وسى دۇنيەلىك وي-پىكىرلەرگە قارسى تۇرىڭىز
«بايقاڭدار، بىرەۋ سەندەردى ادامداردىڭ داستۇرىنە نەگىزدەلگەن پالساپاسىمەن ٵرى بوس، الدامشى ويلارىمەن... تورعا ٴتۇسىرىپ الماسىن» (قولوستىقتارعا 2:8).
اندەر: 60، 26
1. ەلشى پاۋىل قولوستاعى ماسىحشىلەرگە نە دەپ جازدى؟ (ماقالانىڭ باسىنداعى سۋرەتتى قاراڭىز.)
ەلشى پاۋىل شامامەن ب.ز. 60، 61-جىلدارى ريمدە تۇرمەدە وتىرعان كەزىندە قولوستاعى ماسىحشىلەرگە حات جولدايدى. حاتىندا پاۋىل ولارعا نەلىكتەن «كيەلى رۋح بەرەتىن تۇسىنىككە» يە بولۋ كەرەكتىگىن ايتىپ تۇسىندىرەدى. «كيەلى رۋح بەرەتىن تۇسىنىك» دەگەنىمىز — ٵر ماسەلەگە ەحوبانىڭ كوزقاراسىمەن قاراي ٴبىلۋ قابىلەتى (قولوستىقتارعا 1:9). پاۋىل بىلاي دەدى: «مەن مۇنى ەشكىم سەندەردى اقىلعا قونىمدى بولىپ كورىنەتىن سوزدەرىمەن الداپ كەتپەسىن دەپ ايتىپ وتىرمىن. بايقاڭدار، بىرەۋ سەندەردى ادامداردىڭ داستۇرىنە نەگىزدەلگەن پالساپاسىمەن ٵرى بوس، الدامشى ويلارىمەن، ٴماسىح تۋرالى ەمەس، وسى دۇنيەنىڭ قاعيدالارىنا نەگىزدەلگەن ىلىمدەرىمەن تورعا ٴتۇسىرىپ الماسىن» (قولوستىقتارعا 2:4، 8). سوسىن پاۋىل كوپكە تانىمال كەيبىر وي-پىكىرلەردىڭ نە سەبەپتى دۇرىس ەمەس ەكەنىن، ٴبىراق نەگە سول پىكىرلەردى كوپشىلىك ۇناتاتىنىن ٴتۇسىندىردى. مىسالى، وسىنداي پىكىرلەردى ۇستانۋ ارقىلى ادامدار وزدەرىن باسقالاردان اقىلدىراق ٵرى جوعارى دەپ سانايتىن. سوندىقتان پاۋىل باۋىرلاستارعا وسى دۇنيەلىك وي-پىكىرلەردەن باس تارتىپ، بۇرىس ىستەردەن اۋلاق بولۋلارى ٷشىن ٶز حاتىن جولداعان (قولوستىقتارعا 2:16، 17، 23).
2. نەگە ٴبىز وسى دۇنيەلىك وي-پىكىرلەردىڭ كەيبىرىن قاراستىرامىز؟
2 وسى دۇنيەنىڭ ىقپالىنداعى ادامدار ەحوبانىڭ پرينسيپتەرىنە اتۇستى قارايدى. سوندىقتان ٴبىز ساق بولماساق، وسى دۇنيەلىك وي-پىكىرلەردىڭ ىقپالىمەن قۇدايدىڭ دانالىعىنا بىرتە-بىرتە كۇماندانا باستاۋىمىز مۇمكىن. مۇنداي وي-پىكىرلەردى تەلەديداردان، توردان، جۇمىستا نە مەكتەپتە ٴجيى ەستىپ جاتامىز. ەشقايسىسىمىز بۇدان قاشىپ قۇتىلا المايمىز. جامان ىقپالدان اۋلاق بولۋ ٷشىن نە ىستەي الامىز؟ بۇل ماقالانى تالقىلاۋ بارىسىندا ٴبىز وسى دۇنيەلىك بەس ٴتۇرلى وي-پىكىردى قاراستىرىپ، سولارعا قالاي قارسى تۇرۋعا بولاتىنىن كورەمىز.
