37-زەرتتەۋ ماقالاسى
«قولىڭ تىنىم تاپپاسىن»
«تۇقىمىڭدى تاڭەرتەڭ سەپ، كەشكە دەيىن دە قولىڭ تىنىم تاپپاسىن» (ۋاع. 11:6).
68-ٵن پاتشالىق تۇقىمىن سەبەيىك!
اڭداتپا *
1، 2. ۋاعىزداۋشى 11:6 داعى سوزدەر مەن پاتشالىق تۋرالى ىزگى حاباردى ۋاعىزداۋدىڭ اراسىندا قانداي بايلانىس بار؟
كەيبىر ەلدەردە ىزگى حاباردى زور ىقىلاسپەن تىڭدايتىن ادامدار كوپتەپ كەزدەسەدى. ولار تۋرا ٴبىر وسى حاباردى كۇتىپ وتىراتىنداي! ال وزگە جەرلەردە ادامدار قۇدايعا جانە كيەلى كىتاپقا اسا قىزىعۋشىلىق تانىتا بەرمەيدى. ال ٴسىز تۇراتىن جەردە ادامدار ىزگى حابارعا قالاي قارايدى؟ ولار حابارىمىزدى تىڭداسىن-تىڭداماسىن، ەحوبا ۋاعىزدايتىن ۋاقىت بىتكەنشە، ٴبىزدىڭ ىزگى حاباردى جاريالاي بەرگەنىمىزدى قالايدى.
2 ەحوبا بەلگىلەپ قويعان ۋاقىتتا ۋاعىز ٸسى ٶز مارەسىنە جەتەدى دە، «وسى زاماننىڭ سوڭى كەلەدى» (مات. 24:14، 36). ال سول ۋاقىت كەلگەنشە، قالاي ٴبىز كيەلى كىتاپتاعى «قولىڭ تىنىم تاپپاسىن *» دەگەن سوزدەرگە قۇلاق اساتىنىمىزدى كورسەتە الامىز؟ (ۋاعىزداۋشى 11:6 وقىڭىز).
3. بۇل ماقالادا ٴبىز نە قاراستىرامىز؟
3 الدىڭعى ماقالادا ٴبىز شەبەر «ادام اۋلاۋشى» بولۋعا كومەكتەسەتىن ٴتورت جايتتى قاراستىردىق (مات. 4:19). ال بۇل ماقالادا ٴبىز ەشقانداي كەدەرگىلەرگە قاراماستان، تالماي ۋاعىزداي بەرۋگە كومەكتەسەتىن ماڭىزدى ٷش جايتتى قاراستىرامىز. ولار: 1) بار نازارىمىزدى ۋاعىز ىسىنە اۋدارۋ، 2) شىدامدى بولۋ جانە 3) سەنىمىمىزدى بەرىك ەتىپ ساقتاۋ.
بار نازارىڭىزدى ۋاعىز ىسىنە اۋدارىڭىز
4. نەگە ٴبىز بار نازارىمىزدى ەحوبا تاپسىرعان ىسكە اۋدارۋىمىز كەرەك؟
4 يسا سوڭعى كۇندەرى ادامداردىڭ قانداي بولىپ كەتەتىنىن جانە قانداي جاعدايلار ورىن الاتىنىن الدىن الا ايتىپ كەتكەن. بۇل جايتتار يسانىڭ ٸزباسارلارىن ىزگى حاباردى ۋاعىزداۋدان الاڭداتۋى مۇمكىن ەدى. سوندىقتان يسا شاكىرتتەرىنە: «سەرگەك بولىڭدار!»— دەگەن (مات. 24:42). توپان سۋدىڭ الدىندا ادامدارعا نۇحتىڭ ەسكەرتۋىنە دەن قويۋعا كەدەرگى جاسايتىن نارسەلەر كوپ بولعانىنداي، بۇگىندە دە ٴبىزدى الاڭداتاتىن نارسەلەر كوپ (مات. 24:37—39؛ پەت. 2-ح. 2:5). سول سەبەپتەن ٴبىز بار نازارىمىزدى ەحوبا تاپسىرعان ىسكە اۋدارعىمىز كەلەدى.
