جومارت جاندار باقىتتى
«بەرگەن باقىتتى» (ەلشىلەردىڭ ىستەرى 20:35).
اندەر: 76، 110
1. ەحوبانىڭ جومارت ەكەنىن نە دالەلدەيدى؟
ٴبىر كەزدەرى بۇكىل عالامدا ەحوبادان باسقا ەشكىم بولماعان. كەيىن ول باسقالارعا دا ٶمىر سيلاۋدى شەشتى. سودان كوكتە جانە جەردە سانالى تۇلعالاردى جاراتتى. راسىندا دا، «باقىتتى قۇداي» ەحوبا يگى نارسەلەردى بەرگەندى ۇناتادى (تىموتەگە 1-حات 1:11؛ جاقىپ 1:17). ول ٴبىزدىڭ دە باقىتتى بولعانىمىزدى قالايدى. سوندىقتان ٴبىزدى جومارتتىققا ۇيرەتەدى (ريمدىكتەرگە 1:20).
2، 3. ا) جومارت بولعانىمىز نەگە ٴبىزدى باقىتقا بولەيدى؟ ٵ) بۇل ماقالادان نە بىلەمىز؟
2 قۇداي ادام بالاسىن وزىنە ۇقساس ەتىپ جاراتقان (مۇسانىڭ 1-جازباسى 1:27). دەمەك، قۇدايدا بار قاسيەتتەردى ٴبىز دە تانىتا الامىز. ولاي بولسا، شىنايى باقىتقا قول جەتكىزىپ، ەحوبانىڭ باتاسىنا بولەنۋ ٷشىن وعان ەلىكتەۋىمىز قاجەت. بۇل ٷشىن وزگەلەردىڭ مۇددەلەرىن ويلاپ، بەرەگەن بولعانىمىز ٴجون (فىلىپىلىكتەرگە 2:3، 4؛ جاقىپ 1:5). نەگە باقىتتى بولۋ ٷشىن جومارت بولۋ كەرەك؟ ويتكەنى ەحوبا ٴبىزدى سولاي ەتىپ جاراتتى. ٴتىپتى كەمەلسىز بولساق تا، ەحوباعا ەلىكتەپ، ول سياقتى جومارت بولا الامىز.
3 قازىر ٴبىز كيەلى كىتاپتا جومارتتىق جايلى نە دەلىنگەنىن قاراستىرىپ، ٴبىراز نارسەگە ۇيرەنەمىز. قولىمىز اشىق بولسا، ەحوبانىڭ كوڭىلىنەن شىعاتىنىمىزدى بىلەمىز. سونىمەن قاتار جومارتتىقتىڭ ارقاسىندا ەحوبانىڭ تاپسىرعان ٸسىن جاقسى اتقارا الاتىنىمىزدى كورەمىز. جومارتتىق پەن باقىتتىڭ اراسىنداعى بايلانىستى دا تالقىلايمىز. ال سوڭىندا نەگە ٵردايىم جومارت بولۋدىڭ ماڭىزدى ەكەنىن ٴسوز ەتەمىز.
بەرەگەن بولساق، ەحوبانىڭ كوڭىلىنەن شىعامىز
4، 5. ەحوبا مەن يسا قالاي جومارتتىق تانىتتى جانە نەگە ٴبىز ولارعا ەلىكتەۋىمىز قاجەت؟
4 ەحوبا ٴبىزدىڭ وزىنە ەلىكتەگەنىمىزدى قالايدى. سوندىقتان جومارت بولساق، ول قۋانادى (ەفەستىكتەرگە 5:1). ول ادامداردىڭ باقىتتى بولعانىن دا قالايدى. بۇعان دالەل — ونىڭ ٴبىزدى كەرەمەتتەي ەتىپ جاراتقانى، تاماشا باسپانامىز جەردى جانە ونداعىنىڭ ٴبارىن ٴبىزدىڭ يگىلىگىمىز ٷشىن جاراتقانى (ٴزابۇر 104:24؛ 139:13—16). ەحوبا سياقتى، ٴبىز دە باسقالاردى باقىتتى ەتۋگە تىرىسساق، بۇل وعان كورسەتكەن قۇرمەتىمىز بولادى.