قۇدايعا سەنۋ كەرەك پە؟
3. كوپشىلىك قانداي وي-پىكىردى ۇناتادى؟ نە سەبەپتى؟
3 «مەن قۇدايعا سەنبەي-اق جاقسى ادام بولا الامىن». مۇنداي پىكىر كوپ ەلدەردە كەڭ تاراعان. وسىلاي دەيتىن ادامدار قۇدايدىڭ بار-جوقتىعى جايلى تەرەڭ ويلانباي، جاي عانا قالاعان نارسەلەرىن ىستەۋگە ەرىكتى بولعىسى كەلەتىن شىعار (ٴزابۇر 10:4 وقىڭىز). ال باسقالارى: «قۇدايعا سەنبەي-اق، مەنىڭ جاقسى ۇستانىمدارىم بار»،— دەيدى. وسىلاي ٶزدەرىن اقىلدى ەتىپ كورسەتكىسى كەلەدى.
4. جاراتۋشىنىڭ بار ەكەنىنە سەنبەيتىن ادامعا كومەكتەسۋ ٷشىن نە دەي الامىز؟
4 جاراتۋشى جوق دەگەنگە سەنۋ قيسىندى ما؟ بۇل سۇراقتىڭ جاۋابىن تابۋ ٷشىن كەيبىرەۋلەر عىلىمعا جۇگىنىپ، ابدەن شاتاسقان. ٴبىراق شىندىق وتە قاراپايىم. مىسالى، ٷي وزدىگىنەن پايدا بولا ما؟ ارينە، جوق! ونىڭ ٶز قۇرىلىسشىسى بار. ال تىرشىلىك اتاۋلى كەز كەلگەن ۇيدەن اناعۇرلىم كۇردەلى. ٴتىپتى ەڭ قاراپايىم جاسۋشانىڭ ٶزى ٴبولىنىپ كوبەيەدى، ال ٷي جايلى بۇلاي دەي المايسىز. جاسۋشالار اقپاراتتى ساقتاپ، ونى جاڭادان تۇزىلگەن جاسۋشالارعا تاسىمالداي الادى، وسىلاي جاڭا جاسۋشالار دا ٶز كوشىرمەسىن جاساپ كوبەيە الادى. وسىنداي تىرشىلىك قاسيەتى بار جاسۋشالاردى كىم جاراتتى؟ كيەلى كىتاپتا مۇنىڭ جاۋابى بار: «ٵربىر ۇيدىڭ سالۋشىسى بار، ال ٴبارىنىڭ جاراتۋشىسى — قۇداي» (ەۆرەيلەرگە 3:4).
5. ادام بالاسى قۇدايعا سەنبەي-اق نەنىڭ دۇرىس ەكەنىن بىلە الادى دەگەن وي-پىكىر جايلى نە دەۋگە بولادى؟
5 «قۇدايعا سەنبەي-اق، نەنىڭ دۇرىس ەكەنىن بىلەتىن جاقسى ادام بولا الامىز» دەگەن وي-پىكىر جايلى نە دەۋگە بولادى؟ كيەلى جازبالاردا ٴتىپتى قۇدايعا سەنبەيتىن ادامنىڭ دا جاقسى ۇستانىمدارى بولاتىنى جايلى ايتىلعان (ريمدىكتەرگە 2:14، 15). مىسالى، الدەبىرەۋ ٶز اتا-اناسىن جاقسى كورىپ، قۇرمەتتەيتىن شىعار. ٴبىراق ەحوبانىڭ ورناتقان نورمالارىمەن جۇرمەسە، ول وتە ناشار شەشىمدەر قابىلداۋى مۇمكىن (يشايا 33:22). بۇگىندە كوپتەگەن اقىلدى ادامدار دۇنيەدەگى قايعى-قاسىرەتتەن ارىلۋ ٷشىن قۇدايدىڭ كومەگىنە مۇقتاج ەكەنىمىزگە سەنىمدى (ەرەميا 10:23 وقىڭىز). سونىمەن، قۇدايعا سەنبەي-اق جانە ونىڭ نورمالارىمەن ٴجۇرىپ-تۇرماي-اق، نەنىڭ دۇرىس ەكەنىن بىلە الامىن دەگەن پىكىر ەشقاشان ويىمىزعا ۇيالاماسىن (ٴزابۇر 146:3).
