جاستار، ومىرلەرىڭنىڭ ٴمانى كەتپەسىن!
«سەن ماعان ٶمىر جولىن ٴبىلدىردىڭ» (ٴزابۇر 16:11).
اندەر: 133، 89
1، 2. تونيدىڭ جاعدايى قانداي وزگەرىستەر جاساۋعا بولاتىنىن كورسەتەدى؟
توني اكەسىز ٶستى. جوعارى سىنىپتا ونىڭ ساباق وقۋعا ەش زاۋقى سوقپايتىن. ول ٴتىپتى مەكتەپتەن كەتىپ قالۋدى ويلاپ جۇرگەن. دەمالىس كۇندەرى ول يا كينوتەاترعا باراتىن، يا دوستارىمەن ۋاقىت وتكىزەتىن. توني ناشاقور دا، بۇزاقى دا ەمەس ەدى، ٴبىراق ول جەلكەنسىز كەمەدەي ماقساتسىز ٶمىر كەشىپ جاتتى. ول قۇدايدىڭ بارىنا دا كۇمانمەن قارايتىن. بىردە ول ەكى كۋاگەردى كەزىكتىرىپ، وزىنىڭ وسى كۇمانى تۋرالى ايتادى. كۋاگەرلەر ونىڭ قولىنا «تىرشىلىك وزدىگىنەن پايدا بولدى ما؟» جانە «تىرشىلىكتىڭ باستاۋى. بەس ماڭىزدى سۇراق» دەگەن ەكى كىتاپشانى ۇستاتىپ كەتەدى.
2 كۋاگەرلەر ەكىنشى رەت كەلسە، توني مۇلدەم باسقا ويدا وتىر ەكەن. ول كىتاپشالاردى مۇقيات وقىعانى سونشا — ٵر بەتى ۋماجدالىپ كەتىپتى! توني كۋاگەرلەرگە: «قۇداي بار بولۋ كەرەك!»— دەدى. ول كيەلى كىتاپتى زەرتتەي باستاپ، ومىرگە وزگەشە كوزقاراسپەن قارايتىن بولدى. بۇعان دەيىن مەكتەپتە جاقسى وقىماعان ول ەندى ۇزدىك وقۋشىلاردىڭ بىرىنە اينالدى. بۇعان مەكتەپ ديرەكتورى قاتتى تاڭعالدى. ول كىسى تونيدەن بىلاي دەپ سۇرادى: «كوزقاراسىڭدى، وقۋ ۇلگەرىمىڭدى جاقسارتۋ ٷشىن ۇلكەن وزگەرىستەر جاسادىڭ. شىن ايتشى، بۇعان ەحوبا كۋاگەرلەرىمەن ارالاسقانىڭ اسەر ەتتى مە؟» توني ونىڭ دۇرىس تۇجىرىم جاساعانىن ايتىپ، وقىپ-بىلگەندەرىمەن دە ٴبولىستى. ول مەكتەپتى ٴبىتىرىپ، قازىر تۇراقتى ٸزاشار ٵرى قىزمەت كومەكشىسى مىندەتىن اتقارادى. توني ٴسۇيۋشى اكەسى ەحوبانى تاپقانىنا دان ريزا! (ٴزابۇر 68:5).
ەحوباعا باعىنىپ، جەمىستى بول
3. ەحوبا جاستارعا قانداي كەڭەس بەرەدى؟
3 تونيدىڭ وقيعاسى ەحوبانىڭ جاستار ٷشىن قام جەيتىنىن كورسەتەدى. ول سەنىڭ ماعىنالى ٶمىر سۇرگەنىڭدى قالاعاندىقتان: «جاستىق شاعىڭدا ۇلى جاراتۋشىڭدى ەستە ۇستا»،— دەپ كەڭەس بەرەدى (ۋاعىزداۋشى 12:1). بۇلاي ەتۋ وڭاي بولا بەرمەيتىن شىعار، ٴبىراق بۇل قولىڭنان كەلەدى. قۇدايدىڭ قولداۋىمەن سەن قازىر جاس شاعىڭدا دا، ەرتەڭ ەسەيگەن شاعىڭدا دا جەڭىسكە جەتە الاسىڭ. بۇل جازبالارداعى يسرايلدىكتەر مەن ٴداۋىتتىڭ مىسالىنان ايقىن كورىنەدى. ولاي بولسا، يسرايلدىكتەرگە ۋادە ەتىلگەن جەردى جاۋلاپ الۋعا، ال ٴداۋىتكە عولياتتى جەڭۋگە نە كومەك بولعانىن كورەيىك.
