10-زەرتتەۋ ماقالاسى
نەگە شومىلدىرۋ راسىمىنەن ٶتۋ قاجەت؟
«ٵربىرىڭىز... شومىلدىرۋ راسىمىنەن ٶتىڭىز» (ەل. ٸس. 2:38).
34-ٵن مىنسىزدىك جولىمەن ٴجۇرۋ
اڭداتپا a
1، 2. ادام شومىلدىرۋ راسىمىنەن وتكەندە نە بولاتىنىن سيپاتتاپ بەرىڭىز جانە بۇل ماقالادا نە نارسەگە كوڭىل بولەمىز؟
ٴسىز كونگرەستە شومىلدىرۋ راسىمىنەن وتۋگە ۇمىتكەر جانداردى كورگەنسىز بە؟ ارنايى بايانداماداعى ەكى سۇراققا ولاردىڭ نىق سەنىممەن «ٴيا» دەپ جاۋاپ بەرگەندەرىن ەستىگەن شىعارسىز. سوندا ولاردىڭ جاقىندارى مەن دوستارى ٴماز-مەيرام بولىپ، كەۋدەلەرىن ماقتانىش كەرنەيدى. ۇمىتكەرلەر سۋدان شىققاندا، قورشاپ تۇرعان حالايىق دۋ قول شاپالاق ۇرىپ قۋانادى. شومىلدىرۋ راسىمىنەن وتكەندەردىڭ جۇزدەرى بال-بۇل جايناپ، نۇر شاشىپ تۇرادى. وسىلاي اپتاسىنا مىڭداعان ادام ەحوبا قۇدايدىڭ باعىشتالعان ٵرى شومىلدىرۋ راسىمىنەن وتكەن كۋاگەرى بولىپ جاتىر.
2 ٴسىز دە شومىلدىرۋ راسىمىنەن ٶتۋدى ويلاپ ٴجۇرسىز بە؟ ەندەشە، ٴسىز تۇنەك باسقان مىنا زۇلىم دۇنيەدە جارقىراپ تۇرعان جۇلدىز سياقتىسىز، ويتكەنى «ەحوبانى ىزدەپ» ٴجۇرسىز (ٴزاب. 14:1، 2). جاسىڭىز ۇلكەن يا كىشى بولسىن، وسى ماقالا سىزگە ارناپ جازىلعان. ال شومىلدىرۋ راسىمىنەن ٶتىپ قويعان بولساڭىز، وسىنداعى ويلار ەحوباعا ماڭگى قىزمەت ەتەمىن دەگەن شەشىمىڭىزدى بەكەمدەي تۇسەدى. ولاي بولسا، ەحوباعا قىزمەت ەتۋدىڭ تاماشا سەبەپتەرىنىڭ ۇشەۋىنە كوڭىل بولەيىك.
شىندىق پەن ادىلدىكتى سۇيەسىز بە؟
شايتان مىڭداعان جىلدان بەرى ەحوبانىڭ جاقساتىنا كۇيە جاعىپ كەلەدى (3، 4-ابزاستاردى قاراڭىز)
3. ەحوبانىڭ حالقى شىندىق پەن ادىلدىكتى نەگە سۇيەدى؟ (ٴزابۇر 119:128، 163)
3 ەحوبا ٶزىنىڭ قىزمەتشىلەرىنە «شىندىقتى جاقسى كورىڭدەر» دەپ تالاپ قويعان (زاك. 8:19). يسا دا ٴبىزدى ادىلدىكتى اڭساپ، سوعان ۇمتىلۋعا شاقىرعان (مات. 5:6). دەمەك، ەحوبانىڭ الدىندا دۇرىس، تازا ٵرى يگى ارەكەتتەردى ىستەۋگە ادامنىڭ ىستىق ىقىلاسى بولۋ كەرەك. ٴسىز شىندىق پەن ادىلدىكتى جاقسى كورەسىز بە؟ سولاي ەكەنىنە سەنىمدىمىز. دەمەك، ٴسىز وتىرىكتى، جامان ٵرى زۇلىم ىستەردىڭ بارلىعىن جەك كورەسىز (ٴزابۇر 119:128، 163 وقىڭىز). ويتكەنى وتىرىك اتاۋلى مىنا زۇلىم دۇنيەنىڭ بيلەۋشىسى شايتاننان (جوح. 8:44؛ 12:31). ونىڭ كوكسەگەنى — ەحوبا قۇدايدىڭ كيەلى ەسىمىن قارالاۋ. ول ەدەم باعىندا شىققان بۇلىكتەن بەرى قۇدايعا جالا جاۋىپ، جامانداپ كەلەدى. ەحوبانى ادامزاتتان جاقسىلىعىن اياپ وتىرعان ٶزىمشىل دە ادىلەتسىز بيلەۋشى ەتىپ كورسەتەدى (مۇس. 1-ج. 3:1، 4، 5). ونىڭ بۇل وتىرىگى قازىرگى كۇنگە دەيىن ادامداردىڭ جۇرەكتەرى مەن سانالارىن ۋلاپ جاتىر. ادامدار شىندىقتى جاقسى كورمەگەنىن پايدالانىپ، شايتان ولاردى ادىلەتسىز دە زۇلىم جولعا يتەرمەلەپ، ٴتۇرلى بىلىققا باتىرۋعا تىرىسادى (ريم. 1:25—31).
