47-زەرتتەۋ ماقالاسى
ٴسەنىمىڭىز مىقتى بولىپ قالا ما؟
«ابىرجىماڭدار. قۇدايعا سەنىڭدەر» (جوح. 14:1).
119-ٵن سەنىمىمىز بەرىك بولعاي
اڭداتپا *
1. ٴبىزدى قانداي ويلار مازالاۋى مۇمكىن؟
ٴسىز الدا بولاتىن جالعان ٴدىننىڭ جويىلۋى، ماگوگ جەرىندەگى گوگتىڭ شابۋىلى جانە ارماگەددون سوعىسى تۋرالى ويلاعاندا، ٴبىراز ابىرجيتىن شىعارسىز. جانتۇرشىگەرلىك سول كەزەڭدەردە مىنسىزدىگىمدى ساقتاي الار ما ەكەنمىن دەپ ويلايتىن شىعارسىز. وسىنداي ويلار مازالاسا، يسانىڭ «ابىرجىماڭدار، قۇدايعا سەنىڭدەر» دەگەن ٴسوزى سىزگە كومەك بولادى (جوح. 14:1). راسىندا دا، سەنىمىمىز مىقتى بولسا، بولاشاقتى قورىقپاي قارسى الامىز.
2. سەنىمىمىزدى قالاي نىعايتا الامىز جانە بۇل ماقالادا نە تۋرالى قاراستىرامىز؟
2 الداعى سىناقتاردا بەرىك تۇرۋ ٷشىن سەنىمىمىزدى قالاي نىعايتساق بولادى؟ بۇل ٷشىن سەنىمىمىزدى قاي جاعىنان كۇشەيتۋ كەرەكتىگىن ٴبىلۋ كەرەك. سوندىقتان قازىر كەزىگىپ جۇرگەن سىناقتاردا قالاي ارەكەت ەتەتىنىمىزگە ٴمان بەرەيىك. ٵر سىناقتان وتكەن سايىن سەنىمىمىز مىقتى بولا تۇسەدى. سوندا بولاشاقتاعى سىناقتارعا دايىن بولامىز. ٴبىز بۇل ماقالادا يسانىڭ شاكىرتتەرى سەنىمدەرىن نىعايتۋ كەرەك بولعان ٴتورت جاعدايدى قاراستىرامىز. كەيىن ٴبىز دە سونداي قيىندىقتارعا كەزىككەندە، سەنىمىمىزدى نىعايتىپ، بولاشاقتاعى سىناقتارعا قالاي دايىن بولا الاتىنىمىزدى كورەمىز.
قۇداي ٴبىزدى قاجەتىمىزبەن قامدايتىنىنا دەگەن سەنىم
ٴسەنىم بىزگە تارشىلىق كورگەن شاقتا دا پاتشالىق ىسىنە بارىنشا اتسالىسۋعا كومەكتەسەدى (3—6-ابزاستاردى قاراڭىز)
3. ماتاي 6:30، 33 تە يسا سەنىمگە قاتىستى نە ايتتى؟
3 ٵربىر وتاعاسى ايەلى مەن بالا-شاعاسىن ىشەر اس، كيەر كيىم، باسپانامەن قامتاماسىز ەتكىسى كەلەدى. ٴبىراق قازىرگى زاماندا بۇل وڭاي ەمەس. كەيبىر وتاعالارى جۇمىستارىنان ايىرىلىپ، قانشا تىرىسسا دا، مۇلدەم جۇمىس تابا الماي جاتادى. ۇسىنىلعان جۇمىس ماسىحشىلەرگە لايىقسىز بولعاندىقتان دا، وتاعالارعا ودان باس تارتۋعا تۋرا كەلەدى. وسىنداي كەزدەرى ەحوبا جاعدايىمىزدى كورىپ، قاجەتىمىزبەن قامدايتىنىنا زور سەنىم كەرەك. تاۋداعى ۋاعىزىندا يسا شاكىرتتەرىنە وسى جايلى ايتقان (ماتاي 6:30، 33 وقىڭىز). ەگەر ەحوبا ٴبىزدى تاستامايتىنىنا ەش كۇماندانباساق، بار نازارىمىزدى پاتشالىق ىسىنە اۋدارا الامىز. سوندا ول ٴبىزدى قاجەتىمىزبەن قامدايتىنىن كورىپ، وعان جاقىنداي تۇسەمىز ٵرى سەنىمىمىز دە نىعايادى.
