«مەن قۇدايدىڭ... قايتا تىرىلتەتىنىنە ۇمىتتەنەمىن»
«سوڭعى ادام ٶمىر بەرەتىن رۋح بولدى» (قورىنتتىقتارعا 1-حات 15:45).
اندەر: 111، 12
1—3. ا) نەگىزگى نانىمدارىمىزعا قانداي ٸلىم دە كىرەدى؟ ٵ) نەگە قايتا ٴتىرىلۋ ٸلىمى وتە ماڭىزدى؟ (ماقالانىڭ باسىنداعى سۋرەتتى قاراڭىز.)
الدەبىرەۋ ٴدىنىڭىزدىڭ نەگىزگى ىلىمدەرى جايلى سۇراسا، نە دەپ جاۋاپ بەرەر ەدىڭىز؟ ەحوبانىڭ جاراتۋشى ەكەنىن جانە ومىرىمىزگە باستاما بەرگەنى جايلى ايتارسىز. سونداي-اق ٶمىرىن تولەم رەتىندە بەرگەن يسا ماسىحكە سەنەتىنىڭىز تۋرالى دا ٴسوز قوزعارسىز. بولاشاقتا جەر بەتىندە جۇماق ورنايتىنىن، سوندا قۇدايدىڭ قىزمەتشىلەرى ماڭگى ٶمىر سۇرەتىنىن ايتپاي وتپەيتىنىڭىز انىق. ال قايتا ٴتىرىلۋ ٷمىتىن جانىڭىزعا جاقىن تۇتاتىن ىلىمدەردىڭ ٴبىرى رەتىندە اۋىزعا الاسىز با؟
2 زور الاپاتتان ٴتىرى ٶتىپ، جەر بەتىندە ماڭگى ٶمىر سۇرۋگە ۇمىتتەنسەك تە، قايتا ٴتىرىلۋدى نەگىزگى ىلىمدەرىمىزگە جاتقىزۋعا بىزدە كەلەلى سەبەپتەر بار. ەلشى پاۋىل قايتا ٴتىرىلۋ ىلىمىنىڭ نەلىكتەن وتە ماڭىزدى ەكەنىن كورسەتتى. ول: «ولگەندەر قايتا تىرىلمەيتىن بولسا، وندا ٴماسىحتىڭ دە قايتا تىرىلمەگەنى»،— دەدى. يسا قايتا تىرىلمەگەن بولسا، كوكتە پاتشا رەتىندە بيلىك ەتە الماس ەدى جانە ٴبىزدىڭ ۋاعىزىمىز دا بەكەر بولار ەدى (قورىنتتىقتارعا 1-حات 15:12—19 وقىڭىز). ٴبىراق ٴبىز يسانىڭ قايتا تىرىلگەنىن بىلەمىز. وسىعان سەنگەندىكتەن، ولگەندەردىڭ قايتا ٶمىر سۇرە الاتىنىن قىڭىرلىقپەن مويىنداماعان ساددۋكەيلەردەن قاتتى ەرەكشەلەنەمىز. ٴتىپتى ادامدار ٴبىزدى كەلەكە ەتسە دە، قۇدايدىڭ ولگەندەردى تىرىلتە الاتىنىنا دەگەن سەنىمىمىز ەش مىزعىمايدى (مارقا 12:18؛ ەلشىلەردىڭ ىستەرى 4:2، 3؛ 17:32؛ 23:6—8).
