كۇن سايىن ەحوبامەن بىرگە ەڭبەكتەنەيىك
«ٴبىز قۇدايمەن قىزمەتتەسپىز» (قورىنتتىقتارعا 1-حات 3:9).
اندەر: 64، 111
1. ەحوبامەن بىرگە ەڭبەكتەنۋدىڭ قانداي جولدارى بار؟
ەحوبا ادامداردى جاراتقاندا، ولارمەن قىزمەتتەس بولىپ، بىرگە ەڭبەكتەنۋدى قالادى. قازىرگى تاڭدا ادامزات كەمەلسىز بولسا دا، ادال ادامدار كۇن سايىن ەحوبامەن قىزمەتتەس بولا الادى. مىسالى، ٴبىز پاتشالىق جايلى ىزگى حاباردى ۋاعىزداۋ مەن شاكىرت دايىنداۋ ىسىنە قاتىسۋ ارقىلى «قۇدايمەن قىزمەتتەس» بولا الامىز (قورىنتتىقتارعا 1-حات 3:5—9). قۇدىرەتى شەكسىز جاراتۋشى ٴبىزدى وسىنداي وتە ماڭىزدى ىسكە تاڭداپ العانى نەتكەن مارتەبە دەسەڭىزشى! الايدا ۋاعىز ٸسى ەحوبامەن بىرگە ەڭبەكتەنۋدىڭ جالعىز جولى ەمەس. بۇل ماقالادا ٴبىز ەحوبامەن بىرگە ەڭبەكتەنۋدىڭ باسقا دا جولدارىن كورەمىز. دالىرەك ايتساق، ٷي ىشىندەگىلەر مەن قاۋىمداعى باۋىرلاستارعا كومەكتەسۋ ارقىلى، قوناقجاي بولۋ ارقىلى، ۇيىمىمىزدىڭ دۇنيەجۇزى بويىنشا اتقارىپ جاتقان جوبالارىنا قاتىسۋ ارقىلى جانە قىزمەتىمىزدىڭ اياسىن كەڭەيتۋ ارقىلى (قولوستىقتارعا 3:23).
2. نەگە ٴبىز ەشقاشان ٶزىمىزدى وزگەلەرمەن سالىستىرماۋىمىز كەرەك؟
2 وسى ماقالانى زەرتتەۋ بارىسىندا كەلەسى ماڭىزدى جايتتى ۇمىتپايىق: بەس ساۋساق بىردەي ەمەستەي، ٴبىز دە بىردەي ەمەسپىز. جاسىمىز، دەنساۋلىعىمىز، جاعدايىمىز بەن قابىلەتىمىز دە ٵرتۇرلى. سوندىقتان وزىڭىزدىڭ ەحوبا ٷشىن اتقاراتىن ٸسىڭىزدى باسقالاردىكىمەن سالىستىرماڭىز. ەلشى پاۋىل بىلاي دەگەن: «اركىم ٶز ٸس-ارەكەتىن تەكسەرسىن، سوندا ٶزىن باسقالارمەن سالىستىرماي، ٶز ىستەرىنە قۋانادى» (عالاتتىقتارعا 6:4).
ٷي ىشىندەگىلەر مەن قاۋىمداعى باۋىرلاستارعا كومەكتەسىڭىز
3. وتباسىنىڭ قامىن ويلايتىن ادامدى نەگە ەحوبامەن قىزمەتتەسىپ ٴجۇر دەۋگە بولادى؟
3 ەحوبا بىزدەن وتباسىمىزدىڭ قامىن ويلاۋدى تالاپ ەتەدى. مىسالى، ٴسىز وتباسىن اسىراۋ ٷشىن جۇمىس ىستەپ، اقشا تاۋىپ جۇرگەن شىعارسىز. كوپتەگەن انالار بولسا، ۇيدە قالىپ، كىشكەنتاي بالالارىنا قاراپ وتىر. اتا-اناڭىز وزدەرىن قامقورلاي المايتىن بولسا، ولارعا كۇتىم جاساپ جۇرگەن بولارسىز. بۇل وتە ماڭىزدى ىستەر. كيەلى كىتاپتا بىلاي دەلىنگەن: «تۋىستارىنىڭ، اسىرەسە ٷي ٸشىنىڭ، قامىن ويلامايتىن ادام سەنىمنەن باس تارتقان، ول قۇدايعا سەنبەيتىن ادامنان دا جامان» (تىموتەگە 1-حات 5:8). ٴسىزدىڭ وتباسىلىق مىندەتتەرىڭىز بولسا، ەحوباعا ٶزىڭىز قالاعانداي قىزمەت ەتە الماي جۇرگەن شىعارسىز. ٴبىراق كوڭىلىڭىز تۇسپەسىن! ويتكەنى وتباسىنىڭ قامىن جاساپ جۇرگەنىڭىزدى كورىپ ەحوبا قۋانادى (قورىنتتىقتارعا 1-حات 10:31).
