جاستار، جاراتۋشى سەندەرگە باقىت تىلەيدى
«[ول] بۇكىل عۇمىرىمدى يگىلىككە تولتىرادى» (ٴزابۇر 103:5).
اندەر: 135، 39
1، 2. بولاشاق ومىرىڭە قاتىستى شەشىم الدىندا تۇرعاندا، نەگە جاراتۋشىنى تىڭداعانىڭ دۇرىس؟ (ماقالانىڭ باسىنداعى سۋرەتتەردى قارا.)
سەن جاس بولساڭ، ەرتەڭگى كۇنىڭە بايلانىستى تالاي كەڭەستى تالاي ادامنان ەستىپ جاتقان شىعارسىڭ. ۇستازدارىڭ، تۋىستارىڭ بولاشاقتا كۇرەكتەپ اقشا تابۋىڭ ٷشىن ساعان «جوعارى وقۋعا ٴتۇس تە ٴتۇس» دەپ جاتقان بولار. ٴبىراق ەحوبانىڭ ساعان بەرەر كەڭەسى باسقا. ارينە، ەرتەڭگى كۇنى ٶزىڭدى اسىراۋ ٷشىن مەكتەپتە جاقسى وقىعانىڭدى ول قالامايدى ەمەس، قالايدى (قولوستىقتارعا 3:23). ٴبىراق ول بولاشاعىڭا ىقپال ەتەتىن ماڭىزدى شەشىمدەر قابىلداۋ كەرەكتىگىڭدى دە جاقسى بىلەدى. سوندىقتان سەنى جەتەلەيتىن پرينسيپتەر بەرىپ، وسى سوڭعى كۇندەرى وعان ۇنايتىنداي ٶمىر سۇرۋىڭە جاردەم بەرىپ جاتىر (ماتاي 24:14).
2 ەحوبانىڭ ٴبارىن كورەتىنىن ۇمىتپا. ول وسى دۇنيەنى نە كۇتىپ تۇرعانىن جانە ونىڭ سوڭى قانشالىقتى جاقىنداپ قالعانىن دا بىلەدى (يشايا 46:10؛ ماتاي 24:3، 36). ەحوبا سەنى دە، سەنى نە قۋانتىپ، نە مۇڭايتاتىنىن دا جاقسى بىلەدى. ارينە، ادامداردىڭ كەڭەستەرى ادەمى شىعار، ٴبىراق ايتقاندارى قۇداي سوزىمەن ۇيلەسپەسە، بۇلارىن دانالىق دەۋ قيىن (ناقىل سوزدەر 19:21).
دانالىقتىڭ باستاۋى — تەك ەحوبا
3، 4. جامان كەڭەستى تىڭداعان ادام مەن حاۋا وزدەرىن جانە بالالارىن نە نارسەگە دۋشار ەتتى؟
3 جامان كەڭەستەردىڭ تاريحى سوناۋ تەرەڭنەن باستاۋ الادى. شايتان — العاشقى جامان كەڭەسشى. ول حاۋا انا مەن ادام اتاعا قالاي ٶمىر سۇرەتىندەرىن وزدەرى شەشەتىن بولسا، الدەقايدا باقىتتى بولاتىنىن ايتتى (مۇسانىڭ 1-جازباسى 3:1—6). شىندىعىندا، شايتاننىڭ كوكسەگەنى باسقا ەدى. ول ادام مەن حاۋا، ولاردىڭ تۋىلاتىن بالالارى ەحوباعا ەمەس، وعان تابىنعانىن قالادى. نە دەگەن وزىمشىلدىك! ونىڭ ادامزات ٷشىن جاساعان دانەمەسى دە جوق ەدى! ولارعا ٴبارىن بەرگەن ەحوبا بولاتىن. مىسالى، ەكەۋىن ٴبىر-بىرىنە سەرىك ەتتى، تۇراتىن ادەمى باق بەردى، ماڭگى ٶمىر سۇرۋگە جارالعان كەمەلدى ٴتان سيلادى.
