ماتايدىڭ ىزگى حابارىندا يسانىڭ تۋىلۋى مەن ٶمىرىنىڭ باستاپقى كەزەڭى جايلى جازعاندارى لۇقانىكىنەن وزگەشە،‏ سەبەبى ەكى جازۋشى ەكى ادامنىڭ ويلارى مەن باستان وتكەرگەندەرىنە نازار اۋدارعان.‏

ماتاي كىتابىندا جۇسىپپەن بايلانىستى وقيعالارعا باسا ٴ‌مان بەرىلگەن.‏ وندا ٴ‌جۇسىپ ٴ‌ماريامنىڭ اياعى اۋىر ەكەنىن بىلگەندە نە ىستەگەنى،‏ پەرىشتەنىڭ تۇسىندە وعان بار جايتتى ٴ‌تۇسىندىرۋى جانە ونىڭ پەرىشتەنىڭ نۇسقاۋلارىنا ساي ارەكەت ەتكەنى جايلى باياندالادى (‏ماتاي 1:‏19—‏25‏)‏.‏ سونداي-‏اق پەرىشتەنىڭ تۇسىندە ٴ‌جۇسىپتى ەسكەرتىپ،‏ وتباسىمەن مىسىرعا قاشۋدى بۇيىرعانى ٵرى ونىڭ قالاي قۇلاق اسقانى تۋرالى جازىلعان.‏ سوسىن تاعى ٴ‌بىر تۇسىندە پەرىشتەنىڭ وعان يسرايلگە ورالۋدى ايتقانى،‏ ٵرى جۇسىپتىڭ يسرايلگە قايتىپ،‏ وتباسىمەن نازارەتكە قونىس تەپكەنى دە ٴ‌سوز ەتىلەدى (‏ماتاي 2:‏13،‏ 14،‏ 19—‏23‏)‏.‏ ماتاي ٶز ىزگى حابارىنىڭ العاشقى ەكى تاراۋىندا جۇسىپتىڭ ەسىمىن 11 رەت،‏ ال ماريامدىكىن 7 اق رەت اتاپ كەتكەن.‏

ال لۇقانىڭ كىتابىندا ٴ‌ماريامنىڭ جاعدايىنا كوڭىل بولىنگەن.‏ وندا ٴ‌ماريامعا جابىرەيىل پەرىشتەنىڭ كەلگەنى،‏ ٴ‌ماريامنىڭ تۋىسى ەلىزابەتكە بارعانى جانە ەحوبانى ماداقتاپ ايتقان سوزدەرى جازىلعان (‏لۇقا 1:‏26—‏56‏)‏.‏ بۇعان قوسا،‏ شيمون يسانىڭ بولاشاقتا قانداي قيىنشىلىقتارعا ۇشىرايتىنىن ٴ‌ماريامعا ايتقانى سيپاتتالادى.‏ سودان سوڭ لۇقا يسانىڭ 12 جاسىندا وتباسىمەن عيباداتحاناعا بارعانداعى وقيعاسىن دا ايتىپ وتەدى.‏ وسى كەزدە دە لۇقا جۇسىپتىڭ ەمەس،‏ ٴ‌ماريامنىڭ ايتقان سوزدەرىن كەلتىرگەن ٵرى بۇل جاعدايدىڭ ٴ‌ماريامعا قاتتى اسەر قالدىرعانىن دا جازعان (‏لۇقا 2:‏19،‏ 34،‏ 35،‏ 48،‏ 51‏)‏.‏ ىزگى حابارىنىڭ العاشقى ەكى تاراۋىندا لۇقا ٴ‌ماريامنىڭ ەسىمىن 15 رەت،‏ ال ٴ‌جۇسىپتىڭ اتىن 4 رەت قانا اتايدى.‏ دەمەك،‏ ماتاي كوبىنەسە جۇسىپتىڭ نە ويلاپ،‏ نە ىستەگەنى جايلى ايتسا،‏ لۇقا ٴ‌ماريامعا باسا نازار اۋدارادى.‏

ەكى ىزگى حاباردىڭ اراسىندا يسانىڭ اتا-‏بابا شەجىرەسىنە دە قاتىستى وزگەشەلىك بار.‏ ماتاي ٴ‌جۇسىپتىڭ اۋلەتىن ٴ‌تىزىپ شىعادى،‏ وسىلايشا ٴ‌جۇسىپتىڭ اسىراپ العان بالاسى رەتىندە يسادا ٴ‌داۋىتتىڭ پاتشالىق بيلىگىنە زاڭدى قۇقىق بولعانىن كورسەتەدى.‏ نەگە؟‏ ويتكەنى ٴ‌جۇسىپ ٴ‌داۋىت پاتشانىڭ ۇرپاعى بولعان،‏ ياعني ٴ‌داۋىت ۇلى سۇلەيمەننىڭ اۋلەتىنەن شىققان (‏ماتاي 1:‏6،‏ 16‏)‏.‏ الايدا لۇقا ٴ‌ماريامنىڭ شەجىرەسىن كەلتىرگەن،‏ وسىلايشا يسانىڭ،‏ «ادام رەتىندە»،‏ ٴ‌داۋىتتىڭ پاتشالىق بيلىگىنە تابيعي قۇقىعى بولعاندىعىن ايقىن كورسەتكەن (‏ريمدىكتەرگە 1:‏3‏)‏.‏ نەگە؟‏ ويتكەنى ٴ‌ماريام ٴ‌داۋىت پاتشانىڭ ۇرپاعى بولعان،‏ ياعني ٴ‌داۋىت ۇلى ناتاننىڭ اۋلەتىنەن تاراعان (‏لۇقا 3:‏31‏)‏.‏ ٴ‌بىراق نەگە لۇقا كىتابىنداعى شەجىرەدە ٴ‌ماريام اكەسى ەلىنىڭ قىزى رەتىندە اتالىپ وتپەگەن؟‏ سەبەبى رەسمي قۇجاتتاردا،‏ نەگىزىنەن،‏ وتباسىنداعى ەر كىسىلەردىڭ اتتارى عانا جازىلاتىن.‏ سوندىقتان لۇقا ٶز تىزىمىندە ٴ‌جۇسىپتى ەلىنىڭ ۇلى دەپ اتاعاندا،‏ ادامدار ونى ەلىنىڭ كۇيەۋبالاسى دەپ تۇسىنگەن (‏لۇقا 3:‏23‏)‏.‏

ماتاي مەن لۇقا جازعان ىزگى حابارلاردا كەلتىرىلگەن يسانىڭ شەجىرەسى ونىڭ قۇداي ۋادە ەتكەن ٴ‌ماسىح ەكەنىن دالەلدەيدى.‏ يسانىڭ ٴ‌داۋىت پاتشانىڭ ۇرپاعى ەكەندىگى كوپشىلىككە تانىمال بولعانى سونشا،‏ پارىزشىلدار مەن ساددۋكەيلەردىڭ وزدەرى مۇنى جوققا شىعارا الماعان.‏ ماتاي مەن لۇقانىڭ اتالمىش شەجىرەنى جازىپ قالدىرعانى ٴ‌بىزدىڭ دە سەنىمىمىزدى نىعايتادى ٵرى قۇدايدىڭ باسقا دا ۋادەلەرى ورىندالاتىنىنا سەنىمدىلىگىمىزدى ارتتىرادى.‏