ەحوبانى پانالايسىز با؟
«ەحوبا ٶز قىزمەتشىلەرىنىڭ قۇنىن وتەپ الادى؛ ونى پانالاعاندارعا ايىپ تاعىلمايدى» (ٴزابۇر 34:22).
اندەر: 49، 65
1. قۇدايدىڭ كوپتەگەن ادال قىزمەتشىلەرى كۇنانىڭ كەسىرىنەن نە سەزىنەدى؟
ەلشى پاۋىل: «سورلى باسىم-اي!»— دەپ جازعان (ريمدىكتەرگە 7:24). پاۋىل سياقتى، بۇگىندەگى قۇدايدىڭ ادال قىزمەتشىلەرى دە ەڭسەلەرى ٴتۇسىپ، قاتتى كۇيىنەدى. نە سەبەپتى؟ ويتكەنى ەحوباعا قانشا ۇنامدى بولۋعا تىرىسساق تا، ٴبىز كۇنانى مۇرا ەتكەنبىز. سوندىقتان وعان ۇنامدىنى ىستەي الماعان كەزدە جامان سەزىنەتىن شىعارمىز. اۋىر كۇنا جاساعان كەيبىر ماسىحشىلەر ەحوبانىڭ كەشىرىمىنە ەشقاشان يە بولا المايمىن دەپ تە ويلاعان.
2. ا) ٴزابۇر 34:22 قۇدايدىڭ قىزمەتشىلەرىنە وزدەرىن كىنالى سەزىنە بەرمەۋ كەرەكتىگىن قالاي كورسەتەدى؟ ٵ) بۇل ماقالادان نە بىلەمىز؟ (« ٴتالىم رەتىندە مە، الدە بەينەلى ماعىنادا ما؟» دەگەن قورشاۋدى دا قاراڭىز.)
2 جازبالار ٴبىزدى مىناعان سەندىرەدى: ەگەر ەحوبانى پانالايتىن بولساق، ٶزىمىزدى كىنالى سەزىنە بەرۋدىڭ ەش قاجەتى جوق (ٴزابۇر 34:22 وقىڭىز). ٴبىراق ەحوبانى پانالاۋ دەگەنىمىز نەنى بىلدىرەدى؟ ەحوبا بىزگە مەيىرىمدى بولىپ، كەشىرىم تانىتقانىن قالاساق، نە ىستەۋىمىز كەرەك؟ بۇل سۇراقتاردىڭ جاۋابىن تابۋ ٷشىن، ٴبىز ەجەلگى يسرايلدەگى باسساۋعالايتىن قالالار جايلى قاراستىرامىز. بۇل شارا زاڭ كەلىسىمىنىڭ ٴبىر بولىگى بولعان، بۇل كەلىسىم ب.ز. 33-جىلى ەلۋىنشى كۇن مەيرامىندا باسقا كەلىسىممەن الماستىرىلدى. دەسە دە بۇل زاڭدى ەحوبا شىعارعان بولاتىن. سوندىقتان سول باسساۋعالايتىن قالالار جايلى قاراستىرۋ ارقىلى ەحوبانىڭ كۇناعا، كۇناكارلار مەن كۇناسىنا وكىنەتىندەرگە دەگەن كوزقاراسىن بىلە الامىز. الدىمەن يسرايلدە باسساۋعالايتىن قالالاردىڭ نە سەبەپتى بولعانىن جانە ولاردىڭ قانداي قىزمەت اتقارعانىن بىلەيىك.
