4-زەرتتەۋ ماقالاسى
باۋىرلاستارىڭىزدى تۋعان باۋىرداي جاقسى كورىڭىز
«ٴبىر-ٴبىرىڭدى تۋعان باۋىرلارداي جاقسى كورىڭدەر» (ريم. 12:10).
109-ٵن «ٴبىر-ٴبىرىڭدى بارىنشا جاقسى كورىڭدەر»
اڭداتپا *
1. بۇگىندە ادامداردىڭ باۋىرمالدىقتان جۇرداي ەكەنى نەدەن كورىنەدى؟
كيەلى كىتاپتا سوڭعى كۇندەرى ادامداردىڭ «باۋىرمالدىقتان جۇرداي» بولاتىنى ايتىلعان (ٴتىم. 2-ح. 3:1، 3). بۇگىندە ٴبىز وسى پايعامبارلىقتىڭ ورىندالىپ جاتقانىنا كۋامىز. مىسالى، اجىراسۋدىڭ كەسىرىنەن ميلليونداعان وتباسىلار ويران بولۋدا، ەرلى-زايىپتىلار ٴبىر-بىرىنە اشۋلى، ال بالالارى سۇيىسپەنشىلىك سەزىنبەيدى. ٴتىپتى ٴبىر ۇيدە ٶمىر سۇرەتىن وتباسىلار ٴبىر-بىرىنە بوتەن ادامدار سەكىلدى. ٴبىر وتباسىلىق كەڭەسشى بىلاي دەيدى: «اتا-انالار مەن بالالار ٴبىر-بىرىنە ەمەس، كومپيۋتەرگە، پلانشەتكە، سمارتفونعا نە بەينەويىندارعا بايلانعان. بۇنداي وتباسىلار ٴبىر شاتىردىڭ استىندا ٶمىر سۇرسە دە، ٴبىر-ٴبىرىن جاقسى بىلمەيدى».
2، 3. ا) ريمدىكتەرگە 12:10 عا ساي، ٴبىز كىمدەردى تۋعان باۋىرداي جاقسى كورۋىمىز كەرەك؟ ٵ) ٴبىز بۇل ماقالادا نە قاراستىرامىز؟
2 ٴبىز سۇيىسپەنشىلىكتەن جۇرداي وسى زاماننىڭ ٶمىر سالتىن ۇلگى ەتكىمىز كەلمەيدى (ريم. 12:2). ٴبىز تەك ەت جاقىن تۋىستارىمىزعا عانا ەمەس، ٴبىر سەنىمدەگى باۋىرلاستارىمىزعا دەگەن سۇيىسپەنشىلىگىمىزدى دە ارتتىرۋىمىز كەرەك (ريمدىكتەرگە 12:10 وقىڭىز). ٴبىز باۋىرلاستارىمىزدى قانشالىقتى جاقسى كورۋىمىز كەرەك؟ رۋحاني وتباسىمىز بولىپ تابىلاتىن ولاردى تۋعان وتباسىمىزدى جاقسى كورگەندەي جاقسى كورۋىمىز كەرەك. سولاي ەتسەك، ارامىزداعى بىرلىكتى ساقتاپ قالامىز. ال بىرلىك — شىنايى عيباداتتىڭ ماڭىزدى بولىگى (ميحا 2:12).
3 قازىر ەحوبا مەن ونىڭ قىزمەتشىلەرىنىڭ ۇلگىسىنەن نە نارسەگە ۇيرەنە الاتىنىمىزعا نازار اۋدارايىق. بۇل بىزگە باۋىرلاستاردى تۋعان باۋىرداي جاقسى كورۋگە كومەكتەسەدى.
