جاڭا بولمىستى كيىپ، قايتىپ شەشپەيىك
«جاڭا بولمىستى كيىپ الىڭدار» (قولوستىقتارعا 3:10 سىلتەمە).
اندەر: 43، 106
1، 2. ا) جاڭا بولمىسقا يە بولا الاتىنىمىزدى قايدان بىلەمىز؟ ٵ) قولوستىقتارعا 3:10—14 تارماقتاردا جاڭا بولمىسقا جاتاتىن قانداي قاسيەتتەر بار؟
كيەلى كىتاپتىڭ «جاڭا دۇنيە اۋدارماسىندا» ەكى رەت «جاڭا بولمىس» دەگەن تىركەس كەزدەسەدى (ەفەستىكتەرگە 4:24؛ قولوستىقتارعا 3:10). بۇل — «قۇدايدىڭ ەركىنە ساي جاراتىلعان» بولمىس. ٴبىز جاڭا بولمىسقا يە بولا الامىز با؟ ارينە. ەحوبا ادام بالاسىن وزىنە ۇقساس ەتىپ جاراتقاندىقتان، ٴبىز وعان ەلىكتەپ، بويىنداعى اسىل قاسيەتتەردى تانىتا الامىز (مۇسانىڭ 1-جازباسى 1:26، 27؛ ەفەستىكتەرگە 5:1).
2 كەمەلسىزدىكتى مۇرا ەتكەندىكتەن، ارا-تۇرا ٴبارىمىزدىڭ دە جامان قالاۋلارىمىز بولىپ تۇراتىنى راس. قالا بەرسە، قورشاعان ورتامىز دا بىزگە اسەر ەتپەي قويمايدى. الايدا ەحوبانىڭ مەيىرىمگە تولى كومەگىمەن ٴبىز ونىڭ كوڭىلىنەن شىعاتىن ادام بولا الامىز. وسىلاي ەتۋگە ىقىلاسىمىزدى ارتتىرا ٴتۇسۋ ٷشىن، جاڭا بولمىستىڭ قىرلارى بولىپ تابىلاتىن بىرنەشە قاسيەتتى تالقىلاپ كەتەيىك (قولوستىقتارعا 3:10—14 وقىڭىز). ارتىنان وسى قاسيەتتەردى قىزمەتىمىزدە قالاي تانىتا الاتىنىمىزدى كورەمىز.
«بارلىعىڭ ٴبىر ادامدايسىڭدار»
3. جاڭا بولمىستىڭ ٴبىر قىرى قانداي؟
3 پاۋىل ادامداردى الالاماۋ جاڭا بولمىستىڭ ماڭىزدى ٴبىر قىرى ەكەنىن تۇسىندىرگەن. ول بىلاي دەدى: «گرەك نە ياھۋدي، سۇندەتتەلگەن نە سۇندەتتەلمەگەن، جاتجەرلىك نە سكيف *، قۇل نە ەرىكتى ادام دەگەن جوق». قاۋىمدا ەشكىم وزىنىڭ ٴناسىلى، ۇلتى نە قوعامداعى بەدەلىنە بولا ٶزىن باسقالاردان ەرەكشە ساناماۋى كەرەك. نەگە؟ سەبەبى ٴماسىحتىڭ ٸزباسارلارى رەتىندە ٴبارىمىز دە «ٴبىر ادامدايمىز» (قولوستىقتارعا 3:11؛ عالاتتىقتارعا 3:28).