4، 5. ٴبىر وتباسىنا تارشىلىق كورگەندە ۋايىمعا سالىنىپ كەتپەۋگە نە كومەكتەستى؟
4 ۆەنەسۋەلادا تۇراتىن ٴبىر وتباسى تارشىلىق كورگەندە، ەحوبا ولارعا ۋايىمعا باتىپ كەتپەۋگە كومەكتەسكەن. بۇل وتباسى ٶز فەرمالارىندا جۇمىس ىستەپ، كۇندەرىن كورىپ جۇرگەن ەدى. كەيىن قارۋلانعان ٴبىر توبىر ادام كەلىپ، ولاردىڭ يەلىكتەرىن تارتىپ الىپ، وزدەرىن قۋىپ جىبەردى. وتاعاسى ميگەل بىلاي دەيدى: «قازىر ٴبىز بىرەۋدەن ۋاقىتشا الا تۇرعان الاقانداي جەرىمىزدى وڭدەپ، سودان كۇن كورىپ وتىرمىز. مەن كۇنىگە تاڭەرتەڭ ەحوباعا دۇعا ەتىپ، بۇگىنگى قاجەتىمىزدى بەرە كور دەپ سۇرايمىن». جاعدايلارى قيىن بولسا دا بۇل وتباسى قاۋىم كەزدەسۋلەرىنەن قالمايدى، جۇيەلى تۇردە قىزمەتكە شىعادى. ويتكەنى ەحوبا ٵر كۇنى قامدارىن ويلايتىنىنا ولار تولىق سەنەدى.
5 ٴيا، راسىندا دا پاتشالىقتى ٴبىرىنشى ورىنعا قويىپ جۇرگەن بۇل وتباسىن ەحوبا ەشقاشان تاستاعان ەمەس. ميگەل مەن ايەلى يۋراي ەحوبا ولارعا قالاي كومەكتەسىپ جاتقانىنا بار نازارلارىن اۋداردى. مىسالى، ەحوبا باۋىرلاستار ارقىلى ولارعا ازداپ قارجىلاي كومەكتەستى جانە ميگەلگە جۇمىس تاۋىپ بەردى. تاعى بىردە ەحوبا فيليال ارقىلى كومەك كورسەتىپ، ولاردى نەگىزگى قاجەتتەرىمەن قامدادى. ەحوبا ميگەلدىڭ وتباسىن بىردە-ٴبىر ساتكە تاستامادى. وسىنىڭ ارقاسىندا ولاردىڭ سەنىمى بەرىك بولا ٴتۇستى. ۇلكەن قىزدارى يوسەلين بىلاي دەيدى: «ەحوبانىڭ قولىن انىق كورۋ جۇرەككە قاتتى اسەر ەتەدى ەكەن. قازىر مەن ونى بۇكىل ٶمىرىمدى اماناتتاي الاتىن دوسىم دەپ بىلەمىن. وتباسىمىزدىڭ باسىنان وتكەن بۇل سىناقتار ٴبىزدى الدا بولاتىن ۇلكەن سىناقتارعا دايىندادى».
6. قارجىلاي قيىندىق كورگەندە سەنىمىڭىزدى قالاي نىعايتا الاسىز؟
6 ٴسىز دە قارجىلاي قيىندىق كورىپ ٴجۇرسىز بە؟ وندا، بۇل سىزگە وڭاي تيمەي جاتقان شىعار. ٴبىراق ٴسىز وسى قيىن جاعدايدا سەنىمىڭىزدى نىعايتا الاسىز. دۇعا ەتكەن سوڭ، يسانىڭ ماتاي 6:25—34 تارماقتاردا جازىلعان سوزدەرىن وقىپ، وي جۇگىرتىڭىز. سونداي-اق بۇگىندە تەوكراتيالىق ىستەردەن قولى بوساماي جۇرگەن باۋىرلاستاردى ەحوبا قالاي قامقورلاپ جاتقانى جايلى ويلانىڭىز (قور. 1-ح. 15:58). سوندا كوكتەگى اكەمىز ٴسىزدىڭ دە قامىڭىزدى ويلايتىنىنا سەنىمىڭىز نىعايادى. ول سىزگە نە قاجەت ەكەنىن جانە سول قاجەتىڭىزدى قالاي بەرۋ كەرەكتىگىن دە جاقسى بىلەدى. ومىرىڭىزدە ەحوبانىڭ قولىن كورگەن سايىن، سەنىمىڭىز ارتادى. سونىڭ ارقاسىندا الداعى بۇدان دا ۇلكەن سىناقتارعا دايىن بولاسىز (ابق. 3:17، 18).