«وزدەرىڭە باسساۋعالايتىن قالالار تاڭداپ الىڭدار»
3. يسرايلدىكتەر كىسى ولتىرگەن اداممەن نە ىستەۋى ٴتيىس ەدى؟
3 ەجەلگى يسرايلدە ادام قانى توگىلسە، ەحوبا بۇعان بەيجاي قاراماعان. ەگەر كىمدە-كىم بىرەۋدى ولتىرسە، قانى توگىلگەن ادامنىڭ ەڭ جاقىن ەر جىنىستى تۋىسى، ول «كەك الۋشى» دەپ اتالعان، الگى كىسى ٶلتىرۋشىنى مەرت قىلۋى ٴتيىس ەدى (مۇسانىڭ 4-جازباسى 35:19). وسىلايشا كىسى ٶلتىرۋشى ٶزى ولتىرگەن كىناسىز ادامنىڭ ٶمىرىن ٶز ومىرىمەن وتەيتىن. ەگەر ول ٴتيىستى جازاسىن تارتپاسا، ۋادە ەتىلگەن جەر ارامدانىپ كەتەر ەدى، نەمەسە كيەلى بولماي قالار ەدى. ەحوبا بىلاي دەپ بۇيىردى: «تۇرىپ جاتقان جەرلەرىڭدى ارامداماڭدار، ويتكەنى توگىلگەن قان جەردى ارامدايدى» (مۇسانىڭ 4-جازباسى 35:33، 34).
4. يسرايلدىك كىسى ابايسىزدا بىرەۋدى ٶلتىرىپ قويسا، نە بولاتىن؟
4 ال ەگەر ٴبىر يسرايلدىك بىرەۋدى بايقاۋسىزدا ٶلتىرىپ قويسا شى؟ بۇل كەزدەيسوق جاعداي بولسا دا، ول كىناسىز ادامنىڭ قانىن توككەنى ٷشىن جاۋاپتى بولعان (مۇسانىڭ 1-جازباسى 9:5). ٴبىراق ەحوبا مۇنداي جاعدايدا وعان مەيىرىمدىلىك كورسەتىلەتىنىن ايتقان. ابايسىزدا كىسى ٶلتىرىپ قويعان ادام كەك الۋشىدان قاشىپ، باسساۋعالايتىن التى قالانىڭ ٴبىرىن پانالاي الاتىن. سول قالادا قالۋعا رۇقسات العان سوڭ، ول قاۋىپسىزدىكتە بولاتىن. ٴبىراق باس دىني قىزمەتكەر كوز جۇمعانعا دەيىن ول سوندا قالۋى قاجەت ەدى (مۇسانىڭ 4-جازباسى 35:15، 28).
5. باسساۋعالايتىن قالالاردىڭ بولعانى نەگە ەحوبانى جاقسىراق تۇسىنۋگە كومەكتەسەدى دەي الامىز؟
5 باسساۋعالايتىن قالالاردىڭ بولۋىن ادامدار ەمەس، ەحوبانىڭ ٶزى ويلاستىردى. ول ەشۋاعا: «يسرايلدىكتەرگە مىنانى ايت: — وزدەرىڭە باسساۋعالايتىن قالالار تاڭداپ الىڭدار»،— دەپ بۇيىردى. ٴسويتىپ، بۇل قالالار «قاسيەتتى» ەتىلدى (ەشۋا 20:1، 2، 7 سىلتەمە، 8). ەحوبانىڭ ٶزى بۇل قالالاردى ٴبولىپ الۋدى شەشتى. ەندەشە، بۇل شارادان ٴبىز ەحوبا تۋرالى كوپ نارسە بىلەمىز. مىسالى، ونىڭ مەيىرىمدىلىگىن جاقسىراق تۇسىنە الامىز. سونداي-اق بۇل شارادان بۇگىندە ەحوبانى قالاي پانالاي الاتىنىمىزدى بىلەمىز.
