قىزمەتىڭىزدى زور قۇلشىنىسپەن اتقارىڭىز!
ەگەر ٴسىز جاقىن دوسىڭىزدان جىگەرلەندىرەرلىك حات الساڭىز، ٶزىڭىزدى قالاي سەزىنەر ەدىڭىز؟ شاكىرت تىموتە ەلشى پاۋىلدان ٴدال وسىنداي حات الدى. بۇگىندە ٴبىز بۇل حاتتى تىموتەگە ارنالعان ەكىنشى حات دەپ بىلەمىز. ٴسوز جوق، تىموتە اياۋلى دوسىنىڭ حاتىن وقۋ ٷشىن تىنىش جەر تابۋعا اسىققان بولار. بالكىم ول: «پاۋىلدىڭ جاعدايى قالاي ەكەن؟ ول ماعان قىزمەتىمە پايدالى بولاتىن قانداي دا ٴبىر كەڭەس بەردى مە ەكەن؟ ونىڭ حاتى ماعان قىزمەتىمدى جەمىستى اتقارۋعا جانە وزگەلەرگە قولعابىس بولۋعا كومەكتەسە الار ما ەكەن؟»— دەپ ويلاعان شىعار. بىلەتىنىمىزدەي، تىموتە پاۋىلدىڭ باعا جەتپەس حاتىنان وسى سۇراقتارىنا جاۋاپ الدى جانە باسقا دا ماڭىزدى جايتتاردى ۇيرەندى. قازىر وسى حاتتاعى پايدالى كەڭەستەردىڭ كەيبىرىنە نازار اۋدارايىق.
«بارىنە ٴتوزىپ ٴجۇرمىن»
تىموتە پاۋىلدىڭ جازعان حاتىنىڭ العاشقى جولدارىن وقىعان كەزدە، ونىمەن قانشالىقتى جاقىن بولىپ كەتكەنىن بىردەن ۇقسا كەرەك. پاۋىل ونى جىلى سوزدەرمەن «سۇيىكتى بالام» دەپ اتادى (ٴتىم. 2-ح. 1:2). شامامەن ب.ز. 65-جىلى وسى حاتتى العاندا، تىموتە وتىزداردا ەدى. ول كەزدە تىموتە ماسىحشىلەر قاۋىمىندا تاجىريبەلى اقساقال بولاتىن. ول پاۋىلمەن 10 جىلدان اسا ۋاقىت بويى ارالاسىپ، ودان كوپ نارسەگە ۇيرەنگەن ەدى.
تىموتە پاۋىلدىڭ قيىندىقتارعا ادالدىقپەن ٴتوزىپ جاتقانىن بىلگەندە، قاتتى جىگەرلەنىپ قالسا كەرەك. پاۋىل ريمدەگى تۇرمەدە بۇعاۋدا وتىرعان ەدى، ٵرى ولەتىن ۋاقىتى دا تاياپ قالعان بولاتىن (ٴتىم. 2-ح. 1:15، 16؛ 4:6—8). تىموتە پاۋىلدىڭ «بارىنە ٴتوزىپ ٴجۇرمىن» دەگەن سوزدەرىنەن ونىڭ باتىلدىعىن كورگەن شىعار (ٴتىم. 2-ح. 2:8—13). تىموتە سياقتى، ٴبىز دە پاۋىلدىڭ تانىتقان تاباندىلىعىنان جىگەر الا الامىز.
«سيىڭدى وتتاي جالىنداتا بەر»
پاۋىل تىموتەنى وزىنە تاپسىرىلعان قىزمەتتى جوعارى باعالاۋعا تالپىندىردى. پاۋىل ونىڭ «قۇدايدان العان سيىن وتتاي جالىنداتا بەرگەنىن» قالادى (ٴتىم. 2-ح. 1:6). پاۋىل «سي» دەگەن كەزدە، گرەكتىڭ حاريسما دەگەن ٴسوزىن قولدانعان. بۇل ٴسوز ەش قۇن تالاپ ەتپەستەن، لايىقسىز بولسا دا، بەرىلەتىن سيعا نۇسقايدى. تىموتە بۇل سيدى قاۋىمدا ەرەكشە قىزمەت اتقارۋ ٷشىن تاڭدالعان كەزدە الدى (ٴتىم. 1-ح. 4:14).
