ەحوبا «بار جوسپارىڭدى ىسكە اسىرسىن!»
«ەحوبادان زور قۋانىش تاپ، سوندا ول جۇرەك قالاۋىڭدى ورىندايدى» (ٴزابۇر 37:4).
اندەر: 89، 140
1. جاستار بولاشاعىنا قاتىستى نەنى شەشىپ الۋى كەرەك؟ قاتتى ۋايىمعا بەرىلمەۋگە جاستارعا نە كومەكتەسەدى؟ (ماقالانىڭ باسىنداعى سۋرەتتى قارا.)
جاستار، كەلىسەتىن شىعارسىڭدار، ادام ساياحاتقا اتتانباس بۇرىن قاي جاققا باراتىنىن جوسپارلاپ الۋ كەرەك. ٶمىردى دە ساياحاتقا تەڭەۋگە بولادى، ال سول ٶمىر جولىندا قايدا بارعىڭ كەلەتىنىن ويلاستىرىپ جوسپارلايتىن ۋاقىت — جاستىق شاعىڭ. ارينە، مۇنداي جوسپار قۇرۋ وڭاي بولماۋى مۇمكىن. مىسالى، حەتەر ەسىمدى قىز بىلاي دەيدى: «بۇكىل ٶمىرىڭدى نەگە ارنايتىنىڭدى قازىر شەشىپ الۋ كەرەكتىگىن ويلاعاندا، قورقىپ كەتەسىڭ». سەندە دە وسىنداي سەزىم بولسا، ەحوبانىڭ كەلەسى سوزدەرىن ەسىڭدە ۇستاعايسىڭ: «ەش قورىقپا، مەن ساعان جار بولامىن. ەش ابىرجىما، مەن سەنىڭ قۇدايىڭمىن. مەن سەنى نىعايتامىن، ساعان كومەكتەسەمىن» (يشايا 41:10).
2. ەحوبا سەنىڭ باقىتتى بولاشاققا جوسپار قۇرعانىڭدى قالايتىنىن قايدان بىلۋگە بولادى؟
2 ەحوبا سەنى ٶز كەلەشەگىڭدى اقىلمەن جوسپارلاۋعا شاقىرادى (ۋاعىزداۋشى 12:1؛ ماتاي 6:20). ول سەنى باقىتتى بولسا ەكەن دەيدى. جاراتىلىسقا كوز جىبەرىپ، سونداعى دىبىستاردى ەستىپ، قۇداي جاراتقان نارسەلەردىڭ ٴدامىن تاتقان كەزدە بۇعان كوزىڭ جەتە تۇسەدى. الايدا ونىڭ قامقورلىعى بۇدان عانا كورىنبەيدى. ول بىزگە كەڭەستەر بەرىپ، ەڭ جاقسى ٶمىر جولىنا باۋليدى. سوندىقتان ادامدار ونىڭ كەڭەسىن ەلەمەگەندە، وعان بۇل ۇنامايدى. باسشىلىعىنا مويىنسۇنباعان ادامدار جايلى ول بىلاي دەيدى: «ماعان ۇنامسىز نارسەلەردى تاڭدادىڭدار... مەنىڭ قىزمەتشىلەرىم قۋانىشقا كەنەلەدى، ال سەندەر ۇياتقا قالاسىڭدار! مەنىڭ قىزمەتشىلەرىم جۇرەكتەرىن قۋانىش كەرنەپ، ٵن سالادى!» (يشايا 65:12—14). ومىردە دۇرىس تاڭداۋ جاساساق، بۇل ەحوباعا داڭق اكەلەدى (ناقىل سوزدەر 27:11).
