49-زەرتتەۋ ماقالاسى
قايتا ٴتىرىلۋدىڭ بولاتىنىنا كامىل سەنەمىز!
«قۇدايدىڭ ادىلدەردى دە، ادىلەتسىزدەردى دە قايتا تىرىلتەتىنىنە ۇمىتتەنەمىن» (ەل. ٸس. 24:15).
151-ٵن ول شاقىرادى
اڭداتپا *
1، 2. ەحوبانىڭ قىزمەتشىلەرىنىڭ قانداي تاماشا ٷمىتى بار؟
ٷمىتتىڭ بولعانى وتە ماڭىزدى. كەيبىر ادامدار باقىتتى نەكە قۇرامىن، دەنساۋلىعى مىقتى بالا وسىرەمىن نەمەسە اۋرۋىمنان ايىعامىن دەپ ۇمىتتەنەدى. بۇنداي قالاۋلار ماسىحشىلەردە دە بار. ٴبىراق ٴبىزدىڭ ارقالاپ جۇرگەن ٷمىتىمىز الدەقايدا زور: ٴبىز بولاشاقتا ماڭگى ٶمىر ٴسۇرۋدى جانە ومىردەن وتكەن جاقىندارىمىزدى قايتادان كورۋدى ٷمىت ەتەمىز.
2 ەلشى پاۋىل: «قۇدايدىڭ ادىلدەردى دە، ادىلەتسىزدەردى دە قايتا تىرىلتەتىنىنە ۇمىتتەنەمىن»،— دەگەن (ەل. ٸس. 24:15). پاۋىل — قايتا ٴتىرىلۋ ٷمىتى جايلى ايتقان العاشقى ادام ەمەس. بۇل جايلى اۋلەتباسى ٵيۇپ تە ايتقان. ول قۇدايدىڭ ونى ۇمىتپايتىنىنا جانە وعان قايتادان ٶمىر سيلايتىنىنا كامىل سەنگەن (ٵيۇپ 14:7—10، 12—15).
3. قورىنتتىقتارعا ارنالعان 1-حات 15-تاراۋدى قاراستىرعانىمىز نەلىكتەن ٴبىز ٷشىن پايدالى؟
3 «ولگەندەردىڭ قايتا ٴتىرىلۋى» — ماسىحشىلەر سەنەتىن نەگىزگى ىلىمدەردىڭ، ياعني «باستاپقى ىلىمدەردىڭ» ٴبىرى (ەۆر. 6:1، 2). پاۋىل قورىنتتىقتارعا ارنالعان 1-حات 15-تاراۋدا قايتا تىرىلۋگە قاتىستى جازعان. ونىڭ جازعاندارى I عاسىرداعى ماسىحشىلەردى نىعايتقانى ٴسوزسىز. قايتا تىرىلۋگە ۇمىتتەنىپ جۇرگەنىڭىزگە قانشا جىل بولماسىن، قورىنتتىقتارعا ارنالعان 1-حات 15-تاراۋ ٴسىزدى دە نىعايتىپ، ٷمىتىڭىزدى جالىنداتادى.
4. ومىردەن وتكەن جاقىندارىمىزدىڭ قايتا تىرىلەتىنىنە دەگەن ٷمىتىمىزدىڭ قازىعى نە؟
4 يسا ٴماسىحتىڭ قايتا تىرىلگەنى — ومىردەن وتكەن جاقىندارىمىزدىڭ قايتا تىرىلەتىنىنە دەگەن ٷمىتىمىزدىڭ قازىعى. يسا ٴماسىحتىڭ قايتا ٴتىرىلۋى پاۋىل قورىنتتىقتارعا ۋاعىزداعان «ىزگى حاباردىڭ» ٴبىر بولىگى بولعان (قور. 1-ح. 15:1، 2). پاۋىلدىڭ ايتۋىنشا، ەگەر ٴماسىحشى يسانىڭ قايتا تىرىلۋىنە سەنبەيتىن بولسا، ونىڭ سەنىمى ەش پايداسىز بولماق ەدى (قور. 1-ح. 15:17). ٴيا، يسانىڭ قايتا ٴتىرىلۋى — ٴبىزدىڭ ٷمىتىمىزدىڭ نەگىزى.