ول «بولعان جايتتى اقساقالدارعا ايتىپ بەرۋى» ٴتيىس
6، 7. ا) ادەيى كىسى ولتىرمەگەن ادامدى سوتتاۋ ىسىندە اقساقالداردىڭ رولىن سيپاتتاپ بەرىڭىز. (ماقالانىڭ باسىنداعى سۋرەتتى قاراڭىز.) ٵ) قاشقىننىڭ اقساقالدارمەن سويلەسكەنى نەگە دانالىققا جاتار ەدى؟
6 ەگەر يسرايلدىك كىسى بىرەۋدى ابايسىزدا ٶلتىرىپ قويسا، وندا باسساۋعالايتىن قالاعا قاشىپ بارىپ، قالا قاقپاسىنىڭ الدىنداعى اقساقالدارعا «بولعان جايتتى» ايتىپ بەرۋى ٴتيىس ەدى. اقساقالدار ونى جىلى قارسى الۋى كەرەك-ٴتىن (ەشۋا 20:4). كەيىنىرەك ولار قاشقىندى كىسى ٶلىمى بولعان قالاداعى اقساقالدارعا جىبەرىپ، ولار ونىڭ ٸسىن قاراستىراتىن ەدى (مۇسانىڭ 4-جازباسى 35:24، 25 وقىڭىز). ەگەر بۇل اقساقالدار كىسى ٶلىمىن وقىس جاعداي بولدى دەپ شەشسە، قاشقىندى الگى باسساۋعالايتىن قالاعا قايتاراتىن.
7 قاشقىن نەگە اقساقالدارمەن سويلەسۋى قاجەت ەدى؟ وسىلاي سويلەسكەننىڭ ارقاسىندا اقساقالدار يسرايل حالقىنىڭ تازا ساقتالعانىنا كوز جەتكىزەتىن جانە كىسىنى ادەيى ولتىرمەگەن ادامعا ەحوبانىڭ مەيىرىمدىلىگىن سەزىنۋگە كومەكتەسە الاتىن. ٴبىر كيەلى كىتاپ زەرتتەۋشىسى جازعانداي، ەگەر قاشقىن اقساقالدارعا بارماسا، ول ومىرىنەن ايىرىلار ەدى. وسىلايشا، بۇل زەرتتەۋشىنىڭ ايتۋىنشا، قۇدايدىڭ تالابىن ورىنداماعاندىقتان، قاشقىن ٶز ولىمىنە ٶزى جاۋاپتى بولار ەدى. ال ٴتىرى قالۋ ٷشىن، ابايسىزدا كىسى ٶلتىرىپ قويعان ادام كومەك ىزدەپ، سونى قابىل الۋى ٴتيىس ەدى. ەگەر باسساۋعالايتىن قالالاردىڭ بىرىنە قاشىپ بارمايتىن بولسا، ولگەن ادامنىڭ جاقىن تۋىسى ونى ولتىرۋگە قۇقىلى بولاتىن.
8، 9. نەگە اۋىر كۇنا جاساعان ٴماسىحشى اقساقالدارمەن سويلەسۋى كەرەك؟
8 بۇگىندە اۋىر كۇنا جاساعان ٴماسىحشى ەحوبامەن قارىم-قاتىناسىن قالپىنا كەلتىرۋ ٷشىن، اقساقالداردىڭ كومەگىنە جۇگىنۋى ٴتيىس. بۇلاي ەتۋ نەگە سونشالىقتى ماڭىزدى؟ بىرىنشىدەن، اقساقالدارعا اۋىر كۇنا بولعان جاعدايلاردى قاراستىرۋدى ەحوبانىڭ ٶزى تاپسىرعان (جاقىپ 5:14—16). ەكىنشىدەن، اقساقالدار كۇناسىنا وكىنگەن ادامدارعا قايتادان قۇدايدىڭ ىقىلاسىنا بولەنىپ، كۇناسىن قايتالاماۋعا كومەكتەسە الادى (عالاتتىقتارعا 6:1؛ ەۆرەيلەرگە 12:11). ۇشىنشىدەن، اقساقالدار كۇناسىنا وكىنگەن ادامداردىڭ جان ازابى مەن كىنا جۇگىن جەڭىلدەتۋ ٷشىن تاعايىندالعان ٵرى دايىندىقتان وتكەن. ەحوبا مۇنداي اقساقالداردى «جاڭبىرلى داۋىلدان باسساۋعالايتىن پانا» دەپ اتايدى (يشايا 32:1، 2). بۇل شارا — ەحوبانىڭ بىزگە كورسەتىپ وتىرعان مەيىرىمدىلىگىنىڭ ٴبىر قىرى.