بىزگە ٴدىن قاجەت پە؟
6. كوپ ادام ٴدىن جايلى قانداي پىكىردە؟
6 «ادام ەشبىر ٴدىندى ۇستانباي-اق باقىتتى بولا الادى». كوپ ادامدار ٴدىندى ەسكىلىكتىڭ نىشانى جانە ەش پايداسى جوق دەپ ەسەپتەيدى. بۇعان قوسا، كوپ ٴدىن توزاق وتى بار دەپ ۇيرەتەدى، ساداقا بەرۋگە كۇشتەيدى نە ساياساتكەرلەردى قولدايدى. سوندىقتان ٴدىنسىز-اق باقىتتىمىز دەيتىن ادامداردىڭ قاتارى كوبەيىپ جاتقانى ٴبىزدى تاڭعالدىرمايدى. ولار: «مەن قۇدايعا سەنەمىن، ٴبىراق ەشبىر ٴدىننىڭ مۇشەسى بولعىم كەلمەيدى»،— دەۋى مۇمكىن.
7. شىنايى ٴدىن ٴسىزدى قالايشا باقىتتى ەتەدى؟
7 ٴدىنسىز شىنىمەن دە باقىتتى بولا الامىز با؟ ارينە، ادام جالعان ٴدىنسىز باقىتتى بولا الادى. ٴبىراق «باقىتتى قۇداي» ەحوبامەن دوستاسپاسا، ەشكىم شىنايى باقىتقا قول جەتكىزە المايدى (تىموتەگە 1-حات 1:11). ەحوبا ٵربىر ارەكەتىن باسقالارعا كومەكتەسۋ ٷشىن ىستەيدى. ونىڭ قىزمەتشىلەرى بولعاندىقتان ٴبىز باقىتتىمىز، ويتكەنى ٴبىز دە وزگەلەرگە كومەكتەسۋدىڭ جولدارىن ىزدەيمىز (ەلشىلەردىڭ ىستەرى 20:35). مىسالى، شىنايى عيباداتتىڭ ارقاسىندا وتباسىلار قالاي باقىتتى بولا الاتىنى جايلى ويلانىڭىزشى. ٴبىز قوساعىمىزدى قۇرمەتتەۋگە ٵرى وعان ادال بولۋعا، بالالارىمىزدى ادەپتى ەتىپ تاربيەلەۋگە جانە ٷي ىشىندەگىلەردى شىن جاقسى كورۋگە ۇيرەنەمىز. شىنايى عيباداتتىڭ ارقاسىندا قاۋىمدا ەحوبانىڭ حالقىنىڭ اۋىزبىرشىلىگى جاراسقان ٵرى ولار ٶزارا باۋىرلاستىق سۇيىسپەنشىلىك تانىتادى (يشايا 65:13، 14 وقىڭىز).
8. ماتاي 5:3 باقىتتىڭ كىلتى نەدە ەكەنىن قالاي تۇسىندىرەدى؟
8 سونىمەن، ادام قۇدايعا قىزمەت ەتپەي-اق شىنايى باقىتقا قول جەتكىزە الا ما؟ ادامداردى نە باقىتتى ەتەدى؟ كەيبىرەۋلەر ٴمانساپتان، سپورتتان نە سۇيىكتى ىسىمەن اۋەستەنۋدەن قۋانىش تابادى. باسقالارى ٷي ىشىندەگىلەرى مەن دوستارىنىڭ قامىن ويلاپ قاناعات سەزىنەدى. بۇل ىستەردىڭ ٴبارى قۋانىش سىيلاعانمەن، ٶمىرگە قاجەتتى ماڭىزدىراق ٴبىر نارسە بار. جانۋارلاردان ەرەكشەلىگىمىز، ٴبىز جاراتۋشىمىزدى تانىپ-ٴبىلىپ، وعان عيبادات ەتە الامىز. وسىلاي ەتكەندە باقىتقا بولەنەمىز، ويتكەنى ول ٴبىزدى سولاي جاراتقان (ماتاي 5:3 وقىڭىز). مىسالى، باۋىرلاستارىمىزبەن باس قوسىپ، ەحوباعا عيبادات ەتكەندە، ٶزىمىزدى باقىتتى سەزىنىپ، جىگەرلەنىپ قالامىز (ٴزابۇر 133:1). سونداي-اق دۇنيە جۇزىلىك باۋىرلاستىقتىڭ مۇشەسى بولعانىمىز ٷشىن، تازا ٶمىر كەشىپ، جارقىن بولاشاققا دەگەن كەرەمەت ٷمىتىمىز بولعانى ٷشىن قۋانىشتىمىز.
