بىلتىرعى جىلى دۇنيەجۇزى بويىنشا مىڭداعان ەر باۋىرلاس اقساقال يا قىزمەت كومەكشىسى بولىپ تاعايىندالدى.‏ ٴ‌سىز دە سولاردىڭ ٴ‌بىرى بولساڭىز،‏ ەحوباعا جانە باۋىرلاستارىڭىزعا قىزمەت ەتۋدىڭ وسىنداي م‍ۇمكىندىگى ٷشىن قۋانىشتى شىعارسىز.‏

قۋانىشپەن قاتار ازداپ قوبالجيتىن دا بولارسىز.‏ بۇل —‏ كادىمگى نارسە.‏ دجەيسون ەسىمدى جاس اقساقال بىلاي دەيدى:‏ «العاش تاعايىندالعان كەزىمدە،‏ وزىمە جۇكتەلگەن جاڭا جاۋاپكەرشىلىكتەردى ويلاپ قاتتى ۋايىمدادىم».‏ ەجەلدە مۇسا دا،‏ ەرەميا دا ەحوبادان جاڭا تاپسىرما العان كەزدە،‏ بۇل قولىمنان كەلمەيدى دەپ ويلاعان (‏مۇسانىڭ 2-‏جازباسى 4:‏10؛‏ ەرەميا 1:‏6‏)‏.‏ بۇل سەزىم سىزگە دە تانىس بولسا،‏ قالاي سەنىمدىلىكتى ارتتىرىپ،‏ العا باسا بەرۋگە بولادى؟‏ تىموتەنىڭ ۇلگىسىن قاراستىرايىق.‏ ودان ۇيرەنەرىمىز كوپ (‏ەلشىلەردىڭ ىستەرى 16:‏1—‏3‏)‏.‏

ەلشى پاۋىلمەن العاش رەت ساپارعا شىققاندا،‏ تىموتەنىڭ جاسى جيىرمالاردا بولعانعا ۇقسايدى.‏ وسى شاقىرۋدى العان كەزدە،‏ جاس بولعان تىموتەگە ٴ‌تالىم بەرۋگە جانە كەڭەس بەرۋگە قابىلەتى مەن تاجىريبەسى جەتىسپەيتىندەي كورىنگەن شىعار (‏تىموتەگە 1-‏حات 4:‏11،‏ 12؛‏ تىموتەگە 2-‏حات 1:‏1،‏ 2،‏ 7‏)‏.‏ ايتسە دە ول العا باسۋىن دوعارمادى.‏ سودان ارادا ون جىل وتكەن سوڭ،‏ پاۋىل فىلىپىلىكتەرگە جازعان حاتىندا:‏ «يەمىز يسا قالاسا،‏ جاقىندا سەندەرگە تىموتەنى جىبەرمەك ويىم بار»،‏—‏ دەدى.‏ نەگە بۇلاي ەتكەلى جاتقانىن ٴ‌تۇسىندىرىپ،‏ پاۋىل:‏ «ول سياقتى مەنىمەن نيەتتەس.‏.‏.‏ باسقا ەشكىمىم جوق»،‏—‏ دەگەن (‏فىلىپىلىكتەرگە 2:‏19،‏ 20‏)‏.‏

تىموتە نە سەبەپتى اقساقالدار ٷشىن تاماشا ۇلگى؟‏ مۇنىڭ التى سەبەبىن قاراستىرايىق.‏

1.‏ ول شىن جۇرەكتەن ادامداردىڭ قامىن ويلاعان.‏ پاۋىل فىلىپىدەگى باۋىرلاستارعا تىموتە جايلى:‏ «ول.‏.‏.‏ شىن كوڭىلدەن قامدارىڭدى ويلايدى»،‏—‏ دەپ جازعان (‏فىلىپىلىكتەرگە 2:‏20‏)‏.‏ تىموتە سول باۋىرلاستاردىڭ ەحوباعا ەتەنە جاقىن بولعانىن قالادى.‏ سول ٷشىن ول ۋاقىتى مەن كۇشىن اياماي،‏ ولارعا كومەكتەسۋگە دايىن بولدى.‏

اقساقال بولىپ قىزمەت ەتىپ جاتقانىنا 20 جىلدان اسقان ۋيليام جاڭا اقساقالدارعا ۇنەمى بىلاي دەپ جۇرەدى:‏ «باۋىرلاستاردى جاقسى كورىڭدەر.‏ ۇيىمداستىرۋ جاعىنان گورى باۋىرلاستاردىڭ قاجەتتىلىكتەرىنە كوبىرەك كوڭىل بولىڭدەر».‏ كەيبىر اۆتوبۋس جۇرگىزۋشىلەرى جولاۋشىلاردى مىنگىزۋدى ەمەس،‏ ايالدامالارعا ۋاقتىلى بارۋدى عانا ويلايدى.‏ مۇنداي جۇرگىزۋشى سياقتى بولماڭىز.‏

