22-زەرتتەۋ ماقالاسى
كوزگە كورىنبەيتىن سيلاردى باعالاڭىز
«كورىنبەيتىن نارسەلەرگە نازار تىگەمىز. ويتكەنى كورىنەتىن نارسەلەر ۋاقىتشا، ال كورىنبەيتىندەر ماڭگىلىك» (قور. 2-ح. 4:18).
45-ٵن جۇرەك تولعانىسى
اڭداتپا *
1. يسا كوكتەگى قازىنا جايلى نە ايتقان؟
قازىنا اتاۋلىنىڭ ٴبارى بىردەي كوزگە كورىنە بەرمەيدى. نەگىزىندە، ەڭ باعالى دەگەن قازىنالاردى كوزبەن كورە المايمىز. يسا تاۋداعى ۋاعىزىندا كوكتەگى قازىنانىڭ جەردەگى دۇنيە-مۇلىكتەن اناعۇرلىم قۇندى ەكەنىن ايتقان. سوسىن ول: «قازىنالارىڭ قايدا بولسا، جۇرەكتەرىڭ دە سوندا بولادى»،— دەگەن (مات. 6:19—21). ٴبىز ادەتتە نەنى جوعارى باعالاساق، جۇرەگىمىز سوعان ۇمتىلادى. قۇدايدىڭ الدىندا جاقساتقا يە بولۋ ارقىلى «قازىنانى كوكتە جينايمىز». يسا ايتقانداي، بۇل قازىنا ەش جويىلمايدى، ونى ەشكىم دە ۇرلاي المايدى.
2. ا) قورىنتتىقتارعا 2-حات 4:17، 18 گە ساي، پاۋىل ٴبىزدى نە ىستەۋگە شاقىرادى؟ ٵ) بۇل ماقالادا نە قاراستىرامىز؟
2 ەلشى پاۋىل ٴبىزدى «كورىنبەيتىن نارسەلەرگە نازار تىگۋگە» شاقىرادى (قورىنتتىقتارعا 2-حات 4:17، 18 وقىڭىز). كوزگە كورىنبەيتىن بۇنداي قازىنالارعا قۇدايدىڭ جاڭا دۇنيەسىندە يەمدەنەتىن باتالارىمىز دا كىرەدى. ال بۇل ماقالادا قازىردىڭ وزىندە ٴبىز پايداسىن كورەتىن ٴتورت سيدى قاراستىرامىز. بۇلار: قۇدايمەن دوستىعىمىز، دۇعا ەتۋ سيى، قۇدايدىڭ كيەلى رۋحىنىڭ كومەگى جانە ەحوبانىڭ، يسانىڭ جانە پەرىشتەلەردىڭ ۋاعىز ىسىندە بەرەتىن قولداۋى. سونداي-اق وسى كوزگە كورىنبەيتىن سيلارعا ريزا ەكەنىمىزدى قالاي كورسەتە الاتىنىمىزدى ٴسوز ەتەمىز.
ەحوبامەن دوستىعىمىز
3. كوزگە كورىنبەيتىن ەڭ اسىل قازىنامىز قانداي جانە بۇل نەنىڭ ارقاسىندا مۇمكىن بولىپ وتىر؟
3 كوزگە كورىنبەيتىن ەڭ اسىل قازىنامىز — ەحوبا قۇدايمەن دوستىعىمىز (ٴزاب. 25:14). كيەلى قۇدايدىڭ كۇناكار ادامدارمەن دوس بولۋى مۇمكىن بە؟ ٴيا. بۇل يسانىڭ ادامزاتتى «كۇنادان ارىلتاتىن» تولەم قۇرباندىعىنىڭ ارقاسىندا مۇمكىن (جوح. 1:29). ەحوبا ادامزاتتى قۇتقارۋعا قاتىستى نيەتىنىڭ مىندەتتى تۇردە ورىندالاتىنىن الدىن الا بىلگەن. سوندىقتان دا ول ٴماسىحتىڭ ولىمىنە دەيىن ٶمىر سۇرگەن ادامدارمەن دوس بولا العان (ريم. 3:25).
4. ٴماسىح جەرگە كەلمەس بۇرىن قۇدايمەن دوس بولعان كەيبىر ادامدار جايلى ايتىپ بەرىڭىز.