5، 6. قورىنتتىقتارعا 1-حات 15:3، 4 تەگى سوزدەردىڭ ٴبىز ٷشىن قانداي ٴمانى بار؟
5 پاۋىل قايتا ٴتىرىلۋ جايلى جازىپ باستاعان كەزدە، ٷش شىندىققا نازار اۋداردى. 1) «ٴماسىح ٴبىزدىڭ كۇنالارىمىز ٷشىن ٶلدى». 2) «جازبالاردا ايتىلعانداي، جەرلەندى». 3) ول «ٷشىنشى كۇنى قايتا ٴتىرىلدى» (قورىنتتىقتارعا 1-حات 15:3، 4 وقىڭىز).
6 يسانىڭ ولگەنىنىڭ، جەرلەنگەنىنىڭ جانە قايتا تىرىلگەنىنىڭ ٴبىز ٷشىن قانداي ٴمانى بار؟ يشايا پايعامبار ماسىحكە قاتىستى «ول تىرىلەردىڭ جەرىنەن الاستاتىلدى»، «زۇلىمدارمەن بىرگە ٶلدى»، وعان «قابىر بەرىلدى» دەپ پايعامبارلىق ەتكەن. ودان دا ماڭىزدىسى، يشايا پايعامبار ٴماسىح «كوپشىلىكتىڭ كۇناسىن ٶز موينىنا الاتىنىن» ايتقان. يسا مۇنى ٴبىزدى ولىمنەن ازات ەتەتىن تولەم قۇرباندىعىن ۇسىنۋ ارقىلى ىستەدى (يشايا 53:8، 9، 12؛ مات. 20:28؛ ريم. 5:8). ەندەشە، يسانىڭ ولگەنى، جەرلەنگەنى جانە قايتا تىرىلگەنى — ٴبىزدىڭ كۇنا مەن ولىمنەن ازات بولاتىنىمىزعا جانە ومىردەن وتكەن جاقىندارىمىزبەن قايتا قاۋىشاتىنىمىزعا دەگەن ٷمىتىمىزدىڭ مىزعىماس تىرەگى.
يسانىڭ تىرىلگەنىن كوپتەگەن كۋاگەرلەر راستادى
7، 8. ماسىحشىلەرگە يسانىڭ قايتا تىرىلگەنىنە سەنىمدى بولۋعا نە كومەكتەسەدى؟
7 ٴبىزدىڭ قايتا تىرىلۋگە دەگەن ٷمىتىمىز يسانىڭ قايتا تىرىلگەنىمەن تىعىز بايلانىستى. سوندىقتان ٴبىز يسانىڭ قايتا تىرىلگەنىنە نىق سەنۋىمىز كەرەك. ەحوبانىڭ يسانى قايتا تىرىلتكەنىنە نەلىكتەن تولىقتاي سەنىمدى بولا الامىز؟
8 يسانىڭ قايتا تىرىلگەنىنە كوپ ادام كۋا بولعان (قور. 1-ح. 15:5—7). پاۋىل اتاپ وتكەن كۋاگەرلەردىڭ اراسىندا ٴبىرىنشى بولىپ ەلشى پەتىر (كەفا) اتالعان. پەتىردىڭ قايتا تىرىلگەن يسانى كورگەنىن ٴبىر توپ شاكىرت راستاعان (لۇقا 24:33، 34). قايتا تىرىلگەن يسانى «ون ەكى ەلشى» دە كوردى. كەيىن ٴماسىح «ٴبىر مەزگىلدە 500 دەن اسا باۋىرلاسقا كورىندى». ماتاي 28:16—20 تارماقتاردا عاليلەيادا بولعان وسى قۋانىشتى وقيعا جايلى ايتىلسا كەرەك. يسا «سونان سوڭ جاقىپقا»، ياعني ٶزىنىڭ ٴماسىح ەكەنىنە سەنبەگەن ىنىسىنە كورىندى (جوح. 7:5). جاقىپ يسانىڭ قايتا تىرىلگەنىن كورگەندە، ونىڭ ٴماسىح ەكەنىنە كوزى جەتتى. كوڭىل قويارلىق ٴبىر جايت، شامامەن ب.ز. 55-جىلى پاۋىل وسى حاتىن جازعان كەزدە، يسانىڭ قايتا تىرىلگەنىن كورگەن كۋاگەرلەردىڭ كوبىسى ٴتىرى بولعان. سوندىقتان يسانىڭ قايتا تىرىلگەنىنە كۇماندانعان كەز كەلگەن ادام وسى سەنىمدى كۋاگەرلەرمەن سويلەسە الاتىن.
