ٴبىز ەحوبانىڭ مەنشىگىمىز
«ەحوبا قاي حالىقتىڭ قۇدايى بولسا، كىمدى مەنشىكتى يەلىگى ەتىپ تاڭداسا، سول حالىق باقىتتى» (ٴزابۇر 33:12).
اندەر: 40، 50
1. نەگە بارلىق نارسە ەحوبانىڭ مەنشىگىندە دەي الامىز؟ (ماقالانىڭ باسىنداعى سۋرەتتى قاراڭىز.)
بارلىق نارسە ەحوبانىكى! «كوك تە، كوكتىڭ كوگى دە، جەر مەن ونداعىلاردىڭ ٴبارى دە» وعان تيەسىلى (مۇسانىڭ 5-جازباسى 10:14؛ ايان 4:11). ادامداردى ەحوبا جاراتقاندىقتان، ٴبارىمىز دە ونىڭ مەنشىگىمىز (ٴزابۇر 100:3). قۇداي ادامزات تاريحىندا ٶمىر سۇرگەن بۇكىل حالىقتاردىڭ اراسىنان كەيبىرەۋلەردى تاڭداپ الىپ، وزىنىڭ ەرەكشە مەنشىگى ەتكەن.
2. كيەلى كىتاپقا ساي، كىمدەر ەحوبانىڭ ەرەكشە مەنشىگى؟
2 زابۇردىڭ 135-تاراۋىندا سيپاتتالعانداي، ەحوباعا ادال عيبادات ەتكەن ەجەلگى يسرايل حالقى ونىڭ «ەرەكشە مەنشىگى» بولعان (ٴزابۇر 135:4). ال وشيا پايعامبار يسرايلدىك ەمەس ادامداردىڭ كەيبىرى ەحوبانىڭ حالقى بولاتىنىن ايتقان (وشيا 2:23). بۇل پايعامبارلىق ەحوبا كوكتە يسامەن بىرگە بيلىك ەتەتىن يسرايلدىك ەمەس ادامداردى تاڭداي باستاعاندا ورىندالدى (ەلشىلەردىڭ ىستەرى 10:45؛ ريمدىكتەرگە 9:23—26). كيەلى رۋحپەن مايلانعان بۇل ادامدار «قاسيەتتى حالىق» دەپ اتالعان. ولار ەحوبانىڭ «ەرەكشە مەنشىگى» (پەتىردىڭ 1-حاتى 2:9، 10). ال جەردە ماڭگى ٶمىر سۇرۋگە ۇمىتتەنەتىن ادال ٴماسىحشىلەر تۋرالى نە دەۋگە بولادى؟ ەحوبا ولاردى دا «حالقىم» ٵرى «تاڭداۋلىلارىم» دەپ اتايدى (يشايا 65:22).
3. ا) بۇگىندە كىمدەر ەحوبامەن ەرەكشە قارىم-قاتىناستا؟ ٵ) بۇل ماقالادا ٴبىز نە قاراستىرامىز؟
3 بۇگىندە كوكتە ماڭگى ٶمىر سۇرۋگە ۇمىتتەنەتىن «كىشكەنە وتار» جانە جەردە ماڭگى ٶمىر سۇرۋگە ۇمىتتەنەتىن «باسقا دا قويلار» «ٴبىر وتاردى» قۇراپ، ەحوباعا بىرگە عيبادات ەتەدى (لۇقا 12:32؛ جوحان 10:16). ٴبىز ەحوبامەن ەرەكشە قارىم-قاتىناستا بولعانىمىز ٷشىن وعان شەكسىز ريزا ەكەنىمىزدى كورسەتكىمىز كەلەدى. بۇل ماقالادا ەحوبانىڭ تانىتقان ەرەكشە قۇرمەتىنە قالاي ريزاشىلىق بىلدىرە الاتىنىمىزدى قاراستىرامىز.
