1،‏ 2.‏ ا)‏ جاس جۇبايلار نەلىكتەن ەحوباعا سەنىم ارتۋلارى كەرەك؟‏ (‏ٴ‌زابۇر 37:‏3،‏ 4‏)‏ ٵ)‏ وسى ماقالادا نە تۋرالى قاراستىرامىز؟‏

ٴ‌سىز جاقىندا نەكە قۇرعان بولساڭىز نەمەسە نەكە قۇرعالى جاتساڭىز،‏ سۇيگەن ادامىڭىزبەن بىرگە باقىتتى عۇمىر كەشەمىن دەپ ۇمىتتەنەتىنىڭىز ٴ‌سوزسىز.‏ دەسە دە نەكەلىك ٶمىردىڭ ٶز قيىندىقتارى بار.‏ كەيدە جۇپ بولىپ ماڭىزدى شەشىمدەر قابىلداۋ كەرەك بولادى.‏ سول كەزدەرى قالاي ارەكەت ەتەتىندەرىڭىز نەكەلەرىڭىزدىڭ بولاشاعىنا تىكەلەي اسەر ەتەدى.‏ ەگەر ەحوباعا ارقا سۇيەسەڭىزدەر،‏ دۇرىس شەشىمدەر قابىلداپ،‏ نەكەلەرىڭىز بەرىك جانە باقىتتى بولادى.‏ ال ەگەر ٶز اقىلدارىڭىزعا سۇيەنىپ،‏ قۇدايدىڭ ويىن ەلەمەسەڭىزدەر،‏ قيىندىقتارعا ۇشىراپ،‏ نەكەلەرىڭىزگە سىزات ٴ‌تۇسۋى مۇمكىن ‏(‏ٴ‌زابۇر 37:‏3،‏ 4 وقىڭىز)‏.‏

² بۇل ماقالا نەگىزىنەن جاڭادان ۇيلەنگەندەرگە ارنالعانىمەن،‏ مۇندا بارلىق ەرلى-‏زايىپتىلار كەزدەسەتىن قيىندىقتار قاراستىرىلادى.‏ سونداي-‏اق كيەلى كىتاپ زامانىندا ٶمىر سۇرگەن قۇدايعا ادال ەرلەر مەن ايەلدەردىڭ ۇلگىلەرىن كورەمىز جانە ٴ‌بىزدىڭ زامانىمىزداعى ٴ‌ماسىحشى ەرلى-‏زايىپتىلاردىڭ مىسالدارىن قاراستىرىپ،‏ ولاردان نە ۇيرەنەتىنىمىزدى بىلەمىز.‏

3،‏ 4.‏ جاس جۇبايلار قانداي قيىندىقتارعا كەزىگۋى مۇمكىن؟‏

³ جاس جۇبايلارعا اتا-‏اناسى،‏ دوستارى نەمەسە باسقا دا جاقىندارى:‏ «ەندى جۇرت قاتارلى ٶمىر ٴ‌سۇرىپ،‏ تەز بالالى بولىڭدار،‏ ٷي الىپ،‏ ٸشىن دۇنيە-‏مۇلىككە تولتىرىڭدار»،‏—‏ دەپ قىسىم جاساۋى مۇمكىن.‏

⁴ جاس جۇبايلار ابايلاماسا،‏ بۇرىس شەشىمدەر قابىلداپ،‏ قارىزعا باتىپ كەتۋى مۇمكىن.‏ سوسىن بۇل قارىزدى جابۋ ٷشىن  ايەلىنە دە،‏ كۇيەۋىنە دە تاڭ اتقاننان قارا كەشكە دەيىن جۇمىس ىستەۋگە تۋرا كەلەدى.‏ بۇنداي جۇمىس جەكە زەرتتەيتىن،‏ وتباسىلىق عيبادات وتكىزەتىن جانە ۋاعىزدايتىن ۋاقىتتى الىپ قويادى.‏ ولار ٴ‌تىپتى كوبىرەك اقشا تابۋ ٷشىن نەمەسە جۇمىستارىن جوعالتىپ الماۋ ٷشىن قاۋىم كەزدەسۋلەرىنەن قالا باستاۋى مۇمكىن.‏ ناتيجەسىندە،‏ ولار قىزمەت اياسىن كەڭەيتۋ مۇمكىندىگىن جىبەرىپ الىپ،‏ ناعىز قۋانىش پەن قاناعات الۋدان قۇر قالادى.‏