باقىتقا بولەيتىن جوسپار
3. ەحوبا ساعان نە ۇسىنىپ وتىر؟
3 ەحوبا ساعان بولاشاعىڭا قاتىستى قانداي جوسپار ۇسىنىپ وتىر؟ باقىتتى بولۋ ٷشىن، ەحوبانى تانىپ-ٴبىلىپ، وعان قىزمەت ەتۋ قاجەت. ەحوبا ادام بالاسىن سولاي ەتىپ جاراتقان (ٴزابۇر 128:1؛ ماتاي 5:3). جانۋارلار تەك قورەكتەنىپ، كوبەيۋدى عانا بىلەدى. ال ساعان كەلەر بولساق، ەحوبا بولاشاعىڭدى جوسپارلاپ، ٶمىرىڭدى ٴماندى دە ٴساندى ەتكەنىڭدى قالايدى. ادام بالاسىن «وزىنە ۇقساس ەتىپ» جاراتقان جاراتۋشىمىز — «سۇيىسپەنشىلىكتىڭ قۇدايى» ٵرى «باقىتتى قۇداي» (قورىنتتىقتارعا 2-حات 13:11؛ تىموتەگە 1-حات 1:11؛ مۇسانىڭ 1-جازباسى 1:27). سۇيىسپەنشىلىككە تولى قۇدايعا ەلىكتەر بولساڭ، سەن دە باقىتتى بولاسىڭ. كيەلى كىتاپتا: «العاننان گورى بەرگەن باقىتتى»،— دەلىنگەن (ەلشىلەردىڭ ىستەرى 20:35). مۇنى ٶزىڭ دە سەزىنگەن بولارسىڭ. بۇل—ٶمىردىڭ نەگىزگى شىندىعى. سوندىقتان ەحوبا سەنىڭ بولاشاققا قۇرعان جوسپارىڭنىڭ وزگەلەرگە جانە وعان دەگەن سۇيىسپەنشىلىككە نەگىزدەلگەنىن قالايدى (ماتاي 22:36—39 وقى).
4، 5. يسانى باقىتتى ەتكەن نە؟
4 جاستار، يسا ٴماسىح سەندەر ٷشىن تاماشا ۇلگى قالدىردى. بالا كەزىندە ول دا ويناپ-كۇلگەن شىعار. قۇداي سوزىندە ايتىلعانداي، «كۇلەتىن ۋاقىت» پەن «ٴبي بيلەيتىن ۋاقىت» بار (ۋاعىزداۋشى 3:4). سونداي-اق يسا جازبالاردى زەرتتەپ، ەحوباعا جاقىنداعان. 12 جاسىندا ول «ۇعىمتالدىعىمەن جانە بەرگەن جاۋاپتارىمەن» عيباداتحاناداعى ۇستازداردى تاڭعالدىرعان (لۇقا 2:42، 46، 47).
5 ال ەرەسەك كەزىندە يسا قۇدايدىڭ ايتقانىن ىستەۋ ارقىلى باقىتقا بولەنگەن. مىسالى، قۇداي ونىڭ «كەدەيلەرگە ىزگى حاباردى جاريالاعانىن» جانە «زاعيپتارعا كوزدەرى اشىلاتىنىن جاريا ەتكەنىن» قالادى (لۇقا 4:18). ٴزابۇر 40:8 دە يسانىڭ سەزىمدەرى كەلەسىدەي سيپاتتالعان: «وزىڭنىڭ ەركىڭدى ورىنداۋعا قۇشتارمىن، ۋا، قۇدايىم». ول ادامدارعا اكەسى جايلى ٴتالىم بەرۋدەن راقات تاپقان (لۇقا 10:21 وقى). بىردە ٴبىر ايەلمەن شىنايى عيبادات جايلى اڭگىمەلەسكەننەن كەيىن ول شاكىرتتەرىنە بىلاي دەگەن: «مەنىڭ تاماعىم — ٶزىمدى جىبەرگەن قۇدايدىڭ ەركىن ورىنداۋ جانە ونىڭ تاپسىرعان ٸسىن اياقتاۋ» (جوحان 4:31—34). يسا باقىتتى بولدى، ويتكەنى ول قۇدايعا جانە ادامدارعا دەگەن سۇيىسپەنشىلىگىن كورسەتتى. وسىلاي سۇيىسپەنشىلىك تانىتساڭ، سەن دە باقىتتى بولاسىڭ.
