جاستار، «قۇتقارىلۋعا ۇمتىلا بەرىڭدەر»
«ارى قاراي دا مويىنسۇنعىش بولىپ، قالتىراي قورقىپ، قۇتقارىلۋعا ۇمتىلا بەرىڭدەر» (فىلىپىلىكتەرگە 2:12).
اندەر: 41، 89
1. شومىلدىرۋ راسىمىنەن ٶتۋ نەگە وتە ماڭىزدى شەشىم؟ (ماقالانىڭ باسىنداعى سۋرەتتى قارا.)
جىل سايىن مىڭداعان كيەلى كىتاپ زەرتتەۋشىسى شومىلدىرۋ راسىمىنەن وتەدى. ولاردىڭ اراسىندا كوپتەگەن جاس وسپىرىمدەر مەن ودان دا كىشىلەرى بار. كەيبىرى شىندىقتى بالا كەزىنەن بىلەدى. سەن دە سولاردىڭ قاتارىنان بولساڭ، وتە دۇرىس شەشىم قابىلدادىڭ. ٵربىر ٴماسىحشى شومىلدىرۋ راسىمىنەن ٶتۋى ٴتيىس. شومىلدىرۋ ٴراسىمى — قۇتقارىلىپ، ماڭگى ٶمىر ٴسۇرۋ ٷشىن قاجەت قادام (ماتاي 28:19، 20؛ پەتىردىڭ 1-حاتى 3:21).
2. ەحوباعا باعىشتالۋدان نەگە قورىقپاعانىڭ ٴجون؟
2 شومىلدىرۋ راسىمىنەن وتكەن سوڭ، ەحوبا سەنى كوپتەگەن جاڭا جولدارمەن جارىلقاي باستادى. بۇعان قوسا، جاڭا جاۋاپكەرشىلىكتەرىڭ دە پايدا بولدى. بۇل قانداي جاۋاپكەرشىلىكتەر؟ شومىلدىرۋ راسىمىنەن وتكەن كۇنى بايانداما ايتقان باۋىرلاس: «يسا ٴماسىحتىڭ قۇرباندىعىنىڭ نەگىزىندە ٶز كۇنالارىڭا وكىنىپ، ەحوبانىڭ ەركىن ورىنداۋ ٷشىن وعان باعىشتالدىڭ با؟»— دەپ سۇراعاندا، سەن «ٴيا» دەپ جاۋاپ بەردىڭ. سەن ەحوبانى جاقسى كورۋدى جانە وعان قىزمەت ەتۋدى ومىرىڭدە ەڭ باستى ورىنعا قويۋدى ۋادە ەتتىڭ.
وسىنداي ماڭىزدى ۋادە بەرگەنىڭە وكىنەسىڭ بە؟ وكىنبەيتىنىڭ ٴسوزسىز! ٶمىرىڭدى ەحوبانىڭ قولىنا تابىستاعانىڭ ٷشىن ەشقاشان وكىنبەيتىن بولاسىڭ. ەحوبانى تانىمايتىن ادامدار شايتاننىڭ قول استىندا ٴجۇر. ولاردىڭ دا، سەنىڭ دە جاعدايىڭ ٸبىلىستى ەش قىزىقتىرمايدى. كەرىسىنشە، ەگەر سەن ەحوبادان تەرىس اينالىپ، ونىڭ جاعىنا شىقساڭ ٵرى ناتيجەسىندە ماڭگى ٶمىر ٴسۇرۋ ۇمىتىنەن ايىرىلساڭ، ول قاتتى قۋانادى.3. ٶمىرىڭدى ەحوباعا باعىشتاعانىڭ ٷشىن ول سەنى قالاي جارىلقاپ جاتىر؟
3 ٶمىرىڭدى قۇدايعا باعىشتاپ، شومىلدىرۋ راسىمىنەن وتكەلى بەرى ول سەنى قالاي جارىلقاپ كەلە جاتقانىن ويلاشى. سەن ٶمىرىڭدى ەحوباعا تاپسىرعاندىقتان، سەنىمدىلىكپەن بىلاي دەپ ايتا الاسىڭ: «ەحوبا مەنىڭ جاعىمدا؛ مەن ەش قورىقپايمىن. ادام بالاسى ماعان نە ىستەي الادى؟!» (ٴزابۇر 118:6). قۇدايدىڭ جاعىندا بولىپ، ول سەنى ماقتان ەتەتىنىن سەزىنۋدەن ارتىق قۇرمەت جوق!