4 ٴماسىح جەرگە كەلمەس بۇرىن قۇدايمەن دوس بولعان كەيبىر ادامدارعا توقتالا كەتەيىك. مىسالى، ىبىرايىم سەنىمى بولاتتاي بەرىك جان بولعان. ول قايتىس بولعان سوڭ مىڭ جىلدان اسا ۋاقىتتان كەيىن ەحوبا ونى «دوسىم» دەپ اتاعان (يشايا 41:8). دەمەك، ٴتىپتى ٶلىم دە ەحوبانى جاقىن دوستارىنان ايىرا المايدى. ىبىرايىم ەحوبانىڭ جادىندا ٵلى دە ٴتىرى (لۇقا 20:37، 38). تاعى ٴبىر مىسال — ٵيۇپ. كوكتە پەرىشتەلەر جينالعاندا، ەحوبا ايۇپكە سەنەتىنىن ايتتى. ەحوبا ونى «ٵدىل دە ٴمىنسىز، قۇدايدان قورقىپ، جاماندىقتان اۋلاق جۇرەتىن ادام» دەدى (ٵيۇپ 1:6—8). ال دانيال جايلى ەحوبا قانداي پىكىردە بولدى؟ دانيال پۇتقا تابىناتىنداردىڭ جەرىندە شامامەن 80 جىل بويى قۇدايعا ادال قىزمەت ەتتى. پەرىشتەلەر ٷش رەت ەگدە تارتقان دانيالعا ونىڭ قۇداي الدىندا «اسا باعالى جان» ەكەنىن ايتتى (دان. 9:23؛ 10:11، 19). ەحوبا جانىنا جاقىن دوستارىن تىرىلتەتىن ۋاقىتتى تاعاتسىزدانا كۇتەتىنىنە ەش كۇمانىمىز جوق (ٵيۇپ 14:15).
كوزگە كورىنبەيتىن قازىنالارعا ريزاشىلىق ٴبىلدىرۋدىڭ كەيبىر جولدارى قانداي؟ (5-ابزاستى قاراڭىز) *
5. ەحوبامەن جاقىن دوس بولۋ ٷشىن نە ىستەۋىمىز كەرەك؟
5 بۇگىندە ميلليونداعان جۇمىر باستى پەندە ەحوبامەن جاقىن دوس بولىپ ٴجۇر. ويتكەنى دۇنيەنىڭ ٴتورت بۇرىشىنداعى كوپتەگەن ەرلەر مەن ايەلدەر، سونداي-اق بالالار قۇدايدىڭ دوسى بولعىسى كەلەتىنىن ٸس-ارەكەتتەرىمەن كورسەتىپ ٴجۇر. ەحوبا «شىنشىل اداممەن جاقىن دوس بولادى» (ناق. س. 3:32). بۇل دوستىققا ولار يسانىڭ تولەم قۇرباندىعىنا سەنگەندىكتەن قول جەتكىزۋدە. وسى قۇرباندىقتىڭ نەگىزىندە ەحوبا بىزگە وزىنە باعىشتالىپ، شومىلدىرۋ راسىمىنەن وتۋگە مۇمكىندىك بەرەدى. وسى ماڭىزدى قادامداردى جاساساق، قۇدايعا باعىشتالىپ، شومىلدىرۋ راسىمىنەن وتكەن ٵرى الەمدەگى ەڭ ۇلى تۇلعامەن «جاقىن دوس» بولىپ جۇرگەن ميلليونداعان ادامنىڭ قاتارىنا قوسىلامىز!
6. قۇدايمەن دوستىعىمىزدى باعالايتىنىمىزدى قالاي كورسەتسەك بولادى؟
6 قۇدايمەن دوستىعىمىزدى باعالايتىنىمىزدى قالاي كورسەتە الامىز؟ قۇدايعا جۇزدەن استام جىل ادالدىق تانىتقان ىبىرايىم مەن ايۇپكە ەلىكتەپ، ٴبىز دە وسى دۇنيەدە ەحوباعا قانشا جىل قىزمەت ەتىپ كەلە جاتقانىمىزعا قاراماستان وعان دەگەن ادالدىعىمىزدان تايماۋىمىز كەرەك. دانيال سياقتى، ەحوبامەن دوستىعىمىزدى ٶز ومىرىمىزدەن دە ارتىق كورۋىمىز قاجەت (دان. 6:7، 10، 16، 22). ەحوبانىڭ كومەگىمەن كەز كەلگەن سىناقتان سۇرىنبەي وتە الامىز، وسىلاي ونىمەن دوستىق قارىم-قاتىناسىمىزدى ساقتاپ قالامىز (ٴفىلىپ. 4:13).