9 ەحوبانىڭ كوپ قىزمەتشىسى اقساقالدارمەن سويلەسىپ، كومەگىن قابىلداعاننان كەيىن اجەپتەۋىر جەڭىلدىك سەزىنگەن. مىسالى، دەنيەل ەسىمدى باۋىرلاس اۋىر كۇنا جاساعان، ٴبىراق بىرنەشە اي بويى اقساقالدارعا بارماي جۇرگەن. ول بىلاي دەيدى: «ارادا سونشاما ۋاقىت وتكەن سوڭ، اقساقالدار ماعان كومەكتەسە المايدى دەپ پايىمدادىم». ٴبىراق ول كۇناسى جايلى بىرەۋ-مىرەۋ ٴبىلىپ قويار ما ەكەن دەپ ۇنەمى مازالاناتىن، ٵرى ەحوباعا ايتقان ٵر دۇعاسىن كەشىرىم سۇراۋدان باستاۋىم كەرەك دەپ ويلايتىن. اقىر سوڭىندا ول اقساقالداردىڭ كومەگىنە جۇگىندى. وتكەندى ەسكە الىپ، ول بىلاي دەيدى: «ارينە، ولارعا بارۋعا جۇرەكسىندىم. ٴبىراق ولارمەن سويلەسكەن سوڭ، يىعىمنان اۋىر جۇك
تۇسكەندەي بولدى». بۇدان كەيىن دەنيەل قايتادان ەحوباعا ەمىن-ەركىن دۇعا ايتا الدى. قازىر ونىڭ ار-ۇجدانى تازا. ال جاقىندا ول قىزمەت كومەكشىسى بولىپ تاعايىندالدى.«مۇنداي ادام وسى قالالاردىڭ بىرىنە قاشسىن»
10. كەشىرىمگە يە بولۋ ٷشىن، بىرەۋدى ابايسىزدا ٶلتىرىپ قويعان كىسى نە ىستەۋگە ٴتيىس بولعان؟
10 كەشىرىمگە يە بولۋ ٷشىن، ابايسىزدا كىسى ٶلتىرىپ قويعان ادام دەرەۋ جاقىن اراداعى باسساۋعالايتىن قالاعا قاشۋعا ٴتيىس ەدى (ەشۋا 20:4 وقىڭىز). امان قالۋ ٷشىن ول سول قالاعا تەزىرەك جەتىپ، باس ٴدىني قىزمەتكەر ومىردەن وتكەنشە سوندا قالۋعا مىندەتتى بولاتىن. بۇل ٷشىن وعان ٴبىر نارسەلەردى قۇربان ەتۋگە تۋرا كەلەتىن. ول ٶز جۇمىسىن، جايلى ٷيىن تاستاۋى كەرەك ەدى، سونداي-اق بۇدان بىلاي ەمىن-ەركىن ٴجۇرىپ ساياحاتتاي الماس ەدى * (مۇسانىڭ 4-جازباسى 35:25). ٴبىراق ونىسى سوعان تاتيتىن. ال ەگەر قاشقىن قالاعان ۋاقىتىندا باسساۋعالايتىن قالادان شىعىپ كەتسە، بىرەۋدىڭ قانىن توككەنىنە اتۇستى قاراعانىن كورسەتەر ەدى، ٵرى ٶز ومىرىنە دە قاۋىپ توندىرەتىن.
