«شىندىقتى ساتىپ ال، ەشقاشان ساتپا ونى»
«شىندىقتى ساتىپ ال، ەشقاشان ساتپا ونى، دانالىقتى، تاربيە مەن تۇسىنىكتى دە» (ناقىل سوزدەر 23:23).
اندەر: 94، 96
1، 2. ا) ٴسىز ٷشىن ومىردەگى ەڭ باعالى نارسە نە؟ ٵ) ٴسىز قانداي شىندىقتاردى باعالايسىز جانە نەگە؟ (ماقالانىڭ باسىنداعى سۋرەتتەردى قاراڭىز.)
ٴسىز ٷشىن ومىردەگى ەڭ باعالى نارسە نە؟ ەحوبانىڭ قىزمەتشىسى بولعاندىقتان، ٴبىز ونىمەن اراقاتىناسىمىزدى بارىنەن دە جوعارى باعالايمىز. ونى ەش نارسەگە ايىرباستامايمىز. سونىمەن قاتار كيەلى كىتاپتاعى شىندىقتى باعالايمىز. ويتكەنى سونىڭ ارقاسىندا ەحوبامەن دوس بولا الامىز (قولوستىقتارعا 1:9، 10).
2 ەحوبا ٴبىزدىڭ ۇلى تالىمگەرىمىز. ول بىزگە ٶز ٴسوزى كيەلى كىتاپتاعى قۇندى شىندىقتاردى ۇيرەتەدى. ول ٶز ەسىمىنىڭ ماڭىزدىلىعىن ٴتۇسىندىرىپ، بويىنداعى كەرەمەت قاسيەتتەرىن اشتى. ٴبىز ەحوبانىڭ ادامزاتتى قاتتى جاقسى كورگەندىكتەن، ٶز ۇلىن قۇربان ەتكەنىن بىلدىك. بۇعان قوسا، ٴماسىحتىڭ پاتشالىعى تۋرالى دا ەستىدىك. بۇل بولاشاعىمىزعا زور ٷمىت سيلادى. مىسالى، مايلانعاندار كوكتە ٶمىر سۇرۋگە ۇمىتتەنسە، «باسقا قويلار» جەر بەتىندەگى جۇماقتا ٶمىر سۇرۋگە ۇمىتتەنەدى (جوحان 10:16). ەحوبا بىزگە قالاي ٶمىر ٴسۇرۋ كەرەكتىگىن ۇيرەتۋدە. بۇل شىندىقتار تەڭدەسسىز قازىنا ىسپەتتى. ويتكەنى سولار ارقىلى ٴبىز جاراتۋشىمىزعا جاقىنداي تۇسەمىز، ٵرى ٶمىرىمىز ٴمان-ماعىناعا تولادى.
3. ەحوبا شىندىقتى ۇيرەتكەنى ٷشىن بىزدەن اقشا تالاپ ەتە مە؟
3 ەحوبا — جومارت قۇداي. ول ٴبىز ٷشىن ٴتىپتى ٶز ۇلىن قۇربان ەتتى. ەحوبا بىرەۋدىڭ شىندىقتى ىزدەپ جاتقانىن بايقاسا، ونى تاۋىپ الۋىنا كومەكتەسەدى. ول ەشقاشان بىزدەن شىندىقتى ۇيرەتكەنى ٷشىن اقى سۇرامايدى. بىردە شيمون ەسىمدى ٴبىر كىسى باسقالاردى كيەلى رۋحقا كەنەلتە الاتىن بيلىك بەرسىن دەپ ەلشى پەتىرگە اقشا ۇسىنادى. پەتىر شيموننىڭ كوزقاراسى دۇرىس ەمەس ەكەنىن ايتىپ، بىلاي دەيدى: «قۇدايدىڭ سيىن اقشاعا ساتىپ الامىن دەپ ويلاعانىڭ ٷشىن اقشاڭ وزىڭمەن بىرگە قۇرىپ كەتسىن!» (ەلشىلەردىڭ ىستەرى 8:18—20). سونىمەن، «شىندىقتى ساتىپ الۋ» دەگەنىمىز نە؟
«شىندىقتى ساتىپ الۋ» دەگەن نەنى بىلدىرەدى؟
4. بۇل ماقالادا ٴبىز شىندىق تۋرالى نە بىلەمىز؟
4 ناقىل سوزدەر 23:23 وقىڭىز. كيەلى كىتاپتاعى شىندىقتاردى ۇيرەنۋ ٷشىن كۇش سالۋ قاجەت. بۇل ٷشىن وزگە نارسەلەردەن باس تارتۋىمىز كەرەك. ٴبىز شىندىقتى بىلگەندە، ونى بىلايشا ايتقاندا، «ساتىپ الدىق». ەندى ونى «ساتىپ جىبەرۋدەن»، ياعني شىندىقتى تاستاپ كەتۋدەن اۋلاق بولۋىمىز كەرەك. كيەلى كىتاپتاعى شىندىقتاردى قالاي «ساتىپ الامىز»؟ ولاردىڭ باعاسى قانشا؟ وسى سۇراقتاردىڭ جاۋابىن العانىمىز شىندىقتى ودان بەتەر باعالاي تۇسۋگە جانە ونى ەشقاشان تاستاپ كەتپەۋگە دەگەن شەشىمىمىزدى ودان سايىن بەرىك ەتەدى. سونداي-اق بۇل ەحوبانىڭ اشقان شىندىعى كەز كەلگەن نارسەدەن الدەقايدا قىمبات ەكەنىن تۇسىنۋگە كومەكتەسەدى.