6. باسقالارمەن بولاشاققا قاتىستى جوسپارلارىڭ جايلى سويلەسكەننىڭ قانداي پايداسى بار؟
6 كوپتەگەن ماسىحشىلەر جاس كەزىندە ٸزاشارلىق قىزمەتتى باستاعان، وسىلايشا باقىت كوزىن تاپقان. نەگە سول باۋىرلاستاردىڭ كەيبىرىمەن جوسپارىڭ جايلى اڭگىمەلەسپەسكە؟ «اقىلداسپاعان جەردە جوسپار ىسكە اسپايدى، كەڭەسشى كوپ بولسا، ول جۇزەگە اسادى» (ناقىل سوزدەر 15:22). بالكىم، ولار ٸزاشارلىق قىزمەتتىڭ سەنى بۇكىل ومىرىڭە قاجەتتى نارسەلەرگە ۇيرەتەتىنىن ايتىپ بەرەتىن شىعار. يسا كوكتە بولعاندا اكەسىنەن كوپ نارسەگە ۇيرەنگەن. جەردەگى قىزمەتى كەزىندە ول ٵرى قاراي دا ۇيرەنە بەردى. ىزگى حاباردى ايتۋ جانە قيىن جاعدايلاردا مىنسىزدىگىن ساقتاۋ ارقىلى ول زور قۋانىشقا بولەندى (يشايا 50:4 وقى؛ ەۆرەيلەرگە 5:8؛ 12:2). قازىر تولىق ۋاقىتتى قىزمەت سەنى قالايشا باقىتتى ەتەتىنى جايلى ٴسوز قوزعايىق.
شاكىرت دايىنداۋ ٸسى — ەڭ كەرەمەت ٸس
7. نەگە كوپ جاستار شاكىرت دايىنداۋ ىسىنەن قۋانىش تابادى؟
7 يسا بىزگە ادامداردى ۇيرەتىپ، «شاكىرتتەر دايىنداۋدى» تاپسىرعان (ماتاي 28:19، 20). ەگەر سەن وسى ىسكە ٶمىرىڭدى ارنار بولساڭ، ەحوباعا داڭق اكەلەتىن ماعىنالى ٶمىر كەشەسىڭ. ارينە، كەز كەلگەن ٸس سياقتى، بۇل ىستە دە شەبەر بولۋ ٷشىن ۋاقىت كەرەك. جاسوسپىرىم كەزىندە ٸزاشارلىق قىزمەتتى باستاعان تيموتي ەسىمدى باۋىرلاس بىلاي دەدى: «ەحوباعا تولىق ۋاقىتتى قىزمەت ەتۋ ماعان ۇنايدى، ويتكەنى وسىلايشا مەن وعان سۇيىسپەنشىلىگىمدى كورسەتە الامىن. باستاپقىدا ەشكىممەن زەرتتەۋ ساباعىن باستاي المادىم. ٴبىراق كەيىننەن باسقا اۋماققا كوشتىم. ارادا ٴبىر اي وتەر-وتپەس، مەن بىرنەشە زەرتتەۋ ساباعىن باستادىم. ولاردىڭ ٴبىرى پاتشالىق سارايىنا كەلە باستادى. كەيىنىرەك ەكى ايلىق سالتباستى ەر باۋىرلاستارعا ارنالعان كيەلى كىتاپ مەكتەبىندە ٴبىلىم الدىم *. سوسىن جاڭادان تاعايىندالعان جەرىمدە ٴتورت زەرتتەۋ ساباعىن تاپتىم. ادامدارعا ٴتالىم بەرۋ ماعان قاتتى ۇنايدى. ويتكەنى كيەلى رۋح ادامداردىڭ ٶمىرىن قالاي وزگەرتىپ جاتقانىنا كۋا بولاسىڭ» (سالونيكالىقتارعا 1-حات 2:19).