4. اتا-انالار پاتشالىقتى قالاي ٴبىرىنشى ورىنعا قويا الادى جانە بۇنىڭ ناتيجەسى قانداي بولادى؟
4 ٴماسىحشى اتا-انالار بالالارىنا رۋحاني ماقساتتار قويۋعا كومەكتەسۋ ارقىلى قۇدايمەن قىزمەتتەس بولا الادى. كوپتەگەن اتا-انا وسىلاي ىستەپ ٴجۇر دە. سونىڭ ارقاسىندا بالالارى كەيىن ەحوباعا تولىق ۋاقىتتى قىزمەت ەتۋدى باستاپ، ٴتىپتى ۇيدەن جىراقتا قىزمەت ەتكەن. ولاردىڭ كەيبىرى ميسسيونەر بولسا، وزگەلەرى جاريالاۋشىلار تاپشى جەرلەرگە بارىپ، ٸزاشار بولىپ قىزمەت ەتۋدە. ال باسقالارى بەتەلدە قىزمەت ەتىپ ٴجۇر. ارينە، بالالارى الىستا بولعاندىقتان، اتا-انالارى ولارمەن وزدەرى قالاعانداي كوپ كورىسە المايدى. ٴبىراق بالالارى قايدا بولماسىن، اتا-انالارى ولاردى ەحوباعا ٵرى قاراي قىزمەت ەتە بەرۋگە تالپىندىرادى. ويتكەنى بالالارىنىڭ ەحوبانى ومىرلەرىندە باستى ورىنعا قويعاندارىنا قاتتى قۋانادى (جوحاننىڭ 3-حاتى 4). سول اتا-انالاردىڭ كوبىسى وزدەرىن ٴسامۋيلدى ەحوباعا «امانات» قىلىپ بەرگەن حاننا سياقتى سەزىنەدى. وسىلاي ەحوبامەن بىرگە ەڭبەكتەنۋدى ولار قۇرمەت سانايدى (سامۋيلدىڭ 1-جازباسى 1:28).
5. قاۋىمداعى باۋىرلاستارعا قالاي كومەكتەسە الاسىز؟ (ماقالانىڭ باسىنداعى سۋرەتتى قاراڭىز.)
5 ەگەر وتباسىڭىزدا شۇعىل شارۋالارىڭىز بولماسا، ناۋقاس يا قارت باۋىرلاستارعا، نە كومەككە مۇقتاج باسقا باۋىرلاستارعا كومەكتەسە الاسىز با؟ يا بولماسا ولارعا كۇتىم جاساپ جۇرگەن ادامدارعا قول ۇشىن بەرە الاسىز با؟ قاۋىمىڭىزدا كىمگە سونداي كومەك كەرەكتىگىن ويلاپ كورىڭىز. مىسالى، قارت اتا-اناسىنا قاراپ جۇرگەن ايەل باۋىرلاس بار شىعار. ول باسقا دا ىستەرمەن اينالىسا الۋ ٷشىن، ٴسىز ونىڭ اتا-اناسىمەن وتىرا تۇرا الاسىز با؟ يا بولماسا بىرەۋدى قاۋىم كەزدەسۋلەرىنە نە دۇكەنگە اپارىپ-اكەلە الاتىن شىعارسىز نەمەسە اۋرۋحانادا جاتقان باۋىرلاستىڭ جاعدايىن ٴبىلىپ قايتا الاتىن شىعارسىز. سولاي ەتسەڭىز، ەحوبا ٴسىز ارقىلى قانداي دا ٴبىر باۋىرلاستىڭ ايتقان دۇعاسىنا جاۋاپ بەرۋى مۇمكىن. وسىلاي قۇدايمەن بىرگە ەڭبەكتەنەسىز (قورىنتتىقتارعا 1-حات 10:24 وقىڭىز).