«سۇراپىل داۋىلعا» توتەپ بەرەتىن سەنىم
ٴسەنىمىمىز مىقتى بولسا، ٴبىز كادىمگى دە، بەينەلى دە «سۇراپىل داۋىلعا» توتەپ بەرەمىز (7—11-ابزاستاردى قاراڭىز)
7. ماتاي 8:23—26-تارماقتاردا ايتىلعانداي، شاكىرتتەردىڭ سەنىمى «سۇراپىل داۋىلدا» قالاي سىنالدى؟
7 يسا شاكىرتتەرىنىڭ سەنىمدەرىن قاي جاعىنان نىعايتۋ كەرەكتىگىن كورسەتكەن تاعى ٴبىر جاعدايدى الايىق. ولار قايىقپەن كەتىپ بارا جاتقاندا، كەنەت تەڭىزدە سۇراپىل داۋىل كوتەرىلەدى (ماتاي 8:23—26 وقىڭىز). تولقىندار قايىقتى سوققىلاپ، ٸشى سۋعا تولا باستايدى. يسا بۇل كەزدە ۇيىقتاپ جاتقان ەدى. شاكىرتتەردىڭ قورقىپ كەتكەندەرى سونشا، يسانى وياتىپ: «ٴبىزدى قۇتقارا كورىڭىز!»— دەپ ايقايلايدى. سوندا يسا: «نەگە سونشا قورقاسىڭدار، سەنىمى ازدار-اۋ!»— دەپ ولاردى جۇمساق تۇردە تۇزەتەدى. شاكىرتتەر ەحوبا ٷشىن يسانى جانە ونىڭ قاسىنداعىلاردى امان ساقتاۋ تۇك ەمەس ەكەنىن تۇسىنۋلەرى كەرەك ەدى. ٴبىز بۇدان قانداي ساباق الامىز؟ سەنىمىمىز مىقتى بولسا، كادىمگى داۋىل نەمەسە بەينەلى داۋىل بولسىن، كەز كەلگەن سىناقتا تايسالماي بەرىك تۇرامىز.
8، 9. انەلدىڭ سەنىمى قالاي سىنالدى جانە وعان نە كومەكتەستى؟
8 پۋەرتو-ريكودا تۇراتىن انەل دەگەن سالتباستى باۋىرلاسىمىز سەنىمىن نىعايتقان ٴبىر سىناققا كەزىكتى. ول تۋرا ماعىناداعى «سۇراپىل داۋىلدى» باستان وتكەردى. 2017-جىلى «ماريا» داۋىلىنىڭ كەسىرىنەن ول ۇيىنەن دە، جۇمىسىنان دا ايىرىلىپ قالدى. انەل بىلاي دەيدى: «سول كەزدە ۋايىم باسىپ، مەن قاتتى ابىرجىدىم. ٴبىراق ەحوباعا دۇعا ەتىپ، وعان ارقا سۇيەۋدى ۇيرەندىم. سونىڭ ارقاسىندا ۋايىمعا ٶزىمدى جەگىزبەي، قايتا ٸس-ارەكەتكە كوشتىم».
9 انەلدىڭ ايتۋىنشا، قيىنشىلىققا توتەپ بەرۋگە كومەكتەسكەن تاعى ٴبىر جايت — ۇيىمعا مويىنسۇنعانى ەكەن. «ٷيىمنىڭ نۇسقاۋلارىنا مويىنسۇنعاندىقتان، سابىر ساقتاي الدىم. باۋىرلاستار رۋحاني دا، ماتەريالدىق تا كومەك كورسەتكەندە، ەحوبانىڭ قامقورلىعىن سەزىندىم. ەحوبا ماعان سۇراعانىمنان الدەقايدا كوپ بەردى. وسىلاي سەنىمىم بولاتتاي بەرىك بولا ٴتۇستى»،— دەيدى ول.
