ەش نارسە ٴبىزدى سىيىمىزدان ايىرىپ جۇرمەسىن
«ەشكىم سەندەردى سىيلارىڭنان ايىرىپ جۇرمەسىن» (قولوستىقتارعا 2:18).
اندەر: 32، 134
1، 2. ا) قۇدايدىڭ قىزمەتشىلەرى قانداي سىيدى اسىعا كۇتەدى؟ ٵ) سىيعا كوز تىگۋگە نە جاردەمدەسەدى؟ (ماقالانىڭ باسىنداعى سۋرەتتى قاراڭىز.)
مايلانعان ماسىحشىلەردىڭ اسىل ٷمىتى بار. ولار كوكتەگى ومىرگە اسىق. ەلشى پاۋىل وسى ٷمىتتى «قۇدايدىڭ سىيى» دەپ اتاعان (فىلىپىلىكتەرگە 3:14). كوكتە ولار ٴماسىح پاتشالىعىندا يسامەن بىرگە بيلىك ەتىپ، ادامدارعا كەمەلدىلىككە جەتۋگە كومەكتەسەدى (ايان 20:6). بۇل — كەرەمەت ٷمىت! باسقا قويلار بولسا وزگە سىيدى كۇتەدى. ولار جەر بەتىندەگى جۇماقتا ماڭگى ٶمىر سۇرۋگە ۇمىتتەنەدى ٵرى بۇل ۇمىتتەرىنە قاتتى قۋانادى! (پەتىردىڭ 2-حاتى 3:13).
2 پاۋىل ٶز زامانىنداعى مايلانعان باۋىرلاستارى ادال بولىپ، سىيدى السا ەكەن دەدى. سول ٷشىن ولارعا: «كوكتەگى نارسەلەردى ويلاڭدار»،— دەدى (قولوستىقتارعا 3:2). ٴيا، ولار كوكپەن بايلانىستى اسىل ۇمىتتەرىنە بار نازارىن اۋدارۋ كەرەك ەدى (قولوستىقتارعا 1:4، 5). ەحوبانىڭ باتالارى جايلى ويلانعانى قۇدايدىڭ بارلىق قىزمەتشىلەرىنە، مەيلى ولار كوكتە نە جەردە ٶمىر سۇرۋگە ۇمىتتەنسىن، الاتىن سىيلارىنا كوز تىگۋگە جاردەمدەسەدى (قورىنتتىقتارعا 1-حات 9:24).
3. پاۋىل باۋىرلاستارعا نە جايلى ەسكەرتتى؟
3 سونىمەن قاتار پاۋىل باۋىرلاستارعا سىيعا قاۋىپ توندىرەتىن جايتتار تۋرالى دا ەسكەرتتى. مىسالى، قولوستىقتارعا ارناعان حاتىندا ول ماسىحكە سەنۋ ارقىلى ەمەس، مۇسا زاڭىن ۇستانۋ ارقىلى قۇدايعا ۇنايمىز دەپ ويلاعان جالعان ماسىحشىلەر جايلى جازعان (قولوستىقتارعا 2:16—18). سونداي-اق ول ٵلى كۇنگە دەيىن بار قاۋىپ-قاتەردى ٴسوز ەتىپ، ولار ٴبىزدى سىيىمىزدان ايىرۋى مۇمكىن ەكەنىن ايتقان. ونىڭ ىشىندە ازعىن قالاۋلارمەن قالاي كۇرەسۋ كەرەكتىگىن، ٷي ىشىمىزدە نە قاۋىمداعى باۋىرلاستارمەن قيىندىقتار تۋىنداعاندا نە ىستەۋ كەرەكتىگىن تۇسىندىرگەن. پاۋىلدىڭ بەرگەن قۇندى كەڭەستەرى ٴبىز ٷشىن دە پايدالى. سوندىقتان ونىڭ قولوستىقتارعا سۇيىسپەنشىلىكپەن بەرگەن كەي ەسكەرتۋلەرىن قاراستىرىپ وتەلىك.
