36-زەرتتەۋ ماقالاسى
ادام اۋلاۋشى بولۋعا دايىنسىز با؟
«قورىقپا! بۇدان بىلاي ادامداردى اۋلايتىن بولاسىڭ» (لۇقا 5:10).
73-ٵن باتىلدىق دارىتا كور
اڭداتپا *
1. يسا ٴتورت بالىقشىنى نە ىستەۋگە شاقىردى جانە ولار شاقىرۋدى قابىل الدى ما؟
پەتىر، ٵندىر، جاقىپ، جوحان ەسىمدى شاكىرتتەر كاسىبي بالىقشىلار بولعان. يسا ولارعا: «سوڭىمنان ەرىڭدەر، مەن سەندەردى ادام اۋلاۋشى * ەتەمىن»،— دەگەن. وسى شاقىرۋدى ەستىگەندە، ولاردىڭ قالاي تاڭعالعانىن ەلەستەتىپ كورىڭىزشى. ولار يسانىڭ شاقىرۋىن قابىل الدى ما؟ كيەلى كىتاپتا: «ولار اۋلارىن تاستاي سالا، ونىڭ سوڭىنان ەردى»،— دەلىنگەن (مات. 4:18—22). بۇل شەشىم ولاردىڭ ومىرلەرىن ماڭگىلىككە وزگەرتتى. ولار ەندى كادىمگى بالىقتىڭ ورنىنا «ادامداردى اۋلاماق» ەدى (لۇقا 5:10). بۇگىندە دە يسا شىندىقتى جاقسى كورەتىن اقجۇرەكتى ادامداردى ادام اۋلاۋشى بولۋعا شاقىرادى (مات. 28:19، 20). ٴسىز يسانىڭ وسى شاقىرۋىن قابىل الدىڭىز با؟
2. نەگە ٴبىز بالىق اۋلاۋشى بولۋعا قاتىستى شەشىمگە سەلقوس قاراماۋىمىز كەرەك جانە بىزگە وسى قادامدى جاساۋعا نە كومەكتەسەدى؟
2 بالكىم، ٴسىزدىڭ كيەلى كىتاپتى زەرتتەپ جۇرگەنىڭىزگە ٴبىراز بولعان شىعار جانە ومىرىڭىزدە كوپ وزگەرىستەر جاساعان بولارسىز. ەندى سىزگە ىزگى حاباردىڭ جاريالاۋشىسى بولۋعا قاتىستى شەشىم قابىلداۋ كەرەك. ەگەر يسانىڭ شاقىرۋىن قابىلداۋعا سەنىمدىلىگىڭىز جەتپەي جاتسا، كوڭىلىڭىز تۇسپەسىن. بۇل ٴسىزدىڭ بۇنداي شەشىمنىڭ قانشالىقتى ماڭىزدى ەكەنىن تۇسىنەتىنىڭىزدى كورسەتەدى. راس، كيەلى كىتاپتا پەتىر مەن ونىڭ جولداستارىنىڭ اۋلارىن بىردەن تاستاي سالعانى ايتىلادى. ٴبىراق ولار بۇل شەشىمدى ەش ويلانباستان قابىلداي سالعان جوق. مىسالى، پەتىر مەن ٵندىر التى ايدان اسا ۋاقىت بۇرىن يسانىڭ كىم ەكەنىن ٴبىلىپ، ونى ٴماسىح رەتىندە مويىنداپ قويعان ەدى (جوح. 1:35—42). بالكىم، ٴسىز دە ەحوبا مەن يسا جايلى كوبىرەك ٴبىلىپ قالعان بولارسىز جانە ٵرى قاراي دا رۋحاني قادام جاساعىڭىز كەلەر. ٴبىراق جاريالاۋشى بولۋعا قاتىستى شەشىمدى قابىلداماس بۇرىن، جاقسىلاپ ويلانىپ الۋىڭىز كەرەك. قازىر پەتىر مەن اندىرگە جانە ولاردىڭ جولداستارىنا بۇل شەشىمدى قابىلداۋعا نە كومەكتەسكەنىن كورەيىك.