9. ەلشىلەردىڭ ىستەرى 9:3—5 تارماقتارداعى پاۋىلمەن بولعان قانداي جاعداي يسانىڭ قايتا تىرىلگەنىن ودان سايىن دالەلدەي ٴتۇستى؟
9 كەيىن قايتا تىرىلگەن يسا پاۋىلدىڭ وزىنە كورىندى (قور. 1-ح. 15:8). پاۋىل (ساۋل) داماسكىگە بارا جاتقان جولدا ايان ارقىلى كوكتەگى داڭققا بولەنگەن يسانى كوردى جانە ونىڭ داۋسىن ەستىدى (ەلشىلەردىڭ ىستەرى 9:3—5 وقىڭىز). پاۋىلمەن بولعان بۇل جاعداي يسانىڭ قايتا تىرىلگەنى ەشقانداي دا اڭىز ەمەس ەكەنىن ودان سايىن دالەلدەي ٴتۇستى (ەل. ٸس. 26:12—15).
10. يسانىڭ قايتا تىرىلگەنىنە كوزى جەتكەن پاۋىل نە نارسەگە دايىن بولدى؟
10 پاۋىل كەزىندە ماسىحشىلەردى قۋدالاعاندىقتان، ونىڭ ايتقاندارى كەيبىر ادامداردى تاڭعالدىرعان شىعار. يسانىڭ قايتا تىرىلگەنىنە كوزى جەتكەن پاۋىل وزگەلەردىڭ دە وسى شىندىققا كوزىن جەتكىزۋ ٷشىن كوپ ەڭبەك ەتتى. ول ادامدارعا يسانىڭ ٶلىپ، قايتا تىرىلگەنى جايلى شىندىقتى جاريالاعان كەزدە، تالاي تاياق جەدى، تۇرمەگە قامالدى جانە كەمە اپاتىنا ۇشىرادى (قور. 1-ح. 15:9—11؛ قور. 2-ح. 11:23—27). پاۋىل يسانىڭ قايتا تىرىلگەنىنە سەنىمدى بولعانى سونشا — ٶزىنىڭ سەنىمىن قورعاۋ ٷشىن ولۋگە دايىن بولدى. ەرتەدەگى ماسىحشىلەردىڭ يسانىڭ قايتا تىرىلگەنىن راستاعانى ٴسىزدىڭ دە بۇعان كوزىڭىزدى جەتكىزەدى ەمەس پە؟! سونداي-اق قايتا تىرىلۋگە دەگەن سەنىمىڭىزدى دە قايرايدى، سولاي عوي؟
پاۋىل قاتە كوزقاراستاردى تۇزەدى
11. قورىنتتاعى كەيبىر ماسىحشىلەر نەلىكتەن قايتا تىرىلۋگە قاتىستى قاتە كوزقاراستا بولعان بولۋى مۇمكىن؟
11 گرەكتەردىڭ قورىنت قالاسىندا كەيبىر ماسىحشىلەر قايتا تىرىلۋگە قاتىستى قاتە كوزقاراستا بولعان. كەيبىرەۋلەر ٴتىپتى: «ولگەندەر قايتا تىرىلمەيدى»،— دەگەن. ولاردىڭ بۇنداي كوزقاراستا بولۋىنا نە سەبەپ بولعان بولۋى مۇمكىن؟ (قور. 1-ح. 15:12). گرەكتەردىڭ افينا دەگەن تاعى ٴبىر قالاسىندا ٴپالساپاشىلار «يسا قايتا ٴتىرىلدى» دەگەن ٸلىمدى مازاق ەتكەن. بۇنداي كوزقاراس قورىنتتاعى كەيبىر ادامدارعا، ٴتىپتى قاۋىمداعى كەيبىر ماسىحشىلەرگە اسەر ەتكەن بولۋى مۇمكىن (ەل. ٸس. 17:18، 31، 32). ال تاعى بىرەۋلەر قايتا ٴتىرىلۋدى بەينەلى ماعىنادا ٴتۇسىنىپ، ادام كۇناكار