19-زەرتتەۋ ماقالاسى
اقىرعى ۋاقىتتاعى «سولتۇستىك پاتشاسى»
«اقىرعى ۋاقىتتا وڭتۇستىك پاتشاسى ونىمەن [سولتۇستىك پاتشاسىمەن] تەكەتىرەسەدى» (دان. 11:40).
150-ٵن قۇتقارىلۋ ٷشىن قۇدايدى ىزدەيىك
اڭداتپا *
1. كيەلى كىتاپ پايعامبارلىقتارى بىزگە نەنى بىلۋگە كومەكتەسەدى؟
جۋىردا ەحوبانىڭ حالقىمەن نە بولماق؟ بىزگە مۇنى توپشىلاپ جاتۋدىڭ قاجەتى جوق. كيەلى كىتاپ پايعامبارلىقتارىندا الداعى ۋاقىتتا بارىمىزگە اسەر ەتەتىن ەلەۋلى وقيعالار جايلى ايتىلعان. سول پايعامبارلىقتاردىڭ بىرىنەن جەر بەتىندەگى كەيبىر ەڭ قۋاتتى ۇكىمەتتەردىڭ نە ىستەيتىنىن بىلەمىز. بۇل پايعامبارلىق دانيال كىتابىنىڭ 11-تاراۋىندا جازىلعان. وندا ٴبىر-بىرىمەن تەكەتىرەسەتىن ەكى پاتشا تۋرالى ايتىلادى. ولار سولتۇستىك پاتشاسى مەن وڭتۇستىك پاتشاسى دەپ اتالادى. بۇل پايعامبارلىقتىڭ باسىم بولىگى ورىندالىپ قويدى، سوندىقتان ونىڭ قالعان بولىگى دە ورىندالاتىنىنا سەنىمدى بولساق بولادى.
2. مۇسانىڭ 1-جازباسى 3:15 پەن ايان 11:7؛ 12:17 دەن كورىنەتىندەي، دانيالدىڭ پايعامبارلىعىن زەرتتەگەندە، قانداي جايتتاردى جادىمىزدا ۇستاۋىمىز كەرەك؟
2 دانيالدىڭ 11-تاراۋىنداعى پايعامبارلىقتى ٴتۇسىنۋ ٷشىن مىنا جايتتى جادىمىزدا ۇستاۋىمىز كەرەك: بۇل پايعامبارلىقتا تەك قۇدايدىڭ حالقىنا تىكەلەي ىقپال ەتكەن بيلەۋشىلەر مەن ۇكىمەتتەر جايىندا ايتىلادى. قۇداي حالقى دۇنيەجۇزىنىڭ بارلىق تۇرعىندارىمەن سالىستىرعاندا از عانا بولسا دا، نەگە ولار ۇكىمەتتەردىڭ نىساناسىنا اينالعان؟ سەبەبى شايتان مەن ونىڭ بۇكىل جۇيەسىنىڭ بار كوزدەگەنى — ەحوبا مەن يساعا قىزمەت ەتەتىندەردىڭ كوزىن قۇرتۋ (مۇسانىڭ 1-جازباسى 3:15؛ ايان 11:7؛ 12:17 وقىڭىز). ەسكەرەتىن تاعى ٴبىر جايت، دانيالداعى پايعامبارلىق قۇداي سوزىندەگى باسقا دا پايعامبارلىقتارمەن ۇيلەسۋى ٴتيىس. نەگىزى، دانيالدىڭ پايعامبارلىعىن جازبالاردىڭ باسقا بولىكتەرىمەن سالىستىرعاندا عانا دۇرىس تۇسىنە الامىز.
