41-زەرتتەۋ ماقالاسى
كيەلى كىتاپتى زەرتتەۋشىگە رۋحاني وسۋگە كومەكتەسىڭىز (1-ٴبولىم)
«ٴبىزدىڭ قىزمەتىمىز ارقىلى جازىلعان ٴماسىحتىڭ حاتى سەندەر ەكەندەرىڭ كورىنىپ تۇر» (قور. 2-ح. 3:2، 3).
78-ٵن قۇداي ٴسوزىن ۇيرەتۋ
اڭداتپا *
كيەلى كىتاپتى زەرتتەۋشىنىڭ رۋحاني ٶسىپ، شومىلدىرۋ راسىمىنەن وتكەنىن كورۋ — بۇكىل قاۋىم ٷشىن زور قۋانىش! (1-ابزاستى قاراڭىز)
1. ادامعا شومىلدىرۋ راسىمىنەن وتۋگە كومەكتەسۋدىڭ ەرەكشە سي ەكەنى قورىنتتىقتارعا 2-حات 3:1—3 تارماقتاردان قالاي كورىنەدى؟ (مۇقاباداعى سۋرەتتى قاراڭىز.)
قاۋىمىڭىزداعى كيەلى كىتاپتى زەرتتەپ جۇرگەن ادام شومىلدىرۋ راسىمىنەن وتكەندە نە سەزىنەسىز؟ ارينە، قۋاناسىز (مات. 28:19). ال ول اداممەن ٴسىز ٶزىڭىز زەرتتەگەن بولساڭىز شە؟ مۇندايدا ودان بەتەر قۋانارىڭىز ٴسوزسىز! (سال. 1-ح. 2:19، 20). ادامنىڭ رۋحاني ٶسىپ، شومىلدىرۋ راسىمىنەن وتكەنى ٴسىزدىڭ جانە قاۋىمداعى باۋىرلاستاردىڭ ٶز قىزمەتتەرىن بار ىنتامەن اتقارىپ، اۋىر ەڭبەك ەتكەنىن كورسەتەدى. سوندىقتان جاڭادان شومىلدىرۋ راسىمىنەن وتكەن شاكىرتتەر زەرتتەۋ جۇرگىزگەن ادامنىڭ جانە بۇكىل قاۋىمنىڭ جاقسى «كەپىلدەمە حاتى»، ياكي مىنەزدەمە حاتى سەكىلدى (قورىنتتىقتارعا 2-حات 3:1—3 وقىڭىز).
2. ا) ٴبىز قانداي ماڭىزدى سۇراق جايلى ويلانۋىمىز كەرەك جانە نەگە؟ ٵ) كيەلى كىتاپتى زەرتتەۋ ساباعى دەگەنىمىز نە؟ (سىلتەمەنى قاراڭىز.)
2 سوڭعى ٴتورت جىلعى ەسەپكە ساي، دۇنيەجۇزى بويىنشا اي سايىن شامامەن 10000000 كيەلى كىتاپتى زەرتتەۋ ساباعى * جۇرگىزىلدى. ال سول ٴتورت جىلدا جىل سايىن شامامەن 280000 ادام ەحوبا كۋاگەرى ٵرى يسا ٴماسىحتىڭ شاكىرتى رەتىندە شومىلدىرۋ راسىمىنەن ٶتتى. ال قالعان ميلليونداعان زەرتتەۋشىگە شومىلدىرۋ راسىمىنەن وتۋگە قالاي كومەكتەسە الامىز؟ ەحوبا شىدامدىلىق تانىتىپ، ادامدارعا ٴماسىحتىڭ شاكىرتى بولۋعا ٵلى دە مۇمكىندىك بەرىپ وتىر. سوندىقتان ٴبىز ولارعا تەزىرەك رۋحاني ٶسىپ، شومىلدىرۋ راسىمىنەن وتۋگە كومەكتەسۋ ٷشىن قولىمىزدان كەلگەننىڭ ٴبارىن ىستەگىمىز كەلەدى. بەلگىلەنگەن ۋاقىت تەز تاياپ كەلەدى! (قور. 1-ح. 7:29ا؛ پەت. 1-ح. 4:7).