ەحوبا — «اينىماس سۇيىسپەنشىلىگى مول» قۇداي
4. ٴزابۇر 103:8، 11 دەن كورىنەتىندەي، ەحوبا ٴبىزدى قانشالىقتى جاقسى كورەدى؟
4 كيەلى كىتاپتا ەحوبانىڭ تاماشا قاسيەتتەرى جايلى ايتىلادى. مىسالى، وندا «قۇداي — سۇيىسپەنشىلىك» ەكەنى ايتىلعان (جوح. 1-ح. 4:8). وسى سوزدەردىڭ ٶزى ٴبىزدى ەحوباعا جاقىنداتادى. ٴبىراق كيەلى كىتاپتا ەحوبانىڭ «اينىماس سۇيىسپەنشىلىگى مول» ەكەنى دە ايتىلعان (ٴزابۇر 103:8، 11 وقىڭىز). ٴزابۇر جىرشىسىنىڭ سوزدەرى ەحوبانىڭ بىزگە دەگەن سۇيىسپەنشىلىگىنىڭ قانشالىقتى تەرەڭ ەكەنىن تاماشا سيپاتتايدى!
5. ەحوبا قالاي مەيىرىمدىلىك تانىتادى جانە ٴبىز وعان قالاي ەلىكتەي الامىز؟
5 بايقاساق، ٴزابۇر 103:8 دە ەحوبانىڭ اينىماس سۇيىسپەنشىلىگىمەن قاتار، ٴبىزدى وعان جاقىنداتىپ تارتاتىن تاعى ٴبىر قاسيەتى ايتىلعان. بۇل — مەيىرىمدىلىك قاسيەتى (مۇس. 2-ج. 34:6). ەحوبا بىزگە ٵرتۇرلى جولمەن مەيىرىمدىلىك تانىتادى. سولاردىڭ ٴبىرى — ول ٴبىزدىڭ قاتەلىكتەرىمىزدى كەشىرەدى (ٴزاب. 51:1). كيەلى كىتاپقا ساي، مەيىرىمدىلىك كەشىرۋدەن دە كوپ نارسەنى قامتيدى. مەيىرىمدىلىك دەگەن بىرەۋدىڭ قينالىپ جاتقانىن كورگەندە ادامنىڭ ىشىندە تۋىندايتىن كۇشتى سەزىم جانە بۇل سەزىم سول ادامدى كومەكتەسۋگە تالپىندىرادى. ەحوبا ٶزىنىڭ بىزگە كومەكتەسۋگە دەگەن ىقىلاسىن انانىڭ بالاعا دەگەن سەزىمىنەن دە كۇشتى دەپ سيپاتتاعان (يشايا 49:15). ٴبىز قيىندىققا كەزىككەن كەزدە، مەيىرىمدىلىك قاسيەتى ەحوبانى بىزگە كومەكتەسۋگە تالپىندىرادى (ٴزاب. 37:39؛ قور. 1-ح. 10:13). ٴبىز دە باۋىرلاستارىمىز كوڭىلىمىزدى قالدىرىپ جاتسا، ولارعا وكپە-رەنىش ساقتاماي، كەشىرىمدى بولايىق. وسىلاي ٴبىز ولارعا مەيىرىمدىلىك تانىتامىز (ەفەس. 4:32). الايدا مەيىرىمدىلىك تانىتۋدىڭ نەگىزگى جولى — باۋىرلاستارىمىز قيىندىققا كەزىككەن كەزدە ولارعا كومەكتەسۋ. سۇيىسپەنشىلىگىمىز وزگەلەرگە مەيىرىمدى بولۋعا تالپىندىرعان كەزدە، ٴبىز وزگەلەردى جاقسى كورىپ، باۋىرىنا تارتاتىن ەحوباعا ەلىكتەيمىز (ەفەس. 5:1).