10. «سۇراپىل داۋىل» تونگەندە، نە ىستەسەڭىز بولادى؟
10 ٴسىزدىڭ ومىرىڭىزدە دە «سۇراپىل داۋىل» بولىپ جاتىر ما؟ بالكىم، ٴسىز جاقتا تابيعي اپات ورىن العان شىعار. نەمەسە اۋىر دەرتكە شالدىعىپ، بەينەلى داۋىلدى باستان وتكەرىپ جاتقان شىعارسىز. سونىن كەسىرىنەن ەڭسەڭىز ەزىلىپ، نە شارا قولدانۋدى بىلمەي جۇرگەن شىعارسىز. مۇندايدا ەحوباعا ارقا سۇيەۋدى ۇمىتىپ كەتپەڭىز. وعان شىن بەرىلە دۇعا ەتىڭىز. بۇعان دەيىن ەحوبا كومەكتەسكەن جاعدايلاردى ەسكە الىپ، سەنىمىڭىزدى نىعايتىڭىز (ٴزاب. 77:11، 12). ول ٴسىزدى بۇگىن دە، ەرتەڭ دە جالعىز قالدىرمايدى.
11. باسشىلىقتى قولعا العاندارعا مويىنسۇنۋعا نەگە ىقىلاستى بولۋىمىز كەرەك؟
11 سىناققا توتەپ بەرۋگە تاعى نە كومەكتەسەدى؟ انەل ايتىپ كەتكەندەي — مويىنسۇنۋ. ەحوبا مەن يسا سەنىم ارتاتىن ادامدارعا ٴبىز دە سەنىم ارتىپ ۇيرەنەيىك. ارامىزدا باسشىلىقتى قولعا العاندار كەيدە اقىلعا قونبايتىنداي كورىنەتىن شەشىمدەر قابىلداۋى مۇمكىن. الايدا ەحوبا مويىنسۇناتىن جاندارعا باتاسىن بەرەدى. كيەلى كىتاپتان جانە ادال باۋىرلاستارىمىزدىڭ مىسالدارىنان كورەتىنىمىزدەي، مويىنسۇنساق، ٶمىرىمىزدى ساقتايمىز (مۇس. 2-ج. 14:1—4؛ شەج. 2-ج. 20:17). سونداي مىسالدارعا وي جۇگىرتەيىك. سوندا ٷيىمنىڭ قازىرگى دە، ەرتەڭگى دە نۇسقاۋلارىن قولداۋعا دەگەن ىقىلاسىمىز ارتا تۇسەدى (ەۆر. 13:17). سونداي-اق بولاشاقتا بولاتىن بۇدان دا ۇلكەن «داۋىلدان» قورىقپايتىن بولامىز (ناق. س. 3:25).