3. بۇل ماقالادان زەرتتەۋ ساباعىن جۇرگىزۋگە قاتىستى نە بىلەمىز؟
3 شاكىرت دايىنداۋ ٸسى شۇعىل ٸس بولعاندىقتان، باسقارۋشى كەڭەس مەيلىنشە كوپ زەرتتەۋشىگە رۋحاني ٶسىپ، شومىلدىرۋ راسىمىنەن وتۋگە كومەكتەسۋ ٷشىن نە ىستەۋگە بولاتىنى جايلى فيليالداردان سۇراستىردى. وسى جانە كەلەسى ماقالادا ٴتۇرلى ەلدەردەگى تاجىريبەلى ٸزاشارلاردان، ميسسيونەرلەردەن جانە اۋداندىق باقىلاۋشىلاردان نە نارسەگە ۇيرەنە الاتىنىمىزدى قاراستىرامىز * (ناق. س. 11:14؛ 15:22). ولار زەرتتەۋ ساباعى ناتيجەلى بولۋ ٷشىن، زەرتتەۋ ساباعىن جۇرگىزەتىن تالىمگەرلەر مەن ولاردىڭ زەرتتەۋشىلەرى نە ىستەي الاتىندارىنا نازار اۋداردى. ٴبىز بۇل ماقالادا رۋحاني ٶسىپ، شومىلدىرۋ راسىمىنەن ٶتۋ ٷشىن ٵربىر زەرتتەۋشى جاساۋى كەرەك بەس جايتتى قاراستىرامىز.
اپتا سايىن زەرتتەڭىز
زەرتتەۋشىگە تالقىلاۋدى ٴبىر جەردە وتىرىپ وتكىزۋدى ۇسىنىڭىز (4—6 ابزاستاردى قاراڭىز)
4. ەسىك الدىندا جۇرگىزىلەتىن زەرتتەۋ ساباعىنا قاتىستى نەنى ٴتۇسىنۋىمىز كەرەك؟
4 كوپ باۋىرلاستار زەرتتەۋ ساباقتارىن ەسىك الدىندا جۇرگىزەدى. ادامنىڭ قىزىعۋشىلىعىن وسىلاي وياتۋ، ارينە، جاقسى. ٴبىراق بىلەتىنىمىزدەي، بۇنداي تالقىلاۋلار وتە قىسقا بولادى جانە اپتا سايىن وتكىزىلە بەرمەيدى. كەيبىر باۋىرلاستار ادامنىڭ تەلەفون ٴنومىرىن الىپ، قايتا كەلگەنگە دەيىن قىزىعۋشىلىعى سۋىپ قالماس ٷشىن، وعان كيەلى كىتاپتاعى قانداي دا ٴبىر ويمەن ٴبولىسىپ حابارلاما جىبەرەدى نەمەسە قوڭىراۋ سوعادى. بۇنداي قىسقا تالقىلاۋلار ناتيجەلى زەرتتەۋ ساباعىنا ۇلاسپاي، ايلارعا سوزىلۋى مۇمكىن. زەرتتەۋشىنىڭ قۇداي ٴسوزىن زەرتتەۋگە بار جۇمسايتىن ۋاقىتى مەن كۇشى وسى عانا بولسا، ول رۋحاني ٶسىپ، شومىلدىرۋ راسىمىنەن وتە الا ما؟ ەكىتالاي.
