرىپ جاتىرسىز با؟ رۋحاني العا باسىپ، ەحوبا جايلى، ونىڭ نيەتى جايلى بىلە بەرگىڭىز كەلە مە؟
10. نەگە كەيبىر ادامدارعا وقىپ-زەرتتەۋ قيىن؟
10 كوپ ادام وقىپ-ىزدەنگەندى جاقتىرا بەرمەيدى. ال سىزگە قالاي؟ مىسالى، مەكتەپ قابىرعاسىندا جۇرگەندە وقىپ-ىزدەنۋدى ۇيرەندىڭىز بە؟ كىتاپتى قىزىعىپ وقىپ، كوپ نارسە بىلگەندى ۇناتقانسىز با؟ الدە، كەرىسىنشە، قينالعانسىز با؟ بالكىم وسى نە باسقا سەبەپتەرمەن ٴسىز «كىتاپ وقۋعا مۇلدەم جوقپىن» دەپ تۇجىرىمداعان شىعارسىز. ٴبىراق ەحوبا سىزگە كومەكتەسە الادى، ويتكەنى ول — الەمدەگى ەڭ كەرەمەت ٵرى كەمەلدى ۇستاز.
11. ەحوبانى نەگە «ۇلى تالىمگەر» دەيمىز؟
11 ەحوبا ٴبىزدىڭ «ۇلى تالىمگەرىمىز» (يشايا 30:20، 21). ول — مەيىرىمدى، شىدامدى، تۇسىنىگى مول ۇستاز. ەحوبا وقۋشىلارىنىڭ جاقسى جاقتارىن بايقاي بىلەدى (ٴزاب. 130:3). ولاردان شامالارى كەلمەيتىن نارسەنى تالاپ ەتپەيدى. ول بىزگە تاڭعاجايىپ سي — ميدى بەرگەنىن، بىلىمگە دەگەن قۇشتارلىق دارىتقانىن ۇمىتپايىق (ٴزاب. 139:14). جاراتۋشىمىز ٴبىزدىڭ ماڭگى باقي ٵرى قۇمارلانا ٴبىلىم الا بەرگەنىمىزدى قالايدى. سوندىقتان قازىردەن باستاپ كيەلى كىتاپتىڭ شىندىقتارىنا «قۇشتار بولۋدى» ۇيرەنىڭىز (پەت. 1-ح. 2:2). بۇل ٷشىن قولجەتىمدى ماقساتتار قويىپ، كيەلى كىتاپتى جۇيەلى تۇردە وقىپ-زەرتتەۋگە ۇمتىلا بەرىڭىز (ەشۋا 1:8). سوندا ەحوبا ٴسىزدىڭ كۇش سالعانىڭىزدى جارىلقاپ، ول تۋرالى وقىپ-بىلە بەرۋ سىزگە ۇناي تۇسەدى.
12. يسانىڭ ٶمىرى مەن قىزمەتىن زەرتتەگەنىمىز نەگە ماڭىزدى؟
12 جۇيەلى تۇردە ۋاقىت ٴبولىپ، يسانىڭ قالاي قىزمەت ەتىپ، قالاي ٶمىر سۇرگەنى تۋرالى وي جۇگىرتىڭىز. ويتكەنى اسىرەسە قازىرگى قيىن زاماندا يسانىڭ ىزىمەن تۋرا جۇرمەسەك، ەحوباعا قىزمەت ەتە المايمىز (پەت. 1-ح. 2:21). يسا ٶز شاكىرتتەرىنىڭ قيىندىق كورەتىنىن ايتىپ كەتكەن (لۇقا 14:27، 28). ٴبىراق ولار دا ٶزى سياقتى، سوڭىنا دەيىن ەحوباعا ادال بولىپ قالاتىنىنا سەنىمدى بولعان (جوح. 16:33). ەندەشە، يسانىڭ ٶمىر جولىن تىڭعىلىقتى زەرتتەپ، كۇندەلىكتى ومىرىڭىزدە وعان ەلىكتەۋگە كۇش سالىڭىز.