5، 6. ا) شىندىقتى قالايشا تەگىن ساتىپ الۋىمىزعا بولادى؟ ٴتۇسىندىرىڭىز. ٵ) شىندىقتىڭ بىزگە قانداي پايداسى بار؟
5 ٴبىر نارسە تەگىن بەرىلسە، بۇل ونىڭ قۇنى جوق ەكەنىن بىلدىرمەيدى. ناقىل سوزدەر 23:23 تەگى «ساتىپ الۋ» دەپ اۋدارىلعان ەۆرەي ٴسوزى «يەمدەنۋ» دەگەن ماعىنانى دا بەرەدى. وسى ەكى ٴسوز دە ادام ٶزى باعالى دەپ سانايتىن نارسەنى الۋ ٷشىن كۇش سالاتىنىن نەمەسە سول ٷشىن وزگە ٴبىر نارسەدەن باس تارتاتىنىن كورسەتەدى. شىندىقتى قالاي ساتىپ الۋعا بولاتىنىن ٴتۇسىنۋ ٷشىن، ٴبىر دۇكەندە بانان تەگىن بەرىلىپ جاتقانىن ەلەستەتىپ كورەيىك. سول بانان داستارقانعا وزدىگىنەن كەلە قالادى دەپ ويلاۋ قيسىندى ما؟ ارينە، جوق. ٴبىز دۇكەنگە ٶزىمىز بارىپ، ونى الىپ كەلۋىمىز كەرەك. بانان تەگىن بولعانمەن، ونى الۋ ٷشىن كۇش سالۋىمىز كەرەك. سول سياقتى، شىندىقتى ٴبىلۋ ٷشىن بىزگە اقشانىڭ قاجەتى جوق، ٴبىراق بۇل ٴبىزدىڭ تاراپىمىزدان كۇش پەن قۇرباندىقتى تالاپ ەتەدى.
6 يشايا 55:1—3 وقىڭىز. ەحوبانىڭ بۇل سوزدەرى «شىندىقتى ساتىپ الۋ» دەگەن نەنى بىلدىرەتىنىن تۇسىنۋگە كومەكتەسەدى. ول ٶز سوزىندەگى شىندىقتى سۋعا، سۇتكە جانە شاراپقا تەڭەگەن. سالقىن سۋ شولىركەگەن ادامدى سەرگىتەتىندەي، قۇداي سوزىندەگى شىندىق تا ٴبىزدى سولاي سەرگىتەدى. ٴسۇت سابيگە مىقتى بولىپ وسۋگە كومەكتەسەدى. سول سەكىلدى كيەلى كىتاپتاعى شىندىق ەحوبامەن قارىم-قاتىناسىمىزدىڭ مىقتى بولۋىنا كومەكتەسەدى. سونىمەن قاتار ەحوبا شىندىق سوزدەرىن شاراپقا تەڭەگەن. نەگە؟ سەبەبى كيەلى كىتاپتا شاراپتىڭ ادام جۇرەگىن قۋانتاتىنى ايتىلعان (ٴزابۇر 104:15). سوندىقتان ەحوبا بىزگە «شاراپ ساتىپ ال» دەۋىمەن ومىردە ونىڭ باسشىلىعىنا جۇگىنسەك، باقىتتى بولاتىنىمىزدى ايتقىسى كەلەدى (ٴزابۇر 19:8). وسىنداي سالىستىرۋلار ارقىلى ەحوبا شىندىقتى بىلسەك جانە بىلگەندەرىمىزدى ومىردە قولدانساق، پايداسىن كورەتىنىمىزدى تۇسىندىرگىسى كەلەدى. ولاي بولسا، قازىر شىندىقتى قانداي بەس نارسەدەن «ساتىپ الۋعا» بولاتىنىن قاراستىرايىق.