ادىلەتسىزدىككە توتەپ بەرەتىن سەنىم
تاباندى تۇردە دۇعا ايتساق، سەنىمىمىز كۇشەيەدى (12-ابزاستى قاراڭىز)
12. لۇقا 18:1—8-تارماقتاردان كورىنەتىندەي، ادىلەتسىزدىككە كەزىككەندە، سەنىم قالاي كومەكتەسەدى؟
12 يسا شاكىرتتەرى ادىلەتسىزدىككە كەزىككەندە، سەنىمدەرى سىنالاتىنىن بىلگەن. ادىلەتسىزدىككە توتەپ بەرە الۋلارى ٷشىن، يسا ولارعا ٴبىر جەسىر ايەل تۋرالى مىسال ايتىپ بەردى. جەسىر ايەل ادىلدىك ورناتۋىن سۇراپ، قالاداعى بيدىڭ الدىنا قايتا-قايتا بارادى. ويتكەنى ول تاباندىلىقپەن سۇراي بەرسە، بي وتىنىشىنە قۇلاق اساتىنىنا سەنىمدى بولدى. بيدىڭ ٶزى ادىلەتسىز كىسى بولسا دا، اقىرىندا جەسىر ايەلدىڭ ٶتىنىشىن ورىندايدى. بۇل مىسالدان نە تۇسىنەمىز؟ بيدەن ايىرماشىلىعى، ەحوبا — ٵدىل قۇداي. «ولاي بولسا،...قۇداي ٶزى تاڭداپ العان ٵرى وزىنە كۇنى-ٴتۇنى جالبارىنىپ جۇرگەن ادامدارى ٷشىن قالايشا ادىلدىك ورناتپايدى؟»— دەدى يسا (لۇقا 18:1—8 وقىڭىز). سوسىن: «ادام ۇلى كەلگەندە، جەر بەتىنەن وسىنداي سەنىم تابار ما ەكەن؟»— دەپ قوستى. ٴبىز دە ادىلەتسىزدىك كورگەندە شىدامدىلىق پەن تاباندىلىق تانىتىپ، سەنىمىمىز جەسىر ايەلدىكىندەي مىقتى ەكەنىن دالەلدەۋىمىز كەرەك. سەنىمىمىز وسىنداي مىقتى بولسا، ەحوبا ەرتەلى-كەش ادىلدىك ورناتاتىنىنا كۇماندانبايمىز. ٴبىز سونداي-اق دۇعانىڭ كۇشىنە دە سەنۋىمىز كەرەك. كەيدە ٴبىز دۇعامىزعا ٶزىمىز كۇتپەگەن جولمەن جاۋاپ الۋىمىز مۇمكىن.
13. ادىلەتسىزدىك كورگەن ٴبىر وتباسىنا دۇعا قالاي كومەكتەستى؟
13 كونگو دەموكراتيالىق رەسپۋبليكاسىندا تۇراتىن ۆەرو دەگەن ايەل باۋىرلاسىمىزدىڭ وقيعاسىن الايىق. اۋىلدارىنا ٴبىر اسكەري توپ شابۋىلداعاندىقتان، ۆەرو مەن كۇيەۋىنە جانە 15 جاسار قىزىنا قاشۋعا تۋرا كەلەدى. ٴبىراق جولدا ٴبىر پوستتا ساربازدار ۇستاپ الىپ، ولاردى ولتىرەمىز دەپ قورقىتادى. سول كەزدە ۆەرو جىلاي باستايدى. قىزى ونى جۇباتۋ ٷشىن، ەحوبانىڭ ەسىمىن قايتا-قايتا اتاپ، داۋىستاپ دۇعا ەتەدى. ول دۇعا ەتىپ بولعان سوڭ، اسكەري توپتىڭ كومانديرى ودان: «ساعان دۇعا ەتۋدى كىم ۇيرەتكەن؟»— دەپ سۇرايدى. ول: «انام ۇيرەتكەن. بۇل دۇعا ماتاي كىتابىنداعى ۇلگىلى دۇعادان الىنعان»،— دەيدى. سوندا كوماندير وعان: «بارا بەرىڭدەر، ەحوبا قۇدايلارىڭ ساقتاسىن!»— دەپ جاۋاپ بەرەدى.
14. سەنىمىمىز قالاي سىنالۋى مۇمكىن جانە وعان توتەپ بەرۋگە نە كومەكتەسەدى؟
14 جوعارىداعى وقيعا كورسەتەتىندەي، دۇعانىڭ ماڭىزى زور. الايدا ەحوبا ٵرقاشان دۇعالارىمىزعا دەرەۋ ٵرى جانتەبىرەنتەرلىك جولمەن جاۋاپ بەرمەۋى مۇمكىن. مۇندايدا ٴبىز يسانىڭ مىسالىنداعى ايەلدەن ۇلگى الىپ، ەحوباعا تاباندى تۇردە دۇعا ەتە بەرەيىك. ەحوبا ٴبىزدى تاستامايدى جانە ۋاقىتى كەلگەندە قانداي دا ٴبىر جولمەن جاۋاپ بەرەدى. سوندىقتان ودان كيەلى رۋحىن جالبارىنا سۇراي بەرەيىك (ٴفىلىپ. 4:13). سونداي-اق مىنانى ۇمىتپايىق: جاقىندا ەحوبا بىزگە باتاسىن ٷيىپ-توگىپ بەرەتىنى سونشا — بارلىق قيىندىقتارىمىز ۇمىت بولىپ، كەلمەسكە كەتەدى. ەحوبانىڭ كومەگىمەن قيىندىقتاردان ادال وتسەك، بولاشاقتاعى سىناقتاردا دا تايسالماي تۇرامىز (پەت. 1-ح. 1:6، 7).
