ادامنىڭ سىرتىنا قاراپ تون پىشپەڭىز
«ادامعا سىرت كورىنىسىنە قاراپ ۇكىم ايتۋدى قويىڭدار، ٵدىل ۇكىم ايتىڭدار» (جوحان 7:24).
اندەر: 142، 123
1. يشايا يسا تۋرالى قانداي پايعامبارلىق ايتتى جانە بۇل نەگە ٴبىزدىڭ جانىمىزعا جاي بەرەدى؟
يشايا يسا جايلى بىلاي دەپ پايعامبارلىق ەتكەن: «ول تەك كورگەنىنە ساي تورەلىك ەتپەيدى، تەك ەستىگەنىنە ساي تۇزەتپەيدى. قايتا، جارلىعا ٵدىل ۇكىم شىعارادى» (يشايا 11:3، 4). بۇل پايعامبارلىق ٴبىزدىڭ جانىمىزعا جاي بەرىپ، ٷمىت سيلايدى. نەگە ولاي دەيمىز؟ ويتكەنى ٴبىز ٶمىر ٴسۇرىپ جاتقان دۇنيە الالاۋشىلىققا تولى. ادامدار تەك كورگەنىنە سۇيەنىپ، وزگەلەرگە باعا بەرۋگە بەيىم. سول سەبەپتى ٴبىز ادامنىڭ سىرت كورىنىسىنە قاراپ ۇكىم شىعارمايتىن كەمەلدى تورەشىگە مۇقتاجبىز.
2. يسا بىزگە قانداي بۇيرىق بەردى جانە وسى ماقالادا نە جايلى تالقىلايمىز؟
2 ٴبىز كۇن سايىن وزگەلەرگە قاراپ، ولار تۋرالى بەلگىلى ٴبىر وي تۇيەمىز. ٴبىراق يسا سياقتى كەمەلدى ەمەسپىز، سوندىقتان وي-پىكىرىمىز ٵرقاشان دۇرىس بولا بەرمەيدى. ٴبىز كوزبەن كورگەن نارسەنىڭ ىقپالىنا بەرىلىپ قالۋعا بەيىمبىز. ٴبىراق يسا بىلاي دەپ بۇيىرعان: «ادامعا سىرت كورىنىسىنە قاراپ ۇكىم ايتۋدى قويىڭدار، ٵدىل ۇكىم ايتىڭدار» (جوحان 7:24). يسا ٴبىزدىڭ وزىنە ۇقساپ، وزگەلەردىڭ سىرت كورىنىسىنە قاراپ ۇكىم ايتپاعانىمىزدى ياكي سىرتىنان تون پىشپەگەنىمىزدى قالايدى. بۇل ماقالادا وي-پىكىرىمىزگە ىقپال ەتەتىن ٷش جايتتى قاراستىرامىز: ادامنىڭ ۇلتى، تۇرمىس دەڭگەيى مەن جاسى. وسى جايتتاردى قاراستىرۋ بارىسىندا يساعا مويىنسۇنىپ، وزگەلەردىڭ سىرت كورىنىسىنە قاراپ تون پىشپەۋدى ۇيرەنەمىز.