ٴبىز ٶمىرىمىزدى ەحوباعا باعىشتايمىز
4. ەحوبامەن ەرەكشە قارىم-قاتىناستا بولعانىمىز ٷشىن وعان قالاي ريزاشىلىق بىلدىرە الامىز؟ وسى رەتتە يسا نە ىستەدى؟
4 ٶمىرىمىزدى باعىشتاپ، شومىلدىرۋ راسىمىنەن وتكەندە، ەحوباعا ريزاشىلىعىمىزدى بىلدىرەمىز. سول كەزدە ەحوبانىڭ مەنشىگى ەكەنىمىزدى جانە وعان مويىنسۇنعىمىز كەلەتىنىن ٴبارى كورە الادى (ەۆرەيلەرگە 12:9). يسا دا شومىلدىرۋ راسىمىنەن وتكەندە سولاي ەتكەن. ەحوباعا باعىشتالىپ قويعان حالىقتان شىقسا دا، يسا ٶزىن ەحوباعا ارنادى. ول بىلايشا ايتقاندا: «وزىڭنىڭ ەركىڭدى ورىنداۋعا قۇشتارمىن، ۋا، قۇدايىم»،— دەگەندەي بولدى (ٴزابۇر 40:7، 8).
5، 6. ا) يسا شومىلدىرۋ راسىمىنەن وتكەن كەزدە، ەحوبا نە دەدى؟ ٵ) باعىشتالعانىمىز ەحوبانى قۋانتاتىنىن قانداي مىسالمەن تۇسىنۋگە بولادى؟
5 يسا شومىلدىرۋ راسىمىنەن وتكەن كەزدە، ەحوبا نە سەزىندى؟ كيەلى كىتاپتا بىلاي دەلىنگەن: «يسا شومىلدىرۋ راسىمىنەن ٶتىپ، بىردەن سۋدان شىقتى. سوندا كوك اشىلىپ، جاقيا يسانىڭ ۇستىنە قۇداي رۋحىنىڭ كوگەرشىن ىسپەتتى ٴتۇسىپ كەلە جاتقانىن كوردى. سونداي-اق كوكتەن: «بۇل — مەنىڭ سۇيىكتى ۇلىم. مەن وعان ريزامىن!»— دەگەن داۋىس ەستىلدى» (ماتاي 3:16، 17). نەگىزى، يسا ونسىز دا قۇدايدىڭ مەنشىگى ەدى. ٴبىراق ەحوبا يسانىڭ ٶز ٶمىرىن تەك وعان عانا قىزمەت ەتۋگە ارناۋعا دايىن ەكەنىن كورىپ، قاتتى قۋاندى. ٴبىز دە ٶمىرىمىزدى ەحوباعا باعىشتاعان كەزدە، ول قاتتى قۋانادى جانە باتاسىن توگەدى (ٴزابۇر 149:4).
6 ٴبارى ونسىز دا ەحوباعا تيەسىلى بولسا، ٴبىز وعان نە بەرە الامىز؟ مىسالى، ٴبىر ەر ادامنىڭ باقشاسىندا ادەمى گۇلدەر وسەدى دەلىك. بىردە ونىڭ كىشكەنتاي قىزى سول گۇلدەردىڭ بىرەۋىن ٷزىپ اكەلىپ، اكەسىنە سىيلايدى. باقتاعى گۇلدەردىڭ ٴبارى وزىنىكى بولسا دا، ٴسۇيۋشى اكە قىزىنىڭ جاساعان سىيلىعىنا ٴماز-مەيرام بولادى. وسىلاي قىزى اكەسىن جاقسى كورەتىنىن كورسەتەدى. اكەسى ٷشىن بۇل گۇل ەندى باقتاعى گۇلدەردىڭ بارىنەن الدەقايدا باعالى بولادى. تۋرا سول سياقتى، ٴبىز دە ٶمىرىمىزدى ٶز ەركىمىزبەن ەحوباعا باعىشتاعاندا، ونىڭ جۇرەگىن قۋانىش كەرنەيدى (مۇسانىڭ 2-جازباسى 34:14).