بىزگە ونەگەلىك نورمالار قاجەت پە؟
9. ا) جىنىستىق قاتىناسقا قاتىستى قانداي پىكىر كەڭ تارالعان؟ ٵ) نەگە قۇداي ٴسوزى نەكەدەن تىس جىنىستىق قاتىناستى ايىپتايدى؟
9 «نەكەدەن تىس جىنىستىق قاتىناستا بولعاننىڭ نەسى جامان؟» كەيبىر ادامدار بىزدەن بىلاي دەپ سۇرايتىن شىعار: «نەگە سەندەر وزدەرىڭدى سونشاما شەكتەيسىڭدەر؟ ومىردەن ٴلاززات الساڭدارشى». ٴبىراق قۇداي ٴسوزىندە جىنىستىق ونەگەسىزدىككە تىيىم سالىنعان * (سالونيكالىقتارعا 1-حات 4:3—8 وقىڭىز). ەحوبا بىزگە زاڭدار ورناتۋعا قۇقىلى، ويتكەنى ٴبىزدى جاراتقان سول. قۇداي تەك نەكەلەسكەن ەر مەن ايەل عانا جىنىستىق قاتىناستا بولا الادى دەپ ايتادى. ەحوبا ٴبىزدى جاقسى كورگەندىكتەن، بىزگە زاڭدار ورناتقان. سول زاڭدارعا مويىنسۇنساق، ٶمىرىمىز جاقسارا تۇسەتىنىن بىلەدى. قۇدايدىڭ زاڭدارىنا مويىنسۇناتىن وتباسى مۇشەلەرى ٴبىر-بىرىنە سۇيىسپەنشىلىك پەن قۇرمەت تانىتادى ٵرى وزدەرىن قاۋىپسىز سەزىنەدى. ال زاڭدارىن ٴبىلىپ، وعان مويىنسۇنبايتىن ادامداردى قۇداي جازالايدى (ەۆرەيلەرگە 13:4).
10. ٴماسىحشى جىنىستىق ونەگەسىزدىكتەن قالاي اۋلاق بولا الادى؟
10 كيەلى كىتاپتا جىنىستىق ونەگەسىزدىكتەن قالاي اۋلاق بولا الاتىنىمىزعا قاتىستى كەڭەستەر بار. ٴبىز نە نارسەگە كوز تىگەتىنىمىزدى قاداعالاۋىمىز كەرەك. يسا بىلاي دەگەن: «كىمدە-كىم ٴبىر ايەلگە قۇمارتا قاراسا، ٶز جۇرەگىندە سول ايەلمەن نەكە ادالدىعىن بۇزعانى. ەگەر وڭ كوزىڭ كۇناعا ازعىرسا، ونى ويىپ الىپ، لاقتىرىپ تاستا» (ماتاي 5:28، 29). دەمەك، ازعىن ماتەريال مەن ونەگەسىز اۋەندەردەن بويىمىزدى اۋلاق ۇستاۋىمىز كەرەك. پاۋىل بىلاي دەگەن: «توپىراقتان جارالعان دەنە مۇشەلەرىڭنەن تۋىندايتىن ازعىندىق... سياقتى بەيىمدىلىكتەرىڭدى ولتىرىڭدەر» (قولوستىقتارعا 3:5). بۇعان قوسا، نە ويلاپ، نە جايلى سويلەسەتىنىمىزگە مۇقيات بولۋىمىز قاجەت (ەفەستىكتەرگە 5:3—5).