اۋىر قيىندىققا توتەپ بەرەتىن سەنىم
15. ماتاي 17:19، 20 دا ايتىلعانداي، شاكىرتتەر قانداي قيىندىققا كەزىكتى؟
15 يسا شاكىرتتەرىنە سەنىمدەرى بولسا، كەز كەلگەن قيىندىقتى ەڭسەرە الاتىندارىن ايتقان (ماتاي 17:19، 20 وقىڭىز). ٴبىر جاعدايدا ولار ادامنىڭ بويىنان جىندى شىعارا الماي قالادى. نەلىكتەن؟ سەنىمدەرى از بولعاندىقتان. يسا ولارعا جەتەرلىكتەي سەنىمدەرى بولسا، تاۋداي كەدەرگىلەردەن وتە الاتىندارىن ايتتى. ٴبىز دە بۇگىندە تاۋداي قيىندىقتارعا كەزىگۋىمىز مۇمكىن.
ٴسەنىم اۋىر قايعىدا دا ەحوباعا بارىنشا قىزمەت ەتە بەرۋگە كومەكتەسەدى (16-ابزاستى قاراڭىز)
16. سەنىمنىڭ ارقاسىندا گەيدي اۋىر سىناققا قالاي توتەپ بەردى؟
16 گۆاتەمالادا تۇراتىن گەيدي دەگەن باۋىرلاسىمىزدىڭ وقيعاسىنا كوڭىل بۇرايىق. قاۋىمنان كەلە جاتقاندا بىرەۋلەر كۇيەۋى ەديدى ٶلتىرىپ كەتەدى. وسى اۋىر قايعىدا سەنىمى گەيديگە قالاي كومەكتەستى؟ ول بىلاي دەيدى: «مەن دۇعادا اۋىرتپالىعىمدى ەحوباعا ارتقاندىقتان، جانىم تىنىشتىق تاپتى. ەحوبا وتباسىم مەن قاۋىمداعى دوستارىم ارقىلى ماعان قارايلاستى. كوبىرەك قىزمەت ەتىپ جۇرگەندىكتەن، جانىمنىڭ سىزداپ اۋىرعانى ٴبىرشاما باسىلدى، ٵرى ەرتەڭگى كۇندى ۋايىمداماي، ٴبىر كۇننىڭ قامىمەن ٶمىر سۇرەتىن بولدىم. وسى جاعدايدان تۇسىنگەنىم، بولاشاقتا قانداي سىناققا كەزىكپەيىن، ەحوبانىڭ، يسانىڭ جانە ٷيىمنىڭ ارقاسىندا ٴبارىن دە ەڭسەرە الامىن».
17. تاۋداي قيىندىققا كەزىككەندە، نە ىستەسەك بولادى؟
17 جاقىن ادامىڭىزدان ايىرىلعاندىقتان، قايعىرىپ ٴجۇرسىز بە؟ ولاي بولسا، كيەلى كىتاپتان مارقۇمدار قايتا تىرىلگەن وقيعالاردى وقىپ، سەنىمىڭىزدى نىعايتىڭىز. الدە وتباسىڭىزداعى ٴبىر ادام قاۋىمنان شىعارىلعاندىقتان، مۇڭايىپ ٴجۇرسىز بە؟ ولاي بولسا، زەرتتەۋ جۇرگىزىپ، ەحوبانىڭ جونگە سالۋ شاراسى دۇرىس ەكەنىنە سەنىمىڭىزدى نىعايتىڭىز. باسىڭىزعا قانداي كۇن تۋماسىن، بۇنى سەنىمىڭىزدى كۇشەيتۋ ٷشىن پايدالانىڭىز. نە سەزىنىپ تۇرعانىڭىزدىڭ ٴبارىن ەحوباعا اشىپ ايتىڭىز. وقشاۋلانباي، باۋىرلاستارعا جاقىن بولىڭىز (ناق. س. 18:1). بالكىم، كەيبىر ىستەرمەن اينالىسقاندا، ەستەلىكتەر ويىڭىزعا كەلىپ، ٴبىر جىلاپ الاتىن شىعارسىز. ٴبىراق ول ىستەر قيىندىعىڭىزعا توتەپ بەرۋگە كومەكتەسسە، ولاردان باس تارتپاڭىز (ٴزاب. 126:5، 6). جۇيەلى تۇردە قاۋىمعا بارۋدى، قىزمەتكە شىعۋدى، كيەلى كىتاپتى وقۋدى دوعارماڭىز. ەحوبا سىزگە دايىنداپ وتىرعان باتالارعا نازار تىگىڭىز. وسىلاي ەحوبانىڭ قولىن كورگەن سايىن، سەنىمىڭىز كۇشەيە تۇسەدى.