شىندىقتى نەدەن «ساتىپ الىپ» جاتىرسىز؟
7، 8. ا) شىندىقتى ٴبىلۋ ٷشىن نەگە ۋاقىت قاجەت؟ ٵ) ٴبىر ستۋدەنت قانداي قۇرباندىقتارعا باردى جانە ونىڭ ناتيجەسى قانداي بولدى؟
7 ۋاقىت. كەيبىر ادامدار ٷشىن پاتشالىق جايلى ىزگى حاباردى تىڭداۋ، كيەلى كىتاپتى جانە وعان نەگىزدەلگەن ادەبيەتتەردى وقۋ، ەحوبا كۋاگەرلەرىمەن كيەلى كىتاپتى زەرتتەۋ، قاۋىم كەزدەسۋلەرىنە دايىندالۋ مەن ولارعا قاتىسۋعا ٴبىراز ۋاقىت قاجەت. مۇنى اسا ماڭىزدى ەمەس ىستەرگە جۇمسالاتىن ۋاقىتتىڭ ەسەسىنەن الۋ كەرەك (ەفەستىكتەرگە 5:15، 16 وقىڭىز). كيەلى كىتاپتاعى نەگىزگى شىندىقتاردى ۇيرەنۋ ٷشىن قانشا ۋاقىت قاجەت؟ بۇل ٵر ادامنىڭ جاعدايىنا بايلانىستى. ەحوبانىڭ دانالىعىن، جولدارى مەن ىستەرىن قانشا زەرتتەسەك تە، ەشقاشان تۇبىنە جەتە المايمىز (ريمدىكتەرگە 11:33). «كۇزەت مۇناراسىنىڭ» العاشقى سانىندا شىندىق «نازىك گۇلگە» تەڭەلگەن ەدى. وندا: «بىرەۋىن تاپقان سوڭ، ونى مىسە تۇتپاي، تاعى دا ىزدەستىرە بەرۋ قاجەت. تاپ سولاي، ٴبىز دە ٴبىر عانا شىندىقتى قاناعات تۇتىپ قويماي، رۋحاني قازىنامىزدى شىندىقتارعا بايىتا تۇسۋگە اسىق بولۋىمىز كەرەك»،— دەلىنگەن. سوندىقتان «ەحوبانى قانشالىقتى جاقسى تانىپ-ٴبىلدىم؟» دەپ ويلانىپ كورەيىك. ماڭگىلىك ومىردە دە ەحوبا تۋرالى ٴبىلىم ەشقاشان سارقىلمايدى. ال بۇگىن قولدا بار ۋاقىتىمىزدى پايدالانىپ، ەحوبا جايلى بارىنشا ٴبىلىم العانىمىز ماڭىزدى. وسىلاي ەتكەن ٴبىر باۋىرلاستىڭ مىسالىن قاراستىرايىق.