2.‏ ول ەحوبا تاپسىرعان قىزمەتتى باستى ورىنعا قويعان.‏ پاۋىل ايتقانداي،‏ تىموتە «يسا ٴ‌ماسىحتىڭ ەمەس،‏ ٶز م‍ۇددەلەرىن ويلاعان» ادامداردان ايرىقشالانعان (‏فىلىپىلىكتەرگە 2:‏21‏)‏.‏ پاۋىل اينالاسىنداعى باۋىرلاستاردىڭ جەكە شارۋالارىنا تىم كوپ ٴ‌مان بەرەتىنىن بايقاعان.‏ كەيدە ولار وزدەرىنىڭ م‍ۇددەلەرىن ەحوباعا قىزمەت ەتۋدەن دە جوعارى قويعان.‏ ٴ‌بىراق تىموتە ويتپەدى.‏ كوبىرەك قىزمەت ەتۋدىڭ م‍ۇمكىندىگى تۋا قالعاندا،‏ ول:‏ «مەن بارمىن!‏ مەنى جىبەر!‏»—‏ دەگەن يشايا ىسپەتتى رۋح تانىتتى (‏يشايا 6:‏8‏)‏.‏

جەكە باستىڭ قاجەتتىلىكتەرى مەن قاۋىمنىڭ قاجەتتىلىكتەرىن ويلاۋدا قالاي تەپە-‏تەڭدىكتى ساقتاي الاسىز؟‏ بىرىنشىدەن،‏ پاۋىلدىڭ مىنا كەڭەسىن ۇستانىڭىز:‏ «نەنىڭ ماڭىزدىراق ەكەنىنە كوز جەتكىزىڭدەر» (‏فىلىپىلىكتەرگە 1:‏10‏)‏.‏ ەحوبا تاپسىرعان قىزمەتتى ٴ‌بىرىنشى ورىنعا قويىڭىز.‏ ەكىنشىدەن،‏ تىم كوپ ۋاقىت پەن كۇش الاتىن ىستەردەن اۋلاق بولىڭىز.‏ پاۋىل تىموتەگە:‏ «سەن جاستىق شاققا ٴ‌تان قالاۋلاردان اۋلاق بول،‏ قايتا،‏.‏.‏ ادىلدىك،‏ سەنىم،‏ سۇيىسپەنشىلىك پەن تاتۋلىققا ۇمتىل»،‏—‏ دەگەن (‏تىموتەگە 2-‏حات 2:‏22‏)‏.‏

3.‏ ول تەر توگىپ قىزمەت ەتكەن.‏ پاۋىل تىموتە جايلى:‏ «ول ىزگى حاباردى تاراتۋدا اكەسىنە قولعابىس ەتكەن بالاداي مەنىمەن بىرگە قىزمەت  ەتىپ كەلەدى»،‏—‏ دەگەن (‏فىلىپىلىكتەرگە 2:‏22‏)‏.‏ تىموتە جالقاۋ بولماعان.‏ ول پاۋىلمەن بىرگە ايانباي قىزمەت ەتكەن،‏ ال بۇنىسى ولاردىڭ دوستىقتارىن دا نىعايتقان.‏

بۇگىندە ەحوبانىڭ ۇيىمىندا اتقاراتىن جۇمىس وتە كوپ.‏ بۇل جۇمىس قاناعات سيلايدى.‏ ٵرى باۋىرلاستارعا دا جاقىنداي تۇسەسىز.‏ سوندىقتان «يەمىزدىڭ ىسىندە ٵرقاشان كوپ ەڭبەكتەنىڭىز» (‏قورىنتتىقتارعا 1-‏حات 15:‏58‏)‏.‏

4.‏ ول بىلگەنىنە ساي ارەكەت ەتكەن.‏ پاۋىل تىموتەگە بىلاي دەپ جازعان:‏ «سەن مەنىڭ ۇيرەتكەندەرىمە دەن قويدىڭ،‏ ٶمىر سالتىمدى،‏ ماقساتىم،‏ سەنىمىم،‏ شىدامدىلىعىم،‏ سۇيىسپەنشىلىگىم مەن تاباندىلىعىمدى ۇلگى تۇتتىڭ» (‏تىموتەگە 2-‏حات 3:‏10‏)‏.‏ تىموتە ٴ‌بىلىپ-‏ۇيرەنگەنىن ٸس جۇزىندە قولدانعان،‏ سوندىقتان كوپ جاۋاپكەرشىلىككە يە بولعان (‏قورىنتتىقتارعا 1-‏حات 4:‏17‏)‏.‏

كوپ جىل بويى اقساقال بولىپ قىزمەت ەتىپ كەلە جاتقان توم ەسىمدى باۋىرلاستىڭ مىسالىن الايىق.‏ كەزىندە وعان ٴ‌بىر تاجىريبەلى اقساقال كوڭىل ٴ‌بولىپ،‏ جاقسىلاپ ۇيرەتكەن ەكەن.‏ توم بىلاي دەيدى:‏ «مەن ونىمەن ۇنەمى اقىلداسىپ،‏ بەرگەن كەڭەسىن قولداناتىنمىن.‏ سونىڭ ارقاسىندا وزىمە دەگەن سەنىمدىلىگىم تەز ارتتى».‏ بالكىم،‏ ٴ‌سىز دە ٶزىڭىز ۇلگى تۇتاتىن تاجىريبەلى اقساقالدىڭ كومەگىنە جۇگىنە الارسىز؟‏