جەكە جاۋاپكەرشىلىگىڭ
4، 5. ا) نەگە ەحوباعا باعىشتالۋ اركىمنىڭ ٶز جاۋاپكەرشىلىگىندە دەپ ايتا الامىز؟ ٵ) كەز كەلگەن جاستاعى ماسىحشىلەردىڭ قانداي سىناقتارى بار؟
4 سەنىڭ ەحوبامەن قارىم-قاتىناسىڭ اتا-اناڭنان مۇرا بولىپ قالاتىن قانداي دا ٴبىر مۇلىك نە جەر تەلىمى سياقتى ەمەس. ٵلى اتا-اناڭمەن بىرگە تۇراتىن بولساڭ دا، ەحوبامەن قارىم-قاتىناس دامىتۋ — جەكە جاۋاپكەرشىلىگىڭ. نەگە مۇنى ۇمىتپاعانىمىز ٴجون؟ ەشقايسىسىمىز دا ەرتەڭگى كۇنى سەنىمىمىز ناقتى قالاي سىنالاتىنىن بىلمەيمىز. ماسەلەن، سەن جاس ٶسپىرىم شاققا وتپەي تۇرىپ شومىلدىرۋ راسىمىنەن وتكەن بولارسىڭ. ال جەتكىنشەكتىك كەزەڭگە وتكەندە، بۇرىن بولماعان سەزىمدەردى كەشىپ، جاڭا قيىندىقتارىڭ پايدا بولادى. ٴبىر جاس ٶسپىرىم قىز بىلاي دەيدى: «ادەتتە كىشكەنتاي بالا سىنىپتاستارىممەن تۋعان كۇن تورتىن جەي المايمىن دەپ، ەحوبا كۋاگەرى بولعانىنا كوڭىلى تۇسپەيدى. ال ٴبىراز جىلدان سوڭ ەسەيىپ، جىنىستىق قۇمارلىعى كۇشەيگەندە، ول ەحوبانىڭ زاڭدارىنا باعىنۋ ەڭ دۇرىس شەشىم ەكەنىنە تولىقتاي سەنىمدى بولۋى كەرەك».
5 بۇرىن كەزىكپەگەن قيىندىقتاردى باستان كەشىرەتىن جاستار عانا ەمەس. ەرەسەك جاستا شومىلدىرۋ راسىمىنەن وتكەن ادامنىڭ دا سەنىمى ٶزى كۇتپەگەن جولدارمەن سىنالۋى مۇمكىن. بۇل سىناقتار نەكەدە، دەنساۋلىق ماسەلەسىمەن نە جۇمىستا تۋىنداۋى ىقتيمال. قانشا جاستا بولمايىق، ٵرتۇرلى جاعدايلاردا ەحوباعا ادالدىق ساقتاپ قالۋىمىز كەرەك (جاقىپ 1:12—14).
6. ا) ەحوباعا ەشقانداي شارتسىز ۋادە بەرگەنىڭ نەنى بىلدىرەدى؟ ٵ) فىلىپىلىكتەرگە 4:11—13 تارماقتاردان نەگە ۇيرەنە الاسىڭ؟
6 ادالدىق ساقتاۋ ٷشىن، ەحوباعا بەرگەن ۋادەڭنىڭ ەشقانداي شارتسىز بەرىلگەنىن ٵرقاشان ەستە ۇستا. بۇل سەنىڭ قانداي جاعداي بولماسىن، ٴتىپتى اتا-اناڭ نە دوستارىڭ قىزمەت ەتپەي قويسا دا، قۇداي تاعالاعا قىزمەت ەتۋدى دوعارمايمىن دەپ وعان ٴسوز بەرگەنىڭدى بىلدىرەدى (ٴزابۇر 27:10). بارلىق جاعدايدا ەحوباعا دۇعا ەتىپ، بەرگەن ۋادەڭدە تۇرۋىڭا كومەك سۇرا (فىلىپىلىكتەرگە 4:11—13 وقى).