كەزىندە «ٶلى» سانالىپ، ٴماسىحشى بولعاندا «قايتا تىرىلەدى» دەپ ويلاعان بولۋى مۇمكىن. سەبەپتەرى قانداي بولماسىن، قايتا ٴتىرىلۋدى مويىنداماۋ يسانىڭ قايتا تىرىلگەنىنە سەنبەۋدى ٴبىلدىردى. مۇندايدا ولاردىڭ سەنىمى ەش پايداسىز بولماق ەدى. ەگەر قۇداي يسانى قايتا تىرىلتپەگەن بولسا، وندا تولەم ۇسىنىلماي، بۇكىل ادامزات سول كۇيى كۇناكار بولىپ قالدى دەگەن ٴسوز ەدى. سوندىقتان قايتا ٴتىرىلۋدى مويىنداماعانداردىڭ شىنايى ٷمىتى بولمادى (قور. 1-ح. 15:13—19؛ ەۆر. 9:12، 14).
12. پەتىردىڭ 1-حاتى 3:18، 22 گە ساي، يسانىڭ قايتا ٴتىرىلۋى وعان دەيىنگى بولعان قايتا تىرىلۋلەردەن نەسىمەن ەرەكشە بولدى؟
12 ٴماسىحتىڭ ولىمنەن قايتا تىرىلگەنىن پاۋىل ٶز كوزىمەن كوردى. بۇل قايتا ٴتىرىلۋ بۇعان دەيىنگى قايتا تىرىلۋلەردەن الدەقايدا ەرەكشە بولدى. ويتكەنى يساعا دەيىنگى تىرىلگەن ادامدار قايتادان ومىردەن وتكەن ەدى. پاۋىل يسانىڭ «ٶلىم ۇيقىسىنداعىلاردىڭ العاشقىسى بولىپ تىرىلگەنىن» ايتقان. بۇل نەنى ٴبىلدىردى؟ يسا رۋحاني تۇلعا بولىپ ٴتىرىلىپ، ادامداردىڭ اراسىنان كوككە كوتەرىلگەن العاشقى ادام بولدى (قور. 1-ح. 15:20؛ ەل. ٸس. 26:23؛ پەتىردىڭ 1-حاتى 3:18، 22 وقىڭىز).
تىرىلەتىندەردىڭ قاتارىنا جاتاتىندار
13. پاۋىل ادام اتا مەن يسا ماسىحكە قاتىستى قانداي ايىرماشىلىققا نازار اۋداردى؟
13 قالايشا ٴبىر ادامنىڭ ٶلىمى ميلليونداعان ادامعا ٶمىر دارىتا الادى؟ پاۋىل بۇل سۇراققا ناقتى جاۋاپ بەرگەن. ول ادام اتا مەن يسا ٴماسىح ادامزاتتىڭ بولاشاعىنا قالاي اسەر ەتكەنىنە قاتىستى ٴبىر ايىرماشىلىققا نازار اۋداردى. ادام اتاعا قاتىستى پاۋىل: «ٶلىم ادام ارقىلى كەلدى»،— دەپ جازعان. ادام اتا كۇنا جاساعان كەزدە، ٶزىن دە، ۇرپاعىن دا ولىمگە دۋشار ەتتى. ونىڭ مويىنسۇنباۋشىلىعىنىڭ اشتى زاردابىن ٴبىز ٵلى دە تارتىپ كەلەمىز. ٴبىراق قۇداي ۇلىنىڭ قايتا تىرىلگەنىنىڭ ارقاسىندا ولگەندەر قايتادان ٶمىر سۇرەتىن بولادى. پاۋىل «قايتا ٴتىرىلۋ دە ادام ارقىلى» ياعني يسا ارقىلى بولاتىنىن ايتقان. سوسىن ول: «ادام اتامەن بايلانىستاعىلاردىڭ ٴبارى ولەتىنىندەي، ماسىحپەن بايلانىستاعىلاردىڭ ٴبارى تىرىلەدى»،— دەگەن (قور. 1-ح. 15:21، 22).