13. ەحوبادان نەنى سۇراي بەرۋىڭىز كەرەك جانە نەگە؟
13 ارينە، قۇر ٴبىلىمنىڭ ٶزى جەتكىلىكسىز، ويتكەنى ٴبىلىم الۋداعى باستى ماقساتىمىز — ەحوبا جايلى كوبىرەك ٴبىلۋ جانە ونى ودان سايىن جاقسى كورىپ، وعان دەگەن سەنىمىمىزدى كۇشەيتۋ (قور. 1-ح. 8:1—3). سوندىقتان ٴبىلىمىڭىزدى ارتتىرۋمەن قاتار، دۇعادا ەحوبادان «سەنىمىمدى ۇلعايتۋعا كومەكتەسشى» دەپ سۇراڭىز (لۇقا 17:5). ول ٴسىزدىڭ دۇعاڭىزعا قۋانا-قۋانا جاۋاپ بەرىپ، مول سەنىم بەرەدى. ناتيجەسىندە تۋرا بىلىمگە نەگىزدەلگەن سەنىمىڭىز ٴسىزدى العا باسىپ، ارەكەت ەتۋگە تالپىندىرادى (جاق. 2:26).
ٴبىلىمىڭىزدى ىسكە جاراتا بەرىڭىز
توپان سۋ كەلگەنشە، نۇح پەن ونىڭ وتباسى بىلگەندەرىنە ساي ارەكەت قىلدى (14-ابزاستى قاراڭىز)
14. ەلشى پەتىر العان بىلىمىمىزگە ساي ارەكەت ەتۋ كەرەكتىگىنىڭ ماڭىزدىلىعىن قالاي كورسەتتى؟ (سۋرەتتى دە قاراڭىز.)
14 ەلشى پەتىر بىلگەندەرىمىزگە ساي ارەكەت ەتە بەرۋدىڭ ماڭىزدىلىعىن كورسەتكەن. ول كيەلى كىتاپتا ايتىلعان نۇحتىڭ وقيعاسىن كەلتىرگەن. ەسىمىزدە بولسا، ەحوبا سول زامانداعى زۇلىم ادامداردى جويۋ ٷشىن توپان سۋ جىبەرەتىنىن نۇحقا ايتقان. ٴبىراق توپان سۋدىڭ بولاتىنىن قۇر ٴبىلىپ قويعاننان نۇح پەن وتباسى امان قالماس ەدى. سوندا ولار نە ىستەدى؟ ەلشى پەتىر «توپان سۋ كەلگەنشە، كەمە سوعىلىپ جاتقانىن» ايتقان (پەت. 1-ح. 3:20). دەمەك، نۇح پەن وتباسى قۇدايدان ەستىگەندەرىنە ساي ارەكەت ەتىپ، ۇلكەن كەمە سوققان (ەۆر. 11:7). ولاردىڭ بۇل ارەكەتىن پەتىر شومىلدىرۋ راسىمىنە تەڭەپ، بىلاي دەگەن: «بۇل جايت — قازىر سەندەردى... قۇتقارىپ جاتقان نارسە، ياعني شومىلدىرۋ ٴراسىمى» (پەت. 1-ح. 3:21). نۇح پەن ونىڭ وتباسى كەمەنى سوعۋ ٷشىن ٴبىراز جىلدار ەڭبەك ەتكەنىن شومىلدىرۋ راسىمىنە دايىن بولۋ ٷشىن ارەكەت ەتۋگە ۇقساتساق بولادى. ال شومىلدىرۋ راسىمىنە دايىن بولۋ ٷشىن سىزگە نە ىستەۋ قاجەت؟
15. كۇنالارىڭىزعا شىن جۇرەكتەن وكىنەتىنىڭىزدى قالاي كورسەتەسىز؟
15 الدىمەن، كۇنالارىڭىزعا شىن جۇرەكتەن وكىنۋىڭىز قاجەت (ەل. ٸس. 2:37، 38). شىن وكىنگەن ادام شىن وزگەرەدى. مىسالى، ٴسىز ازعىندىق، تەمەكى شەگۋ، بوعاۋىز يا قورلىق سوزدەر ايتۋ سياقتى ەحوباعا ۇنامايتىن ىستەردى تاستادىڭىز با؟ (قور. 1-ح. 6:9، 10؛ قور. 2-ح. 7:1؛ ەفەس. 4:29). ٵلى ارىلماعان بولساڭىز، جاقسى جاققا وزگەرۋ ٷشىن ەش بەرىلمەي، تىرىسا بەرىڭىز. وسى جايىندا وزىڭىزبەن زەرتتەيتىن باۋىرلاسپەن سويلەسسەڭىز، يا بولماسا اقساقالداردان كومەك سۇراساڭىز بولادى. ال ەگەر سەن ٵلى اتا-اناڭمەن تۇرىپ جاتقان جاس قىز يا جىگىت بولساڭ، ولاردان: «شومىلدىرۋ راسىمىنەن وتۋگە لايىقتى بولۋ ٷشىن مىنا جامان ادەتىمنەن قالاي ارىلسام بولادى؟»— دەپ كومەك سۇراپ كور.