5 ٴبىز ەحوبامەن قاتار يساعا دا ەلىكتەيمىز. ول ادام بالاسى ٷشىن جومارت بولۋدىڭ كەرەمەت ۇلگىسىن قالدىردى. يسا ٶزى جايلى بىلاي دەگەن: «ادام ۇلى... وزىنە قىزمەت ەتكىزۋگە ەمەس، ٶزى قىزمەت ەتىپ، كوپتەگەن ادامدار ٷشىن جانىن تولەم رەتىندە بەرۋگە كەلدى» (ماتاي 20:28). سول سەبەپتى ەلشى پاۋىل ماسىحشىلەرگە مىناداي كەڭەس بەردى: «سەندەر دە ٴماسىح يسا سياقتى ويلاڭدار. [ول] بارلىعىنان ٶز ەركىمەن باس تارتىپ، قۇلدىڭ كەيپىن قابىلدادى» (فىلىپىلىكتەرگە 2:5، 7). ٴبىز كەلەسىدەي سۇراقتى وي ەلەگىنەن وتكىزسەك بولادى: «مەن يساعا بۇرىنعىدان دا جاقسىراق ەلىكتەي الامىن با؟» (پەتىردىڭ 1-حاتى 2:21 وقىڭىز).
6. يسانىڭ قايىرىمدى ساماريالىق تۋرالى اڭگىمەسىنەن نە ۇيرەنەمىز؟ (ماقالانىڭ باسىنداعى سۋرەتتى قاراڭىز.)
6 ەحوبا وزىنىڭ جانە يسانىڭ كەرەمەت جومارتتىعىنا ەلىكتەگەنىمىزدى كورگەندە، بىزگە ريزا بولادى. بۇل ٷشىن وزگەلەردىڭ قامىن ويلاپ، ولارعا كومەكتەسۋدىڭ جولدارىن ىزدەۋىمىز كەرەك. مۇنىڭ ماڭىزدىلىعى يسانىڭ قايىرىمدى ساماريالىق تۋرالى اڭگىمەسىنەن كورىنەدى (لۇقا 10:29—37 وقىڭىز). يسا بۇل اڭگىمەنى نە ٷشىن ايتقان ەدى؟ سەبەبى ٴبىر ياھۋدي كىسى ودان: «مەن ناقتى كىمدى ٴسۇيۋىم كەرەك؟»— دەپ سۇراعان بولاتىن. سونداعى يسانىڭ جاۋابىنان كەلەسىدەي وي تۇيەمىز: ادامدار كىم بولماسىن، قايدان بولماسىن، ولارعا كومەكتەسۋگە ٴتيىسپىز. ەحوباعا ۇنامدى بولعىمىز كەلسە، الگى ساماريالىق كىسى سياقتى جومارتتىق تانىتۋىمىز كەرەك.
7. ەحوبانىڭ ايتقانىمەن ٴجۇرۋ ەڭ جاقسى جول ەكەنىنە سەنەتىنىمىزدى قالاي كورسەتە الامىز؟ ٴتۇسىندىرىڭىز.
7 كەزىندە ەدەم باعىندا كوتەرىلگەن داۋلى ماسەلە جايلى ويلانساق، جومارت تا كەڭپەيىل بولۋدىڭ ماڭىزدىلىعىن جەتە تۇسىنەمىز. شايتاننىڭ ايتۋى بويىنشا، ادام مەن حاۋا ەحوبانىڭ ٴتىلىن الماي، تەك ٶز باستارىن ويلاسا، اناعۇرلىم باقىتتى بولار ەدى. سودان حاۋا شايتانعا يلانىپ قالدى دا، ٶز قارا باسىن ويلاپ كەتىپ، قۇداي سياقتى بولعىسى كەلدى. ادام دا ٶزىن ويلاپ، قۇدايعا قاراعاندا حاۋاعا جاققىسى كەلدى (مۇسانىڭ 1-جازباسى 3:4—6). مۇنىڭ سالدارى وتە قايعىلى بولدى. ٴيا، ٶزىمشىل ادام باقىتتى بولا المايدى. ال ەگەر وزگەلەردىڭ مۇددەسىن ويلايتىن جومارت ادام بولساق، ەحوبانىڭ ايتقانىمەن ٴجۇرۋ ەڭ جاقسى جول ەكەنىنە سەنەتىنىمىزدى كورسەتەمىز.