7. «قالتىراي قورقىپ، قۇتقارىلۋعا ۇمتىلۋ» دەگەن نەنى بىلدىرەدى؟
7 ەحوبا سەنىمەن دوس بولعىسى كەلەدى. ٴبىراق بۇل دوستىقتى بەرىك ساقتاۋ ٷشىن جانە قۇتقارىلۋعا ۇمتىلۋ ٷشىن كۇش سالۋ فىلىپىلىكتەرگە 2:12-دە: «ارى قاراي دا... قالتىراي قورقىپ، قۇتقارىلۋعا ۇمتىلا بەرىڭدەر»،— دەلىنگەن. بۇل سوزدەر قالاي ەحوبامەن تىعىز قارىم-قاتىناستى ساقتاپ، وعان كەز كەلگەن جاعدايدا ادال بولىپ قالا الاتىنىمىزدى جاقسىلاپ ويلانۋ كەرەكتىگىن بىلدىرەدى. ەشقايسىسىمىز بۇل ماعان قيىن ەمەس دەپ سەنىمدىلىكپەن ايتا المايمىز. قۇدايعا كوپ جىل بويى قىزمەت ەتسە دە، كەيبىرى ادالدىقتان تايىپ كەتكەنىن ۇمىتپا. قۇتقارىلۋعا ۇمتىلۋ ٷشىن سەن قانداي قادامدار جاساۋىڭ كەرەك؟
قاجەت. وسىعان قاتىستىكيەلى كىتاپتى زەرتتەۋ وتە ماڭىزدى
8. جەكە زەرتتەۋگە نە كىرەدى جانە ول نەگە ماڭىزدى؟
8 ەحوبامەن دوستاسۋ ٷشىن ٴبىز ونى تىڭداۋىمىز جانە وعان سويلەۋىمىز كەرەك. ەحوبانى تىڭداۋدىڭ ەڭ باستى جولى — كيەلى كىتاپتى وقىپ-زەرتتەۋ. بۇعان قۇداي ٴسوزىن جانە كيەلى كىتاپقا نەگىزدەلگەن ادەبيەتتەردى وقىپ، وي جۇگىرتۋ جاتادى. ٴبىراق كيەلى كىتاپتى زەرتتەۋ مەكتەپتەگىدەي ەمتيحان تاپسىرۋ ٷشىن مالىمەتتى جاتتاپ الۋ سياقتى ەمەس. قايتا، بۇل ىزدەنىس جاساپ، ەحوبا تۋرالى جاڭا نارسەلەردى اشاتىن قىزىقتى ساياحات سەكىلدى. سوندا سەن ەحوباعا جاقىنداي تۇسەسىڭ، ال ول ساعان جاقىندايدى (جاقىپ 4:8).