ازعىن قالاۋلاردى ٶلتىرۋ
4. نەگە ازعىن قالاۋلار ٴبىزدى سىيىمىزدان ايىرۋى مۇمكىن؟
4 پاۋىل باۋىرلاستارىنىڭ ەسىنە تاماشا ۇمىتتەرىن سالعان سوڭ، بىلاي دەپ جازدى: «سوندىقتان توپىراقتان جارالعان دەنە مۇشەلەرىڭنەن تۋىندايتىن ازعىندىق، ارام ىستەر، ٴناپسىقۇمارلىق، زياندى قۇمارلىق جانە... اشكوزدىك سياقتى بەيىمدىلىكتەرىڭدى ولتىرىڭدەر» (قولوستىقتارعا 3:5). ازعىن قالاۋلارىمىز وتە كۇشتى بولۋى مۇمكىن جانە ونىڭ كەسىرىنەن ەحوبامەن قارىم-قاتىناسىمىز بۇزىلىپ، بولاشاققا دەگەن ۇمىتىمىزدەن ايىرىلىپ قالۋىمىز دا عاجاپ ەمەس. ونەگەسىز قالاۋلارىنا بوي الدىرعان، ٴبىراق كەيىننەن قاۋىمعا قايتىپ ورالعان ٴبىر ەر باۋىرلاس ايتقانداي، بۇل قالاۋلار ونىڭ بويىن بيلەپ العانى سونشا، ول «تىم كەش بولعانشا، سونىڭ جەتەگىندە جۇرە بەرگەن».
5. قاۋىپتى جاعدايلاردا ٶزىمىزدى قالاي قورعاي الامىز؟
5 ەحوبانىڭ ونەگەلىك تالاپتارىنان تايىپ كەتۋىمىز مۇمكىن جاعدايدا بولساق، ساق بولۋ اسىرەسە ماڭىزدى. مىسالى، كەزدەسىپ جۇرگەن جۇپتار اۋەل باستان كيەلى كىتاپتىڭ قول ۇستاسۋ، ٴسۇيىسۋ مەن وڭاشادا قالۋعا قاتىستى تالىمدەرىن قالاي قولداناتىنىن تالقىلاپ العاندارى ٴجون بولادى (ناقىل سوزدەر 22:3). يا بولماسا ٸس ساپارمەن جۇرگەندە نە قارسى جىنىستى اداممەن جۇمىس ىستەگەندە قاۋىپتى جاعدايلار تۋۋى مۇمكىن (ناقىل سوزدەر 2:10—12، 16). وسىنداي جاعدايلاردا ٴسىز ٶزىڭىزدى قالاي قورعاي الاسىز؟ ەحوبا كۋاگەرى ەكەنىڭىزدى ايتىڭىز. ٴجۇرىس-تۇرىسىڭىز ونەگەلى بولسىن ٵرى قىلىمسۋ مەن قىرىنداۋدىڭ قۇردىمعا اكەلەتىنىن ەشقاشان ۇمىتپاڭىز. مۇڭايعان نە جالعىزسىراعان كەزدەرى دە وتە اباي بولۋىمىز كەرەك. سوندايدا بىرەۋدىڭ كوڭىل ٴبولىپ، ٴبىزدى باعالايتىنىن سەزىنگىمىز كەلەتىن شىعار. كۇدەرىمىز ۇزىلگەنى سونشا، بىزگە كوڭىل بىلدىرگەن كەز كەلگەن ادامنىڭ ىعىنا كونىپ كەتۋىمىز مۇمكىن. بۇل قاۋىپتى جاعداي. وسىنداي سەزىمدەر بويىڭىزدا پايدا بولسا، سىيىڭىزدان ايىراتىن ەشقانداي ارەكەتكە بارماڭىز. ەحوبا مەن باۋىرلاستارىڭىزدىڭ كومەگىنە جۇگىنىڭىز (ٴزابۇر 34:18؛ ناقىل سوزدەر 13:20 وقىڭىز).
6. كوڭىل كوتەرۋ ٴتۇرىن تاڭداعاندا نەنى ەستە ۇستاۋىمىز قاجەت؟
6 ازعىن قالاۋلاردى ٶلتىرۋ ٷشىن، بىزگە ونەگەسىز كوڭىل كوتەرۋ تۇرلەرىنەن اۋلاق بولۋ كەرەك. بۇگىندەگى كوڭىل كوتەرۋ تۇرلەرىنىڭ باسىم بولىگى سودوم مەن عوموراداعى جاعدايدى ەسكە سالادى (ياھۋدا 7). ويىن-ساۋىق تۇرلەرىن شىعارۋشىلار جىنىستىق ونەگەسىزدىكتى كادىمگى، ەش قاۋىپسىز جايت ەتىپ كورسەتەدى. دەمەك، بىزگە ٵرقاشان ساق ٴجۇرۋ كەرەك. ٴبىز وسى دۇنيە ۇسىناتىن كەز كەلگەن كوڭىل كوتەرۋ تۇرلەرىن قابىلداي بەرمەۋىمىز قاجەت. كەرىسىنشە، سىيىمىزدان ايىرمايتىن ويىن-ساۋىق تۇرلەرىن تاڭداعانىمىز ابزال (ناقىل سوزدەر 4:23).