ٴبىز ادامداردى ناسىلدەرى مەن شىققان ورتاسىنا قاراپ الالامايمىز
4. ا) ەحوبانىڭ قىزمەتشىلەرى ادامدارعا قالاي قاراۋ كەرەك؟ ٵ) قانداي جاعداي ماسىحشىلەردىڭ بىرلىگىن سىنعا الۋى مۇمكىن؟
4 جاڭا بولمىسقا يە بولعان كەزدە ٴبىز بارلىق ادامدارعا، ٴناسىلى مەن شىققان ورتاسىنا قاراماستان، سىي-قۇرمەت تانىتامىز (ريمدىكتەرگە 2:11). دۇنيە ٴجۇزىنىڭ كەيبىر جەرلەرىندە بۇلاي ەتۋ وڭايعا سوقپايدى. مىسال ٷشىن، بۇرىندارى وڭتۇستىك افريكا رەسپۋبليكاسىندا جەرگىلىكتى ۇكىمەت ٴتۇرلى ٴناسىلدىڭ ادامدارىن ٵرتۇرلى اۋماققا ٴبولىپ، بولەك تۇرعىزعان. وسى ەلدەگى ادامداردىڭ كوبى، ونىڭ ىشىندە كۋاگەرلەر دە بار، ٵلى كۇنگە شەيىن سول اۋماقتاردا ٶمىر سۇرۋدە. باسقارۋشى كەڭەس سول باۋىرلاستارىمىزدى «جۇرەكتەرىن ايقارا اشۋعا» تالپىندىرعىسى كەلدى. سودان 2013-جىلدىڭ قازان ايىندا ولار ارنايى ٴبىر شارانى ماقۇلدادى. بۇل شارا سونداعى ٴتۇرلى ٴناسىلدى باۋىرلاستارىمىزعا ٴبىر-بىرىمەن جاقسىراق تانىسۋعا جول اشپاق ەدى (قورىنتتىقتارعا 2-حات 6:13).
5، 6. ا) ٴبىر ەلدە قۇداي حالقىنىڭ اراسىنداعى بىرلىكتى نىعايتۋ ماقساتىندا قانداي شارا ۇيىمداستىرىلدى؟ (ماقالانىڭ باسىنداعى سۋرەتتى قاراڭىز.) ٵ) مۇنىڭ ناتيجەسى قانداي بولدى؟
5 وسى ەلدەگى باۋىرلاستار مىناداي شارا ۇيىمداستىردى: كەيبىر دەمالىس كۇندەرى تىلدەرى نە ناسىلدەرى ٵرتۇرلى ەكى قاۋىمنىڭ باۋىرلاستارى بىرگە ۋاقىت وتكىزۋ كەرەك ەدى. ٴسويتىپ، بۇل باۋىرلاستار بىرگە ۋاعىزعا شىعىپ، قاۋىم كەزدەسۋىنە بىرگە بارىپ ٴجۇردى، سونداي-اق ٴبىر-بىرلەرىنە قوناققا بارىپ تۇردى. بۇل شاراعا جۇزدەگەن قاۋىم قاتىناسىپ، فيليالعا كوپتەگەن جىلى لەبىز كەلىپ جاتتى. بۇل ٴتىپتى كۋاگەر ەمەس ادامداردى دا تاڭعالدىردى. مىسالى، ٴبىر ٴدىن قىزمەتكەرى بىلاي دەدى: «مەن كۋاگەر ەمەسپىن، ٴبىراق ۋاعىز ىستەرىڭنىڭ كەرەمەت ۇيىمداستىرىلعانىن جانە ٴناسىل ارالىق بىرلىكتەرىڭدى اتاپ وتكىم كەلەدى». باۋىرلاستارىمىز بۇل شارانىڭ قانداي پايداسىن كوردى؟
6 كوسا تىلىندە سويلەيتىن نوما ەسىمدى باۋىرلاسىمىز باستاپقىدا اعىلشىن ٴتىلدى قاۋىمداعى كۋاگەرلەردى وزىنىڭ قاراپايىم ۇيىنە قوناققا شاقىرۋعا قاتتى قىسىلادى. ٴبىراق اق ٴناسىلدى كۋاگەرلەرمەن ۋاعىزعا شىعىپ، ولاردىڭ ۇيىندە قوناقتا بولعاننان كەيىن، ٶزىن ەركىن سەزىنە باستايدى. «ولار دا ٶزىمىز سياقتى كادىمگى ادامدار ەكەن عوي!»— دەيدى ول. ٴسويتىپ، بىردە اعىلشىن