«سەنىمىمىزدى نىعايتا كورىڭىز»
18. سەنىمىڭىزدىڭ وسال تۇسىن بايقاساڭىز، نە ىستەسەڭىز بولادى؟
18 وتكەن نەمەسە قازىرگى سىناقتاردا سەنىمىڭىزدىڭ وسال جەرلەرىن بايقاساڭىز، كوڭىلىڭىز تۇسپەسىن. وسى مۇمكىندىكتى پايدالانىپ، سەنىمىڭىزدى نىعايتا الاسىز. ول ٷشىن يسانىڭ ەلشىلەرى سياقتى «سەنىمىمدى نىعايتا كور» دەپ دۇعا ەتىڭىز (لۇقا 17:5). سونداي-اق وسى ماقالاداعى باۋىرلاستاردىڭ وقيعالارى جايلى وي جۇگىرتىڭىز. ميگەل مەن يۋراي سياقتى، ەحوبانىڭ كومەكتەسكەن كەزدەرىن ەشقاشان جادىڭىزدان شىعارماڭىز. ۆەرونىڭ قىزى جانە انەل سياقتى، اسىرەسە سىن ساعاتتاردا ەحوباعا شىن بەرىلە دۇعا ەتىڭىز. گەيديدىڭ جاعدايىنداعىداي، ەحوبا سىزگە دە وتباسىڭىز بەن دوستارىڭىز ارقىلى كومەكتەسە الادى. قازىرگى سىناقتاردا ەحوبانىڭ كومەگىن قابىل الساڭىز، الداعى كەز كەلگەن سىناقتا ول سىزگە كومەكتەسەتىنىنە سەنىمدى بولاسىز.
19. يسا نە نارسەگە سەنىمدى بولدى جانە ٴسىز نە نارسەگە سەنىمدى بولا الاسىز؟
19 يسا شاكىرتتەرىنە سەنىمدەرى از بولعانىن ايتسا دا، ولار ەحوبانىڭ كومەگىمەن الداعى سىناقتاردان ادال وتەتىندەرىنە ەش كۇماندانباعان (جوح. 14:1؛ 16:33). سونداي-اق مىقتى سەنىمنىڭ ارقاسىندا ۇلى جاماعات تا زور الاپاتتان امان وتەتىنىنە سەنىمدى بولعان (ايان 7:9، 14). ٴسىز سولاردىڭ اراسىندا بولاسىز با؟ ەحوبانىڭ راقىمىنىڭ ارقاسىندا بولا الاسىز! بۇل ٷشىن كەز كەلگەن مۇمكىندىكتى پايدالانىپ، سەنىمىڭىزدى قازىردەن نىعايتا بەرىڭىز! (ەۆر. 10:39).
118-ٵن «سەنىمىمىزدى نىعايتا كور»
^ 5-ابزاس وسى زاماننىڭ سوڭى كەلگەنىن ٴبارىمىز اسىعا كۇتىپ ٴجۇرمىز. دەگەنمەن «سەنىمىم مىقتى بولىپ، سول كەزەڭنەن ادال وتەر مە ەكەنمىن» دەپ ۋايىمدايتىن شىعارمىز. وسى ماقالادا سەنىمىمىزدى كۇشەيتەتىن اقىل-كەڭەستەر مەن باۋىرلاستاردىڭ وقيعالارىن وقىپ بىلەمىز.
