قۋانىشپەن ٵن شىرقايىق!
«قۇدايىمىزعا ماداق ٵنىن ايتقان قانداي جاقسى!» (ٴزابۇر 147:1).
اندەر: 9، 138
1. ٵننىڭ ارقاسىندا ٴبىز نە ىستەي الامىز؟
ٴبىر اتاقتى اقىن بىلاي دەگەن ەكەن: «سوزدەر وي سالادى، مۋزىكا سەزىم وياتادى. ال ٵن بولسا ويعا دا، سەزىمگە دە اسەر ەتىپ، جۇرەككە جەتىپ بويدى الادى». ٴبىزدىڭ اندەرىمىز كوكتەگى اكەمىز ەحوباعا ماداق اكەلىپ، وعان دەگەن سۇيىسپەنشىلىگىمىزدى پاش ەتەدى. ٴبىزدى وعان جاقىنداتا تۇسەدى. ولاي بولسا، ٵن ايتۋدىڭ، مەيلى جەكە نە باۋىرلاستارمەن بىرگە بولسىن، شىنايى عيباداتتا الار ورنى ماڭىزدى ەكەنى تۇسىنىكتى-اق.
2، 3. ا) كەيبىرەۋلەر قاۋىمدا ٵن ايتۋعا قالاي قارايدى؟ ٵ) وسى ماقالادا قانداي سۇراقتاردى قاراستىرامىز؟
2 قاۋىم كەزدەسۋلەرىندە ٵن ايتۋعا قالاي قارايسىز؟ ۇيالىپ، ٵن ايتۋدان تارتىناسىز با؟ كەي مادەنيەتتە ەر ادامدار باسقالاردىڭ كوزىنشە ٵن ايتۋعا ىڭعايسىزدانادى. مۇنداي كوزقاراس بۇكىل قاۋىمعا كەرى اسەر ەتۋى مۇمكىن. اسىرەسە اقساقالدار ٵن ايتۋعا قىسىلاتىن بولسا نە ٵن ايتىلىپ جاتقاندا باسقا ىستەرمەن اينالىسىپ جاتسا، بۇل باۋىرلاستارعا جامان ىقپال ەتۋى مۇمكىن (ٴزابۇر 30:12).
3 ٵن ايتۋ — ەحوباعا دەگەن عيباداتىمىزدىڭ اجىراماس بولىگى. سول سەبەپتى ٵن ايتىلىپ جاتقاندا ٴبىز سىرتقا شىعىپ كەتۋدى، يا بولماسا كەزدەسۋدىڭ وسى بولىگىن جىبەرىپ الۋدى قالامايمىز. سوندىقتان ٴبارىمىز كەلەسى سۇراقتار جايلى ويلانۋىمىز كەرەك: «كەزدەسۋلەردە ٵن ايتۋعا قالاي قارايمىن؟ باسقالاردىڭ كوزىنشە ٵن ايتۋعا قىسىلاتىن بولسام، ماعان نە كومەك بولماق؟ ٵندى سەزىممەن شىرقاۋدى قالاي ۇيرەنسەم بولادى؟»
ٵن ايتۋ — شىنايى عيباداتىمىزدىڭ اسا ماڭىزدى بولىگى
4، 5. ەجەلگى يسرايلدە انمەن بايلانىستى قانداي شارالار جاسالعان؟
4 تاريح بويى ەحوبانىڭ قىزمەتشىلەرى ونى انمەن ماداقتاپ وتىرعان. كوڭىل قويارلىق ٴبىر جايت، يسرايلدىكتەر ەحوباعا ادال بولعان كەزدەرى ٵن ايتۋ ولاردىڭ عيباداتىندا ماڭىزدى ورىن العان. مىسالى، ٴداۋىت عيباداتحاناداعى قىزمەتكە دايىندىق جاساعاندا، ەحوبانى انمەن ماداقتاۋ ٷشىن 4000 لەۋىلىكتىڭ باسىن قوسقان. سولاردىڭ 288 ٸ «ٵن شىرقاۋ ٷشىن ارنايى دايىندىقتان وتكەن» بولاتىن (شەجىرەلەر 1-جازبا 23:5؛ 25:7).