ادامنىڭ ۇلتىنا قاراپ تون پىشپەيىك
3، 4. ا) پەتىردىڭ باسقا ۇلت ادامدارىنا قاتىستى كوزقاراسى نەگە وزگەردى؟ (ماقالانىڭ باسىنداعى سۋرەتتى قاراڭىز.) ٵ) ەحوبا پەتىرگە قانداي جاڭا شىندىقتى اشتى؟
3 ەلشى پەتىر بالا كەزىنەن باسقا ۇلت ادامدارىنىڭ ٴبارى تازا ەمەس دەپ ەسەپتەپ كەلگەن. ٴبىراق ٴبىر كۇنى وعان كەساريادا تۇراتىن كورنەل ەسىمدى باسقا ۇلتتان شىققان ادامعا بارۋ تاپسىرىلدى. سول كەزدە ول نە سەزىندى دەپ ويلايسىز؟ (ەلشىلەردىڭ ىستەرى 10:17—29). دەسە دە كەيبىر جايتتار پەتىردىڭ كوزقاراسىن وزگەرتتى. مىسالى، ٴدال وسى جاعدايدىڭ الدىندا ول قۇدايدان ايان العان ەدى (ەلشىلەردىڭ ىستەرى 10:9—16). بۇل اياندا پەتىر كوكتەن ماتا ىسپەتتى نارسەنىڭ ٴتۇسىپ كەلە جاتقانىن كوردى، ال ماتادا ارام دەپ ەسەپتەلگەن الۋان ٴتۇرلى جانۋارلار بار ەدى. سودان كەيىن: «پەتىر، ورنىڭنان تۇر دا، سويىپ جە!»— دەگەن داۋىستى ەستىدى. ٴبىراق پەتىر ەش كەلىسپەدى. سوندا داۋىس: «قۇداي تازالاعاندى ەندى ارام دەپ ايتپا»،— دەدى. بۇل اياننان كەيىن پەتىر داۋىستىڭ نە ايتقىسى كەلگەنىن بىردەن ۇقپادى. وسىلاي ويلانىپ وتىرعاندا، كورنەل جىبەرگەن كىسىلەر كەلەدى. سوندا كيەلى رۋح پەتىرگە كورنەلدىڭ ۇيىنە بارۋدى تاپسىرادى دا، پەتىر الگى كىسىلەرمەن بىرگە جولعا شىعادى.
4 ەگەر پەتىر «سىرت كورىنىسكە قاراپ ۇكىم ايتقاندا»، ول ەشقاشان كورنەلدىڭ ۇيىنە بارماس ەدى. ول كەزدە ياھۋديلەر وزگە ۇلت ادامدارىنىڭ ۇيىنە اتتاپ باسپايتىن. ەندەشە، پەتىر نەگە ول ۇيگە باردى؟ جاڭاعى كورگەن ايانى مەن كيەلى رۋحتىڭ بەرگەن باسشىلىعىنا سۇيەنە وتىرىپ، پەتىر تەرىس پىكىرىن وزگەرتتى. كورنەلدىڭ اڭگىمەسىن تىڭداپ بولعاننان كەيىن ول: «قۇداي ەشكىمدى الالامايتىنىن ەندى شىنىمەن ٴبىلىپ الدىم. ول وزىنەن قورقاتىن جانە ٵدىل ارەكەت ەتەتىن ٵربىر ادامدى، قاي ۇلتتان شىقسا دا، قابىل الادى»،— دەدى (ەلشىلەردىڭ ىستەرى 10:34، 35). بۇل جاڭا تۇسىنىك پەتىردى قايران قالدىردى، ٵرى بولاشاقتا بارلىق ٴماسىحشىلەرگە اسەر ەتپەك ەدى. قالايشا؟
5. ا) ەحوبا بارلىق ٴماسىحشىلەردىڭ نەنى تۇسىنگەنىن قالايدى؟ ٵ) بۇل شىندىقتى بىلگەنىمىز ەشكىمدى الالامايتىنىمىزدى بىلدىرە مە؟ ٴتۇسىندىرىڭىز.