3. شەبەر ۋاعىزداۋشى بولۋعا قانداي قاسيەتتەر كومەكتەسەدى؟
3 شەبەر بالىقشى بولعان يسانىڭ العاشقى شاكىرتتەرىنىڭ ىقىلاسى، ٴبىلىمى، باتىلدىعى مەن ەرىك-جىگەرى مىقتى ەدى. ٴدال وسى قاسيەتتەر ولارعا شەبەر ادام اۋلاۋشى بولۋعا كومەكتەسكەنى ٴسوزسىز. بۇل ماقالادا ٴبىز شەبەر ۋاعىزداۋشى بولۋ ٷشىن وسى قاسيەتتەردى قالاي دامىتا الاتىنىمىزدى قاراستىرامىز.
ىقىلاسىڭىزدى ارتتىرىڭىز
پەتىر مەن ونىڭ جولداستارى ادام اۋلاۋشى بولدى. بۇل ماڭىزدى ٸس بۇگىندە دە جالعاسۋدا (4، 5-ابزاستى قاراڭىز)
4. ادام اۋلاۋشى بولۋعا پەتىردى نە تالپىندىردى؟
4 پەتىر بالىق اۋلاۋمەن وتباسىن اسىراۋ ٷشىن اينالىسقان، ٴبىراق ول بۇل ىسكە تەك جۇمىس دەپ قاراماعان. پەتىر بالىق اۋلاۋدى جاقسى كورگەنگە ۇقسايدى (جوح. 21:3، 9—15). ول ادام اۋلاۋدى دا جاقسى كورۋدى ۇيرەندى. ەحوبانىڭ كومەگىمەن پەتىر بۇل ٸستىڭ دە قاس شەبەرىنە اينالدى (ەل. ٸس. 2:14، 41).
5. لۇقا 5:8—11 تارماقتارعا قاراساق، پەتىر نە ٷشىن قورىقتى جانە بىزگە وسىنداي سەزىمدەردى جەڭۋگە نە كومەكتەسەدى؟
5 ٴبىز ەحوبانى جاقسى كورگەندىكتەن ۋاعىزدايمىز. بۇل ٸستى اتقارۋعا دەگەن ىقىلاسىمىزدى ارتتىراتىن باستى نارسە — وسى. ەحوباعا دەگەن سۇيىسپەنشىلىگىمىز «مەن بۇل ٸستى اتقارا المايمىن» دەگەن سەزىمدى جەڭۋگە كومەكتەسەدى. ادام اۋلاۋشى بولۋعا شاقىرعان كەزدە يسا پەتىرگە: «قورىقپا!»— دەگەن (لۇقا 5:8—11 وقىڭىز). نەگىزى، پەتىر «يسانىڭ شاكىرتى بولسام، نە بولار ەكەن؟» دەپ قورقىپ تۇرعان جوق ەدى. ول يسانىڭ كەرەمەت تۇردە ولارعا كوپ بالىق ۇستاپ بەرگەنىنە قايران قالىپ، يسامەن بىرگە ٴبىر ٸستى اتقارۋعا ٶزىن لايىقسىز سەزىندى. بالكىم، ٴسىز دە پەتىر سياقتى قورقىپ، «يسانىڭ شاكىرتى بولسام، وزىمنەن تالاپ ەتىلەتىن ٸستى اتقارا الامىن با؟» دەپ ۋايىمدارسىز. ەگەر سولاي بولسا، ەحوباعا، يساعا جانە وزگەلەرگە دەگەن سۇيىسپەنشىلىگىڭىزدى ارتتىرىڭىز. بۇل ٴسىزدىڭ ادام اۋلاۋشى بولۋعا قاتىستى يسانىڭ شاقىرۋىن قابىل الۋعا دەگەن ىقىلاسىڭىزدى وياتادى (مات. 22:37، 39؛ جوح. 14:15).
6. ٴبىزدى ۋاعىزداۋعا تاعى نە نارسە تالپىندىرادى؟
6 ٴبىزدى ۋاعىزداۋعا تالپىندىراتىن تاعى بىرنەشە سەبەپكە توقتالايىق. ٴبىز يسانىڭ: «بارىڭدار دا... شاكىرتتەر دايىنداڭدار»،— دەگەن بۇيرىعىنا مويىنسۇنعىمىز كەلەدى (مات. 28:19، 20). ۋاعىزداۋىمىزدىڭ تاعى ٴبىر سەبەبى — ادامدار «ازىپ-توزعان، بەيشارا كۇيدە»، ولار پاتشالىق جايلى شىندىقتى ەستۋگە ٴزارۋ (مات. 9:36). ەحوبا ٵرتۇرلى ادامداردىڭ شىندىق جايلى تۋرا ٴبىلىم الىپ، قۇتقارىلعانىن قالايدى (ٴتىم. 1-ح. 2:4).