بار ويىمىز ٴمانساپقا اۋۋى كەرەك پە؟
11. نەلىكتەن ٴمانساپتى ويلاپ كەتۋىمىز مۇمكىن؟
11 «ٴمانساپ قۋۋ — باقىتتىڭ كوزى». ادامدار ٴبىزدى بار ۋاقىتىمىز بەن كۇشىمىزدى ٴمانساپ ٷشىن سارپ ەتۋگە يتەرمەلەۋى مۇمكىن. اسىرەسە اتىمىزدى شىعاراتىن، ىقپالدى ەتەتىن، بايلىققا جەتەلەيتىن ٴمانساپتى كوزدەۋگە تالپىندىراتىن شىعار. باقىتتىڭ سىرى ٴمانساپ قۋۋدا دەپ ويلايتىن ادامدار كوپ بولعاندىقتان، ٴبىز دە بىرتە-بىرتە سول پىكىرگە بوي الدىرا باستاۋىمىز ىقتيمال.
12. ٴمانساپ ٴسىزدى باقىتتى ەتە مە؟
12 ٴمانساپ ادامدى ىقپالدى يا ايگىلى ەتەتىنى راس، ٴبىراق ول ٴسىزدى باقىتتى ەتە الا ما؟ جوق. ويلاپ كورىڭىزشى: شايتان ىقپالدى دا ايگىلى بولعىسى كەلگەن. ٴسويتىپ، ٶز دەگەنىنە جەتتى. ٴبىراق ول باقىتتى ەمەس، قايتا، قاتتى اشۋلى (ماتاي 4:8، 9؛ ايان 12:12). كەرىسىنشە، ادامدارعا قۇداي جايلى جانە ونىڭ ۋادە ەتكەن جارقىن بولاشاعى تۋرالى ايتىپ جۇرگەن بىزدەر نەتكەن باقىتتىمىز! دۇنيەدەگى ەشبىر ٴمانساپ ٴسىزگە وسىنداي تولىققاندى باقىت سىيلاي المايدى. ونىڭ ۇستىنە، ٴمانساپقا ۇمتىلعان ادامدار باقتالاستىققا، اشۋ-ىزا مەن قىزعانىشقا بوي الدىرىپ جاتادى. ال سوڭىندا جان دۇنيەسى قاڭىراپ قالعانداي بولادى. كيەلى كىتاپتا مۇنى «جەلدىڭ سوڭىنان قۋۋمەن» تەڭەيدى (ۋاعىزداۋشى 4:4).
13. ا) ٶز جۇمىسىمىزعا دەگەن كوزقاراسىمىز قانداي بولۋ كەرەك؟ ٵ) پاۋىلدى شىنايى باقىتقا بولەگەن نە؟
13 ارينە، كۇن كورۋ ٷشىن ارەكەت قىلۋىمىز قاجەت جانە وزىمىزگە ۇنايتىن جۇمىستى تاڭداعاندا تۇرعان ەشتەڭە جوق. ٴبىراق جۇمىسىمىز ٶمىرىمىزدە باستى ورىنعا شىعىپ كەتپەۋ كەرەك. يسا بىلاي دەگەن: «ەشكىم ەكى قوجايىنعا بىردەي قۇل بولا المايدى. ولاي ەتكەن كۇندە بىرەۋىن جەك كورىپ، ەكىنشىسىن جاقسى كورەدى، نەمەسە بىرىنە ادال بولىپ، ەكىنشىسىنە نەمكەتتى قارايدى. سەندەر قۇدايعا جانە بايلىققا بىردەي قىزمەت ەتە المايسىڭدار» (ماتاي 6:24). ەحوباعا قىزمەت ەتىپ، وزگەلەرگە كيەلى كىتاپتان ٴتالىم بەرۋ زور قۋانىشقا بولەيدى. ەلشى پاۋىل ٶز ومىرىندە وسىعان كوز جەتكىزگەن. جاس بولعاندا، ول تابىسقا جەتكىزەتىن ٴمانساپقا ۇمتىلعان بولاتىن. ال كەيىن ٶزى ۋاعىزداعان ادامداردىڭ ومىرلەرى قۇداي حابارىنىڭ ارقاسىندا وزگەرىپ جاتقانىن كورگەن كەزدە، شىنايى باقىت سەزىندى (سالونيكالىقتارعا 1-حات 2:13، 19، 20 وقىڭىز). ەشقانداي ٴمانساپ ەحوباعا قىزمەت ەتىپ، وزگەلەرگە قۇدايىمىز جايلى ٴتالىم بەرۋدەن كەلەتىن باقىتقا بولەي المايدى!