5 پەتىر ارقىلى ەحوبا ەشكىمدى ٴبولىپ-جارمايتىن قۇداي ەكەنىن بارلىق ٴماسىحشىلەرگە ٴتۇسىندىردى. ول ادامنىڭ ٴناسىلى مەن ۇلتىنا، رۋى مەن تىلىنە قارامايدى. ودان قورقاتىن ٵرى دۇرىس نارسەنى ىستەپ جۇرگەن ادامداردىڭ ٴبارى وعان ۇنامدى (عالاتتىقتارعا 3:26—28؛ ايان 7:9، 10). بالكىم، بۇل ٴسىزگە جاڭالىق ەمەس شىعار. ٴبىراق الالاۋشىلىق تۇرىپ جاتقان ەلىڭىزدەگى ادامداردىڭ يا ٷي ىشىندەگىلەردىڭ قانىنا ٴسىڭىپ كەتكەن بولسا شە؟ ٴسىز «مەن ەشكىمدى الالامايمىن» دەپ ويلاساڭىز دا، الالاۋشىلىقتىڭ جۇرناعى بويىڭىزدا قالىپ قويۋى مۇمكىن. ٴتىپتى قۇدايدىڭ بەت-جۇزگە قارامايتىنىن وزگەلەرگە تۇسىندىرگەننەن كەيىن دە، پەتىر ٵلى دە الالاۋشىلىقتان تولىقتاي ارىلماعانى بايقالعان (عالاتتىقتارعا 2:11—14). ەندەشە، يسانىڭ بۇيرىعىنا ساي، وزگەلەردىڭ «سىرت كورىنىسىنە قاراپ ۇكىم ايتۋدى قويۋ» ٷشىن نە ىستەي الامىز؟
6. ا) الالاۋشىلىقتان تولىق ارىلۋعا نە كومەكتەسەدى؟ ٵ) ٴبىر جاۋاپتى باۋىرلاستىڭ حاتىنان نە بايقالدى؟
6 بويىمىزدا الالاۋشىلىقتىڭ جۇرناعى قالىپ قويماعانىن ٴبىلۋ ٷشىن ٶز-ٶزىمىزدى تەكسەرۋىمىز كەرەك. ٴبىزدىڭ كوزقاراسىمىز قۇداي سوزىنەن العان بىلىمىمىزبەن سايكەس پە، جوق پا — سونى انىقتاۋىمىز كەرەك (ٴزابۇر 119:105). سونداي-اق دوسىمىزبەن سويلەسىپ، بويىمىزدان الالاۋشىلىقتىڭ نىشانىن بايقاعان-بايقاماعانىن سۇراساق بولادى. سەبەبى مۇنى ٶزىمىز بايقاماۋىمىز مۇمكىن (عالاتتىقتارعا 2:11، 14). راس، الالاۋشىلىقتىڭ ادام بويىنا ٴسىڭىپ كەتەتىنى سونشا، ونى ٶزىمىز دە اڭعارماي قالامىز. ٴدال وسىنداي جاعداي ٴبىر جاۋاپتى باۋىرلاسپەن بولعان. ول تولىق ۋاقىتتى قىزمەتتە جۇرگەن ٴبىر ەرلى-زايىپتى جايلى فيليالعا ەسەپ جىبەرەدى. بۇل وتباسىنىڭ وتاعاسى كوپشىلىك تومەن سانايتىن ۇلتتىڭ وكىلى ەكەن. سونىمەن الگى جاۋاپتى باۋىرلاس ول جايلى ٴبىراز جاقسى سوزدەر جازىپ، ٴبىراق سوڭىنان بىلاي دەپ تولىقتىرادى: «ول [وسى ۇلتتان] شىقسا دا، وتە ادەپتى، ٶمىر سالتى دا ۇلگىلى. نەگىزى، [بۇل ۇلتتان] شىققانداردىڭ كوبىسى لاس، ٵرى تۇرمىس دەڭگەيى وتە ناشار كەلەدى. ٴبىراق وزگەلەر باۋىرلاسىمىزعا قاراپ، [وسى] ورتادان شىققان ادام مىندەتتى تۇردە سونداي ٶمىر كەشەدى دەگەندى بىلدىرمەيتىنىن كورە الادى». بۇدان ٴبىز قانداي ساباق الامىز؟ ەحوبانىڭ ۇيىمىندا قانداي جاۋاپتى قىزمەت اتقارمايىق، بويىمىزدا الالاۋشىلىقتىڭ جۇرناعى قالۋى مۇمكىن. سوندىقتان ٶز-ٶزىمىزدى تەكسەرىپ، وزگە بىرەۋدىڭ كومەگىن قابىل الۋىمىز قاجەت. تاعى نە ىستەۋگە بولادى؟
7. «جۇرەگىمىزدى ايقارا اشۋدىڭ» قانداي جولدارى بار؟
7 ەگەر «جۇرەگىمىزدى ايقارا اشساق»، الالاۋشىلىقتىڭ ورنى سۇيىسپەنشىلىكپەن تولادى (قورىنتتىقتارعا 2-حات 6:11—13). ٴسىز تەك ٶز ۇلتىڭىزدان، رۋىڭىزدان شىققان ادامدارمەن نە ٶز تىلىڭىزدە سويلەيتىندەرمەن عانا ارالاسقاندى ۇناتاسىز با؟ سولاي بولسا، باسقالارمەن دە ارالاسۋعا تىرىسىڭىز. ٵرتۇرلى ورتادان شىققان باۋىرلاستاردى قىزمەتكە شاقىرىڭىز. يا بولماسا ولاردى قوناق قىلىڭىز (ەلشىلەردىڭ ىستەرى 16:14، 15). ۋاقىت وتە جۇرەگىڭىز سۇيىسپەنشىلىككە تولاتىنى سونشا — الالاۋشىلىق دەگەنگە ورىن قالمايدى. بۇدان بولەك، ادامنىڭ «سىرت كورىنىسىنە قاراپ ۇكىم ايتۋعا» يتەرمەلەيتىن تاعى ٴبىر جايت بار. سونى قاراستىرايىق.