14. ادام اتا تىرىلە مە؟ ٴتۇسىندىرىڭىز.
14 پاۋىل «ادام اتامەن بايلانىستاعىلاردىڭ ٴبارى ولەدى» دەۋىمەن نە ايتقىسى كەلدى؟ ول ادام اتادان كۇنا مەن كەمەلسىزدىكتى مۇرا ەتىپ، سونىڭ سالدارىنان ولەتىن بۇكىل ادامزاتتى ايتقان (ريم. 5:12). «تىرىلەتىندەردىڭ» قاتارىندا ادام اتا بولمايدى. ول يسا ٴماسىحتىڭ تولەم قۇرباندىعىنىڭ يگىلىگىن كورمەيدى، ويتكەنى ول كەمەلدى ادام بولعان، ٵرى قۇدايعا سانالى تۇردە مويىنسۇنباعان. بولاشاقتا «ادام ۇلى» «سەركەلەر» دەپ تاباتىن ادامداردىڭ ماڭگىلىككە جويىلاتىنى سياقتى، ادام اتا دا ماڭگىلىككە جويىلدى (مات. 25:31—33، 46؛ ەۆر. 5:9).
يسا كوكتەگى ومىرگە قايتا تىرىلگەندەردىڭ العاشقىسى بولدى (15، 16-ابزاستى قاراڭىز) *
15. پاۋىلدىڭ «ٴبارى تىرىلەدى» دەگەن سوزدەرى كىمدەردى قامتيدى؟
15 بايقاساق، پاۋىل: «ماسىحپەن بايلانىستاعىلاردىڭ ٴبارى تىرىلەدى»،— دەگەن (قور. 1-ح. 15:22). پاۋىل بۇل حاتىن قورىنتتاعى مايلانعاندارعا، ياعني كوكتەگى ومىرگە تىرىلەتىن ماسىحشىلەرگە جازدى. «ٴماسىح يسامەن بايلانىستاعى» بۇل ماسىحشىلەر «قاسيەتتى ەتىلگەن» جانە «قاسيەتتى بولۋعا شاقىرىلعان» ەدى. پاۋىل «ٴماسىحتىڭ شاكىرتى رەتىندە ٶلىم ۇيقىسىنا كەتكەندەر» جايلى دا ايتتى (قور. 1-ح. 1:2؛ 15:18؛ قور. 2-ح. 5:17). باسقا ٴبىر حاتىندا ول: «ٴماسىح سياقتى ولسەك، وندا سول سياقتى قايتا تىرىلەتىنىمىز دە ٴسوزسىز، وسىلاي ونىمەن بىرلىكتە بولامىز»،— دەپ جازدى (ريم. 6:3—5). يسا رۋحاني تۇلعا رەتىندە ٴتىرىلىپ، كوككە كوتەرىلگەن ەدى. دەمەك، ٴماسىحتىڭ كيەلى رۋحپەن مايلانعان شاكىرتتەرىنىڭ بارىمەن دە تۋرا سولاي بولادى.
16. پاۋىل يسانى «العاشقىسى» دەپ اتاۋىمەن نە نارسەگە مەڭزەدى؟
16 پاۋىل «ٴماسىحتىڭ ٶلىم ۇيقىسىنداعىلاردىڭ العاشقىسى بولىپ تىرىلگەنىن» جازعان. مىنانى ۇمىتپايىق: ەلازار سياقتى قايتا تىرىلگەن باسقا ادامدار جەردەگى ومىرگە ٴتىرىلدى. ال يسا ولىمنەن رۋحاني تۇلعا بولۋ ٷشىن جانە ماڭگىلىك ٶمىر ٴسۇرۋ ٷشىن تىرىلگەن ەڭ العاشقى ادام بولدى. سونداي-اق پاۋىل يسانى «العاشقىسى» دەپ اتاۋىمەن كەيىن وزگەلەر دە كوكتەگى ومىرگە تىرىلەتىنىنە مەڭزەدى. ۋاقىتى كەلگەندە، ەلشىلەر مەن ٴماسىحتىڭ كيەلى رۋحپەن مايلانعان وزگە دە شاكىرتتەرى يسا سياقتى كوكتەگى ومىرگە قايتا تىرىلمەك ەدى.