دۇعا ەتۋ سيى
7. ا) ناقىل سوزدەر 15:8 گە ساي، ەحوبا دۇعالارىمىزعا قالاي قارايدى؟ ٵ) ەحوبا دۇعالارىمىزعا قالاي جاۋاپ بەرەدى؟
7 كوزگە كورىنبەيتىن تاعى ٴبىر قازىنامىز — دۇعا. جان دوستار ٴبىر-بىرىنە وي-سەزىمدەرىن ايتقاندى جاقسى كورەدى. ەحوبامەن دوستىعىمىز تۋرالى دا وسىلاي دەي الامىز. ول بىزگە ٶزىنىڭ ٴسوزى ارقىلى سويلەپ، وي-سەزىمدەرىن جەتكىزەدى. ال ٴبىز وعان تەرەڭ ويلارىمىز بەن ىشكى سەزىمدەرىمىزدى دۇعا ارقىلى ايتامىز. ناقىل سوزدەر 15:8 وقىڭىز). سۇيىكتى دوسىمىز بولعاندىقتان ەحوبا دۇعالارىمىزدى ەستىپ قانا قويماي، ولارعا جاۋاپ تا بەرەدى. كەيدە ول تەز جاۋاپ بەرەدى، ال كەيدە ٴبىر ماسەلە جايلى ٴبىراز ۋاقىت دۇعا ەتۋىمىز كەرەك بولادى. قالاي بولعان كۇندە دە، قۇداي دۇعامىزعا ٴدال ۋاقىتىندا، ەڭ جاقسى جولمەن جاۋاپ بەرەتىنىنە نىق سەنەمىز. ارينە، ونىڭ جاۋابى ٴبىز كۇتكەننەن وزگەشە بولۋى مۇمكىن. مىسالعا، ول سىناقتارىمىزدى الىپ تاستاماي، ولارعا توتەپ بەرۋىمىز ٷشىن دانالىق پەن كۇش دارىتۋى مۇمكىن (قور. 1-ح. 10:13).
ەحوبا ٴبىزدىڭ دۇعالارىمىزدى تىڭداعاندى ۇناتادى ((8-ابزاستى قاراڭىز) *
8. دۇعا ەتۋ سيىنا دەگەن ريزاشىلىعىمىزدى قالاي كورسەتە الامىز؟
8 وسى تەڭدەسسىز سي ٷشىن ريزاشىلىعىمىزدى قالاي بىلدىرسەك بولادى؟ مۇنىڭ ٴبىر جولى — قۇدايدىڭ «ۇدايى دۇعا ەتىڭدەر» دەگەن نۇسقاۋىنا قۇلاق اسۋ (سال. 1-ح. 5:17). ەحوبا ٴبىزدى دۇعا ەتۋگە ماجبۇرلەمەيدى. قايتا، ەرىك بوستاندىعىمىزدى سيلاپ، ٴبىزدى ٵردايىم دۇعا ايتۋعا تالپىندىرادى (ريم. 12:12). ولاي بولسا، وسى سيعا دەگەن ريزاشىلىعىمىزدى كۇنى بويى ٴجيى-ٴجيى دۇعا ەتۋىمىزبەن كورسەتە الامىز. البەتتە، دۇعامىزدا ەحوباعا العىس ٴبىلدىرۋدى جانە ونى ماداقتاۋدى دا ۇمىتپاۋىمىز كەرەك (ٴزاب. 145:2، 3).