ٴتىلدى قاۋىمداعى باۋىرلاستار كوسا ٴتىلدى قاۋىممەن قىزمەتتەسۋگە كەلگەن كەزدە، ول سونداعى بىرنەشە باۋىرلاستى ۇيىنە تاماققا شاقىرادى. نوما قوناققا كەلگەن اق ٴناسىلدى ٴبىر اقساقالدىڭ ۇيدەگى كىشكەنتاي سۋلياۋ شارباقتا ٴماز بولىپ وتىرعانىن كورىپ قاتتى قايران قالادى. ٵلى كۇنگە دەيىن ٴجۇرىپ جاتقان وسى شارانىڭ ارقاسىندا باۋىرلاستاردىڭ كوبىسى جاڭا دوستار تاۋىپ، ٵرتۇرلى ورتادان شىققان ادامدارمەن تانىسىپ جاتىر.جاناشىرلىق پەن مەيىرىمدىلىكتى كيىپ الايىق
7. نەگە ٵردايىم جاناشىرلىق تانىتۋىمىز كەرەك؟
7 شايتاننىڭ دۇنيەسى قۇرىمايىنشا، ەحوبانىڭ حالقى قيىندىق كورەدى. جۇمىسسىزدىق، اۋىر دەرت، قۋعىن-سۇرگىن، تابيعي اپاتتار، قىلمىستىڭ كوپتىگىنەن دۇنيە-مۇلىكتەن ايىرىلۋ جانە تاعى باسقا قيىنشىلىقتار باسىمىزعا ٴتۇسۋى مۇمكىن. قيىن شاقتا بىرىمىزگە-ٴبىرىمىز قول ۇشىن بەرۋ ٷشىن، شىن جاناشىر بولۋىمىز قاجەت. بارىنشا جاناشىر بولعانىمىز وزگەلەرگە مەيىرىمدى بولۋعا تالپىندىرادى (ەفەستىكتەرگە 4:32). بۇل قاسيەتتەر جاڭا بولمىستىڭ قىرى بولىپ تابىلادى. وسى قاسيەتتەردىڭ ارقاسىندا ٴبىز قۇدايعا ەلىكتەپ، وزگەلەردى جۇباتا الامىز (قورىنتتىقتارعا 2-حات 1:3، 4).
8. قاۋىمداعى بارلىق ادامدارعا جاناشىرلىق پەن مەيىرىمدىلىك تانىتساق، مۇنىڭ قانداي ناتيجەسىن كورەمىز؟ مىسال كەلتىرىڭىز.
8 قاۋىمىمىزداعى باسقا ەلدەن كوشىپ كەلگەندەرگە نە تۇرمىسى ناشار ادامدارعا قالايشا كوبىرەك جاناشىرلىق تانىتا الامىز؟ ٴبىز ولاردى جىلى شىرايمەن قارسى الىپ، ولارمەن دوستاسقىمىز كەلەدى ٵرى قاۋىمعا قاجەت ەكەنىن تۇسىنۋگە كومەكتەسكىمىز كەلەدى (قورىنتتىقتارعا 1-حات 12:22، 25). مىسالى، دەننيكەرل فيليپپيننەن جاپونياعا كوشەدى. شەتەلدىك بولعاندىقتان، جۇمىسىنداعىلار وعان سىي-قۇرمەت تانىتپايدى. كەيىن ول ەحوبا كۋاگەرلەرىنىڭ جينالىسىنا قاتىناسادى. ول بىلاي دەيدى: «جينالىستاعىلاردىڭ بارلىعى دەرلىك جاپوندىقتار بولسا دا، مەنى بۇرىننان تانيتىنداي جىلى قارسى الدى». باۋىرلاستارىمىزدىڭ ٵرى قاراي دا مەيىرىمدىلىك تانىتقانى وعان ەحوباعا ەتەنە جاقىنداۋعا كومەكتەسەدى. ٴبىراز ۋاقىتتان كەيىن ول شومىلدىرۋ راسىمىنەن وتەدى، ال بۇگىندە اقساقال بولىپ قىزمەت ەتەدى. ونىمەن بىرگە قىزمەتتەسىپ جۇرگەن اقساقالدار قاۋىمدارىندا دەننيكەرل مەن ايەلى جەننيفەر سياقتى باۋىرلاستاردىڭ بولعانىنا ريزا ەكەندەرىن ٴبىلدىرىپ بىلاي دەيدى: «ولار ٸزاشار رەتىندە وتە قاراپايىم ٶمىر ٴسۇرىپ، پاتشالىقتى ٴبىرىنشى ورىنعا قويۋدا تاماشا ۇلگى كورسەتىپ ٴجۇر» (لۇقا 12:31).