ادامنىڭ تۇرمىس دەڭگەيىنە قاراپ تون پىشپەيىك
8. مۇسانىڭ 3-جازباسى 19:15 كە ساي، بىزدە قانداي بەيىمدىلىك بار؟
8 ٴبىز ادامداردى تۇرمىس دەڭگەيىنە قاراپ ٴبولىپ-جارۋىمىز مۇمكىن. مۇسانىڭ 3-جازباسى 19:15 تە بىلاي دەلىنگەن: «كەدەيگە الالاۋشىلىق تانىتپاڭدار، بايعا دا ورىنسىز قۇرمەت كورسەتپەڭدەر، ٴبارىن ٵدىل سوتتاڭدار». الدەكىمنىڭ قالتاسىنىڭ قالىڭ-جۇقالىعى ٴبىزدىڭ وعان دەگەن كوزقاراسىمىزعا قالاي ىقپال ەتۋى مۇمكىن؟
9. سۇلەيمەن قانداي اششى شىندىقتى جازىپ قالدىرعان جانە وندا ٴبىز ٷشىن قانداي ەسكەرتۋ بار؟
9 سۇلەيمەن رۋحتىڭ جەتەلەۋىمەن مىنا ٴبىر اشتى شىندىقتى جازىپ قالدىرعان: «كەدەيدى ٴتىپتى جاقىن ادامى جەك كورەر، ال بايدىڭ دوستارى كوپ بولار» (ناقىل سوزدەر 14:20). بۇل ناقىل سوزدە قانداي ەسكەرتۋ بار؟ اباي بولماساق، باقۋاتتى باۋىرلاستارمەن دوستاسقىمىز كەلىپ، قاراپايىم تۇراتىن باۋىرلاستاردان قاشقاقتاي باستاۋىمىز مۇمكىن. ادامداردى دۇنيە-مۇلكىنە قاراپ ٴبولىپ-جارۋ نەگە قاۋىپتى؟
10. جاقىپ ٴماسىحشىلەرگە قانداي ەسكەرتۋ ايتقان؟
10 ەگەر باۋىرلاستاردى دۇنيە-مۇلكىنە قاراپ ٴبولىپ-جاراتىن بولساق، قاۋىمنىڭ جىك-جىككە بولىنۋىنە سەبەپشى بولۋىمىز مۇمكىن. وسىنداي جاعداي ٴبىرىنشى عاسىرداعى كەيبىر قاۋىمداردا بولعان، سوندىقتان جاقىپ ولاردى ەسكەرتكەن (جاقىپ 2:1—4 وقىڭىز). ٴبىز دە قاۋىمداعى باۋىرلاستاردىڭ جىككە بولىنۋىنە جول بەرمەۋىمىز كەرەك. ولاي بولسا، ادامداردىڭ تۇرمىس دەڭگەيىنە قاراپ تون پىشۋدەن قالاي اۋلاق بولا الامىز؟
بويىمىزدا الالاۋشىلىقتىڭ بار-جوعىن انىقتاۋ ٷشىن، وزگە بىرەۋدىڭ كومەگىن كىشىپەيىلدىلىكپەن قابىل الۋىمىز قاجەت
11. ادامنىڭ ەحوبامەن قارىم-قاتىناسى دۇنيە-مۇلكىنە بايلانىستى ما؟ ٴتۇسىندىرىڭىز.