3 پاۋىل «ولگەندەردىڭ قايتا ٴتىرىلۋى» تۋرالى ىلىمنىڭ «ٴماسىح جايىندا باستاپقى ىلىمدەرگە» جاتاتىنىن جازعان (ەۆرەيلەرگە 6:1، 2). ول قايتا تىرىلۋگە سەنەتىنىنە باسا كوڭىل اۋدارعان (ەلشىلەردىڭ ىستەرى 24:10، 15، 24، 25). بۇل ٸلىم باستاپقى ٸلىم، ياعني قۇداي سوزىندەگى نەگىزگى شىندىق، بولىپ تابىلسا دا، قايتا ٴتىرىلۋ جايلى مۇقيات زەرتتەگەنىمىز ٴجون (ەۆرەيلەرگە 5:12). نەگە؟
4. قايتا ٴتىرىلۋ جايلى قانداي سۇراقتار تۋىنداۋى مۇمكىن؟
4 ادەتتە كيەلى كىتاپتى زەرتتەي باستاعان ادامدار ەلازار سياقتى بۇرىن ٶمىر سۇرگەن ادامداردىڭ قايتا تىرىلگەنى جايلى وقىپ بىلەدى. سونداي-اق ىبىرايىم، ٵيۇپ جانە دانيال بولاشاقتا ولگەندەردىڭ قايتا ٶمىر سۇرەتىنىنە نىق سەنگەنىن دە بىلەدى. دەسە دە الدەبىرەۋ جۇزدەگەن جىل بۇرىن بەرىلگەن بۇل ۋادەلەرگە نە سەبەپتى سەنەتىنىمىزدى سۇراسا، كيەلى كىتاپتان قانداي دالەل كەلتىرەر ەدىڭىز؟ كيەلى كىتاپتا بولاشاقتاعى قايتا تىرىلۋدىڭ قاشان ورىن الاتىنى جايلى نە دەلىنگەن؟ بۇل سۇراقتاردىڭ جاۋابى سەنىمىمىزدى قاتايتا تۇسەدى.
جۇزدەگەن جىل بۇرىن پايعامبارلىق ەتىلگەن قايتا ٴتىرىلۋ
5. ٴبىز الدىمەن نەنى قاراستىراتىن بولامىز؟
5 قايتىس بولعان ادامنىڭ ومىرگە كوپ ۇزاماي ورالعانىن ەلەستەتۋ بىزگە قيىن ەمەس (جوحان 11:11؛ ەلشىلەردىڭ ىستەرى 20:9، 10). الايدا بىرەۋدىڭ جىلدار وتە، ٴتىپتى جۇزدەگەن جىلدان كەيىن، قايتا تىرىلەتىنى ۋادە ەتىلسە شى؟ مەيلى ۇزاق ۋاقىت بۇرىن قايتىس بولعان ادامعا نە جاقىندا كوز جۇمعان ادامعا قاتىستى ايتىلسىن، مۇنداي ۋادەگە سەنە الامىز با؟ تۇپتەپ كەلگەندە، ٴبىز جۇزدەگەن جىل بۇرىن ۋادە ەتىلىپ، كەيىننەن جۇزەگە اسقان ٴبىر قايتا تىرىلۋگە سەنىپ تە ٴجۇرمىز. ول كىمنىڭ قايتا ٴتىرىلۋى؟ ونىڭ بولاشاقتا بولاتىن قايتا تىرىلۋمەن قانداي بايلانىسى بار؟
6. ٴزابۇردىڭ 118-تاراۋىنداعى پايعامبارلىقتىڭ يساعا قانداي قاتىسى بار؟
6 ٴزابۇردىڭ 118-تاراۋىنىڭ كومەگىمەن كوپتەگەن جىل بۇرىن پايعامبارلىق ەتىلگەن قايتا ٴتىرىلۋ جايلى قاراستىرايىق. بۇل تاراۋدى ٴداۋىت جازعان بولسا كەرەك. بۇل ٴزابۇر جىرىندا «ەحوبا، ٴبىزدى قۇتقارا كورشى، جالىنامىز!» جانە «ەحوبانىڭ اتىنان كەلە جاتقان جارىلقانسىن» دەگەن سوزدەر بار. يسا 9-نيساندا، ولىمىنەن بىرنەشە كۇن بۇرىن، يەرۋساليمگە تايقارعا ٴمىنىپ كىرگەندە، جۇرت وسى پايعامبارلىق سوزدەردى ايتقان بولاتىن (ٴزابۇر 118:25، 26؛ ماتاي 21:7—9). ال قالايشا ٴزابۇر 118-تاراۋ كوپتەگەن جىلدان كەيىن بولاتىن قايتا تىرىلۋگە نۇسقاعان؟ وسى ٴزابۇر جىرىندا تاعى مىنانداي سوزدەر بار: «قۇرىلىسشىلار باس تارتقان تاس نەگىزگى بۇرىشتىق تاسقا اينالدى» (ٴزابۇر 118:22).