ەحوبامەن قانشالىقتى جاقسى پىكىر الىساسىڭ؟ (8—11 ابزاستاردى قارا)
9. جەكە زەرتتەۋدە ساعان قانداي قۇرالدار كومەكتەسەدى؟
9 جەكە زەرتتەۋدە سەن ەحوبانىڭ ۇيىمى شىعارىپ جاتقان كوپتەگەن قۇرالداردى قولدانساڭ بولادى. مىسالى، jw.org تور بەكەتىنىڭ «جاس وسپىرىمدەر» دەگەن ساناتىنداعى «جۇمىس داپتەرى» دەپ اتالاتىن توپتامانى الايىق. بۇل توپتاما ساعان كيەلى كىتاپتاعى وقيعالاردان بىلگەنىڭدى ٸس جۇزىندە قولدانۋعا كومەكتەسەدى. سونداي-اق توربەكەتتە «كيەلى كىتاپ نەگە ۇيرەتەدى؟» دەپ اتالاتىن ىزدەنىس قۇرالدارى بار. ولار ساعان سەنىمىڭدى نىعايتۋعا جانە نانىمدارىڭدى وزگەلەرگە ٴتۇسىندىرىپ بەرۋگە كومەكتەسەدى. 2017-جىلعى «كۇزەت مۇناراسىنىڭ» №1-سانىنىڭ 3—7- بەتتەرىنەن جانە 2009-جىلدىڭ ساۋىرىندە شىققان «ويانىڭدار!» جۋرنالىنىڭ (حانزۋشا) «جاستاردىڭ ساۋالدارى. كيەلى كىتاپتى قىزىعىپ وقۋ ٷشىن نە ىستەۋگە بولادى؟» دەگەن ماقالاسىنان جەكە زەرتتەۋگە قاتىستى باسقا دا جاقسى كەڭەستەر تابا الاسىڭ. قۇتقارىلۋعا ۇمتىلۋ ٷشىن زەرتتەۋ مەن وي جۇگىرتۋدىڭ ماڭىزى زور (ٴزابۇر 119:105 وقى).
دۇعانىڭ ماڭىزى وتە زور
10. نەگە شومىلدىرۋ راسىمىنەن وتكەن ٴماسىحشى دۇعا ەتۋى قاجەت؟
10 كيەلى كىتاپتى زەرتتەگەندە، ٴبىز ەحوبانى تىڭدايمىز. ال دۇعا ەتكەندە، ٶزىمىز وعان سويلەيمىز. ٴبىز دۇعاعا انشەيىن ٴبىر ۇيرەنشىكتى ادەت نە ساتتىلىك ٷشىن ايتىلاتىن تىلەك سياقتى قاراماۋىمىز كەرەك. دۇعا جاراتۋشىمىزبەن شىنىمەن سويلەسۋدى بىلدىرەدى. ەحوبا سەنىڭ نە ايتاتىنىڭدى ەستىگىسى كەلەدى! بۇل كەرەمەت ەمەس پە؟! (فىلىپىلىكتەرگە 4:6 وقى). سوندىقتان قانداي دا ٴبىر سەبەپپەن ۋايىمعا بەرىلسەڭ، كيەلى كىتاپ «بار اۋىرتپالىعىڭدى ەحوباعا ارتۋعا» شاقىرادى (ٴزابۇر 55:22). ميلليونداعان باۋىرلاس بۇل كەڭەستىڭ پايداسىن كورگەن. سەن دە ونىڭ پايداسىن كورە الاسىڭ!
11. نەگە ەحوباعا ٵردايىم العىس بىلدىرۋىڭ كەرەك؟