5 ٵن مەن كۇي عيباداتحانانى باعىشتاۋ سالتاناتىنىڭ دا ماڭىزدى بولىگى بولعان. كيەلى كىتاپتا بىلاي دەلىنگەن: «ەحوبانى ماداقتاپ، وعان العىس ايتىپ جاتقان كەرنەيشىلەر مەن انشىلەردىڭ داۋىستارى بىرىككەن ساتتە — ٵنشى-كۇيشىلەر كەرنەي، جەز تاباقشا مەن باسقا دا اسپاپتاردىڭ سازىنا قوسىلىپ... ەحوبانى ماداقتاي باستاعان ساتتە — ٷيدىڭ، ەحوبانىڭ ٷيىنىڭ ٸشىن بۇلت الىپ كەتتى». بۇل وقيعا يسرايلدىكتەردىڭ سەنىمىن نىعايتقانى ٴسوزسىز (شەجىرەلەر 2-جازبا 5:13، 14؛ 7:6).
6. نەحەميا يەرۋساليمدە ٵمىرشى بولعاندا، ٵن-كۇي ورىنداۋعا قاتىستى قانداي شارالار جاسادى؟
6 نەحەميا يسرايلدىكتەردى يەرۋساليمنىڭ قابىرعاسىن قالپىنا كەلتىرۋ ىسىنە جۇمىلدىرعاندا، ٵن مەن كۇي ورىنداۋ ٷشىن لەۋىلىكتەردىڭ دە باسىن قوسقان بولاتىن. ولاردىڭ ورىنداۋلارى يەرۋساليم قابىرعاسىن باعىشتاۋ سالتاناتىنىڭ الدەقايدا قۋانىشتى وتۋىنە سەپتىگىن تيگىزگەن. نەحەميا «ريزاشىلىق اندەرىن ايتاتىن ەكى ۇلكەن توپتى» تاعايىندادى. ٵن ايتقان بۇل ەكى توپ قابىرعا ۇستىمەن ٴبىر-بىرىنە قاراما-قارسى ٴجۇرىپ وتىرىپ، عيباداتحانانىڭ توڭىرەگىنە كەلىپ توقتادى. ولاردىڭ داۋسى كۇشتى بولعانى سونشا، ٴتىپتى الىس ماڭداعى ادامدارعا ەستىلىپ جاتتى (نەحەميا 12:27، 28، 31، 38، 40، 43). ەحوبا ٶز قىزمەتشىلەرىنىڭ ونى ماداقتاۋ ٷشىن وسىلاي زور قۇلشىنىسپەن ٵن ايتقاندارىنا ريزا بولعانى داۋسىز.
7. يسا ماسىحشىلەر ٷشىن ٵن ايتۋ عيباداتتىڭ اجىراماس بولىگى بولۋ كەرەكتىگىن قالاي كورسەتتى؟
7 يسانىڭ كۇندەرىندە دە ٵن شىنايى عيباداتتىڭ اجىراماس بولىگى بولىپ قالا بەردى. ادامزات تاريحىنداعى ەڭ ماڭىزدى تۇندە نە بولعانى ەسىڭىزدە مە؟ يەمىزدىڭ كەشكى اسىن وتكىزگەننەن كەيىن، يسا شاكىرتتەرىمەن بىرگە ەحوبانى ماداقتاپ ٵن ايتقان (ماتاي 26:30 وقىڭىز).