4. شىندىقتىڭ قۇدايى ەحوبا نە ىستەپ جاتىر؟ (سۋرەتتى دە قاراڭىز.)
4 ەحوبا — «شىندىقتىڭ قۇدايى» (ٴزاب. 31:5، ٴسىلت.). ونى سۇيەتىن جاندارعا ول شىندىقتى ەش جاسىرماي ۇيرەتەدى. ولاردى شايتان تاراتقان وتىرىكتەردىڭ شىرماۋىنان بوساتىپ، كوزدەرىن اشادى. سونىمەن قاتار شىنشىل بولۋدى، ٵدىل ٴجۇرىپ تۇرۋدى دا ۇيرەتەدى. وسىلاي ولاردىڭ قادىر-قاسيەتىن ارتتىرىپ، جانتىنىشتىعىن سيلايدى (ناق. س. 13:5، 6). كيەلى كىتاپتى زەرتتەپ جۇرگەندە ٴسىز دە وسىنى سەزىندىڭىز بە؟ ٴبىلىم الا كەلە ٴسىز قۇدايدىڭ جولى بۇكىل ادامزات ٷشىن جانە ٴسىز ٷشىن دە ەڭ دۇرىس جول ەكەنىن ٴتۇسىندىڭىز (ٴزاب. 77:13). سوندىقتان قۇدايدىڭ تالاپتارىن ۇستانىپ ٶمىر سۇرۋگە بەكىندىڭىز (مات. 6:33). سونداي-اق ەحوبا قۇدايدىڭ ەسىمىن اقتاۋعا اتسالىسىپ، شىندىقتى قورعاعىڭىز كەلەر. بۇلاي ەتۋ ٷشىن نە ىستەي الاسىز؟
5. شىندىق پەن ادىلدىكتىڭ جاعىنا شىققانىڭىزدى قالاي كورسەتەسىز؟
5 ٴسىز: «شايتاننىڭ وتىرىگى ماعان كەرەك ەمەس، مەن شىندىقتىڭ جاعىنا شىعامىن. بيلەۋشىمنىڭ ەحوبا بولعانىن قالايمىن جانە ول نەنى دۇرىس دەپ ايتسا، سونى ىستەگىم كەلەدى»،— دەپ ۇيعاراتىن شىعارسىز. ەندەشە، بۇنداي شەشىم قابىلداعانىڭىزدى قالاي كورسەتەسىز؟ ەحوباعا دۇعا ەتىپ، وعان باعىشتالۋىڭىزبەن جانە شومىلدىرۋ راسىمىنەن ٶتىپ، باعىشتالعانىڭىزدى كوپشىلىك الدىندا پاش ەتۋىڭىزبەن. ٴيا، شىندىق پەن ادىلدىككە دەگەن سۇيىسپەنشىلىك — شومىلدىرۋ راسىمىنەن وتۋگە تالپىندىراتىن وتە كۇشتى سەبەپ.