5.‏ كلاۋس پەن ماريسانىڭ وقيعاسىنان نەنى تۇسىنۋگە بولادى؟‏

⁵ ٶمىر كورسەتكەندەي،‏ بايلىققا ۇمتىلۋ ەشقاشان باقىتقا جەتكىزبەيدى.‏ مىسالعا كلاۋس پەن ماريسا دەگەن ەرلى-‏زايىپتىنى الايىق *‏.‏ ۇيلەنگەن سوڭ،‏ ولار جاقسى ٶمىر كەشەيىك دەپ تولىق ۋاقىت جۇمىس ىستەي باستايدى.‏ ٴ‌بىراق ولار شىن قاناعات سەزىنبەيدى.‏ «بىزدە ٴ‌بارى بولدى،‏ ٴ‌تىپتى قاجەتىنەن دە كوپ بولدى،‏ ٴ‌بىراق ەشقانداي رۋحاني ماقساتقا ۇمتىلمادىق.‏ شىنى كەرەك،‏ ٶمىرىمىز قيىنداپ،‏ سترەسس كوبەيىپ كەتتى»،‏—‏ دەيدى كلاۋس.‏ ٴ‌سىزدىڭ وتباسىڭىز دا وسىنداي كۇي كەشىپ جۇرسە،‏ ەڭسەڭىز تۇسپەسىن.‏ كيەلى كىتاپتاعى ۇلگى بولعان ادامداردىڭ مىسالدارى سىزگە كومەكتەسە الادى.‏ قازىر جوسافات پاتشا كۇيەۋلەرگە قانداي ۇلگى قالدىرعانىن كورەيىك.‏

6.‏ ۇلكەن قيىندىققا كەزىككەندە جوسافات پاتشا ناقىل سوزدەر 3:‏5،‏ 6 داعى كەڭەستى قالاي قولداندى؟‏

⁶ كۇيەۋلەر،‏ سىزدەردە جاۋاپكەرشىلىك كوپ بولعاندىقتان كەيدە ۋايىمدايتىن شىعارسىزدار.‏ سىزدەرگە جوسافات پاتشا جاقسى ۇلگى قالدىرعان.‏ ونىڭ موينىندا بۇكىل ەلدىڭ قامى جاتقان ەدى.‏ ول وزىنە جۇكتەلگەن مىندەتكە ۇلكەن جاۋاپكەرشىلىكپەن قارادى.‏ مىسالى،‏ ول ياھۋدا ەلىندە بەكىنىستى قالالار سالدى،‏ 1160000 نان استام سارباز جيناپ،‏ اسكەرىن كۇشەيتتى (‏شەج.‏ 2-‏ج.‏ 17:‏12—‏19‏)‏.‏ بىردە جوسافات پاتشا وتە ۇلكەن قيىندىققا كەزىكتى.‏ امموندىقتاردىڭ،‏ موابتىقتاردىڭ جانە سەيىر تاۋلى وڭىرىنىڭ قالىڭ قولى ياھۋدا ەلىنە قارسى اتتانىپ،‏ جوسافاتتىڭ وزىنە،‏ وتباسىنا جانە حالقىنا قاۋىپ ٴ‌توندىردى (‏شەج.‏ 2-‏ج.‏ 20:‏1،‏ 2‏)‏.‏ سول كەزدە ول نە ىستەدى؟‏ ول ناقىل سوزدەر 3:‏5،‏ 6 دا ‏(‏وقىڭىز)‏ ايتىلعانداي ارەكەت ەتىپ،‏ ەحوباعا جۇگىندى،‏ ودان كۇش سۇرادى.‏ ونىڭ كىشىپەيىلدىلىكپەن ايتقان دۇعاسىنان كوكتەگى قامقور اكەسىنە قانشالىقتى ارقا سۇيەگەنىن كورەمىز (‏شەج.‏ 2-‏ج.‏ 20:‏5—‏12‏)‏.‏ جوسافاتتىڭ دۇعاسىنا ەحوبا قالاي جاۋاپ بەردى؟‏