8. ٴبىرىنشى عاسىرداعى ماسىحشىلەر قۇدايدى انمەن ماداقتاۋعا قاتىستى قانداي ۇلگى قالدىردى؟
8 ٴبىرىنشى عاسىرداعى ماسىحشىلەر قۇدايدى انمەن ماداقتاۋعا قاتىستى بىزگە جاقسى ۇلگى قالدىرعان. كەزىندە ەحوباعا سيىنۋ ٷشىن عيباداتحاناعا بارعان يسرايلدىكتەردەن ايىرماشىلىعى ولار جەكە ۇيلەردە جينالاتىن. بۇل ۇيلەر عيباداتحانا سياقتى ٴزاۋلىم دە اسەم بولماسا دا، باۋىرلاستار وندا قۇلشىنا ٵن ايتقان. ەلشى پاۋىل باۋىرلاستارعا بىلاي دەپ جازعان: «ٴزابۇر جىرلارى، ماداقتاۋ ولەڭدەرى جانە ريزاشىلىققا تولى رۋحاني اندەرمەن ۇنەمى ٴبىر-بىرىڭە ٴتالىم بەرىپ، جىگەرلەندىرىڭدەر. ەحوباعا شىن جۇرەكتەن ٵن ايتىڭدار» (قولوستىقتارعا 3:16). ٴبىزدىڭ ٵن كىتابىمىزداعى اندەر دە «ريزاشىلىققا تولى» سەزىممەن ايتىلۋ كەرەكتىگى انىق. بۇل اندەر جيناعى — «ادال دا اقىلدى قۇلدىڭ» بەرىپ جاتقان ۋاقتىلى اس-سۋىنىڭ ٴبىر بولىگى (ماتاي 24:45).
ٵندى سەنىمدىلىكپەن ايتۋدى قالاي ۇيرەنە الامىز؟
9. ا) نەگە كەيبىرەۋلەر قاۋىم مەن كونگرەستە قۋانا ٵن شىرقاۋدان تارتىنشاقتاۋى مۇمكىن؟ ٵ) ەحوباعا ماداق اندەرىن قالاي ايتۋىمىز كەرەك جانە بۇل ىستە كىمدەر جەتەكشىلىكتى قولعا الۋى ٴتيىس؟ (ماقالانىڭ باسىنداعى سۋرەتتى قاراڭىز.)
9 ٵن ايتۋعا تارتىنشاقتايتىن بولساڭىز، بۇعان نە سەبەپ بولۋى مۇمكىن؟ بالكىم، ٵن ايتۋ وتباسىڭىز ٷشىن ۇيرەنشىكتى ادەت ەمەس شىعار نە مادەنيەتىڭىزگە جات بولار. يا بولماسا راديودان نە تەلەديداردان كاسىبي انشىلەردى ەستىپ جۇرگەن سوڭ، ٶزىڭىزدى سولارمەن سالىستىرىپ، ٵن ايتۋعا ۇيالاتىن بولارسىز نە ٶز داۋسىڭىزعا كوڭىلىڭىز تولمايتىن شىعار. الايدا بارلىعىمىزدا دا ەحوباعا ماداق اندەرىن ايتۋ جاۋاپكەرشىلىگىمىز بار. ەندەشە، ٵن كىتابىن جوعارى كوتەرىپ، باسىڭىزدى تىك ۇستاپ، شابىتتانا ٵن شىرقاڭىز! (ەزرا 3:11؛ ٴزابۇر 147:1 وقىڭىز). بۇگىندە كوپ پاتشالىق سارايىندا ٵننىڭ سوزدەرى ەكران بەتىنەن كورسەتىلەدى، وسىنىڭ ارقاسىندا ٵندى كەڭ داۋىسپەن ايتا الامىز. ٴبىر قىزىعى، پاتشالىق اندەرى اقساقالدارعا ارنالعان پاتشالىق قىزمەت مەكتەبىنىڭ باعدارلاماسىنا دا ەنگىزىلدى. بۇل شارا اقساقالداردىڭ قاۋىم كەزدەسۋلەرىندە ٵن ايتۋدا جەتەكشىلىك ەتۋى كەرەكتىگىن كورسەتەدى.
10. داۋىستاپ ٵن ايتۋدان قورقاتىن بولساق، نەنى ەستە ۇستاۋ كەرەك؟
10 كوپ ادام داۋسىم تىم قاتتى شىعادى نە داۋسىم جوق دەپ ويلاعاندىقتان، ٵندى قاتتىراق ايتۋدان قورقۋى مۇمكىن. الايدا كەلەسى جايت تۋرالى ويلانىپ كورەيىكشى. ٴبىز ٴبارىمىز دە سوزبەن «كوپ سۇرىنەمىز»، ٴبىراق سولاي ەكەن دەپ، سويلەمەي قويمايمىز عوي (جاقىپ 3:2). ولاي بولسا، كەمەلسىز داۋسىمىزعا بولا ەحوباعا ماداق اندەرىن ايتۋدان نەگە تارتىنۋىمىز كەرەك؟!