8. كوبىرەك ادامعا ۋاعىزداۋ ٷشىن كەيبىر جاستار نە ىستەيدى؟
8 كەيبىر جاستار شەت ٴتىلىن ۇيرەنىپ العان. مىسالى، سولتۇستىك امەريكاداعى جەيكوب بىلاي دەپ جازدى: «جەتى جاسىمدا سىنىپتاستارىمنىڭ كوبىسى ۆەتنامدىقتار ەدى. مەن ولارعا ەحوبا جايىندا ايتىپ بەرگىم كەلەتىن، سوندىقتان كوپ ۇزاماي ولاردىڭ ٴتىلىن ۇيرەنىپ الۋدى جوسپارلادىم. بۇل ٴتىلدى ۇيرەنۋ ٷشىن، كوبىنەسە اعىلشىن تىلىندەگى «كۇزەت مۇناراسىن» ۆەتنام تىلىندەگى باسىلىممەن سالىستىراتىنمىن. بۇعان قوسا، كورشى ۆەتنام تىلىندەگى قاۋىمداعى باۋىرلاستارمەن دوستاسىپ الدىم. ون سەگىزگە تولعاندا، ٸزاشار بولدىم. كەيىننەن سالتباستى ەر باۋىرلاستارعا ارنالعان كيەلى كىتاپ مەكتەبىندە وقىدىم. قازىرگى ٸزاشار رەتىندە تاعايىندالعان جەرىمدە بۇل ماعان زور كومەك بولدى. مەن قىزمەت ەتىپ جۇرگەن ۆەتنام تىلىندەگى توپتا جالعىز اقساقالمىن. كوپ ۆەتنامدىقتار مەنىڭ ٴتىل ۇيرەنىپ العانىمدى كورىپ تاڭعالىپ جاتادى. ولار مەنى ىشكە كىرگىزەدى، ٴسويتىپ مەن ولارمەن ٴجيى زەرتتەۋ ساباعىن باستاپ كەتەمىن. ولاردىڭ كەيبىرى رۋحاني ٶسىپ، شومىلدىرۋ راسىمىنەن ٶتتى» (ەلشىلەردىڭ ىستەرى 2:7، 8 سالىستىر).
9. شاكىرت دايىنداۋ ىسىمەن اينالىسقاندا نەگە ۇيرەنەمىز؟
9 شاكىرت دايىنداۋ ٸسى سەنى جاقسى ەڭبەك داعدىلارىنا ۇيرەتەدى. مىسالى، ادامدارمەن ٴتىل تابىسۋدى، ٶزىڭدى سەنىمدى ۇستاي ٴبىلۋدى جانە ٸلتيپاتتىلىق تانىتۋدى ۇيرەنەسىڭ (ناقىل سوزدەر 21:5؛ تىموتەگە 2-حات 2:24). ال ەڭ باستىسى، وسى ٸستىڭ ارقاسىندا سەن ٶز نانىمىڭدى جازبالارعا نەگىزدەپ دالەلدەۋدى يگەرەسىڭ، وسىلايشا زور قۋانىشقا بولەنەسىڭ. سونداي-اق ەحوبامەن بىرگە ەڭبەكتەنۋدى دە ۇيرەنە الاسىڭ (قورىنتتىقتارعا 1-حات 3:9).
10. قيىن اۋماقتا قىزمەت ەتىپ جۇرسەڭ دە، شاكىرت دايىنداۋ ىسىنەن قالاي قۋانىش تابا الاسىڭ؟
10 سەندەردىڭ اۋماقتارىڭدا كيەلى كىتاپتى زەرتتەگىسى كەلەتىندەر وتە از بولسا دا، سەن شاكىرت دايىنداۋ ىسىنەن قۋانىش تابا الاسىڭ. شاكىرت دايىنداۋ ىسىنە بۇكىل قاۋىم جۇمىلا اتسالىسادى. ٴبىر باۋىرلاس قانا شاكىرت بولاتىن ادام تاپسا دا، ٴبارىمىز قۋانامىز، سەبەبى بارلىعىمىز بىرلەسە ىزدەدىك. مىسالى، كيەلى كىتاپقا ونشا قىزىعۋشىلىق تانىتپايتىن اۋماقتا توعىز جىل بويى ٸزاشار بولعان برەندون بىلاي دەدى: «ىزگى حاباردى ۋاعىزداعاندى جاقسى كورەمىن، سەبەبى ەحوبا بىزگە وسىنى ىستەۋدى ايتتى. مەن ٸزاشارلىق قىزمەتتى مەكتەپ بىتىرگەننەن كەيىن الدىم. قاۋىمىمىزداعى جاس ەر باۋىرلاستاردى جىگەرلەندىرە الاتىنىما، ولاردىڭ رۋحاني العا باسىپ جاتقاندارىنا قۋانامىن. سالتباستى ەر باۋىرلاستارعا ارنالعان كيەلى كىتاپ مەكتەبىنە بارعان سوڭ، مەنى جاڭا جەرگە ٸزاشار ەتىپ تاعايىندادى. شومىلدىرۋ راسىمىنەن وتۋگە دەيىن بارعان زەرتتەۋشىنى سول كۇيى تاپپادىم، ٴبىراق باسقالار تاپتى عوي. شاكىرت دايىنداۋ ىسىنە بارىنشا اتسالىسۋدى شەشكەنىمە ريزامىن» (ۋاعىزداۋشى 11:6).