5. لۇقا 14:27—33 تارماقتاردا يسا شاكىرت دايىنداۋ ىسىندە پايدالى بولاتىن قانداي سوزدەر ايتتى؟
5 بىردە يسا شاكىرتى بولعىسى كەلەتىن ادام نە ىستەۋى كەرەكتىگىن ٴتۇسىندىرۋ ٷشىن مىسال كەلتىردى. ول مۇنارا سالعىسى كەلگەن ادام مەن جورىققا شىققان پاتشا جايلى ايتتى. يسا مۇنارا سالعىسى كەلگەن ادام قۇرىلىسىن اياقتاۋ ٷشىن، «الدىمەن شىعىنىن ەسەپتەپ الاتىنىن»، جورىققا شىققان پاتشا دا ٴبارى ويداعىداي بولاتىن-بولمايتىنىنا كوز جەتكىزۋ ٷشىن، «الدىمەن اقىلداسىپ الاتىنىن» ايتتى (لۇقا 14:27—33 وقىڭىز). مۇنىمەن يسا شاكىرتى بولعىسى كەلگەن ادام ونىڭ سوڭىنان ەرۋ ٷشىن نە ىستەۋ كەرەكتىگىن مۇقيات سارالاپ-سالماقتاپ الۋ كەرەكتىگىن ايتقىسى كەلدى. وسى سەبەپتەن دە ٴبىز زەرتتەۋشىلەردى اپتا سايىن زەرتتەۋگە تالپىندىرۋىمىز كەرەك. ول ٷشىن نە ىستەسەك بولادى؟
6. زەرتتەۋ ساباعى ناتيجەلى بولۋ ٷشىن نە ىستەسەك بولادى؟
6 الدىمەن، ەسىك الدىندا وتكىزىلەتىن زەرتتەۋ ساباقتارىن ۇزاعىراق وتكىزۋگە تىرىسىڭىز. بالكىم، ٵر كەلگەندە ٴبىر ەمەس، ەكى تارماق تالقىلاپ كورەرسىز. ٷي يەسى ۇزاعىراق اڭگىمەلەسۋگە ۇيرەنگەن كەزدە، ودان: «تالقىلاۋدى ٴبىر جەردە وتىرىپ وتكىزسەك قالاي قارايسىز؟»— دەپ سۇراپ كورىڭىز. ٷي يەسىنىڭ جاۋابىنا قاراپ، كيەلى كىتاپتى زەرتتەۋ ول ٷشىن قانشالىقتى ماڭىزدى ەكەنىن انىقتاي الاسىز. ال كەيىننەن رۋحاني ٶسۋىن تەزدەتۋ ٷشىن، وعان زەرتتەۋ ساباعىن اپتاسىنا ەكى رەت ٶتۋدى ۇسىنساڭىز بولادى. ٴبىراق زەرتتەۋشى رۋحاني ٶسۋ ٷشىن بۇل جەتكىلىكسىز.
ٵر زەرتتەۋ ساباعىنا دايىندالىڭىز
زەرتتەۋ ساباعىنا جاقسىلاپ دايىندالىڭىز، زەرتتەۋشىگە دە دايىندالۋدى ۇيرەتىڭىز (7—9 ابزاستاردى قاراڭىز)
7. تالىمگەر ٵر زەرتتەۋ ساباعىنا تىڭعىلىقتى دايىندالۋ ٷشىن نە ىستەسە بولادى؟
7 تالىمگەر رەتىندە ٴسىز ٵربىر زەرتتەۋ ساباعىنا جاقسىلاپ دايىندالۋىڭىز قاجەت. الدىمەن، مالىمەتتى وقىپ، تارماقتارىن قاراپ شىقساڭىز بولادى. مالىمەتتىڭ نەگىزگى ويلارىن انىق ٴتۇسىنىپ الىڭىز. تاراۋدىڭ اتاۋى، تاقىرىپشالارى، ابزاستىڭ سۇراقتارى، «وقىڭىز» دەپ كورسەتىلگەن تارماقتار، سۋرەتتەر مەن تاقىرىپتى تۇسىنۋگە كومەكتەسەتىن بەينەروليكتەر جايلى ويلانىڭىز. كەيىن زەرتتەۋشىڭىزدى ويدا تۇتىپ، «ول جەڭىل ٴتۇسىنىپ، ومىرىندە قولدانا الۋ ٷشىن، مالىمەتتى قاراپايىم ٵرى انىق ەتىپ قالاي جەتكىزسەم بولادى؟» دەپ ويلانىپ كورىڭىز (نەح. 8:8؛ ناق. س. 15:28ا).