4 ەڭ وكىنىشتىسى — ادام مەن حاۋا قۇدايدى تىڭداماي، ٶمىر بەرۋشىدەن وزدەرىن اجىراتىپ تاستادى. ونىڭ سالدارى ۋداي اشى بولدى. تامىرىنان اجىراعان گۇل سياقتى ولار دا بىرتە-بىرتە قارتتىقتان سولىپ، اقىرىندا ٶلدى. كۇنانىڭ كەسىرى بالالارىنا دا، بىزگە دە ٴتيدى (ريمدىكتەرگە 5:12). بۇگىندە باسىم كوپشىلىك قۇدايدى ەلەمەي، ٶز دەگەندەرىمەن ٴجۇر (ەفەستىكتەرگە 2:1—3). ٴيا، كيەلى كىتاپتا ايتىلعانداي، ەحوباعا قارسى شىعاتىن ادامدا دانالىق جوق (ناقىل سوزدەر 21:30).
5. ادامدارعا قاتىستى قۇدايدا قانداي سەنىم بولدى؟ ونىڭ سەنىمى اقتالدى ما؟
5 ەحوبا ادام مەن حاۋانىڭ ۇرپاقتارىنىڭ ىشىنەن ول تۋرالى ٴبىلىپ، وعان قىزمەت ەتۋدى قالايتىن ادامدار شىعاتىنىنا سەنىمدى بولدى. بۇلاردىڭ ىشىندە جاستار دا بولماق ەدى (ٴزابۇر 103:17، 18؛ 110:3). جاستار ەحوبا ٷشىن التىنداي باعالى! سەن دە جاستىق شاعىڭدا قۇدايدىڭ يگىلىگىنە مولىنان كەنەلىپ، باقىتتى ٶمىر ٴسۇرىپ جۇرگەن بولارسىڭ (ٴزابۇر 103:5 وقى؛ ناقىل سوزدەر 10:22). سول يگىلىكتەرگە مىنالار دا كىرەدى: رۋحاني اس-سۋ، جاقسى دوستار، ٴماندى ماقساتتار مەن شىنايى ەركىندىك. قازىر سولارعا توقتالىپ وتەمىز.
رۋحاني اس-سۋ
6. نەگە رۋحاني مۇقتاجدىعىڭدى ويلاعانىڭ دۇرىس جانە بۇل ورايدا ەحوبا قانداي كومەك ۇسىنىپ وتىر؟
6 رۋحاني ازىقتى قاجەت ەتپەيتىن جانۋارلاردان ەرەكشەلىگىمىز — ٴبىز جاراتۋشىمىز جايىندا بىلۋگە ٴزارۋمىز (ماتاي 4:4). ٴبىز قۇدايدى تىڭداساق، تۇسىنىككە، دانالىققا، باقىتقا يە بولامىز. يسا: «قۇدايدى تانىپ-بىلگىسى كەلەتىندەر باقىتتى»،— دەگەن (ماتاي 5:3). ەحوبا بىزگە كيەلى كىتاپتى بەردى، سەنىمىمىزدى قايراي تۇسەتىن ادەبيەتتەرمەن قامتاماسىز ەتىپ جاتقان «ادال دا اقىلدى قۇلدى» تاعايىندادى (ماتاي 24:45). بۇل ادەبيەتتەر سەنىمىمىزگە ٴنار بەرىپ، ەحوباعا جاقىنداتا تۇسەتىندىكتەن، ولاردى «رۋحاني اس-سۋ» دەپ اتايمىز. رۋحاني اس-سۋ بىزدە كول-كوسىر! (يشايا 65:13، 14).
7. قۇداي بەرىپ وتىرعان رۋحاني اس-سۋدىڭ سەن ٷشىن قانداي پايداسى بار؟
7 رۋحاني اس-سۋدىڭ ارقاسىندا دانا بولاسىڭ، كوپ جاعدايدا سەنى قورعاپ قالاتىن سانالىلىققا يە بولاسىڭ (ناقىل سوزدەر 2:10—14 وقى). وسى قاسيەتتەر جاراتۋشى قۇداي جوق دەگەن نەمەسە باقىتتىڭ كوزى اقشا مەن بايلىقتا دەگەن وتىرىككە ەرىپ كەتپەۋگە كومەكتەسەدى. سونداي-اق وزىڭە كەيىن تاياق بولىپ تيەتىن قالاۋلار مەن ادەتتەرگە بوي الدىرماۋعا دا ەرىك-جىگەر بەرەدى. ەندەشە، دانالىق پەن سانالىلىققا يە بولۋ ٷشىن بار كۇشىڭدى سالا بەر. سوندا ەحوبا سەنى جاقسى كورەتىنىنە، ساعان ەڭ جاقسىنى تىلەيتىنىنە كوزىڭ جەتەدى (ٴزابۇر 34:8؛ يشايا 48:17، 18).
