ٶزىن-‏ٶزى قالاي قورعايتىنىن شەشكەندە ماسىحشىلەر كيەلى كىتاپتاعى پرينسيپتەردى ۇستانادى.‏ ال بۇل پرينسيپتەردەن تۇيەرىمىز —‏ ماسىحشىلەردىڭ وزگەلەردەن قورعانۋ ٷشىن تاپانشا،‏ مىلتىق نە باسقا دا قارۋ تۇرلەرىن قولدانعانى دۇرىس بولمايدى.‏ قازىر تومەندەگى جايتتارعا وي تاستايىق:‏

ەحوبا ٷشىن ادام ٶمىرى قاسيەتتى.‏ ٴ‌زابۇر جىرشىسى ٴ‌داۋىت ەحوبا جايىندا:‏ «ٶمىردىڭ قاينار كوزى سەندە»،‏—‏ دەگەن (‏ٴ‌زابۇر 36:‏9‏)‏.‏ سوندىقتان ٴ‌ماسىحشى ٶزىمدى نە مۇلكىمدى قورعايمىن دەپ ۇيعارسا،‏ ول قانتوگىستەن،‏ ياعني وزگە ادامنىڭ ولىمىنە جاۋاپتى بولۋدان اۋلاق بولۋ ٷشىن قولىنان كەلگەننىڭ بارلىعىن جاسايدى (‏مۇسانىڭ 5-‏جازباسى 22:‏8؛‏ ٴ‌زابۇر 51:‏14‏)‏.‏

ارينە،‏ ادام ٶزىن قورعاۋ ٷشىن قولدانعان كەز كەلگەن زاتپەن بىرەۋدى ومىرىنەن ايىرۋى مۇمكىن.‏ الايدا قارۋمەن،‏ مەيلى ابايسىزدا نە قاساقانا بولسىن،‏ ادام ٶلتىرۋ اناعۇرلىم وڭاي *‏.‏ سونداي-‏اق شابۋىلداۋشى ادام ونسىز دا قىزۋ قاندى بولىپ تۇرعاندىقتان،‏ ول قارۋدى كورسە،‏ قاۋىپتى جاعداي ودان بەتەر ۋشىعىپ،‏ بىرەۋ بولماسا بىرەۋ قازا بولۋى مۇمكىن.‏

يسا ولەر الدىنداعى ٴ‌تۇنى شاكىرتتەرىنە سەمسەر الۋدى ايتقاندا،‏ ونى وزدەرىن قورعاي الۋلارى ٷشىن الدىرتقان جوق ‏(‏لۇقا 22:‏36،‏ 38‏)‏.‏ بۇلاي ەتكەن سەبەبى،‏ يسا ولارعا ساباق بەرگىسى كەلدى:‏ ونىڭ ٸزباسارلارى،‏ ٴ‌تىپتى قارۋلى توبىرمەن بەتپە-‏بەت كەلسە دە،‏ قاتىگەزدىككە جۇگىنبەۋى ٴ‌تيىس ‏(‏لۇقا 22:‏52‏)‏.‏ پەتىر سەمسەرىن قولدانىپ جوعارعى ٴ‌دىني قىزمەتكەردىڭ قۇلىنا باس سالعاندا،‏ يسا پەتىرگە بۇيىرىپ:‏ «سەمسەرىڭدى قىنابىنا سال!‏»—‏ دەدى.‏ كەيىن ٴ‌تىپتى وسى تاڭداعى ماسىحشىلەرگە دە باسشىلىق بولاتىن مىنا ٴ‌پرينسيپتى ايتتى:‏ «قولىنا سەمسەر العانداردىڭ ٴ‌بارى سەمسەردەن ولەدى» (‏ماتاي 26:‏51،‏ 52‏)‏.‏

ميحا 4:‏3 تە پايعامبارلىق ەتىلگەندەي،‏ قۇداي حالقى «سەمسەرلەرىنەن سوقا،‏ نايزالارىنان وراق سوعادى».‏ شىنايى ماسىحشىلەر بەيبىت سۇيگىشتىگىمەن تانىمال.‏ ولار قۇدايدىڭ ەلشى پاۋىل ارقىلى بەرگەن «جاماندىققا جاماندىقپەن قايتارماڭدار» جانە «بارلىق ادامدارمەن تاتۋ بولىڭدار» دەگەن بۇيرىقتارىنا قۇلاق اسادى (‏ريمدىكتەرگە 12:‏17،‏ 18‏)‏.‏ پاۋىل نەشە ٴ‌تۇرلى قيىن جاعدايلارعا ۇشىراسا دا،‏ ٴ‌تىپتى «قاراقشىلاردان باسىنا قاۋىپ تونسە» دە،‏ ٶزىن قورعاۋ ٷشىن ەشقاشان كيەلى كىتاپ پرينسيپتەرىنەن اتتاپ كەتپەدى (‏قورىنتتىقتارعا 2-‏حات 11:‏26‏)‏.‏ قايتا،‏ ول قۇدايعا سەنىم ارتتى جانە كيەلى كىتاپتاعى دانا كەڭەستىڭ «قارۋ-‏جاراقتان گورى ارتىق» ەكەنىن ٴ‌بىلدى (‏ۋاعىزداۋشى 9:‏18‏)‏.‏