5. ەلشىلەردىڭ ىستەرى 1:6—8 تارماقتاردا ۋاعىز ٸسىنىڭ اۋقىمى قالاي سيپاتتالعان؟
5 بۇگىندە ٴبىز بار نازارىمىزدى پاتشالىق تۋرالى ۋاعىز ىسىنە اۋدارۋىمىز كەرەك. يسا ۋاعىز ٸسى ٶزى ولگەننەن كەيىن دە جالعاساتىنىن ٵرى الدەقايدا كەڭ تارالاتىنىن ايتقان (جوح. 14:12). يسا ولگەننەن كەيىن، ونىڭ كەيبىر شاكىرتتەرى بالىق اۋلاۋعا ورالعان ەدى. يسا قايتا تىرىلگەن سوڭ كەرەمەت جاساپ، ولارعا كوپ بالىق ۇستاۋعا كومەكتەستى. ول وسى جاعدايدى قولدانىپ، ۋاعىزداۋ مەن شاكىرت دايىنداۋ ٸسىنىڭ كەز كەلگەن ىستەن ماڭىزدى ەكەنىنە باسا نازار اۋداردى (جوح. 21:15—17). ال كوككە كوتەرىلەر الدىندا ول شاكىرتتەرىنە ٶزى باستاعان ۋاعىز ٸسىنىڭ يسرايلگە عانا ەمەس، ودان دا كوپ جەرلەرگە تارالاتىنىن ايتتى (ەلشىلەردىڭ ىستەرى 1:6—8 وقىڭىز). بىرنەشە جىلدان كەيىن، يسا ايان ارقىلى ەلشى جوحانعا «يەمىزدىڭ كۇنىندە» نە بولاتىنىن كورسەتتى *. جوحاننىڭ كورگەن كەرەمەت كورىنىستەرىنىڭ ٴبىرى مىناداي ەدى: ول ٴبىر پەرىشتەنىڭ «ٵربىر ۇلت، رۋ، ٴتىل جانە حالىققا جاريالايتىن ماڭگىلىك ىزگى حابارى بار ەكەنىن» كوردى (ايان 1:10؛ 14:6). راسىندا دا، ەحوبا ۋاعىزدايتىن ۋاقىت بىتكەنشە، ٴبىزدىڭ وسى ۇلى ىسكە اتسالىسقانىمىزدى قالايدى.
6. بار نازارىمىزدى ۋاعىز ىسىنە تىگۋ ٷشىن نە ىستەسەك بولادى؟
6 بار نازارىمىزدى ۋاعىز ىسىنە تىگۋ ٷشىن، ٴبىز ەحوبانىڭ بىزگە قالاي كومەكتەسىپ جاتقانى جايلى وي جۇگىرتۋىمىز كەرەك. مىسالى، ول ٴبىزدى باسپا جانە ەلەكتروندى ادەبيەتتەر ارقىلى، اۋديو-ۆيدەو باسىلىمدار ارقىلى، برودكاستينگ باعدارلاماسى ارقىلى رۋحاني اس-سۋمەن مولىنان قامتاماسىز ەتىپ جاتىر. ويلاپ كورىڭىزشى، رەسمي تور بەكەتىمىزدەگى مالىمەتتەر 1000 نان استام تىلدە قولجەتىمدى! (مات. 24:45—47). مىنا الەم ساياسي كوزقاراسىنا، دىنىنە، تۇرمىس دەڭگەيىنە قاراي جىك-جىككە بولىنگەن. ال دۇنيەجۇزى بويىنشا 8 ميلليوننان استام قۇدايدىڭ قىزمەتشىلەرى بولسا شىنايى بىرلىكتىڭ راقاتىن كورىپ ٴجۇر. مىسالى، 2019-جىلدىڭ 19-ساۋىرىندە دۇنيەنىڭ تۇكپىر-تۇكپىرىندەگى كۋاگەرلەر كۇندەلىكتى تارماق تالقىلانعان ۆيدەونى تاماشالادى. ال سول كۇنى كەشكە 20919041 ادام يسانىڭ ولگەن كۇنىن ەسكە الدى. ٴبىزدىڭ كۇندەرىمىزدە ورىن الىپ جاتقان وسى ٴبىر كەرەمەتكە كۋا بولىپ، وعان اتسالىسىپ جاتقانىمىز جايلى وي جۇگىرتكەنىمىز بار نازارىمىزدى پاتشالىق ىسىنە اۋدارۋعا كومەكتەسەدى.