9. ٴبىر ەر باۋىرلاس دۇعا تۋرالى قانداي سەزىمدە، ال ٴسىز قانداي سەزىمدەسىز؟
9 ەحوباعا كوبىرەك قىزمەت ەتكەن سايىن جانە ونىڭ دۇعالارىمىزعا قالاي جاۋاپ بەرىپ جاتقانىن كورگەن سايىن، دۇعاعا دەگەن العىسىمىز ارتا ٴتۇسۋ كەرەك. 47 جىل بويى تولىق ۋاقىتتى قىزمەت ەتىپ جۇرگەن كريس باۋىرلاس بىلاي دەيدى: «ەحوبامەن سويلەسۋ ٷشىن تاڭەرتەڭ ەرتە تۇرعاندى ۇناتامىن. تاڭ ارايلاپ اتىپ، اينالا اجارلانا تۇسكەندە، ەحوبامەن تىلدەسۋگە نە جەتسىن! سول كەزدە بارلىق سيلارى ٷشىن، سونىڭ ىشىندە دۇعا ٷشىن، العىس ايتپاي تۇرا المايمىن. ال كۇننىڭ سوڭىندا دۇعا ەتىپ العان سوڭ، تازا ار-ۇجدانمەن ۇيقىعا كەتۋ نەتكەن عانيبەت!»
كيەلى رۋحتىڭ كومەگى
10. قۇدايدىڭ كيەلى رۋحىن نە ٷشىن باعالاۋىمىز كەرەك؟
10 قۇدايدىڭ كيەلى رۋحى — باعالاۋىمىز كەرەك تاعى ٴبىر كوزگە كورىنبەيتىن قازىنا. يسا كيەلى رۋح سۇراپ دۇعا ەتە بەرۋىمىز كەرەكتىگىن ايتقان (لۇقا 11:9، 13). ەحوبا كيەلى رۋحى ارقىلى بىزگە كۇش بەرەدى، ٴتىپتى «ادام كۇشىنەن اسقان كۇش» دارىتادى (قور. 2-ح. 4:7؛ ەل. ٸس. 1:8). قۇداي رۋحىنىڭ كومەگىمەن كەز كەلگەن سىناقتا مويىماي، تاباندى بولا الامىز.
(11-ابزاستى قاراڭىز) *
11. كيەلى رۋح بىزگە قالاي كومەكتەسەدى؟
11 كيەلى رۋح ماسىحشىلىك مىندەتتەرىمىزدى اتقارۋعا كومەكتەسەدى. قۇدايدىڭ رۋحى قابىلەت پەن دارىندارىمىزدى ارتتىرا الادى. ٴبىز قىزمەتتەگى جەتىستىكتەرىمىز ٶزىمىزدىڭ ەمەس، كيەلى رۋحتىڭ ارقاسىندا ەكەنىن جاقسى تۇسىنەمىز.
12. ٴزابۇر 139:23، 24 كە ساي، كيەلى رۋح نە ىستەۋگە كومەكتەسسىن دەپ دۇعا ەتۋىمىز كەرەك؟
12 قۇدايدىڭ كيەلى رۋحىن باعالايتىنىمىزدى قالاي كورسەتە الامىز؟ مۇنىڭ ٴبىر جولى — كيەلى رۋح جامان ويلارىمىز بەن قالاۋلارىمىزدى انىقتاۋعا كومەكتەسسىن دەپ دۇعا ەتۋ (ٴزابۇر 139:23، 24 وقىڭىز). وسىلاي ەتسەك، ەحوبا رۋحى ارقىلى جامان ويلارىمىز بەن بەيىمدىلىكتەرىمىزدى اڭعارۋعا كومەكتەسەدى. ولاردى اڭعارعاننان كەيىن، قۇدايعا دۇعا ەتىپ، كيەلى رۋحىمەن سول ويلارىمىز بەن قالاۋلارىمىزعا قارسى تۇرۋعا كۇش بەرۋىن سۇراۋىمىز كەرەك. سوندا ەحوبا بىزگە كيەلى رۋحىمەن كومەكتەسۋىن دوعارماۋ ٷشىن قولدان كەلگەننىڭ ٴبارىن ىستەگىمىز كەلەتىنىن كورسەتەمىز (ەفەس. 4:30).