يسا ٴماسىحتى سۇيەسىز بە؟
6. ٴزابۇر 45:4 تە ايتىلعانداي، ٴبىز يسانى نە ٷشىن جاقسى كورەمىز؟
6 ٴزابۇر 45:4 تە (وقىڭىز) يسا ٴماسىحتى نە ٷشىن جاقسى كورەتىنىمىزدىڭ بىرنەشە كەلەلى سەبەبى جازىلعان. يسا — شىندىقتىڭ، كىشىپەيىلدىلىك پەن ادىلدىكتىڭ جاعىندا. سول ٷشىن دە ٴسىز ونى جاقسى كورەسىز، ويتكەنى ٴسىز دە شىندىق پەن ادىلدىكتىڭ جاعىنداسىز. يسانىڭ شىندىق پەن ادىلدىكتى قالاي باتىل قورعاعانى دا ەسىڭىزدە بولار (جوح. 18:37). ال كىشىپەيىلدىلىكتىڭ ماڭىزدىلىعىن ول قالاي كورسەتتى؟
7. يسانىڭ كىشىپەيىلدىلىگىنە نە سەبەپتى سۇيسىنەسىز؟
7 يسا كىشىپەيىلدىلىكتىڭ ماڭىزدىلىعىن ٶز ۇلگىسىمەن كورسەتتى. مىسالى، ول اتاق-ماراپاتتى ەشقاشان وزىنە الماي، ونى بارلىق ۋاقىتتا اكەسىنە جاۋدىرعان (مار. 10:17، 18؛ جوح. 5:19). يسانىڭ وسىلاي ٶزىن كىشى تۇتقانى سىزگە قالاي اسەر ەتەدى؟ ونى جاقسى كورىپ، ونىڭ ىزىمەن جۇرگىڭىز كەلەدى ەمەس پە؟! يسا نەگە سونداي كىشىپەيىل دەپ ويلايسىز؟ ويتكەنى ول كىشىپەيىل اكەسى ەحوبانى قاتتى سۇيەدى ٵرى ونى ۇلگى تۇتادى (ٴزاب. 18:35؛ ەۆر. 1:3). ەحوبانىڭ قاسيەتتەرىن وسىنشالىقتى ٴمىنسىز تانىتاتىنى ٷشىن ٴسىز ونى جانىڭىزعا جاقىن تارتا تۇسەسىز، سولاي ەمەس پە؟
8. ٴبىزدىڭ پاتشامىز يسا ەكەنىنە نەگە قاتتى قۋانىشتىمىز؟
8 يسانى جاقسى كورەتىنىمىزدىڭ تاعى ٴبىر سەبەبى — ول ەڭ كەرەمەت، تەڭدەسسىز پاتشا! ەحوبا ونى ٶزى ۇيرەتىپ، وسى رولگە ٶزى تاعايىنداعان (يشايا 50:4، 5). ال يسا ٴبىزدى جاقسى كورگەندىكتەن قانداي جانقيارلىققا بارعانىن ويلاڭىزشى! (جوح. 13:1). پاتشاڭىز رەتىندە ول ٴسىزدىڭ سۇيىسپەنشىلىگىڭىزگە ابدەن لايىق، سولاي ەمەس پە؟! يسا ايتىپ كەتكەندەي، ونى شىن سۇيسەك، وسيەتتەرىن ورىندايمىز ٵرى ول ٴبىزدى دوستارىم دەپ اتايدى (جوح. 14:15؛ 15:14، 15). ەحوبانىڭ ۇلىمەن دوس بولۋ ٴبىز ٷشىن نەتكەن سي-قۇرمەت!