ٴبىز قولدا بار ۋاقىتىمىزدى پايدالانىپ، ەحوبا جايلى بارىنشا ٴبىلىم العانىمىز دۇرىس
8 ماريكو * ەسىمدى جاپونيالىق ٴبىر بويجەتكەن وقۋعا ٴتۇسۋ ٷشىن امەريكاعا كوشىپ بارادى. بىردە ونىڭ ۇيىنە ٴبىر ٸزاشار باۋىرلاسىمىز كەلىپ، ىزگى حابارمەن بولىسەدى. ماريكو ٶز ٴدىنى بار بولسا دا، كيەلى كىتاپتى زەرتتەۋ ساباعىن باستايدى. ۇيرەنىپ جاتقاندارى وعان قاتتى ۇناعاندىقتان، باۋىرلاسىمىزعا اپتاسىنا ەكى رەت زەرتتەگىسى كەلەتىنىن ايتادى. ماريكو وقۋى مەن جۇمىسىنان قولى بوساماسا دا، ۋاقىت تاۋىپ قاۋىم كەزدەسۋلەرىنە بارا باستايدى. ول شىندىق جايلى كوبىرەك ٴبىلۋ ٷشىن كوڭىل كوتەرۋگە از ۋاقىت جۇمسايتىن بولدى. وسىنداي قۇرباندىقتارعا بارعاننىڭ ارقاسىندا ماريكو ەحوباعا جاقىنداي ٴتۇستى. ٴسۇيتىپ، ٴبىر جىلعا جەتپەي شومىلدىرۋ راسىمىنەن ٶتتى. ال جارتى جىلدان كەيىن، ناقتىلايتىن بولساق، 2006-جىلى ٸزاشار بولدى. ول ٵلى دە سول قىزمەتىن اتقارىپ ٴجۇر.
9، 10. ا) شىندىقتى بىلگەنىمىز دۇنيە-مۇلىككە دەگەن ويىمىزدى قالاي وزگەرتەدى؟ ٵ) ٴبىر بويجەتكەن نەدەن باس تارتتى جانە ول شەشىمىنە وكىندى مە؟
9 دۇنيە-مۇلىك. شىندىققا تەرەڭ تامىر جايۋ ٷشىن بىزگە تابىسى جاقسى جۇمىستان نە تابىسقا جەتكىزەتىن ٴمانساپتان باس تارتۋ كەرەك بولاتىن شىعار. مىسالى، يسا بالىقشى بولعان پەتىر مەن ٵندىردى شاكىرتى بولۋعا شاقىرعاندا، ولار كاسىپتەرىن قالدىرعان (ماتاي 4:18—20). ارينە، شىندىقتى بىلگەنى ادامنىڭ مىندەتتى تۇردە جۇمىستان باس تارتۋى كەرەك دەگەندى بىلدىرمەيدى. ول ٶزىن جانە وتباسىن اسىراۋ ٷشىن جۇمىس ىستەۋ كەرەك (تىموتەگە 1-حات 5:8). الايدا شىندىقتى بىلگەننەن كەيىن ٴبىزدىڭ دۇنيە-مۇلىككە قاتىستى ويىمىز وزگەرەدى. ويتكەنى ٴبىز ومىردە نەنىڭ شىنىمەن ماڭىزدى ەكەنىن تۇسىنەمىز. يسا بىزگە: «وزدەرىڭە قازىنانى جەردە جيناۋدى دوعارىڭدار!.. قايتا، قازىنانى كوكتە جيناڭدار!»— دەگەن (ماتاي 6:19، 20). ماريا ەسىمدى بويجەتكەن يسانىڭ وسى سوزدەرىنە قۇلاق اسقان.
10 ماريا بالا كۇنىنەن گولف ويناعاندى جاقسى كورەتىن. جوعارى سىنىپتا وقىپ جۇرگەندە، ونىڭ گولفتاعى شەبەرلىگى ۇشتالا تۇسەدى. سوندىقتان ٴبىر ۋنيۆەرسيتەت وعان تەگىن وقۋدى ۇسىنادى. ماريانىڭ ومىرلىك ماقساتى كاسىبي گولف ويىنشىسى بولىپ، كوپ اقشا تابۋ ەدى. كەيىن ول كيەلى كىتاپتى زەرتتەي باستايدى. ماريا كيەلى كىتاپتان بىلگەندەرىن ۇناتىپ، ولاردى ومىرىندە قولدانادى. ول: «كوزقاراسىم مەن ٶمىرىم كيەلى كىتاپ تالاپتارىنا ساي بولعان سايىن، باقىتتى بولا ٴتۇستىم»،— دەپ ٴبولىستى. ماريا ەحوبامەن قارىم-قاتىناسىنا جانە سپورتقا بىردەي دەن قويا المايتىنىن ٴتۇسىندى (ماتاي 6:24). سوندىقتان ول ٶز ماقساتىنان باس تارتىپ، ودان دا جاقسى نارسەنى تاڭدادى. بۇگىندە ماريا — ٸزاشار. ول: «مەن باقىتتى دا ٴمان-ماعىناعا تولى ٶمىر كەشۋدەمىن»،— دەيدى.