11 الايدا ٴبىز ەحوبادان كومەك العىمىز كەلگەندىكتەن عانا دۇعا ەتپەۋىمىز كەرەك. كيەلى كىتاپتا: «ٵردايىم العىس بىلدىرىڭدەر»،— دەلىنگەن (قولوستىقتارعا 3:15). كەيدە قيىندىقتارىمىز جايلى ويلاپ ۋايىمعا باتىپ كەتەتىنىمىز سونشا، وزىمىزدە بار يگىلىكتەردى ەلەمەي كەتەمىز. سوندىقتان ەحوباعا كەم دەگەندە قانداي ٷش نارسە ٷشىن ريزامىن دەپ كۇن سايىن ويلانىپ، سوسىن سولار ٷشىن وعان العىسىڭدى ٴبىلدىر. 12 جاسىندا شومىلدىرۋ راسىمىنەن وتكەن ابيگەل ەسىمدى جاس ٶسپىرىم قىز بىلاي دەيدى: «مەنىڭشە، ەحوبا — راقمەت ايتۋىمىزعا الەمدەگى ەڭ لايىق تۇلعا. ٴبىز وعان مۇمكىندىك تۋعان كەزدىڭ بارىندە بەرىپ جاتقان سىيلارى ٷشىن العىس ايتۋىمىز كەرەك». ابيگەل ٴبىر كەزدەرى ەستىگەن مىنا سۇراق جايلى ويلانىپ تۇرادى ەكەن: «بۇگىن ەحوباعا نە نارسەلەر ٷشىن العىس بىلدىرسەم، ەرتەسىنە سولار عانا قالاتىن بولسا، مەندە نە قالار ەدى؟»
ٶز باسىڭنان وتكىزۋدىڭ پايداسى
12، 13. ٶز ومىرىڭدە ەحوبانىڭ ىزگىلىگىن قالاي كوردىڭ؟ ەحوبانىڭ وزىڭە قالاي كومەكتەسكەنى جايلى ويلاعانىڭ نەگە ماڭىزدى؟
12 ەحوبا ٴداۋىت پاتشاعا كوپتەگەن قيىن جاعدايلارعا توزۋگە كومەكتەستى. سوعان ٶز ومىرىندە كوزى جەتىپ ول بىلاي دەدى: «دامىن تاتىڭدار دا، ەحوبانىڭ ىزگىلىگىنە كوز جەتكىزىڭدەر؛ ودان پانا تاپقاندار باقىتتى» (ٴزابۇر 34:8). بۇل تارماق ەحوبانىڭ ىزگىلىگىن ٶز ومىرىمىزدە كورۋىمىز كەرەكتىگىنە نۇسقايدى. سەن كيەلى كىتاپ پەن ادەبيەتتەردى وقىعاندا ٵرى قاۋىم كەزدەسۋلەرىنە قاتىسقاندا، قۇدايدىڭ باسقالارعا ادال بولىپ قالۋعا قالاي كومەكتەسكەنىن بىلەسىڭ. ٴبىراق ەحوبامەن قارىم-قاتىناسىڭ نىعايعان سايىن، ەحوبانىڭ ساعان قالاي كومەكتەسىپ جاتقانىن كورە بىلۋىڭ قاجەت. ٶز ومىرىڭدە ەحوبانىڭ ىزگى ەكەنىن قالاي كوردىڭ؟
13 ٵر ٴماسىحشى ەحوبانىڭ ىزگىلىگىن ٶز ومىرىندە ٴبىر ەرەكشە جولمەن كورگەن: ەحوبا ٵرقايسىسىمىزدى وزىنە جانە ۇلىنا جاقىنداتىپ تارتتى. يسا: «مەنى جىبەرگەن اكەم جاقىنداتىپ تارتسا عانا، ادام ماعان كەلە الادى»،— دەگەن (جوحان 6:44). ەحوبا سەنى وزىنە جاقىنداتىپ تارتتى دەپ ويلايسىڭ با؟ الدە «ەحوبا اكە-شەشەمدى وزىنە جاقىنداتتى، ال مەن جاي عانا سولارعا ەرىپ ٴجۇرمىن» دەيسىڭ بە؟ ٴبىراق ەحوباعا ٶزىڭدى باعىشتاپ، شومىلدىرۋ راسىمىنەن وتكەنىڭدە، سەن ونىمەن جەكە ٶزىڭنىڭ قارىم-قاتىناسىڭ بار ەكەنىن كورسەتتىڭ. كيەلى كىتاپتا: «كىم قۇدايدى سۇيسە، قۇداي سول ادامدى بىلەدى»،— دەلىنگەن (قورىنتتىقتارعا 1-حات 8:3). ەندەشە، ەحوبانىڭ ۇيىمىنداعى ورنىڭدى ٵردايىم جوعارى باعالا.