تىموتە بۇل سيدى قالاي قولداندى؟ ول «وتتاي جالىنداتا بەر» دەگەن سوزدەردى وقىعاندا، ۇيدەگى جاي عانا قىزعان شوققا اينالعان وت جايلى ويلاعان شىعار. ادەتتە ونداي وت لاۋلاپ جانىپ، كوبىرەك جىلۋ بەرۋ ٷشىن، ونى قوزعاپ تۇرۋ قاجەت بولاتىن. پاۋىلدىڭ قولدانعان انازوپەرەو دەگەن گرەك ەتىستىگى ٴبىر سوزدىككە ساي، «وتتى قوزعاۋ»، «قايتا جانداندىرۋ»، «وتتى جەلپۋ»، ياعني بەينەلەپ ايتقاندا، «قانداي دا ٴبىر ىسكە دەگەن قۇلشىنىستى وياتۋ» دەگەندى بىلدىرگەن. دەمەك، پاۋىل تىموتەنى: «قىزمەتىڭدى زور قۇلشىنىسپەن اتقار»،— دەپ تالپىندىرعىسى كەلگەن. بۇگىندە ٴبىز دە قىزمەتىمىزدى تۋرا سولاي، زور قۇلشىنىسپەن، اتقارۋىمىز كەرەك.
«وزىڭە سەنىپ تاپسىرىلعان قازىنانى... امان ساقتا»
اياۋلى دوسىنىڭ حاتىن ٵرى قاراي وقىپ جاتىپ، تىموتە قىزمەتىندە جەمىستى بولۋعا كومەكتەسەتىن تاعى ٴبىر سوزدەردى بايقادى. پاۋىل: «وزىڭە سەنىپ تاپسىرىلعان قازىنانى بويىمىزداعى كيەلى رۋحتىڭ كومەگىمەن امان ساقتا»،— دەپ جازعان (ٴتىم. 2-ح. 1:14). تىموتەگە قانداي قازىنا سەنىپ تاپسىرىلعان ەدى؟ بۇعان دەيىنگى تارماقتا پاۋىل «دۇرىس ٸلىم» جايلى، ياعني كيەلى جازبالاردا جازىلعان شىندىق جايلى ايتقان (ٴتىم. 2-ح. 1:13). تىموتە ٴماسىحشى رەتىندە وسى شىندىق جايلى قاۋىمنىڭ ىشىندە دە، سىرتىندا دا ۋاعىزداۋ كەرەك بولعان (ٴتىم. 2-ح. 4:1—5). سونداي-اق ول قۇدايدىڭ وتارىن باعۋ ٷشىن اقساقال بولىپ تاعايىندالعان بولاتىن (پەت. 1-ح. 5:2). ەحوبانىڭ كيەلى رۋحى مەن ونىڭ سوزىنە ارقا سۇيەگەندىكتەن، تىموتە وزىنە سەنىپ تاپسىرىلعان قازىنانى، ياعني ۋاعىزداۋى كەرەك شىندىقتى قورعاپ، امان ساقتاي الدى (ٴتىم. 2-ح. 3:14—17).