ەحوبانىڭ بىزگە تاپسىرعان ٸسىن اتقارايىق
8. ادام مەن حاۋا نەگە وزگەلەردىڭ قامىن ويلاۋ كەرەك ەدى؟
8 ەدەمدە جالعىز وزدەرى بولسا دا، ادام مەن حاۋا باسقالاردىڭ قامىن ويلاۋ كەرەك ەدى. ويتكەنى ەحوبانىڭ بەرگەن تاپسىرماسى بويىنشا، ولار ٶسىپ-ٶنىپ، جەر بەتىن تولتىرىپ، ونى جۇماققا اينالدىرۋ كەرەك بولاتىن (مۇسانىڭ 1-جازباسى 1:28). ەحوبا جەر بەتىندەگى ٵر ادامنىڭ باقىتتى بولعانىن قالادى. ادام مەن حاۋا دا وسىنى قالاپ، بولاشاقتا تۋىلاتىن بالالارىنىڭ باقىتىن ويلاۋ كەرەك-ٴتىن. ولاردىڭ ٴبارى جەر بەتىن ادەمى جۇماققا اينالدىرۋ ٷشىن بىرگە ەڭبەكتەنۋ كەرەك ەدى. الدا ولاردى ۇلكەن ٸس كۇتىپ تۇردى!
9. جەر بەتىن جۇماققا اينالدىرۋ ٸسى نەگە ادامزاتتى باقىتتى ەتپەك ەدى؟
9 جەر بەتىن جۇماققا اينالدىرىپ، قۇدايدىڭ ەركىن ورىنداۋ ٷشىن، كەمەلدى ادامزات ەحوبامەن دە بىرگە ەڭبەكتەنۋ كەرەك ەدى. وسىلايشا ولار قۇدايدىڭ دەمالۋ ٷشىن دايىنداعان جەرىنە كىرە الاتىن (ەۆرەيلەرگە 4:11). ويلاپ كورىڭىزشى، بۇل جۇمىستان ولار ەش جالىقپاس ەدى! ولار وزدەرىن عانا ويلاماي، وزگەلەردىڭ دە مۇددەسىن ويلاعاندارى ٷشىن ەحوبا ولارعا باتاسىن مولىنان جاۋدىرار ەدى.
10، 11. ۋاعىزداۋ مەن شاكىرت دايىنداۋ ٸسىن اتقارۋىمىزعا نە سەپتىگىن تيگىزەدى؟
10 بۇگىندە ەحوبا بىزگە ەرەكشە ٸس تاپسىرعان. بۇل — ۋاعىزداۋ مەن شاكىرت دايىنداۋ ٸسى. ونى اتقارۋ ٷشىن ٴبىز ادامداردىڭ قامىن ويلاۋىمىز كەرەك. نيەتىمىز دۇرىس بولسا عانا، ياعني ەحوبا مەن ادامداردى جاقسى كورسەك قانا، بۇل ٸستى تالماي اتقارا الامىز.
11 پاۋىل وزىنىڭ جانە ٸ عاسىرداعى باسقا دا ماسىحشىلەردىڭ «قۇدايمەن قىزمەتتەس» ەكەندەرىن ايتقان. ويتكەنى ولار ادامدارعا شىندىقتى ۋاعىزداپ، ٴتالىم بەرگەن بولاتىن (قورىنتتىقتارعا 1-حات 3:6، 9). ٴبىز دە «قۇدايمەن قىزمەتتەسە» الامىز. بۇل ٷشىن ۋاقىتىمىزدى، كۇشىمىز بەن قولدا بارىمىزدى قۇداي تاپسىرعان ۋاعىز ىسىنە جۇمسايمىز. ٴبىز ٷشىن بۇل — ۇلكەن مارتەبە!