9، 10. قىزمەتتە جاناشىرلىق تانىتقانىمىز جاقسى ناتيجە اكەلەتىنىنە مىسالدار كەلتىرىڭىز.
9 پاتشالىق جايلى ىزگى حاباردى ۋاعىزداعاندا، «بارىنە» جاقسىلىق جاساۋدىڭ مۇمكىندىگى تۋادى (عالاتتىقتارعا 6:10). كوپ كۋاگەرلەر كوشىپ كەلگەن شەتەلدىكتەرگە جاناشىرلىق تانىتىپ ٴجۇر ٵرى ولاردىڭ ٴتىلىن ۇيرەنۋدە (قورىنتتىقتارعا 1-حات 9:23). ولاردىڭ تالپىنىسى ٶز جەمىسىن بەرۋدە. مىسالى، اۆستراليادا تۇراتىن تيففاني ەسىمدى ٸزاشار بريسبەن قالاسىنداعى سۋاحيلي ٴتىلدى قاۋىمعا كومەكتەسۋ ٷشىن سول ٴتىلدى ۇيرەنىپ العان. ٴتىلدى يگەرۋ قانشا قيىنعا سوقسا دا، مۇنىڭ ارقاسىندا ٶمىرى ٴماندى بولا ٴتۇستى. تيففاني بىلاي دەيدى: «ەگەر قىزمەتتىڭ قىزىعىنا شومىلعىڭ كەلسە، وندا شەت ٴتىلدى قاۋىم جونىندە ويلانىپ كور! سوندا ٶز قالاڭنان شىقپاي-اق ساياحاتتاپ جۇرگەندەي سەزىمدە بولاسىڭ. دۇنيە جۇزىلىك باۋىرلاستىعىمىزدى سەزىنىپ، ارامىزداعى تاماشا بىرلىكتى ٶز كوزىڭمەن كورەسىڭ».
10 جاپونيادا تۇراتىن ٴبىر وتباسى وسىلاي ەتكەن. قىزدارى ساكيكو بىلاي دەيدى: «ٴبىز قىزمەتتە برازيليالىق كوشىپ كەلگەن شەتەلدىكتەردى ٴجيى كەزدەستىرەتىنبىز. ولارعا وزدەرىنىڭ پورتۋگال تىلىندەگى كيەلى كىتاپتارىنان ايان 21:3، 4 نە ٴزابۇر 37:10، 11، 29 سياقتى تارماقتاردى كورسەتكەنىمىزدە، ولار زەيىن قويىپ تىڭدايتىن، ال كەيبىرى ٴتىپتى كوز جاسىنا ەرىك بەرەتىن». بۇل وتباسى سول شەتەلدىكتەرگە جانى اشىپ، ولارعا شىندىقتى بىلۋگە كومەكتەسۋ ٷشىن بۇكىل وتباسىمەن بىرگە پورتۋگال ٴتىلىن ۇيرەنە باستايدى. كەيىنىرەك پورتۋگال ٴتىلدى قاۋىمنىڭ اشىلۋىنا كومەكتەسەدى. جىلدار وتە ولار ٴبىرتالاي شەتەلدىكتەرگە ەحوبانىڭ قىزمەتشىسى بولۋعا جاردەم بەرەدى. ساكيكو بىلاي دەيدى: «پورتۋگال ٴتىلىن مەڭگەرۋ ٷشىن كوپ تەر توكتىك، ٴبىراق كورگەن باتالارىمىز بارىنەن دە اسىپ ٴتۇستى. ەحوباعا دەگەن العىسىمىز شەكسىز» (ەلشىلەردىڭ ىستەرى 10:34، 35 وقىڭىز).