7.‏ ەحوبا جوسافاتتىڭ دۇعاسىنا قالاي جاۋاپ بەردى؟‏

⁷ ەحوبا جوسافاتقا جاحازيەل دەگەن لەۋىلىك ارقىلى جاۋاپ بەردى.‏ ول بىلاي دەپ ەرەكشە نۇسقاۋ بەردى:‏ «تەك سول جەرگە بارىڭدار دا،‏ تاپجىلماي تۇرىڭدار،‏ سوندا ەحوبانىڭ  وزدەرىڭدى قالاي قۇتقاراتىنىن كورەسىڭدەر» (‏شەج.‏ 2-‏ج.‏ 20:‏13—‏17‏)‏.‏ تاپجىلماي تۇرىپ سوعىستا جەڭۋ —‏ مۇمكىن ەمەس نارسە!‏ ٴ‌بىراق بۇل پەندەدەن ەمەس،‏ ەحوبا قۇدايدان كەلگەن نۇسقاۋ ەدى.‏ جوسافات ەحوباعا تولىق سەنىم ارتىپ،‏ ٴ‌بارىن سول ايتقانداي ىستەدى.‏ جاۋىمەن بەتپە-‏بەت كەلگەندە،‏ ول الدىڭعى شەپكە مايتالمان ساربازدارىن ەمەس،‏ قارۋى جوق انشىلەرىن قويدى.‏ ەحوبا ٴ‌سوزىن جەرگە تاستاماي،‏ جوسافات پەن حالقىنا ۇلى جەڭىس سيلادى (‏شەج.‏ 2-‏ج.‏ 20:‏18—‏23‏)‏.‏

8.‏ كۇيەۋلەر جوسافاتتان قانداي ۇلگى الا الادى؟‏

⁸ كۇيەۋلەر،‏ جوسافات پاتشا سياقتى،‏ سىزدەردىڭ دە مويىندارىڭىزدا ۇلكەن جاۋاپكەرشىلىك بار.‏ وتباسىن اسىراپ،‏ ولاردى قورعاۋ ٷشىن سىزدەر كوپ ەڭبەكتەنەسىزدەر.‏ قانداي دا ٴ‌بىر قيىندىق تۋىنداعاندا،‏ سىزدەر ونى شەشۋگە ٶز شامام جەتەدى دەپ ويلايتىن شىعارسىزدار.‏ ٴ‌بىراق مۇنداي بەيىمدىلىككە بەرىلمەڭىزدەر.‏ قايتا،‏ ەحوباعا دۇعا ەتىپ،‏ ودان كومەك سۇراڭىزدار.‏ سوسىن ايەلدەرىڭىزبەن بىرگە تاعى دا ىستىق دۇعا ايتىڭىزدار.‏ كيەلى كىتاپتى جانە سوعان نەگىزدەلگەن ادەبيەتتەردى زەرتتەپ،‏ قۇداي مەن ونىڭ ۇيىمىنىڭ باسشىلىعىنا جۇگىنىڭىزدەر.‏ سوسىن سول اقىل-‏كەڭەسكە ساي ارەكەت ەتىڭىزدەر.‏ ٴ‌بىراق بۇل شەشىمدەرىڭىز وزگەلەرگە ۇناماۋى مۇمكىن.‏ ولار:‏ «مىناۋىڭ بارىپ تۇرعان اقىماقتىق قوي،‏ ودان دا كوپ اقشا تاۋىپ،‏ وتباسىڭنىڭ جاعدايىن جاقسىلاپ جاسامايسىڭ با؟‏!‏»—‏ دەيتىن شىعار.‏ ٴ‌بىراق جوسافات پاتشانى ەستە ۇستاڭىزدار.‏ ول ەحوباعا سەنىم ارتىپ،‏ مۇنى ىسىمەن كورسەتتى.‏ ال ەحوبا وسى ادال قىزمەتشىسىن تاستامادى،‏ ول ٴ‌سىزدى دە تاستامايدى (‏ٴ‌زاب.‏ 37:‏28؛‏ ەۆر.‏ 13:‏5‏)‏.‏ نەكەلىك ومىرلەرى شىن قاناعات پەن باقىتقا تولى بولۋ ٷشىن ەرلى-‏زايىپتىلار نە ىستەسە بولادى؟‏

