وزگەلەردىڭ مەيىرىمدىلىك تانىتقانى كىم-‏كىمگە دە ۇنايدى.‏ بىرەۋ قامىمىزدى ويلاپ تۇرسا،‏ بۇل بىزگە جۇبانىش بەرىپ،‏ جانىمىزدى جادىراتاتىنى راس.‏ ٴ‌بىراق سول قاسيەتتى وزگەلەردەن عانا كۇتپەي،‏ ٶزىمىز دە قالاي تانىتساق بولادى؟‏

مەيىرىمدى ادام شىن جۇرەكتەن وزگەلەردىڭ قامىن ويلايدى جانە مۇنىسىن سوزىمەن دە،‏ ىسىمەن دە كورسەتەدى.‏ ول جاي عانا سىپايىلىق كورسەتۋمەن شەكتەلمەيدى.‏ شىنايى مەيىرىمدىلىككە قوزعاۋشى كۇش بولاتىن جايت —‏ وزگەلەرگە دەگەن سۇيىسپەنشىلىك پەن ولاردىڭ سەزىمدەرىن ٴ‌تۇسىنۋ.‏ بۇدان دا ماڭىزدىسى،‏ مەيىرىمدىلىك —‏ كيەلى رۋحتىڭ جەمىسىنىڭ ٴ‌بىر بولىگى (‏عالاتتىقتارعا 5:‏22،‏ 23‏)‏.‏ ەحوبا ٴ‌بىزدىڭ مەيىرىمدى بولعانىمىزدى قالايدى.‏ ەندەشە،‏ ەحوبا مەن يسانىڭ قالاي مەيىرىمدىلىك تانىتقانىن جانە ولاردى قالاي ۇلگى ەتە الاتىنىمىزدى كورەيىك.‏

ەحوبا بارلىعىنا،‏ ٴ‌تىپتى «العىستى بىلمەيتىندەرگە دە،‏ زۇلىمدارعا دا مەيىرىم كورسەتەدى» (‏لۇقا 6:‏35‏)‏.‏ مىسالى،‏ «جاماندارعا دا،‏ جاقسىلارعا دا كۇن ساۋلەسىن توككىزىپ،‏ ادىلدەرگە دە،‏ ادىلەتسىزدەرگە دە جاڭبىر جاۋدىرادى» (‏ماتاي 5:‏45‏)‏.‏ ەحوبانىڭ جاراتۋشى ەكەنىنە سەنبەيتىندەر دە ونىڭ مەيىرىمدىلىگىن سەزىنىپ،‏ ومىردە ٴ‌بىرشاما باقىتتى بولا الادى.‏

ەحوبانىڭ ادام مەن حاۋاعا جاساعان جاقسىلىعىنان ونىڭ زور مەيىرىمدىلىگىن كورەمىز.‏ كۇنا جاساعاننان كەيىن كوپ ۇزاماي،‏ ولار «ٸنجىر جاپىراقتارىن بىرىكتىرىپ تىگىپ،‏ الجاپقىش جاساپ الدى».‏ الايدا ەحوبا ەدەم باعىنىڭ سىرتىندا ولارعا قورعانىش بولاتىن باسقا كيىمنىڭ قاجەت ەكەنىن ٴ‌بىلدى.‏ ويتكەنى جەردى قارعىس اتقان ەدى ٵرى وندا «تىكەن مەن ارامشوپ» قاپتاپ جاتتى.‏ ەحوبا مەيىرىمدىلىك تانىتىپ،‏ ولارعا «تەرىدەن ۇزىن كيىم جاساپ بەردى» (‏مۇسانىڭ 1-‏جازباسى 3:‏7،‏ 17،‏ 18،‏ 21‏)‏.‏