4، 5. قاناحاندىقتاردى جاۋلاپ العان يسرايلدىكتەر مەن عولياتتى جەڭگەن ٴداۋىتتىڭ وقيعاسىنان قانداي ماڭىزدى جايتتى بىلەمىز؟ (ماقالانىڭ باسىنداعى سۋرەتتەردى قارا.)
4 يسرايل حالقى ۋادە ەتىلگەن جەرگە كىرەر الدىندا ەحوبا ولارعا قانداي نۇسقاۋ بەرگەن ەدى؟ «سوعىسۋدى جاقسىلاپ ۇيرەنىپ، مىقتى جاۋىنگەر بولىڭدار» دەدى مە؟ جوق! (مۇسانىڭ 5-جازباسى 28:1، 2). ول «ماعان باعىنىڭدار، ماعان سەنىم ارتىڭدار» دەدى (ەشۋا 1:7—9). جاي ادامعا بۇل اقىلعا سىيمايتىن كەڭەس بولىپ كورىنەر. ٴبىراق يسرايلدىكتەر ٷشىن بۇل ەڭ جاقسى نۇسقاۋ بولدى! ەحوبا قاناحان جەرىندە حالقىن جەڭىستەن جەڭىسكە جەتكىزىپ وتىردى (ەشۋا 24:11—13). ارينە، قۇدايدىڭ ٴتىلىن الۋ ٷشىن سەنىم قاجەت. ال سەنىم ەشقاشان جەمىسسىز قالدىرمايدى. بۇل بۇرىن دا، قازىر دە سولاي.
5 عوليات وتە مىقتى جاۋىنگەر بولعان. ونىڭ بويى ٷش مەتردەي، ٶزى مۇزداي قارۋلانعان ەدى! (سامۋيلدىڭ 1-جازباسى 17:4—7). ال ٴداۋىتتىڭ قولىندا ساقپانى، جۇرەگىندە سەنىمى بولدى. قۇدايعا سەنىمى جوق ادام عولياتقا قارسى شىققان ٴداۋىتتى بارىپ تۇرعان اقىماق دەر ەدى. ٴبىراق اقىماق ٴداۋىت ەمەس، عوليات بولىپ شىقتى! (سامۋيلدىڭ 1-جازباسى 17:48—51).
6. بۇل ماقالادا نە تۋرالى بىلەمىز؟
6 الدىڭعى ماقالادان ٴبىز باقىتتى دا ٴماندى ومىرگە باستايتىن ٴتورت نارسەنى بىلدىك. ولار: رۋحاني مۇقتاجدىقتى قاناعاتتاندىرۋ، قۇدايدى سۇيەتىن ادامدارمەن دوس بولۋ، ٴماندى ماقساتتار قويۋ جانە قۇداي سيلاعان ەركىندىكتى باعالاۋ. بۇل ماقالادان وسى يگى ىستەردىڭ پايداسىن كورۋ ٷشىن تاعى نە ىستەي الاتىنىمىزدى بىلەمىز. وسى ورايدا ٴزابۇر كىتابىنىڭ 16-جىرىنداعى پرينسيپتەرگە كوڭىل بۇرايىق.