7. ۋاعىز ٸسىنىڭ ماڭىزدىلىعى ريمدىكتەرگە 10:13—15 تارماقتاردان قالاي كورىنەدى؟
7 ۋاعىز ٸسى ادامداردىڭ ٶمىرىن قۇتقاراتىنى جايلى ويلاساق، بۇل ۋاعىزداۋعا دەگەن قالاۋىمىزدى ارتتىرادى. اۋلاعان بالىقتارىن ساتىپ، جەۋمەن عانا شەكتەلەتىن كاسىبي بالىقشىدان ايىرماشىلىعىمىز — ٴبىز ادامداردى ومىرلەرىن قۇتقارۋ ٷشىن «اۋلايمىز» (ريمدىكتەرگە 10:13—15 وقىڭىز؛ ٴتىم. 1-ح. 4:16).
ٴبىلىمىڭىزدى ارتتىرىڭىز
8، 9. بالىقشىلار نەنى ٴبىلۋ كەرەك جانە نەگە؟
8 يسانىڭ كۇندەرىندە يسرايلدىك بالىقشىلار سۋدا مەكەندەيتىندەردىڭ قايسىسىن اۋلاۋعا بولاتىنىن جاقسى ٴبىلۋ كەرەك بولعان (مۇس. 3-ج. 11:9—12). سونداي-اق ولار بالىقتى قايدان اۋلاۋعا بولاتىنىن دا جاقسى ٴبىلۋ كەرەك-ٴتىن. ادەتتە بالىقتار سۋى جاعىمدى، ازىق كوپ جەردە جۇرەدى. بالىقشىنىڭ قاي ۋاقىتتا بالىق اۋلاۋعا باراتىنى دا ماڭىزدى. وسىعان قاتىستى ٴبىر وقيعانى كورەيىك. تىنىق مۇحيت ارالدارىندا تۇراتىن كۋاگەر ٴبىر ميسسيونەر باۋىرلاستى بالىق اۋلاۋعا شاقىرعان ەكەن. ميسسيونەر باۋىرلاس وعان: «ەرتەڭ تاڭەرتەڭ توعىزدا كەزدەسەيىك»،— دەيدى. ٴبىراق جەرگىلىكتى باۋىرلاس وعان: «سەن تۇسىنبەدىڭ، ٴبىز وزىمىزگە ىڭعايلى ۋاقىتتا ەمەس، بالىق اۋلاۋعا قولايلى ۋاقىتتا بارامىز»،— دەپ جاۋاپ بەردى.
9 I عاسىرداعى ادام اۋلاۋشىلار دا بەينەلى بالىقتاردىڭ قايدا جانە قاشان جۇرەتىنىن جاقسى بىلگەن. مىسالى، يسانىڭ ٸزباسارلارى عيباداتحانادا، ٴماجىلىسحانالاردا، ۇيمە-ٷي جانە بازار الاڭدارىندا ۋاعىزداعان (ەل. ٸس. 5:42؛ 17:17؛ 18:4). ٴبىز دە ٶزىمىزدىڭ ايماعىمىزدا تۇراتىن ادامداردى جاقسى ٴبىلۋىمىز كەرەك. ولارعا بەيىمدەلىپ، ادامدار كوپ جۇرەتىن جەردە جانە ولاردىڭ كوبىسىن تابۋعا بولاتىن ۋاقىتتا ۋاعىزداۋىمىز كەرەك (قور. 1-ح. 9:19—23).