كىشىپەيىلدىلىكتى كيىپ الايىق
11، 12. ا) نەگە جاڭا بولمىستى كييۋدەگى نيەتىمىز دۇرىس بولۋ كەرەك؟ ٵ) كىشىپەيىل بولۋعا بىزگە نە كومەكتەسەدى؟
11 جاڭا بولمىستى كييۋدەگى نيەتىمىز — وزگەلەردىڭ قوشەمەتىنە بولەنۋ ەمەس، ەحوبانى دارىپتەۋ بولۋ كەرەك. ەستەن شىعارمايىق: ٴتىپتى كەمەلدى پەرىشتەنىڭ ٶزى كوكىرەكتەنىپ كەتىپ، جولدان تايعان (ەزەكيەل 28:17 سالىستىرىڭىز). ال ٴبىز بولساق كەمەلسىزبىز، سوندىقتان وركوكىرەكتىكتەن اۋلاق بولۋ الدەقايدا قيىن. ايتسە دە ۇستىمىزگە كىشىپەيىلدىلىكتى كيە الامىز. بۇلاي ەتۋگە نە كومەكتەسەدى؟
12 بىزگە كىشىپەيىل بولۋعا قۇداي ٴسوزىن كۇنىگە وقىعانىمىز جانە وقىعانىمىز جايلى وي جۇگىرتكەنىمىز كومەكتەسەدى (مۇسانىڭ 5-جازباسى 17:18—20). اسىرەسە يسانىڭ تالىمدەرى مەن كىشىپەيىلدىلىگىنىڭ تاماشا ۇلگىسىن وي ەلەگىنەن وتكىزۋىمىز قاجەت (ماتاي 20:28). يسانىڭ كىشىپەيىل بولعانى سونشا، شاكىرتتەرىنىڭ اياعىن جۋعان (جوحان 13:12—17). كىشىپەيىل بولۋعا ەحوبادان دۇعادا كيەلى رۋحىن سۇراعانىمىز دا كومەكتەسەدى. ونىڭ رۋحى ٶزىمىزدى باسقالاردان جوعارى ساناۋعا يتەرمەلەيتىن كەز كەلگەن بەيىمدىلىكپەن كۇرەسۋگە جاردەمدەسەدى (عالاتتىقتارعا 6:3، 4؛ فىلىپىلىكتەرگە 2:3).
كىشىپەيىل بولساق، قاۋىمنىڭ تاتۋلىعى مەن بىرلىگىن ارتتىرا تۇسەمىز
13. كىشىپەيىل بولساق، قانداي باتاعا كەنەلەمىز؟
13 ناقىل سوزدەر 22:4 وقىڭىز. ەحوبا بىزدەن كىشىپەيىل بولۋدى تالاپ ەتەدى. كىشىپەيىلدىلىك كوپ باتاعا كەنەلتەدى. كىشىپەيىل بولساق، قاۋىمنىڭ تاتۋلىعى مەن بىرلىگىن ارتتىرا تۇسەمىز. ونىڭ ۇستىنە، بىزگە ەحوبانىڭ راقىمى تۇسەدى. ەلشى پەتىر بىلاي دەگەن: «ٴبارىڭ دە ٶزارا اراقاتىناستارىڭدا كىشىپەيىل بولىڭدار! ويتكەنى قۇداي تاكاپپارلارعا قارسى تۇرادى، ال كىشىپەيىلدەرگە راقىمىن توگەدى» (پەتىردىڭ 1-حاتى 5:5).
جۇمساقتىق پەن شىدامدىلىقتى كيىپ الايىق
14. جۇمساق تا شىدامدى بولۋدىڭ ەڭ وزىق ۇلگىسى كىم؟
14 مىنا دۇنيەدە جۇمساقتىق پەن شىدامدىلىقتى ٴجيى وسالدىقتىڭ بەلگىسى دەپ سانايدى. ٴبىراق، شىندىعىنا كەلگەندە، ولاي ەمەس. بۇل كەرەمەت قاسيەتتەر الەمدەگى ەڭ قۇدىرەتتى تۇلعا ەحوبادان باستاۋ الادى. ول — جۇمساق تا شىدامدى بولۋدىڭ ەڭ كەرەمەت ۇلگىسى (پەتىردىڭ 2-حاتى 3:9). مىسالى، ەحوبا ىبىرايىم مەن لۇتتىڭ سۇراقتارىنا پەرىشتەلەرى ارقىلى جاۋاپ بەرگەندە، قانشالىقتى شىدامدى بولعانىن ەسكە الايىقشى (مۇسانىڭ 1-جازباسى 18:22—33؛ 19:18—21). سونداي-اق ٴتىلازار يسرايلدىكتەرگە 1500 جىلدان استام ۋاقىت بويى تانىتقان شىدامدىلىعى دا ەسىمىزدە بولار (ەزەكيەل 33:11).