7. وزىنە شىن جۇرەكتەن قىزمەت ەتەتىندەرگە قاتىستى ەحوبانىڭ نە سەزىنەتىنى مالاحيدىڭ سوزدەرىنەن قالاي كورىنەدى؟
7 مالاحي 3:16 وقىڭىز. ەحوباعا باعىشتالىپ، شومىلدىرۋ راسىمىنەن ٶتۋ نەگە سونشالىقتى ماڭىزدى؟ راس، قۇرساقتا پايدا بولعان كەزدەن باستاپ-اق ٴسىز جاراتۋشىڭىز ەحوبانىڭ مەنشىگى بولىپ تابىلاسىز. ٴبىراق ول ٴسىزدىڭ ونى بيلەۋشى رەتىندە مويىنداپ، وعان ٶمىرىڭىزدى باعىشتاۋعا دايىن ەكەنىڭىزدى كورگەندە، ول قانشالىقتى قۋانادى دەسەڭىزشى! (ناقىل سوزدەر 23:15). ەحوبا وزىنە شىن جۇرەكتەن قىزمەت ەتەتىندەردى جاقسى بىلەدى، ٵرى ولاردىڭ ەسىمىن «ەستەلىك كىتابىنا» جازىپ قويادى.
8، 9. ەسىمدەرى «ەستەلىك كىتابىنا» جازىلعان ادامداردان ەحوبا نە تالاپ ەتەدى؟
8 ەسىمىمىز ەحوبانىڭ «ەستەلىك كىتابىنان» وشپەسىن دەسەك، بەلگىلى ٴبىر تالاپتاردى ورىنداۋعا ٴتيىسپىز. مالاحي ايتىپ كەتكەندەي، ٴبىز ەحوبادان قورقىپ، ونىڭ ەسىمى تۋرالى وي جۇگىرتۋىمىز كەرەك. ەگەر تاعى بىرەۋگە نە ٴبىر نارسەگە عيبادات ەتەتىن بولساق، ەحوبا وزىنىڭ كىتابىنان ەسىمىمىزدى ٶشىرىپ تاستايدى! (مۇسانىڭ 2-جازباسى 32:33؛ ٴزابۇر 69:28).
ٶمىر سۇرگەن ٵربىر كۇنى ٴبىز ەحوباعا مويىنسۇناتىنىمىزدى ىسىمىزبەن كورسەتۋىمىز كەرەك
9 ەحوبانىڭ ەركىن ورىندايمىن دەپ ۋادە ەتىپ، شومىلدىرۋ راسىمىنەن وتكەنىمىز جەتكىلىكسىز. بۇلاردى ٴبىز ومىرىمىزدە ٴبىر-اق رەت ىستەيمىز. ال ەحوباعا عيبادات ەتۋ — ٴبىزدىڭ ٶمىر سالتىمىز. ٶمىر سۇرگەن ٵربىر كۇنى ٴبىز ەحوباعا مويىنسۇناتىنىمىزدى ىسىمىزبەن كورسەتۋىمىز كەرەك (پەتىردىڭ 1-حاتى 4:1، 2).
ٴبىز وسى دۇنيەلىك قۇمارلىقتاردان باس تارتامىز
10. ەحوباعا عيبادات ەتەتىن مەن ەتپەيتىندەردىڭ اراسىندا قانداي ايىرماشىلىق انىق كورىنىپ تۇرۋ كەرەك؟
10 الدىڭعى ماقالادان بىلگەنىمىزدەي، قابىل، سۇلەيمەن جانە يسرايلدىكتەر ەحوباعا عيبادات ەتەمىز دەي تۇرا، وعان ادال بولماعان. وسىدان ەحوباعا عيبادات ەتەمىن دەي سالۋ جەتكىلىكسىز ەكەنىن كورەمىز. ٴبىز جاماندىقتى جەك كورىپ، جاقسىلىقتى ٴسۇيۋىمىز كەرەك (ريمدىكتەرگە 12:9). ەحوبا «ٵدىل مەن زۇلىمنىڭ، قۇدايعا قىزمەت ەتەتىن مەن قىزمەت ەتپەيتىننىڭ اراسىنداعى ايىرماشىلىق» انىق كورىنەتىنىن ايتقان (مالاحي 3:18).