ادامعا شىندىقتى تۇسىنۋگە كومەكتەسسەك، زور قۋانىشقا بولەنەمىز (12-ابزاستى قاراڭىز)
12، 13. شاكىرت دايىنداۋ ىسىنىڭ جەمىسى جونىندە نە ايتا الاسىز؟
12 ۋاعىزداۋ مەن شاكىرت دايىنداۋ ىسىنە ۋاقىتىمىز بەن كۇشىمىزدى جۇمساپ، جومارتتىق تانىتقانىمىز ٴبىزدى زور قۋانىشقا بولەيدى. بۇنى زەرتتەۋ ساباقتارىن جۇرگىزگەن كوپ باۋىرلاس راستاي الادى. زەرتتەۋشىلەردىڭ كيەلى كىتاپ ىلىمدەرىن تۇسىنگەنىن، شىنايى سەنىمدەرى پايدا بولىپ، ومىرلەرىن وزگەرتكەنىن ٵرى بىلگەندەرىن باسقالارعا ايتا باستاعانىن كورگەندە، قۋانىشىمىزدا شەك بولمايدى. يسا دا 70 شاكىرتىنىڭ ۋاعىزدان قۋانىپ كەلىپ، قىزىقتى وقيعالاردى ايتىپ جاتقاندارىن كورگەندە، قاتتى قۋانعان (لۇقا 10:17—21).
13 دۇنيەجۇزىندەگى باۋىرلاستارىمىز كيەلى كىتاپتاعى حابار ادامداردىڭ ٶمىرىن جاقسى جاققا وزگەرتىپ جاتقانىن كورگەندە، توبەلەرى كوككە جەتەدى. مىسالى، اننا * ەسىمدى تۇرمىس قۇرماعان ٴبىر باۋىرلاسىمىز ەحوباعا كوبىرەك قىزمەت ەتكىسى كەلگەن. سودان شىعىس ەۋروپاداعى جاريالاۋشىلارعا قاجەتتىلىك بار ٴبىر ايماققا كوشىپ بارادى. ول بىلاي دەيدى: «مۇندا كيەلى كىتاپتى زەرتتەگىسى كەلەتىن ادامدار كوپ. بۇل ماعان قاتتى ۇنايدى. قىزمەتىم زور قۋانىش سىيلايدى. قىزمەتتەن قولىم بوسامايتىنى سونشا — قيىندىقتارىمدى ويلاپ ۋايىمداۋعا ۋاقىتىم قالمايدى. ويتكەنى زەرتتەپ جۇرگەن ادامداردى، ولاردىڭ قيىندىعى مەن ۋايىمى جايلى ويلانامىن. ولارعا كومەكتەسىپ، جىگەرلەندىرۋدىڭ امالىن ىزدەيمىن. وسىلاي «العاننان گورى بەرگەن باقىتتى» دەگەن سوزدەردىڭ راستىعىنا كوزىم جەتتى» (ەلشىلەردىڭ ىستەرى 20:35).
ادامدار قۇداي حابارىنا قۇلاق اسپاسا دا، ونى ۋاعىزداۋ ٴبىز ٷشىن قۋانىش
14. ادامدار تىڭداماسا دا، ۋاعىز ىسىنەن قالاي قۋانىش الۋعا بولادى؟
14 ادامدار ۋاعىزىمىزدى تىڭداماسا دا، ٴبىز بۇل ىستەن قۋانىش تابا الامىز. ويتكەنى ٴبىز ولارعا ىزگى حاباردى ەستۋگە مۇمكىندىك بەرىپ ٴجۇرمىز. كەزىندە ەحوبانىڭ ەزەكيەلگە ايتقان: «ولار تىڭداسىن-تىڭداماسىن، ايتقاندارىمدى جەتكىز»،— دەگەن سوزدەرىن بىزگە دە قاتىستىرۋعا بولادى (ەزەكيەل 2:7؛ يشايا 43:10). سونىمەن، ادامدار قۇداي حابارىنا قۇلاق اسپاسا دا، ەڭبەگىمىز ەحوبا ٷشىن باعالى (ەۆرەيلەرگە 6:10 وقىڭىز). قىزمەت جايلى ٴبىر باۋىرلاس بىلاي دەپتى: «ٴبىز ەكتىك، سۋاردىق. ەندى ٵرى قاراي ەحوبانىڭ ٶزى وسىرەدى دەگەن ۇمىتپەن دۇعا ەتەمىز» (قورىنتتىقتارعا 1-حات 3:6).