«قۇرىلىسشىلار» ماسىحتەن «باس تارتتى» (7-ابزاستى قاراڭىز)
7. ياھۋديلەر يسادان قالاي باس تارتتى؟
7 ماسىحتەن باس تارتقان «قۇرىلىسشىلار» ياھۋدي باسشىلارىن بىلدىرەدى. ولار جاي عانا يسانى ەلەمەي نە ٴماسىح رەتىندە مويىنداماي قويعان جوق ەدى. پيلاتتىڭ الدىندا يسانىڭ ٶلىم جازاسىنا كەسىلۋىن تالاپ ەتۋىمەن كوپتەگەن ياھۋديلەر ودان باس تارتتى (لۇقا 23:18—23). ٴيا، ولار يسانىڭ ولىمىنە جاۋاپتى ەدى.
قۇداي ٴماسىحتى «نەگىزگى بۇرىشتىق تاس» قىلۋ ٷشىن قايتا ٴتىرىلتتى (8، 9-ابزاستى قاراڭىز)
8. قالاي يسا «نەگىزگى بۇرىشتىق تاسقا» اينالماق ەدى؟
8 يسادان باس تارتىپ، ولتىرگەن بولسا، قالاي ول «نەگىزگى بۇرىشتىق تاسقا» اينالماق ەدى؟ بۇل ول قايتا تىرىلسە عانا مۇمكىن بولاتىن. يسا بۇل ويدى ٴجۇزىم باعىن جۇزىمشىلەرگە جالعا بەرگەن ٴبىر كىسى جايلى مىسالمەن اشا ٴتۇستى. بۇل كىسى جۇزىمشىلەرگە حابارشىلارىن جىبەرىپ تۇرادى، ٴبىراق الگىلەر حابارشىلارعا ٴجابىر كورسەتەدى. اقىرىندا جۇزىمدىك يەسى ۇلىما قۇلاق اسار دەگەن ويمەن ۇلىن جىبەرەدى. الايدا ولار ونىڭ ۇلىن ٶلتىرىپ تاستايدى. يسا وسى مىسالدى ايتقان سوڭ، ٴزابۇر 118:22 دەگى پايعامبارلىقتى كەلتىردى (لۇقا 20:9—17). ەلشى پەتىر دە يەرۋساليمدە ياھۋدي «ەل بيلەۋشىلەرى، اقساقالدار مەن ٴدىن مۇعالىمدەرىنىڭ» الدىندا ٴسوز سويلەگەندە، ٴدال وسى تارماقتى كەلتىرگەن بولاتىن. پەتىر ولار «باعاناعا ٸلىپ ولتىرگەن، ٴبىراق قۇداي ٴتىرىلتىپ العان نازارەتتىك يسا ٴماسىح» جايلى ايتقان. سوسىن: «وسى يسا — «قۇرىلىسشىلار، ياعني سىزدەر، مەنسىنبەگەن تاس. ول نەگىزگى بۇرىشتىق تاسقا اينالدى»،— دەدى (ەلشىلەردىڭ ىستەرى 3:15؛ 4:5—11؛ پەتىردىڭ 1-حاتى 2:5—7).
9. ٴزابۇر 118:22 دە قانداي ەلەۋلى وقيعا پايعامبارلىق ەتىلگەن؟
9 ٴزابۇر 118:22 دەگى پايعامبارلىقتىڭ جۇزدەگەن جىلدان سوڭ ورىن العان قايتا تىرىلۋگە نۇسقاعانى انىق. جۇرت ماسىحتەن باس تارتىپ، ٶلتىردى. ٴبىراق ول قايتا ٴتىرىلىپ، نەگىزگى بۇرىشتىق تاسقا اينالدى. قايتا تىرىلگەننەن كەيىن جەردەگىلەردىڭ ەشقايسىسىنا بەرىلمەگەن «ٴبىزدى قۇتقاراتىن ەسىم» تەك يسادا بولدى (ەلشىلەردىڭ ىستەرى 4:12؛ ەفەستىكتەرگە 1:20).