شىندىق ٷشىن نەدەن باس تارتپايىق، يسا ونىڭ ورنى ەسەلەپ تولاتىنىن ۋادە ەتكەن
11. شىندىقتى بىلگەنىمىز وزگەلەرمەن قارىم-قاتىناسىمىزعا قالاي اسەر ەتۋى مۇمكىن؟
11 وزگەلەرمەن قارىم-قاتىناسىمىز. كيەلى كىتاپتان بىلگەندەرىمىزدى ٸس-جۇزىندە قولدانا باستاعاندا، تۋىستارىمىزبەن جانە دوستارىمىزبەن قارىم-قاتىناسىمىز وزگەرۋى مۇمكىن. يسا بۇنىڭ سەبەبىن ٴتۇسىندىرىپ كەتكەن. ول ٸزباسارلارى ٷشىن ايتقان دۇعاسىندا بىلاي دەگەن: «ولاردى شىندىعىڭ ارقىلى قاسيەتتى ەتە كور. سەنىڭ سوزىڭ — شىندىق» (جوحان 17:17). «قاسيەتتى ەتۋ» دەگەن ٴسوز «ٴبولىپ الۋ» دەگەندى دە ٴبىلدىرۋى مۇمكىن. ٴبىز شىندىقپەن ٶمىر سۇرە باستاعاندا، وسى دۇنيەدەن بولىنەمىز. ويتكەنى ٴبىز كيەلى كىتاپتا ايتىلعانداردى ۇستانامىز. ٴبىز دوستارىمىزبەن جانە تۋىستارىمىزبەن جاقسى اراقاتىناستا بولۋعا تىرىسساق تا، ولاردىڭ بىزگە دەگەن كوزقاراسى وزگەرۋى مۇمكىن. ٴتىپتى كەيبىرەۋلەرى سەنىمىمىزگە قارسى شىعاتىن دا شىعار. ٴبىز بۇعان تاڭعالمايمىز. ويتكەنى يسا: «ٴيا، ادامعا ٶز ٷي ىشىندەگىلەرى دۇشپان بولادى»،— دەگەن (ماتاي 10:36). دەسە دە يسا شىندىق ٷشىن نەدەن باس تارتپايىق، ونىڭ ورنى ەسەلەپ تولاتىنىن ۋادە ەتكەن! (مارقا 10:28—30 وقىڭىز).
12. اارون شىندىق ٷشىن قانداي قۇرباندىققا باردى؟
12 ەۆرەي ۇلتىنان شىققان اارون دەگەن كىسى قۇدايدىڭ ەسىمىن ايتۋعا بولمايدى دەگەنگە سەنىپ كەلگەن. ٴبىراق ول قۇداي تۋرالى شىندىقتى قاتتى بىلگىسى كەلەدى. بىردە ەحوبا كۋاگەرى وعان ەۆرەيدىڭ ٴتورت داۋىسسىز ارپىنەن تۇراتىن قۇدايدىڭ ەسىمىنە داۋىستى دىبىستاردى قوسقاندا، ونى «ەحوبا» دەپ دىبىستاۋعا بولاتىنىن كورسەتەدى. مۇنى بىلگەن ااروننىڭ قۋانعانى سونشا — ول بۇل جايىندا راۆۆيندەرگە ايتادى. اارون «قۇدايدىڭ ەسىمى تۋرالى شىندىقتى ەستىگەندە ولار دا قۋانادى» دەپ ويلايدى. ٴبىراق ولاي بولماي شىقتى. راۆۆيندەر ونىڭ بەتىنە تۇكىرىپ، سيناگوگادان قۋىپ شىقتى. ااروننىڭ جاقىندارى دا ودان تەرىس اينالدى. ٴبىراق ول قارسىلىقتارعا قاراماي، ەحوبا تۋرالى ٴبىلىم الۋىن دوعارمادى. كەيىن ول ەحوبا كۋاگەرى بولىپ، ومىرىنىڭ سوڭىنا دەيىن ەحوباعا ادال قىزمەت ەتتى. شىندىق ٷشىن وزگەلەرمەن قارىم-قاتىناسىمىز وزگەرسە، ٴبىز دە تاڭعالماۋىمىز كەرەك.
13، 14. شىندىقتى بىلگەن سوڭ، ويىمىز بەن ٸس-ارەكەتىمىزدە قانداي وزگەرىستەر جاساۋ كەرەك؟ مىسال كەلتىرىڭىز.