13. كيەلى رۋحقا دەگەن ريزاشىلىعىمىزدى قالاي ارتتىرا الامىز؟
13 كيەلى رۋحتىڭ بۇگىندە نە ىستەپ جاتقانى جايلى ويلانساق، وعان دەگەن ريزاشىلىعىمىز ارتقان ۇستىنە ارتا تۇسەدى. يسا كوككە كوتەرىلمەس بۇرىن شاكىرتتەرىنە: «وزدەرىڭە كيەلى رۋح قونعاندا كۇش-قۋاتقا يە بولىپ،.. جەردىڭ قيىر شەتىنە دەيىن مەن جايلى كۋالىك ەتەسىڭدەر»،— دەگەن بولاتىن (ەل. ٸس. 1:8). وسى سوزدەر قازىرگى تاڭدا تاڭعاجايىپ تۇردە ورىندالىپ جاتىر. كيەلى رۋحتىڭ ارقاسىندا دۇنيەنىڭ تۇكپىر-تۇكپىرىندەگى سەگىز جارىم ميلليونداي ادام ەحوباعا عيبادات ەتۋدە. سونىمەن قاتار قۇدايدىڭ رۋحىنىڭ ارقاسىندا ٴبىز رۋحاني جۇماقتا ٴجۇرمىز، ويتكەنى كيەلى رۋح سۇيىسپەنشىلىك، قۋانىش، تاتۋلىق، شىدامدىلىق، مەيىرىمدىلىك، ىزگىلىك، سەنىم، جۇمساقتىق، ۇستامدىلىق سياقتى كوركەم قاسيەتتەردى دامىتۋعا كومەكتەسەدى. بۇل قاسيەتتەر — «كيەلى رۋحتىڭ جەمىسى» (عال. 5:22، 23). شىنىمەن دە، كيەلى رۋح — باعا جەتپەس سي!
كوكتەن كەلەتىن قولداۋ
14. ۋاعىزدا جۇرگەندە بىزگە كوزگە كورىنبەيتىن قانداي قولداۋ كورسەتىلەدى؟
14 كوزگە كورىنبەيتىن قازىنامىزدىڭ تاعى ٴبىرى — ەحوبامەن جانە ونىڭ ۇيىمىنىڭ كوكتەگى بولىگىمەن «بىرگە ەڭبەكتەنىپ جۇرگەنىمىز» (قور. 2-ح. 6:1). شاكىرت دايىنداۋ ىسىنە اتسالىسقاندا، ٴبىز ولارمەن ەڭبەكتەنەمىز. پاۋىل وزىنە جانە وسى ىسكە قاتىساتىندارعا نۇسقاپ: «ٴبىز قۇدايمەن قىزمەتتەسپىز»،— دەگەن (قور. 1-ح. 3:9). ۋاعىزعا شىققاندا ٴبىز يسامەن دە قىزمەتتەس بولامىز. ەسىڭىزدە بولسا، «بارلىق حالىقتاردان شاكىرتتەر دايىنداۋدى» تاپسىرعان سوڭ، يسا ٸزباسارلارىنا: «سەندەرمەن بىرگەمىن»،— دەپ ايتقان بولاتىن (مات. 28:19، 20). ال پەرىشتەلەر تۋرالى نە دەۋگە بولادى؟ «جەر بەتىندە تۇراتىندارعا... ماڭگىلىك ىزگى حاباردى» ايتقان كەزدە، پەرىشتەلەردىڭ ٴبىزدى جەتەلەيتىنى نەتكەن باتا! (ايان 14:6).
15. قىزمەتىمىزدە ەحوبانىڭ ماڭىزدى ٴرول اتقاراتىنىنا كيەلى كىتاپتان مىسال كەلتىرىڭىز.