11. كۇناسىنا وكىنەتىن ٴماسىحشى قۇدايدىڭ مەيىرىمدىلىگىنە دەگەن ريزاشىلىعىن قالاي كورسەتە الادى؟
11 بۇگىندە كۇناسىنا وكىنەتىن ادام دا قۇدايدىڭ كەشىرىمىنە يە بولۋ ٷشىن، بەلگىلى ٴبىر ارەكەتتەر جاساۋى ٴتيىس. ول كۇنا جاساۋىن دوعارۋى قاجەت. بۇل اۋىر كۇناعا جەتەلەيتىن كەز كەلگەن نارسەدەن اۋلاق بولۋدى دا بىلدىرەدى. ەلشى پاۋىل قورىنتتاعى وكىنگەن ماسىحشىلەردىڭ ٸس-ارەكەتىن بىلاي دەپ سيپاتتاعان: «قۇدايعا ۇنامدى مۇڭنىڭ ناتيجەسىنە قاراڭدارشى: نەتكەن زور ىقىلاس، تازارۋ، جاماندىققا دەگەن نارازىلىق، قۇداي الدىنداعى قورقىنىش، ىنتا، قۇلشىنىس، نەتكەن كەرەمەت تۇزەتۋ!» (قورىنتتىقتارعا 2-حات 7:10، 11). سونىمەن، ەگەر ٴبىز كۇنا جاساۋدى دوعارۋ ٷشىن قولدان كەلگەننىڭ ٴبارىن ىستەسەك، ٶز جاعدايىمىزعا بەيجاي قارامايتىنىمىزدى ٵرى ەحوبا قايتكەن كۇندە دە ٴبىزدى كەشىرەدى دەپ ويلامايتىنىمىزدى وعان كورسەتەمىز.
12. ەحوبانىڭ مەيىرىمدىلىگىنە بولەنە بەرۋ ٷشىن، ماسىحشىگە نەدەن باس تارتۋ كەرەك بولادى؟
12 ەحوبانىڭ مەيىرىمدىلىگىنە بولەنە بەرۋ ٷشىن، ماسىحشىگە نەدەن باس تارتۋ كەرەك بولار؟ ول كۇنا جاساۋعا يتەرمەلەيتىن نارسەلەردەن، ٴتىپتى ٶزى ۇناتاتىن نارسەلەردەن باس تارتۋعا دايىن بولۋى كەرەك (ماتاي 18:8، 9). مىسالى، ەگەر دوستارىڭىز ەحوباعا ۇنامسىز ىستەرمەن اينالىسۋعا ىقپال ەتسە، ولارمەن ارالاسۋدى دوعاراسىز با؟ ەگەر ىشىمدىك ٸشۋدىڭ مولشەرىن قاداعالاي الماساڭىز، كوپ ٸشىپ قويۋىڭىز مۇمكىن جاعدايلاردان قاشىق بولاسىز با؟ ال ەگەر ونەگەسىز جىنىستىق قالاۋلارمەن كۇرەسۋ قيىنعا سوقسا، ارام ويلار تۋدىراتىن فيلمدەردەن، تور بەكەتتەرىنەن جانە ىستەردەن اۋلاق جۇرەسىز بە؟ ەستە ۇستاڭىز، ەحوبانىڭ زاڭدارىن ۇستانۋ ٷشىن جاساعان قۇرباندىعىمىز سوعان تاتيدى. ەحوبا ٴبىزدى تاستاپ كەتتى دەگەن سەزىمنەن وتكەن سوراقى نارسە جوق. ال ونىڭ «ماڭگىلىك اينىماس سۇيىسپەنشىلىگىن» سەزىنۋدەن اسقان ەشتەڭە جوق (يشايا 54:7، 8).
«بۇل قالالار باسساۋعالايتىن پانالارىڭ بولادى»
13. نەگە باسساۋعالايتىن قالادا قاشقىندار قاۋىپسىز، تىنىش ٵرى باقىتتى ٶمىر كەشكەن دەي الامىز؟ ٴتۇسىندىرىڭىز.