قوناقجاي بولىڭىز
6. ٴبىز قوناقجايلىلىقتى قالاي تانىتا الامىز؟
6 قۇدايمەن بىرگە ەڭبەكتەنەتىندەر وزدەرىنىڭ قوناقجايلىلىعىمەن تانىمال. كيەلى كىتاپتا «قوناقجايلىلىق» دەپ اۋدارىلعان گرەك ٴسوزى بەيتانىس ادامعا مەيىرىمدىلىك تانىتۋ دەگەندى بىلدىرەدى (ەۆرەيلەرگە 13:2). قۇداي سوزىندە قوناقجايلىلىق تانىتقان ادامداردىڭ مىسالدارى بار. ولارعا قاراپ، مەيىرىمدىلىك تانىتۋدى ۇيرەنەمىز (مۇسانىڭ 1-جازباسى 18:1—5). مۇمكىندىك باردا ٴبىز «سەنىمى ٴبىر باۋىرلاستارعا» دا، وزگەلەرگە دە قول ۇشىن بەرە الامىز، ٵرى بەرۋىمىز كەرەك تە (عالاتتىقتارعا 6:10).
7. تولىق ۋاقىتتى قىزمەتشىلەرگە قوناقجايلىلىق تانىتقاننىڭ قانداي پايداسى بار؟
7 تولىق ۋاقىتتى قىزمەتشىلەرگە ۋاقىتشا تۇراتىن باسپانا قاجەت بولسا، ولارعا قوناقجايلىلىق تانىتىپ، ەحوبامەن قىزمەتتەس بولا الاسىز با؟ (جوحاننىڭ 3-حاتى 5، 8 وقىڭىز). وسىلاي ەتسەك، ونىڭ پايداسىن ولار دا، ٴبىز دە كورەمىز. كيەلى كىتاپتا بۇل «ٶزارا جىگەرلەنۋ» دەپ اتالعان (ريمدىكتەرگە 1:11، 12). ولاف دەگەن باۋىرلاستىڭ وقيعاسىن قاراستىرايىق. جاس كەزىندە ولافتىڭ قاۋىمىنا سالتباستى اۋداندىق باقىلاۋشى كەلىپ، وعان تۇراقتايتىن جەر قاجەت بولادى. ٴبىراق قاۋىمدا كومەكتەسە الاتىن ەشكىم تابىلمايدى. سوندا ولاف كۋاگەر ەمەس اتا-اناسىمەن سويلەسىپ، اۋداندىق باقىلاۋشىنى ۇيلەرىنە قوناق ەتۋگە رۇقسات سۇرايدى. ولار رۇقسات بەرەدى، ٴبىراق ولافتىڭ ديۆاندا جاتۋعا تۋرا كەلەتىنىن ايتادى. ولاف كەلىسە كەتەدى جانە وسىنداي قۇرباندىققا بارعانىنا ول ەش وكىنبەيدى. ويتكەنى اۋداندىق باقىلاۋشىمەن وتكىزگەن ٴبىر اپتاسى تاماشا بولادى. كۇنىگە تاڭەرتەڭ بىرگە تۇرىپ، تاڭعى اس ۇستىندە كوپتەگەن قىزىقتى تاقىرىپتاردا اڭگىمەلەسەدى. اۋداندىق باقىلاۋشى ولافتى قاتتى جىگەرلەندىرگەنى سونشا، ول تولىق ۋاقىتتى قىزمەتتى باستايدى. ول سوڭعى 40 جىل ىشىندە بىرنەشە ەلدە ميسسيونەر بولىپ قىزمەت ەتتى.