17. ٴماسىحتىڭ كيەلى رۋحپەن مايلانعان شاكىرتتەرى كوكتەگى سيلارىن قاشان الماق ەدى؟
17 پاۋىل قورىنتتىقتارعا ارناپ حات جازىپ جاتقان كەزدە، ٴماسىحتىڭ كيەلى رۋحپەن مايلانعان شاكىرتتەرىنىڭ كوكتەگى ومىرگە ٴتىرىلۋى ٵلى باستالماعان ەدى. پاۋىل بۇنىڭ بولاشاقتا بولاتىنىنا نۇسقاپ: «بارلىعى ٶز كەزەگىمەن: العاشقىسى — ٴماسىح، سوسىن ٴماسىح وسىندا بولاتىن كەزدە ونىڭ مەنشىگىندەگىلەر تىرىلەدى»،— دەگەن (قور. 1-ح. 15:23؛ سال. 1-ح. 4:15، 16). بۇگىندە ٴبىز الدىن الا ايتىلىپ كەتكەن «ٴماسىح وسىندا بولاتىن كەزدە» ٶمىر ٴسۇرىپ جاتىرمىز. دەمەك، ومىردەن وتكەن ەلشىلەر مەن وزگە دە كيەلى رۋحپەن مايلانعان ماسىحشىلەرگە كوكتەگى سيلارىن الۋ ٷشىن ٵرى يسا سياقتى قايتا ٴتىرىلىپ، ونىمەن بىرلىكتە بولۋ ٷشىن، ونىڭ وسىندا بولاتىن كەزىن كۇتۋ كەرەك بولدى.
ٷمىتىڭىز ٴسوزسىز اقتالادى!
18. ا) نەگە ٴبىز كوكتەگى ومىرگە قايتا تىرىلۋدەن كەيىن تاعى ٴبىر قايتا ٴتىرىلۋ بولادى دەپ تۇجىرىمداي الامىز؟ ٵ) قورىنتتىقتارعا 1-حات 15:24—26 تارماقتاردان كورىنەتىندەي، كوكتە قانداي جاعدايلار ورىن الادى؟
18 كيەلى كىتاپتا پاۋىل مەن وزگە دە كوككە باراتىن ادامدار «ٴبىرىنشى بولىپ قايتا تىرىلەتىندەر» دەپ اتالعان (ٴفىلىپ. 3:11). بۇل سوزدەر كەيىن تاعى ٴبىر قايتا ٴتىرىلۋدىڭ بولاتىنىنا نۇسقايدى. ٵيۇپتىڭ ٶز بولاشاعىنا قاتىستى ايتقان سوزدەرى دە بۇنى راستايدى (ٵيۇپ 14:15). «ٴماسىح وسىندا بولاتىن كەزدە» تىرىلەتىن «ونىڭ مەنشىگىندەگىلەر» ٴماسىح «كۇللى ۇكىمەت، بارشا بيلىك پەن كۇشتى جوق قىلعان» كەزدە كوكتە ونىڭ قاسىندا بولادى. ٴتىپتى «سوڭعى جاۋ — ٶلىم» دە جويىلادى. سوندىقتان كوككە تىرىلگەندەردىڭ ەشقايسىسىنا بۇدان بىلاي ٶلىمنىڭ ٵمىرى جۇرمەيدى. ال كوكتە ماسىحپەن بىرگە ٶمىر سۇرۋگە ۇمىتتەنبەيتىن ادال ماسىحشىلەردىڭ بارىمەن نە بولادى؟ (قورىنتتىقتارعا 1-حات 15:24—26 وقىڭىز).