8. قولوستىقتارعا 1:9، 10 دا جازىلعان پاۋىلدىڭ سوزدەرىنەن زەرتتەۋشى جايلى دۇعا ەتۋگە قاتىستى نە بىلەمىز؟
8 دايىندىقتىڭ ٴبىر بولىگى رەتىندە ەحوباعا زەرتتەۋشىڭىز جانە ونىڭ قاجەتتىلىكتەرى جايلى دۇعا ەتىڭىز. زەرتتەۋشىڭىزدىڭ جۇرەگىنە جەتەتىندەي ەتىپ ٴتالىم بەرۋگە كومەكتەسۋىن سۇراڭىز (قولوستىقتارعا 1:9، 10 وقىڭىز). زەرتتەۋشىڭىز تۇسىنبەي قالادى-اۋ نە كەلىسپەيدى-اۋ دەگەن جەرلەردى الدىن الا بايقاۋعا تىرىسىڭىز. ٴسىزدىڭ ماقساتىڭىز ادامعا رۋحاني ٶسىپ، شومىلدىرۋ راسىمىنەن وتۋگە كومەكتەسۋ ەكەنىن ۇمىتپاڭىز.
9. زەرتتەۋشىڭىزگە زەرتتەۋگە دايىندالۋعا قالاي كومەكتەسە الاسىز؟ ٴتۇسىندىرىڭىز.
9 جۇيەلى تۇردە زەرتتەگەننىڭ ارقاسىندا زەرتتەۋشى ەحوبا مەن يسانىڭ جاساعان بار جاقسىلىعىنا ريزاشىلىعى ارتىپ، كوبىرەك بىلگىسى كەلەدى دەپ ۇمىتتەنەمىز (مات. 5:3، 6). زەرتتەۋدىڭ تولىق پايداسىن كورۋ ٷشىن، زەرتتەۋشى بار نازارىن الىپ جاتقان تالىمىنە اۋدارۋ كەرەك. بۇل ٷشىن زەرتتەۋشىگە ٵر زەرتتەۋ ساباعىنا دايىندالۋدىڭ، ياعني مالىمەتتى الدىن الا وقىپ شىعىپ، ونى ومىردە قالاي قولدانا الاتىنى جايلى وي جۇگىرتۋدىڭ ماڭىزدىلىعىن ٴتۇسىندىرىڭىز. بۇل ورايدا زەرتتەۋشىگە قالاي كومەكتەسە الاسىز؟ دايىندىقتىڭ قالاي وتەتىنىن كورسەتۋ ٷشىن ونىمەن بىرگە دايىندالىڭىز *. زەرتتەۋشىگە سۇراقتىڭ ناقتى جاۋابىن قالاي تابۋعا بولاتىنىن كورسەتىڭىز جانە سول جاۋاپتى ەسىنە تۇسىرەتىن نەگىزگى سوزدەردى عانا سىزىپ قويۋدى ۇيرەتىڭىز. سوسىن ودان سول جاۋاپتى ٶز سوزىمەن ايتىپ بەرۋدى سۇراڭىز. وسىلاي ٴسىز ونىڭ مالىمەتتى قانشالىقتى جاقسى تۇسىنگەنىن انىقتاي الاسىز. ٴبىراق ٴسىز زەرتتەۋشىڭىزگە تاعى ٴبىر نارسەنى ۇيرەتۋىڭىز كەرەك. ول نە نارسە؟
زەرتتەۋشىگە ەحوبامەن كۇن سايىن سويلەسۋدى ۇيرەتىڭىز
زەرتتەۋشىڭىزگە ەحوبامەن سويلەسۋدى ۇيرەتىڭىز (10، 11-ابزاستى قاراڭىز)
10. كيەلى كىتاپتى كۇندەلىكتى وقۋ نەلىكتەن ماڭىزدى جانە مۇنىڭ مەيلىنشە پايداسىن كورۋ ٷشىن زەرتتەۋشى نە ىستەۋ كەرەك؟
10 زەرتتەۋشى اپتا سايىن تالىمگەرىمەن زەرتتەپ قانا قويماي، ٶزى دە كۇن سايىن ٴبىر نارسە ىستەۋ كەرەك. ول ەحوبامەن سويلەسۋى قاجەت. ول مۇنى ەحوبانى تىڭداۋ ارقىلى جانە وعان سويلەۋ ارقىلى ىستەي الادى. ول ەحوبانى تىڭداۋ ٷشىن، كيەلى كىتاپتى كۇندە وقۋ كەرەك (ەشۋا 1:8؛ ٴزاب. 1:1—3). زەرتتەۋشىڭىزگە jw.org تور بەكەتىندەگى «كيەلى كىتاپتى وقۋ كەستەسىن» قالاي قولدانۋعا بولاتىنىن كورسەتىڭىز *. ارينە، كيەلى كىتاپتى وقۋدىڭ مەيلىنشە پايداسىن كورۋ ٷشىن، زەرتتەۋشىڭىزدى كيەلى كىتاپتان ەحوبا تۋرالى نە بىلگەنى جايلى جانە بىلگەندەرىن ومىردە قالاي قولدانا الاتىنى جايلى وي جۇگىرتۋگە تالپىندىرۋدى ۇمىتپاڭىز (ەل. ٸس. 17:11؛ جاق. 1:25).