15 كوكتەن كەلەتىن وسىنداي قولداۋدىڭ ارقاسىندا قانداي ىستەر اتقارىلىپ جاتىر؟ پاتشالىق تۋرالى ٴسوزدىڭ تۇقىمىن سەپكەندە، كەيبىرى جاقسى جۇرەكتەرگە ٴتۇسىپ، ٶنىم بەرۋدە (مات. 13:18، 23). شىندىقتىڭ وسى تۇقىمىن كىم ٶسىرىپ، كىم ٶنىمدى ەتەدى؟ يسا ايتقانداي، «اكەسى جاقىنداتىپ تارتسا عانا» ادام ونىڭ ٸزباسارى بولا الادى (جوح. 6:44). كيەلى كىتاپتا وسىنى راستايتىن جاقسى ٴبىر مىسال بار. پاۋىل ٴفىلىپى قالاسىنىڭ سىرتىندا ٴبىر توپ ايەلگە ۋاعىزداعاندا نە بولعانىن ەسكە الايىقشى. كيەلى كىتاپتا سول ايەلدەردىڭ ٴبىرى ٴلۇديا جايلى بىلاي دەلىنگەن: «پاۋىلدى تىڭداپ وتىرعاندا، ايتىلعانداردى قابىل الۋى ٷشىن ەحوبا ونىڭ جۇرەگىن اشتى» (ەل. ٸس. 16:13—15). ەحوبا ٴلۇديا سياقتى ميلليونداعان باسقا ادامداردى دا وزىنە جاقىنداتىپ تارتتى.
16. قىزمەتتەگى جەتىستىكتەرىمىز ٷشىن ماداققا كىم لايىق؟
16 سونىمەن، قىزمەتتە جەتىستىكتەرگە كىمنىڭ ارقاسىندا جەتىپ جاتىرمىز؟ قورىنتتاعى قاۋىمعا جازعان پاۋىلدىڭ مىنا سوزدەرى وسىعان جاۋاپ بەرەدى: «مەن ەكتىم، اپوللوس سۋاردى، ال ٶسىرىپ جاتقان — قۇداي. سوندىقتان ەككەن دە، سۋارعان دا ەمەس، ٶسىرىپ وتىرعان قۇداي ماداقتالسىن» (قور. 1-ح. 3:6، 7). ەندەشە، پاۋىل ىسپەتتى قىزمەتتەگى كەز كەلگەن جەتىستىگىمىز ٷشىن بار ماداقتى ەحوباعا ارنايىق.
17. قۇدايمەن، ماسىحپەن جانە پەرىشتەلەرمەن «بىرگە ەڭبەكتەنۋدى» باعالايتىنىمىزدى قالاي كورسەتەمىز؟
17 قۇدايمەن، ماسىحپەن جانە پەرىشتەلەرمەن «بىرگە ەڭبەكتەنۋ» مارتەبەسىن باعالايتىنىمىزدى قالاي كورسەتسەك بولادى؟ ىزگى حاباردى وزگەلەرگە ايتۋدىڭ مۇمكىندىگىن قالت جىبەرمەۋ ارقىلى. مۇنى ىستەۋدىڭ جولدارى كوپ. مىسالى، «ەل الدىندا جانە ۇيدەن ۇيگە ٴجۇرىپ» ۋاعىزداۋ (ەل. ٸس. 20:20). سونداي-اق كوبىسى بەيرەسمي كۋالىك ەتكەندى جاقسى كورەدى. ولار بوتەن ادامدى جولىقتىرعاندا دوستىق پەيىلمەن سالەمدەسىپ، اڭگىمە باستاپ كورەدى. ەگەر ادام اڭگىمەلەسۋگە ىڭعاي تانىتسا، وعان ىلتيپاتپەن پاتشالىق حابارىن ايتادى.
(18-ابزاستى قاراڭىز) *
18، 19. ا) شىندىقتىڭ تۇقىمىن قالاي سۋارامىز؟ ٵ) ەحوبا كيەلى كىتاپتى زەرتتەگەن ٴبىر كىسىگە قالاي كومەكتەستى؟
18 قۇدايمەن قىزمەتتەسەتىندىكتەن، ٴبىز تەك شىندىقتىڭ تۇقىمىن سەۋىپ قانا قويماي، ونى سۋارۋىمىز دا كەرەك. ەگەر ادام حابارىمىزعا قىزىقسا، ونىمەن زەرتتەۋ ساباعىن باستاۋ ٷشىن قايتا بارۋعا نەمەسە وعان باسقا بىرەۋدىڭ بارۋىن قامداۋعا كۇش سالامىز. ەحوبا سول ادامعا وي قالپى مەن ٶمىر سالتىن وزگەرتۋگە كومەكتەسىپ جاتقانىن كورگەندە قاتتى قۋانامىز.