جوسپارىڭ سەنى قايدا جەتەلەپ اكەلۋى مۇمكىن؟
11. كوپ جاستار تاعى قانداي جولمەن ەحوباعا قىزمەت ەتىپ ٴجۇر؟
11 ەحوباعا قىزمەت ەتۋدىڭ مۇمكىندىگى كوپ. ماسەلەن، كوپ جاستارىمىز قۇرىلىس ىسىندە كومەك كورسەتىپ ٴجۇر. قازىر جۇزدەگەن پاتشالىق سارايىنا قاجەتتىلىك بار. بۇل عيبادات ورىندارى ەحوبانى داڭقتايتىندىقتان، ولاردىڭ بوي كوتەرۋىنە اتسالىسقانىڭ سەنى شاتتىققا كەنەلتەتىنى ٴسوزسىز. مۇنىمەن قويماي، ول جاقتاعى باۋىرلاستارىڭمەن قىزمەتتەسۋ دە قۋانىشقا بولەيدى. بۇدان بولەك، جۇمىستى ۇقىپتى ىستەۋ، حاۋىپسىزدىك شارالارىن ۇستانۋ، باقىلاۋشىلارمەن قىزمەتتەسە ٴبىلۋ سياقتى داعدىلاردى دا مەڭگەرىپ الاسىڭ.
تولىق ۋاقىتتى قىزمەتتى باستاعان باۋىرلاستار مول باتاعا كەنەلەدى (11—13 ابزاستاردى قاراڭىز)
12. قالاي ٸزاشارلىق قىزمەت ارقىلى باسقا دا مۇمكىندىكتەرگە ەسىك اشىلادى؟
12 كەۆين ەسىمدى باۋىرلاس بىلاي دەيدى: «كىشكەنتاي كەزىمنەن بەرى ەحوباعا تولىق ۋاقىتتى قىزمەت ەتۋدى ارماندايتىنمىن. اقىرى، 19 جاسىمدا ٸزاشار بولدىم. ٴبىر قۇرىلىسشى باۋىرلاسقا تولىق ەمەس ۋاقىتتى جۇمىسقا تۇرىپ، ٶز-ٶزىمدى اسىرادىم. شاتىر، تەرەزە، ەسىك ورناتۋدى ۇيرەنىپ الدىم. كەيىنىرەك مەن ەكى جىل بويى داۋىلدان جاپا شەككەندەرگە كومەكتەسۋ توبىندا بولىپ، پاتشالىق سارايى مەن باۋىرلاستاردىڭ ۇيلەرىن قايتا سوعۋعا جاردەمدەستىم. ال وڭتۇستىك افريكادا قۇرىلىس جاعىنان مۇقتاجدىق بار ەكەنىن بىلگەندە، ٶتىنىش تولتىرىپ، سوندا شاقىرىلدىم. افريكادا مەن بىرنەشە اپتا سايىن ٴبىر پاتشالىق سارايىنىڭ جوباسىنان ەكىنشىسىنە بارامىن. ٴبىز قۇرىلىس توبىمىزبەن ٴبىر وتباسى سياقتىمىز. ٴبىز ٴبىر جەردە تۇرامىز، كيەلى كىتاپتى بىرگە وقيمىز، جۇمىستى دا بىرگە ىستەيمىز. جەرگىلىكتى باۋىرلاستارمەن دە اپتا سايىن ۋاعىزعا شىعىپ تۇرعان ۇنايدى. بالا كەزىمدە قۇرعان جوسپارىم قازىر مەنى زور قۋانىشقا بولەۋدە. بۇلاي بولادى دەپ ويلاماعان دا ەدىم».