14، 15. ۋاعىز ٸسى سەنىمىڭدى قاتايتۋعا قالاي كومەكتەسەدى؟
14 سونداي-اق ەحوبا ساعان قىزمەتتە نە مەكتەپتە سەنىمىڭ جايلى باتىلدىقپەن ايتۋعا كومەكتەسكەندە، ونىڭ ىزگىلىگىن سەزىنەسىڭ. سىنىپتاستارىڭا ۋاعىزداۋ وڭايعا سوقپايتىن شىعار. ولار مۇنى قالاي قابىلدايتىنىن ويلاپ ۋايىمدايتىن شىعارسىڭ. اسىرەسە كوپشىلىكتىڭ الدىندا تۇرىپ نانىمدارىڭدى ٴتۇسىندىرۋ قورقىنىشتى بولار. بۇل ورايدا ساعان نە كومەك بولماق؟
15 سەنىپ جۇرگەن نارسەلەرىڭە نەلىكتەن سەنەتىنىڭ جايلى ويلا. jw.org توربەكەتىندەگى ىزدەنىس قۇرالدارى سەنىڭ تىلىڭدە بولسا، ولاردى قولدانۋعا تىرىس. بۇل ىزدەنىس قۇرالدارى نە نارسەگە سەنەتىنىڭدى، ولارعا نەلىكتەن سەنەتىنىڭدى جانە نانىمدارىڭدى باسقالارعا قالاي تۇسىندىرۋگە بولاتىنى جايلى ويلانۋعا كومەكتەسەدى. شىنىمەن كوز جەتكىزسەڭ ٵرى جاقسىلاپ دايىندالىپ الساڭ، ەحوبا جايلى كۋالىك بەرۋگە ىقىلاستى بولاسىڭ (ەرەميا 20:8، 9).
16. نانىمدارىڭ جايلى باتىل ايتۋعا ساعان نە كومەكتەسە الادى؟
16 جاقسىلاپ دايىندالعان كۇننىڭ وزىندە، سەنىمىڭ جايلى ٴسوز باستاۋعا جۇرەكسىنۋىڭ مۇمكىن. 13 جاسىندا شومىلدىرۋ راسىمىنەن وتكەن 18 جاسار ٴبىر قىز باۋىرلاسىمىز بىلاي دەپ بولىسەدى: «نە نارسەگە سەنەتىنىمدى جۇزگە بىلسەم دە، كەيدە ويىمداعىنى جەتكىزۋگە قينالىپ قالامىن». سوندىقتان ول شىندىقتى ەركىن جانە تابيعي مانەردە جەتكىزۋگە تىرىسادى ەكەن. ول بىلاي دەيدى: «سىنىپتاستارىم نە ىستەپ جۇرگەندەرى جايلى ەش قىسىلماستان ايتادى. مەن دە سولاي ەتۋىم كەرەك. سول ٷشىن مەن ٴسوز اراسىندا ٴبىر نارسەلەردى اڭگىمە قىلامىن، مىسالى: «وتكەندە كيەلى كىتاپتان ٴتالىم بەرگەندە مىنانداي وقيعا بولدى...»— دەيمىن. سوسىن ايتقىم كەلگەن تاقىرىپقا كوشەمىن. تىكەلەي كيەلى كىتاپ تۋرالى ايتپاسام دا، ٴجيى سىنىپتاستارىم كيەلى كىتاپتان قالاي ٴتالىم بەرەتىنىم جايلى بىلگىسى كەلەدى. كەيدە ولار سۇراقتار دا قويادى. وسى ٴتاسىلدى كوبىرەك قولدانعان سايىن، ٴسوز باستاۋ مەن ٷشىن وڭاي بولا تۇسەدى. ارتىنان ٶزىمدى سونداي باقىتتى سەزىنەمىن!»