19 وڭتۇستىك افريكاداعى بۇرىن ەمشى بولعان باۋىرلاستىڭ مىسالىن قاراستىرايىق. وعان كيەلى كىتاپتى زەرتتەۋ ساباعىنان بىلگەندەرى قاتتى ۇنايدى. الايدا كيەلى كىتاپتىڭ ارۋاقتارمەن بايلانىسۋ جايلى نە دەيتىنىن بىلگەندە، مۇنى قابىلداۋ وعان قيىن بولادى (مۇس. 5-ج. 18:10—12). ٴبىراق ول بىرتە-بىرتە وي قالپىن قۇدايدىڭ تۇزەتۋىنە جول بەرەدى. ٴسۇيتىپ، ۋاقىت وتە ول جالعىز كۇنكورىس كوزى بولعان ەمشىلىك كاسىبىنەن باس تارتادى. قازىر 60 قا كەلگەن ول بىلاي دەيدى: «ەحوبا كۋاگەرلەرىنىڭ ماعان ٵرتۇرلى جولمەن قول ۇشىن بەرىپ جاتقانىنا ٴدان ريزامىن. ولار جۇمىس تابۋىما دا كومەكتەستى. بارىنەن بۇرىن، ٶمىرىمدى وزگەرتۋگە جاردەم بەرگەن ەحوباعا العىسىم شەكسىز. ەندى مەن شومىلدىرۋ راسىمىنەن ٶتىپ، ۋاعىز ىسىنە قاتىسىپ ٴجۇرمىن».
20. ٴسىز نە ىستەۋگە بەل بۋدىڭىز؟
20 وسى ماقالادا كوزگە كورىنبەيتىن ٴتورت قازىنانى قاراستىردىق. ولاردىڭ ىشىندەگى ەڭ ماڭىزدىسى — ەحوبامەن جاقىن دوس بولۋ مارتەبەسى. ەحوبامەن دوس بولساق، كوزگە كورىنبەيتىن باسقا قازىنالاردىڭ دا يگىلىگىن كورە الامىز. اتاپ ايتقاندا، وعان دۇعا ەتە الامىز، كيەلى رۋحتىڭ كومەگىن كورەمىز جانە كوكتەن كەلەتىن قولداۋدى سەزىنەمىز. ولاي بولسا، كوزگە كورىنبەيتىن وسى قازىنالارعا ريزاشىلىعىمىزدى ارتتىرا بەرەيىك. سونداي-اق كەرەمەت دوسىمىز بولعانى ٷشىن ەحوباعا العىس جاۋدىرۋدان تالمايىق!
145-ٵن قۇداي ۋادە ەتكەن جۇماق
^ 5-ابزاس الدىڭعى ماقالادا قۇدايدىڭ كوزگە كورىنەتىن كەيبىر سيلارىن قاراستىردىق. ال بۇل ماقالادا كوزگە كورىنبەيتىن سيلارعا نازار اۋدارامىز جانە ولاردى باعالايتىنىمىزدى قالاي كورسەتەتىنىمىز جايلى قاراستىرامىز. سونداي-اق وسى سيلاردى بەرگەن ەحوبا قۇدايعا دەگەن ريزاشىلىعىمىزدى ارتتىرامىز.
^ 58-ابزاس سۋرەت سيپاتتاماسى: 1) قىز باۋىرلاس جاراتىلىستارعا تامسانىپ، ەحوبامەن دوستىعى جايلى ويلانىپ تۇر.
^ 60-ابزاس سۋرەت سيپاتتاماسى: 2) باۋىرلاس كۋالىك بەرۋ ٷشىن ەحوبادان كۇش سۇراپ وتىر.
^ 62-ابزاس سۋرەت سيپاتتاماسى: 3) كيەلى رۋح باۋىرلاسقا بەيرەسمي تۇردە پاتشالىق حابارىن باتىل ۋاعىزداۋعا كومەكتەسىپ جاتىر.
^ 64-ابزاس سۋرەت سيپاتتاماسى: 4) باۋىرلاس ٶزى بەيرەسمي كۋالىك بەرگەن ايەلمەن كيەلى كىتاپتى زەرتتەپ وتىر. ول ۋاعىزداۋ مەن شاكىرت دايىنداۋ ٸسىن پەرىشتەلەردىڭ قولداۋىمەن اتقارىپ جاتىر.