9.‏ يشايا پايعامبار مەن ونىڭ ايەلى جايلى ٴ‌بىز نە بىلەمىز؟‏

⁹ يشايا پايعامبار مەن ونىڭ ايەلى ومىرلەرىن ەحوباعا قىزمەت ەتۋگە ارناعان.‏ كيەلى كىتاپتا يشايانىڭ ايەلى «پايعامبار ايەل» دەپ اتالعان.‏ سوعان قاراعاندا،‏ ونىڭ دا پايعامبارلىق مىندەتتەرى بولعان (‏يشايا 8:‏1—‏4‏)‏.‏ ولار ەحوباعا عيبادات ەتۋدى باستى ورىنعا قويۋلارىمەن ەرلى-‏زايىپتىلارعا كەرەمەت ۇلگى قالدىرعان!‏

10.‏ كيەلى كىتاپتاعى پايعامبارلىقتاردى زەرتتەۋدىڭ ەرلى-‏زايىپتىلارعا قانداي كومەگى بار؟‏

¹⁰ بۇگىندە دە ەرلى-‏زايىپتىلار يشايا مەن ونىڭ ايەلى سياقتى ەحوباعا بارىنشا قىزمەت ەتۋگە تالپىنا الادى.‏ بۇل ٷشىن ولار ەحوباعا كوبىرەك سەنىم ارتۋدى ۇيرەنۋلەرى كەرەك.‏ بۇعان كيەلى كىتاپتاعى پايعامبارلىقتاردى زەرتتەپ،‏ ولاردىڭ مىندەتتى تۇردە ورىندالاتىنىنا كوز جەتكىزگەندەرى كومەكتەسەدى * (‏تيت.‏ 1:‏2‏)‏.‏ سونداي-‏اق ولار:‏ «قانداي پايعامبارلىقتاردىڭ ورىندالۋىنا ۇلەس قوسا الامىز؟‏»—‏ دەپ ويلانسا بولادى.‏ مىسالى،‏ ەرلى-‏زايىپتىلار يسانىڭ «وسى زاماننىڭ سوڭى كەلگەنشە ىزگى حابار بۇكىل جەر بەتىندە ۋاعىزدالادى» دەگەن پايعامبارلىعىنىڭ ورىندالۋىنا قاتىسا الادى (‏مات.‏ 24:‏14‏)‏.‏ ولاردىڭ كيەلى كىتاپتاعى پايعامبارلىقتاردىڭ شىنىمەن ورىندالاتىنىنا كوزدەرى جەتكەن سايىن،‏ ەحوباعا كوبىرەك قىزمەت ەتۋگە دەگەن شەشىمدەرى بەكي تۇسەدى.‏

11.‏ پريسكيلا مەن اقيلا نە نارسەگە جول بەرمەدى؟‏

¹¹ ريم قالاسىندا تۇرعان پريسكيلا مەن اقيلا دەگەن ياھۋدي ەرلى-‏زايىپتى دا جاس جۇبايلارعا جاقسى ۇلگى قالدىرعان.‏ ولار يسا تۋرالى ىزگى حاباردى ەستىپ،‏ ٴ‌ماسىحشى بولعان.‏ بىردە كۇتپەگەن جەردەن يمپەراتور كلاۋدي بۇكىل ياھۋديلەرگە ريمنەن كەتۋدى بۇيىرادى.‏ ەندى اقيلا مەن پريسكيلاعا ۇيرەنشىكتى جەرلەرىن تاستاپ،‏ جاڭا جەردە ٴ‌بارىن باسىنان باستاۋعا تۋرا كەلدى.‏ ولار تۇراتىن جاڭا ٷي تاۋىپ،‏ شاتىر جاساۋ كاسىپتەرىنە دە باسىنان كىرىسۋلەرى كەرەك ەدى.‏ وسىنداي وزگەرىستەر كەزىندە اقيلا مەن پريسكيلا پاتشالىق ٸسىن ەكىنشى ورىنعا قويىپ كەتتى مە؟‏ ٴ‌بىز بۇنىڭ جاۋابىن بىلەمىز.‏ ولار قورىنتتاعى قاۋىممەن بىردەن ارالاسىپ كەتتى.‏ پاۋىلمەن بىرگە باۋىرلاستاردى نىعايتتى.‏ كەيىنىرەك ولار باسقا دا قالالارعا كوشىپ بارىپ،‏ جاريالاۋشىلار قاجەت جەردە قىزمەت ەتتى (‏ەل.‏ ٸس.‏ 18:‏18—‏21؛‏ ريم.‏ 16:‏3—‏5‏)‏.‏ اقيلا مەن پريسكيلانىڭ ٶمىرى باقىت پەن قىزىققا تولى بولدى!‏