8. نەلىكتەن قازىر قۇدايعا جاقىنداي بەرگەنىڭ ٴجون؟ مۇنىڭ بولاشاقتا قانداي پايداسى تيەدى؟
8 جاقىندا شايتان بيلەگەن مىنا دۇنيە تولىعىمەن جويىلادى. سول ۋاقىتتا ەحوبا عانا ٴبىزدى قورعاپ، قاجەتىمىزدى بەرەدى، بۇل ٴتىپتى جەيتىن نانىمىزدى دا قامتۋى مۇمكىن (اباقۇق 3:2، 12—19). سول ٷشىن قازىردەن ەش مۇمكىندىكتى جىبەرمەي، قۇدايعا جاقىنداپ، وعان كوبىرەك سەنىم ارتۋدى ۇيرەنۋ قاجەت (پەتىردىڭ 2-حاتى 2:9). سوندا باسىڭا قانداي كۇن تۋماسىن، ٴداۋىت سياقتى: «ەحوبانى ٵردايىم ويىمدا ۇستايمىن. ول مەنىڭ وڭ جاعىمدا، مەن نىق تۇرىپ، ەش شايقالمايمىن»،— دەيتىن بولاسىڭ (ٴزابۇر 16:8).
ەڭ جاقسى دوستار
9. ا) جوحان 6:44 كە ساي، ەحوبا نە ىستەيدى؟ ٵ) باسقا كۋاگەرلەردى كەزىكتىرگەندە، قانداي عاجاپ نارسە بولادى؟
9 شىندىقتى بىلمەيتىن بەيتانىس ٴبىر ادامدى كەزىكتىردىڭ دەلىك. سەن ول تۋرالى نە ايتا الاسىڭ؟ بالكىم، ونىڭ ەسىمىن ايتىپ، ٴتۇر-كەلبەتىن عانا سيپاتتاپ بەرەرسىڭ. ال ەگەر ول كىسى شىندىقتى بىلەتىن بولسا، وندا جاعداي مۇلدەم باسقا بولار ەدى! سەن ونىڭ ەحوبانى سۇيەتىنىن، ەحوبا ودان ٴبىر جاقسىلىقتى بايقاپ، ٶز وتباسىنا شاقىرعانىن بىلەسىڭ (جوحان 6:44 وقى). ول قانداي ورتادان شىقپاسىن، قانداي تاربيە كورىپ وسپەسىن، وعان قاتىستى كوپ جايت ساعان ايقىن. ول دا سەن جايىندا ٴدال سولاي كوپ بىلەتىنىندە ٴسوز جوق!
ەحوبا سەنىڭ ادال دوستارىڭنىڭ بولعانىن جانە ٴماندى ماقساتتار قويعانىڭدى قالايدى (9—12 ابزاستاردى قارا)
10، 11. ەحوبانىڭ حالقىندا ورتاق نە بار؟ بۇنىڭ ٴبىز ٷشىن قانداي پايداسى بار؟
10 كۋاگەرمەن كەزدەسە سالىسىمەن-اق، سەندەردى بايلانىستىراتىن ٴبىر نارسە بار ەكەنىن بىلەسىڭ: انا تىلدەرىڭ بولەك بولسا دا، ەكەۋىڭ ورتاق تىلدە — شىندىقتىڭ «تازا تىلىندە» سويلەيسىڭدەر (سافونيا 3:9). بۇل دەگەنىمىز — ەكەۋىڭ دە قۇدايعا سەنىپ، ورتاق ونەگەلىلىك تالاپتاردى ورىندايسىڭدار، بولاشاققا دەگەن ۇمىتتەرىڭ دە ٴبىر. وسى جايتتار ٴبىر-بىرىڭە سەنىم ارتۋعا ٵرى ماڭگىلىككە ۇلاساتىن دوستىقتى باستاۋعا نەگىز بولادى.
11 ەحوباعا عيبادات ەتكەندە، سەن ناعىز دوستاردى تاباسىڭ دەسەك، ارتىق ايتقاندىق ەمەس. كۇللى جەر جۇزىندە سەن تانىمايتىن قانشاما دوستارىڭ بار ەكەنىن سەن ٴتىپتى بىلمەيسىڭ دە! وسى سيدىڭ جەمىسىن بىزدەن باسقا كورىپ جۇرگەن كىم بار؟!