8. وزگەلەر بىردەن ريزاشىلىق بىلدىرمەسە دە، نە سەبەپتى مەيىرىمدى بولۋىمىز كەرەك؟ مىسال كەلتىرىڭىز.
8 ٴبىز بەيتانىس ادامدارعا ٴتۇرلى جولمەن مەيىرىمدىلىك تانىتا الامىز. ٴبىر مىسالدى قاراستىرايىق. يسپانياداعى ٴبىر باۋىرلاس ەكۆادوردان كوشىپ كەلگەن ەسيكا ەسىمدى ايەلمەن كيەلى كىتاپتى زەرتتەيدى. ٴبىر كۇنى زەرتتەۋ بارىسىندا الگى ايەل جىلاپ جىبەرىپ، كوز جاسىن تيا المايدى. باۋىرلاس ونىڭ نەگە جىلاپ جاتقانىن سۇرايدى. سوندا ول يسپانياعا كوشپەي تۇرىپ جوقشىلىق كورگەنىن ايتىپ بەرەدى. ٴتىپتى ٴبىر كۇنى قىزىنا قارا سۋدان باسقا بەرەر تاماعى قالماپتى. سوندا ەسيكا كىشكەنتاي قىزىن ۇيىقتاتىپ جاتىپ، كومەك سۇراپ قۇدايعا دۇعا ەتكەن ەكەن. كوپ ۇزاماي ەسيكاعا ەكى كۋاگەر كەلىپ، وعان جۋرنال بەرگەن. ٴبىراق ول جۋرنالدى جىرتىپ تاستاپ، ولارعا: «وسى جۋرنالدارىڭ قىزىما تاماق بولادى دەيسىڭدەر مە؟»— دەپ ۇرىسىپ بەرىپتى. باۋىرلاستار ونى جۇباتۋعا تىرىسقانمەن، مۇنىسىنان تۇك شىقپاعان. كەيىنىرەك باۋىرلاستار ونىڭ ەسىگىنىڭ الدىنا ٴبىر كارزەڭكە ازىق-تۇلىك تاستاپ كەتىپتى. سول كەزدە قۇداي وزىنىڭ دۇعاسىنا جاۋاپ بەرگەنىن تۇسىنبەپتى. ەندى سونى ەسىنە الىپ جىلاعان ەكەن. سودان ەسيكا ەحوباعا قىزمەت ەتۋدى شەشتى. ٴيا، بۇعان الگى ەكى ايەل باۋىرلاستىڭ بەرەگەندىگى سەبەپشى بولعانى ٴسوزسىز (ۋاعىزداۋشى 11:1، 6).
ۇيىمنىڭ جوبالارىنا قاتىسۋعا ەرىك ٴبىلدىرىڭىز
9، 10. ا) يسرايلدىكتەر قانداي جولدارمەن ەرىكتى قىزمەت اتقارا الاتىن؟ ٵ) بۇگىندە ەر باۋىرلاستار قاۋىمعا قالاي كومەكتەسە الادى؟
9 ەجەلگى يسرايلدىكتەردە ەرىكتى قىزمەت اتقارۋدىڭ مۇمكىندىگى كوپ بولعان (مۇسانىڭ 2-جازباسى 36:2؛ شەجىرەلەر 1-جازبا 29:5؛ نەحەميا 11:2). بۇگىنگى تاڭدا دا باۋىرلاستارعا ەرىكتى تۇردە كومەكتەسۋدىڭ مۇمكىندىگى از ەمەس. بۇل ٷشىن ٴسىزدىڭ ۋاقىتىڭىز، قاراجاتىڭىز بەن قابىلەتىڭىز قاجەت بولادى. مۇنداي ەرىكتى ىسكە قاتىسقاندا، قۋانىشىڭىز ارتىپ، قۇدايدىڭ باتاسىنا يە بولاسىز.