10. ا) ٴزابۇر 16:10 دا قانداي پايعامبارلىق جازىلعان؟ ٵ) ٴزابۇر 16:10 داعى سوزدەر داۋىتكە قاتىستى ەمەس ەكەنىن قايدان بىلەمىز؟
10 ەندى قايتا ٴتىرىلۋ جايلى الدىن الا ايتىلعان باسقا ٴبىر تارماقتى تالقىلايىق. بۇل سوزدەر مىڭداعان جىلدان كەيىن جۇزەگە اسقان ەدى. وسى جايت قايتا تىرىلۋدىڭ پايعامبارلىق ەتىلگەننەن نە ۋادە ەتىلگەننەن ۇزاق ۋاقىتتان كەيىن ورىن الۋى مۇمكىن ەكەنىنە سەنىمدىلىك بەرەدى. ٴزابۇردىڭ 16-تاراۋىندا ٴداۋىتتىڭ كەلەسى سوزدەرىن وقيمىز: «سەن مەنى كوردە قالدىرمايسىڭ، ادال قىزمەتشىڭنىڭ ورعا تۇسۋىنە جول بەرمەيسىڭ» (ٴزابۇر 16:10). مۇنىمەن ٴداۋىت ٶزىنىڭ ەشقاشان ولمەيتىنىن نە كوردە بولمايتىنىن ايتقىسى كەلمەگەن. قۇداي سوزىندە ٴداۋىتتىڭ قارتايىپ، كوز جۇمعانى جانە «سۇيەگى ٴداۋىتتىڭ قالاسىنا قويىلعانى» انىق ەتىپ جازىلعان (پاتشالار 1-جازبا 2:1، 10). ولاي بولسا، بۇل سوزدەر كىمگە قاتىستى ەدى؟
11. پەتىر ٴزابۇر 16:10 دى قاشان ٴتۇسىندىردى؟
11 ٴداۋىت وسى سوزدەردى جازعاننان مىڭنان اسا جىل وتكەن سوڭ، پەتىر ٴزابۇر 16:10 دا كىم تۋرالى ايتىلعانىن ٴتۇسىندىردى. يسانىڭ ٶلىپ، قايتا تىرىلگەنىنە بىرنەشە اپتا بولعاندا، پەتىر مىڭداعان ياھۋديلەر مەن ياھۋدي ٴدىنىن قابىلداعاندارعا ٴسوز ارنادى (ەلشىلەردىڭ ىستەرى 2:29—32 وقىڭىز). ول ٴداۋىتتىڭ دۇنيەدەن وزىپ، قابىرگە قويىلعانىن جۇرتتىڭ ەسىنە سالدى. سونداي-اق ٴداۋىت «ٴماسىحتىڭ قايتا تىرىلەتىنىن الدىن الا ٴبىلىپ»، سول تۋرالى ايتقانىن دا تىلگە تيەك ەتتى. سول كەزدە الدەكىمنىڭ پەتىرمەن كەلىسپەگەنى كيەلى كىتاپتا جازىلماعان.
12. ٴزابۇر 16:10 داعى سوزدەر قالاي ورىندالدى جانە بۇدان قايتا تىرىلۋگە قاتىستى ۋادە تۋرالى نە بىلەمىز؟
12 ٴسوزىن راستاۋ ٷشىن پەتىر ٴداۋىتتىڭ ٴزابۇر 110:1 دەگى سوزدەرىن كەلتىردى (ەلشىلەردىڭ ىستەرى 2:33—36 وقىڭىز). ول جازبالاردىڭ كومەگىمەن وي تۇزگەننىڭ ارقاسىندا جينالعان قاۋىم يسانىڭ «يەمىز ٵرى ٴماسىح» ەكەنىنە سەندى. ولار يسا ولىمنەن قايتا تىرىلگەن كەزدە ٴزابۇر 16:10 داعى سوزدەر ورىندالعانىن مويىندادى. كەيىن پيسيديانىڭ انتيوحيا قالاسىندا ياھۋديلەردىڭ الدىندا ٴسوز سويلەگەن ەلشى پاۋىل دا وسى ايعاقتى قولداندى. بۇل جۇرتقا قاتتى اسەر ەتىپ، ولار ونى ارى قاراي تىڭداي بەرگىسى كەلدى (ەلشىلەردىڭ ىستەرى 13:32—37، 42 وقىڭىز). بۇدان، جۇزدەگەن جىل وتكەن سوڭ عانا ورىندالسا دا، قايتا ٴتىرىلۋ جايلى اتالمىش كيەلى كىتاپ پايعامبارلىقتارى سەنىم ارتۋعا تۇرارلىق بولعانىنا ٴبىزدىڭ دە كوزىمىز جەتەدى.