سۇيىسپەنشىلىك پەن مەيىرىمدىلىككە بولەنەيىك
7. ماسىحشىلىك قاۋىمدا قانداي قيىندىقتار تۋىنداۋى مۇمكىن؟
7 ماسىحشىلىك قاۋىمنىڭ مۇشەسى بولعانىمىزعا ٴبىز وتە قۋانىشتىمىز. ٴبىز قاۋىم كەزدەسۋلەرىندە قۇداي ٴسوزىن زەرتتەيمىز جانە ٴبىر-ٴبىرىمىزدى سۇيىسپەنشىلىكپەن دەمەپ-قولدايمىز. بۇلاي ەتكەنىمىز سىيعا بار نازارىمىزدى اۋدارۋعا كومەكتەسەدى. دەگەنمەن كەيدە باۋىرلاستار اراسىندا تۇسىنىسپەۋشىلىكتىڭ سالدارىنان قيىندىق بولىپ تۇرادى. مۇنداي قيىندىقتاردى شەشىپ الماساق، ارتىنان اشۋ-ىزاعا بەرىلۋىمىز وپ-وڭاي (پەتىردىڭ 1-حاتى 3:8، 9 وقىڭىز).
8، 9. ا) سىيىمىزدى الۋعا قانداي قاسيەتتەر كومەكتەسەدى؟ ٵ) باۋىرلاسىمىز ٴبىزدى رەنجىتىپ قويسا، تاتۋلىق ساقتاۋعا نە كومەكتەسەدى؟
8 اشۋ-ىزانىڭ ٴبىزدى سىيىمىزدان ايىرۋىنا جول بەرمەۋىمىز كەرەك. ماسىحشىلەر نە ىستەۋ كەرەكتىگىن ايتىپ پاۋىل بىلاي دەگەن: «قۇداي تاڭداعان، قاسيەتتى دە سۇيىكتى ادامدار رەتىندە جاناشىرلىق، مەيىرىمدىلىك، كىشىپەيىلدىلىك، جۇمساقتىق، شىدامدىلىق سياقتى قاسيەتتەرگە بولەنىڭدەر. ەگەر الدەكىمنىڭ بىرەۋگە رەنجۋگە سەبەبى بولسا دا، ٶزارا ٴتوزىمدى بولىپ، ٴبىر-ٴبىرىڭدى كەڭپەيىلمەن كەشىرىڭدەر. ەحوبانىڭ وزدەرىڭدى كەڭپەيىلمەن كەشىرگەنىندەي، سەندەر دە سولاي ەتىڭدەر. بۇعان قوسا، سۇيىسپەنشىلىككە بولەنىڭدەر، ويتكەنى ول ادامداردى تولىقتاي بىرىكتىرەدى» (قولوستىقتارعا 3:12—14).
9 سۇيىسپەنشىلىك پەن مەيىرىمدىلىك وزگەلەردى كەشىرۋگە كومەكتەسەدى. بىرەۋدىڭ ٴسوزى نە ٸسى جانىمىزعا باتسا، ٶزىمىزدىڭ دە باسقالاردى سوزىمىزبەن نە ارەكەتىمىزبەن جارالاعانىمىزدى ٵرى ولاردىڭ ٴبىزدى كەشىرگەنىن ەسكە الساق بولادى. سول كەزدە ولاردىڭ سۇيىسپەنشىلىگى مەن مەيىرىمدىلىگىنە وتە ريزا بولعانىمىز ٴسوزسىز! (ۋاعىزداۋشى 7:21، 22 وقىڭىز). ٴماسىح شىنايى عيبادات ەتەتىندەردى مەيىرىمدىلىكپەن بىرىكتىرگەنىنە ريزاشىلىعىمىز شەكسىز (قولوستىقتارعا 3:15). ٴبارىمىز ٴبىر قۇدايدى جاقسى كورەمىز، ٴبىر حاباردى ۋاعىزدايمىز، كورىپ جۇرگەن كوپ قيىندىعىمىز دا بىردەي. ٴبىر-ٴبىرىمىزدى ٴسۇيىپ، مەيىرىمدى بولساق، كەشىرە بىلسەك، قاۋىمىمىزدىڭ بىرلىگى نىعايا تۇسەدى ٵرى سىيىمىزدان دا كوز جازبايمىز.