13 قاشقىن باسساۋعالايتىن قالادان شىقپاسا، قاۋىپسىزدىكتە بولاتىن. سول قالالار جايلى ەشۋا 20:2، 3). ەحوبا قاشقىننىڭ ٴبىر ماسەلەمەن قايتادان سوتتالۋىن تالاپ ەتپەگەن. بۇعان قوسا، قاننىڭ كەگىن الۋشى قاشقىندى ولتىرمەس ٷشىن باسساۋعالايتىن قالاعا كىرگىزىلمەيتىن. قاشقىن سول قالادا تۇرعان كەزدىڭ بارىندە، ەحوبانىڭ قورعانىشىندا بولعان. ول تۇرمەدە ەمەس-ٴتىن. جۇمىس ىستەۋگە، وزگەلەرگە كومەكتەسۋگە ٵرى ەحوباعا تىنىشتىقتا قىزمەت ەتۋگە مۇمكىندىگى بولاتىن. ٴيا، ول باقىتتى دا ماعىنالى ٶمىر كەشە الاتىن!
ەحوبا: «بۇل قالالار... باسساۋعالايتىن پانالارىڭ بولادى»،— دەگەن (14. كۇناسىنا وكىنگەننەن كەيىن ٴماسىحشى نە نارسەگە سەنىمدى بولا الادى؟
14 اۋىر كۇنا جاساعان كەيبىر ماسىحشىلەر وكىنىش بىلدىرگەننەن كەيىن دە كىنا جۇگىنەن ايىرىلا المايدى. كەيبىرى ٴتىپتى ەحوبا ولاردىڭ جاساعانىن ەشقاشان كەشىرمەيدى دەپ ويلايدى. ەگەر ٴسىز دە وسىنداي ويدا بولساڭىز، وتىنەمىز، ەحوبا ٴسىزدى كەشىرگەنىنە سەنىمدى بولىڭىز. ول كەشىرسە، تولىقتاي كەشىرەدى. سوندىقتان ٶزىڭىزدى كىنالى سەزىنە بەرمەڭىز. جوعارىدا اتالىپ وتىلگەن دەنيەل دە وسىنىڭ راستىعىنا كوز جەتكىزدى. اقساقالدار ونىڭ ٸسىن قاراستىرىپ، تازا ار-ۇجدانعا يە بولۋعا كومەكتەسكەننەن كەيىن، ول ۇلكەن جەڭىلدىك سەزىندى. ول بىلاي دەيدى: «سودان كەيىن ٶزىمدى كىنالى سەزىنبەيتىن بولدىم. كۇنا ەندى ارتتا قالدى. ەحوبا ايتپاقشى، ول جۇگىڭىزدى الىپ، سىزدەن الاستاتادى. ونى قايتا-قايتا ويلاي بەرۋدىڭ ەش قاجەتى جوق». كەزىندە باسساۋعالايتىن قالاعا كىرگەن قاشقىن كەك الۋشى كەلىپ، ٶزىن ٶلتىرىپ كەتە مە دەپ قورىقپايتىن. سول سياقتى، كۇنامىزدى كەشىرگەننەن كەيىن ەحوبا كۇنامىزدى قايتادان كوتەرىپ، سول ٷشىن ٴزابۇر 103:8—12 وقىڭىز).