قايتا ٴتىرىلۋ قاشان بولادى؟
13. قايتا تىرىلۋگە قاتىستى قانداي سۇراقتارىمىز بولۋى مۇمكىن؟
13 الدىن الا ايتىلعان قايتا ٴتىرىلۋ كوپتەگەن عاسىرلاردان كەيىن جۇزەگە اسۋى مۇمكىن ەكەنىن بىلگەنىمىز بىزگە جىگەر بەرەدى. دەسە دە كەيبىرىمىزدىڭ كوكەيىمىزدە: «سوندا جاقىن ادامىممەن قايتا قاۋىشۋ ٷشىن مەن ۇزاق ۋاقىت كۇتۋىم كەرەك پە؟ قايتا ٴتىرىلۋ قاشان بولادى؟»— دەگەن سۇراقتار تۋاتىن شىعار. ەسىمىزدە بولسا، يسا ەلشىلەرىنە ولار بىلمەيتىن جانە بىلە دە المايتىن جايتتاردىڭ بار ەكەنىن ايتقان. «اكەنىڭ قۇزىرىنداعى ۋاقىتتار مەن مەرزىمدەرگە» قاتىستى جايتتار دا بار (ەلشىلەردىڭ ىستەرى 1:6، 7؛ جوحان 16:12). ايتكەنمەن قايتا تىرىلۋدىڭ قاشان بولاتىنىنا قاتىستى مالىمەت مۇلدە جوق ەمەس.
14. يسانىڭ قايتا ٴتىرىلۋى وعان دەيىنگىلەردەن نەسىمەن ەرەكشە بولدى؟
14 كيەلى كىتاپتا جازىلعان ەڭ ماڭىزدى قايتا ٴتىرىلۋ — يسانىڭ ٴتىرىلۋى. ەگەر ول ولىمنەن قايتا تىرىلمەگەندە، ەشقايسىسىمىز دا ومىردەن وتكەن جاقىندارىمىزدى كورۋگە ۇمىتتەنە الماس ەدىك. يساعا دەيىن قايتا تىرىلگەن ادامدار، مىسالى ٸلياس پەن ەلىشە تىرىلتكەن ادامدار، ماڭگى عۇمىر كەشكەن جوق. ولار قايتادان جەر قۇشىپ، تاندەرى ٴشىرىپ كەتتى. ٴبىراق يسا «ولىمنەن قايتا ٴتىرىلدى». ول «ەندى قايتىپ ولمەيدى جانە وعان ولىمنىڭ بيلىگى جۇرمەيدى». كوكتە ول «ماڭگى ٶمىر سۇرەدى» (ريمدىكتەرگە 6:9؛ ايان 1:5، 18؛ قولوستىقتارعا 1:18؛ پەتىردىڭ 1-حاتى 3:18).
15. نەگە يسا «ٶلىم ۇيقىسىنداعىلاردىڭ العاشقىسى» دەپ اتالعان؟
15 يسانىڭ كوككە رۋحاني تۇلعا رەتىندە قايتا تىرىلگەنى وسىنداي قايتا تىرىلۋدىڭ ەڭ العاشقىسى ٵرى ەڭ باستىسى بولدى (ەلشىلەردىڭ ىستەرى 26:23). ٴبىراق كوكتە ٶمىر ٴسۇرۋ ٷشىن قايتا تىرىلەتىن ودان باسقالار دا بار. يسا ادال ەلشىلەرىنىڭ وزىمەن بىرگە كوكتە بيلىك ەتەتىنىن ۋادە ەتكەن (لۇقا 22:28—30). ولار وسى سىيعا كوز جۇمعان سوڭ عانا يە بولماق ەدى. يسا سياقتى ولار دا رۋحاني دەنەمەن قايتا تىرىلمەك ەدى. پاۋىل «ٴماسىح ٶلىم ۇيقىسىنداعىلاردىڭ العاشقىسى بولىپ تىرىلگەنىن» ايتقان. سوسىن ول باسقالاردىڭ دا قايتا ٴتىرىلىپ، كوككە باراتىنىن ايتتى: «بارلىعى ٶز كەزەگىمەن: العاشقىسى — ٴماسىح، سوسىن ٴماسىح وسىندا بولاتىن كەزدە ونىڭ مەنشىگىندەگىلەر تىرىلەدى» (قورىنتتىقتارعا 1-حات 15:20، 23).