11. ەحوباعا عانا عيبادات ەتەتىنىمىز نەگە انىق كورىنىپ تۇرۋى ٴتيىس؟
11 وزىنىڭ حالقى ەتىپ تاڭداعانى ٷشىن ٴبىز ەحوباعا شەكسىز ريزامىز! سوندىقتان ەحوبانىڭ جاعىندا ەكەنىمىز بارىنە انىق كورىنىپ تۇرۋى ٴتيىس (ماتاي 5:16؛ تىموتەگە 1-حات 4:15). بىلاي دەپ ويلانىپ كورىڭىز: «باسقالار مەنىڭ تولىقتاي ەحوباعا ادال ەكەنىمدى كورىپ ٴجۇر مە؟ ەحوبا كۋاگەرى ەكەنىمدى ادامدارعا ماقتانىشپەن ايتامىن با؟» ەحوبانىڭ مەنشىگىندە ەكەنىمىزدى وزگەلەرگە ايتۋعا ۇيالساق، ەحوبانىڭ قانشالىقتى كوڭىلى تۇسەدى دەسەڭىزشى! (ٴزابۇر 119:46؛ مارقا 8:38 وقىڭىز).
ٶمىر سالتىڭىزدان ەحوبا كۋاگەرى ەكەنىڭىز انىق كورىنە مە؟ (12، 13-ابزاستى قاراڭىز)
12، 13. كەيبىرەۋلەردىڭ ەحوبا كۋاگەرى ەكەنىن اجىراتۋ نەگە قيىن بولىپ جاتادى؟
12 وكىنىشكە قاراي، كەيبىر كۋاگەرلەر «وسى دۇنيەنىڭ رۋحىنا» ەلىكتەيدى. سوندىقتان ولاردىڭ ەحوباعا عيبادات ەتپەيتىن ادامداردان اسا ايىرماشىلىعى جوق (قورىنتتىقتارعا 1-حات 2:12). «وسى دۇنيەنىڭ رۋحى» ادامداردى وزدەرىنىڭ تاندىك قالاۋلارىن كوبىرەك ويلاۋعا يتەرمەلەيدى (ەفەستىكتەرگە 2:3). مىسالى، قانشا رەت ايتىلعانىنا قاراماستان، كەيبىرەۋلەر قاراپايىم كيىنۋ جايلى كەڭەسكە قۇلاق اسپايدى. ولار تىرىسىپ تۇراتىن، اشىق كيىمدەر كيەدى، ٴتىپتى جينالىستارعا دا سولاي كەلەدى. يا بولماسا تىم كوزگە تۇسەتىن شاش ۇلگىلەرىن تاڭداپ جاتادى (تىموتەگە 1-حات 2:9، 10). مۇندايدا ولاردىڭ كۋاگەر يا كۋاگەر ەمەستىگىن اجىراتۋ قيىن بولۋى مۇمكىن (جاقىپ 4:4).
13 كەيبىر كۋاگەرلەردىڭ وسى دۇنيەدەگى ادامداردان ونشا ايىرماشىلىعى جوق ەكەنى تاعى ٴبىر جاعدايلاردان بايقالادى. مىسالى، ولاردىڭ ساۋىق كەشتەرىندە وزدەرىن قالاي ۇستايتىندارى، قالاي بي بيلەيتىندەرى ٴماسىحشىلەرگە لايىقسىز بولىپ جاتادى. ال تاعى بىرەۋلەردىڭ الەۋمەتتىك جەلىگە سالعان سۋرەتتەرىنەن نەمەسە جازعان تۇسىنىكتەمەلەرىنەن تاندىك وي قالىپتارى بايقالادى. بالكىم، ولار جازاعا تارتىلاتىنداي اۋىر كۇنا جاساماعان شىعار، ٴبىراق ولار وسى دۇنيەدەن ەرەكشە بولۋ ٷشىن قاتتى كۇش سالىپ جۇرگەن باۋىرلاستارعا جامان ىقپال ەتۋى مۇمكىن (پەتىردىڭ 1-حاتى 2:11، 12 وقىڭىز).