3. وسى جانە كەلەسى ماقالادا نە تالقىلايمىز؟
3 وسى جايتتاردى ەسكەرە وتىرىپ، قازىر دانيال 11:25—39 تارماقتاردى تالقىلايمىز. ٴبىز 1870-جىلدان 1991-جىلعا دەيىن سولتۇستىك پاتشاسى مەن وڭتۇستىك پاتشاسى كىم بولعانىن بىلەمىز. سونداي-اق پايعامبارلىقتىڭ وسى بولىگىنە قاتىستى تۇسىنىگىمىزگە وزگەرىس ەنگىزۋ نەگە اقىلعا قونىمدى ەكەنىن كورەمىز. ال كەلەسى ماقالادا دانيال 11:40—12:1 تارماقتاردى قاراستىرىپ، پايعامبارلىقتىڭ وسى بولىگىندەگى 1991-جىلدان باستاپ ارماگەددون سوعىسىنا دەيىنگى ۋاقىت تۋرالى تۇسىنىگىمىزدى ايقىندايمىز. وسى ماقالالاردى زەرتتەگەندە، «اقىرعى ۋاقىتتا تەكەتىرەسەتىن پاتشالار» دەگەن كەستەنى پايدالانساڭىز بولادى. الدىمەن، وسى پايعامبارلىقتاعى ەكى پاتشانىڭ كىم ەكەنىن انىقتاپ الايىق.
سولتۇستىك پاتشاسى مەن وڭتۇستىك پاتشاسىن قالاي انىقتايمىز؟
4. سولتۇستىك پاتشاسى مەن وڭتۇستىك پاتشاسىن انىقتاۋعا قانداي ٷش جايت كومەكتەسەدى؟
4 اۋەلگىدە «سولتۇستىك پاتشاسى» مەن «وڭتۇستىك پاتشاسى» دەپ يسرايل ەلىنىڭ سولتۇستىگى مەن وڭتۇستىگىندەگى ەلدەردىڭ بيلەۋشىلەرىن اتاعان. نەگە بۇلاي دەيمىز؟ دانيالعا حابار اكەلگەن پەرىشتەنىڭ نە دەگەنىنە نازار اۋدارايىق. ول: «ساعان سوڭعى كۇندەرى حالقىڭمەن [قۇداي حالقىمەن] نە بولاتىنىن ٴتۇسىندىرۋ ٷشىن كەلدىم»،— دەگەن (دان. 10:14). ب.ز. 33-جىلىنىڭ ەلۋىنشى كۇن مەيرامىنا دەيىن قۇدايدىڭ حالقى يسرايل حالقى بولعان. الايدا سول جىلدان باستاپ ەحوبا ٶز حالقى دەپ يسانىڭ ادال ٸزباسارلارىن ەسەپتەيتىنىن ايقىن ەتتى. سوندىقتان دانيال كىتابىنىڭ 11-تاراۋىنداعى پايعامبارلىقتىڭ باسىم بولىگى يسرايل حالقىنا ەمەس، ٴماسىحتىڭ ٸزباسارلارىنا قاتىستى (ەل. ٸس. 2:1—4؛ ريم. 9:6—8؛ عال. 6:15، 16). تاريح بويى سولتۇستىك پاتشاسى مەن وڭتۇستىك پاتشاسى وزگەرىپ وتىردى. ٴبىراق ولاردىڭ بارىنە ورتاق بىرنەشە جايت بولدى. ٴبىرىنشىسى، سول پاتشالار قۇداي حالقىنا ايتارلىقتاي ىقپال ەتتى. ەكىنشىسى، قۇداي حالقىنا قالاي قاراعاندارىمەن ولار شىنايى قۇداي ەحوبانى جەك كورەتىندەرىن ايان ەتتى. ٷشىنشىسى، ەكى پاتشا ٴبىر-بىرىنەن ۇستەم بولۋ ٷشىن ٶزارا باقتالاستى.