10 قۇداي ٴسوزى قاۋىمداعى ەر كىسىلەردى قىزمەت كومەكشىسى جانە اقساقال بولىپ قىزمەت ەتۋگە شاقىرادى. وسىلاي ولار ەحوبامەن بىرگە ەڭبەكتەنە الادى (تىموتەگە 1-حات 3:1، 8، 9؛ پەتىردىڭ 1-حاتى 5:2، 3). مۇنداي باۋىرلاستار وزگەلەرگە رۋحاني ىستەردە دە، ٸس جۇزىندە دە كومەكتەسكىسى كەلەدى (ەلشىلەردىڭ ىستەرى 6:1—4). اقساقالدار سىزدەن قاۋىمدا قىزمەت كورسەتۋشى بولۋدى، ادەبيەتكە، ۋچاسكەلەرگە، پاتشالىق سارايىن كۇتىپ ۇستاۋعا قاتىستى ىستەردە كومەگىڭىزدى سۇراعان با؟ يا بولماسا باسقا ىستە جاردەم سۇراعان بولار. وسىلاي قولعابىس ەتكەن باۋىرلاستار زور قاناعات سەزىنگەن.
ۇيىمنىڭ جوبالارىنا قاتىساتىن ەرىكتى قىزمەتشىلەر ٴجيى جاڭا دوستار تاۋىپ جاتادى (11-ابزاستى قاراڭىز)
11. ٴبىر باۋىرلاس قۇرىلىس جوبالارىنا قاتىسقاننىڭ قانداي پايداسىن كورگەن؟
11 قۇرىلىس جوبالارىنا قاتىسۋعا ەرىك بىلدىرگەن باۋىرلاستار ٴجيى جاڭا دوستار تاۋىپ جاتادى. ماردجي ەسىمدى ايەل باۋىرلاس 18 جىل بويى پاتشالىق سارايلارىن سوعۋ جوبالارىنا قاتىسقان ەكەن. سول جوبالاردا ول جاس قىز باۋىرلاستارعا كوڭىل ٴبولىپ، ولاردى قۇرىلىس ىسىنە ۇيرەتىپتى. ماردجي وسىنداي جوبالار كەزىندە ەرىكتى قىزمەتشىلەر ٴبىر-ٴبىرىن جىگەرلەندىرە الاتىنىن ايتادى (ريمدىكتەرگە 1:12). ونىڭ ايتۋىنشا، سونداي جوبالاردا تانىسقان دوستارى وعان قيىندىق كورگەن كەزدەرى زور قولداۋ كورسەتىپتى. ٴسىز قۇرىلىس جوبالارىنا قاتىسىپ كورگەنسىز بە؟ وندا قىزمەت ەتۋ ٷشىن قانداي دا ٴبىر سالادا بىلىكتى بولۋ شارت ەمەس.
12. اپاتتان كەيىن قانداي كومەك كورسەتە الاسىز؟
12 ەحوبامەن قىزمەتتەسۋدىڭ تاعى ٴبىر جولى — تابيعي اپاتتان زارداپ شەككەن باۋىرلاستارعا جاردەمدەسۋ. مىسالى، ولارعا قارجىلاي كومەك كورسەتۋگە بولادى (جوحان 13:34، 35؛ ەلشىلەردىڭ ىستەرى 11:27—30). يا بولماسا اپات بولعان جەردە تازالاۋ نە جوندەۋ جۇمىستارىمەن اينالىسا الامىز. پولشاداعى گابريەلا ەسىمدى ايەل باۋىرلاستىڭ ۇيىنە سۋ تاسقىنىنىڭ كەسىرىنەن قاتتى زاقىم كەلىپتى. سوندا ول جاقىن اراداعى قاۋىمنان كومەككە كەلگەن باۋىرلاستاردى كورىپ، قاتتى قۋانىپ كەتەدى. سول جاعدايدى ەسكە الىپ، ول اپاتتا جوعالتقان دۇنيە-مۇلكىن ويلاپ ۋايىمدامايتىنىن، كەرىسىنشە، يە بولعان باتالارىنا قۋاناتىنىن ايتادى. «قاۋىمنىڭ مۇشەسى بولۋ ەرەكشە مارتەبە، ٵرى قۋانىش پەن باقىت سيلايدى. باسىمنان وتكەن وسى وقيعادان سوعان كوزىم جەتتى»،— دەيدى گابريەلا. اپاتتان كەيىن باۋىرلاستاردىڭ كومەگىن كورگەن كوپتەگەن باۋىرلاستار دا وسى سوزدەرگە قوسىلادى. ەحوبامەن بىرگە ەڭبەكتەنە ٴجۇرىپ، وسى باۋىرلاستارعا كومەكتەسكەن ەرىكتىلەر دە زور قۋانىشقا بولەنىپ، تەرەڭ قاناعات سەزىنگەن (ەلشىلەردىڭ ىستەرى 20:35؛ قورىنتتىقتارعا 2-حات 9:6، 7 وقىڭىز).