رۋحاني مۇقتاجدىعىڭدى قاناعاتتاندىر
7. ا) رۋحاني ادام دەگەن قانداي ادام؟ ٵ) داۋىتتىڭ «ەنشىسى» نە ەدى جانە مۇنىڭ اسەرى قانداي بولدى؟
7 رۋحاني باعىتتا ويلاناتىن ادام قۇدايعا سەنەدى، ٵرى ومىردەگى جاعدايلارعا قۇدايدىڭ كوزىمەن قارايدى. ول ەحوبانىڭ جەتەگىنە ەرىپ، وعان مويىنسۇنىپ ٶمىر سۇرۋگە شىنداپ بەكىنگەن (قورىنتتىقتارعا 1-حات 2:12، 13). وسىنداي ادامنىڭ بىردەن-ٴبىر مىسالى — داۋىت. ول: «ەحوبا — مەنىڭ ەنشىم»،— دەپ جىرلاعان (ٴزابۇر 16:5). مۇندا «ەنشى» دەپ ونىڭ قۇدايمەن جاقىن قارىم-قاتىناسى ايتىلىپ وتىر. ٴداۋىت وسى ەنشىسىن قاتتى باعالاعان جانە قۇدايدى «پانام» دەپ بىلگەن (ٴزابۇر 16:1). سوندىقتان دا ول: «بار بولمىسىم شاتتانادى»،— دەگەن. ٴيا، ٴداۋىتتى ەڭ باقىتتى ەتكەن ەحوبامەن دوستىعى ەدى! (ٴزابۇر 16:9، 11 وقى).
8. ٶمىرىڭدى ٴمان-ماعىناعا تولتىراتىن كەيبىر ىستەر قانداي؟
8 اقشا مەن ويىن-ساۋىقتىڭ سوڭىنان قۋعان ادام ٴداۋىت سياقتى باقىتتى بولا المايدى (تىموتەگە 1-حات 6:9، 10). كانادادا تۇراتىن ٴبىر ەر باۋىرلاس بىلاي دەيدى: «ناعىز قاناعات نەدەن كەلەدى دەيسىز عوي؟ بۇل ومىردەن نە الاتىنىڭا ەمەس، ٵربىر يگى سيدىڭ كوزى ەحوبا قۇدايعا نە بەرەتىنىڭە بايلانىستى» (جاقىپ 1:17). ەحوباعا سەنىم دامىتساڭ ٵرى وعان قىزمەت ەتسەڭ، ومىرىڭ شىنىمەن دە ماعىنالى بولادى. ال سەنىمىڭدى قالاي وسىرە الاسىڭ؟ ەحوبامەن بىرگە ۋاقىت وتكىزۋ ارقىلى. بۇل ٷشىن ونىڭ ٴسوزىن وقى، كەرەمەت جاراتىلىستارىن تاماشالا، ونىڭ قاسيەتتەرى جايلى، سەنى قانشالىقتى جاقسى كورەتىنى جايلى ويلان (ريمدىكتەرگە 1:20؛ 5:8).
9. قۇداي ٴسوزى سەنى قالىپتاستىرۋ ٷشىن نە ىستەۋىڭ قاجەت؟
9 ەحوبا ٴبىزدى جاقسى كورەتىنىن كورسەتۋ ٷشىن، تۋرا ٴبىر ٴسۇيۋشى اكە ىسپەتتى تۇزەتىپ جاتادى. ٴداۋىت: «ماعان اقىل-كەڭەس ايتقان ەحوبانى ماداقتايمىن، ٴتىپتى تۇندە دە كوڭىل تۇبىندەگى ويلارىم مەنى تۇزەتەدى»،— دەپ، ونىڭ تۇزەتۋلەرىن باعالاعان (ٴزابۇر 16:7). ول ەحوبانىڭ ويلارى جايلى تولعانىپ، ولاردى ٶز ويلارى ەتتى. وسى ويلارى ٴداۋىتتى قالىپتاستىردى، ونىڭ ادامي قاسيەتتەرىن ۇشتادى. سەن دە سولاي ەتسەڭ، قۇدايعا دەگەن سۇيىسپەنشىلىگىڭ دە، وعان ۇنامدى بولۋعا دەگەن ىقىلاسىڭ دا ارتادى. ٴسۇيتىپ، تولىسقان ٴماسىحشى بولاسىڭ. «مەن جەكە زەرتتەپ، وقىعانىم جايلى ويلانعاندا، ەحوبا مۇنى ماعان ارناپ جازعانداي سەزىمدە بولامىن!»— دەيدى كريستين دەگەن جاس باۋىرلاس.