11، 12. ٵن ايتۋ قابىلەتىمىزدى قالاي جاقسارتا الامىز؟
11 بالكىم، ٴبىز ٵندى دۇرىس ايتۋدى بىلمەگەندىكتەن، ٵن شىرقاۋدان قورقاتىن شىعارمىز. ولاي بولسا، قازىر ٵن ايتۋ قابىلەتىمىزدى جاقسارتۋدىڭ بىرنەشە قاراپايىم جولىن قاراستىرايىق *.
12 دۇرىس تىنىس الۋدى ۇيرەنسەڭىز، قاتتى ٵرى زور داۋىسپەن ٵن ايتا الاسىز. ەلەكتر توگى شامعا قۋات بەرەتىنىندەي، تىنىس العانىمىز سويلەگەندە نە ٵن ايتقاندا داۋسىمىزعا قۋات بەرەدى. ادەتتە سويلەگەن كەزدە داۋسىڭىز قانداي بولسا، سونداي داۋىس قاتتىلىعىمەن، ٴتىپتى ودان دا قاتتىراق داۋىسپەن ٵن ايتىڭىز (باسقا دا كەڭەستەردى تابۋ ٷشىن، «تەوكراتيالىق قىزمەت مەكتەبىندە ٴبىلىم الامىز» كىتابىنىڭ 181—184 بەتتەرىندەگى «دۇرىس تىنىس الۋ» تاقىرىپشاسىن قاراڭىز.). بۇلاي ىستەگەنىمىز وتە ورىندى. ويتكەنى كيەلى كىتاپتىڭ كەي جەرلەرىندە ەحوبانىڭ قىزمەتشىلەرى ونى ماداقتاعاندا، «شاتتانا ايعايلاۋعا» شاقىرىلادى (يشايا 24:14).
13. سەنىمدىرەك ٵن ايتۋدىڭ جولىن ٴتۇسىندىرىڭىز.
13 وتباسىلىق عيبادات كەزىندە نە جەكە ٶزىڭىز بىلاي ەتىپ كورىڭىز: ٵن كىتابىنان سۇيىكتى اندەرىڭىزدىڭ ٴبىرىن تاڭداپ، ونىڭ سوزدەرىن قاتتى ٵرى سەنىمدى داۋىسپەن داۋىستاپ وقىڭىز. سوسىن سول داۋىس قاتتىلىعىن ۇستاپ، ٴبىر دەممەن تولىق ٴبىر سويلەمدى ايتىپ شىعىڭىز. ەندى ٴدال سونداي قاتتى داۋىسپەن سول سويلەمدى اندەتىپ ايتىڭىز (ٴزابۇر 33:1—3). سوندا ٵن ايتقاندا داۋسىڭىز كۇشتىرەك شىعاتىن بولادى ٵرى بۇلاي بولعانى وتە جاقسى. داۋسىم قاتتىراق شىقتى ەكەن دەپ، قورقىپ نە ۇيالىپ قالماڭىز.
14. ا) اۋىزدى كەڭىرەك اشقانىڭىز جاقسىراق ٵن ايتۋعا قالاي كومەكتەسەدى؟ (« ٵن ايتۋ قابىلەتىن قالاي جاقسارتۋعا بولادى؟» دەگەن قورشاۋدى قاراڭىز.) ٵ) داۋىسقا بايلانىستى قيىندىقتاردى جەڭۋ تۋرالى قانداي كەڭەستەر ٴسىز ٷشىن ٴتيىمدى؟
14 داۋسىڭىز كۇشتىرەك شىعۋ ٷشىن اۋىز قۋىسىن كەڭەيتۋ قاجەت. سوندىقتان ٵن ايتقاندا، اۋزىڭىزدى ادەتتە سويلەگەننەن كەڭىرەك اشىڭىز. الايدا داۋسىڭىز ٵلسىز نە تىم جوعارى دەپ ويلاساڭىز، نە ىستەۋگە بولادى؟ بۇعان قاتىستى ٴتيىمدى كەڭەستەردى «تەوكراتيالىق قىزمەت مەكتەبىندە ٴبىلىم الامىز» كىتابىنىڭ 184-بەتىندەگى «كەيبىر قيىندىقتار جانە ولاردى جەڭۋ» قورشاۋىن قاراڭىز.