16. كوكتەگى ومىرگە قايتا تىرىلۋدىڭ قاشان بولاتىنىنا قاتىستى نە بىلەمىز؟
16 پاۋىلدىڭ سوزدەرىنەن كوكتەگى ومىرگە قايتا تىرىلۋدىڭ قاشان بولاتىنىن بىلۋگە بولادى. بۇل ٴماسىح وسىندا بولاتىن كەزدە ورىن الادى. كوپتەگەن جىل بويى ەحوبا كۋاگەرلەرى كيەلى كىتاپتان ٴماسىحتىڭ «وسىندا بولاتىن كەزى» 1914-جىلى باستالعانىن دالەلدەپ كەلەدى. ٴبىز ٵلى دە يسانىڭ «وسىندا بولاتىن كەزىندە» ٶمىر ٴسۇرىپ جاتىرمىز جانە وسى زۇلىم دۇنيەنىڭ اقىرى وتە جاقىن.
17، 18. ٴماسىح وسىندا بولاتىن كەزدە كەيبىر مايلانعاندارمەن نە بولادى؟
17 كوكتەگى ومىرگە قايتا ٴتىرىلۋ جايىندا كيەلى كىتاپتا تاعى مىناداي مالىمەت بار: «سەندەردى ٶلىم ۇيقىسىندا جاتقاندار تۋرالى دا بەيحابار قالدىرعىمىز كەلمەيدى. يسانىڭ ٶلىپ، قايتا تىرىلگەنىنە سەنسەك،.. ٶلىم ۇيقىسىنا كەتكەندەرگە ونىمەن بىرگە بولۋ ٷشىن قۇدايدىڭ ٶمىر بەرەتىنىنە دە سەنەمىز... يەمىز وسىندا بولاتىن كەزدە ٵلى ٴتىرى جۇرەتىندەرىمىز ٶلىم ۇيقىسىنا كەتكەندەردەن ەش ٶزبايمىز. سەبەبى يەمىزدىڭ ٶزى كوكتەن باس پەرىشتەنىڭ داۋسىمەن بۇيرىق بەرىپ،.. ٴماسىح جولىندا ولگەندەر ٴبىرىنشى بولىپ تىرىلەدى. سوسىن ٴبىز — ٴتىرى جۇرگەندەر — سولارمەن بىرگە يەمىزبەن اۋادا كەزدەسۋ ٷشىن بۇلت ىشىندە اكەتىلەمىز، ٴسويتىپ، ۇنەمى يەمىزبەن بىرگە بولامىز» (سالونيكالىقتارعا 1-حات 4:13—17).
18 العاشقى قايتا ٴتىرىلۋ، ياعني كوكتەگى ومىرگە قايتا ٴتىرىلۋ، ٴماسىحتىڭ وسىندا بولاتىن كەزى باستالعاننان كەيىن ورىن الماق ەدى. زور الاپات كەزىندە ٴتىرى جۇرەتىن مايلانعاندار «بۇلت ىشىندە اكەتىلەدى». بۇل نەنى بىلدىرەدى؟ «بۇلت ىشىندە اكەتىلەتىندەر» «ٶلىم ۇيقىسىنا كەتپەيدى»، بۇل ولاردىڭ ۇزاق ۋاقىت ٶلى كۇيدە جاتپايتىنىن بىلدىرەدى. ولگەن كەزدە ولاردىڭ «ٴبارى دە وزگەرەدى. بۇل كەنەتتەن، قاس قاعىم ساتتە، سوڭعى كەرنەي تارتىلىپ جاتقاندا ىسكە اسادى» (قورىنتتىقتارعا 1-حات 15:51، 52؛ ماتاي 24:31).