10. يشايا 26:3 تەن بىلگەنىمىزدەي، رۋحاني ادام بولۋدىڭ قانداي پايداسى بار؟
10 رۋحاني ادام بولساڭ، سەن بۇگىنگى دۇنيەگە جانە ەرتەڭگى كۇنگە قۇداي سياقتى قارايسىڭ. ويتكەنى ەحوبا ساعان تەڭدەسى جوق ٴبىلىم مەن تۇسىنىك بەرىپ جاتىر. ول ٶمىرىڭدى دۇرىس نارسەگە ارناعانىڭدى، جاقسى شەشىمگە كەلگەنىڭدى، بولاشاققا سەنىممەن كوز تىككەنىڭدى قالايدى (يشايا 26:3 وقى). اقش-تا تۇراتىن دجوشۋا ەسىمدى جاس باۋىرلاس ٴبىر جايتتى بايقاپتى: ادام ەحوباعا جاقىن بولسا، نەنىڭ ماڭىزدى، نەنىڭ ماڭىزسىز ەكەنىن انىق اجىراتا بىلەدى.
شىنايى دوستار تاپ
11. داۋىت كىمدەرمەن دوس بولعان؟
11 ٴزابۇر 16:3 وقى. ٴداۋىت جاقسى دوستاردى قايدان تابۋعا بولاتىنىن بىلگەن. ول ەحوبانى جاقسى كورەتىندەردىڭ اراسىندا ٴجۇرىپ، «زور قۋانىشقا بولەنگەن». بۇل دوستارىن ٴداۋىت «قاسيەتتىلەر» دەپ اتادى، ويتكەنى ولار ەحوبانىڭ ونەگەلىلىك زاڭ-تالاپتارىن ۇستانۋعا تىرىساتىن. باسقا ٴبىر ٴزابۇر جىرشىسى تاڭداعان دوستارى جايىندا ٴدال سونداي ويدا بولعان. ول: «مەن وزىڭنەن قورقاتىنداردىڭ، نۇسقاۋلارىڭدى ورىندايتىنداردىڭ دوسىمىن»،— دەدى (ٴزابۇر 119:63). الدىڭعى ماقالادا تالقىلاعانىمىزداي، سەن دە ەحوبانى ٴسۇيىپ، وعان مويىنسۇناتىنداردىڭ اراسىنان جاستارى ٵرتۇرلى كوپ دوس تابا الاسىڭ.
12. داۋىت پەن جونا ٴتاننىڭ دوستىعىنا نە ارقاۋ بولدى؟
12 داۋىت دوس رەتىندە تەك قۇرداستارىن عانا تاڭداماعان. ٴداۋىتتىڭ جانىنا جاقىن بولعان دوسىن اتاي الاسىڭ با؟ ويىڭا بىردەن جوناتان كەلگەن شىعار. ەكەۋىنىڭ دوستىعى — كيەلى كىتاپتا جازىلعان ەڭ ادەمى دوستىقتىڭ ٴبىرى! ٴبىراق جوناتان ٴداۋىتتەن 30 جاستاي ۇلكەن بولعانىن بىلگەنسىڭ بە؟ ەندەشە ولاردىڭ دوستىقتارىنا ارقاۋ بولعان نە؟ قۇدايعا دەگەن سەنىمدەرى. سونداي-اق ٴبىر-بىرىنە دەگەن قۇرمەتتەرى، قۇدايدىڭ جاۋلارىمەن شايقاسقاندا كورسەتكەن باتىلدىقتارى جانە ٴبىر-بىرىنىڭ باسقا دا جاقسى قاسيەتتەرىن باعالاعاندارى (سامۋيلدىڭ 1-جازباسى 13:3؛ 14:13؛ 17:48—50؛ 18:1).
13. كوپ دوستار تابۋدىڭ سىرى نەدە؟ مىسال كەلتىر.