17. سەنىمىڭ جايلى ايتۋعا ساعان تاعى نە كومەكتەسە الادى؟
17 ادامدار ولاردىڭ قامىن ويلاپ تۇرعانىڭدى
جانە قۇرمەتتەيتىنىڭدى سەزسە، ساعان جانە نانىمدارىڭا قۇرمەتپەن قاراۋى وڭايىراق بولادى. كىشكەنتاي كەزىندە شومىلدىرۋ راسىمىنەن وتكەن 17 جاسار وليۆيا بىلاي دەيدى: «اڭگىمە بارىسىندا كيەلى كىتاپ جايلى ٴسوز قوزعاسام، ادامدار مەنى دىنگە تىم بەرىلىپ كەتكەن دەپ ويلايدى دەپ قورقاتىنمىن». كەيىن ول جاعدايعا باسقاشا قاراي باستادى. ول قورقىنىشتىڭ ويىن تۇساۋلاپ الۋىنا جول بەرمەدى، قايتا بىلاي دەپ ويلادى: «كوپ جاستار ەحوبا كۋاگەرلەرى تۋرالى ەشتەڭە دە بىلمەيدى. ولار كورىپ جۇرگەن كۋاگەرلەر بىزدەر عانا. سوندىقتان ۋاعىزىمىزدى قالاي قابىلدايتىنى ٶزىمىزدى قالاي ۇستايتىنىمىزعا بايلانىستى. ۇيالشاق بولساق، سەنىمىمىز جايلى ايتۋعا قينالساق نەمەسە سويلەگەندە قىسىلىپ-قىمتىرىلىپ تۇرساق، ولار نە ويلايدى؟ كۋاگەر بولعانىمىزدى ماقتان ەتپەيمىز دەپ ويلاپ قالۋى مۇمكىن. ٴتىپتى سەنىمسىز بولىپ تۇرعانىمىزدى كورىپ، دورەكى جاۋاپ بەرۋى دە ىقتيمال. ال كەرىسىنشە، نە نارسەگە سەنەتىنىمىزدى ەمىن-ەركىن ٵرى سەنىمدىلىكپەن ايتساق، وسىلايشا بۇل جايلى ايتۋ ٴبىز ٷشىن قالىپتى جايت ەكەنىن كورسەتسەك، ولار بىزگە قۇرمەتپەن قاراي باستاۋى ابدەن مۇمكىن».قۇتقارىلۋعا ۇمتىلا بەر
18. قۇتقارىلۋعا ۇمتىلۋ ٷشىن نە ىستەگەنىڭ ٴجون؟
18 وسى ماقالادا سەن ٷشىن قۇتقارىلۋعا ۇمتىلۋدىڭ ۇلكەن جاۋاپكەرشىلىك ەكەنىن بىلدىك. قۇتقارىلۋعا ۇمتىلۋ ٷشىن قۇداي ٴسوزىن وقىعانىڭ، وقىعاندارىڭ جايلى وي جۇگىرتكەنىڭ، ەحوباعا دۇعا ەتكەنىڭ جانە ونىڭ جەكە ساعان ٴتۇرلى جولمەن كومەكتەسىپ كەلگەنى جايلى تەرەڭ ويلانعانىڭ ٴجون. وسىلاي ەتكەننىڭ ارقاسىندا ەحوبانىڭ دوسىڭ ەكەنىنە سەنىمدى بولا تۇسەسىڭ. سوندا سەنىمىڭ جايلى باسقالارعا ايتۋعا ىقىلاستى بولاسىڭ (ٴزابۇر 73:28 وقى).
19. قۇتقارىلۋعا ۇمتىلۋ نەگە بار كۇشىمىزدى سالۋعا تۇرارلىق؟
19 يسا: «كىم مەنىڭ سوڭىمنان ەرگىسى كەلسە، وزىنەن باس تارتىپ، ازاپ باعاناسىن الىپ، ۇدايى سوڭىمنان ەرىپ ٴجۇرسىن»،— دەگەن (ماتاي 16:24). يسانىڭ سوڭىنان ەرۋ ٷشىن ٵر ٴماسىحشى ٶزىن ەحوباعا باعىشتاپ، شومىلدىرۋ راسىمىنەن ٶتۋى ٴتيىس. دەسە دە بۇل قادام بۇگىندەگى تاماشا ٶمىردىڭ باسى عانا جانە ول بولاشاقتا قۇدايدىڭ جاڭا دۇنيەسىندە ماڭگى ٶمىر سۇرۋىمىزگە جول اشادى. ەندەشە قۇتقارىلۋعا ۇمتىلا بەرۋ ٷشىن بارىنشا تىرمىسىپ-تىرىسايىق!