13. ەرىكتى قىزمەت ەحوباعا دەگەن سۇيىسپەنشىلىگىمىزدى قالايشا نىعايتادى؟ مىسال كەلتىرىڭىز.
13 ستەفاني جانە ونىمەن ٴبىر ايماقتا تۇراتىن جاريالاۋشىلار دا قۇدايمەن بىرگە ەڭبەكتەنۋدىڭ ٴبىر جولىن تاۋىپتى. ولار سوعىس بولىپ جاتقان ەلدەردەن قۇراما شتاتتارعا باسساۋعالاپ كەلگەن كۋاگەرلەرگە كومەكتەسكەن ەكەن. سول بوسقىندارعا ٷي مەن جيھاز تابۋعا قول ۇشىن بەرگەن. ستەفاني بىلاي دەيدى: «ولاردىڭ دۇنيەجۇزىلىك باۋىرلاستىق ٷشىن بىلدىرگەن ريزاشىلىقتارىن ەستىپ، قۋانعاندارىن كورگەندە، جۇرەگىمىز ەلجىرەپ كەتتى. ولار ٴبىزدى كومەكتەسىپ جاتىر دەپ ويلايدى. ٴبىراق شىندىعىنا كەلگەندە، ٴبىز ولارعا ەمەس، ولار بىزگە كومەكتەستى. ويتكەنى ولاردىڭ سۇيىسپەنشىلىگىن، بىرلىگى مەن سەنىمىن، سونداي-اق ەحوباعا قالاي ارقا سۇيەيتىنىن كورگەندە، ٴبىزدىڭ دە ەحوباعا دەگەن سۇيىسپەنشىلىگىمىز كادىمگىدەي نىعايىپ قالدى. بۇعان قوسا، قۇداي ۇيىمىنىڭ جاساپ جاتقان يگىلىكتەرى ٷشىن دە ريزاشىلىعىمىز تەرەڭدەي ٴتۇستى».
قىزمەت اياسىن كەڭەيتەيىك
14، 15. ا) يشايا پايعامبار قانداي رۋح تانىتتى؟ ٵ) يشايانىڭ سول رۋحىن ٴماسىحشىلەر قالاي تانىتا الادى؟
14 ٴسىز ەحوبا ٷشىن كوبىرەك ەڭبەكتەنگىڭىز كەلە مە؟ وندا جاريالاۋشىلار از جەرگە كوشىپ بارا الار ما ەدىڭىز؟ ارينە، جومارتتىق تانىتۋ ٷشىن مىندەتتى تۇردە باسقا جاققا كوشۋدىڭ قاجەتى جوق. دەسە دە كەي باۋىرلاستاردىڭ مۇنداي مۇمكىندىگى بار، ٵرى ولار يشايا پايعامباردىكىندەي رۋح تانىتادى. ەحوبا: «كىمدى جىبەرەيىن؟ ٴبىز ٷشىن كىم بارادى؟»— دەپ سۇراعاندا، يشايا: «مەن بارمىن! مەنى جىبەر!»— دەگەن (يشايا 6:8). ال ٴسىز شە؟ ەحوبانىڭ ۇيىمىنا كومەكتەسۋگە دايىنسىز با؟ دايىن بولساڭىز، مۇمكىندىگىڭىز بار ما؟ ەندەشە، قاي جاعىنان كومەكتەسە الاتىنىڭىزدى قاراستىرايىق.