13. نەگە بەتەلدىك قىزمەت كوپ جاستارىمىزدى قۋانىشقا بولەۋدە؟
13 كەزىندە ٸزاشار بولعان جاستاردىڭ كەيبىرى قازىر بەتەلدە قىزمەت ەتەدى. بەتەلدىك قىزمەت باقىتقا بولەيدى، سەبەبى سەن ول جەردە نە ىستەسەڭ دە، ەحوبا ٷشىن ىستەيسىڭ. بەتەل وتباسى ادامداردىڭ شىندىقتى ٴبىلۋى ٷشىن كيەلى كىتاپ پەن باسىلىمداردى شىعارۋعا كۇش سالادى. داستين ەسىمدى بەتەلدىك بىلاي دەيدى: «مەن توعىز جاسىمدا تولىق ۋاقىتتى قىزمەت ەتەمىن دەپ ماقسات قويدىم، ٴسويتىپ، مەكتەپ بىتىرگەن سوڭ ٸزاشارلىقتى باستادىم. ٴبىر جارىم جىلدان كەيىن، مەنى بەتەلگە شاقىردى. ول جەردە باسپا ماشينالارىمەن جۇمىس ىستەۋدى، سوسىن كومپيۋتەرلىك باعدارلاما جاساۋدى يگەردىم. بەتەلدە مەن دۇنيە جۇزىلىك شاكىرت دايىنداۋ ٸسىنىڭ ٶسىمى جايىندا تىكەلەي ەستي الامىن. بۇل جاقتاعى قىزمەت قاتتى ۇنايدى، ويتكەنى ٴبىزدىڭ ٸسىمىز ادامداردىڭ ەحوباعا جاقىنداي تۇسۋىنە سەپتىگىن تيگىزەدى».
بولاشاققا قانداي جوسپار قۇراسىڭ؟
14. تولىق ۋاقىتتى قىزمەتكە قازىردەن باستاپ دايىندالۋ ٷشىن نە ىستەسەڭ بولادى؟
14 تولىق ۋاقىتتى قىزمەت ەتۋگە قالاي دايىندالساڭ بولادى؟ ەحوباعا ەڭ جاقسى جولمەن قىزمەت ەتۋ ٷشىن ساعان ماسىحشىگە ٴتان قاسيەتتەردى دامىتۋ قاجەت. قۇداي ٴسوزىن جۇيەلى تۇردە زەرتتە، ٴمان-ماعىناسىنا تەرەڭىنەن بويلاپ وي جۇگىرت، قاۋىم كەزدەسۋلەرىندە ٶز سەنىمىڭمەن ٴبولىسىپ وتىرۋعا تىرىس. مەكتەپ قابىرعاسىندا جۇرگەندە، وزگەلەرگە ىزگى حاباردى ايتۋ قابىلەتىڭدى دامىتا الاسىڭ. ادامداردىڭ پىكىرلەرىن ىلتيپاتپەن سۇراپ، جاۋابىن تىڭداۋ ارقىلى كوڭىل ٴبولۋدى ۇيرەنە بەر. سونىمەن قاتار قاۋىمىڭدا تازالىق جۇمىسىنا نە پاتشالىق سارايىن جوندەۋ سياقتى ىستەردە كومەگىڭدى ۇسىنساڭ بولادى. ەحوبا كىشىپەيىل ٵرى جۇمىس ىستەۋگە دايار ادامداردى قۋانا قولدانادى (ٴزابۇر 110:3 وقى؛ ەلشىلەردىڭ ىستەرى 6:1—3). ەلشى پاۋىل تىموتەنى ميسسيونەرلىك قىزمەتكە شاقىرعان، سەبەبى «باۋىرلاستار ول تۋرالى جاقسى پىكىردە بولاتىن» (ەلشىلەردىڭ ىستەرى 16:1—5).