ەحوبانىڭ جاعىندا جۇرگەندەرى انىق كورىنبەيتىن ادامدار ٴسىزگە جامان ىقپال ەتىپ جۇرمەسىن
14. ەحوبامەن ەرەكشە قارىم-قاتىناسىمىزدى قورعاۋ ٷشىن نە ىستەۋىمىز كەرەك؟
14 «وسى دۇنيەدەگىنىڭ ٴبارى» ٴتان قۇمارلىعى مەن كوزدىڭ قالاۋىن ٶرشىتىپ، دۇنيە-مۇلىككە ماقتانۋعا يتەرمەلەيتىندەي ەتىپ قۇراستىرىلعان (جوحاننىڭ 1-حاتى 2:16). ەحوبانىڭ مەنشىگى بولعاندىقتان، ٴبىز وزگەشەمىز. ٴبىز قۇدايعا «ۇنامسىز ٴجۇرىس-تۇرىستان جانە وسى دۇنيەلىك قۇمارلىقتاردان باس تارتامىز»، سونداي-اق «وسى زاماندا ەستى، ٵدىل ٵرى وعان شىن بەرىلىپ ٶمىر سۇرەمىز» (تيتكە 2:12). ٴبىزدىڭ بۇكىل ٶمىر سالتىمىزدان، قالاي سويلەيتىنىمىزدەن، قالاي ٸشىپ-جەيتىنىمىزدەن، قالاي كيىنىپ، قالاي جۇمىس ىستەيتىنىمىزدەن ەحوباعا تيەسىلى ەكەنىمىز ٵربىر ادامعا انىق كورىنىپ تۇرۋ كەرەك (قورىنتتىقتارعا 1-حات 10:31، 32 وقىڭىز).
ٴبىز «ٴبىر-ٴبىرىمىزدى بارىنشا سۇيەمىز»
15. باۋىرلاستارعا نەگە مەيىرىمدىلىك پەن سۇيىسپەنشىلىك تانىتۋىمىز كەرەك؟
15 ەحوبامەن قارىم-قاتىناسىمىزدى قانشالىقتى باعالايتىنىمىز باۋىرلاستارعا قالاي قارايتىنىمىزدان كورىنەدى. ولار دا ٶزىمىز سياقتى ەحوبانىڭ مەنشىگى. وسىنى ەستە ۇستاساق، ولارعا ۇنەمى مەيىرىمدىلىك پەن سۇيىسپەنشىلىك تانىتاتىن بولامىز (سالونيكالىقتارعا 1-حات 5:15). بۇلاي ەتۋ قانشالىقتى ماڭىزدى؟ يسا وزىنىڭ ٸزباسارلارىنا: «مەنىڭ شاكىرتتەرىم ەكەندەرىڭدى جۇرتتىڭ ٴبارى ٶزارا سۇيىسپەنشىلىكتەرىڭنەن بىلەتىن بولادى»،— دەگەن (جوحان 13:35).
16. ەحوبا ادامداردى جاقسى كورەتىنىن مۇسا زاڭىنان قالاي كورۋگە بولادى؟
16 قاۋىمداعى باۋىرلاستارعا قالاي قاراۋىمىز كەرەكتىگىن ٴتۇسىنۋ ٷشىن مۇسا زاڭىنان مىسال كەلتىرەيىك. ەحوبانىڭ عيباداتحاناسىندا تەك عيبادات ٷشىن عانا قولدانىلاتىن بۇيىمدار بولعان. زاڭدا لەۋىلىكتەر بۇل بۇيىمداردى قالاي قولدانۋ كەرەكتىگى ناقتى ايتىلعان. وسى نۇسقاۋلاردى ۇستانباعان كەز كەلگەن ادام ولىمگە كەسىلگەن (مۇسانىڭ 4-جازباسى 1:50، 51). عيباداتقا ارنالعان زاتتاردى ادامدار قالاي قولدانعانى ەحوبا ٷشىن سونشالىقتى ماڭىزدى بولعان بولسا، وزىنە باعىشتالعان ادال قىزمەتشىلەرىنە ادامداردىڭ قالاي قارايتىنى ول ٷشىن الدەقايدا ماڭىزدى ەمەس پە؟! وزىنە قانشالىقتى باعالى ەكەنىمىزدى كورسەتىپ، ەحوبا: «كىم ساعان تيىسسە، سول مەنىڭ كوزىمنىڭ قاراشىعىنا تيىسكەنى»،— دەگەن (زاكاريا 2:8).