يسا شىندىق جايلى كۋالىك ەتكەندە، ەش نارسەگە الاڭدامادى (7-ابزاستى قاراڭىز)
7. يسانىڭ ۇلگىسى بار نازارىمىزدى ۋاعىز ىسىنە اۋدارۋعا قالاي كومەكتەسەدى؟
7 بار نازارىمىزدى ۋاعىز ىسىنە اۋدارۋدىڭ تاعى ٴبىر جولى — يسانىڭ ۇلگىسىنە ەلىكتەۋ. ول شىندىق تۋرالى كۋالىك ەتكەندە، ەش نارسەگە الاڭداماعان (جوح. 18:37). شايتان وعان «الەمنىڭ بارلىق پاتشالىقتارى مەن ولاردىڭ ٴسان-سالتاناتىن» ۇسىنعاندا دا، وزگەلەر ونى پاتشا ەتۋگە تىرىسقاندا دا يسا ازعىرۋلارعا ەش بەرىلمەدى (مات. 4:8، 9؛ جوح. 6:15). ول بايلىق قۋىپ، الاڭداپ كەتپەدى، قۋعىن-سۇرگىن كەزىندە دە قورقىنىشقا بوي الدىرمادى (لۇقا 9:58؛ جوح. 8:59). ٴبىز سىناققا كەزىككەندە ەلشى پاۋىلدىڭ كەڭەسىن ەستە ۇستاساق، نازارىمىزدى ۋاعىز ىسىنەن تايدىرىپ المايمىز. ول ماسىحشىلەردى «قاجىماي، ۇنجىرعالارى تۇسپەۋ» ٷشىن يسانىڭ ۇلگىسىنە ەلىكتەۋگە شاقىرعان (ەۆر. 12:3).
شىدامدى بولىڭىز
8. شىدامدىلىق دەگەنىمىز نە جانە بۇل قاسيەت نەگە اسىرەسە قازىر قاجەت؟
8 شىدامدىلىق دەگەنىمىز — جاعدايدىڭ وزگەرۋىن سابىرمەن كۇتە ٴبىلۋ قابىلەتى. جاعىمسىز جاعدايلاردىڭ اياقتالعانىن قالاعاندا، يا جاقسى نارسەنىڭ ورىن العانىن ۇزاق ۋاقىت كۇتىپ جۇرگەندە بىزگە شىدامدىلىق قاجەت. اباقۇق پايعامبار ياھۋداداعى زورلىق-زومبىلىقتىڭ تىيىلعانىن اڭساعان (ابق. 1:2). يسانىڭ شاكىرتتەرى دە پاتشالىق بىردەن ورناپ، ولاردى ريمنىڭ ەزگىسىنەن قۇتقارادى دەپ ۇمىتتەندى (لۇقا 19:11). ٴبىز دە قۇداي پاتشالىعىنىڭ زۇلىمدىقتى جويىپ، ٵدىل ادامدار ٶمىر سۇرەتىن جاڭا دۇنيەنى ورناتاتىن كەزىن اڭساپ ٴجۇرمىز (پەت. 2-ح. 3:13). الايدا ٴبىز ەحوبا بەلگىلەگەن ۋاقىتتى شىدامدىلىقپەن كۇتۋىمىز كەرەك. قازىر ەحوبانىڭ ٶزى ٴبىزدى قالاي شىدامدىلىققا ۇيرەتەتىنىن كورەيىك.