10، 11. ا) قىزعانىش نەگە قاۋىپتى؟ ٵ) قىزعانىش سىيىمىزدان ايىرىپ جۇرمەۋى ٷشىن نە ىستەۋىمىز كەرەك؟
10 قىزعانىش سىيدى الۋىمىزعا كەدەرگى جاساۋى مۇمكىن. كيەلى كىتاپتاعى مىسالداردان قىزعانىشتىڭ قانشالىقتى قاۋىپتى ەكەنىن بىلەمىز. مىسالى، قابىل ٵبىلدى ٸشتارلىقتان ٶلتىرىپ تاستادى. قوراح، داتان، ٵبيرام ۇشەۋى مۇسانى كورە الماي، وعان قارسى باس كوتەردى. ساۋل پاتشا داۋىتكە قىزعانىشپەن قاراپ، ولتىرگىسى كەلدى. قۇداي سوزىندەگى مىنا سوزدەر وتە راس ايتىلعان: «قىزعانىش پەن جانجالقۇمارلىق بار جەردە تارتىپسىزدىك پەن جاماندىق اتاۋلىنىڭ ٴبارى دە بولادى» (جاقىپ 3:16).
11 شىنايى سۇيىسپەنشىلىك پەن مەيىرىمدىلىككە بولەنۋگە بارىنشا كۇش سالساق، قىزعانىشقا وڭايلىقپەن بوي بەرمەيتىن بولامىز. كيەلى كىتاپتا: «سۇيىسپەنشىلىك شىدامدى دا مەيىرىمدى؛ سۇيىسپەنشىلىك قىزعانبايدى»،— دەلىنگەن (قورىنتتىقتارعا 1-حات 13:4). قىزعانىش بولمىسىمىزدىڭ ٴبىر قىرىنا اينالماۋى ٷشىن كەز كەلگەن ماسەلەدە ەحوبانىكىندەي كوزقاراستى ۇستانۋعا تىرىسۋىمىز كەرەك. باۋىرلاستارىمىزعا قاۋىمنىڭ، ياعني ٴبىر دەنەنىڭ مۇشەلەرى رەتىندە قاراۋعا ٴتيىسپىز. كيەلى كىتاپتا بىلاي دەلىنگەن: «ٴبىر مۇشە دارىپتەلسە، ونىمەن بىرگە ٴبارى قۋانادى» (قورىنتتىقتارعا 1-حات 12:16—18، 26). باۋىرلاسىمىز ٴبىر قۋانىشقا جەتىپ جاتسا، ٴبىز وعان قىزعانىشپەن قارامايمىز، قايتا، قۋانىشىنا ورتاقتاسامىز. ساۋل پاتشانىڭ ۇلى جوناتان كەرەمەت ۇلگى قالدىرعان. پاتشا بولۋعا ٶزى ەمەس، ٴداۋىت تاڭدالعان كەزدە ول قىزعانبادى. ول ٴتىپتى ٴداۋىتتى جىگەرلەندىرىپ، قولداۋ كورسەتتى (سامۋيلدىڭ 1-جازباسى 23:16—18). ٴبىز دە جوناتان سياقتى بولىپ، مەيىرىمدىلىك پەن سۇيىسپەنشىلىك كورسەتە الامىز با؟
سىيعا وتباسىمىزبەن يە بولايىق
12. كيەلى كىتاپتاعى قانداي كەڭەس ٴسىزدىڭ وتباسىڭىزعا سىيدى الۋعا كومەكتەسەدى؟
12 وتباسىمىزدىڭ ٵربىر مۇشەسى كيەلى كىتاپ پرينسيپتەرىن ۇستانسا، ٷي ٸشىمىز تاتۋ-ٴتاتتى تۇرىپ، باقىتتى بولادى ٵرى الداعى سىيعا يە بولادى. پاۋىل وتباسىلارىنا مىنا ٴبىر كەرەمەت كەڭەستى بەرگەن: «ايەلدەر، يەمىزبەن بايلانىستاعى سەندەر كۇيەۋلەرىڭە باعىنىڭدار. كۇيەۋلەر، ٵردايىم ايەلدەرىڭدى سۇيىڭدەر، ولارعا كارلەرىڭدى توكپەڭدەر. بالالار، ٵردايىم اتا-انالارىڭا مويىنسۇنىڭدار، ويتكەنى بۇل يەمىزگە ۇنايدى. اكەلەر، بالالارىڭنىڭ كوڭىلى تۇسپەۋى ٷشىن، ولاردى ىزالاندىرماڭدار» (قولوستىقتارعا 3:18—21). قالاي ويلايسىز، ٴسىزدىڭ وتباسىڭىز بۇل كەڭەستىڭ قانداي پايداسىن كورە الادى؟