5. II عاسىردان XIX عاسىردىڭ سوڭىنا دەيىن سولتۇستىك پاتشاسى مەن وڭتۇستىك پاتشاسى بولدى ما؟ ٴتۇسىندىرىڭىز.
5 ب.ز. II عاسىرىندا شىنايى ماسىحشىلەر قاۋىمىنا جالعان ماسىحشىلەر كوپتەپ ەنە باستادى. ولار قۇداي سوزىندەگى شىندىقتاردى جاسىرىپ، جالعان ٴدىننىڭ ىلىمدەرىن ۇيرەتتى. سول ۋاقىتتان باستاپ XIX عاسىردىڭ سوڭىنا دەيىن جەر بەتىندە قۇداي حالقىنىڭ ۇيىمداسقان توبى بولمادى. جالعان ماسىحشىلەر ارامشوپتەي قاۋلاپ كەتكەندىكتەن، كىمدەر شىنايى ماسىحشىلەر ەكەنىن انىقتاۋ قيىن بولدى (مات. 13:36—43). بۇل جايتتى بىلگەنىمىز نەگە ماڭىزدى؟ بۇدان ٴبىز II عاسىردان باستاپ XIX عاسىردىڭ ەكىنشى جارتىسىنا دەيىن بيلىك ەتكەن پاتشالار مەن ۇكىمەتتەردىڭ سولتۇستىك پاتشاسى مەن وڭتۇستىك پاتشاسى بولۋى مۇمكىن ەمەس ەكەنىن بىلەمىز. ويتكەنى ولار شابۋىل جاسايتىنداي جەر بەتىندە قۇداي حالقىنىڭ ۇيىمداسقان توبى بولمادى *. الايدا سولتۇستىك پاتشاسى مەن وڭتۇستىك پاتشاسى XIX عاسىردىڭ سوڭىندا قايتادان پايدا بولادى دەپ كۇتۋ ورىندى ەدى. نەلىكتەن؟
6. قۇداي حالقى قايتادان توپ رەتىندە قاشان ۇيىمداسا باستادى؟ ٴتۇسىندىرىڭىز.
6 1870-جىلدان باستاپ قۇداي حالقى توپ بولىپ ۇيىمداسا باستادى. سول جىلى چارلز تەيز راسسەلل مەن ونىڭ سەرىكتەرى كيەلى كىتاپتى زەرتتەۋ توبىن قۇردى. راسسەلل باۋىرلاس پەن ونىڭ سەرىكتەرى الدىن الا ايتىلعان «حابارشى» بولدى، ٵرى ٴماسىحتىڭ پاتشالىعى كەلمەي تۇرىپ «جول دايىندادى» (مالح. 3:1). وسىلاي قۇداي حالقىنىڭ كىم ەكەنى قايتادان انىق بولدى! سول كەزدە قۇدايدىڭ قىزمەتشىلەرىنە ەداۋىر ىقپال ەتكەن دۇنيەجۇزىلىك ٸرى مەملەكەتتەر بولدى ما؟ قازىر تومەندەگى ايعاقتاردى قاراستىرايىق.
وڭتۇستىك پاتشاسى كىم؟
7. ٴبىرىنشى دۇنيەجۇزىلىك سوعىستىڭ كەزىنە دەيىن كىم وڭتۇستىك پاتشاسى بولدى؟
7 1870-جىلدارى بريتانيا جەر بەتىندەگى الپاۋىت يمپەرياعا اينالدى. الەمدەگى ەڭ قۋاتتى اسكەري كۇش وسى يمپەريادا بولدى. دانيالدىڭ پايعامبارلىعىندا بۇل يمپەريا كىشكەنتاي مۇيىزگە تەڭەلگەن. ول باسقا ٷش ٴمۇيىزدى، ياعني فرانسيا، يسپانيا، نيدەرلاندىنى وزىنە باعىندىردى (دان. 7:7، 8). ٴسۇيتىپ، ٴبىرىنشى دۇنيەجۇزىلىك سوعىستىڭ كەزىنە دەيىن بريتانيا وڭتۇستىك پاتشاسى بولدى. ٴدال وسى ۋاقىت ارالىعىندا امەريكا قۇراما شتاتتارى الەمدەگى ەڭ باي مەملەكەتكە اينالىپ، بريتانيامەن تىعىز اراقاتىناس ورناتا باستادى.