12.‏ نەگە جۇبايلاردىڭ رۋحاني ماقساتتارعا ۇمتىلعاندارى دۇرىس؟‏

¹² بۇگىندە دە كوپ جاس جۇبايلار پريسكيلا مەن اقيلاعا ەلىكتەپ،‏ پاتشالىقتى باستى ورىنعا قويا الادى.‏ ولار قانداي ماقساتقا ۇمتىلاتىندارىن كەزدەسىپ جۇرگەندە-‏اق شەشىپ العاندارى دۇرىس.‏ جۇبايلار بىرگە شەشىم قابىلداپ،‏ رۋحاني ماقساتتارعا بىرگە ۇمتىلسا،‏ كوپ جاعدايدا ەحوبانىڭ قولىن كورەتىن بولادى (‏ۋاع.‏ 4:‏9،‏ 12‏)‏.‏ راسسەلل مەن ەليزابەتتىڭ سوزدەرىنە دەن قويايىقشى.‏ راسسەل بىلاي دەيدى:‏ «ٴ‌بىز قانداي رۋحاني ماقساتتارعا ۇمتىلاتىنىمىزدى ۇيلەنبەي تۇرىپ شەشىپ الدىق».‏ ال ەليزابەت بىلاي دەيدى:‏ «ٴ‌بىز ماقساتىمىزدى الدىن الا انىقتاپ العاندىقتان،‏ ٴ‌تۇرلى تاڭداۋلار جاساۋعا تۋرا كەلگەندە ماقساتىمىزدان الىستاتاتىن شەشىمدەردەن اۋلاق بولدىق».‏ كەيىن راسسەلل مەن ەليزابەت ميكرونەزياعا كوشىپ بارىپ،‏ جاريالاۋشىلار قاجەت جەردە قىزمەت ەتتى.‏

13.‏ ٴ‌زابۇر 28:‏7 گە ساي،‏ ەحوباعا سەنىم ارتساق،‏ ناتيجەسى قانداي بولادى؟‏

 ¹³ راسسەلل مەن ەليزابەت سياقتى،‏ كوپتەگەن ەرلى-‏زايىپتىلار باسقا ىستەرگە الاڭداماي،‏ مۇمكىندىگىنشە كوبىرەك ۋاعىزداپ،‏ ٴ‌تالىم بەرۋگە تىرىسادى.‏ ولار رۋحاني ماقساتتار قويىپ،‏ سولارعا ۇمتىلعاندا،‏ بۇنىڭ كوپ جەمىسىن كورەدى.‏ ەحوبانىڭ قامقورلىعىن سەزىنىپ،‏ وعان دەگەن سەنىمدەرى ارتادى جانە شىن باقىتتى بولادى ‏(‏ٴ‌زابۇر 28:‏7 وقىڭىز)‏.‏

14.‏ پەتىر مەن ونىڭ ايەلىنىڭ ماتاي 6:‏25،‏ 31—‏34-‏تارماقتاردا جازىلعان ۋادەگە سەنەتىندەرى نەدەن كورىندى؟‏