ٴبىزدى جازالايدى دەپ قورقۋدىڭ ەش قاجەتى جوق (15، 16. يسانىڭ تولەم بەرگەنىن جانە باس ٴدىني قىزمەتكەر ەكەنىن بىلگەنىمىز قۇدايدىڭ مەيىرىمدىلىگىنە سەنىمىمىزدى قالاي نىعايتادى؟
15 شىنىندا دا، يسرايلدىكتەرگە قاراعاندا، ەحوبانىڭ مەيىرىمدىلىك تانىتاتىنىنا سەنىمدى بولۋعا بىزدە سەبەپ اناعۇرلىم كوپ. پاۋىل ەحوباعا كەمەلدى تۇردە مويىنسۇنا الماعانىنا كۇيىنىپ، «سورلى باسىم-اي!» دەپ جازعان سوڭ: «يەمىز يسا ٴماسىح ارقىلى مەنى قۇتقارىپ الاتىن قۇدايعا راحىمەت!»— دەپ داۋىستاعان (ريمدىكتەرگە 7:25). بۇل سوزدەر نەنى بىلدىرەدى؟ پاۋىل كۇناكار قالاۋلارمەن كۇرەسىپ ٴجۇردى جانە بۇرىن كۇنا جاسادى، دەسە دە ول بۇنىسىنا وكىندى. سوندىقتان يسانىڭ تولەم قۇرباندىعىنىڭ نەگىزىندە ەحوبا ونى كەشىرگەنىنە سەنىمدى بولدى. يسا تولەم بەرگەندىكتەن، ٴبىز تازا ار-ۇجدانعا جانە جانتىنىشتىعىنا يە بولا الامىز (ەۆرەيلەرگە 9:13، 14). باس ٴدىني قىزمەتكەر رەتىندە «يسا ٶزى ارقىلى قۇدايعا دۇعا ەتەتىندەردى تولىعىمەن قۇتقارا الادى. ول ٵردايىم ٴتىرى بولعاندىقتان، ولار ٷشىن ٶتىنىش جاسايدى» (ەۆرەيلەرگە 7:24، 25). ەجەلدە باس ٴدىني قىزمەتكەردىڭ ارقاسىندا يسرايلدىكتەر ەحوبانىڭ كەشىرىمىنە يە بولعانىنا كوز جەتكىزە العان. ال ٴبىزدىڭ باس ٴدىني قىزمەتكەرىمىز يسا بولعاندىقتان، ەحوبانىڭ «مەيىرىمدىلىگى مەن راقىمىنا يە بولا» الاتىنىمىزعا بىزدە سەبەپ كوبىرەك (ەۆرەيلەرگە 4:15، 16).
16 ولاي بولسا، ەحوبانى پانالاۋ ٷشىن، ٴبىز يسانىڭ قۇرباندىعىنا سەنۋىمىز قاجەت. تولەم تەك جالپى ادامزاتقا قاتىستى دەپ ويلاماڭىز. ونىڭ يگىلىگىن جەكە ٴسىز كورە الاتىنىڭىزعا سەنىڭىز (عالاتتىقتارعا 2:20، 21). تولەم قۇرباندىعىنىڭ ارقاسىندا ەحوبا ٴسىزدىڭ كۇنالارىڭىزدى كەشىرەتىنىنە سەنىڭىز. تولەم سىزگە ماڭگىلىك ٶمىر سۇرۋگە ٷمىت بەرگەنىنە سەنىمدى بولىڭىز. يسانىڭ قۇرباندىعى — ەحوبانىڭ سىزگە جاساعان سىيى.
17. نەگە ٴسىز ەحوبانى پانالاعىڭىز كەلەدى؟
17 باسساۋعالايتىن قالالار ەحوبانىڭ مەيىرىمدىلىگىن جاقسىراق تۇسىنۋگە كومەكتەسەدى. قۇدايدىڭ بۇل شاراسى بىزگە ٶمىردىڭ قاسيەتتى ەكەنىن ۇيرەتەدى. سونداي-اق بۇل شارا اقساقالداردىڭ بىزگە قالاي كومەكتەسە الاتىنىن، شىنايى وكىنۋدىڭ نەنى بىلدىرەتىنىن جانە ەحوبانىڭ ٴبىزدى كەشىرەتىنىنە نەگە تولىقتاي سەنىمدى بولا الاتىنىمىزدى اشادى. ٴسىز ەحوبانى پانالايسىز با؟ دۇنيەدە ودان اسقان قاۋىپسىز جەر جوق! (ٴزابۇر 91:1، 2). كەلەسى ماقالادا قالاي باسساۋعالايتىن قالالار ادىلدىك پەن مەيىرىمدىلىكتىڭ اسقاق ۇلگىسى ەحوباعا ەلىكتەۋگە كومەكتەسەتىنىن بىلەمىز.
^ 10-ابزاس ياھۋدي زەرتتەۋشىلەردىڭ ايتۋىنشا، قاشقىننىڭ وتباسى دا ونىمەن بىرگە تۇرۋ ٷشىن، سول باسساۋعالايتىن قالاعا كوشىپ كەلەتىن بولعانعا ۇقسايدى.