ٴماندى ماقساتتار
12. الدىڭا قانداي ٴماندى ماقساتتار قويساڭ بولادى؟
12 ۋاعىزداۋشى 11:9—12:1 وقى. قول جەتكىزگىڭ كەلەتىن قانداي ماقساتتارىڭ بار؟ مۇمكىن، كيەلى كىتاپتى كۇن سايىن وقيمىن دەپ، قاۋىمدا تۇسىنىكتەمەلەرىم مەن تاپسىرمالارىمدى جاقسارتامىن دەپ ماقسات قويعان شىعارسىڭ. يا بولماسا قىزمەتتە كيەلى كىتاپتى تيىمدىرەك قولدانۋعا تىرىسىپ جۇرگەن بولارسىڭ. جاقسارعانىڭدى وزىڭ بايقاپ يا وزگەلەر ايتقاندا، بويىڭدى قانداي سەزىم بيلەيدى؟ ارينە، قۋانىش سەزىمى، ٵرى بۇل ورىندى دا. نەگە؟ ويتكەنى سەن ٴدال يسا سياقتى وزىڭنىڭ ەمەس، ەحوبانىڭ قالاۋىن ىستەدىڭ (ٴزابۇر 40:8؛ ناقىل سوزدەر 27:11).
13. قۇدايعا قىزمەت ەتۋ وسى دۇنيەدەگى ماقساتتاردان نە سەبەپتى ارتىق؟
13 بار نازارىڭدى ەحوباعا قىزمەت ەتۋگە بۇر. بۇل ومىرىڭە ٴمان-ماعىنا بەرىپ، سەنى باقىتتى ەتەدى. ەلشى پاۋىل: «بەرىك بولىڭدار، مىزعىماي تۇرىڭدار، يەمىزدىڭ ىسىندە ٵرقاشان كوپ ەڭبەكتەنىڭدەر. سەبەبى يەمىزدىڭ جولىنداعى ەڭبەكتەرىڭنىڭ بەكەر ەمەس ەكەنىن بىلەسىڭدەر»،— دەپ جازعان (قورىنتتىقتارعا 1-حات 15:58). ال ادامدار اقشا تابۋ، اتاقتى بولۋ سياقتى ماقساتتارعا ۇمتىلعاندا، باقىتسىز كۇي كەشەدى. ٴتىپتى وركەندەپ تۇرسا دا، جان دۇنيەلەرى تونالعانداي بوس بولىپ جاتادى (لۇقا 9:25). سۇلەيمەن پاتشا — وسىنىڭ ٴبىر دالەلى (ريمدىكتەرگە 15:4).
14. سۇلەيمەننىڭ وقيعاسىنان نە بىلە الاسىڭ؟
14 تاريحتاعى ەڭ باي، ەڭ بەدەلدى بولعان سۇلەيمەن ٴبىر سىناق وتكىزبەكشى بولادى. ول: «كانە، ٴلاززات-ەرمەككە بەرىلىپ، ونىڭ نە جاقسىلىعى بار ەكەنىن كورەيىن»،— دەدى (ۋاعىزداۋشى 2:1—10). ٴسۇيتىپ، ول ٴزاۋلىم ۇيلەر سوعىپ، كوزدىڭ جاۋىن الاتىن باۋ-باقشالار مەن ساياباقتار جاسادى. نە كەرەك، كوڭىلى قالاعاندى ىستەدى. سونىڭ ٴبارى ونى باقىتتى ەتتى مە؟ سودان قاناعات تاپتى ما؟ ىستەگەن بار ىسىنە قاراپ: «ٴبارى دە... بوس اۋرەشىلىك ەكەنىن كوردىم»،— دەدى ول. سوسىن: «ناعىز قۇنى بار ەشتەڭە جوق ەكەن»،— دەپ تۇيىندەدى (ۋاعىزداۋشى 2:11). سۇلەيمەننىڭ وقيعاسىنان سەن دە سونى تۇسىندىڭ بە؟
ەحوباعا مويىنسۇنعانىمىز وزىمىزگە يگى ٵرى شىنايى ەركىندىك اكەلەدى
15. سەنىم ساعان نە ٷشىن قاجەت جانە ٴزابۇر 32:8 دەن وقىعانىمىزداي، ونىڭ قانداي پايداسى بار؟
15 كەيبىر ادامدار شەكەسىنە ٴتيىپ بارىپ قانا ومىردەن ساباق الادى. ٴبىراق ەحوبا سەنىڭ ولاي ۇيرەنگەنىڭدى قالامايدى. ونىڭ بار قالايتىنى — ٴتىلىن الىپ، مويىنسۇنعانىڭ. بۇلاي ەتۋ ٷشىن سەنىم قاجەت. ال سەنىمىڭە سۇيەنىپ قابىلداعان شەشىمدەرىڭە ەشقاشان وكىنبەيسىڭ. ەحوبا ەشقاشان «ەسىمىنە دەگەن سۇيىسپەنشىلىگىڭدى ۇمىتپايدى» (ەۆرەيلەرگە 6:10). سوندىقتان سەنىمىڭە سەنىم قوسۋ ٷشىن بارىڭدى سال. سوندا ومىردە دۇرىس شەشىمدەر قابىلدايسىڭ جانە كوكتەگى اكەڭنىڭ ساعان ەڭ جاقسىنى تىلەيتىنىنە كوز جەتكىزەسىڭ (ٴزابۇر 32:8 وقى).