13 جامان ويلار مەن ارام ىستەر. ٴبىز شىندىقتى ٴبىلىپ، كيەلى كىتاپ تالاپتارىنا ساي ٶمىر سۇرە باستاعاندا، ويىمىز بەن ٸس-ارەكەتىمىزدى وزگەرتۋگە دايىن بولۋىمىز قاجەت. ەلشى پەتىر بىلاي دەگەن: «ٴتىلالعىش بالالارداي بولىپ، قۇدايدى بىلمەي تۇرعان كەزدەرىڭدەگى قالاۋلارىڭ بويىنشا ٶمىر ٴسۇرۋدى قويىڭدار... بارلىق ٸس-ارەكەتتەرىڭدە كيەلى بولىڭدار» (پەتىردىڭ 1-حاتى 1:14، 15). ەجەلگى قورىنت قالاسىندا ادامداردىڭ كوبىسى ازعىن ٶمىر كەشكەن. سوندىقتان ولار ەحوبانىڭ كوز الدىندا تازا بولۋ ٷشىن ۇلكەن وزگەرىستەر جاساۋ كەرەك ەدى (قورىنتتىقتارعا 1-حات 6:9—11). بۇگىندە دە شىندىقتى بىلگەن ادامدار ومىرلەرىندە ۇلكەن وزگەرىستەر جاسايدى. پەتىر بۇنى بىلاي سيپاتتاعان: «بۇرىنىراقتا سەندەردىڭ باسقا حالىقتار سياقتى، ورەسكەلدىككە، ٴناپسىقۇمارلىققا، ماسكۇنەمدىككە بەرىلىپ، ىردۋ-دىردۋ توي-دۋمان قۇرۋمەن، سىلقيا تويعانشا جارىسا ىشۋمەن، جيرەنىشتى پۇتتارعا تابىنۋمەن ٶمىر كەشكەندەرىڭ جەتەدى» (پەتىردىڭ 1-حاتى 4:3).
14 دەۆين مەن جاسمين كوپ جىل بويى ماسكۇنەم بولعان. دەۆين تاجىريبەلى ەسەپشى بولعانمەن، ماسكۇنەمدىگىنىڭ كەسىرىنەن جۇمىستان شىعىپ قالا بەرەتىن. ال جۇرت ٴجاسميندى اشۋشاڭ، قاتىگەز دەپ بىلەتىن. ٴبىر كۇنى ول ماس بولىپ كەلە جاتىپ ەكى ميسسيونەردى كەزدەستىرەدى. ولار وعان كيەلى كىتاپتى زەرتتەۋ ساباعىن ۇسىنادى. ٴبىراق ٴبىر اپتادان سوڭ باۋىرلاستار ولاردىڭ ۇيىنە كەلسە، ەكەۋى دە ۇرتتاپ العان ەكەن. ولار سول ميسسيونەرلەردى شىنىمەن كەلەدى دەپ ويلاماعان ەدى. كۋاگەرلەر كەلەسى جولى كەلگەندە، جاعداي مۇلدەم باسقاشا بولدى. دەۆين مەن جاسمين كيەلى كىتاپتان ٴبىلىم الۋعا دايىن وتىر ەكەن. ٴسۇيتىپ، ولار بىلگەندەرىن بىردەن ومىردە قولدانا باستادى. ٷش ايدىڭ ىشىندە ولار ىشكىلىكتى قويىپ، كەيىن زاڭدى نەكەگە تۇردى. دەۆين مەن جاسميننىڭ وزگەرگەنى اۋىلداستارىنىڭ كوبىسىنە اسەر ەتىپ، ولار دا كيەلى كىتاپتى زەرتتەۋگە ىقىلاس تانىتتى.