‏«جاماندارعا دا،‏ جاقسىلارعا دا» مەيىرىمدىلىك تانىتاتىن ەحوبا وزىنىڭ ادال قىزمەتشىلەرىنە ەرەكشە مەيىرىمدى.‏ مىسالى،‏ زاكاريا پايعامباردىڭ كەزىن الايىق.‏ سول كەزدەرى يەرۋساليمدەگى عيباداتحانانىڭ قۇرىلىسى توقتاپ تۇرعان ەدى.‏ وسىنى ۋايىمداعان ٴ‌بىر پەرىشتە ەحوباعا ٶز ۋايىمىن ٴ‌بىلدىردى.‏ ەحوبا ونىڭ ٴ‌سوزىن قۇلاق قويىپ تىڭداپ،‏ وعان «جىلى دا جۇباتاتىن سوزدەرمەن جاۋاپ بەردى» (‏زاكاريا 1:‏12،‏ 13‏)‏.‏ ەحوبا ٸلياس پايعامبارعا دا مەيىرىمدىلىك تانىتقان.‏ بىردە ىلياستىڭ جانى كۇيزەلىپ،‏ جالعىزدىقتان تورىققانى سونشا —‏ ول ەحوبادان وزىنە ٶلىم تىلەيدى.‏ قۇداي ىلياستىڭ سەزىمدەرىن ايالايتىنىن كورسەتىپ،‏ ونى نىعايتۋ ٷشىن پەرىشتەسىن جىبەرەدى.‏ سونىمەن قاتار ول پايعامباردىڭ جالعىز ەمەس ەكەنىنە سەندىرەدى.‏ ەحوبانىڭ مەيىرىمدىلىگى ٸلياسقا قىزمەتىن ٵرى قاراي جالعاستىرۋعا كۇش بەردى (‏پاتشالار 1-‏جازبا 19:‏1—‏18‏)‏.‏ قالاي ويلايسىز،‏ ەحوبانىڭ قاي قىزمەتشىسى ونىڭ مەيىرىمدىلىگىن كەرەمەت تۇردە تانىتتى؟‏

يسا جەردە بولعاندا،‏ ونىڭ مەيىرىمدىلىگى ەرەكشە كوزگە تۇسەتىن.‏ ول دورەكىلىك دەگەندى بىلمەيتىن،‏ وزگەلەردى ٶز ىرقىنا كوندىرۋگە تىرىسپايتىن جان ەدى.‏ يسا باسقالاردىڭ قامىن ويلايتىنىن مىنا سوزىمەن كورسەتتى:‏ «بەينەت شەككەندەر مەن ەڭسەلەرىن اۋىر  جۇك باسقاندار،‏ بارلىعىڭ دا ماعان كەلىڭدەر،‏ مەن جاندارىڭدى سەرگىتەمىن» (‏ماتاي 11:‏28—‏30‏)‏.‏ يسا وتە مەيىرىمدى بولعاندىقتان،‏ ول قايدا بارسا،‏ حالىق تا سوڭىنان ەرىپ ٴ‌جۇردى.‏ ولارعا جانى اشىپ تاماق بەردى،‏ ساۋىقتىردى جانە اكەسى تۋرالى «كوپ نارسەگە ۇيرەتتى» (‏مارقا 6:‏34؛‏ ماتاي 14:‏14؛‏ 15:‏32—‏38‏)‏.‏

يسا ادامداردىڭ سەزىمدەرىن ٴ‌تۇسىنىپ،‏ ولارعا مەيىرىممەن،‏ تۇسىنىكپەن قاراعان.‏ ول ٴ‌تىپتى دەمالۋعا بولگەن ۋاقىتىندا دا ٶزىن ىزدەپ كەلگەندەردى مەيىرىممەن قارسى العان (‏لۇقا 9:‏10،‏ 11‏)‏.‏ ال ەندى قان كەتىپ اۋىرعان ايەلدىڭ وقيعاسىن ەسكە تۇسىرەيىكشى.‏ ول ايىعۋدى قالاعاندىقتان،‏ يسانىڭ كيىمىنە قولىن تيگىزدى.‏ ٴ‌بىراق مۇسا زاڭىنا ساي،‏ ول ايەل تازا ەمەس بولىپ ەسەپتەلەتىن (‏مۇسانىڭ 3-‏جازباسى 15:‏25—‏28‏)‏.‏ يسا ونىڭ ارەكەتىنە قالاي قارادى؟‏ ول الگى ايەلگە اشۋلانعان جوق.‏ يسا ونىڭ قورقىپ تۇرعانىن كوزىنەن كوردى.‏ 12 جىل بويى قان كەتىپ قينالا اۋىرعانىنا جانى اشىپ بىلاي دەدى:‏ «قىزىم،‏ سەنىمىڭنىڭ ارقاسىندا ايىقتىڭ.‏ ۋايىمداماي قايتا بەر،‏ جانىڭا باتقان دەرتتەن ساۋىقتىڭ» (‏مارقا 5:‏25—‏34‏)‏.‏ ٴ‌يا،‏ يسانىڭ ارەكەتى مەيىرىمگە تولى ەدى!‏