8. سوڭعى كۇندەرى كىم وڭتۇستىك پاتشاسى بولىپ كەلەدى؟
8 ٴبىرىنشى دۇنيەجۇزىلىك سوعىس كەزىندە قۇراما شتاتتار مەن بريتانيا بىرىگىپ، قۋاتتى اسكەري وداق قۇردى. سول كەزدە بريتانيا مەن قۇراما شتاتتار انگلو-امەريكا دۇنيەجۇزىلىك دەرجاۆاسىنا اينالدى. دانيال كىتابىندا ايتىلعانداي، بۇل پاتشا «وراسان كوپ ٵرى قۋاتتى جاساق» جينادى (دان. 11:25). سوڭعى كۇندەر دەپ اتالاتىن كەزەڭ بويى انگلو-امەريكا دەرجاۆاسى وڭتۇستىك پاتشاسى بولىپ كەلەدى *. ال سولتۇستىك پاتشاسى كىم بولدى؟
سولتۇستىك پاتشاسى كىم؟
9. سولتۇستىك پاتشاسى قاشان پايدا بولدى جانە دانيال 11:25 قالاي ورىندالدى؟
9 1871-جىلى، راسسەلل مەن ونىڭ سەرىكتەرى كيەلى كىتاپتى زەرتتەۋ توبىن قۇرعاننان كەيىن، سولتۇستىك پاتشاسى قايتا پايدا بولدى. سول جىلى گەرمانيا يمپەرياسىنىڭ نەگىزى قالاندى. ونىڭ نەگىزىن سالۋعا وتتو فون بيسمارك ۇلكەن ۇلەس قوستى. بۇل يمپەريانىڭ العاشقى يمپەراتورى پرۋسسيا پاتشاسى I ۆيلگەلم بولدى. ول بيسماركتى ٴبىرىنشى كانسلەر ەتىپ تاعايىندادى *. بىرنەشە ونجىلدىقتان كەيىن گەرمانيا افريكاداعى، تىنىق مۇحيتىنداعى ەلدەردى باقىلاۋىندا ۇستاپ، وتارلاۋشى ەلگە اينالدى. وسىلاي ول بريتانيانى باسىپ وزباق بولدى (دانيال 11:25 وقىڭىز). گەرمانيا يمپەرياسى قۋاتتى قول جيناپ، الەمدەگى ەكىنشى ەڭ ۇلكەن اسكەري-تەڭىز فلوتىن قۇردى. ول وسى كۇشىن ٴبىرىنشى دۇنيەجۇزىلىك سوعىستا جاۋلارىنا قارسى قولداندى.
10. دانيال 11:25ٵ، 26 داعى پايعامبارلىق قالاي ورىندالدى؟
10 دانيال ٶز پايعامبارلىعىندا گەرمانيا يمپەرياسىمەن جانە ونىڭ اسكەري كۇشىمەن نە بولاتىنىن دا ايتىپ كەتكەن. پايعامبارلىقتا سولتۇستىك پاتشانىڭ «قارسى تۇرا المايتىنى» ايتىلعان. نەلىكتەن؟ ويتكەنى «ولار ايلا-امال ويلاستىرادى... داستارقانىنان ٴدامدى تاماق جەپ جۇرگەندەر ونى كۇيرەتەدى» (دان. 11:25ٵ، 26ا). دانيالدىڭ زامانىندا پاتشا داستارقانىنان تاعام جەپ جۇرگەندەرگە «پاتشا سارايىنداعى» قىزمەتكەرلەر كىرەتىن (دان. 1:5). دەمەك، بۇل پايعامبارلىقتا گەرمانيا يمپەرياسىنداعى جوعارى لاۋازىمدى تۇلعالار تۋرالى، سونىڭ ىشىندە يمپەراتوردىڭ گەنەرالدارى مەن اسكەري كەڭەسشىلەرى تۋرالى ايتىلىپ تۇر. ولار كەيىننەن مونارحيانىڭ قۇلاۋىنا ىقپال ەتتى *. سونداي-اق پايعامبارلىقتا سولتۇستىك پاتشاسىنىڭ وڭتۇستىك پاتشاسىمەن سوعىسى قالاي اياقتالاتىنى ٴسوز ەتىلەدى: «ونىڭ جاساعىنىڭ تۇگى قالمايدى، كوپتەگەن ادام مەرت بولادى» (دان. 11:26ٵ). الدىن الا ايتىلعانداي، ٴبىرىنشى دۇنيەجۇزىلىك سوعىستا گەرمانيا اسكەرىنىڭ «تۇگى قالماي»، كوپتەگەن ادام «مەرت بولدى». بۇعان دەيىن تاريحتا وسىنداي قانقۇيلى سوعىس بولعان ەمەس.