شەبەر بالىقشى... 1. قولايلى ۋاقىتتا جانە قولايلى جەردە بالىق اۋلايدى (8، 9-ابزاستى قاراڭىز)
10. ەحوبانىڭ ۇيىمى ٴبىزدى قانداي قۇرالدارمەن جابدىقتاعان؟
10 ادەتتە بالىقشىنىڭ جاقسى قۇرالدارى بولۋ كەرەك. سونداي-اق ول ولاردى دۇرىس قولدانا ٴبىلۋى قاجەت. ٴبىز دە وزىمىزگە تاپسىرىلعان ٸستى اتقارۋ ٷشىن جاقسى جابدىقتالىپ، قۇرالدارىمىزدى قولدانا بىلگەنىمىز ٴجون. يسا ٶز شاكىرتتەرىنە ادامداردى قالاي اۋلاۋ كەرەكتىگىنە قاتىستى ناقتى نۇسقاۋلار بەرگەن. ول ولارعا وزدەرىمەن بىرگە نە الىپ ٴجۇرۋ كەرەكتىگىن، قاي جەردە ۋاعىزداۋ كەرەكتىگىن جانە نە ايتۋ كەرەكتىگىن ۇيرەتكەن (مات. 10:5—7؛ لۇقا 10:1—11). بۇگىندە ەحوبانىڭ ۇيىمى ٴبىزدى «ٴتالىم بەرۋ قۇرالدارىمەن» جابدىقتاعان. بۇل قۇرالدار بۇگىندە وتە ٴتيىمدى *. ەحوبانىڭ ۇيىمىندا ٴبىز ولاردى قالاي قولدانۋدى دا ۇيرەنىپ جاتىرمىز. بۇل بىزگە سەنىمدىلىكپەن ۋاعىزداۋعا ٵرى شەبەر تالىمگەر بولۋعا كومەكتەسەدى (ٴتىم. 2-ح. 2:15).
شەبەر بالىقشى... 2. ٶز قۇرالدارىن دۇرىس قولدانا بىلەدى (10-ابزاستى قاراڭىز)
باتىلدىعىڭىزدى ارتتىرىڭىز
11. نەگە ادام اۋلاۋشىلاردىڭ باتىل بولۋى قاجەت؟
11 كاسىبي بالىقشىلاردىڭ باتىل بولعانى ماڭىزدى. ولار ٴجيى سۋدىڭ ورتاسىندا تۇنىمەن جۇمىس ىستەيدى. ال تەڭىزدە جاعداي اياقاستىنان كۇرت وزگەرىپ، كەز كەلگەن ۋاقىتتا داۋىل باستالىپ كەتۋى مۇمكىن. ادام اۋلاۋشىلارعا دا باتىلدىق قاجەت. ويتكەنى ٴبىز ۋاعىزداپ، ٶزىمىزدىڭ ەحوبا كۋاگەرى ەكەنىمىزدى ايتا باستاعاندا، بەينەلى داۋىلدارعا كەزىگۋىمىز مۇمكىن. مىسالى، وتباسىمىز بىزگە قارسى شىعاتىن شىعار، تانىستارىمىز ۇستىمىزدەن كۇلەر، يا بولماسا كەيبىرەۋلەر ٴبىزدى تىڭداۋدان باس تارتار. ٴبىراق ٴبىز بۇعان تاڭعالمايمىز، ويتكەنى يسا ٸزباسارلارىن قارسىلاستارىنىڭ ورتاسىنا ۋاعىزداۋعا جىبەرەتىنىن ايتقان (مات. 10:16).
12. ەشۋا 1:7—9 تارماقتارعا ساي، باتىلدىعىمىزدى ارتتىرۋعا نە كومەكتەسەدى؟
12 باتىلدىعىڭىزدى قالاي ارتتىرا الاسىز؟ بىرىنشىدەن، ۋاعىز ىسىنە يسانىڭ كوكتەن جەتەكشىلىك ەتىپ جاتقانىنا كوز جەتكىزىپ الىڭىز (جوح. 16:33؛ ايان 14:14—16). ەكىنشىدەن، ەحوبانىڭ ٴسىزدىڭ قامىڭىزدى ويلايتىنىنا دەگەن سەنىمىڭىزدى نىعايتىڭىز (مات. 6:32—34). سەنىمىڭىز مىقتى بولعان سايىن، باتىلدىعىڭىز دا ارتا تۇسەدى. پەتىر مەن ونىڭ جولداستارى تابىس كوزدەرىن تاستاپ، يسانىڭ سوڭىنان ەرۋىمەن مىقتى سەنىمدەرىن كورسەتتى. سول سياقتى، ٴسىز دە ەحوبا كۋاگەرلەرىمەن كيەلى كىتاپتى زەرتتەيتىنىڭىزدى جانە قاۋىم كەزدەسۋلەرىنە باراتىنىڭىزدى تانىستارىڭىز بەن جاقىندارىڭىزعا ايتۋىڭىزبەن زور سەنىمىڭىزدى كورسەتتىڭىز. ٴجۇرىس-تۇرىسىڭىز بەن ٶمىر سالتىڭىز ەحوبانىڭ ٵدىل نورمالارىنا ساي كەلۋ ٷشىن ٴسىز كوپتەگەن وزگەرىستەر جاسادىڭىز. بۇل دا سەنىم مەن باتىلدىقتى تالاپ ەتتى. باتىلدىعىڭىزدى ٵرى قاراي دا ارتتىرار بولساڭىز، قايدا بارساڭىز دا قۇدايىڭىز ەحوبا سىزگە «جار بولاتىنىنا» سەنىمدى بولاسىز (ەشۋا 1:7—9 وقىڭىز).