مەكتەپ قابىرعاسىندا جۇرگەندە، وزگەلەرگە ىزگى حاباردى ايتۋ قابىلەتىڭدى دامىتا الاسىڭ
15. ٸزاشار بولۋعا مۇمكىندىك بەرەتىن جۇمىستى قالاي تابۋعا بولادى؟
15 تولىق ۋاقىتتى قىزمەتشىلەردىڭ كوبىسىنە جۇمىس كەرەك (ەلشىلەردىڭ ىستەرى 18:2، 3). بالكىم، جەرگىلىكتى اۋماقتان تابىلادى-اۋ دەگەن از ۋاقىتتق جۇمىسقا كىرە الۋ ٷشىن، ارنايى ٴبىر قىسقا كۋرستى وقىپ الارسىڭ. جوسپارىڭ جايلى اۋداندىق باقىلاۋشىمەن نەمەسە باسقا دا ىزاشارلارمەن اقىلداسىپ، ويلارىن سۇراپ كور. سوسىن كيەلى كىتاپتا ايتىلعانداي، «بار ٸسىڭدى ەحوباعا سەنىپ تاپسىر، سوندا جوسپارلارىڭ ىسكە اسار» (ناقىل سوزدەر 16:3؛ 20:18).
16. تولىق ۋاقىتتى قىزمەت قالاي بولاشاقتاعى جاۋاپكەرشىلىكتەرگە دايىندايدى؟
16 ەحوبا سەنىڭ باقىتتى بولاشاقتى «بەرىك ۇستانعانىڭدى» قالايدى. بۇعان سەنىمدى بولساڭ بولادى (تىموتەگە 1-حات 6:18، 19 وقى). تولىق ۋاقىتتى قىزمەت ەتكەندە سەن باسقا دا تولىق ۋاقىتتى قىزمەتشىلەرمەن يىق تىرەسە قىزمەت ەتىپ، تولىسقان ٴماسىحشى بولاسىڭ. سونداي-اق جاس كەزىنەن باستاپ تولىق ۋاقىتتى قىزمەت ەتكەن كوپتەگەن باۋىرلاستار وتباسىن قۇرعاندا دا، مۇنىڭ پايداسىن كورگەن. ۇيلەنبەي تۇرىپ ٸزاشار بولعان باۋىرلاستاردىڭ كوبىسى وتباسىن قۇرعاننان كەيىن دە ٸزاشارلىق قىزمەتتەرىن بىرگە جالعاستىرىپ جاتادى (ريمدىكتەرگە 16:3، 4).
17، 18. جوسپار قۇرۋدىڭ جۇرەكپەن قانداي بايلانىسى بار؟
17 ٴزابۇر 20:4 تە ەحوبا جايلى بىلاي دەلىنگەن: «جۇرەك قالاۋىڭدى ورىنداسىن، بار جوسپارىڭدى ىسكە اسىرسىن». بولاشاعىڭدى جوسپارلاعاندا ٶمىرىڭدى شىن مانىندە نەگە ارناعىڭ كەلەتىنى جونىندە ويلان. ەحوبا ٴبىزدىڭ كەزىمىزدە نە ىستەپ جاتقانى تۋرالى جانە ونىڭ ىسىنە قالاي ۇلەس قوسا الاتىنىڭ جايلى ويلانىپ كور. ٴسويتىپ، وعان ۇنايتىن ىسپەن اينالىسۋدى جوسپارلا.
18 ٶمىرىڭدى تولىقتاي ەحوباعا قىزمەت ەتۋگە جانە ونى ماداقتاۋعا ارنايتىن بولساڭ، وتە باقىتتى بولاسىڭ. سوندا «ەحوبادان زور قۋانىش» تاباسىڭ، ال «ول جۇرەك قالاۋىڭدى ورىندايدى» (ٴزابۇر 37:4).
^ 7-ابزاس بۇل مەكتەپ پاتشالىقتى جاريالاۋشىلارعا ارنالعان مەكتەپپەن الماستىرىلدى.
قىزىقتى بولار مالىمەتتەر
قۇرداستارىڭ نە دەيدى؟
كامەرون ەڭ جاقسى ٶمىر جولىن تاڭدادى
ٶمىرىڭىزدىڭ قۋانىشقا تولى بولعانىن قالايسىز با؟ كامەرون ەسىمدى جاس قىزدىڭ بەيتانىس جەردە قالاي كوپ قۋانىشقا كەنەلگەنى جايلى بەينەروليكتى كورىڭىز.