9. ەحوبانىڭ شىدامدى ەكەنى قانداي جاعدايلاردان كورىنەدى؟
9 ەحوبا — شىدامدىلىقتىڭ كەمەلدى ۇلگىسى. ول نۇحقا كەمە سوعىپ، ادامدارعا توپان سۋ جايلى ەسكەرتۋ ٷشىن جەتكىلىكتى ۋاقىت بەردى (پەت. 2-ح. 2:5؛ پەت. 1-ح. 3:20). ەحوبا سودوم مەن عومورانىڭ زۇلىم تۇرعىندارىن جويۋدى ۇيعارعاندا، وسى شەشىمىنە قاتىستى قايتا-قايتا سۇراق قويعان ىبىرايىمدى شىداممەن تىڭدادى (مۇس. 1-ج. 18:20—33). سونداي-اق ەحوبا وپاسىز يسرايل حالقىنا عاسىرلار بويى ەرەكشە شىدامدىلىق تانىتتى (نەح. 9:30، 31). ٴبىز دە بۇگىندە ونىڭ شىدامدىلىعىنا كۋا بولىپ ٴجۇرمىز. ول وزىنە جاقىنداعىسى كەلگەندەر وكىنۋ ٷشىن ولارعا جەتكىلىكتى ۋاقىت بەرىپ جاتىر (پەت. 2-ح. 3:9؛ جوح. 6:44؛ ٴتىم. 1-ح. 2:3، 4). ەحوبانىڭ شىدامدىلىعى — ٴبىزدىڭ دە ۋاعىزداۋ مەن شاكىرت دايىنداۋ ىسىندە شىدامدىلىق تانىتۋىمىزعا كەلەلى سەبەپ. ال ەندى ەحوبا ٴبىزدى شىدامدىلىققا ۇيرەتۋ ٷشىن كيەلى كىتاپقا قانداي مىسال جازدىرعانىن كورەيىك.
شىدامدى دا، ەڭبەكقور ديقان سياقتى، ٴبىز دە ەڭبەگىمىزدىڭ جەمىسىن كۇتەمىز (10، 11-ابزاستى قاراڭىز)
10. جاقىپ 5:7، 8 دە جازىلعان ديقان جايلى مىسالدان نە ۇيرەنەمىز؟
10 جاقىپ 5:7، 8 وقىڭىز. ٴبىز ەگىن ەككەن ديقاننىڭ مىسالىنان شىدامدى بولۋدى ۇيرەنە الامىز. راس، كەيبىر وسىمدىكتەر تەز وسەدى. ٴبىراق وسىمدىكتەردىڭ كوبىسى، اسىرەسە جەمىس بەرەتىندەرى، ۇزاق ۋاقىت ٴپىسىپ-جەتىلەدى. يسرايلدە ەگىندىك وسەتىن ماۋسىم شامامەن 6 ايعا سوزىلعان. ديقان كۇزگى جاڭبىردان كەيىن تۇقىمىن سەۋىپ، كوكتەمگى جاڭبىردان كەيىن ٶنىمىن جيناپ الاتىن بولعان (مار. 4:28). ٴبىزدىڭ دە وسى ديقان سياقتى شىدامدى بولعانىمىز دۇرىس. ٴبىراق بۇل وڭاي بولماۋى مۇمكىن.
11. شىدامدى بولعانىمىز بىزگە قىزمەتتە قاي جاعىنان كومەكتەسەدى؟
11 ادەتتە كەمەلسىز ادامدار ەڭبەكتەرىنىڭ جەمىسىن بىردەن كورگىسى كەلەدى. ٴبىراق ديقان جايلى مىسالدى ۇمىتپايىق. ول ەگىستىگى ٶنىم بەرۋ ٷشىن وعان ۇنەمى كۇتىم جاسايدى. مىسالى، ول جەر اۋدارادى، ەگىن ەگەدى، ارامشوپتەردى جۇلادى، سۋارادى. تۋرا سول سياقتى، شاكىرت دايىنداۋ ٸسى دە ۇنەمى ەڭبەك ەتۋدى تالاپ ەتەدى. زەرتتەۋشىلەرىمىزدىڭ جۇرەگىن ارامشوپتەي تامىر جايعان الالاۋشىلىق، نەمكەتتىلىك سياقتى قاسيەتتەردەن تازارتۋ ٷشىن، ۋاقىت قاجەت. قىزمەتتە شىدامدىلىق تانىتساق، ادامدار ٴبىزدى تىڭداماعان كەزدە كوڭىلىمىز تۇسپەيدى. وزگەلەر ٴبىزدى تىڭداعان جاعدايدا دا شىدامدى بولۋىمىز كەرەك. ويتكەنى ٴبىز كيەلى كىتاپتى زەرتتەپ جۇرگەن ادامنىڭ سەنىمىن كۇشتەپ وسىرە المايمىز. ٴتىپتى شاكىرتتەردىڭ دە يسانىڭ تالىمىنە قاتىستى تۇسىنىكتەرى بىرتە-بىرتە ارتقان (جوح. 14:9). ٴبىز ەگىپ، سۋارساق تا، وسىرەتىن ەحوبا ەكەنىن ەش ۇمىتپايىق (قور. 1-ح. 3:6).