15. يسا جۇمساق تا شىدامدى بولۋدىڭ قانداي ۇلگىسىن كورسەتتى؟
15 يسا دا «جۇمساق» بولعان (ماتاي 11:29). شاكىرتتەرى السىزدىكتەرگە بوي الدىرعاندا، ول وتە شىدامدى بولدى. جەردەگى قىزمەتى كەزىندە يسانى ٴجيى نەگىزسىز سىناپ-مىنەپ، كىنا تاعاتىن. دەسە دە ول ولە-ولگەنشە جۇمساق تا شىدامدى بولدى. ازاپ باعاناسىندا جانى قاتتى قينالىپ تۇرسا دا، ول اكەسىنەن ٶزىن ولىمگە كەسكەندەردى كەشىرۋىن سۇراعان. يسا: «[ولار] نە ىستەپ جاتقاندارىن بىلمەيدى»،— دەگەن (لۇقا 23:34). ٴتىپتى كۇيزەلىپ تۇرسا دا، ٴتانى اۋىرىپ تۇرسا دا ول جۇمساقتىعى مەن شىدامدىلىعىنان اينىماعان (پەتىردىڭ 1-حاتى 2:21—23 وقىڭىز).
16. جۇمساقتىق پەن شىدامدىلىق تانىتۋدىڭ ٴبىر جولى قانداي؟
16 پاۋىل جۇمساق تا شىدامدى بولۋدىڭ ٴبىر جولىن ايتىپ بىلاي دەگەن: «ەگەر الدەكىمنىڭ بىرەۋگە رەنجۋگە سەبەبى بولسا دا، ٶزارا ٴتوزىمدى بولىپ، ٴبىر-ٴبىرىڭدى كەڭپەيىلمەن كەشىرىڭدەر. ەحوبانىڭ وزدەرىڭدى كەڭپەيىلمەن كەشىرگەنىندەي، سەندەر دە سولاي ەتىڭدەر» (قولوستىقتارعا 3:13). كەشىرىمشىل بولۋ ٷشىن بىزگە جۇمساقتىق پەن شىدامدىلىق قاسيەتتەرى قاجەت. وسىنىڭ ارقاسىندا قاۋىمنىڭ بىرلىگى بۇزىلماي، نىعايا تۇسەدى.
17. نەگە جۇمساقتىق پەن شىدامدىلىق قاسيەتتەرىن تانىتقانىمىز ماڭىزدى؟
17 ەحوبا بىزدەن ادامدارعا جۇمساق ٵرى شىدامدى بولۋدى تالاپ ەتەدى. ونىڭ ورناتاتىن جاڭا دۇنيەسىندە ٶمىر ٴسۇرۋ ٷشىن وسى قاسيەتتەردى دامىتۋعا ٴتيىسپىز (ماتاي 5:5؛ جاقىپ 1:21). جۇمساق تا شىدامدى بولساق، ەحوبانى ماداقتايمىز ٵرى باسقالاردى دا سوعان تالپىندىرامىز (عالاتتىقتارعا 6:1؛ تىموتەگە 2-حات 2:24، 25).
سۇيىسپەنشىلىكتى كيىپ الايىق
18. سۇيىسپەنشىلىك پەن الالاماۋشىلىقتىڭ قانداي بايلانىسى بار؟
18 جوعارىدا تالقىلاپ كەتكەن قاسيەتتەردىڭ ٴبارى دە سۇيىسپەنشىلىكپەن تىعىز بايلانىستى. مىسالى، شاكىرت جاقىپ باۋىرلاستاردىڭ كەدەيلەرگە قاراعاندا بايلارعا جاقسىراق قارايتىنىن بايقاعاندا، ولارعا كەڭەس بەرگەن. ول بۇلاي ەتۋدىڭ قۇدايدىڭ «وزگە ادامدى ٶزىڭدى سۇيگەندەي ٴسۇي» دەگەن تالابىنا قايشى ەكەنىن ايتقان. سوسىن: «ادامداردى الالاۋدى قويماساڭدار، كۇنا جاسايسىڭدار»،— دەپ قوستى (جاقىپ 2:8، 9). ادامداردى سۇيسەك، ەشكىمدى بىلىمىنە، ناسىلىنە نە ابىروي-بەدەلىنە قاراپ الالامايمىز. ٴبىز سىرت كوزگە عانا ەشكىمدى ٴبولىپ-جارمايتىنداي كورىنۋگە تىرىسپايمىز. الالاماۋشىلىق ٴبىزدىڭ شىنايى بولمىسىمىزدىڭ ٴبىر بولىگى بولۋى ٴتيىس.