11. زەرتتەۋشى دۇعا ەتۋدى قالاي ۇيرەنە الادى جانە ونىڭ ەحوباعا ٴجيى دۇعا ەتكەنى نەلىكتەن ماڭىزدى؟
11 زەرتتەۋشىڭىزدى ەحوباعا سويلەۋگە، ياعني كۇن سايىن دۇعا ەتۋگە تالپىندىرىڭىز. ٵر زەرتتەۋدىڭ باسىندا جانە سوڭىندا زەرتتەۋشىڭىزبەن بىرگە جانە زەرتتەۋشىڭىز جايلى شىن جۇرەكتەن دۇعا ەتىڭىز. قالاي دۇعا ەتەتىنىڭىزدى ەستىگەندە، ول ەحوبا قۇدايعا يسا ٴماسىح ارقىلى شىن جۇرەكتەن جانە ەركىن دۇعا ەتۋدى ۇيرەنەدى (مات. 6:9؛ جوح. 15:16). زەرتتەۋشىڭىزدىڭ كۇن سايىن كيەلى كىتاپ وقىعانى (ەحوبانى تىڭداعانى) جانە دۇعا ەتكەنى (ەحوباعا سويلەگەنى) ونى قۇدايعا قانشالىقتى جاقىنداتا تۇسەدى دەسەڭىزشى! (جاق. 4:8). وسى ادەتتەردى قالىپتاستىرسا، زەرتتەۋشىڭىز وزىنە رۋحاني ٶسىپ، شومىلدىرۋ راسىمىنەن وتۋگە كومەكتەسەتىن تاعى ٴبىر نارسەگە يە بولادى. ول نە نارسە؟
زەرتتەۋشىگە ەحوبامەن جەكە قارىم-قاتىناس دامىتۋعا كومەكتەسىڭىز
12. زەرتتەۋشىڭىزگە ەحوبامەن جەكە قارىم-قاتىناس دامىتۋعا قالاي كومەكتەسە الاسىز؟
12 زەرتتەۋ ساباعىنان بىلگەندەرى زەرتتەۋشىنىڭ تەك ساناسىنا عانا ەمەس، جۇرەگىنە دە جەتۋ كەرەك. نەلىكتەن؟ جۇرەككە جەتكەن نارسە ٸس-ارەكەتكە تالپىندىرادى، ويتكەنى قالاۋ، ەموسيا جانە سەزىم جۇرەكتەن شىعادى. يسا قيسىندى وي ٴتۇزىپ، ادامداردىڭ وي-ساناسىنا جەتەتىندەي ەتىپ ٴتالىم بەرگەن. ٴبىراق ادامداردىڭ يسانىڭ سوڭىنان ەرگەن سەبەبى — ونىڭ تالىمدەرى جۇرەكتەرىنە جەتكەن (لۇقا 24:15، 27، 32). زەرتتەۋشىڭىز ەحوبانىڭ جاقىن قارىم-قاتىناس دامىتۋعا بولاتىن ٴتىرى تۇلعا ەكەنىن كورۋ كەرەك، سونداي-اق ەحوبا ونىڭ اكەسى، قۇدايى جانە دوسى بولا الاتىنىن ٴتۇسىنۋ كەرەك (ٴزاب. 25:4، 5). زەرتتەۋ ساباعى كەزىندە قۇدايدىڭ ادەمى قاسيەتتەرىنە ەرەكشە نازار اۋدارىڭىز (مۇس. 2-ج. 34:5، 6؛ پەت. 1-ح. 5:6، 7). قانداي تاقىرىپ قاراستىرساڭىز دا، زەرتتەۋشىڭىزگە ەحوبانىڭ قانداي تۇلعا ەكەنىن ايتىپ وتىرىڭىز. وعان قۇدايدىڭ سۇيىسپەنشىلىك، مەيىرىمدىلىك، جاناشىرلىق سياقتى تاماشا قاسيەتتەرىن كورۋگە كومەكتەسىڭىز. يسا ەحوبا قۇدايدى ٴسۇيۋ «ٴبىرىنشى ٵرى ەڭ باستى زاڭ» ەكەنىن ايتقان (مات. 22:37، 38). سوندىقتان زەرتتەۋشىڭىزدىڭ جۇرەگىنە قۇدايعا دەگەن تەرەڭ سۇيىسپەنشىلىك ۇيالاتۋعا تىرىسىڭىز.
13. زەرتتەۋشىڭىزگە ەحوبانىڭ تاماشا قاسيەتتەرىن تانىپ-بىلۋگە قالاي كومەكتەسە الاسىز؟ مىسال كەلتىرىڭىز.
13 زەرتتەۋشىڭىزبەن سويلەسكەندە، ەحوبانى نە ٷشىن جاقسى كورەتىنىڭىز جايلى ايتىڭىز. سوندا زەرتتەۋشىڭىز ول دا ەحوبامەن دوس بولىپ، ونى جاقسى كورۋى كەرەكتىگىن تۇسىنەتىن بولادى (ٴزاب. 73:28). مىسالى، زەرتتەۋ ساباعىنا ارنالعان باسىلىمدا نە تارماقتا ەحوبانىڭ سۇيىسپەنشىلىگى، دانالىعى، ادىلدىگى مەن كۇشى جايلى سىزگە قاتتى ۇنايتىن ويلار بار شىعار. وسى تۋرالى زەرتتەۋشىڭىزبەن ٴبولىسىپ، بۇل كوكتەگى اكەڭىزدى نەلىكتەن قاتتى جاقسى كورەتىنىڭىزدىڭ ٴبىر سەبەبى ەكەنىن ايتىڭىز. رۋحاني ٶسىپ، شومىلدىرۋ راسىمىنەن ٶتۋ ٷشىن، زەرتتەۋشى تاعى نە ىستەۋ كەرەكتىگىن كورەيىك.