15 ۋاعىزداۋ مەن شاكىرت دايىنداۋ ىسىنە قاتىستى يسا بىلاي دەگەن: «جينايتىن ەگىن كوپ، ٴبىراق جۇمىسشىلار از. سوندىقتان ەگىننىڭ يەسىنەن ونى جيناۋعا جۇمىسشىلار جىبەرۋىن وتىنىڭدەر» (ماتاي 9:37، 38). ٴسىز جاريالاۋشىلار از جەردە ٸزاشار بولىپ قىزمەت ەتە الاسىز با؟ يا بولماسا باسقا بىرەۋدىڭ قىزمەت ەتە الۋى ٷشىن، وعان كومەكتەسە الارسىز؟ جاريالاۋشىلار قاجەت جەرلەردە ٸزاشار بولىپ قىزمەت ەتۋدى كوپ باۋىرلاستار قۇدايعا جانە ادامدارعا دەگەن سۇيىسپەنشىلىك كورسەتۋدىڭ كەرەمەت جولى دەپ بىلەدى. ٴسىز ٷشىن قىزمەت اياسىن كەڭەيتۋدىڭ بۇدان دا باسقا جولدارى بار ما؟ سولاي ەتسەڭىز، زور قۋانىشقا بولەنەسىز.
16، 17. قىزمەت اياسىن كەڭەيتۋدىڭ تاعى قانداي جولدارى بار؟
16 بەتەلدە قىزمەت ەتۋگە نە قۇرىلىس جوبالارىنا قاتىسۋعا دايىنسىز با؟ بۇل قىزمەت تۇرلەرىن ۋاقىتشا قىزمەتشى رەتىندە يا بولماسا اپتاسىنا ٴبىر نە بىرنەشە كۇن اتقارۋعا بولادى. جۇمىس تاجىريبەسى باسقا سالادا بولسا دا، كەز كەلگەن جەردە، كەز كەلگەن ٸستى اتقارۋعا دايىن باۋىرلاستار ەحوبانىڭ ۇيىمىنا ٵردايىم قاجەت. كومەك قاجەت جەردە قىزمەت ەتۋ ٷشىن قۇرباندىققا بارۋعا دايىن اركىمدى ەحوبا قاتتى باعالايدى (ٴزابۇر 110:3).
17 قىزمەتتە جاقسارا ٴتۇسۋ ٷشىن، ارنايى وقۋدان وتكىڭىز كەلە مە؟ وندا نەگە پاتشالىقتى جاريالاۋشىلارعا ارنالعان مەكتەپكە ٶتىنىش تولتىرماسقا؟ بۇل مەكتەپتە تولىق ۋاقىتتى قىزمەت ەتىپ جۇرگەن تولىسقان ەر جانە ايەل باۋىرلاستارعا ٴتالىم بەرىلەدى. سول تالىمنىڭ ارقاسىندا ولار قۇدايدىڭ ۇيىمى ٷشىن كوبىرەك ٸس اتقارا الادى. بۇل مەكتەپتە وقىعان باۋىرلاستار قاي جاققا تاعايىندالسا، سول جاققا بارۋعا دايىن بولۋلارى ٴتيىس. ٴسىز وسىلاي ەحوباعا كوبىرەك قىزمەت ەتۋگە دايىنسىز با؟ (قورىنتتىقتارعا 1-حات 9:23).
18. كۇن سايىن ەحوبامەن بىرگە ەڭبەكتەنۋدىڭ قانداي يگىلىگى بار؟
18 ٴبىز ەحوبانىڭ حالقى بولعاندىقتان جومارتتىق، ىزگىلىك، مەيىرىمدىلىك پەن سۇيىسپەنشىلىك تانىتامىز. ٵر كۇنى وزگەلەردىڭ قامىن ويلايمىز. بۇل بىزگە قۋانىش، تىنىشتىق پەن باقىت سيلايدى (عالاتتىقتارعا 5:22، 23). جاعدايىمىز قانداي بولماسىن، ەحوباعا ەلىكتەپ جومارت بولساق، ٵرى ونىمەن بىرگە ەڭبەكتەنە بەرسەك، قۋانىشىمىز ەش ۇزىلمەيدى! (ناقىل سوزدەر 3:9، 10).