ۇيمە-ٷي ٴجۇرىپ، ٵر ادامعا بارۋ ارقىلى ولارعا پاتشالىق حابارىن ەستۋگە مۇمكىندىك بەرەمىز (14-ابزاستى قاراڭىز)
باقىتىمىز نەگە بايلانىستى؟
15. ادامدار باعالاسا عانا جومارت بولۋىمىز كەرەك پە؟ ٴتۇسىندىرىڭىز.
15 يسا ٴبىزدىڭ جومارت بولىپ، باقىتقا كەنەلگەنىمىزدى قالايدى. جومارت بولساق، ادامدار دا بىزگە جومارت بولادى. سول سەبەپتى يسا كەلەسىدەي كەڭەس بەرگەن: «بەرىڭدەر، سوندا جۇرت سەندەرگە دە بەرەدى. قويىندارىڭا نىعىزداپ، شايقاپ، تاسىپ-توگىلگەن مولشەردە سالىپ بەرەدى. قانداي ولشەممەن ولشەپ بەرسەڭدەر، سەندەرگە دە سونداي ولشەممەن بەرىلەدى» (لۇقا 6:38). دەسە دە ٴسىزدىڭ جومارتتىعىڭىزدى بارلىعى بىردەي باعالاي بەرمەس. ٴبىراق سوندا دا بەرۋدەن تالماڭىز. كىم بىلەدى، بالكىم، ٴبىر عانا جومارت ٸسىڭىز كوپ يگىلىك اكەلەر.
16. كىمدەرگە جومارت بولۋىمىز كەرەك جانە قانداي نيەتپەن؟
16 شىن جومارت ادامدار جاقسىلىق جاساعاندا، «كەيىن وزىمە قايتادى» دەپ كۇتپەيدى. يسا: «توي جاساعاندا، كەدەي-كەپشىك، كەمتار، اقساقتار مەن سوقىرلاردى شاقىر. ولار ساعان قارىمتاڭدى قايتارا المايتىندىقتان باقىتتى بولاسىڭ»،— دەگەن (لۇقا 14:13، 14). كيەلى كىتاپتا: «جومارت جان جارىلقانادى»،— دەگەن سوزدەر دە بار. ال باسقا ٴبىر جەرىندە: «بەيشارانىڭ قامىن ويلايتىن ادام باقىتتى»،— دەلىنگەن (ناقىل سوزدەر 22:9؛ ٴزابۇر 41:1). ٴيا، ٴبىز وزگەلەرگە شىن نيەتپەن كومەكتەسكىمىز كەلگەندىكتەن جومارت بولۋىمىز كەرەك.
17. بەرۋدىڭ قانداي جولدارى بار؟
17 پاۋىل يسانىڭ «العاننان گورى بەرگەن باقىتتى» دەگەن سوزدەرىن ايتقاندا، اقشا نە زات بەرۋدى عانا ويدا تۇتپاعان. بەرۋدىڭ باسقا دا جولدارى بار. مىسالى، ٴبىز وزگەلەرگە جىگەر بەرەمىز، كيەلى كىتاپقا جۇگىنىپ كەڭەس بەرەمىز جانە قول ۇشىن بەرەمىز (ەلشىلەردىڭ ىستەرى 20:31—35). پاۋىل سوزىمەن دە، ىسىمەن دە جومارت بولۋدىڭ ماڭىزدىلىعىن كورسەتكەن. وعان ەلىكتەپ ٴبىز دە ۋاقىتىمىزدى، كۇشىمىزدى، كوڭىلىمىز بەن سۇيىسپەنشىلىگىمىزدى اياماي، جومارت بولۋىمىز كەرەك.