«جوناتان مەن ٴداۋىت اينىماس دوس بولدى»
6. جوناتان مەن ٴداۋىتتىڭ ٴبىر-ٴبىرىن تۋعان باۋىرداي جاقسى كورەتىنى نەدەن كورىندى؟
6 كيەلى كىتاپتا ٴبىر-ٴبىرىن تۋعان باۋىرداي جاقسى كورگەن كەمەلسىز ادامداردىڭ وقيعالارى بار. مىسالى، جوناتان مەن ٴداۋىتتى الايىق. كيەلى كىتاپتا: «جوناتان مەن ٴداۋىت اينىماس دوس بولىپ، جوناتان ونى جانىنداي جاقسى كورىپ كەتتى»،— دەلىنگەن (سام. 1-ج. 18:1). ٴداۋىت ساۋلدان كەيىن پاتشا بولۋ ٷشىن مايلانعان ەدى. ٴبىراق ساۋل ٴداۋىتتى كورە الماي، ونى ولتىرمەكشى بولدى. ال جوناتان بولسا ٴداۋىتتى ولتىرگەلى جۇرگەن اكەسىن مۇلدەم قولدامادى. جوناتان مەن ٴداۋىت اينىماس دوس بولىپ، ٴبىر-بىرىنە ٵردايىم قولداۋ كورسەتەتىندەرىن ايتىپ سەرتتەستى (سام. 1-ج. 20:42).
جاس ايىرماشىلىعى جوناتان مەن داۋىتكە ٴبىر-ٴبىرىن تۋعان باۋىرداي جاقسى كورىپ، دوس بولۋعا توسقاۋىل بولعان جوق (6—9-ابزاستاردى قاراڭىز)
7. جوناتان مەن ٴداۋىتتىڭ دوس بولۋىنا قانداي جايتتاردىڭ كەدەرگى بولۋىنا بولار ەدى؟
7 جوناتان مەن ٴداۋىتتىڭ دوس بولۋىنا كەدەرگى بولارلىقتاي جايتتاردىڭ بولعانىن ەسكەرسەك، ولاردىڭ ٴبىر-ٴبىرىن تۋعان باۋىرداي جاقسى كورگەنى ودان سايىن تاڭعالدىرادى! مىسالى، جوناتان داۋىتتەن شامامەن 30 جاسقا ۇلكەن ەدى. جوناتاننىڭ «ٶمىر كورمەگەن بۇل بوزبالامەن ورتاق نەم بار» دەۋىنە بولار ەدى. ٴبىراق جوناتان ولاي ويلامادى، ول داۋىتكە زور قۇرمەت تانىتتى.
8. جوناتان نەنىڭ ارقاسىندا داۋىتپەن جاقىن دوس بولا الدى؟
8 جوناتاننىڭ داۋىتكە قىزعانىشپەن قاراۋىنا بولار ەدى. ساۋل پاتشانىڭ ۇلى بولعاندىقتان، ونىڭ «تاققا وتىراتىن زاڭدى مۇراگەر مەنمىن» دەپ تۇرىپ الۋىنا دا بولار ەدى (سام. 1-ج. 20:31). ٴبىراق جوناتان كىشىپەيىل ٵرى ەحوباعا ادال بولدى. سوندىقتان ول ٴداۋىتتى بولاشاق پاتشا ەتىپ تاڭداعان ەحوبانىڭ شەشىمىن تولىقتاي قولدادى. اكەسىنىڭ اشۋىن تۋدىرسا دا، جوناتان داۋىتكە دە ادال بولدى (سام. 1-ج. 20:32—34).