ٴ‌بىز قاراستىرعان وقيعالاردان كورگەنىمىزدەي،‏ مەيىرىمدىلىك ٸس-‏ارەكەتپەن سۇيەمەلدەنەدى.‏ يسا قايىرىمدى ساماريالىق تۋرالى استارلى اڭگىمەسىندە مۇنىڭ قانشالىقتى ماڭىزدى ەكەنىنە باسا نازار اۋداردى.‏ قاراقشىلار ياھۋدي كىسىنى توناپ،‏ ۇرىپ-‏سوعىپ،‏ شالا-‏جانسار ەتىپ جولدىڭ شەتىندە تاستاپ كەتكەندە،‏ وعان ٶتىپ بارا جاتقان ساماريالىقتىڭ عانا جانى اشيدى.‏ سول زاماندا ساماريالىقتار مەن ياھۋديلەر اراسىندا جەككورۋشىلىك بولسا دا،‏ مەيىرىمدىلىك ونى الگى كىسىگە كومەكتەسۋگە تالپىندىردى.‏ ول ياھۋديدىڭ جارالارىن تاڭىپ،‏ ونى قوناق‍ۇيگە اپاردى.‏ قوناق‍ۇيدىڭ يەسىنە اقشا بەرىپ،‏ ياھۋديگە كۇتىم كورسەتۋىن سۇرادى،‏ ٴ‌تىپتى قوسىمشا شىعىندارىن دا تولەيتىنىن ۋادە ەتتى (‏لۇقا 10:‏29—‏37‏)‏.‏

مەيىرىمدىلىك تەك ٸس-‏ارەكەتىمىزدەن عانا ەمەس،‏ ايتار سوزىمىزدەن دە كورىنىپ تۇرۋ كەرەك.‏ ٴ‌سوزىمىز وزگەلەرگە قانات بىتىرگەنى ٴ‌جون.‏ كيەلى كىتاپتا:‏ «سارىۋايىم جۇرەكتى كۇيزەلتەدى،‏ جاقسى ٴ‌سوز ونى شاتتىققا تولتىرادى»،‏—‏ دەلىنگەن (‏ناقىل سوزدەر 12:‏25‏)‏.‏ مەيىرىمدىلىك پەن ىزگىلىك باسقالارعا جىگەرلى سوزدەر ايتۋعا قوزعاۋ سالعاندا،‏ ٴ‌بىز ولاردىڭ باقىتىنا باقىت قوسامىز *‏.‏ جاقسى سوزدەرىمىز ولاردىڭ قامىن ويلايتىنىمىزدى كورسەتىپ،‏ ٶمىر تاۋقىمەتىن كوتەرۋگە كۇش بەرەدى (‏ناقىل سوزدەر 16:‏24‏)‏.‏

قۇداي بارلىق ادامداردى وزىنە ۇقساس ەتىپ جاراتقاندىقتان،‏ ٴ‌بارىمىز دە مەيىرىمدىلىك قاسيەتىن تانىتا الامىز (‏مۇسانىڭ 1-‏جازباسى 1:‏27‏)‏.‏ مىسالى،‏ ەلشى پاۋىلدى ريمگە جەتكىزۋ ٷشىن تاعايىندالعان ريم جاساعىنىڭ باسشىسى يۋلي مەيىرىمدىلىك تانىتىپ،‏ سيدون قالاسىندا «پاۋىلعا دوستارىنا بارىپ،‏ ولاردىڭ كومەگىنە جۇگىنۋىنە رۇقسات ەتتى» (‏ەلشىلەردىڭ ىستەرى 27:‏3‏)‏.‏ سول ساپار بارىسىندا پاۋىل جانە وزگەلەر كەمە اپاتىنا ۇشىراعاندا،‏ مالتانىڭ تۇرعىندارى ولاردى مەيىرىمدىلىكپەن قارسى الدى،‏ ٴ‌تىپتى جىلىنسىن دەپ وت جاقتى (‏ەلشىلەردىڭ ىستەرى 28:‏1،‏ 2‏)‏.‏ بۇل ادامدار راسىندا دا جاقسىلىق جاسادى.‏ الايدا ەحوبانى قۋانتۋ ٷشىن ادام كەي كەزدە عانا ەمەس،‏ ٵردايىم مەيىرىمدى بولۋى ٴ‌تيىس.‏