شەبەر بالىقشى... 3. باتىلدىقپەن كەز كەلگەن جاعدايدا جۇمىس ىستەي بەرەدى (11، 12-ابزاستى قاراڭىز)
13. وي جۇگىرتۋ مەن دۇعا ەتۋ باتىلدىعىڭىزدى قالاي ارتتىرادى؟
13 باتىل بولۋ ٷشىن تاعى نە ىستەۋىڭىز كەرەك؟ باتىلدىق سۇراپ، ەحوباعا دۇعا ەتىڭىز (ەل. ٸس. 4:29، 31). ەحوبا دۇعالارىڭىزعا جاۋاپ بەرەدى جانە ول ٴسىزدى ەشقاشان تاستامايدى. ٴسىزدى قولداۋ ٷشىن ول ٵردايىم قاسىڭىزدان تابىلادى. ەحوبانىڭ ەجەلدە ٶز قىزمەتشىلەرىن قالاي قۇتقارعانى جايلى وي جۇگىرتىڭىز. قيىندىقتارىڭىزدى جەڭۋگە جانە ومىرىڭىزدە وزگەرىستەر جاساۋعا ەحوبانىڭ قالاي كومەكتەسكەنى جايلى دا ويلانىڭىز. ٶز حالقىن قىزىل تەڭىزدەن وتكىزگەن قۇداي سىزگە دە ٴماسىحتىڭ شاكىرتى بولۋعا ٴسوزسىز كومەكتەسە الادى (مۇس. 2-ج. 14:13). «ەحوبا مەنىڭ جاعىمدا؛ مەن ەش قورىقپايمىن. ادام بالاسى ماعان نە ىستەي الادى؟!»— دەپ ايتقان ٴزابۇر جىرشىسى سياقتى، ٴسىز دە ەحوباعا سەنىم ارتىڭىز (ٴزاب. 118:6).
14. ماساە مەن تاموەنىڭ وقيعالارىنان نە ۇيرەندىڭىز؟
14 ەحوبانىڭ تابيعاتىنان ۇياڭ ادامدارعا باتىل بولۋعا كومەكتەسكەنى دە باتىلدىعىمىزدى ارتتىرادى. مىسالى، ماساە ەسىمدى قىز باۋىرلاس وتە ۇيالشاق بولعان. ول سەنىمى جايلى وزگەلەرگە ەشقاشان ايتا المايمىن دەپ ويلاعان. وعان بەيتانىس ادامدارمەن سويلەسۋدىڭ قيىن بولعانى سونشا — بۇل ول ٷشىن اسا المايتىن بەلەستەي كورىنگەن. ٴبىراق ول ەحوباعا جانە وزگەلەرگە دەگەن سۇيىسپەنشىلىگىن ارتتىرۋ ٷشىن ەرەكشە كۇش سالدى. ماساە ۋاعىزداۋ ٸسىنىڭ قانشالىقتى شۇعىل ٸس ەكەنى جايلى وي جۇگىرتتى جانە ۋاعىزداۋعا دەگەن ىنتاسىن ارتتىرۋدى سۇراپ، ەحوباعا دۇعا ەتتى. اقىرىندا، ول قورقىنىشىن جەڭدى، ٴتىپتى تۇراقتى ٸزاشار بولىپ قىزمەت ەتتى. ەحوبا جاڭا جاريالاۋشىلارعا دا «باتىل بولۋعا» كومەكتەسە الادى. بۇنى تاموە باۋىرلاستىڭ وقيعاسىنان كورۋگە بولادى. ول العاش رەت ۇيمە-ٷي ۋاعىزداعاندا ٴبىر ايەل شىعىپ: «مەن ەحوبا كۋاگەرلەرىمەن سويلەسكىم كەلمەيدى!»— دەپ ايعايلاپ، ەسىكتى تارس جاۋىپ قويادى. سوندا قورقىنىشقا ەش بوي الدىرماعان تاموە سەرىگىنە: «نە ايتقانىن ەستىدىڭ بە؟ مەن بىردە-ٴبىر ٴسوز ايتىپ ۇلگەرمەدىم، ٴبىراق ول مەنىڭ ەحوبا كۋاگەرى ەكەنىمدى تانىدى. سوعان مەن قاتتى قۋانىشتىمىن»،— دەيدى. تاموە قازىر تۇراقتى ٸزاشار بولىپ قىزمەت ەتەدى.