9. ماسىحشىلەردىڭ شومىلدىرۋ ٴراسىمى قاي جاعىنان يسانىڭ شومىلدىرۋ راسىمىنە ۇقسايدى؟
9 يسا ٸزباسارلارىنا وسيەت ەتكەن ىستەردىڭ ٴبىرى — شومىلدىرۋ راسىمىنەن ٶتۋ (مات. 28:19، 20). ونىڭ ٶزى دە شومىلدىرۋ راسىمىنەن ٶتىپ، ٸزباسارلارىنا ۇلگى قالدىرعان (« يسا وتكەن شومىلدىرۋ ٴراسىمى مەن ونىڭ ٸزباسارلارى وتەتىن شومىلدىرۋ ٴراسىمىنىڭ ايىرماشىلىعى نەدە؟» دەگەن قورشاۋدى قاراڭىز). ارينە، يسا وتكەن شومىلدىرۋ ٴراسىمى مەن بىزدىكىنىڭ ايىرماشىلىعى بار. ٴبىراق ۇقساستىعى دا جوق ەمەس. شومىلدىرۋ راسىمىنەن وتۋىمەن يسا ٶزىن اكەسىنىڭ ەركىن ورىنداۋعا ارنادى (ەۆر. 10:7). ونىڭ ٸزباسارلارى دا قۇدايعا باعىشتالعاندارىنىڭ بەلگىسى رەتىندە كوپشىلىك الدىندا شومىلدىرۋ راسىمىنەن ٶتىپ، ەندى وزدەرىنىڭ ەمەس، ەحوبانىڭ ەركىن ورىنداۋدى باستى ورىنعا قويادى. وسىلاي قوجايىندارى ٴماسىحتىڭ ىزىمەن جۇرەدى.
10. يسانى نە سەبەپتى جاقسى كورەسىز جانە بۇل ٴسىزدى نە ىستەۋگە تالپىندىرادى؟
10 ٴسىز يسانىڭ ەحوبانىڭ جالعىز ۇلى ەكەنىنە جانە بىزگە بيلىك ەتۋگە تاعايىندالعان پاتشا ەكەنىنە سەنەسىز. ونىڭ كىشىپەيىل ەكەنىن جانە ەحوبانىڭ قاسيەتتەرىن ٴمىنسىز تانىتاتىنىن بىلەسىز. اشىققانداردى تاماقتاندىرىپ، تۇڭىلگەندەردى جۇباتىپ، ناۋقاستاردى ساۋىقتىرعانىن دا تالاي وقىدىڭىز (مات. 14:14—21). ال بۇگىندە يسانىڭ قاۋىمدارعا قالاي جەتەكشىلىك ەتىپ جاتقانىن كورىپ ٴجۇرسىز (مات. 23:10). قۇداي پاتشالىعىنىڭ پاتشاسى رەتىندە كەلەشەكتە ول بۇدان دا كوپ ٸس اتقارادى. وسىنداي پاتشاڭىزدى جاقسى كورەتىنىڭىزدى قالاي كورسەتسەڭىز بولادى؟ ونى ۇلگى ەتىڭىز (جوح. 14:21). ال ونى ۇلگى ەتۋ ەحوباعا ٶمىرىڭىزدى باعىشتاپ، شومىلدىرۋ راسىمىنەن وتۋدەن باستالادى.
ەحوبا قۇدايدى سۇيەسىز بە؟
11. شومىلدىرۋ راسىمىنەن ٶتۋدىڭ ەڭ باستى سەبەبى قانداي؟
11 شومىلدىرۋ راسىمىنەن وتۋگە قوزعاۋ سالاتىن ەڭ باستى سەبەپ قانداي؟ قۇدايدىڭ ەڭ باستى زاڭى قانداي ەكەنىن يسا ايتىپ كەتكەن. ول: «قۇدايىڭ ەحوبانى بار جۇرەگىڭمەن، بۇكىل جان-تانىڭمەن، بارلىق اقىل-ويىڭمەن جانە بار كۇش-قۋاتىڭمەن ٴسۇي»،— دەگەن (مار. 12:30). ٴسىز قۇدايدى وسىلاي جاقسى كورەسىز بە؟
سىزگە قۋانىش سيلايتىن جايتتاردىڭ ٴبارى دە ەحوبادان (12، 13-ابزاستاردى قاراڭىز)
12. ٴسىز ەحوبانى نە ٷشىن سۇيەسىز؟ (سۋرەتتى دە قاراڭىز.)
12 ەحوبانى جاقسى كورۋدىڭ سەبەپتەرىن اتاپ وتەر بولساق، ولار وتە كوپ. مىسالى، ٴسىز ونىڭ «ٶمىردىڭ قاينار كوزى» ەكەنىن ٵرى «يگى دە كەمەلدى سيدىڭ ٴبارى» سودان ەكەنىن ٴبىلدىڭىز (ٴزاب. 36:9؛ جاق. 1:17). سىزگە قۋانىش سيلايتىن جايتتاردىڭ بارلىعى جومارت تا قامقور قۇدايىمىزدان كەلىپ جاتىر.