وزگەلەرگە قۇداي جايلى بىلۋگە كومەكتەسەتىندىكتەن، ٴبىز باقىتتىمىز (12، 13-ابزاستى قاراڭىز
دۇنيەدەگى قيىندىقتاردى شەشۋ ادامزاتتىڭ قولىنان كەلە مە؟
14. ادامزات ٶز قيىندىقتارىن ٶزى شەشە الادى دەگەن پىكىر نەگە كوپشىلىككە تارتىمدى؟
14 «ادامزات ٶز قيىندىعىن ٶزى شەشە الادى». مۇنداي پىكىر كوپشىلىككە ۇنايدى. نەگە؟ ويتكەنى وسى پىكىردى ۇستاناتىن ادامدار قۇدايدىڭ باسشىلىعىن قاجەت ەتپەي، ٶز قالاعانىمىزدى جۇزەگە اسىرامىز دەپ ويلايدى. بالكىم، ٴسىز بىرەۋ-مىرەۋدەن سوعىس، قىلمىس، اۋرۋ مەن كەدەيلىك سياقتى قيىندىقتار ازايىپ جاتىر دەگەندى ەستىگەن شىعارسىز. ٴبىر ەسەپتە بىلاي دەلىنگەن: «ادامگەرشىلىك قاسيەتى ارتۋدا، ويتكەنى ادامدار دۇنيەمىزدى جاقسارتۋدى شەشتى». بۇل شىندىققا جاناسا ما؟ ادامزات راسىندا دا دۇنيەدەگى قيىندىقتاردىڭ ٴتۇيىنىن شەشىپ جاتىر ما؟ كەيبىر ايعاقتارعا كوز جىبەرەيىكشى.
15. دۇنيەدەگى جاعدايدىڭ وتە قيىن ەكەنىنە قانداي ايعاقتار بار؟
15 ادامزات سوعىستى توقتاتا الدى ما؟ ٴبىرىنشى جانە ەكىنشى دۇنيە جۇزىلىك سوعىستاردا 60 ميلليوننان استام ادام قازا تاپتى. 2015-جىلدىڭ وزىندە سوعىستىڭ ٴيا قۋعىن-سۇرگىننىڭ كەسىرىنەن شامامەن 12،4 ميلليون ادام ٶز ۇيلەرىن تاستاپ قاشۋعا ٴماجبۇر بولعان. ناتيجەسىندە مۇنداي ادامداردىڭ جالپى سانى 65 ميلليونعا جەتتى. قىلمىس جايلى نە دەۋگە بولادى؟ بەلگىلى ٴبىر جەرلەردە قىلمىستىڭ كەيبىر تۇرلەرى ازايدى. ٴبىراق باسقا تۇرلەرى، مىسالى اقپاراتتىق قىلمىس، وتباسىنداعى زورلىق-زومبىلىق، لاڭكەستىك ارەكەتتەر جانە جەمقورلىق سياقتى قىلمىستار كوبەيگەن ۇستىنە كوبەيۋدە. اۋرۋ جونىندە نە ايتۋعا بولادى؟ كەيبىر اۋرۋلارعا ەم تابىلعانى راس. ٴبىراق 2013-جىلعى ٴبىر ەسەپكە ساي، ٵر جىلى 60 جاسقا دەيىنگى 9 ميلليون ادام جۇرەك اۋرۋىنان، ميعا قان قۇيىلۋدان، راك اۋىرۋىنان، تىنىس جولى اۋرۋلارىنان جانە قانىتتى نەسەپ اۋىرۋىنان كوز جۇمادى. ال كەدەيلىك تۋرالى قانداي ايعاقتار بار؟ دۇنيە جۇزىلىك بانكەنىڭ ەسەبىنە ساي، تەك افريكانىڭ وزىندەگى تاقىر كەدەي ادامداردىڭ سانى 1990-جىلى 280 ميلليون بولسا، 2012-جىلى 330 ميلليونعا دەيىن وسكەن ەكەن.