9. جوناتاننىڭ داۋىتپەن باقتالاسپاعانىن قايدان بىلەمىز؟
9 جوناتان ٴداۋىتتى باۋىرىنداي جاقسى كورىپ كەتتى، سوندىقتان ونىمەن باقتالاسۋعا تىرىسپادى. جوناتان شەبەر ساداقشى ٵرى باتىل جاۋىنگەر بولاتىن. حالىق جوناتان مەن ونىڭ اكەسى ساۋلدى قىراننان ۇشقىر، ارىستاننان كۇشتى ادامدار رەتىندە تانيتىن (سام. 2-ج. 1:22، 23). سوندىقتان جوناتاننىڭ ٶز ەرلىكتەرىن ايتىپ ماقتانۋىنا بولار ەدى. الايدا ول باقتالاسىپ، داۋىتتەن اسىپ تۇسۋگە تىرىسپادى. قايتا، ٴداۋىتتىڭ باتىلدىعى مەن ەحوباعا دەگەن سەنىمدىلىگىنە ٴتانتى بولدى. نەگىزى، ٴداۋىت عولياتتى ولتىرگەننەن كەيىن، جوناتان ونى جانىنداي جاقسى كورە باستاعان بولاتىن. ٴبىز دە جوناتانعا ەلىكتەپ، باۋىرلاستارىمىزدى تۋعان باۋىرداي جاقسى كورەتىنىمىزدى قالاي كورسەتە الامىز؟
ٴبىر-ٴبىرىمىزدى تۋعان باۋىرداي جاقسى كورەتىنىمىزدى كورسەتەيىك
10. «ٴبىر-ٴبىرىڭدى بارىنشا جاقسى كورىڭدەر» دەگەن نەنى بىلدىرەدى؟
10 كيەلى كىتاپ ٴبىزدى «ٴبىر-ٴبىرىمىزدى بارىنشا جاقسى كورۋگە» شاقىرادى (پەت. 1-ح. 1:22). بۇل ورايدا ەحوبادان ۇلگى الساق بولادى. ونىڭ ٴبىزدى بارىنشا جاقسى كورەتىنى سونشا — ٴبىز وعان ادال بولعان جاعدايدا، ونىڭ سۇيىسپەنشىلىگىنەن ٴبىزدى ەش نارسە ايىرا المايدى (ريم. 8:38، 39). تارماقتاعى «بارىنشا» دەپ اۋدارىلعان گرەك ٴسوزى «سوزۋ»، ٴتىپتى «كەرۋ» دەگەن ماعىنانى بىلدىرەدى. كەيدە باۋىرلاستاردى تۋعان باۋىرداي جاقسى كورۋ ٷشىن، سۇيىسپەنشىلىگىمىزدى سوزۋعا، كەرۋگە تۋرا كەلۋى مۇمكىن. وزگەلەر كوڭىلىمىزدى تۇسىرگەن كەزدە، مىنا كەڭەسكە ساي ارەكەت ەتە بەرۋىمىز كەرەك: «سۇيىسپەنشىلىكپەن ٴبىر-بىرىڭە توزىمدىلىك تانىتىڭدار، ٶزارا تاتۋ بولىپ، كيەلى رۋح ارقىلى يەمدەنگەن بىرلىكتەرىڭدى ساقتاپ قالۋعا بارىنشا ۇمتىلىڭدار» (ەفەس. 4:1—3). ەگەر «بىرلىك ساقتاۋعا» بارىنشا كۇش سالاتىن بولساق، باۋىرلاستارىمىزدىڭ قاتەلىكتەرىنە قادالىپ قالمايمىز. ولارعا ەحوبانىڭ كوزىمەن قاراۋعا بارىمىزدى سالامىز (سام. 1-ج. 16:7؛ ٴزاب. 130:3).