13. تولەم قۇرباندىعى نەلىكتەن ەڭ عاجاپ سي؟
13 تولەم قۇرباندىعى — ەحوبانىڭ بەرگەن ەڭ عاجاپ سيى. ونى سونشالىقتى باعالى ەتەتىن نە دەپ ويلايسىز؟ ەحوبا مەن ۇلى يسانىڭ ٴبىر-بىرىنە قانداي جاقىن بولعانىن ويلاپ كورىڭىزشى. يسا: «اكەمدى جاقسى كورەمىن»، «اكەم مەنى جاقسى كورەدى»،— دەگەن (جوح. 10:17؛ 14:31). كوكتە ميللياردتاعان جىلدار ىشىندە ولار ٴبىر-بىرىنە قاتتى باۋىر باسىپ، جاقىن بولىپ كەتكەنى ٴسوزسىز (ناق. س. 8:22، 23، 30). اسىل ۇلىنىڭ ازاپ شەگۋىنە جول بەرىپ، ولىمگە قيۋ قۇدايدىڭ جانىنا قانشالىقتى باتتى دەسەڭىزشى! ەحوبا بۇكىل ادامزاتتى، ونىڭ ىشىندە ٴسىزدى دە قاتتى سۇيگەندىكتەن، ٶزىنىڭ قىمباتتى ۇلىن قۇربان ەتۋگە دايىن بولدى. ويتكەنى ٴسىزدىڭ دە، باسقالاردىڭ دا ماڭگى ٶمىر سۇرگەنىن قالادى (جوح. 3:16؛ عال. 2:20). ەحوبانى سۇيۋگە بۇدان اسقان سەبەپ بار ما؟!
14. ومىردە ۇمتىلاتىن ەڭ كەرەمەت ماقسات قانداي؟
14 ەحوبانى جاقىننان تانىپ-بىلگەن سايىن، ونى ودان بەتەر جاقسى كورىپ كەتكەن بولارسىز. ونىمەن دوستىعىڭىزدى قازىر دە، ماڭگىلىك بويى دا نىعايتا بەرگىڭىز كەلەر، ٵرى بۇل قولىڭىزدان كەلەدى دە. ەحوبا ٴسىزدى: «بالام، مەنىڭ جۇرەگىمدى قۋانت»،— دەپ شاقىرادى (ناق. س. 23:15، 16). ٴسىز ونىڭ جۇرەگىن سوزىڭىزبەن عانا ەمەس، ىسىڭىزبەن دە قۋانتا الاسىز. ونى شىن سۇيەتىنىڭىز قانداي ٶمىر جولىن ۇستاناتىنىڭىزدان كورىنەدى (جوح. 1-ح. 5:3). ەحوباعا ۇنامدى ٶمىر ٴسۇرۋ — ومىردە ۇمتىلاتىن ەڭ كەرەمەت ماقسات.