11. دانيال 11:27، 28 گە ساي، سولتۇستىك پاتشاسى مەن وڭتۇستىك پاتشاسى نە ىستەدى؟
11 دانيال 11:27، 28 دە ٴبىرىنشى دۇنيەجۇزىلىك سوعىستىڭ الدىندا نە بولاتىنى سيپاتتالعان. پايعامبارلىقتا سولتۇستىك پاتشاسى مەن وڭتۇستىك پاتشاسى «ٴبىر داستارقان باسىندا وتىرىپ، ٴبىر-بىرىنە وتىرىك ايتاتىنى» جازىلعان. سونداي-اق وندا سولتۇستىك پاتشاسىنىڭ «مول بايلىق» جينايتىنى ايتىلعان. بۇل ٴدال سولاي بولدى دا. گەرمانيا مەن بريتانيا ٴبىر-بىرىنە بەيبىتشىلىكتى قالايتىندارىن ايتقانمەن، 1914-جىلى سوعىس باستالعاندا، ولاردىڭ جالعان سويلەگەندەرى ايقىن بولدى. 1914-جىلعا دەيىن گەرمانيا وتە بايىپ، ەكونوميكالىق جاعىنان الەمدەگى ەكىنشى ٸرى ەلگە اينالدى. سودان دانيال 11:29 بەن 30-تارماقتىڭ ٴبىرىنشى بولىگى ورىندالىپ، گەرمانيا وڭتۇستىك پاتشاسىمەن سوعىستى، ٴبىراق جەرمەن-جەكسەن بولدى.
پاتشالار قۇداي حالقىنا قارسى شىعادى
12. ٴبىرىنشى دۇنيەجۇزىلىك سوعىستا سولتۇستىك پاتشاسى مەن وڭتۇستىك پاتشاسى قالاي ارەكەت ەتتى؟
12 1914-جىلدان باستاپ ەكى پاتشا ٴبىر-بىرىمەن قاقتىعىسۋىن جانە قۇداي حالقىنا قارسى شىعۋىن ۇدەتە ٴتۇستى. مىسالى، ٴبىرىنشى دۇنيەجۇزىلىك سوعىستا گەرمانيا ۇكىمەتى دە، بريتانيا ۇكىمەتى دە كىسى ولتىرۋدەن باس تارتقان قۇداي قىزمەتشىلەرىن قۋدالادى. ال اقش ۇكىمەتى ۋاعىز ىسىنە جەتەكشىلىك ەتكەندەردى اباقتىعا جاپتى، وسىلاي ايان 11:7—10 تارماقتارداعى پايعامبارلىق جۇزەگە استى.
13. 1930-جىلدارى جانە ەكىنشى دۇنيەجۇزىلىك سوعىس كەزىندە سولتۇستىك پاتشاسى نە ىستەدى؟
13 سودان كەيىن 1933-جىلدان باستاپ، اسىرەسە ەكىنشى دۇنيەجۇزىلىك سوعىس كەزىندە سولتۇستىك پاتشاسى قۇداي حالقىن اياۋسىز قۋعىندادى. گەرمانيادا ناسيستىك پارتيا بيلىككە كەلىپ، گيتلەر مەن ونىڭ جاقتاستارى قۇداي حالقىنىڭ ىسىنە تيىم سالدى. سولتۇستىك پاتشاسى 1500 گە جۋىق ەحوبانىڭ قىزمەتشىلەرىن ٶلتىرىپ، مىڭداعانىن كونسلاگەرلەرگە جاپتى. دانيال بۇل وقيعالاردىڭ بولاتىنىن دا ايتقان ەدى. سولتۇستىك پاتشاسى ۋاعىز ىسىنە تيىم سالۋىمەن «قاسيەتتى ورىندى... ارامدادى» جانە «ۇدايى شالىناتىن قۇرباندىقتى توقتاتتى» (دان. 11:30ٵ، 31ا). گيتلەر ٴتىپتى گەرمانياداعى قۇداي حالقىن تۇپتامىرىمەن جويىپ جىبەرۋدى انت ەتتى.
جاڭا سولتۇستىك پاتشاسى
14. ەكىنشى دۇنيەجۇزىلىك سوعىستان كەيىن كىم سولتۇستىك پاتشاسى بولدى؟ ٴتۇسىندىرىڭىز.