پاۋىل ەۋوديا مەن سينتيحەنى ٴبىر-بىرىمەن دوس بولۋعا شاقىردى. بۇگىندە بىزگە دە باۋىرلاستارمەن ٴتىل تابىسۋ كەيدە قيىن بولىپ جاتادى (11-ابزاستى قاراڭىز)
11. نەگە باۋىرلاستاردى تۋعان باۋىرداي جاقسى كورۋ كەيدە قيىن بولۋ مۇمكىن؟
11 باۋىرلاستاردى تۋعان باۋىرداي جاقسى كورۋ ۇنەمى وڭاي بولا بەرمەيدى، اسىرەسە ولاردىڭ قاتەلىكتەرىن ٴبىلىپ تۇرساق. بۇنداي قيىندىق I عاسىرداعى كەيبىر ماسىحشىلەردىڭ اراسىندا دا بولعان كورىنەدى. مىسالى، ەۋوديا مەن سينتيحەگە پاۋىلمەن بىرگە «ىزگى حابار ٷشىن يىق تىرەسە» قىزمەتتەسۋ قيىنعا سوقپاسا كەرەك. ٴبىراق قانداي دا ٴبىر سەبەپتەرمەن ولار ٴبىر-بىرىمەن ٴتىل تابىسا الماعان. سوندىقتان پاۋىل ولاردى «يەمىزدىڭ جولىندا جۇرگەندەر رەتىندە ٴبىر ويدا بولۋعا» شاقىرعان (ٴفىلىپ. 4:2، 3).
جاس اقساقالدار مەن جاسى ۇلكەن اقساقالدار ٴبىر-بىرىمەن جاقىن دوس بولا الادى (12-ابزاستى قاراڭىز)
12.باۋىرلاستاردى تۋعان باۋىرداي جاقسى كورە ٴتۇسۋ ٷشىن نە ىستەسەك بولادى؟
12 بۇگىندە ٴبىز باۋىرلاستارىمىزدى تۋعان باۋىرداي جاقسى كورە ٴتۇسۋ ٷشىن نە ىستەي الامىز؟ ٴبىر سەنىمدەگى باۋىرلاستاردى جاقسىراق تاني تۇسسەك، ولاردى ٴتۇسىنۋ دە، تۋعان باۋىرداي جاقسى كورۋ دە جەڭىلىرەك بولادى. سىزگە باۋىرلاستارمەن دوس بولۋعا ولاردىڭ جاسى مەن شىققان ورتاسى كەدەرگى بولماسىن. ەسىڭىزدە بولسا، جوناتان داۋىتتەن 30 جاستاي ۇلكەن ەدى. سوندا دا ولار جاقىن دوس بولدى. ٴسىز دە قاۋىمدا وزىڭىزدەن ۇلكەن نە كىشى باۋىرلاسپەن دوس بولا الاسىز با؟ ەگەر دوس بولساڭىز، «بارلىق باۋىرلاستاردى سۇيەتىنىڭىزدى» كورسەتەسىز (پەت. 1-ح. 2:17).
12-ابزاستى قاراڭىز *
13. نەگە ٴبىز قاۋىمدا بارلىعىنا بىردەي جاقىن بولماۋىمىز مۇمكىن؟
13 باۋىرلاستاردى تۋعان باۋىرداي جاقسى كورۋ دەگەن قاۋىمداعىلاردىڭ بارلىعىنا بىردەي جاقىن بولۋىمىز كەرەك دەگەندى بىلدىرە مە؟ جوق، ويتكەنى بۇل مۇمكىن ەمەس. باسقالارعا قاراعاندا ورتاق نارسەلەرىمىز كوپ اداممەن جاقىن بولۋ كادىمگى نارسە. يسا بارلىق ەلشىلەرىن «دوستارى» دەپ ساناسا دا، جوحاندى ەرەكشە جاقسى كورگەن (جوح. 13:23؛ 15:15؛ 20:2). ٴبىراق يسا وزگەلەردى ٴبولىپ-جارىپ، جوحاندى بارىنەن ارتىق كورمەگەن. مىسالى، جوحان مەن ونىڭ باۋىرى جاقىپ قۇداي پاتشالىعىندا باستى ورىندارعا وتىرعىزۋدى سۇراعاندا، يسا ولارعا: «مەنىڭ وڭ نە سول جاعىما كىم وتىراتىنىن مەن شەشپەيمىن»،— دەگەن (مار. 10:35—40). ٴبىز دە يساعا ەلىكتەپ، الالاۋشىلىق تانىتىپ دوستارىمىزدى وزگەلەردەن ارتىق كورمەۋىمىز كەرەك (جاق. 2:3، 4). سولاي ەتسەك، ٴبىز قاۋىمدا جىككە بولىنۋشىلىكتىڭ ەمەس، بىرلىكتىڭ بولۋىنا ۇلەس قوسامىز. ال ماسىحشىلەر قاۋىمىندا جىككە بولىنۋشىلىككە ەشقانداي ورىن جوق (ياھد. 17—19).