11 ٴبىز باۋىرلاستارعا ەحوبانىڭ كوزىمەن قاراۋىمىز كەرەك. ەحوبا ادامدى بايلىعىنا نە كەدەيلىگىنە قاراپ باعالامايدى. ٴبىزدىڭ ەحوبامەن قارىم-قاتىناسىمىز قالتامىزدىڭ قالىڭدىعىنا يا دۇنيە-مۇلكىمىزگە بايلانىستى ەمەس. راس، يسا «باي ادامنىڭ كوك پاتشالىعىنا كىرۋى قيىن بولاتىنىن» ايتقان، ٴبىراق ول مۇنى مۇمكىن ەمەس دەگەن جوق (ماتاي 19:23). يسانىڭ تاعى: «جارلىلار، سەندەر باقىتتىسىڭدار، ويتكەنى قۇداي پاتشالىعى سەندەرگە تيەسىلى»،— دەگەنى دە بار (لۇقا 6:20). ٴبىراق بۇل سوزدەرى كەدەي-كەپشىكتەردىڭ بارلىعى يسانى تىڭداپ، ەرەكشە باتاعا كەنەلەتىنىن بىلدىرمەدى. ويتكەنى يسانىڭ سوڭىنان ەرمەگەن كەدەي ادامدار كوپ بولعان. سونىمەن، كورىپ وتىرعانىمىزداي، ادامنىڭ دۇنيە-مۇلكىنە قاراپ، ونى قۇدايعا جاقىن نە الىس دەپ ايتا المايمىز.
12. كيەلى كىتاپتا بايلارعا دا، كەدەيلەرگە دە قانداي كەڭەس بەرىلگەن؟
12 ەحوبانىڭ حالقىنىڭ اراسىندا باي باۋىرلاستار دا، قاراپايىم تۇراتىن باۋىرلاستار دا بار. ٴبىراق ولاردىڭ ٴبارى ەحوبانى جاقسى كورەدى، وعان بار جۇرەگىمەن قىزمەت ەتەدى. كيەلى كىتاپ باي ادامداردى «ۇمىتتەرىن تۇراقسىز بايلىققا ەمەس»، قۇدايعا ارتۋعا تالپىندىرادى (تىموتەگە 1-حات 6:17—19 وقىڭىز). سونداي-اق وندا ەحوبانىڭ بارلىق قىزمەتشىلەرىنە — بايىنا دا، كەدەيىنە دە — اقشاقۇمارلىقتىڭ قاۋىپتى ەكەنى ەسكەرتىلگەن (تىموتەگە 1-حات 6:9، 10). باۋىرلاستارىمىزعا ەحوبانىڭ كوزىمەن قارايتىن بولساق، ولاردى دۇنيە-مۇلكىنىڭ بار-جوقتىعىنا قاراپ الالامايمىز. ال ادامنىڭ جاسى تۋرالى نە دەۋگە بولادى؟ جاسقا قاراپ تون ٴپىشۋ دۇرىس پا؟
ادامنىڭ جاسىنا قاراپ تون پىشپەيىك
13. قارت ادامداردى سىيلاۋعا قاتىستى كيەلى كىتاپتا نە دەلىنگەن؟
13 قارت كىسىلەردى قۇرمەتتەۋىمىز كەرەكتىگى كيەلى كىتاپتىڭ ٴبىراز جەرىندە ايتىلعان. مىسالى، مۋسانىڭ 3-جازباسى 19:32 دە: «اق شاشتى قاريانىڭ الدىندا تۇرەگەلىڭدەر، قارت كىسىگە قۇرمەت كورسەتىڭدەر. قۇدايدان قورقىڭدار»،— دەلىنگەن. ال ناقىل سوزدەر 16:31 دە: «اق شاش — اسەم ٴتاج، ٵدىل جولمەن جۇرگەن سوعان قول جەتكىزەر»،— دەگەن سوزدەر بار. سونداي-اق ەلشى پاۋىل تىموتەگە: «ۇلكەن كىسىگە قاتتى سويلەمە، قايتا، ٶز اكەڭدەي كور»،— دەگەن (تىموتەگە 1-حات 5:1، 2). تىموتە ۇلكەن جاستاعى باۋىرلاستارعا باسشىلىق بەرۋگە قۇزىرلى بولسا دا، ولارعا ٵردايىم جاناشىرلىق پەن قۇرمەت تانىتۋ كەرەك بولعان.