بۇگىندە بىزگە دە شىندىق سەنىپ تاپسىرىلعان، ٴبىز ونى وزگەلەرگە ۋاعىزداۋىمىز كەرەك (مات. 28:19، 20). وزىمىزگە سەنىپ تاپسىرىلعان وسى قازىنانى جوعارى باعالاۋ ٷشىن، ٴبىز ۇدايى دۇعا ەتىپ، قۇداي ٴسوزىن زەرتتەۋدى ادەتكە اينالدىرۋىمىز كەرەك (ريم. 12:11، 12؛ ٴتىم. 1-ح. 4:13، 15، 16). سونداي-اق ٴبىز قاۋىمدا قوسىمشا قىزمەت اتقارۋىمىز مۇمكىن. مىسالى، ٴبىز اقساقال نە تولىق ۋاقىتتى قىزمەتشى بولۋىمىز مۇمكىن. وسىنداي قىزمەتتەردى اتقارعاندا كىشىپەيىل بولۋىمىز قاجەت. سونداي-اق بىزگە تاپسىرىلعان قىزمەتتى تەك ەحوبانىڭ كومەگىمەن عانا اتقارا الاتىنىمىزدى ٴتۇسىنۋىمىز كەرەك. سوندا قۇدايدىڭ بىزگە سەنىپ تاپسىرعان قازىناسىن شىنىمەن دە باعالايتىنىمىزدى كورسەتەمىز.
«مەنەن ەستىگەندەرىڭدى ادال كىسىلەرگە سەنىپ تاپسىر»
تىموتە ٶزىنىڭ اتقارىپ جۇرگەن قىزمەتىن وزگەلەرگە دە ۇيرەتۋ كەرەك ەدى. سوندىقتان پاۋىل تىموتەگە: «مەنەن ەستىگەندەرىڭدى ادال كىسىلەرگە سەنىپ تاپسىر، سوندا ولار دا وزگەلەرگە ٴتالىم بەرۋگە قابىلەتتى بولادى»،— دەگەن (ٴتىم. 2-ح. 2:2). پاۋىل تىموتەنى بار ۇيرەنىپ-بىلگەنىن وزگە ەر باۋىرلاستارعا ۇيرەتۋگە شاقىردى. بۇگىندە دە ماسىحشىلەر قاۋىمىندا ٵربىر باقىلاۋشى وسىلاي ەتۋگە تالپىنۋ كەرەك. جاقسى باقىلاۋشى ٶزىنىڭ قىزمەتىنە قاتىستى بىلگەندەرىن قىزعانىپ، ىشتە ساقتاپ قالمايدى. قايتا، سول قىزمەتتى وزگەلەر دە اتقارا الۋ ٷشىن، باسقالاردى ۇيرەتەدى. «ولار ماعان قاراعاندا كوبىرەك ٴبىلىپ كەتەدى، بۇل قىزمەتتى مەنەن جاقسىراق اتقارىپ كەتەدى» دەپ قورىقپايدى. سوندىقتان مۇنداي باقىلاۋشى قانداي دا ٴبىر تاپسىرماعا قاتىستى نەگىزگى جايتتاردى ۇيرەتۋمەن عانا شەكتەلمەيدى. ول وزىنەن ٴتالىم الىپ جاتقاندارعا دانالىق پەن تۇسىنىكتى دامىتۋعا، ياعني رۋحاني وسۋگە كومەكتەسەدى. سوندا ودان ٴتالىم العان «ادال كىسىلەردىڭ» قاۋىمعا الدەقايدا كوپ پايداسى تيەتىن بولادى.
ٴسوز جوق، تىموتە پاۋىلدان العان جىگەرلەندىرەرلىك وسى حاتتى جوعارى باعالاعان. ونىڭ وسى قۇندى كەڭەستەردى قايتا-قايتا وقىپ، ولاردى قىزمەتتە قالاي بارىنشا قولدانۋعا بولاتىنى جايلى ويلانىپ جۇرگەنىن ەلەستەتۋ قيىن ەمەس.
پاۋىلدىڭ ايتقان كەڭەستەرىن ٴبىز دە قولدانعىمىز كەلەدى. بۇل ٷشىن ٴبىز سيىمىزدى وتتاي جالىنداتا بەرۋگە، وزىمىزگە سەنىپ تاپسىرىلعان قازىنانى امان ساقتاۋعا جانە تاجىريبەمىز بەن ٴبىلىمىمىزدى وزگەلەرمەن بولىسۋگە كۇش سالۋىمىز كەرەك. سوندا ٴبىز، پاۋىل تىموتەگە ايتقانداي، «قىزمەتىمىزدى تولىقتاي اتقارا» الامىز (ٴتىم. 2-ح. 4:5).