14 ەكىنشى دۇنيەجۇزىلىك سوعىستان كەيىن كەڭەس وداعى بۇرىن گەرمانياعا تاۋەلدى بولعان ۇلكەن اۋماققا بيلىك ەتىپ، سولتۇستىك پاتشاسىنا اينالدى. گەرمانياداعى توتاليتارلىق ٴتارتىپ سەكىلدى، كەڭەس وداعى دا ۇكىمەتكە تولىقتاي مويىنسۇنۋدان باس تارتىپ، شىنايى قۇدايعا عيبادات ەتەتىندەردىڭ ٴبارىن اسقان جاۋىزدىقپەن قۋدالادى.
15. ەكىنشى دۇنيەجۇزىلىك سوعىس اياقتالعاننان كەيىن سولتۇستىك پاتشاسى قالاي ارەكەت ەتتى؟
15 ەكىنشى دۇنيەجۇزىلىك سوعىس اياقتالعاننان كەيىن كوپ ۇزاماي جاڭا سولتۇستىك پاتشاسى — كەڭەس وداعى مەن ونىڭ وداقتاستارى — قۇداي حالقىنا شابۋىلدادى. ايان 12:15—17 تارماقتاردا قۇداي حالقىن قۋدالاۋ «وزەنگە» تەڭەلگەن. وسى پايعامبارلىققا ساي، سولتۇستىك پاتشاسى ۋاعىز ىسىنە تيىم سالىپ، ەحوبانىڭ مىڭداعان قىزمەتشىسىن سىبىرگە ايدادى. سوڭعى كۇندەر باستالعالى بەرى سولتۇستىك پاتشاسى قۇداي حالقىن قۋعىنداعان ۇستىنە قۋعىنداپ كەلەدى. دەسە دە ولاردىڭ ٸسىن ەش توقتاتا الار ەمەس *.
16. كەڭەس وداعى دانيال 11:37—39 تارماقتارداعى پايعامبارلىقتى قالاي ورىندادى؟
16 دانيال 11:37—39 وقىڭىز. وسى پايعامبارلىققا سايكەس، قالايشا سولتۇستىك پاتشاسى «اتا-بابالارىنىڭ قۇدايىن... قۇرمەتتەمەدى»؟ ٴدىننىڭ كوزىن قۇرتۋدى كوزدەگەن كەڭەس وداعى داستۇرلى ٴدىني ۇيىمداردىڭ كۇشىن جويۋعا تىرىستى. مىسالى، 1918-جىلدىڭ باسىندا كەڭەس ۇكىمەتىنىڭ قابىلداعان شەشىمدەرىنىڭ ناتيجەسىندە مەكتەپتەردە اتەيزم ۇيرەتىلەتىن بولدى. ال بۇل سولتۇستىك پاتشاسى قاي ماعىنادا «بەكىنىستەردىڭ قۇدايىن دارىپتەدى؟» كەڭەس وداعى اسكەري كۇش قۇرۋ ٷشىن قىرۋار قاراجات جۇمسادى جانە ٶز بيلىگىن نىعايتۋ ماقساتىندا مىڭداعان يادرولىق قارۋ جاساپ شىعاردى. اقىر اياعىندا سولتۇستىك پاتشاسى دا، وڭتۇستىك پاتشاسى دا ميللياردتاعان ادامدى قىرىپ سالاتىنداي مىقتى قارۋ-جاراق جيناپ الدى!
ەكى پاتشانىڭ بىرلەسە ارەكەت ەتۋى
17. «قاڭىراتىپ بوس قالدىراتىن جەركەنىشتى نارسە» نە؟
17 سولتۇستىك پاتشاسى وڭتۇستىك پاتشاسىنا ماڭىزدى ٴبىر ماسەلەدە قولداۋ كورسەتتى: ولار «قاڭىراتىپ بوس قالدىراتىن جەركەنىشتى نارسە ورناتتى» (دان. 11:31). بۇل «جەركەنىشتى نارسە» — بىرىككەن ۇلتتار ۇيىمى.