19. كوكتە ٶمىر سۇرۋگە ۇمىتتەنبەيتىندەر نە نارسەگە ۇمىتتەنە الادى؟
19 كوكتە ٶمىر سۇرۋگە ۇمىتتەنبەيتىندەر نە نارسەگە ۇمىتتەنە الادى؟ ولار پاۋىلدىڭ مىنا سوزدەرىن نەگىزگە الىپ، ۇمىتكە يە بولا الادى: «قۇدايدىڭ ادىلدەردى دە، ادىلەتسىزدەردى دە قايتا تىرىلتەتىنىنە ۇمىتتەنەمىن» (ەل. ٸس. 24:15). ادىلەتسىز ادام كوككە بارا المايتىندىقتان، بۇل سوزدەر بولاشاقتا جەر بەتىندە قايتا ٴتىرىلۋ بولاتىنىنا نۇسقايتىنى انىق.
قايتا ٴتىرىلۋدىڭ بولاتىنىنا سەنسەك، بولاشاققا سەنىممەن قارايمىز (20-ابزاستى قاراڭىز) *
20. قايتا تىرىلۋگە دەگەن ٷمىتىڭىز قانشالىقتى نىعايدى؟
20 قايتا ٴتىرىلۋ مىندەتتى تۇردە بولادى! جەر بەتىندە ٶمىر ٴسۇرۋ ٷشىن قايتا تىرىلەتىندەر ماڭگىلىك ٶمىر سۇرۋگە ۇمىتتەنەتىن بولادى. بۇل ۋادە تولىقتاي سەنىم ارتۋعا تۇرارلىق. ەگەر جاقىندارىڭىز ومىردەن ٶتىپ جاتسا، ٴسىز ۇمىتىڭىزدەن جۇبانىش الا الاسىز. ولار ٴماسىح پەن مايلانعاندار «1000 جىل بويى پاتشالىق ەتكەن» كەزدە ولىمنەن قايتا تىرىلەدى (ايان 20:6). ال ەگەر مىڭجىلدىق بيلىك باستالعانعا دەيىن ٶزىڭىز ومىردەن ٶتىپ جاتساڭىز، قايتا تىرىلەتىنىڭىزگە سەنىمدى بولىڭىز. ٴبىزدىڭ بۇل «ٷمىتىمىز اقتالماي قالمايدى» (ريم. 5:5). ٷمىتىمىز ٴبىزدى قازىرگى ۋاقىتتا مىقتى ەتە الادى جانە قۇدايعا قۋانىشپەن قىزمەت ەتۋگە كومەكتەسەدى. ٴبىراق قورىنتتىقتارعا 1-حات 15-تاراۋدان بىلەتىنىمىز بۇل عانا ەمەس. كەلەسى ماقالادا بۇل تاراۋدى ٵرى قاراي قاراستىراتىن بولامىز.
147-ٵن ۋادە ەتىلگەن جۇماق
^ 5-ابزاس قورىنتتىقتارعا ارنالعان 1-حات 15-تاراۋدا قايتا تىرىلۋگە نازار اۋدارىلادى. ٴبىز بۇل ٸلىمدى نەلىكتەن ماڭىزدى سانايمىز؟ يسانىڭ قايتا تىرىلگەنىنە نەگە سەنىمدىمىز؟ بۇل ماقالادا وسى جانە قايتا تىرىلۋگە قاتىستى باسقا دا ماڭىزدى سۇراقتاردىڭ جاۋابىن الامىز.
^ 56-ابزاس سۋرەت سيپاتتاماسى: يسا — كوككە كوتەرىلگەن العاشقى ادام (ەل. ٸس. 1:9). يسانىڭ قاسىنا كوككە كوتەرىلەتىندەردىڭ اراسىندا توما، جاقىپ، ٴلۇديا، جوحان، ٴماريام، پاۋىل سياقتى شاكىرتتەر بولماق ەدى.
^ 58-ابزاس سۋرەت سيپاتتاماسى: ەر باۋىرلاس ۇزاق جىل بىرگە قىزمەت ەتكەن سۇيىكتى ايەلىنەن ايىرىلعان. ول ايەلىنىنىڭ قايتا تىرىلەتىنىنە نىق سەنىپ، ەحوباعا ٵرى قاراي دا ادال قىزمەت ەتىپ ٴجۇر.