زەرتتەۋشىنى قاۋىم كەزدەسۋلەرىنە بارۋعا تالپىندىرىڭىز
زەرتتەۋشىڭىزدى قاۋىم كەزدەسۋلەرىنە مەيلىنشە تەزىرەك بارۋعا تالپىندىرىڭىز (14، 15-ابزاستى قاراڭىز)
14. ەۆرەيلەرگە 10:24، 25 تە زەرتتەۋشىگە رۋحاني وسۋگە كومەكتەسەتىن قاۋىم كەزدەسۋلەرى جايلى نە دەلىنگەن؟
14 بارلىعىمىز زەرتتەۋشىلەرىمىزدىڭ رۋحاني ٶسىپ، شومىلدىرۋ راسىمىنەن وتكەنىن قالايمىز. زەرتتەۋشىلەرگە كومەكتەسۋدىڭ ٴبىر جولى — ولاردى قاۋىم كەزدەسۋلەرىنە بارۋعا تالپىندىرۋ. تاجىريبەلى تالىمگەرلەر بىردەن قاۋىم كەزدەسۋلەرىنە بارا باستايتىن زەرتتەۋشىلەردىڭ رۋحاني تەز وسەتىنىن ايتادى (ٴزاب. 111:1). تالىمگەرلەردىڭ كەيبىرى زەرتتەۋشىلەرىنە كيەلى كىتاپ تۋرالى ٴتالىمنىڭ جارتىسىن زەرتتەۋ ساباعىنان، جارتىسىن قاۋىم كەزدەسۋلەرىنەن الاتىنىن ايتادى ەكەن. زەرتتەۋشىڭىزبەن بىرگە ەۆرەيلەرگە 10:24، 25 ٴتى وقىڭىز، سوسىن قاۋىم كەزدەسۋلەرىنە بارۋدىڭ قانداي پايداسى بار ەكەنىن ٴتۇسىندىرىڭىز. وعان «پاتشالىق سارايىندا نە ٷشىن جينالامىز؟» دەگەن بەينەروليكتى كورسەتىڭىز *. زەرتتەۋشىڭىزگە اپتا سايىن قاۋىم كەزدەسۋلەرىنە بارۋدى ٶمىرىنىڭ اجىراماس بولىگى ەتۋگە كومەكتەسىڭىز.
15. زەرتتەۋشىنى جۇيەلى تۇردە قاۋىم كەزدەسۋلەرىنە بارۋعا تالپىندىرۋ ٷشىن نە ىستەي الاسىز؟
15 ەگەر زەرتتەۋشىڭىز قاۋىم كەزدەسۋىنە ٵلى بارىپ كورمەگەن بولسا نە جۇيەلى تۇردە بارماسا، نە ىستەسەڭىز بولادى؟ وعان سوڭعى قاۋىم كەزدەسۋىنەن بىلگەندەرىڭىز جايلى شابىتپەن ايتىپ بەرىڭىز. وسىلاي ايتقانىڭىز جاي شاقىرۋدان گورى كوبىرەك اسەر ەتىپ، ونىڭ ىقىلاسىن وياتۋى مۇمكىن. زەرتتەۋشىڭىزگە سول اپتادا تالقىلانىپ جاتقان «كۇزەت مۇناراسى» جۋرنالىن نەمەسە «ٶمىرىمىز بەن قىزمەتىمىز» جۇمىس داپتەرىن كورسەتىڭىز. سوسىن وعان كەلەسى اپتادا نە تالقىلاناتىنىن كورسەتىپ، وعان قاي بولىگى قىزىق بولار ەدى — سونى سۇراڭىز. قاۋىم كەزدەسۋىنە ٴبىرىنشى رەت كەلگەن كەزدە، زەرتتەۋشىڭىز بۇل كەزدەسۋ وزگە ٴدىني جيىنداردان الدەقايدا اسىپ تۇسەتىنىن كورەدى (قور. 1-ح. 14:24، 25). سونداي-اق ول جينالىستا وزىنە رۋحاني ٶسىپ، شومىلدىرۋ راسىمىنەن وتۋگە كومەكتەسەتىن جانە جاقسى ۇلگى بولاتىن وزگە باۋىرلاستارمەن تانىسادى.
16. زەرتتەۋشى رۋحاني ٶسىپ، شومىلدىرۋ راسىمىنەن ٶتۋ ٷشىن، زەرتتەۋ ساباعى قالاي جۇرگىزىلۋ كەرەك جانە كەلەسى ماقالادا نە قاراستىرامىز؟
16 سونىمەن، زەرتتەۋشى رۋحاني ٶسىپ، شومىلدىرۋ راسىمىنەن ٶتۋ ٷشىن، زەرتتەۋ ساباعى قالاي جۇرگىزىلۋ كەرەك؟ زەرتتەۋ ساباعىنىڭ ماڭىزدىلىعىن كورسەتۋ ٷشىن، زەرتتەۋشىڭىزدى اپتا سايىن زەرتتەۋگە جانە ٵر زەرتتەۋ ساباعىنا دايىندالۋعا تالپىندىرىڭىز. سونداي-اق ونى ەحوبامەن كۇن سايىن سويلەسۋگە جانە ونىمەن جەكە قارىم-قاتىناس دامىتۋعا تالپىندىرىڭىز. قاۋىم كەزدەسۋلەرىنە بارۋعا دەگەن ىقىلاسىن وياتىڭىز. (« زەرتتەۋشى رۋحاني ٶسىپ، شومىلدىرۋ راسىمىنەن ٶتۋ ٷشىن نە ىستەيدى؟» دەگەن قورشاۋدى قاراڭىز.) ال كەلەسى ماقالادا زەرتتەۋشىگە رۋحاني ٶسىپ، شومىلدىرۋ راسىمىنەن وتۋگە كومەكتەسۋ ٷشىن، تالىمگەردىڭ نە ىستەۋى كەرەكتىگىنە قاتىستى تاعى بەس جايتتى قاراستىرامىز.