15. شىندىقتى بىلگەندە، اسىرەسە قانداي وزگەرىستەردى جاساۋ قيىن جانە نەگە؟
15 قۇدايعا ۇنامسىز ادەت-عۇرىپتار. ٴبىز ٷشىن ەڭ ۇلكەن ٵرى ەڭ قيىن وزگەرىستەردىڭ ٴبىرى — ەحوباعا ۇنامايتىن ادەت-عۇرىپتاردى تاستاۋ. كەيبىرەۋلەر ٴتىپتى ەحوبانىڭ ادەت-عۇرىپتارعا دەگەن كوزقاراسىن بىلە تۇسسە دە، ولاردان ٷزىلدى-كەسىلدى باس تارتۋعا قينالىپ جاتادى. ولار اعايىن-تۋىس، ارىپتەستەر مەن دوستار نە دەيدى دەپ ۋايىمدايدى. ويتكەنى ولاردىڭ ادەت-عۇرىپتاردى قاتتى ۇستاناتىنىن بىلەدى، اسىرەسە ماسەلە مارقۇم كىسىلەردى دارىپتەۋگە كەلگەندە (مۇسانىڭ 5-جازباسى 14:1). سونىمەن، قاجەتتى وزگەرىستەر جاساۋعا نە كومەكتەسەدى؟ ٴبىز ەجەلدە شىندىقتى بىلگەن سوڭ باتىل وزگەرىستەر جاساعان ادامداردان ۇيرەنسەك بولادى. سولاردىڭ ٴبىرى — ەرتەدەگى ەفەستەگى ماسىحشىلەر.
16. ەفەستەگى كەيبىر ماسىحشىلەر قانداي قۇرباندىقتارعا باردى؟
16 ەرتەدە ەفەس قالاسىندا سيقىرلىقپەن اينالىسۋ كادىمگى نارسە بولاتىن. سيقىرلىقپەن اينالىسقان ادامدار ماسىحشىلىكتى قابىلداعاننان كەيىن نە ىستەدى؟ كيەلى كىتاپتا بىلاي دەلىنگەن: «سيقىرلىقپەن اينالىسقان كوپتەگەن ادامدار كىتاپتارىن اكەلىپ، جۇرتتىڭ كوزىنشە ورتەپ جىبەردى. ولاردىڭ قۇنىن ەسەپتەگەندە، 50000 كۇمىس اقشا بولىپ شىقتى. وسىلايشا ەحوبانىڭ ٴسوزى زور قارقىنمەن تاراپ، ىقپالى ارتا بەردى» (ەلشىلەردىڭ ىستەرى 19:19، 20). بۇل ادال ماسىحشىلەر وزدەرىنىڭ قىمبات كىتاپتارىنان ارىلۋعا دايىن بولدى. ال ەحوبا بۇل ٷشىن ولارعا باتاسىن توكتى.
17. ا) شىندىق ٷشىن قانداي نارسەلەردەن باس تارتۋىمىز مۇمكىن؟ ٵ) كەلەسى ماقالادا قانداي سۇراقتار تالقىلانادى؟
17 شىندىقتى ٴبىلۋ ٷشىن ٴبىز قانداي قۇرباندىقتارعا باردىق؟ بارلىعىمىز بۇل ٷشىن ۋاقىتىمىزدى جۇمسادىق. كەيبىرىمىز بايلىققا جەتۋ مۇمكىندىگىنەن باس تارتتىق. بالكىم، كەيبىر ادامدارمەن قارىم-قاتىناسىمىز وزگەرگەن شىعار. كوبىمىز ويىمىز بەن ٴجۇرىس-تۇرىسىمىزدى وزگەرتتىك. سونداي-اق ەحوباعا ۇنامسىز ادەت-عۇرىپتاردان باس تارتتىق. كيەلى كىتاپتاعى شىندىق ٴبىز باس تارتقان كەز كەلگەن نارسەدەن الدەقايدا باعالى ەكەنىنە كوزىمىز جەتتى! كيەلى كىتاپتاعى شىندىقتىڭ ارقاسىندا ەحوبامەن جاقىن قارىم-قاتىناستا بولا الامىز. ال بۇعان ەش نارسە تەڭ كەلمەيدى. شىندىقتىڭ ارقاسىندا كورگەن بارلىق باتالارىمىز جايلى ويلانعاندا، «شىندىقتى قالايشا ساتۋعا بولادى؟» دەگەن سۇراق ەرىكسىز تۋىندايدى. بۇل قالاي بولۋى مۇمكىن؟ ەشقاشان مۇنداي ۇلكەن قاتەلىككە بارماۋ ٷشىن نە ىستەسەك بولادى؟ بۇل سۇراقتاردىڭ جاۋابىن كەلەسى ماقالادان بىلەمىز.
^ 8-ابزاس بۇل ماقالادا كەيبىر ەسىمدەر وزگەرتىلگەن.