19. نەلىكتەن سۇيىسپەنشىلىككە بولەنگەنىمىز ماڭىزدى؟
19 سۇيىسپەنشىلىك ٵرى «شىدامدى دا مەيىرىمدى» جانە «مەنمەنسىنبەيدى» (قورىنتتىقتارعا 1-حات 13:4). ادامدارعا ىزگى حاباردى جەتكىزۋدى دوعارماي ايتا بەرۋ ٷشىن، ٴبىز شىدامدى، مەيىرىمدى جانە كىشىپەيىل بولۋىمىز كەرەك (ماتاي 28:19). بۇعان قوسا، وسى قاسيەتتەردىڭ ارقاسىندا قاۋىمداعى بارلىق باۋىرلاستارىمىزبەن وڭاي ٴتىل تابىسا الامىز. بارلىعىمىز وسىنداي سۇيىسپەنشىلىكتى تانىتار بولساق، قاۋىمنىڭ بىرلىگى نىعايادى ٵرى بۇل ەحوباعا ماداق اكەلەدى. وزگەلەر وسىنداي اۋىزبىرشىلىكتى كورىپ، شىندىققا جاقىنداي تۇسەدى. سونىمەن، جاڭا بولمىستىڭ سيپاتتاماسى كيەلى كىتاپتا بىلاي دەپ تامامدالعانى ورىندى: «بۇعان قوسا، سۇيىسپەنشىلىككە بولەنىڭدەر، ويتكەنى ول ادامداردى تولىقتاي بىرىكتىرەدى» (قولوستىقتارعا 3:14).
جاڭارا بەرەيىك
20. ا) قانداي سۇراقتار جايلى ويلانعانىمىز ٴجون؟ نەگە؟ ٵ) قانداي تاماشا بولاشاقتى اسىعا كۇتۋدەمىز؟
20 ٵرقايسىسىمىز ٶزىمىزدى: «ەسكى بولمىستى شەشىپ تاستاپ، ونى قايتىپ كيمەۋ ٷشىن ماعان ٵلى قانداي وزگەرىستەر جاساۋ كەرەك؟»— دەپ تەكسەرگەنىمىز ابزال. بۇل ٷشىن ٴبىز ەحوباعا دۇعا ەتىپ، كومەگىن سۇراپ جالىنۋىمىز كەرەك. «قۇداي پاتشالىعىن مۇرا ەتۋ» ٷشىن، بۇرىس ويلار مەن ارەكەتتەردەن ارىلۋعا بارىنشا تىرىسۋىمىز قاجەت (عالاتتىقتارعا 5:19—21). ٶزىمىزدى تاعى بىلاي دەپ تەكسەرگەنىمىز ٴجون: «ەحوباعا ۇنامدى بولۋ ٷشىن وي قالپىمدى ٵلى دە وزگەرتىپ جاتىرمىن با؟» (ەفەستىكتەرگە 4:23، 24). ٴبىز كەمەلسىزبىز، سوندىقتان جاڭا بولمىستى كيىپ، ونى شەشىپ تاستاماس ٷشىن ايانباي كۇش سالا بەرۋىمىز كەرەك. بۇل — توقتامايتىن ارەكەت. جەر بەتىندەگى ٵربىر ادام جاڭا بولمىسقا يە بولىپ، ەحوبانىڭ كەرەمەت قاسيەتتەرىن كەمەلدى تۇردە تانىتقاندا، زامان قانداي تاماشا بولادى دەسەڭىزشى!
^ 3-ابزاس كيەلى كىتاپ جازىلعان زاماندا كوپشىلىك سكيفتەرگە قاراڭعى ادامدار دەپ قاراپ، ولاردى مەنسىنبەگەن.