15. ەحوبانى سۇيەتىنىڭىزدى قالاي پاش ەتە الاسىز؟
15 ەحوباعا دەگەن سۇيىسپەنشىلىگىڭىزدى قالاي پاش ەتۋگە بولادى؟ بىرىنشىدەن، وعان ارنايى دۇعا ايتىپ، ٶمىرىڭىزدى باعىشتاۋ ارقىلى (ٴزاب. 40:8). سوسىن شومىلدىرۋ راسىمىنەن ٶتىپ، باعىشتالعانىڭىزدى كوپشىلىكتىڭ الدىندا جاريالايسىز. ماقالانىڭ باسىندا ايتىلىپ كەتكەندەي، بۇل — ومىرىڭىزدەگى باقىتقا تولى ٵرى وتە ماڭىزدى ٴسات. ەندى ٴسىز ٶزىڭىز ٷشىن ەمەس، ەحوبا ٷشىن ٶمىر سۇرەسىز (ريم. 14:8؛ پەت. 1-ح. 4:1، 2). راس، بۇل — وتە جاۋاپتى قادام. ٴبىراق بۇل قادام ەڭ باقىتتى ومىرگە ەسىك اشادى. قالاي؟
16. ٴزابۇر 41:12 دە ايتىلعانداي، ٶمىرىن ەحوباعا قىزمەت ەتۋگە ارناعان جانداردى ول قالاي جارىلقايدى؟
16 الەمدەگى ەڭ قولى اشىق تۇلعا — ەحوبا. وعان بەرگەنىڭىز سىزگە اسىپ-تاسىپ، مولىنان قايتادى (مار. 10:29، 30). ەحوبا قۇردىمعا كەتىپ بارا جاتقان مىنا زۇلىم دۇنيەنىڭ وزىندە سىزگە باتا مەن قىزىققا، ٴمان-ماعىناعا تولى ەڭ جاقسى ٶمىردى بەرەدى، ٵرى بۇل — تەك باستاماسى عانا. شومىلدىرۋ راسىمىنەن كەيىن باستالاتىن ٶمىردىڭ شەگى جوق دەسە دە بولادى، ويتكەنى ٴسىز كوكتەگى اكەڭىزگە ماڭگىلىك بويى قىزمەت ەتە الاسىز. وسىلاي اكەڭىزبەن ارالارىڭىزداعى سۇيىسپەنشىلىك بارعان سايىن ۇلعايىپ، تۇبىندە ٴسىز دە ول سياقتى ماڭگى ٶمىر كەشەسىز (ٴزابۇر 41:12 وقىڭىز).
17. قالاي ٴسىز ەحوباعا ودا جوق نارسەنى بەرە الاسىز؟
17 ومىرىڭىزدەگى باستان وتكىزگەن ٵربىر باقىتتى ٴسات پەن يگى سيلاردىڭ بارلىعى ەحوبادان. ال ٶمىرىڭىزدى باعىشتاپ، شومىلدىرۋ راسىمىنەن وتكەندە، ٴسىز وعان ٶز اتىڭىزدان وتە قۇندى سيلىق بەرە الاسىز. بۇل — ٴسىزدىڭ شىن قالاۋىڭىزبەن اتقاراتىن ادال قىزمەتىڭىز (ٵيۇپ 1:8؛ 41:11؛ ناق. س. 27:11). ويلاپ كورىڭىزشى، اسپان مەن جەردەگىنىڭ ٴبارى ەحوبانىكى بولسا دا، ٴسىز وعان ودا جوق نارسەنى سيلاي الاسىز. بۇل نەتكەن مارتەبە! ەحوباعا قىزمەت ەتۋدەن ارتىق باقىتتى ٶمىر جولى بار ما؟! راسىندا دا، شومىلدىرۋ راسىمىنەن وتۋگە تالپىندىراتىن ەڭ كەرەمەت سەبەپ — ەحوباعا دەگەن سۇيىسپەنشىلىگىڭىز!
نەگە وتپەسكە؟
18. قانداي سۇراقتار جايلى ويلانعانىڭىز ٴجون؟
18 سونىمەن، شومىلدىرۋ راسىمىنەن وتەمىن دەپ شەشتىڭىز بە؟ بۇنى ٶزىڭىز عانا ايتا الاسىز. ٴبىراق وزىڭىزگە مىنا سۇراقتى قويىپ كورىڭىز: «شومىلدىرۋ راسىمىنەن وتۋىمە قانداي كەدەرگى بار، ونى نەسىنە كەيىنگە ىسىرىپ ٴجۇرمىن؟» (ەل. ٸس. 8:36). وسى ماقالادا قاراستىرىپ وتكەن ٷش سەبەپتى الايىقشى. بىرىنشىدەن، ٴسىز شىندىق پەن ادىلدىكتى سۇيەسىز. ەندەشە، ٴسىز ٵربىر ادام تەك شىندىقتى ايتىپ، ٵدىل ٴجۇرىپ-تۇراتىن زاماندا ٶمىر سۇرگىڭىز كەلە مە؟ ەكىنشىدەن، ٴسىز يسا ٴماسىحتى جاقسى كورەسىز. ەندەشە، ول ٴسىزدىڭ پاتشاڭىز بولعانىن قالايسىز با، ونىڭ ىزىمەن جۇرگىڭىز كەلە مە؟ ٷشىنشى ٵرى ەڭ باستى سەبەپ — ٴسىز ەحوبانى سۇيەسىز. ولاي بولسا، قۇدايىڭىز ەحوباعا قىزمەت ەتىپ، ونىڭ جۇرەگىن قۋانتقىڭىز كەلە مە؟ وسى سۇراقتاردىڭ بارلىعىنا «ٴيا» دەپ جاۋاپ بەرسەڭىز، وندا شومىلدىرۋ راسىمىنەن وتۋگە سىزگە نە كەدەرگى؟! (ەل. ٸس. 16:33).