ماسىحشىلەرگە دۇنيە-‏مۇلىكتەن گورى ومىرلەرى الدەقايدا ارتىق.‏ ٴ‌بىز بىلەتىنىمىزدەي،‏ ادامنىڭ «ٶمىرى دۇنيەسىنىڭ مولدىعىنا بايلانىستى ەمەس» (‏لۇقا 12:‏15‏)‏.‏ سوندىقتان قارۋى بار توناۋشىعا اقىرىن سويلەگەنىمىز اسەر ەتپەسە،‏ ٴ‌بىز يسانىڭ:‏ «زۇلىم ادامعا قارسىلاسپا»،‏—‏ دەگەن كەڭەسىنە ساي ارەكەت ەتەمىز.‏ بۇل ونىڭ العىسى كەلگەنىنىڭ ٴ‌بارىن الۋىنا كەدەرگى جاساماۋدى ٴ‌بىلدىرۋى مۇمكىن (‏ماتاي 5:‏39،‏ 40؛‏ لۇقا 6:‏29‏)‏ *‏.‏ ارينە،‏ ەڭ جاقسىسى،‏ قىلمىسكەرلەردىڭ  كوزىنە ٴ‌تۇسىپ،‏ جەمتىگىنە اينالماۋ.‏ ەگەر ٴ‌بىز كيەلى كىتاپتىڭ كەڭەسىنە قۇلاق اسساق ٵرى «دۇنيە-‏مۇلىككە ماقتانۋدان» اۋلاق بولساق،‏ ولاردىڭ بىزگە شابۋىلداۋ قاۋپىن ازايتامىز (‏جوحاننىڭ 1-‏حاتى 2:‏16‏)‏.‏ بۇعان قوسا،‏ كورشىلەرىمىزدىڭ ٴ‌بىزدى بەيبىتسۇيگىش ەحوبا كۋاگەرى رەتىندە تانىعانى دا قورعانىش بولادى (‏ناقىل سوزدەر 18:‏10‏)‏.‏

ماسىحشىلەر وزگەلەردىڭ ار-‏ۇجدانىن قۇرمەتتەيدى ‏(‏ريمدىكتەرگە 14:‏21‏)‏.‏ ەگەر قانداي دا ٴ‌بىر باۋىرلاستىڭ وزگەلەردەن قورعانۋ ٷشىن قارۋ ۇستاپ جۇرگەنىن بىلسە،‏ بۇل كەيبىر باۋىرلاستاردى اڭ-‏تاڭ قالدىرۋى نە ٴ‌تىپتى ٴ‌سۇرىندىرۋى مۇمكىن.‏ قارۋدى يەمدەنۋگە زاڭدى قۇقىمىز بولعانمەنەن،‏ باۋىرلاستاردى جاقسى كورەتىندىكتەن ٴ‌بىز ەشقاشان دا ولاردى سۇرىندىرەتىن نارسە ىستەگىمىز كەلمەس ەدى (‏قورىنتتىقتارعا 1-‏حات 10:‏32،‏ 33؛‏ 13:‏4،‏ 5‏)‏.‏

ماسىحشىلەر ۇلگىلى بولۋعا تىرىسادى ‏(‏قورىنتتىقتارعا 2-‏حات 4:‏2؛‏ پەتىردىڭ 1-‏حاتى 5:‏2،‏ 3‏)‏.‏ ەگەر باۋىرلاس وزگەلەردەن قورعانۋ ٷشىن قارۋ ۇستاپ جۇرگەن بولسا،‏ اقساقالدار وعان كيەلى كىتاپتان كەڭەس بەرەدى.‏ ال ەگەر ول قارۋدى وزىندە قالدىرۋدى شەشسە،‏ ول جاقسى ۇلگى كورسەتپەيدى.‏ سوندىقتان قاۋىمدا ول ەشبىر جاۋاپكەرشىلىكتەر مەن مارتەبەلى مىندەتتەردى اتقارا المايدى.‏ بۇل جايت جۇمىس بابىمەن قارۋ ۇستاپ جۇرگەن ماسىحشىگە دە قاتىستى.‏ ونىڭ باسقا جۇمىس ىزدەستىرگەنى الدەقايدا جاقسى بولار ەدى *‏.‏

ٴ‌ماسىحشى ٶزىن،‏ وتباسىن،‏ دۇنيە-‏مۇلكىن قالاي قورعايتىنىن،‏ سونىمەن قاتار قانداي جەرگە جۇمىسقا تۇراتىنىن ٶزى شەشۋى كەرەك.‏ ٴ‌بىراق سول شەشىمىن كيەلى كىتاپ پرينسيپتەرىنە جۇگىنە وتىرىپ قابىلداۋى قاجەت.‏ دانالىعى زور قۇدايىمىز بۇل پرينسيپتەردى ٴ‌بىزدى سۇيگەندىكتەن بەردى.‏ سول سەبەپتى ەحوبامەن تىعىز قارىم-‏قاتىناستاعى ماسىحشىلەر وزدەرىن باسقالاردان قورعاۋ ٷشىن قارۋ ۇستاماۋدى شەشەدى.‏ ەگەر قۇدايعا سەنىم ارتاتىن جانە ومىردە كيەلى كىتاپ پرينسيپتەرىن قولداناتىن بولسا،‏ ولار ماڭگىلىك بويى شىنايى حاۋىپسىزدىكتە ٶمىر سۇرەتىندەرىن بىلەدى (‏ٴ‌زابۇر 97:‏10؛‏ ناقىل سوزدەر 1:‏33؛‏ 2:‏6،‏ 7‏)‏.‏