12. كۋاگەر ەمەس تۋىستارىمىزعا ۋاعىزداعاندا قالاي شىدامدىلىق تانىتا الامىز؟
12 كۋاگەر ەمەس تۋىستارىمىزعا ۋاعىزداعان كەزدە، شىدامدىلىعىمىز سىنعا الىنۋى مۇمكىن. مۇندايدا بىزگە ۋاعىزداۋشى 3:7 دەگى پرينسيپ كومەك بولادى. وندا «ۇندەمەيتىن ۋاقىت، سويلەيتىن ۋاقىت» بار ەكەنى ايتىلعان. ٴبىزدىڭ ۇلگىلى ٴجۇرىس-تۇرىسىمىز باسقالارعا ٷنسىز كۋالىك بەرە الادى. دەسە دە مۇمكىندىك تۋعاندا شىندىق جايلى كۋالىك بەرۋگە دايىن بولۋىمىز كەرەك (پەت. 1-ح. 3:1، 2). ٴبىز قۇلشىنىسپەن ۋاعىزداپ، ٴتالىم بەرۋىمىز كەرەك، ٴبىراق بارلىق ادامعا، سونىڭ ىشىندە تۋىستارىمىزعا ٵردايىم شىدامدىلىق تانىتۋىمىز قاجەت.
13، 14. شىدامدىلىق تانىتۋ جاعىنان بىزگە ۇلگى بولاتىن كەيبىر ادامداردىڭ مىسالىن ايتىپ بەرىڭىز.
13 ٴبىز ەجەلدەگى جانە بۇگىندەگى ادال ادامداردىڭ ۇلگىلەرىنەن شىدامدىلىققا ۇيرەنە الامىز. اباقۇق زۇلىمدىقتىڭ بىتكەنىن تاعاتسىزدانا كۇتكەن. ٴبىراق ول: «مەن كۇزەت ورنىمدا دايىن تۇرامىن»،— دەپ، ٶزىنىڭ شىدامدى ەكەنىن كورسەتتى (ابق. 2:1). ەلشى پاۋىل دا قىزمەتىن اياقتاپ، كوكتەگى سيىنا يە بولعىسى كەلگەن. دەسە دە ول شىدامدىلىقپەن «ىزگى حاباردى جاريالاۋ ارقىلى تۇبەگەيلى كۋالىك بەرۋدى» جالعاستىرا بەرگەن (ەل. ٸس. 20:24).
14 عالاقات مەكتەبىن بىتىرگەن ٴبىر ەرلى-زايىپتىنىڭ وقيعاسىن الايىق. ولار كۋاگەرلەر از جانە حريستيان دىنى كەڭ تارالماعان ەلگە تاعايىندالادى. سوندىقتان كوپشىلىك ادام كيەلى كىتاپتى زەرتتەۋگە اسا ىقىلاس تانىتا قويمايدى. ال باسقا ەلدە قىزمەت ەتىپ جاتقان سىنىپتاستارى بولسا، كەرىسىنشە، كوپتەگەن جەمىستى كيەلى كىتاپتى زەرتتەۋ ساباعى جۇرگىزىپ جاتقاندارىن ايتادى. تاعايىندالعان اۋماقتارىندا ٶسىم باياۋ بولىپ جاتسا دا، بۇل جۇپ قىزمەتتەرىن شىدامدىلىقپەن اتقارا بەرەدى. ەش جەمىس بەرمەيتىندەي كورىنگەن بۇل اۋماقتا سەگىز جىلداي قىزمەت ەتكەننەن كەيىن، ولاردىڭ ٴبىر زەرتتەۋشىسى شومىلدىرۋ راسىمىنەن وتەدى. ەجەلدەگى جانە بۇگىندەگى وسىنداي ادال ادامداردان نە نارسەگە ۇيرەنە الامىز؟ ولار قۇلشىنىستارىن باسەڭدەتپەي، قولدارىنا تىنىم بەرمەدى. ەحوبا بولسا ولاردى شىدامدىلىقتارى ٷشىن جارىلقادى. ەندەشە، «سەنىمى مەن شىدامدىلىعىنىڭ ارقاسىندا ۋادەلەردى مۇرا ەتكەندەرگە ەلىكتەيىك!» (ەۆر. 6:10—12).