19. شومىلدىرۋ راسىمىنەن وتۋدەن نەگە تارتىنباعانىڭىز ٴجون؟ مىسال كەلتىرىڭىز. (جوحان 4:34)
19 شومىلدىرۋ راسىمىنەن وتۋگە بەكىنە الماي جۇرسەڭىز، يسانىڭ جوحان 4:34 تەگى (وقىڭىز) سوزدەرىنە نازار اۋدارىڭىزشى. ول قۇدايدىڭ ەركىن ورىنداۋدى تاماققا تەڭەگەن. نەگە دەپ ويلايسىز؟ تاماق جەگەنىمىز اعزامىزعا پايدالى ەكەنىندەي، ەحوبانىڭ ەركىن ورىنداۋ دا ٶز يگىلىگىمىزگە اساتىنىن يسا بىلگەن. ەحوبا ەشقاشان وزىمىزگە زيان بولاتىن نارسەنى ىستە دەپ ايتپايدى. ال قۇدايدىڭ ەركىن ورىنداۋعا ٴسىزدىڭ شومىلدىرۋ راسىمىنەن ٶتۋىڭىز جاتا ما؟ ارينە (ەل. ٸس. 2:38). ەندەشە، ەحوبانىڭ بۇيرىعىنا مويىنسۇنىپ، شومىلدىرۋ راسىمىنەن وتكەنىڭىز ٶز يگىلىگىڭىز ٷشىن ەكەنىنە كامىل سەنسەڭىز بولادى. ٴسىز الەمدەگى ەڭ ٴدامدى تاعام دەپ ۇسىنىلعان تاماقتان باس تارتپايسىز عوي؟! سول سياقتى، شومىلدىرۋ راسىمىنەن وتۋدەن دە ەش تارتىنباڭىز.
20. كەلەسى ماقالادا نە جايىندا تالقىلايمىز؟
20 سونىمەن، نەلىكتەن كەيىنگە ىسىرماي، شومىلدىرۋ راسىمىنەن وتپەسكە؟ بالكىم، كەيبىرى: «مەن ٵلى دايىن ەمەسپىن»،— دەر. ەحوباعا باعىشتالىپ، شومىلدىرۋ راسىمىنەن ٶتۋ ومىردەگى ەڭ ماڭىزدى دا جاۋاپتى شەشىم ەكەنى راس. سوندىقتان وعان دايىن بولۋ ٷشىن جاقسىلاپ ويلانىپ، كۇش سالۋ كەرەك ٵرى ٴبىراز ۋاقىت قاجەت. ٴبىراق وسى قادامدى جاساۋعا شىنىمەن نيەتتى بولساڭىز، قازىردەن باستاپ قالاي دايىندالا الاسىز؟ بۇل سۇراقتىڭ جاۋابىن كەلەسى ماقالادا قاراستىرايىق.
28-ٵن ەحوبانىڭ دوسى بولايىق
a كيەلى كىتاپتى زەرتتەپ جۇرگەن ٵربىر ادام ٷشىن شومىلدىرۋ راسىمىنەن ٶتۋ — اسا ماڭىزدى قادام. ال ادام مۇنداي شەشىمگە قالاي كەلەدى؟ ٴبىر سوزبەن ايتقاندا، سۇيىسپەنشىلىك ارقىلى. سوندا ٴبىز كىمدى جانە نەنى ٴسۇيۋىمىز كەرەك؟ وسى ماقالادا سونىڭ جاۋابىن الامىز ٵرى شومىلدىرۋ راسىمىنەن وتكەن ادام قانداي ومىرگە قول جەتكىزەتىنىن دە بىلەمىز.