ەحوبا مەيىرىمدىلىك قاسيەتى بولمىسىمىزدىڭ اجىراماس بولشەگىنە جانە ومىرلىك ۇستانىمىمىزعا اينالعانىن قالايدى.‏ سوندىقتان ول بىزگە مەيىرىمدىلىكتى «كيىپ الىڭدار» دەپ كەڭەس بەرەدى (‏قولوستىقتارعا 3:‏12،‏ سىلتەمە)‏.‏ ٴ‌بىراق بۇل وڭاي ەمەس.‏ بۇعان بىرنەشە سەبەپ بار.‏ مۇمكىن،‏ ٴ‌بىز ۇيالشاق،‏ سەنىمسىز يا ازداپ ٶزىمشىل شىعارمىز.‏ يا بولماسا ٴ‌بىزدى رەنجىتكەن ادامعا مەيىرىمدىلىك تانىتۋ قيىنعا سوعار.‏ ٴ‌بىراق دۇعادا ەحوبادان كيەلى رۋح سۇراپ،‏ وعان ەلىكتەۋگە تىرىسساق،‏ ول بىزگە مەيىرىمدى ادام بولۋعا كومەكتەسەدى (‏قورىنتتىقتارعا 1-‏حات 2:‏12‏)‏.‏

قاي جاعىنان مەيىرىمدىلىك جەتىسپەيتىنىن قالاي انىقتاۋعا بولادى؟‏ ٴ‌سىزگە مىنا سۇراقتار كومەكتەسەدى:‏  ‏«مەن وزگەلەردى مۇقيات تىڭدايمىن با؟‏ سەزىمدەرىن تۇسىنۋگە تىرىسامىن با؟‏ كومەككە مۇقتاج كەزدەرىن بايقايمىن با؟‏ تۋىسىما نە جاقىن دوسىما ەمەس،‏ باسقا ادامعا سوڭعى رەت قاشان مەيىرىمدىلىك تانىتتىم؟‏» سوسىن اينالاڭىزداعى ادامدارمەن،‏ اسىرەسە قاۋىمداعىلارمەن جاقىنىراق تانىسۋدى ماقسات ەتىپ قويىڭىز.‏ سوندا ولاردىڭ قانداي قيىندىقتارى بارىن،‏ ولارعا قانداي كومەك قاجەت ەكەنىن بىلەسىز.‏ بۇدان كەيىن وزگەلەر سىزگە قانشالىقتى مەيىرىمدى بولعانىن قالاساڭىز،‏ ٴ‌سىز دە ولارعا سونشالىقتى مەيىرىمدى بولۋعا تىرىسىڭىز (‏ماتاي 7:‏12‏)‏.‏ سوڭىندا ەحوبادان كومەك سۇراڭىز،‏ سوندا مەيىرىمدى ادام بولۋ ٷشىن جاساپ جاتقان قادامدارىڭىزعا ول باتاسىن بەرەدى (‏لۇقا 11:‏13‏)‏.‏

ەلشى پاۋىل وزىنە جاقسى قىزمەتشى بولۋعا كومەكتەسكەن قاسيەتتەردىڭ اراسىندا مەيىرىمدىلىكتى دە اتاپ وتكەن (‏قورىنتتىقتارعا 2-‏حات 6:‏3—‏6‏)‏.‏ پاۋىلدىڭ سوزدەرىنەن دە،‏ ىستەرىنەن دە مەيىرىمدىلىك ەسىپ تۇرعان.‏ سوندىقتان ادامدار ونى جاقسى كورگەن.‏ ولار پاۋىلدىڭ كورسەتكەن قامقورلىعىن سەزىنگەن (‏ەلشىلەردىڭ ىستەرى 28:‏30،‏ 31‏)‏.‏ ٴ‌بىز دە وزگەلەرگە مەيىرىمدى بولساق،‏ ۋاقىت وتە ولار شىندىق جايىندا كوبىرەك بىلگىسى كەلۋى مۇمكىن.‏ ٴ‌بىز بارلىق ادامدارعا،‏ ٴ‌بىزدى رەنجىتكەندەرگە دە مەيىرىمدىلىك تانىتساق،‏ بۇل ولاردىڭ جۇرەگىنە اسەر ەتىپ،‏ كوزقاراستارىن وزگەرتۋى مۇمكىن (‏ريمدىكتەرگە 12:‏20‏)‏.‏ بالكىم،‏ ۋاقىت وتە ولار كيەلى كىتاپ تۋرالى بىلگىسى كەلەر.‏