ەرىك-جىگەرىڭىزدى ارتتىرىڭىز
15. ەرىك-جىگەر دەگەنىمىز نە جانە نەگە بۇل ماسىحشىلەرگە قاجەت قاسيەت؟
15 تابىستى بالىقشىلاردىڭ ەرىك-جىگەرلەرى مىقتى كەلەدى. ەرىك-جىگەر دەگەنىمىز — ادامنىڭ ٶزىن-وزىنە باعىندىرىپ، ىستەلۋ قاجەت نارسەنى ىستەي ٴبىلۋ قابىلەتى. كاسىبي بالىقشىلاردىڭ ەرىك-جىگەرى مىقتى بولعانى ماڭىزدى، ويتكەنى ولارعا ەرتە تۇرۋ كەرەك، اۋا رايىنىڭ قانداي بولعانىنا قاراماي، جۇمىستارىن سوڭىنا دەيىن اتقارۋ قاجەت. بىزگە دە تاباندى بولىپ، جۇمىسىمىزدى سوڭىنا دەيىن اتقارۋ ٷشىن ەرىك-جىگەر قاجەت (مات. 10:22).
16. ٴبىز ەرىك-جىگەرىمىزدى قالاي ارتتىرا الامىز؟
16 ٴبىز ەرىك-جىگەرمەن تۋىلمايمىز. كەرىسىنشە، ٴبىز تابيعاتىمىزدان كۇش سالۋدى قاجەت ەتپەيتىن ىستەردى ىستەۋگە بەيىمبىز. ەرىك-جىگەر بولۋ ٷشىن ۇستامدىلىق قاسيەتى كەرەك. بىزگە ىستەگىمىز كەلمەيتىن ىستەردى ىستەپ ۇيرەنۋ ٷشىن كومەك قاجەت. بۇل كومەكتى ەحوبا بىزگە كيەلى رۋحى ارقىلى بەرەدى (عال. 5:22، 23).
17. قورىنتتىقتارعا 1-حات 9:25—27 تارماقتارعا ساي، پاۋىل ٶزىنىڭ ەرىك-جىگەرىن قالاي ارتتىرعانى جايلى نە دەگەن؟
17 ەلشى پاۋىلدىڭ ەرىك-جىگەرى مىقتى بولعان. ٴبىراق ول دۇرىس نارسەنى ىستەۋ ٷشىن دەنەسىن «ۇرعىلاۋعا» تۋرا كەلگەنىن ايتقان (قورىنتتىقتارعا 1-حات 9:25—27 وقىڭىز). ول وزگەلەردى دە وزدەرىن تاربيەلەۋگە، بارلىعىن «لايىقتى ٵرى تارتىپپەن» جاساۋعا شاقىرعان (قور. 1-ح. 14:40). رۋحاني كەستەنى مىقتاپ ۇستانۋ ٷشىن، سونىڭ ىشىندە بەينەلى بالىق اۋلاۋ ىسىنە اتسالىسۋ ٷشىن، بىزگە ەرىك-جىگەرىمىزدى قايراۋ قاجەت (ەل. ٸس. 2:46).