شىنايى ەركىندىك
16. ەركىندىكتى نە ٷشىن باعالاپ، نە ٷشىن اقىلمەن پايدالانۋ قاجەت؟
16 پاۋىل: «ەحوبانىڭ رۋحى بار جەردە ازاتتىق بار»،— دەپ جازعان (قورىنتتىقتارعا 2-حات 3:17). ەحوبا ەركىندىكتى جاقسى كورەدى. ول سەنى ەركىندىكتى قالايتىنداي ەتىپ جاراتقان. ٴبىراق ەركىندىگىڭدى اقىلمەن پايدالانسا ەكەن دەيدى. سوندا بۇل سەنى قورعايدى. مۇمكىن، سەنىڭ جاسىڭداعىلار پورنوگرافياعا اۋەستەنىپ، ازعىن ٶمىر كەشەتىن شىعار نەمەسە جانكەشتى سپورت تۇرلەرىمەن اينالىساتىن بولار. نە بولماسا ىشىمدىك ٸشىپ، ەسىرتكى قابىلدايتىن شىعار. باسىندا وسى نارسەلەر قىزىقتى دا اسەرلى بولىپ كورىنۋى مۇمكىن، ٴبىراق تۇبىندە اۋرۋعا، تاۋەلدىلىككە، ٴتىپتى ولىمگە اكەپ سوقتىرادى (عالاتتىقتارعا 6:7، 8). سونداي جاستار وزدەرىن ەركىنمىن دەپ ويلايتىن شىعار، ٴبىراق بۇل — ولاردىڭ ويى عانا (تيتكە 3:3).
17، 18. ا) نەلىكتەن ەحوباعا مويىنسۇنۋ شىنايى ەركىندىككە جەتكىزەدى دەي الامىز؟ ٵ) نەلىكتەن ادام مەن حاۋا بۇگىنگى ادامدارعا قاراعاندا الدەقايدا ەركىن بولعان؟
17 ەحوباعا مويىنسۇنعانىمىز وزىمىزگە يگى. سولاي ەتكەنىمىز دەنساۋلىعىمىزعا جاقسى ٵرى بىزگە شىنايى ەركىندىك اكەلەدى (ٴزابۇر 19:7—11). ەركىندىگىڭدى اقىلمەن پايدالانعاندا، ياعني قۇدايدىڭ كىرشىكسىز زاڭدارى مەن پرينسيپتەرىنە مويىنسۇنعانىڭدا، قۇداي دا، اتا-اناڭ دا سەنىڭ جاۋاپتى ادام ەكەنىڭدى كورەدى. كەلە-كەلە اتا-اناڭ ساعان كوبىرەك سەنىم ارتىپ، كوبىرەك ەركىندىك بەرەدى. ەحوبا وزىنىڭ ادال قىزمەتشىلەرىنە جاقىندا ٴمىنسىز ەركىندىك سىيلايدى. كيەلى كىتاپتا بۇل «قۇداي بالالارىنىڭ سالتاناتتى بوستاندىعى» دەپ اتالادى (ريمدىكتەرگە 8:21).
18 ادام مەن حاۋادا ٴدال وسىنداي بوستاندىق بولعان. ەدەم باعىندا ەحوبا ولارعا تەك ٴبىر عانا شەكتەۋ قويدى: ولار ٴبىر عانا اعاشتىڭ جەمىسىن جەمەۋ كەرەك ەدى (مۇسانىڭ 1-جازباسى 2:9، 17). قالاي ويلايسىڭ، بۇل زاڭ ادىلەتسىز نە تىم قاتال بولدى ما؟ جوق، ارينە! ويلاپ كورشى، ادامدار نەشە ٴتۇرلى زاڭدار شىعارىپ، ولارعا باعىنۋدى تالاپ ەتەدى. ال ەحوبا ادام مەن حاۋاعا ٴبىر-اق زاڭ بەردى.