شىن جۇرەكتەن ٵن شىرقاڭىز
15. ا) 2016-جىلى وتكەن جىلدىق جيىندا قانداي حابارلاندىرۋ بولدى؟ ٵ) ٵن كىتابىن نە سەبەپتى جاڭارتۋ قاجەت بولدى؟
15 2016-جىلى وتكەن جىلدىق جيىندا باسقارۋشى كەڭەستىڭ مۇشەسى ستيۆەن لەتت باۋىرلاس «ەحوباعا قۋانا ٵن شىرقايىق!» * دەپ اتالاتىن جاڭا ٵن كىتابىنىڭ جارىق كورگەنىن حابارلاعاندا، قاتىسۋشىلاردىڭ بارلىعى تاڭ-تاماشا بولدى. ستيۆەن باۋىرلاس «كيەلى جازبالار. جاڭا دۇنيە اۋدارماسى» قايتا وڭدەلگەندىكتەن، ٵن كىتابىن دا جاڭارتۋ قاجەتتىلىگى تۋىنداعانىن ايتىپ ٶتتى. «جاڭا دۇنيە اۋدارماسىنان» كەيبىر تىركەستەر الىنىپ تاستالعاندىقتان، جاڭا ٵن كىتابىنىڭ سوزدەرىنە دە وزگەرىستەر ەنگىزىلدى. سونداي-اق وعان ۋاعىز ٸسى جانە تولەم جايلى جاڭا اندەر دە قوسىلدى. ونىڭ ۇستىنە، ٵن عيباداتىمىزدىڭ ماڭىزدى بولىگى بولعاندىقتان، باسقارۋشى كەڭەس جوعارى ساپالى ٵن كىتابىن شىعارۋدى ٴجون كوردى. بۇل جاڭا ٵن كىتابىنىڭ مۇقاباسى «جاڭا دۇنيە اۋدارماسىنا» ۇقساس ەتىپ جاسالدى.
16، 17. جاڭا ٵن كىتابىنا تاعى قانداي وزگەرىستەر ەنگىزىلدى؟
16 كىتاپتى قولدانۋ ىڭعايلى بولۋ ٷشىن، ونداعى اندەر تاقىرىپ بويىنشا توپتاستىرىلعان. مىسالى، العاشقى 12 ٵن ەحوبا جايلى بولسا، كەلەسى 8 ى يسا مەن تولەم جايلى جانە تاعى سول سياقتى. تاقىرىپتاردىڭ تولىق ٴتىزىمى كىتاپتىڭ باس جاعىندا ورنالاسقان. بۇل وتە ىڭعايلى. مىسالى، ەر باۋىرلاستار كوپشىلىككە ارنالعان بايانداماعا ٵن تاڭداعاندا وسى تىزىمگە قاراي الادى.
17 ٵن كىتابىنداعى سوزدەرگە وزگەرىستەر ەنگىزىلگەندىكتەن، اندەردىڭ ماعىناسىن ٴتۇسىنۋ جەڭىلدەدى. سونىڭ ارقاسىندا ٵربىر ادام جاڭا اندەردى شىن جۇرەكتەن شىرقاي الادى. كىتاپتا قولدانىلىپ كەلگەن رەسمي ٴتىل كوپشىلىككە تۇسىنىكتى تىلگە الماستىرىلدى. وسىلايشا سوزدەرى ٵرى سويلەمدەرى قاراپايىم بولعاندىقتان، ٵن ايتۋ وڭايىراق بولادى. سونداي-اق كەيبىر اندەر قايتا وڭدەلىپ، وندا قاۋىم كەزدەسۋلەرى مەن ۋاعىز ىسىمەن بايلانىستى ٴتيىمدى تاقىرىپتار قوزعالادى..
