باۋىرلاستىڭ ٴبىر مەيىرىمدى ٸسى
وسىدان الپىس جىلداي ۋاقىت بۇرىن ۇندىستاننىڭ گۋدجارات ولكەسىندەگى ٴبىر قالاشىقتا جوننىڭ اكەسى شومىلدىرۋ راسىمىنەن ٶتىپ، ەحوبا كۋاگەرى بولدى. ٴبىراق جون، اپكەسى، ەكى قارىنداسى مەن ەكى ٸنىسى، اناسى، ٴبارى كاتوليكتەر ەدى ٵرى دىندەرىن قاتتى ۇستاناتىن. سول سەبەپتى ولار اكەسىنىڭ دىنىنە قارسى بولاتىن.
بىردە اكەسى جوننان قاۋىمداعى ٴبىر باۋىرلاسقا حاتقالتا اپارىپ بەرۋدى وتىنەدى. ٴبىراق جون سول كۇنى تاڭەرتەڭ ۇلكەن قاڭىلتىر شەلەكتى اشامىن دەپ، ساۋساعىن وڭدىرماي كەسىپ الادى. سوندا دا اكەسىنىڭ ايتقانىن ەكى ەتپەي، قان ساۋعالاعان ساۋساعىن شۇبەرەكپەن بايلاي سالادى دا، حاتقالتانى الىپ ۇيدەن شىعىپ كەتەدى.
دىتەگەن جەرىنە جەتكەن سوڭ، جون الگى حاتقالتانى باۋىرلاستىڭ ايەلىنە بەرەدى. ول دا ەحوبا كۋاگەرى بولاتىن. جوننىڭ جاراقات العانىن بايقاپ قالعان ايەل باۋىرلاس وعان كومەكتەسەيىن دەيدى. سودان العاشقى كومەك كورسەتۋگە ارنالعان ٴدارى-دارمەك قوبديشاسىن شىعارىپ، جاراقاتىن تازالاپ، ساۋساعىن تاڭعىشپەن ورايدى. سوسىن وعان ىستىق شاي بەرەدى. وسى ۋاقىتتىڭ ارالىعىندا ول جونعا جىلى شىرايمەن كيەلى كىتاپ جايلى ايتىپ وتىردى.
وسى مەيىرىمدى ارەكەتتەن كەيىن جوننىڭ ەحوبا كۋاگەرلەرى جايلى ويى وزگەرە باستايدى. ول الگى باۋىرلاسقا ەحوبا كۋاگەرلەرىن كاتوليكتەردەن ايرىقشالايتىن نانىمدارى جايلى ەكى سۇراق قويادى. ونىڭ سۇراعانى: يسا قۇداي ما؟ ماسىحشىلەر ٴماريامعا سيىنۋ كەرەك پە؟ بۇل ايەل باۋىرلاس گۋدجاراتي ٴتىلىن ۇيرەنىپ العاندىقتان، جونعا ونىڭ انا تىلىندە جاۋاپ بەرەدى. ول جاۋاپتارىن كيەلى كىتاپتان كورسەتەدى دە، وعان «پاتشالىق جايلى وسى ىزگى حابار» دەگەن كىتاپشانى بەرەدى.
كەيىن كىتاپشانى وقىپ جاتىپ جون شىندىقتى تاپقانىن تۇسىنەدى. ول شىركەۋدەگى ٴدىني قىزمەتكەرگە بارىپ، الگى ەكى سۇراقتى وعان دا قويادى. سوندا ول كىسى اشۋعا بۋلىعىپ، كيەلى كىتاپتى وعان لاقتىرىپ جىبەرەدى دە: «سەن شايتان بوپ كەتكەنسىڭ! كيەلى كىتاپتىڭ قاي جەرىندە يسا قۇداي ەمەس دەپ جازىلعان؟! ال، كورسەت! ٴماريامعا تابىنباڭدار دەپ قاي جەرىندە جازىلعان؟ كورسەت ماعان!»— دەپ باقىرادى. بۇنى كورگەن جون توبە شاشى تىك تۇرادى. ول ەندى شىركەۋگە ەشقاشان كەلمەيتىنىن ايتادى. سودان بەرى جون شىركەۋدىڭ تابالدىرىعىن اتتاپ باسپادى!
جون كۋاگەرلەرمەن زەرتتەۋ ساباعىن باستاپ، شىندىقتى قابىلداپ، ەحوباعا قىزمەت ەتەدى. ٴبىراز ۋاقىت وتە وتباسىنىڭ بىرنەشە مۇشەسى دە شىندىققا كەلەدى. الگى وقيعادان سوڭ شامامەن 60 جىل وتسە دە، جون ساۋساعىنداعى تىرتىققا قاراپ، باۋىرلاستىڭ مەيىرىمدىلىگىن ەسكە الادى. ونىڭ ٴبىر عانا مەيىرىمدى ٸسى جوننىڭ جۇرەگىنە قوزعاۋ سالىپ، ول كۇنى بۇگىنگە شەيىن ەحوباعا قىزمەت ەتىپ كەلەدى (قورىنتتىقتارعا 2-حات 6:4، 6).