¹⁴ ەرلى-‏زايىپتىلار پەتىر مەن ونىڭ ايەلىنەن دە كوپ نارسەگە ۇيرەنە الادى.‏ پەتىر وتباسىن اسىراۋ ٷشىن بالىق اۋلاۋمەن اينالىساتىن.‏ يسامەن تانىسقانىنا ٴ‌بىرشاما ۋاقىت وتكەننەن كەيىن،‏ يسا ونى وزىمەن بىرگە تولىق ۋاقىت قىزمەت ەتۋگە شاقىردى.‏ پەتىرگە بۇل شەشىمدى قابىلداۋ وڭاي بولماعان شىعار،‏ ويتكەنى ونىڭ وتباسى بار ەدى (‏لۇقا 5:‏1—‏11‏)‏.‏ ٴ‌بىراق ول يسانىڭ سوڭىنان ەرىپ،‏ بىرگە ۋاعىزداۋدى شەشتى.‏ بۇل شىنىمەن دە دانا شەشىم بولدى!‏ ٴ‌بىز پەتىردىڭ ايەلى ونىڭ شەشىمىن قولداعان دەپ تۇجىرىمداي الامىز.‏ ويتكەنى كيەلى كىتاپتا ايتىلعانداي،‏ يسا قايتا تىرىلگەننەن كەيىن ول پەتىرمەن بىرگە ميسسيونەرلىك ساپارعا شىققان (‏قور.‏ 1-‏ح.‏ 9:‏5‏)‏.‏ ايەلى جاقسى ۇلگى كورسەتكەندىكتەن،‏ پەتىر ٴ‌ماسىحشى ەرلى-‏زايىپتىلارعا ەركىن كەڭەس بەرە العانى ٴ‌سوزسىز (‏پەت.‏ 1-‏ح.‏ 3:‏1—‏7‏)‏.‏ پاتشالىقتى ٴ‌بىرىنشى ورىنعا قويسا،‏ ەحوبا قاجەتىمەن قامدايتىنىنا پەتىر دە،‏ ونىڭ ايەلى دە سەنىمدى بولعان ‏(‏ماتاي 6:‏25،‏ 31—‏34 وقىڭىز)‏.‏

15.‏ ەستەر مەن تياگونىڭ وقيعاسىنان نە ۇيرەنەمىز؟‏

¹⁵ ال ەگەر ۇيلەنگەندەرىڭىزگە ٴ‌بىراز جىل بولسا شە؟‏ ەحوباعا كوبىرەك قىزمەت ەتۋگە دەگەن ىقىلاستارىڭىزدى قالاي جانداندىرا الاسىزدار؟‏ بۇنىڭ ٴ‌بىر جولى —‏ وسىلاي ەتكەن ەرلى-‏زايىپتىلار جايلى وقىپ-‏زەرتتەۋ.‏ مىسالى،‏ «ولار دايىندىق رۋحىن تانىتتى» دەگەن ايدارداعى ماقالالاردى زەرتتەسەڭىزدەر بولادى.‏ بۇل ماقالالار برازيليالىق تياگو مەن ەستەرگە جاقسى كومەكتەسكەن.‏ ولار سول ماقالالاردى وقىعان سوڭ،‏ قاجەتتىلىك بار جەردە قىزمەت ەتۋگە ىقىلاستارى ويانعان.‏ تياگو بىلاي دەيدى:‏ «ەحوبانىڭ بۇگىندەگى قىزمەتشىلەرىنە قالاي كومەكتەسىپ جاتقانى جايلى وقىعاندا،‏ ٴ‌بىز دە ەحوبانىڭ كومەگىن انىق كورىپ،‏ قامقورلىعىن سەزىنگىمىز كەلىپ كەتتى».‏ ٴ‌سۇيتىپ،‏ ولار پاراگۆايعا كوشىپ باردى.‏ 2014-‏جىلدان بەرى ولار پورتۋگال تىلىندەگى تاناپتا قىزمەت ەتەدى.‏ ايەلى ەستەر بىلاي دەيدى:‏ «‏ەفەستىكتەرگە 3:‏20 ەكەۋىمىزدىڭ دە سۇيىكتى تارماعىمىز.‏ ونداعى سوزدەردىڭ راستىعىنا ٴ‌بىزدىڭ تالاي رەت كوزىمىز جەتتى».‏ سول تارماقتا ەحوبانىڭ بىزگە ٴ‌بىز سۇراعاننان الدەقايدا كوپ نارسە بەرەتىنى ايتىلعان.‏ ەحوبا وسى ۋادەسىندە بەرىك تۇرادى!‏

16.‏ جاس جۇبايلار كىمدەردەن اقىل-‏كەڭەس سۇراي الادى؟‏

¹⁶ جاس جۇبايلار ەحوباعا ٵردايىم سەنىم ارتاتىن باۋىرلاستاردان ۇلگى السا بولادى.‏ مىسالى،‏ كەيبىر ەرلى-‏زايىپتىلار ەحوباعا ونداعان جىلدار بويى تولىق ۋاقىت قىزمەت ەتىپ كەلەدى.‏ جاس جۇبايلار سول تاجىريبەلى باۋىرلاستارمەن اقىلداسىپ،‏ كەڭەس سۇراي الادى.‏ بۇل —‏ ەحوباعا سەنىم ارتاتىندارىڭىزدى كورسەتۋدىڭ  تاعى ٴ‌بىر جولى (‏ناق.‏ س.‏ 22:‏17،‏ 19‏)‏.‏ سونداي-‏اق اقساقالدار دا جاس جۇپتارعا رۋحاني ماقساتتار قويىپ،‏ سوعان جەتۋگە كومەكتەسە الادى.‏