19. «اناعۇرلىم جاقسى قايتا ٴتىرىلۋ» دەگەن قانداي قايتا ٴتىرىلۋ؟
19 بۇگىندە ادال ماسىحشىلەردىڭ باسىم كوپشىلىگى مايلانباعان، ياعني كوكتە ماسىحپەن بىرگە بيلىك ەتۋگە تاڭدالماعان. ولار وسى زۇلىم دۇنيە جويىلاتىن كەزدى، «ەحوبانىڭ كۇنىن» اسىعا كۇتەدى. بۇل كەز قاشان كەلەتىنىن ەشكىم ناقتى بىلمەيدى، ٴبىراق ايعاقتارعا قاراساق، ول كۇننىڭ جاقىن ەكەنىن بىلەمىز (سالونيكالىقتارعا 1-حات 5:1—3). قۇدايدىڭ جاڭا دۇنيەسى ورناعاندا، قايتا تىرىلۋدىڭ باسقا ٴتۇرى ورىن الادى. ول كەزدە ادامدار جەردەگى ومىرگە قايتا تىرىلەدى ٵرى كەمەلدى بولىپ، ەندى قايتىپ ولمەۋگە ۇمىتتەنە الادى. وسى قايتا ٴتىرىلۋ بۇرىندارى بولعان كەزدەگى قايتا تىرىلۋدەن «اناعۇرلىم جاقسى» بولادى، ويتكەنى بۇرىن تىرىلگەن ادامدار كەيىنىرەك قايتادان كوز جۇمعان (ەۆرەيلەرگە 11:35).
20. قايتا ٴتىرىلۋ بەلگىلى ٴبىر تارتىپپەن بولاتىنىنا نەگە سەنىمدىمىز؟
20 كيەلى كىتاپتا كوكتەگى ومىرگە قايتا تىرىلەتىندەردىڭ «بارلىعى ٶز كەزەگىمەن» تىرىلەتىنى ايتىلعان (قورىنتتىقتارعا 1-حات 15:23). ەندەشە جەردەگى ومىرگە قايتا ٴتىرىلۋ دە ٶز كەزەگىمەن نەمەسە تارتىپپەن بولاتىنىنا سەنىمدى بولساق بولادى. وسى ورايدا كەلەسىدەي سۇراقتار تۋىنداۋى مۇمكىن: جاقىندا قايتىس بولعاندار ٴماسىحتىڭ مىڭ جىلدىق بيلىگىنىڭ باس جاعىندا قايتا ٴتىرىلىپ، جاقىندارىمەن قاۋىشا ما؟ ەجەلدە ادال دا قابىلەتتى جەتەكشى بولعان ەر كىسىلەر جاڭا دۇنيەدە قۇداي حالقىن ۇيىمداستىرۋعا كومەكتەسۋ ٷشىن ەرتەرەك تۇرا ما؟ ەحوباعا ەشقاشان قىزمەت ەتپەگەن ادامدارمەن نە بولادى؟ ولار قاشان جانە قاي جەردە قايتا تىرىلەدى؟ سانامىزدا سانسىز سۇراقتار تۋاتىن شىعار. ٴبىراق بۇنىڭ ٴبارىن ويلاپ ۋايىمداۋدىڭ قاجەتى جوق. ونى ٶز ۋاقىتى كەلگەندە كورەلىك. ەحوبا قالاي ٴبارىن جايعاستىراتىنىن كورگەندە، اڭ-تاڭ بولىپ، قۋاناتىنىمىزعا سەنىمدىمىز.
21. ٴسىزدىڭ نەندەي ٷمىتىڭىز بار؟
21 ول ۋاقىت كەلگەنشە، ٴبىز ەحوباعا دەگەن سەنىمىمىزدى قاتايتۋىمىز كەرەك. ول مارقۇمداردى ەستە ساقتايتىنىن جانە ولاردىڭ قايتا ٶمىر سۇرەتىنىن يسا ارقىلى ۋادە ەتكەن (جوحان 5:28، 29؛ 11:23). يسا ەحوبا ٷشىن ىبىرايىم، ىسقاق جانە جاقىپتىڭ «ٴبارى ٴتىرى» ەكەنىن ايتقاندا، قۇدايدىڭ ولگەندەردى تىرىلتەتىنىنە قوسىمشا دالەل كەلتىردى (لۇقا 20:37، 38). ولاي بولسا، بىزدە دە ەلشى پاۋىل سياقتى بىلاي دەۋگە سەبەپ جەتىپ ارتىلادى: «مەن قۇدايدىڭ... قايتا تىرىلتەتىنىنە ۇمىتتەنەمىن» (ەلشىلەردىڭ ىستەرى 24:15).