13 ەحوباعا سەنەتىن، ونى جاقسى كورەتىن ادامدارمەن دوس بولعاندا، ٴبىز دە ٴداۋىت پەن جوناتان سياقتى «زور قۋانىشقا بولەنەمىز». قۇدايعا كوپ جىلدان بەرى قىزمەت ەتىپ كەلە جاتقان كيەرا: «مەن دۇنيەنىڭ ٵرتۇرلى بۇرىشىندا تۇراتىن، تاربيەسى مەن مادەنيەتى ٵرتۇرلى ادامدارمەن دوستاستىم»،— دەيدى. سەن دە دوستىق قۇشاعىڭدى كەڭ جايساڭ، ٴبىزدى ٴبىر وتباسىنداي بىرىكتىرىپ وتىرعان كۇش كيەلى كىتاپ پەن كيەلى رۋح ەكەنىن كورەسىڭ!
ٴماندى ماقساتتار قوي
14. ا) ٴماندى ماقساتتار قويۋعا نە كومەكتەسەدى؟ ٵ) كەيبىر جاستار ماقساتتارى جايلى نە دەيدى؟
14 ٴزابۇر 16:8 وقى. قۇدايعا قىزمەت ەتۋ ٴداۋىتتىڭ ومىرىندەگى ەڭ ماڭىزدى ٸس بولعان. سەن دە ماقساتتار قويعاندا ٴداۋىتكە ەلىكتەسەڭ، ەحوبانىڭ ويىن ەسكەرسەڭ، ومىرىڭ ٴماندى بولادى. ستيۆەن ەسىمدى باۋىرلاس بىلاي دەپ وي ٴبولىستى: «ماقساتىما ۇمتىلىپ، وعان قول جەتكىزىپ، سوسىن جاقسارعان جاقتارىمدى كورگەندە، قۋانىشقا كەنەلەمىن». گەرمانيانىڭ تۋماسى، ٴبىراق قازىر وزگە ەلدە قىزمەت ەتەتىن جاس ەر باۋىرلاس: «ەرتەڭ قارتايعاندا ٶمىر بويى تەك ٶزىمدى ويلاعانىمدى تۇسىنسەم، مەنەن وتكەن باقىتسىز ادام بولماس ەدى»،— دەدى. سەن وسى سوزدەرمەن كەلىسەسىڭ بە؟ وندا قابىلەتتەرىڭ مەن دارىندارىڭدى قۇدايدى ماداقتاۋ ٷشىن ٵرى وزگەلەرگە كومەكتەسۋ ٷشىن جۇمسا (عالاتتىقتارعا 6:10). الدىڭا رۋحاني ماقساتتار قويىپ، سولارعا جەتۋ ٷشىن ەحوبادان كومەك سۇرا. ول مۇنداي دۇعالارعا قۋانا جاۋاپ بەرەدى! (جوحاننىڭ 1-حاتى 3:22؛ 5:14، 15).
15. قانداي ماقساتتارعا ۇمتىلساڭ بولادى؟ (« ۇمتىلۋعا تۇرارلىق ماقساتتار» دەگەن قورشاۋدى قارا.)
15 الدىڭا قانداي ماقساتتار قويساڭ بولادى؟ مىسالى، كەزدەسۋلەردە ٶز سوزىڭمەن تۇسىنىكتەمە بەرۋ، بولماسا ٸزاشار نە بەتەلدىك بولىپ قىزمەت ەتۋ. جاڭا ٴبىر ٴتىل ۇيرەنىپ، ىزگى حاباردى كوبىرەك ادامعا جەتكىزۋگە ۇمتىلساڭ دا بولادى. تولىق ۋاقىتتى قىزمەت اتقاراتىن باراك ەسىمدى جاس جىگىت بىلاي دەيدى: «تاڭەرتەڭ كوزىمدى اشىپ، بار كۇشىمدى ەحوباعا بەرگەلى جاتقانىمدى تۇسىنگەندە، عاجاپ سەزىمگە بولەنەمىن. باسقا ەشقانداي ىستەن مۇنداي كۇي كەشپەيمىن».