17.‏ كلاۋس پەن ماريسا قانداي جاعدايعا كەزىكتى جانە ٴ‌بىز ولاردان نە ۇيرەنەمىز؟‏

¹⁷ ٴ‌بىز ەحوباعا كوبىرەك قىزمەت ەتۋدىڭ بەلگىلى ٴ‌بىر جولىن ويلاعانىمىزبەن،‏ ەحوبا بىزگە باسقا قىزمەتتىڭ ەسىگىن اشۋى مۇمكىن.‏ جوعارىدا ايتىلعان كلاۋس پەن ماريسانىڭ جاعدايىندا وسىلاي بولعان.‏ نەكە قۇرعاندارىنا ٷش جىل بولعاندا،‏ ولار فينليانديا بەتەلىنىڭ قۇرىلىسىنا قاتىسۋ ٷشىن سول جاققا كوشىپ بارادى.‏ ٴ‌بىراق باۋىرلاستار ولارعا قۇرىلىسقا 6 اي عانا كومەكتەسە الاتىندارىن ايتادى.‏ بۇنى ەستىگەندە ولاردىڭ كوڭىلدەرى ٴ‌تۇستى.‏ ٴ‌بىراق كەيىن ولار اراب ٴ‌تىلىن ۇيرەتەتىن كۋرسقا شاقىرىلدى.‏ قازىر ەكەۋى باسقا ەلدە اراب ٴ‌تىلدى تاناپتا قۋانا قىزمەت ەتىپ ٴ‌جۇر.‏ ماريسا بىلاي دەپ ەسىنە الدى:‏ «ەحوباعا تولىق سەنىم ارتىپ،‏ بۇرىن ەشقاشان ىستەمەگەندى ىستەۋ باسىندا قورقىنىشتى كورىنەدى.‏ ٴ‌بىراق ەحوبا بىزگە كۇتپەگەن جولدارمەن كومەكتەسىپ وتىردى.‏ وسىنى كورگەننەن كەيىن مەنىڭ ەحوباعا دەگەن سەنىمىم ودان سايىن ارتتى».‏ بۇل مىسالدان كورەتىنىمىزدەي،‏ ەحوباعا تولىق سەنىم ارتساق،‏ ول بىزگە ٵردايىم باتاسىن بەرەدى.‏

18.‏ ەرلى-‏زايىپتىلار ەحوباعا سەنىم ارتا بەرۋلەرى ٷشىن نە ىستەۋلەرى كەرەك؟‏

¹⁸ نەكە —‏ ەحوبانىڭ بەرگەن سيى (‏مات.‏ 19:‏5،‏ 6‏)‏.‏ ەحوبا ەرلى-‏زايىپتىلاردىڭ سول سيدىڭ قىزىعىن كورگەنىن قالايدى (‏ناق.‏ س.‏ 5:‏18‏)‏.‏ جاس جۇبايلار،‏ ومىرلەرىڭىزدى نە نارسەگە ارناپ جۇرگەندەرىڭىز جايلى ويلانىپ كورىڭىزدەر.‏ ەحوبا بەرگەن سيلاردى باعالايتىندارىڭىزدى بارىنشا كورسەتىپ جاتىرسىزدار ما؟‏ ەحوباعا دۇعا ەتىڭىزدەر.‏ قۇداي سوزىنەن ٶز جاعدايلارىڭىزعا ساي كەلەتىن پرينسيپتەردى ىزدەڭىزدەر.‏ كەيىن سول كەڭەستەرگە ساي ارەكەت ەتىڭىزدەر.‏ جۇپ بولىپ ومىرلەرىڭىزدى ەحوباعا قىزمەت ەتۋگە ارناساڭىزدار،‏ ول مىندەتتى تۇردە باتاسىن بەرەدى،‏ ٵرى نەكەلەرىڭىز باقىتتى بولادى!‏