قوناقجايلىلىق، جومارتتىق، كەشىرىمدىلىك پەن مەيىرىمدىلىك تانىتاتىن بولساق، ەحوبا مۇنى بايقايدى
17. ەحوبا نە نارسەگە «دەن قويىپ، تىڭداپ تۇرادى»؟
17 مالاحي ايتقانداي، ەحوبا قىزمەتشىلەرىنىڭ ٶزارا قانداي قارىم-قاتىناستا ەكەنىن ٴبىلۋ ٷشىن «دەن قويىپ، تىڭداپ تۇرادى» (مالاحي 3:16). «ەحوبا ٶز مەنشىگىندەگىلەردى بىلەدى» (تىموتەگە 2-حات 2:19). ٴبىزدىڭ نە ايتىپ، نە ىستەيتىنىمىز ەحوبا ٷشىن ٴمالىم (ەۆرەيلەرگە 4:13). باۋىرلاستارىمىزعا سۋىق قاباق تانىتساق، بۇل ونىڭ نازارىنان تىس قالمايدى. ال قوناقجايلىلىق، جومارتتىق، كەشىرىمدىلىك پەن مەيىرىمدىلىك تانىتاتىن بولساق، ەحوبا مۇنى دا بايقايدى (ەۆرەيلەرگە 13:16؛ پەتىردىڭ 1-حاتى 4:8، 9).
«ەحوبا ٶز حالقىن قالدىرمايدى»
18. وزىنىڭ حالقى ەتىپ تاڭداعانى ٷشىن ەحوباعا قالاي ريزاشىلىق بىلدىرە الامىز؟
18 حالقى رەتىندە ەحوبانىڭ مەنشىگى بولعانىمىز ٷشىن وعان قانشالىقتى ريزا ەكەنىمىزدى كورسەتكىمىز كەلەدى. ٴبىز ٶمىرىمىزدى ەحوباعا باعىشتاعانىمىز ەڭ دانا شەشىم بولعانىن بىلەمىز. «بۇزىلعان، ازعىن ۇرپاق اراسىندا» ٶمىر سۇرسەك تە، «تازا دا كىناراتسىز» بولىپ، «وسى دۇنيەدە شىراقتاي نۇر شاشىپ جۇرە» الامىز (فىلىپىلىكتەرگە 2:15). ٴبىز ەحوبا جەك كورەتىن كەز كەلگەن نارسەدەن اۋلاق جۇرۋگە بەل بۋدىق (جاقىپ 4:7). سونداي-اق باۋىرلاستارىمىزدى جاقسى كورىپ، قۇرمەتتەيمىز، ويتكەنى ولار دا ەحوبانىڭ مەنشىگى (ريمدىكتەرگە 12:10).
19. ەحوبا وزىنىڭ مەنشىگىندەگىلەردى قالاي جارىلقايدى؟
19 كيەلى كىتاپتا: «ەحوبا ٶز حالقىن قالدىرمايدى»،— دەگەن ۋادە بار (ٴزابۇر 94:14). بۇل سوزدەر قانداي جاعداي بولماسىن، ەحوبا بىزبەن بىرگە بولاتىنىنا كەپىلدىك بەرەدى. ٴتىپتى ٶلىم قۇشساق تا، ول ٴبىزدى ۇمىتپايدى (ريمدىكتەرگە 8:38، 39). «ٶمىر سۇرسەك، ەحوبا ٷشىن ٶمىر سۇرەمىز، ال ولسەك، ەحوبا ٷشىن ولەمىز. سوندىقتان ٶمىر سۇرسەك تە، ولسەك تە ەحوبانىڭ مەنشىگىمىز» (ريمدىكتەرگە 14:8). ەحوبانىڭ ومىردەن وتكەن بارلىق ادال دوستارىنا قايتا ٶمىر دارىتاتىن ۋاقىتىن اسىعا كۇتەمىز (ماتاي 22:32). قازىردىڭ وزىندە ٴبىز اكەمىزدىڭ كوپتەگەن تاماشا سىيلارىنىڭ يگىلىگىن كورىپ ٴجۇرمىز. كيەلى كىتاپتا ايتىلعانداي، «ەحوبا قاي حالىقتىڭ قۇدايى بولسا، كىمدى مەنشىكتى يەلىگى ەتىپ تاڭداسا، سول حالىق باقىتتى» (ٴزابۇر 33:12).