جۇماقتا ٵربىر ادام مەيىرىمدى بولادى.‏ قايتا تىرىلگەندەردىڭ كەيبىرى سول كەزدە ومىرىندە ٴ‌بىرىنشى رەت مەيىرىمدىلىكتىڭ شۋاعىنا شومىلادى.‏ ٴ‌سۇيتىپ،‏ وزدەرى دە مەيىرىمدىلىك تانىتۋعا تالپىنادى.‏ ال مەيىرىمسىز جانە وزگەلەرگە قول ۇشىن بەرگىسى كەلمەيتىن ادامدار ٷشىن قۇداي پاتشالىعىنىڭ ەسىگى جابىق بولادى.‏ جۇماق وزگەلەردى سۇيەتىن،‏ مەيىرىمدى ادامداردىڭ عانا ماڭگى مەكەنى بولماق (‏ٴ‌زابۇر 37:‏9—‏11‏)‏.‏ جەر بەتىندە ناعىز تىنىش زامان سول كەزدە ورنايدى.‏ ٴ‌بىراق مەيىرىمدىلىكتىڭ يگىلىگىن قازىردىڭ وزىندە كورە الامىز.‏ قالايشا؟‏

كيەلى كىتاپتا:‏ «مەيىرىمدى ٶز جانىنا يگىلىك جاسايدى»،‏—‏ دەگەن سوزدەر بار (‏ناقىل سوزدەر 11:‏17‏)‏.‏ مەيىرىمدى جانعا ادامدار تارتىلادى،‏ وعان دا سونداي مەيىرىممەن قارايدى.‏ يسا:‏ «قانداي ولشەممەن ولشەپ بەرسەڭدەر،‏ سەندەرگە دە سونداي ولشەممەن بەرىلەدى»،‏—‏ دەگەن (‏لۇقا 6:‏38‏)‏.‏ مەيىرىمدى ادام دوستار تاۋىپ،‏ ولاردى جوعالتپايدى.‏

ەلشى پاۋىل ەفەستەگى قاۋىمعا:‏ «ٴ‌بىر-‏بىرىڭە مەيىرىمدى دە بارىنشا جاناشىر بولىڭدار.‏.‏.‏ ٴ‌بىر-‏ٴ‌بىرىڭدى.‏.‏.‏ كەشىرىڭدەر»،‏—‏ دەپ جازعان (‏ەفەستىكتەرگە 4:‏32‏)‏.‏ قاۋىمداعىلاردىڭ بارلىعى مەيىرىمدى دە جاناشىر بولسا،‏ قاۋىم نىعايىپ،‏ بىرلىگى جاراسا تۇسەدى.‏ ٴ‌بىز باۋىرلاستاردى سىناپ-‏مىنەمەيمىز،‏ ولار تۋرالى وسەك ايتپايمىز نەمەسە جاندارىنا باتاتىن ٴ‌سوز يا ٴ‌تىپتى قالجىڭ ايتپايمىز.‏ كەرىسىنشە،‏ اۋزىمىزدان شىققان ٵر ٴ‌سوزىمىز ولاردى رۋحتاندىرىپ،‏ بويلارىنا جىگەر قۇيۋ كەرەك (‏ناقىل سوزدەر 12:‏18‏)‏.‏ سوندا بۇكىل قاۋىم ەحوباعا قۋانىشپەن قىزمەت ەتەدى.‏

ٴ‌يا،‏ مەيىرىمدىلىك —‏ ٵر ٴ‌سوزىمىز بەن ىسىمىزدەن كورىنىس تاباتىن قاسيەت.‏ مەيىرىمدى بولساق،‏ ٴ‌سۇيۋشى ٵرى جومارت قۇدايىمىز ەحوباعا ۇقساس بولامىز (‏ەفەستىكتەرگە 5:‏1‏)‏.‏ بۇل قاۋىمدى نىعايتادى،‏ ال وزگەلەردى ەحوباعا جاقىنداتادى.‏ ەندەشە ەحوبا كۋاگەرلەرى مەيىرىمدى حالىق ەكەنىن بارشا جۇرت ٴ‌بىلسىن!‏