18. جومارتتىق جايلى كوپتەگەن عالىمدار نە دەيدى؟
18 ادامنىڭ مىنەز-قۇلقىن زەرتتەيتىن عالىمداردىڭ دا ايتۋىنشا، بەرەگەندىك ادامدى باقىتتى ەتەدى ەكەن. ٴبىر عىلىمي ماقالادا وزگەلەرگە جاقسىلىق جاساعان ادامدار وزدەرىن باقىتتىراق سەزىنگەنى ايتىلعان. عالىمدار وزگەلەرگە قول ۇشىن بەرسەك، ومىرىمىزگە ٴمان-ماعىنا كىرەتىنىن ايتادى. سول سەبەپتى كەيبىر ماماندار دەنساۋلىقتى جاقسارتىپ، باقىتتىراق بولۋ ٷشىن ەرىكتى جۇمىس ىستەۋگە كەڭەس بەرەدى. ارينە، ولاردىڭ كەڭەسى ٴبىز ٷشىن جاڭالىق ەمەس، سەبەبى ٴسۇيۋشى جاراتۋشىمىز ەحوبا جومارتتىقتىڭ باقىتقا جەتەلەيتىنىن ٵردايىم ايتىپ وتىرادى (تىموتەگە 2-حات 3:16، 17).
جومارت ىستەرىڭىز جالعاسا بەرسىن
19، 20. ٴسىز نە سەبەپتى جومارت بولعىڭىز كەلەدى؟
19 اينالامىزداعى ادامداردىڭ تەك ٶز مۇددەسىن ويلايتىنىن كورگەندە، جومارت بولۋ ٵردايىم وڭايعا سوقپايتىنى راس. ٴبىراق يسا ەكى باستى زاڭدى — ەحوبانى بار جۇرەگىمىزبەن، بۇكىل جان-تانىمىزبەن، بارلىق اقىل-ويىمىزبەن جانە بار كۇش-قۋاتىمىزبەن ٴسۇيۋ كەرەكتىگىن جانە وزگە ادامدى ٶزىمىزدى سۇيگەندەي ٴسۇيۋ كەرەكتىگىن — ەسكە سالعان (مارقا 12:28—31). ٴبىز بۇل ماقالادا ەحوبانى جاقسى كورەتىندەر وعان ەلىكتەيتىنىن بىلدىك. ەحوبا دا، يسا دا جومارت. ولار ٴبىزدى دە وزدەرىنە ەلىكتەۋگە شاقىرادى، ويتكەنى بۇل ٴبىزدى ناعىز باقىتقا بولەيتىنىن بىلەدى. ەگەر قۇداي مەن ادامدارعا قاتىستى جومارت بولساق، ەحوباعا قۇرمەت تانىتامىز، ٵرى بۇل وزىمىزگە دە، وزگەلەرگە دە يگىلىك اكەلەدى.
20 ٴسىز قازىردىڭ وزىندە ادامداردان، اسىرەسە باۋىرلاستارىڭىزدان، بار جاقسىلىعىڭىزدى اياماي جۇرگەنىڭىزدە كۇمان جوق (عالاتتىقتارعا 6:10). وسى العان بەتىڭىزدەن تايماساڭىز، وزگەلەر جومارتتىعىڭىز ٷشىن رازى بولىپ، ٴسىزدى جاقسى كورەتىن بولادى. ٵرى باقىتقا كەنەلەسىز. كيەلى كىتاپتا: «جومارت جان وركەندەيدى، وزگەنىڭ كوڭىلىن سەرگىتكەن ٶزى دە سەرگيدى»،— دەلىنگەن (ناقىل سوزدەر 11:25). كۇندەلىكتى ومىرىمىزدە جانە قىزمەتتە وزگەلەردىڭ مۇددەسىن ويلاپ، مەيىرىمدىلىك پەن جومارتتىق تانىتۋدىڭ جولدارى كوپ. سولاردىڭ كەيبىرىن كەلەسى ماقالادا تالقىلايمىز.
^ 13-ابزاس ەسىمى وزگەرتىلگەن.