16. قانداي رۋحاني ىستەردى ادەتكە اينالدىرۋىمىز كەرەك؟
16 سونىمەن قاتار، رۋحاني ىستەرمەن اينالىسۋدى ادەتكە اينالدىرعان دا ماڭىزدى. بۇعان قاۋىم كەزدەسۋلەرىنە بارىپ، تۇسىنىكتەمەلەر بەرۋ جاتادى (ەۆر. 10:24، 25). ال جاريالاۋشى بولعاننان كەيىن، ۋاعىز ىسىنە جۇيەلى تۇردە قاتىسىپ تۇرىڭىز. قىزمەتكە كوبىرەك شىققان سايىن، ۋاعىزداۋ سىزگە ۇناي تۇسەدى (ٴتىم. 2-ح. 4:5). اتا-اناڭمەن تۇرىپ جاتقان جاس جەتكىنشەك بولساڭ، بىلاي دەپ ويلانىپ كور: «قاۋىمعا يا قىزمەتكە اتا-انامنىڭ ايتۋىمەن عانا بارامىن با، الدە ٶز ەركىممەن بە؟» رۋحاني ىستەردى ٶز قالاۋىڭمەن اتقارعانىڭ ەحوباعا سەنەتىنىڭدى، ونى سۇيەتىنىڭدى جانە وعان دەگەن ريزاشىلىعىڭدى كورسەتەدى. «قۇدايعا شىن بەرىلگەن ادامدارعا ٴتان» وسى ارەكەتتەر — ٴبىزدىڭ ەحوباعا ۇسىناتىن سيىمىز (پەت. 2-ح. 3:11؛ ەۆر. ). ەشكىم يتەرمەلەمەي-اق، ٶز قالاۋىمىزبەن ۇسىناتىن سيلار ەحوباعا قاتتى ۇنايدى ( 13:15قورىنتتىقتارعا 2-حات 9:7 سالىستىرىڭىز). ەحوباعا ەڭ جاقسىمىزدى بەرگەندە ٶزىمىز دە باقىت سەزىنەمىز.
ەحوباعا دەگەن سۇيىسپەنشىلىگىڭىز ارتا بەرسىن
17، 18. قيىندىقتاردان ٶتىپ، شومىلدىرۋ راسىمىنە دايىن بولۋ ٷشىن قانداي قاسيەتتىڭ بولعانى وتە ماڭىزدى جانە نەلىكتەن؟ (ناقىل سوزدەر 3:3—6)
17 ٴسىز شومىلدىرۋ راسىمىنەن وتكەنگە دەيىن ٴتۇرلى قيىندىقتارعا تاپ بولاسىز. وزگەلەر ٴسىزدى باسقا دىنگە كىرىپ كەتتى دەپ كەلەكە-مازاق ەتۋى، ٴتىپتى قارسى شىعىپ، قۋعىنداۋى دا مۇمكىن (ٴتىم. 2-ح. 3:12). نەمەسە جامان ٴبىر ادەتىڭىزدى ەندى جەڭدىم بە دەگەندە، وعان قايتادان بەرىلىپ قالۋىڭىز مۇمكىن. يا بولماسا شومىلدىرۋ راسىمىنەن ٶتۋ ماقساتىڭىز ازىرگە قول جەتىمسىز بولىپ كورىنگەندىكتەن، شىدامىڭىز تاۋسىلىپ، ىشتەي قىنجىلاتىن شىعارسىز. ٴبىراق ەحوبانى شىن جاقسى كورسەڭىز، وسى سىناقتاردىڭ بارىنەن وتە الاسىز.