سەنىمىڭىزدى بەرىك ەتىپ ساقتاڭىز
15. قالايشا سەنىم تالماي ۋاعىزداي بەرۋگە دەگەن شەشىمىمىزدى بەرىك ەتەدى؟
15 ٴبىز ٶزىمىز ۋاعىزداپ جۇرگەن حابارعا سەنەمىز، سوندىقتان ول جايلى مۇمكىندىگىنشە كوپ ادامعا ايتقىمىز كەلەدى. ٴبىز قۇداي سوزىندە جازىلعان ۋادەلەرگە سەنىم ارتامىز (ٴزاب. 119:42؛ يشايا 40:8). كيەلى كىتاپتا جازىلعان پايعامبارلىقتاردىڭ بۇگىندە ورىندالىپ جاتقانىن ٶز كوزىمىزبەن كورىپ ٴجۇرمىز. كيەلى كىتاپتاعى كەڭەستەردى قولدانىپ جۇرگەن ادامداردىڭ ٶمىرى قالاي جاقسى جاققا وزگەرىپ جاتقانىنا دا كۋامىز. بۇل دالەلدەر قۇداي پاتشالىعى جايلى ىزگى حاباردى ٵربىر ادام ەستۋى كەرەكتىگىنە كوزىمىزدى جەتكىزەدى.
16. ٴزابۇر 46:1—3 تارماقتارعا ساي، ەحوباعا جانە يساعا دەگەن سەنىمىمىز قالايشا تالماي ۋاعىزداۋعا دەگەن شەشىمىمىزدى بەرىك ەتەدى؟
16 سونداي-اق ٴبىز ٶزىمىز ۋاعىزداپ جۇرگەن حاٴبارىمىزدىڭ قاينارى ەحوباعا جانە ول پاتشالىقتىڭ پاتشاسى ەتىپ تاعايىنداعان يساعا سەنەمىز (جوح. 14:1). قانداي جاعدايعا كەزىكپەيىك، ەحوبا ٵردايىم بىزگە پانا بولادى جانە كۇش بەرەدى (ٴزابۇر 46:1—3 وقىڭىز). سونداي-اق ٴبىز مىناعان سەنىمدىمىز: يسا ەحوبانىڭ بەرگەن بيلىگى مەن قۇدىرەتىن قولدانىپ، كوكتەن ۋاعىز ىسىنە جەتەكشىلىك ەتىپ جاتىر (مات. 28:18—20).
17. نەگە ٴبىز تالماي ۋاعىزداي بەرۋىمىز كەرەك؟ مىسال كەلتىرىڭىز.
17 سەنىم ەحوبا ەڭبەگىمىز ٷشىن باتاسىن بەرەتىنىنە دەگەن سەنىمدىلىگىمىزدى ارتتىرادى. كەيدە ەحوبا باتاسىن ٴبىز كۇتپەگەن جولمەن بەرەدى (ۋاع. 11:6). مىسالى، ٴبىزدىڭ ادەبيەت اربالارىمىز بەن ستەندىلەرىمىزدىڭ قاسىنان كۇن سايىن مىڭداعان ادام وتەدى. ۋاعىزداۋدىڭ بۇل ٴتاسىلى ٴتيىمدى مە؟ البەتتە! 2014-جىلعى «ٴبىزدىڭ قاسيەتتى قىزمەتىمىزدىڭ» قاراشا ايىنداعى سانىندا ٴبىر ستۋدەنت قىز جايلى ايتىلدى. ول ەحوبا كۋاگەرلەرى جايلى ەسسە جازعىسى كەلەدى. ول پاتشالىق سارايىن تابا المايدى، ٴبىراق ۋنيۆەرسيتەتىنىڭ قاسىنان ادەبيەتتەر ارباسىن كورىپ، سول جەردەن ەسسەگە قاجەتتى مالىمەت تابادى. اقىرىندا، بۇل ستۋدەنت شومىلدىرۋ راسىمىنەن وتەدى. قازىر ول تۇراقتى ٸزاشار رەتىندە قىزمەت ەتىپ ٴجۇر. مۇنداي وقيعالار ٴبىزدى تالماي ۋاعىزداي بەرۋگە تالپىندىرادى، ٵرى پاتشالىق حابارىنا مۇقتاج ادامداردىڭ ٵلى دە بار ەكەنىن كورسەتەدى.