19. ەحوبا مەن يسا ۇيرەتىپ جاتقان نە نارسە ٴبىزدى بوستاندىققا جەتكىزەدى؟
19 ەحوبا — وتە دانا قۇداي. ول بىزگە ٴتۇرلى زاڭداردى ٷيىپ بەرۋدىڭ ورنىنا، سۇيىسپەنشىلىك زاڭىنا مويىنسۇنۋدى شىدامدىلىقپەن ۇيرەتەدى. پرينسيپتەرى بويىنشا ٶمىر سۇرۋگە، جاماندىقتان جيرەنۋگە باۋليدى (ريمدىكتەرگە 12:9). ونىڭ ۇلى يسا تاۋداعى ۋاعىزىندا جامان ىستەردىڭ قايدان باستالاتىنى تۋرالى ايتقان (ماتاي 5:27، 28). جاماندىق پەن جاقسىلىقتى ٶزى سياقتى اجىراتا الۋدى يسا قۇداي پاتشالىعىنىڭ پاتشاسى رەتىندە جاڭا دۇنيەدە دە ۇيرەتە بەرمەك (ەۆرەيلەرگە 1:9). ول ٴبىزدىڭ وي-سانامىز بەن دەنساۋلىعىمىزدى دا مىنسىزدىككە جەتكىزەدى. ەلەستەتىپ كورشى، جامان ٸس جاساۋعا ٴبىزدى ەشتەڭە تارتپايتىن بولادى، كەمەلسىزدىكتىڭ كەسىرىنەن ەندى قينالمايمىز! ال سوڭىندا ەحوبا ۋادە ەتكەن «سالتاناتتى بوستاندىققا» يە بولامىز!
20. ا) ەحوبا وزىنىڭ ەركىندىگىن قالاي پايدالانادى؟ ٵ) سەن وعان قالاي ەلىكتەي الاسىڭ؟
20 دەگەنمەن جاڭا دۇنيەدە ەركىندىگىمىز شەكتەۋلى بولادى. سوندا ونى نە شەكتەمەك؟ ٴبىز بارلىق كەزدە قۇدايعا جانە ادامدارعا دەگەن سۇيىسپەنشىلىكتىڭ جەتەگىندە جۇرۋگە ٴتيىس بولامىز. سۇيىسپەنشىلىكتىڭ دەگەنىمەن جۇرسەك، ەحوباعا ەلىكتەيمىز. ەحوبا شەكسىز ەركىندىككە يە بولا تۇرا، ٵربىر ٸسىن سۇيىسپەنشىلىكپەن ىستەيدى. مىسالى، بىزگە سۇيىسپەنشىلىكپەن قارايدى (جوحاننىڭ 1-حاتى 4:7، 8). بۇدان شىعاتىن ٴتۇيىن — ەحوباعا ەلىكتەسەك قانا، شىنايى ەركىندىككە جەتە الامىز.
21. ا) داۋىت ەحوباعا قاتىستى نە سەزىنگەن؟ ٵ) كەلەسى ماقالا نە تۋرالى بولادى؟
21 ساعان سيلاعان بارلىق يگىلىكتەرى ٷشىن ەحوباعا ريزاسىڭ با؟ ول رۋحاني اس-سۋدى، ەڭ جاقسى دوستار مەن ٴماندى ماقساتتاردى، بولاشاقتا ٴمىنسىز ەركىندىككە يە بولۋ ٷمىتىن جانە تاعى دا باسقا كەرەمەت سيلاردى بەردى (ٴزابۇر 103:5). بالكىم، سەن ٴزابۇر 16:11 دەگى: «سەن ماعان ٶمىر جولىن ٴبىلدىردىڭ، الدىڭدا زور قۋانىشقا كەنەلتتىڭ. وڭ جاعىڭدا بولۋ ماڭگىلىك باقىتقا بولەيدى»،— دەگەن ٴداۋىتتىڭ سوزدەرىمەن كەلىسەتىن شىعارسىڭ. كەلەسى ماقالادا ٴبىز ٴزابۇردىڭ 16-تاراۋىنداعى باسقا دا قۇندى شىندىقتار تۋرالى ٴسوز قوزعايمىز. بۇل ساعان ەڭ كەرەمەت ومىرگە اياق باسۋعا كومەك بولادى.