قۇداي سيلاعان ەركىندىكتى باعالا
16. داۋىت ەحوبانىڭ زاڭ-پرينسيپتەرىنە قالاي قاراعان جانە نەگە؟
16 ٴزابۇر 16:2، 4 وقى. الدىڭعى ماقالادان بىلگەنىمىزدەي، قۇدايدىڭ زاڭ-پرينسيپتەرىمەن جۇرسەك، شىنايى ەركىندىككە يە بولامىز. ٴبىز جاقسىلىقتى، يگى نارسەنى ٴسۇيىپ، جاماندىقتى جەك كورۋدى ۇيرەندىك (اموس 5:15). ٴداۋىت ەحوبانى «يگىلىگىمنىڭ قاينارى» دەپ اتاعان. «يگىلىك» دەپ اۋدارىلعان ٴتۇپنۇسقاداعى ٴسوز ونەگەلىلىكتىڭ شىڭىن، ياكي ىزگىلىكتى دە بىلدىرەدى. ەحوبانىڭ بار ىستەرى، بىزگە بەرىپ جاتقانىنىڭ ٴبارى دە يگى. ٴداۋىت وسىنداي قۇدايدى ۇلگى ەتۋگە، ول سۇيەتىن نارسەلەردى سۇيۋگە مەيلىنشە تىرىسقان. ول سونىمەن قاتار ەحوبا جەك كورەتىن نارسەلەردى جەك كورۋگە ۇمتىلعان. مىسالى، جالعان تاڭىرلەرگە قۇلشىلىق ەتۋدى، ياعني ەحوبادان وزگە بىرەۋگە يا بىردەڭەگە عيبادات ەتۋدى جانى سۇيمەگەن. جالعان عيبادات قۇردىمعا جەتەلەيدى جانە ەحوباعا تيەسىلى ماداقتى تارتىپ الىپ، وزگە بىرەۋگە يا بىردەڭەگە بەرەدى (يشايا 2:8، 9؛ ايان 4:11).
17، 18. ا) داۋىت جالعان عيباداتتىڭ سالدارى جايىندا نە دەگەن؟ ٵ) بۇگىندە نە نارسە ادامداردىڭ «قاسىرەتىنە قاسىرەت قوسۋدا»؟
17 كيەلى كىتاپ جازىلعان زاماندا جىنىستىق ازعىندىق كوپ جەردە جالعان عيباداتتىڭ اجىراماس بولىگى بولعان (وشيا 4:13، 14). وسىنداي ٴجۇرىس-تۇرىستى ۇناتقاندىقتان، كوپ ادام جالعان عيباداتقا باس ۇرعان. ٴبىراق بۇدان ولار باقىت تاپتى ما؟ بۇلاي دەۋ قيىن! ٴداۋىت ايتقانداي، ولار «قاسىرەتىنە قاسىرەت قوسقان». بالالارىن ٴتىپتى سول جالعان تاڭىرلەرگە قۇرباندىققا شالعان! (يشايا 57:5). ەحوبا مۇنداي قاتىگەزدىكتى جەك كورگەن (ەرەميا 7:31). سەن سول داۋىردە ٶمىر سۇرگەن بولساڭ، اتا-اناڭنىڭ ەحوباعا عيبادات ەتەتىنىنە دان ريزا بولار ەدىڭ، سولاي ەمەس پە؟!
18 قازىرگى تاڭدا كوپ ٴدىندەر جىنىستىق ازعىندىقتى، سونىڭ ىشىندە گوموسەكسۋاليزمدى، كادىمگى نارسە دەپ قابىلدايدى. ونەگەسىز ٶمىر كەشەتىندەر وزدەرىن ەركىنبىز دەپ ويلار، ٴبىراق شىندىعىنا كەلگەندە ولار «قاسىرەتىنە قاسىرەت قوسۋدا» (قورىنتتىقتارعا 1-حات 6:18، 19). سەن بۇنىمەن كەلىسەسىڭ بە؟ اياۋلى جاستار، كوكتەگى اكەلەرىڭدى تىڭداڭدار. بۇل وزدەرىڭ ٷشىن پايدالى ەكەنىن تۇسىنىڭدەر. ازعىندىقتىڭ سالدارى اشى ەكەنىن ەسكەرىڭدەر. ٴبىر ساتتىك لاززاتتىڭ زاردابى مىڭ ەسە اۋىر بولادى (عالاتتىقتارعا 6:8). ماقالانىڭ باسىندا اتالىپ كەتكەن دجوشۋا: «سەن نە ىستەسەڭ دە ەرىكتىسىڭ. ٴبىراق ەركىندىكتى تەرىس قولدانۋ تۇبىندە ەش راقات اكەلمەيدى»،— دەپ ويىن تۇيىندەدى.