18 سىزدە بار ەڭ ادەمى، ەڭ اسىل قاسيەت — ەحوباعا دەگەن سۇيىسپەنشىلىگىڭىز (ناقىل سوزدەر 3:3—6 وقىڭىز). ەحوبانى قاتتى جاقسى كورگەن سايىن، كەز كەلگەن قيىندىققا تايسالماي توتەپ بەرە الاسىز. كيەلى كىتاپتا ەحوبانىڭ قىزمەتشىلەرىنە دەگەن اينىماس سۇيىسپەنشىلىگى جايىندا كوپ ايتىلادى. بۇل قاسيەت ەحوبانىڭ ٶز قىزمەتشىسىنە قاتتى باۋىر باسىپ، ونى ەشقاشان ورتا جولدان تاستامايتىنىن جانە سۇيىسپەنشىلىگىن ەشقاشان سوندىرمەيتىنىن بىلدىرەدى (ٴزاب. 100:5). قۇدايعا ۇقساس جاراتىلعاندىقتان، ٴسىز دە وسىنداي سۇيىسپەنشىلىك تانىتا الاسىز (مۇس. 1-ج. 1:26). قالاي؟
ەحوباعا كۇن سايىن ريزاشىلىعىڭىزدى ٴبىلدىرىپ وتىرىڭىز (19-ابزاستى قاراڭىز) b
19. ەحوبانىڭ ٴسىز ٷشىن جاساعان بارلىق جاقسىلىعىنا ريزاشىلىعىڭىزدى قالاي ارتتىرساڭىز بولادى؟ (عالاتتىقتارعا 2:20)
19 بىرىنشىدەن، ەحوباعا دەگەن ريزاشىلىعىڭىزدى ارتتىرىڭىز (سال. 1-ح. 5:18). كۇن سايىن «ەحوبا مەنى جاقسى كورەتىنىن بۇگىن قالاي كورسەتتى؟» دەپ ويلانىڭىز. سوسىن دۇعادا سول جاقسىلىقتارىن اتاپ ٶتىپ، ەحوباعا العىس ٴبىلدىرۋدى ۇمىتپاڭىز. وسى جاقسىلىقتارىن ەحوبا ٴدال ٴسىز ٷشىن، ٴسىزدى جاقسى كورگەندىكتەن جاساپ جاتقانىن ەلشى پاۋىل سياقتى اڭعارا ٴبىلىڭىز (عالاتتىقتارعا 2:20 وقىڭىز). «مەن دە ونى سۇيەتىنىمدى كورسەتەمىن بە؟» دەپ ويلانىڭىز. ەحوبانى سۇيسەڭىز، ەشقانداي ازعىرۋعا بەرىلمەيسىز جانە قيىندىقتاردىڭ بارىنە تاباندىلىقپەن توتەپ بەرەسىز. سونىمەن قاتار ەحوبانى سۇيەتىنىڭىزدى ٵر كۇنى دالەلدەپ، رۋحاني ادەتتەردەن دە ەش اينىمايسىز.