قولىڭىز تىنىم تاپپاسىن
18. پاتشالىق جايلى ۋاعىزداۋ ٸسى ەحوبا بەلگىلەگەن ۋاقىتتا اياقتالاتىنىنا نەگە سەنىمدىمىز؟
18 ٴبىز پاتشالىق جايلى ۋاعىزداۋ ٸسى ٴدال ۋاقىتىندا اياقتالاتىنىنا سەنىمدى بولساق بولادى. مىسالى، نۇحتىڭ كۇندەرىندە بولعان وقيعادان ەحوبا كەز كەلگەن ٸستى ٶز ۋاقىتىندا ىستەيتىنىن كورەمىز. ەحوبا توپان سۋدىڭ قاشان باستالاتىنىن شامامەن 120 جىل بۇرىن بەلگىلەپ قويعان ەدى. ارادا ٴبىراز جىل وتكەننەن كەيىن، ول نۇحقا كەمە سوعۋدى تاپسىردى. نۇح توپان سۋ باستالعانعا دەيىن 40 نە 50 جىل بويى اۋىر ەڭبەكتەنگەن بولسا كەرەك. ەشكىم قۇلاق اسپاسا دا، نۇح ەحوبا جانۋارلاردى كەمەگە كىرگىزەتىن ۋاقىت كەلدى دەمەيىنشە، ادامداردى تالماي ەسكەرتە بەردى. كەيىن ەحوبا ٴدال بەلگىلەنگەن ۋاقىتتا كەمەنىڭ «ەسىگىن جاۋىپ قويدى» (مۇس. 1-ج. 6:3؛ 7:1، 2، 16).
19. ەگەر قولىمىز تىنىم تاپپاسا، نە نارسەگە كۋا بولامىز؟
19 جاقىندا ەحوبا پاتشالىق جايلى ۋاعىزداۋ ٸسىن توقتاتادى. ول شايتاننىڭ دۇنيەسىنىڭ «ەسىگىن» جابادى دا، ادىلدەر ٶمىر سۇرەتىن جاڭا دۇنيە ورناتادى. سول ۋاقىت كەلگەنشە، قولدارى ەش تىنىم تاپپاعان نۇحقا، اباقۇققا جانە باسقا دا ادال جاندارعا ەلىكتەي بەرەيىك. بار نازارىمىزدى ۋاعىز ىسىنە اۋدارايىق، شىدامدى بولايىق جانە ەحوبا مەن ونىڭ ۋادەلەرىنە دەگەن سەنىمىمىزدى بەرىك ەتىپ ساقتايىق.
75-ٵن «مەن بارمىن، مەنى جىبەر!»
^ 5-ابزاس وتكەن ماقالادا العا باسىپ جاتقان كيەلى كىتاپتى زەرتتەۋشىلەر ۋاعىزداۋشى بولۋعا تالپىندىرىلدى. ال بۇل ماقالادا ٴبىز جاڭا جاريالاۋشىلارعا دا، تاجىريبەلى جاريالاۋشىلارعا دا ەحوبا ۋاقىت ٴبىتتى دەگەنشە ىزگى حاباردى تالماي جاريالاي بەرۋگە كومەكتەسەتىن ٷش جايتتى قاراستىرامىز.
^ 2-ابزاس ٴسوز ٴمانى: بۇل ماقالادا «قولىڭ تىنىم تاپپاسىن» دەگەن تىركەس ەحوبا ۋاقىت ٴبىتتى دەمەيىنشە، ىزگى حاباردى تالماي جاريالاي بەرۋدى بىلدىرەدى.
^ 5-ابزاس «يەمىزدىڭ كۇنى» 1914-جىلى يسا پاتشا رەتىندە تاققا وتىرعان كەزدە باستالدى، ٵرى مىڭجىلدىق بيلىكتىڭ سوڭىنا دەيىن جالعاسادى.