14. فىلىپىلىكتەرگە 2:3 كە ساي، بىزگە باقتالاستىق رۋحىنان اۋلاق بولۋعا نە كومەكتەسەدى؟
14 ەگەر ٴبىر-ٴبىرىمىزدى تۋعان باۋىرداي جاقسى كورەتىن بولساق، قاۋىمدا باقتالاستىق رۋحى بولمايدى. مىسالى، جوناتان داۋىتپەن باقتالاسىپ، تاققا تالاسقان جوق. جوناتان بارلىعىمىز ٷشىن تاماشا ۇلگى! باۋىرلاستارىڭىزدىڭ قابىلەتتەرىن قىزعانىپ، ولارمەن باقتالاسىپ جۇرمەڭىز، قايتا، «كىشىپەيىلدىلىكپەن باسقالاردى وزىڭىزدەن جوعارى قويىڭىز» (فىلىپىلىكتەرگە 2:3 وقىڭىز). ٵربىر باۋىرلاس قاۋىمعا ٶز ۇلەسىن قوساتىنىن ەستەن شىعارماڭىز. ەگەر ٴبىز كىشىپەيىل بولىپ قالاتىن بولساق، باۋىرلاستاردىڭ جاقسى جاقتارىن بايقاپ، ولاردان ۇلگى الا الامىز (قور. 1-ح. 12:21—25).
15. تانيانىڭ وتباسىمەن بولعان جاعدايدان نە ٴتۇيدىڭىز؟
15 ٴبىز كۇتپەگەن جەردەن قيىندىقتارعا كەزىككەندە، ەحوبا ٴبىزدى باۋىرلاستار ارقىلى جۇباتادى. ولار ٴبىزدى تۋعان باۋىرداي جاقسى كورىپ، ٸس-جۇزىندە كومەك كورسەتەدى. مىسالى، ٴبىر وتباسىمەن بولعان جاعدايدى الايىق. ولار قۇراما شتاتتاردا وتكەن 2019-جىلعى «سۇيىسپەنشىلىك ەش سارقىلمايدى» دەگەن حالىقارالىق كونگرەسكە باردى. ولار سەنبى كۇنگى باعدارلامادان قايتىپ كەلە جاتقان كەزدە ٴبىر وقىس جاعداي بولدى. ٷش بالانىڭ اناسى تانيا بىلاي دەيدى: «ٴبىز كولىكپەن قوناق ۇيىمىزگە قايتىپ كەلە جاتقان ەدىك. سول كەزدە ٴبىر جۇرگىزۋشى كولىگىن يگەرە الماي، بىزگە كەپ سوقتى. بۇدان ەشكىم زارداپ شەككەن جوق. ٴبىراق ٴبىز زارە-قۇتىمىز قالماي، كولىكتەن شىعىپ، جولدا تۇردىق. جولدىڭ شەتىندە بىرەۋ قول بۇلعاپ، ٴبىزدى كولىگىنە شاقىرىپ جاتتى. بۇل ەندى عانا كونگرەستەن شىققان ٴبىزدىڭ ٴبىر باۋىرلاسىمىز ەكەن. ٴبىراق ٴبىزدى كورىپ توقتاعان بۇل باۋىرلاس قانا ەمەس ەدى. شۆەسيادان كەلگەن بەس دەلەگات تا توقتادى. سولاردىڭ اراسىنداعى بىرنەشە ايەل باۋىرلاس قىزىم ەكەۋمىزدى قۇشاقتاي كەتتى. بۇدان ٶزىمىزدى سونداي جاقسى سەزىنىپ قالدىق! مەن ولارعا بىزبەن