76-ٵن ماداقتاۋ قۇرباندىعىن ۇسىنامىز
^ 5-ابزاس ٴتالىم بەرۋ دەگەنىمىز — ادامعا جاڭاشا ويلانۋعا، جاڭاشا سەزىنىپ، جاڭاشا ارەكەت ەتۋگە كومەكتەسۋ. 2020-جىلدىڭ تارماعى، ماتاي 28:19، ادامدارمەن كيەلى كىتاپتى زەرتتەۋدىڭ جانە ولارعا يسا ٴماسىحتىڭ شاكىرتى رەتىندە شومىلدىرۋ راسىمىنەن وتۋگە كومەكتەسۋ ٷشىن ٴتالىم بەرۋدىڭ ماڭىزدىلىعىن ەسىمىزگە سالدى. وسى جانە كەلەسى ماقالادا بۇل ماڭىزدى ٸستى مەيلىنشە قالاي جاقسى اتقارا الاتىنىمىزدى كورەمىز.
^ 2-ابزاس ٴسوز ٴمانى: ەگەر ٴسىز اداممەن جۇيەلى تۇردە كيەلى كىتاپ جايلى اڭگىمەلەسسەڭىز، يا بولماسا كيەلى كىتاپقا نەگىزدەلگەن ادەبيەتتىڭ كومەگىمەن پىكىر الىسساڭىز، مۇنى كيەلى كىتاپتى زەرتتەۋ ساباعى دەۋگە بولادى. زەرتتەۋ ساباعى قالاي وتەتىنىن كورسەتكەننەن كەيىن، ساباق ەكى رەت جۇرگىزىلسە جانە ٵرى قاراي دا جالعاساتىنىنا ۇمىتتەنۋگە نەگىز بار بولسا، ول تۋرالى ەسەپ تاپسىرۋعا بولادى.
^ 3-ابزاس بۇل ماقالالاردا 2004-جىلعى «ٴبىزدىڭ قاسيەتتى قىزمەتىمىزدىڭ» شىلدە ايىنداعى سانى مەن 2005-جىلعى مامىر ايىنداعى سانى ارالىعىندا شىققان «كيەلى كىتاپتى زەرتتەۋ ساباعىن ناتيجەلى وتكىزەمىز» ايدارىنان الىنعان كەڭەستەر دە بار.
^ 9-ابزاس «كيەلى كىتاپتى زەرتتەۋشىلەردى دايىندالۋعا ۇيرەتۋ» دەگەن ٴتورت مينۋتتىق بەينەروليكتى كورىپ شىعىڭىز. ®JW Library قوسىمشاسىنان مەديا > كەزدەسۋلەرىمىز بەن قىزمەتىمىز > شەبەر ۋاعىزداۋشى بولايىق دەگەن جەردى قاراڭىز.
^ 10-ابزاس كيەلى كىتاپ تالىمدەرى > كيەلى كىتاپتى زەرتتەۋ قۇرالدارى دەگەن جەرگە كىرىڭىز.
^ 14-ابزاس ®JW Library قوسىمشاسىنان مەديا > كەزدەسۋلەرىمىز بەن قىزمەتىمىز > قىزمەتكە ارنالعان قۇرالدار دەگەن جەردى قاراڭىز.