19، 20. ەحوباعا سەنەتىن، وعان مويىنسۇناتىن جاستاردى قانداي باتالار كۇتىپ تۇر؟
19 يسا بىلاي دەگەن: «مەنىڭ ٴسوزىمدى ۇستانساڭدار، شىنىمەن مەنىڭ شاكىرتىمسىڭدەر، ٵرى شىندىقتى بىلە تۇسەسىڭدەر، ال شىندىق سەندەردى ازات ەتەدى» (جوحان 8:31، 32). ەحوباعا مىڭ دا ٴبىر راقمەت، ول ٴبىزدى جالعان دىننەن، رۋحاني قاراڭعىلىق پەن ىرىمداردان ازات ەتتى. ال بولاشاقتا «قۇداي بالالارىنىڭ سالتاناتتى بوستاندىعىنا جەتەمىز» (ريمدىكتەرگە 8:21). ٴماسىحتىڭ «ٴسوزىن»، ياعني وسيەتتەرىن ۇستانساڭ، قازىردىڭ وزىندە سول بوستاندىقتىڭ دامىن تاتا الاسىڭ. وسىلايشا «شىندىقتى بىلە تۇسەسىڭ!» بۇل جاي عانا شىندىق تۋرالى ٴبىلۋدى ەمەس، شىندىقپەن ٶمىر ٴسۇرۋدى دە بىلدىرەدى.
20 جاستار، قۇداي بەرگەن ەركىندىكتى باعالاڭدار. ونى اقىلمەن جۇمساڭدار. سوندا كەرەمەت بولاشاققا جەتەلەيتىن شەشىمدەر قابىلداي الاسىڭدار. ٴبىر جاس باۋىرلاس بىلاي دەيدى: «جاس كەزىڭدە ەركىندىگىڭدى دۇرىس پايدالانساڭ، ەرتەڭ وزىڭە لايىق جۇمىس تابۋ، ۇيلەنۋ نە ۇيلەنبەي قويا تۇرۋ سياقتى كۇردەلى ماسەلە شىعا كەلگەندە، جاقسى شەشىمگە كەلە الاسىڭ».
21. «شىنايى ٶمىردى» قالاي يەمدەنە الاسىڭ؟
21 مىنا دۇنيەدە ادامداردىڭ تاماشا ٶمىر دەپ جۇرگەندەرى ۇزاققا سوزىلمايدى. ەرتەڭ نە كۇتىپ تۇرعانىن ەشكىم دە بىلمەيدى (جاقىپ 4:13، 14). سوندىقتان «شىنايى ومىرگە» — قۇدايدىڭ جاڭا دۇنيەسىندە بولاتىن ماڭگىلىك ومىرگە يە بولۋ ٷشىن، دۇرىس شەشىمدەر قابىلدا (تىموتەگە 1-حات 6:19). ارينە، ەحوبا ەشكىمدى وزىنە كۇشتەپ قىزمەت ەتكىزبەيدى. مۇنى اركىم ٶزى شەشەدى. ەحوبانى «ەنشىڭ» ەتكىڭ كەلسە، وعان كۇن سايىن جاقىن بولا ٴتۇس. ونىڭ بەرىپ جاتقان بارلىق يگىلىگىن باعالا (ٴزابۇر 103:5). ەحوبا سەنى «زور قۋانىشقا كەنەلتىپ»، ماڭگىلىك باقىت سيلايتىنىنا سەنىمدى بول! (ٴزابۇر 16:11).