14. جاسى ۇلكەن ادامدى قاي كەزدە تۇزەتۋ كەرەك بولادى؟
14 ال ەگەر ۇلكەن جاستاعى كىسى ٴبىلىپ تۇرىپ كۇنا جاساسا نەمەسە ەحوباعا ۇنامسىز نارسەنى ناسيحاتتاپ جۇرسە شە؟ ەحوبا بىلە تۇرا كۇنا جاساعان ادامنىڭ جاسى ۇلكەن نە سىيلى ەكەن دەپ كۇناسىنا كوز جۇما سالمايدى. يشايا 65:20 دا جازىلعان پرينسيپكە كوڭىل بولەيىكشى. وندا: «كۇناكاردى، ٴتىپتى جۇزگە كەلسە دە، قارعىس اتادى»،— دەلىنگەن. ەزەكيەل العان اياننان دا وسى سياقتى ٴپرينسيپتى بايقاۋعا بولادى (ەزەكيەل 9:5—7). دەمەك، ەجەلدەن بار ٴتاڭىر يە ەحوبانى قۇرمەتتەۋ بارىنەن دە ماڭىزدى (دانيال 7:9، 10، 13، 14). ەحوبانى قۇرمەتتەگەنىمىز بىزگە باتىلدىق بەرەدى. سوندا ٴبىز شالىس قادام باسقان ادامدى، جاسى ۇلكەن بولسا دا، تۇزەتە الامىز (عالاتتىقتارعا 6:1).
15. جاس ەر باۋىرلاستاردى قۇرمەتتەۋگە قاتىستى ەلشى پاۋىلدان نە ۇيرەنەمىز؟
15 ال جاس ەر باۋىرلاستار جونىندە نە دەۋگە بولادى؟ ولاردى جاسسىنىپ، قۇرمەتتەمەۋ دۇرىس پا؟ جوق. پاۋىل تىموتەگە: «ەشكىمنىڭ ٶزىڭدى جاسسىنىپ، مەنسىنبەي جۇرۋىنە جول بەرمە. قايتا، ادال بولىپ جۇرگەندەرگە سوزىڭمەن، ٴجۇرىس-تۇرىسىڭمەن، سۇيىسپەنشىلىگىڭمەن، سەنىمىڭمەن جانە پاك تازالىعىڭمەن ۇلگى كورسەت»،— دەگەن (تىموتەگە 1-حات 4:12). پاۋىل بۇل سوزدەردى جازعاندا، تىموتەنىڭ جاسى وتىزداردا بولسا كەرەك. سوعان قاراماستان، پاۋىل وعان وتە ماڭىزدى جاۋاپكەرشىلىكتەر تاپسىرعان. بۇدان قانداي وي تۇيەمىز؟ جاس ەر باۋىرلاستاردى جاستىعىنا قاراپ مەنسىنبەۋ دۇرىس ەمەس. ٶزىڭىز ويلاپ كورىڭىزشى، يسا 33 جاسقا كەلگەنگە دەيىن قانشاما ٸس اتقاردى؟!