كەيىنگە شەگەرمەڭىز
18. ەحوبا ۋاعىزىمىزدى ناتيجەلى دەپ ٴبىلۋ ٷشىن نە ىستەۋىمىز قاجەت؟
18 كاسىبي بالىقشىلار ىستەرىنىڭ قانشالىقتى ناتيجەلى ەكەنىن قانشا بالىق ۇستاعاندارىنا قاراپ انىقتايدى. ال ٴبىزدىڭ جەمىستى بولۋىمىز قۇدايدىڭ ۇيىمىنا قانشا ادام اكەلگەنىمىزگە بايلانىستى ەمەس (لۇقا 8:11—15). ەگەر ٴبىز تاباندى بولىپ، ىزگى حاباردى ۋاعىزداي بەرسەك جانە وزگەلەرگە ٴتالىم بەرە بەرسەك، ەحوبا ٴبىزدىڭ ٸسىمىزدى جەمىستى دەپ بىلەدى. ويتكەنى ٴبىز وعان جانە ونىڭ ۇلىنا مويىنسۇنىپ ٴجۇرمىز (مار. 13:10؛ ەل. ٸس. 5:28، 29).
19، 20. بۇگىندە ٴبىز قانداي ەرەكشە سەبەپپەن ۋاعىزدايمىز؟
19 كەيبىر ەلدەردە بالىق اۋلاۋعا بەلگىلى ٴبىر ايلاردا عانا رۇقسات ەتىلەدى. بالىقشىلار بالىق اۋلاۋ ماۋسىمى اياقتالايىن دەپ جاتقان كەزدە بۇل ٸستى شۇعىل اتقارۋعا تىرىسادى. بۇگىندە ادام اۋلاۋشىلار دا ۋاعىز ىسىنە ٴدال وسىنداي سەبەپپەن اتسالىسىپ ٴجۇر: وسى دۇنيەنىڭ سوڭى تەز تاياپ كەلەدى. ادامداردىڭ ٶمىرىن قۇتقاراتىن بۇل ىسكە بەرىلگەن ۋاقىت ٴبىتىپ بارادى! سوندىقتان بۇل ٸستى كەيىنگە شەگەرمەڭىز جانە وعان اتسالىسۋ ٷشىن جاعدايىم تولىقتاي كەرەمەت بولۋ كەرەك دەپ ويلاماڭىز (ۋاع. 11:4).
20 قازىردەن باستاپ ىقىلاسىڭىزدى، ٴبىلىمىڭىزدى، باتىلدىعىڭىزدى جانە ەرىك-جىگەرىڭىزدى ارتتىرىڭىز. سەگىز ميلليوننان استام ادام اۋلاۋشىلارىنا قوسىلىپ، ەحوبا سيلايتىن قۋانىشقا كەنەلىڭىز (نەح. 8:10). بۇل ىسكە بارىنشا اتسالىسۋعا بەلىڭىزدى بەكەم بۋىڭىز جانە ەحوبا ۋاقىت ٴبىتتى دەمەيىنشە، توقتاماڭىز. كەلەسى ماقالادا ٴبىز پاتشالىق تۋرالى ىزگى حاباردى تالماي جاريالاي بەرۋگە كومەكتەسەتىن ٷش جايتتى قاراستىرامىز.
66-ٵن ىزگى حاباردى جاريالايىق
^ 5-ابزاس يسا كىشىپەيىل دە ەڭبەكقور بالىقشىلاردى ٶزىنىڭ شاكىرتى بولۋعا شاقىرعان. بۇگىندە دە يسا تۋرا وسىنداي قاسيەت تانىتاتىن ادامداردى ادام اۋلاۋشى بولۋعا شاقىرىپ كەلەدى. بۇل ماقالادا ٴبىز يسانىڭ شاقىرۋىن قابىلداۋعا تارتىناتىن كيەلى كىتاپتى زەرتتەۋشىلەر نە ىستەي الاتىندارىن تالقىلايمىز.
^ 1-ابزاس ٴسوز ٴمانى: «ادام اۋلاۋشى» دەگەن تىركەس ىزگى حاباردى ۋاعىزدايتىنداردىڭ جانە وزگەلەرگە ٴتالىم بەرىپ، ٴماسىحتىڭ شاكىرتى بولۋعا كومەكتەسەتىندەردىڭ بارلىعىنا قاتىستى ايتىلعان.
^ 10-ابزاس 2018-جىلعى «كۇزەت مۇناراسىنىڭ» قازان ايىنداعى سانىنان «شىندىقتى ۇيرەتەيىك» دەگەن ماقالانى قاراڭىز (9—15 ب.).