ٴبارى جاقسى بولاتىنىن ايتسام دا، ولار ٴبىزدى قالدىرىپ كەتكەن جوق. ولار بىزگە مەديسينالىق كومەك كورسەتىلگەننەن كەيىن دە قاسىمىزدا بولىپ، قاجەتىمىزدىڭ ٴبارى بارىنا كوز جەتكىزدى. وسى ٴبىر قيىن شاقتا ٴبىز ەحوبانىڭ سۇيىسپەنشىلىگىن سەزىندىك. وسى جاعدايدان كەيىن، ٴبىزدىڭ باۋىرلاستارعا دەگەن سۇيىسپەنشىلىگىمىز ارتتى. ەحوباعا دەگەن دە سۇيىسپەنشىلىگىمىز بەن ريزاشىلىعىمىز تەرەڭدەي ٴتۇستى». مۇقتاج بولعان كەزىڭىزدە باۋىرلاستار ٴسىزدى تۋعان باۋىرداي جاقسى كورىپ، كومەك كورسەتكەن كەزدەر ەسىڭىزدە مە؟
16. ٴبىر-ٴبىرىمىزدى تۋعان باۋىرداي جاقسى كورۋگە قانداي سەبەپتەر بار؟
16 ٴبىر-ٴبىرىمىزدى تۋعان باۋىرداي جاقسى كورەتىن بولساق، بۇنىڭ ناتيجەسى قانداي بولاتىنىن كورەيىك. باستارىنا كۇن تۋعاندا باۋىرلاستارعا جۇبانىش بەرەمىز. قۇداي حالقىنىڭ اراسىنداعى بىرلىكتى نىعايتامىز. سونداي-اق يسانىڭ شاكىرتتەرى ەكەنىمىزدى دالەلدەيمىز. بۇنى كورىپ، اقجۇرەك ادامدار شىنايى عيباداتقا تارتىلاتىن بولادى. بارىنەن بۇرىن، «قايىرىمى مول اكە جانە جۇبانىش اتاۋلىنىڭ قاينار كوزى» ەحوبانى قۋانتامىز (قور. 2-ح. 1:3). ەندەشە، ٴبارىمىز دە ٴبىر-ٴبىرىمىزدى تۋعان باۋىرداي جاقسى كورە بەرەيىك!
130-ٵن كەشىرىمدى بولايىق
^ 5-ابزاس يسا شاكىرتتەرىنىڭ ٶزارا سۇيىسپەنشىلىكتەرىمەن تانىلاتىنىن ايتقان. بارلىعىمىز وسى تالاپقا ساي ٶمىر سۇرۋگە تىرىسامىز. باۋىرلاستارعا دەگەن سۇيىسپەنشىلىگىمىز نىعايۋ ٷشىن، ولاردى تۋعان وتباسىمىزداي جاقسى كورۋدى ۇيرەنۋىمىز قاجەت. بۇل ماقالا بىزگە ٴبىر سەنىمدەگى باۋىرلاستارىمىزدى تۋعان باۋىرداي جاقسى كورە تۇسۋگە كومەكتەسەدى.
^ 55-ابزاس سۋرەت سيپاتتاماسى: جاس اقساقال تاجىريبەلى جاسى ۇلكەن اقساقالدان ۇيرەنگەندەرىنە سۇيەنىپ، ٴسوز سويلەپ جاتىر. جاسى ۇلكەن اقساقال ۇيىنە ايەلىمەن قوناققا كەلگەن سول جاس ەر باۋىرلاستى قۇشاق جايا قارسى الىپ جاتىر. ەكى وتباسى ٴبىر-بىرىنە سۇيىسپەنشىلىك پەن جومارتتىق تانىتىپ جاتىر.