20. ەحوباعا باعىشتالۋ ٷشىن نە ىستەۋ كەرەك جانە بۇل شەشىم قانشالىقتى ماڭىزدى؟
20 ٴسۇيتىپ، كەلە-كەلە سۇيىسپەنشىلىگىڭىز ٴسىزدى وتە ماڭىزدى ٴبىر قادام جاساۋعا قوزعاۋ سالادى. ٴسىز ٶمىرىڭىزدى ەحوباعا باعىشتاۋدى ۋادە ەتىپ، ەرەكشە ٴبىر دۇعا ايتاسىز. ەحوباعا باعىشتالعاننان كەيىن ٴسىزدى كەرەمەت جارقىن بولاشاق كۇتىپ تۇر: ٴسىز ەندى ماڭگىلىككە ونىڭ مەنشىگىسىز. بۇل ۋادە ٶمىردىڭ ىستىق-سۋىعىندا دا وعان قىزمەت ەتە بەرەتىنىڭىزدى بىلدىرەدى. بۇل — ٴبىر بەرگەندە، ماڭگىلىككە بەرىلەتىن ۋادە. ونى قايتادان جاڭارتىپ وتىرۋدىڭ قاجەتى بولمايدى. بۇل وتە جاۋاپتى ٵرى ماڭىزدى شەشىم ەكەنى راس. ٴبىراق ول ومىرىڭىزدە قابىلدايتىن ەڭ كەرەمەت، ەش وكىندىرمەيتىن شەشىم بولماق (ٴزاب. 50:14). ارينە، شايتان مىنسىزدىگىڭىزدەن تايىپ كەتۋىڭىز ٷشىن اكەڭىزگە دەگەن سۇيىسپەنشىلىگىڭىزدى سۋىتۋعا تىرىسادى. ٴبىراق وعان ەشقاشان دا دەس بەرمەڭىز! (ٵيۇپ 27:5). ەحوباعا دەگەن ىستىق سۇيىسپەنشىلىگىڭىز بولسا، وعان باعىشتالعاندا بەرگەن ۋادەڭىزدە بەرىك تۇرا الاسىز ٵرى وعان ودان بەتەر جاقىنداي تۇسەسىز.
21. نەگە شومىلدىرۋ ٴراسىمى سوڭى ەمەس، باستاماسى دەپ ايتا الامىز؟
21 ٶمىرىڭىزدى دۇعادا ەحوباعا باعىشتاعان سوڭ، كەلەسى قادامدى جاساۋ ٷشىن قاۋىمىڭىزداعى اقساقالدارعا جولىعىڭىز. ٴبىراق شومىلدىرۋ ٴراسىمى مارە سىزىعى ەمەس، ەحوباعا ماڭگى قىزمەت ەتەمىن دەگەن ٶمىر جولىڭىزدىڭ باستاماسى عانا. ەندەشە، قازىردەن اكەڭىزگە دەگەن سۇيىسپەنشىلىگىڭىزدى تەرەڭدەتە بەرىڭىز. وسى سۇيىسپەنشىلىگىڭىزدى كۇننەن-كۇنگە نىعايتاتىن ماقساتتارعا ۇمتىلىڭىز. سوندا شومىلدىرۋ راسىمىنەن وتۋگە تالپىناسىز. ٴسىز شومىلدىرۋ راسىمىنەن وتەتىن كۇن ەرەكشە شۋاقتى كۇن بولماق! ٴبىراق بۇل تەك باستاماسى ەكەنىن ۇمىتپاڭىز. لايىم ەحوبا مەن ونىڭ ۇلىنا دەگەن سۇيىسپەنشىلىگىڭىز ماڭگى باقي وسە بەرسىن!
135-ٵن ەحوبانىڭ شاقىرۋى: «اقىلدى بول، بالام»
a شومىلدىرۋ راسىمىنەن وتكىسى كەلەتىن ادامنىڭ نيەتى دۇرىس بولۋ كەرەك. سونداي-اق ارەكەتتەرى دە دۇرىس بولعانى ٴجون. وسى ماقالادا ەفيوپيالىق ساراي قىزمەتكەرىنىڭ ۇلگىسىن قاراستىرا وتىرىپ، شومىلدىرۋ راسىمىنەن وتكىسى كەلەتىن زەرتتەۋشى قانداي قادامدار جاساۋى كەرەكتىگىن بىلەمىز.
b سۋرەت سيپاتتاماسى: جاس قىز باۋىرلاس ەحوبانىڭ قامقورلىعىنا ريزاشىلىعىن ٴبىلدىرىپ دۇعا ەتىپ تۇر.