16. ا) نەگە قۇداي پاتشالىعى عانا دۇنيەدەگى قيىندىقتاردى شەشە الادى؟ ٵ) يشايا پايعامبار مەن ٴزابۇر جىرشىسى پاتشالىق جايلى نە ايتقان؟
16 اتالمىش ايعاقتار ٴبىزدى تاڭعالدىرمايدى. بۇگىندە ەكونوميكالىق جانە ساياسي ۇيىمداردى ٶزىمشىل ادامدار باسقارىپ وتىر. بۇل ادامدار سوعىستى، قىلمىستى، اۋرۋ مەن كەدەيلىكتى قۇرتا المايدى. مۇنى ىستەي الاتىن تەك قۇداي پاتشالىعى. ەحوبا ادامزات ٷشىن نە ىستەيتىنى جايلى ويلاپ كورىڭىزشى. ونىڭ پاتشالىعى سوعىسقا تۇرتكى بولاتىن سەبەپتەردىڭ ٴبارىن جويادى، مىسالى وزىمشىلدىكتى، جەمقورلىقتى، وتان سۇيگىشتىگتى، جالعان ٴدىندى جانە شايتاننىڭ ٶزىن دە قۇرتادى (ٴزابۇر 46:8، 9). قۇداي پاتشالىعى قىلمىستىڭ تامىرىنا بالتا شابادى. بۇل پاتشالىق ٴتىپتى قازىردىڭ وزىندە ميلليونداعان ادامدى ٴبىر-ٴبىرىن سۇيۋگە جانە ٴبىر-بىرىنە سەنىم ارتۋعا ۇيرەتىپ جاتىر. بۇل — باسقا ەشبىر ۇكىمەتتىڭ قولىنان كەلمەيتىن ٸس (يشايا 11:9). جۋىردا ەحوبا اۋرۋ اتاۋلىنى جوق قىلىپ، بارلىق ادامزاتتى ساپ-ساۋ ەتەدى (يشايا 35:5، 6). ول كەدەيلىكتى دە قۇرتادى جانە قۇدايدىڭ ارقاسىندا بارلىق ادامدار باقىتتى ٶمىر ٴسۇرىپ، ونىمەن تىعىز قارىم-قاتىناسقا يە بولادى. بۇعان ەشقانداي بايلىق تەڭ كەلمەيدى (ٴزابۇر 72:12، 13).
«قالاي جاۋاپ بەرۋ كەرەكتىگىن» بىلەيىك
17. وسى دۇنيەلىك وي-پىكىرلەرگە قالاي قارسى تۇرا الامىز؟
17 ەگەر ٴسىز شىندىققا قايشى كەلەتىن كەڭ تارالعان ٴبىر وي-پىكىردى ەستىسەڭىز، بۇل جايلى كيەلى كىتاپتا نە دەلىنگەنىن ٴبىلىڭىز. تولىسقان باۋىرلاسپەن سويلەسىڭىز. ادامدار سول وي-پىكىردى نە ٷشىن ۇناتاتىنىن، نەگە ونىڭ بۇرىس ەكەنىن جانە وعان قالاي قارسى تۇرۋعا بولاتىنىن ويلانىڭىز. پاۋىلدىڭ كەلەسى سوزدەرىنە قۇلاق اسساق، وسى دۇنيەلىك وي-پىكىرلەردەن قورعانا الامىز: «قاۋىمنان تىس ادامدارمەن ارالاسقاندا دانا بولىڭدار... سوندا اركىمگە قالاي جاۋاپ بەرۋ كەرەكتىگىن بىلەسىڭدەر» (قولوستىقتارعا 4:5، 6).
^ 9-ابزاس كيەلى كىتاپتىڭ كەيبىر اۋدارمالارىندا كەزدەسەتىن جوحان 7:53—8:11 تارماقتار جازبالاردىڭ ٴتۇپ نۇسقاسىندا جوق. كەيبىر ادامدار سول ٷزىندىنى نەگىزگە الىپ، بۇرىس تۇجىرىم جاسايدى. ولاردىڭ ويىنشا، نەكە ادالدىعىن بۇزعان ادامدى تەك كۇناسى جوق ادام عانا سوتتاي الادى. ٴبىراق قۇداي يسرايلگە مىناداي زاڭ بەرگەن: «ەگەر الدەبىرەۋ وزگەنىڭ ايەلىمەن جاتقان جەرىندە ۇستالسا، ەكەۋى دە — ايەلمەن جاتقان ەركەك تە، ايەلدىڭ ٶزى دە — ٶلتىرىلسىن» (مۇسانىڭ 5-جازباسى 22:22).