13. ايەل باۋىرلاس سەنبەيتىن كۇيەۋىنىڭ ەحوباعا قىزمەت ەتۋگە دەگەن ىقىلاسىن قالاي وياتا الادى؟
13 قىمباتتى ايەل باۋىرلاس، بالكىم، ٴسىزدىڭ كۇيەۋىڭىز ەحوباعا قىزمەت ەتپەيتىن بولار. ەگەر جۇبايىڭىز سىزگە جۇمساقتىق پەن قۇرمەت تانىتپاسا، نە ىستەيسىز؟ اشۋعا بەرىلىپ، ۇرىس شىعارساڭىز، جاعداي وڭالا ما؟ دەگەنىڭىزگە قول جەتكىزسەڭىز دە، مۇنىمەن كۇيەۋىڭىزدىڭ ەحوباعا قىزمەت ەتۋگە دەگەن ىقىلاسىن وياتاسىز با؟ ٴسىرا، وياتپاسسىز. ال ەگەر كۇيەۋىڭىزگە وتاعاسى رەتىندە قۇرمەت كورسەتسەڭىز، وتباسىڭىزدىڭ ۇيىعان ايرانداي بولۋىنا ۇلەس قوساسىز ٵرى ەحوبانى داڭقتايسىز. ٴسىزدىڭ ۇلگىڭىز كۇيەۋىڭىزدىڭ بويىندا ەحوباعا قىزمەت ەتۋگە دەگەن ىقىلاس وياتىپ، ناتيجەسىندە ەكەۋىڭىز دە سىيعا يە بولا الاسىزدار (پەتىردىڭ 1-حاتى 3:1، 2 وقىڭىز).
14. سەنبەيتىن ايەلى قۇرمەتتەمەيتىن بولسا، ەر باۋىرلاس نە ىستەۋى كەرەك؟
14 قىمباتتى ەر باۋىرلاس، بالكىم، ٴسىزدىڭ ايەلىڭىز ەحوباعا قىزمەت ەتپەيتىن شىعار. ەگەر ول ٴسىزدى قۇرمەتتەمەيدى دەپ ويلاساڭىز، نە ىستەيسىز؟ ايەلىڭىزگە ايقاي سالىپ، ۇيدە كىم قوجايىن ەكەنىن كورسەتسەڭىز، ول ٴسىزدى قۇرمەتتەيتىن بولا ما؟ ارينە، جوق! قۇداي سىزدەن يساعا ەلىكتەپ، ٴسۇيۋشى كۇيەۋ بولادى دەپ كۇتەدى (ەفەستىكتەرگە 5:23). قاۋىمنىڭ باسى يسا ٵرقاشان شىدامدىلىق پەن سۇيىسپەنشىلىك تانىتادى (لۇقا 9:46—48). ٴسىز يساعا ەلىكتەسەڭىز، ۋاقىت وتە كەلە جارىڭىز دا ەحوباعا قىزمەت ەتۋگە ىقىلاس ٴبىلدىرۋى مۇمكىن.
15. ٴماسىحشى كۇيەۋ ايەلىن سۇيەتىنىن وعان قالاي كورسەتەدى؟
15 ەحوبا كۇيەۋلەرگە مىناداي باسشىلىق بەرگەن: «ٵردايىم ايەلدەرىڭدى سۇيىڭدەر، ولارعا كارلەرىڭدى توكپەڭدەر» (قولوستىقتارعا 3:19). سۇيىسپەنشىلىگى مول كۇيەۋ ايەلىنە قۇرمەت كورسەتەدى. قالاي؟ ول ونىڭ وي-پىكىرىمەن ساناسادى جانە ايەلىنىڭ نە دەيتىنى ول ٷشىن ماڭىزدى ەكەنىن كورسەتەدى (پەتىردىڭ 1-حاتى 3:7). ونىڭ بارلىق ٶتىنىشىن ورىنداي الماسا دا، ايەلىن قۇلاق قويىپ تىڭداعانىنىڭ ارقاسىندا ول الدەقايدا دۇرىس شەشىمدەر قابىلداي الادى (ناقىل سوزدەر 15:22). ٴسۇيۋشى كۇيەۋ ايەلىنەن قۇرمەت كورسەتۋدى كۇشتەپ تالاپ ەتپەيدى. كەرىسىنشە، ونىڭ قۇرمەتىنە بولەنۋدىڭ جولىن ىزدەيدى. وتاعاسى ايەلى مەن بالالارىن سۇيسە، ولار باقىتتى بولىپ، ەحوباعا قىزمەت ەتۋى ٵرى ٶمىر سىيىنا يە بولۋى ابدەن مۇمكىن.