18. بىرىككەن ۇلتتار ۇيىمى نەگە «جەركەنىشتى نارسە» دەپ سيپاتتالعان؟
18 بىرىككەن ۇلتتار ۇيىمى نەگە «جەركەنىشتى نارسە» دەپ سيپاتتالعان؟ ويتكەنى ول دۇنيەجۇزىندە بەيبىتشىلىك ورناتامىن دەپ ايتادى، وسىلاي قۇداي پاتشالىعى عانا جۇزەگە اسىراتىن نارسەنى ىستەي الامىن دەيدى. سونداي-اق پايعامبارلىقتا «جەركەنىشتى نارسەنىڭ» «قاڭىراتىپ بوس قالدىراتىنى» ايتىلعان، سەبەبى بىرىككەن ۇلتتار ۇيىمى جالعان دىندەردىڭ ٴبارىن جويۋدا باستى ٴرول اتقاراتىن بولادى («اقىرعى ۋاقىتتا تەكەتىرەسەتىن پاتشالار» دەگەن كەستەنى قاراڭىز).
مۇنى نە ٷشىن ٴبىلۋىمىز كەرەك؟
19، 20. ا) ەكى پاتشا تۋرالى نە ٷشىن ٴبىلۋىمىز كەرەك؟ ٵ) كەلەسى ماقالادا قانداي سۇراقتىڭ جاۋابىن بىلەمىز؟
19 ەكى پاتشا تۋرالى بىلگەنىمىز ٴبىز ٷشىن ماڭىزدى. ويتكەنى بۇل دانيالدىڭ سولتۇستىك پاتشاسى مەن وڭتۇستىك پاتشاسى تۋرالى پايعامبارلىعى 1870-جىلدان باستاپ 1991-جىلعا دەيىن ورىندالعانىن دالەلدەيدى. ولاي بولسا، وسى پايعامبارلىقتىڭ قالعان بولىگى دە جۇزەگە اساتىنىنا ەش كۇماندانباساق بولادى.
20 1991-جىلى كەڭەس وداعى قۇلادى. وندا بۇگىنگى كۇنى سولتۇستىك پاتشاسى كىم؟ مۇنىڭ جاۋابىن كەلەسى ماقالادان بىلەمىز.
128-ٵن سوڭىنا دەيىن تاباندى تۇرايىق
^ 5-ابزاس ٴبىز دانيالدىڭ «سولتۇستىك پاتشاسى» مەن «وڭتۇستىك پاتشاسى» تۋرالى پايعامبارلىعىنىڭ ٵلى دە ورىندالىپ جاتقانىنا كۋامىز. نەگە بۇلاي دەي الامىز؟ وسى پايعامبارلىقتى نەلىكتەن ەگجەي-تەگجەيلى تۇسىنگەنىمىز ماڭىزدى؟
^ 5-ابزاس وسى سەبەپتى ەسكەرسەك، ەندى ريم يمپەراتورى اۆرەليان (ب.ز. 270—275) «سولتۇستىك پاتشاسى»، ال زەنوبيا پاتشايىم (ب.ز. 267—272) «وڭتۇستىك پاتشاسى» بولدى دەۋ قيسىنسىز بولار. بۇل «دانيالدىڭ پايعامبارلىعىنا كوڭىل قويىڭدار!» (حانزۇشا) كىتابىنىڭ 13، 14-تاراۋىندا جازىلعان تۇسىنىگىمىزدى وزگەرتەدى.
^ 8-ابزاس « انگلو-امەريكا دۇنيەجۇزىلىك دەرجاۆاسى جايلى كيەلى كىتاپ پايعامبارلىقتارى» دەگەن قورشاۋدى قاراڭىز.
^ 9-ابزاس 1890-جىلى بيسماركتى يمپەراتور II ۆيلگەلم بيلىكتەن شەتتەتتى.
^ 10-ابزاس ولار ۇكىمەتتى تەز قۇلاتۋدىڭ كوپ امالىن جاسادى. ماسەلەن، يمپەراتورعا قولداۋ كورسەتپەي قويدى، سوعىسقا قاتىستى قۇپيا مالىمەتتەردى اشتى جانە يمپەراتوردى بيلىكتەن كەتۋگە ماجبۇرلەدى.
^ 15-ابزاس دانيال 11:34 تە ايتىلعانداي، سولتۇستىك پاتشاسى شامالى ۋاقىتقا ماسىحشىلەردى قۋعىنداۋىن توقتاتتى. مىسالى، 1991-جىلى كەڭەس وداعى قۇلاعاندا، سولاي بولدى.