16، 17. ا) اقساقالدار ەر باۋىرلاستىڭ قىزمەت كومەكشىسى نەمەسە اقساقال بولۋعا لايىق يا لايىق ەمەس ەكەنىن قالاي انىقتايدى؟ ٵ) جەرگىلىكتى ادەت-عۇرىپتار مەن جەكە پىكىرىمىز قالاي كيەلى جازبالارعا قايشى كەلۋى مۇمكىن؟
16 كەيبىر حالىقتاردىڭ مادەنيەتىندە جاس جىگىتتەرگە قۇرمەتپەن قارامايدى. سونىڭ اسەرىنەن كەيبىر اقساقالدار قاۋىمداعى جاس ەر باۋىرلاس قىزمەت كومەكشىسىنە نەمەسە اقساقالعا قويىلاتىن تالاپتارعا ساي كەلسە دە، ونى سول قىزمەتكە ۇسىنباۋى مۇمكىن. ٴبىراق ەر باۋىرلاس قىزمەت كومەكشىسى نە اقساقال بولىپ تاعايىندالۋ ٷشىن بەلگىلى ٴبىر جاستا بولۋ كەرەك دەپ كيەلى كىتاپتىڭ ەش جەرىندە ايتىلماعان (تىموتەگە 1-حات 3:1—10، 12، 13؛ تيتكە 1:5—9). ەگەر اقساقال ٶز مادەنيەتىنىڭ ىقپالىمەن وسىعان قاتىستى ەرەجە ورناتاتىن بولسا، ونىڭ بۇل ارەكەتى قۇداي سوزىنە ساي ەمەس. اقساقالدار جاس ەر باۋىرلاسقا قاتىستى شەشىم قابىلداعاندا، ٶز پىكىرىنە يا سول جەردىڭ سالتىنا ەمەس، قۇداي سوزىندەگى تالاپتارعا جۇگىنۋ كەرەك (تىموتەگە 2-حات 3:16، 17).
17 ەگەر اقساقالدار قىزمەت كومەكشىسىن يا اقساقالدى تاعايىنداۋعا قاتىستى كيەلى كىتاپتاعى تالاپتاردى ەلەمەسە، ولار تاعايىندالۋعا لايىق بولىپ تۇرعان باۋىرلاستى ۇسىنۋعا اسىقپاۋى مۇمكىن. ٴبىر ەلدە بولعان جاعدايدى الايىق. ٴبىر قىزمەت كومەكشىسى قاۋىمداعى ٶز مىندەتتەرىن جاقسى اتقارىپ جۇرەدى. اقساقالدار ونىڭ جازبالارداعى تالاپتارعا ساي كەلەتىنىمەن كەلىسەدى. ٴبىراق ٴبارىبىر اقساقال رەتىندە تاعايىنداۋعا ۇسىنبايدى. ويتكەنى كەيبىر جاسى ۇلكەن اقساقالدار ول تىم جاس كورىنەدى دەگەن ويدا بولادى. وكىنىشكە قاراي، بۇل باۋىرلاس تۇرىنە بولا اقساقال بولىپ تاعايىندالمايدى. بۇنداي كوزقاراس دۇنيەجۇزىندەگى كوپتەگەن ەلدەردە كەزدەسەتىن سياقتى. ٴبىز ٶز پىكىرىمىزگە يا جەرگىلىكتى ادەت-عۇرىپقا ەمەس، كيەلى كىتاپقا جۇگىنۋگە ٴتيىسپىز. سوندا ٴبىز يساعا مويىنسۇنىپ، وزگەلەردىڭ سىرتىنا قاراپ تون پىشپەيتىن بولامىز.
«ٵدىل ۇكىم ايتىڭدار»
18، 19. باۋىرلاستارعا ەحوبانىڭ كوزىمەن قاراۋعا نە كومەكتەسەدى؟
18 ٴبىز كەمەلسىز بولساق تا، ەحوباعا ەلىكتەپ، ادامدى الالاماۋدى ۇيرەنە الامىز (ەلشىلەردىڭ ىستەرى 10:34، 35). سول ٷشىن ٴبىز ٵردايىم قۇداي سوزىندەگى ەسكەرتۋلەرگە دەن قويعانىمىز ٴجون. ونداعى كەڭەستەردى قولدانۋ ارقىلى يسانىڭ «سىرت كورىنىسكە قاراپ ۇكىم ايتۋدى قويىڭدار» دەگەن بۇيرىعىن ورىندايمىز (جوحان 7:24).
19 جۋىردا پاتشامىز يسا ٴماسىح بۇكىل ادامزاتقا ۇكىم ايتاتىن بولادى. سوندا ول وزىنىڭ ۇكىمىن كورگەنىنە يا ەستىگەنىنە ەمەس، قۇدايدىڭ ٵدىل تالاپتارىنا نەگىزدەيدى (يشايا 11:3، 4). ٴبىز سول تاماشا كەزەڭدى كورۋگە اسىقپىز!