5.‏ ول جاتتىعا بەردى.‏ پاۋىل تىموتەگە:‏ «قۇدايعا شىن بەرىلگەندىك دامىتۋدى ماقسات ەتىپ،‏ جاتتىعا بەر»،‏—‏ دەپ كەڭەس بەرگەن (‏تىموتەگە 1-‏حات 4:‏7‏)‏.‏ سپورتشىنىڭ جاتتىقتىرۋشىسى بولسا دا،‏ ول ٶزى جاتتىعا بەرۋى كەرەك.‏ پاۋىل تىموتەنى تاعى بىلاي دەپ تالپىندىردى:‏ «وزگەلەردىڭ الدىندا وقۋدى،‏ ولارعا ناسيحات ايتۋدى،‏ ٴ‌تالىم بەرۋدى بار ىقىلاسىڭمەن جالعاستىرا بەر.‏.‏.‏ وسىلار تۋرالى وي جۇگىرت،‏ ٶزىڭدى سولارعا ارنا،‏ وسىلايشا جەتىستىكتەرىڭ جۇرتتىڭ بارىنە انىق كورىنەتىن بولسىن» (‏تىموتەگە 1-‏حات 4:‏13—‏15‏)‏.‏

ٴ‌سىز دە ٴ‌بىلىمىڭىزدى ارتتىرىپ،‏ قابىلەتتەرىڭىزدى شىڭداي بەرىڭىز.‏ كيەلى كىتاپتى تىڭعىلىقتى زەرتتەڭىز،‏ ۇيىمنان كەلگەن سوڭعى باسشىلىقتارمەن تانىسىپ وتىرىڭىز.‏ وزىڭىزگە تىم سەنىمدى بولماڭىز.‏ كەز كەلگەن ماسەلەنى تىڭعىلىقتى زەرتتەمەي-‏اق شەشۋگە تاجىريبەم جەتەدى دەپ ويلاماڭىز.‏ تىموتە سياقتى،‏ «وزىڭىزگە جانە بەرىپ جاتقان تالىمىڭىزگە ٵردايىم دەن قويىڭىز» (‏تىموتەگە 1-‏حات 4:‏16‏)‏.‏

6.‏ ول ەحوبانىڭ رۋحىنا ارقا سۇيەدى.‏ تىموتەنىڭ قىزمەتى جايلى ايتقاندا،‏ پاۋىل ونى:‏ «وزىڭە سەنىپ تاپسىرىلعان قازىنانى بويىمىزداعى كيەلى رۋحتىڭ كومەگىمەن امان ساقتا»،‏—‏ دەپ ەسكەرتكەن (‏تىموتەگە 2-‏حات 1:‏14‏)‏.‏ ٴ‌يا،‏ تىموتە قۇدايدىڭ رۋحىنا ارقا سۇيەۋ كەرەك بولدى.‏

كوپ جىل بويى اقساقال بولىپ قىزمەت ەتەتىن دونالد بىلاي دەيدى:‏ «تاعايىندالعان باۋىرلاستار قۇدايمەن قارىم-‏قاتىناستارىن قاتتى باعالاۋ كەرەك.‏ وسىلاي ەتەتىن باۋىرلاستاردىڭ «كۇش-‏قۋاتتارى ارتا» بەرەدى.‏ قۇداي رۋحىن سۇراپ دۇعا ەتسە جانە رۋحتىڭ جەمىسىن دامىتا بەرسە،‏ ولار باۋىرلاستارى ٷشىن ناعىز باتا بولادى» (‏ٴ‌زابۇر 84:‏7؛‏ پەتىردىڭ 1-‏حاتى 4:‏11‏)‏.‏

ٴ‌سىز سياقتى جاڭادان تاعايىندالعان اقساقالدار مەن قىزمەت كومەكشىلەرىنىڭ ەحوباعا دەگەن قىزمەتتەرىندە العا باسىپ جاتقانىن كورىپ،‏ قۋانىپ قالامىز.‏ جوعارىدا اتالىپ وتكەن دجەيسون بىلاي دەيدى:‏ «اقساقال بولىپ قىزمەت ەتىپ كەلە جاتقاننان بەرى مەن كوپ نارسەگە ۇيرەندىم،‏ سەنىمدىلىگىم دە ارتا ٴ‌تۇستى.‏ قازىر مەن وسى قىزمەتىمنىڭ قۋانىشىن كورىپ ٴ‌جۇرمىن،‏ ٵرى ونى كەرەمەت مارتەبە سانايمىن!‏»‏

ٴ‌سىز ٵرى قاراي دا العا باسا بەرەسىز بە؟‏ ەگەر تىموتەنى ۇلگى تۇتساڭىز،‏ ٴ‌سىز دە اياۋلى باۋىرلاستارىڭىز ٷشىن ناعىز باتا بولاسىز!‏