وتباسىلىق عيبادات كەزىندە ٵن ايتىپ جاتتىعىڭىزدار (18-ابزاستى قاراڭىز)
18. نەگە جاڭا اندەردى ايتىپ ۇيرەنۋىمىز كەرەك؟ (سىلتەمەنى دە قاراڭىز.)
18 «ەحوباعا قۋانا ٵن شىرقايىق!» كىتابىندا دۇعا تۇرىندە جازىلعان اندەر كوپ. بۇل اندەر ەحوباعا ٶز سەزىمدەرىمىزدى جەتكىزۋگە كومەكتەسەدى. ال باسقا اندەر ٴبىزدى «سۇيىسپەنشىلىككە جانە يگى ىستەرگە» تالپىندىرادى (ەۆرەيلەرگە 10:24). ٴبىز جاڭا اندەردىڭ اۋەنىن، ىرعاعى مەن سوزدەرىن جاقسى ٴبىلىپ العىمىز كەلەدى. مۇنى ىستەۋدىڭ ٴبىر جولى — باۋىرلاستار ورىنداعان وسى اندەردىڭ دىبىس جازباسىن تىڭداۋ. بۇل دىبىس جازبالاردى jw.org تور بەكەتىنەن كورسەك بولادى. اندەردى ۇيدە ايتىپ جاتتىعار بولساڭىز، ولاردى سەنىمدىلىكپەن ٵرى سەزىممەن ايتۋدى ۇيرەنە الاسىز *.
19. قاۋىمداعىلاردىڭ ٴبارى ەحوباعا قالاي عيبادات ەتە الادى؟
19 ٵن ايتۋ عيباداتىمىزدىڭ ماڭىزدى بولىگى ەكەنىن ەستە ۇستايىق. ٵن — ەحوبانى جاقسى كورەتىنىمىزدى جانە ٴبىز ٷشىن جاساعان بار جاقسىلىعى ٷشىن ريزاشىلىعىمىزدى ٴبىلدىرۋدىڭ كۇشتى جولى (يشايا 12:5 وقىڭىز). زور شابىتپەن ٵن ايتساڭىز، بۇل باسقالاردى دا سولاي ەتۋگە تالپىندىرادى. قاۋىمداعى ٵر ادام، مەيلى جاس نە قارت بولسىن، شىندىققا جاڭادان كەلسىن، ٴبارى دە ەحوباعا ٵن ايتىپ، عيبادات ەتە الادى. ولاي بولسا، شىن جۇرەكتەن ٵن شىرقاۋعا ەش قىسىلماڭىز. ٴزابۇر جىرشىسىنىڭ: «ەحوباعا ٵن شىرقاڭدار!»— دەگەن سوزدەرىنە ساي ارەكەت ەتەيىك. ٴيا، ەحوباعا قۋانىشپەن ٵن شىرقايىق! (ٴزابۇر 96:1).
^ 11-ابزاس ٵن ايتۋ قابىلەتىمىزدى جاقسارتۋعا قاتىستى كوبىرەك ٴبىلۋ ٷشىن، JW Broadcasting-تەن «دەيۆيد سپلين. جاڭا اندەردى ايتىپ ۇيرەنەيىك» (حانزۋشا) دەگەن باياندامانى قاراڭىز (فيلىم تۇرلەرى: اي سايىنعى باعدارلاما—بايانداما).
^ 15-ابزاس بۇل باسىلىم ازىرگە قازاق تىلىندە جوق.
^ 18-ابزاس ٵر ايماقتىق جانە اۋداندىق كونگرەستىڭ تاڭەرتەڭگى جانە تۇستەن كەيىنگى باعدارلاماسى ون مينۋتتىق اۋەنمەن باستالادى. وسى اسەم اۋەندەر ٵن ايتۋعا دەگەن قۇشتارلىعىمىزدى ارتتىرادى ٵرى جۇرەگىمىزدى باعدارلاماعا دايىندايدى. سول سەبەپتى ٴبارىمىز ٶز ورنىمىزعا جايعاسىپ، اۋەن باستالعاندا، تىڭداۋعا دايىن وتىرۋىمىز كەرەك.