وتباسىلىق قيىندىقتار سىيىمىزدان ايىرىپ جۇرمەۋى ٷشىن نە ىستەسەك بولادى؟ (13—15 ابزاستاردى قاراڭىز)
جاستار، سىيدى الۋلارىڭا ەشتەڭە كەدەرگى بولماسىن!
16، 17. جاستىق شاعىڭدا اتا-اناڭا قاتتى رەنجىمەۋگە نە كومەكتەسەدى؟
16 قىمباتتى جاس ٶسپىرىم، بالكىم، اتا-اناڭ سەنى تۇسىنبەيتىندەي نە تىم قاتال كورىنەتىن شىعار. بۇعان قاتتى رەنجىپ، ٴتىپتى ەحوباعا قىزمەت ەتكىڭ كەلمەي قالۋى دا مۇمكىن. ٴبىراق ەحوبانى تاستاپ كەتسەڭ، مىنا الەمدە سەنى ٴماسىحشى اتا-اناڭ مەن قاۋىمداعى دوستارىڭ سياقتى ەشكىم جاقسى كورمەيتىنىن تۇسىنەسىڭ.
17 ويلانىپ كورشى، ەگەر اتا-اناڭ سەنى ەش تۇزەتپەيتىن بولسا، ولار سەنىڭ قامىڭدى ويلايدى دەۋگە بولار ما ەدى؟ (ەۆرەيلەرگە 12:8). ارينە، اتا-اناڭ كەمەلسىز بولعاندىقتان، ولاردىڭ سەنى قالاي تۇزەتەتىنىنە قاپا بولاتىن شىعارسىڭ. ٴبىراق وعان قادالىپ قالما. ولاردىڭ ايتقان سوزدەرى مەن ىستەرىنە قانداي سەبەپتەر تۇرتكى بولعانىن تۇسىنۋگە تىرىس. بۇلقان-تالقان بولماي، سابىر ساقتا. قۇداي سوزىندە: «ٴبىلىمدى بايىپپەن سويلەر، پارىقتى سابىر ساقتار»،— دەلىنگەن (ناقىل سوزدەر 17:27). كەڭەس قالاي بەرىلگەنىنە قاراماستان، ونى قابىلداپ، ساباق الا بىلەتىن تولىسقان ادام بولۋعا ماقسات قوي (ناقىل سوزدەر 1:8). ەحوبانى سۇيەتىن اتا-اناڭنىڭ بارى تەڭدەسسىز سىي ەكەنىن ەش ۇمىتپاعايسىڭ. ولار سەنىڭ ماڭگى ٶمىر سىيىن الۋىڭ ٷشىن كومەگىن ايامايدى.
18. نە سەبەپتى الداعى سىيعا كوز تىگۋگە بەكىندىڭىز؟
18 ٷمىتىمىز كوكتەگى يا جەردەگى ماڭگى ٶمىر بولسىن، ٴبارىمىز دە جارقىن بولاشاققا كوز تىگەمىز. بۇل — شىنايى ٷمىت. ول الەمنىڭ جاراتۋشىسىنىڭ بەرگەن ۋادەسىنە نەگىزدەلگەن. جۇماقتاعى ٶمىر جايلى قۇداي: «جەر بەتى ەحوبا تۋرالى بىلىمگە تولادى»،— دەگەن (يشايا 11:9). جاقىندا جەردىڭ ٵربىر تۇرعىنى قۇدايدىڭ ٴتالىمىن الادى. وسى سىيعا بارىنشا كۇش سالعانىمىز تۇرارلىق ٸس ەمەس پە؟! سوندىقتان ەحوبانىڭ سىزگە بەرگەن ۋادەسىن ەشقاشان ەستەن شىعارماڭىز جانە ەشتەڭەنىڭ ٴسىزدى سىيدان ايىرۋىنا جول بەرمەڭىز!
