شىندىق «تاتۋلىق ەمەس، سەمسەر» اكەلەدى
«مەنى جەر بەتىنە تاتۋلىق اكەلۋگە كەلدى دەپ ويلاماڭدار. مەن تاتۋلىق ەمەس، سەمسەر اكەلۋگە كەلدىم» (ماتاي 10:34).
اندەر: 43، 24
1، 2. بۇگىندە ٴبىز قانداي تىنىشتىققا كەنەلە الامىز؟ ٵ) نەلىكتەن قازىر تولىق تىنىشتىققا كەنەلۋ مۇمكىن ەمەس؟ (ماقالانىڭ باسىنداعى سۋرەتتى قاراڭىز.)
قاي-قايسىسىمىز دا تىنىش ٵرى ۋايىم-قايعىسىز ٶمىر كەشكىمىز كەلەدى. سوندىقتان «قۇدايدىڭ تىنىشتىعىن» العانىمىز ٷشىن ٴبىز ەحوباعا قاتتى ريزامىز. بۇل تىنىشتىقتىڭ ارقاسىندا ٴبىز سابىر ساقتاپ، كوڭىلدى تۇسىرەتىن ويلار مەن سەزىمدەرگە بەرىلمەيمىز (فىلىپىلىكتەرگە 4:6، 7). بۇعان قوسا، ٶمىرىمىزدى ەحوباعا باعىشتاعاندىقتان، «قۇدايمەن تاتۋمىز»، ياعني ونىمەن جاقسى قارىم-قاتىناستامىز (ريمدىكتەرگە 5:1).
2 الايدا قۇدايدىڭ بۇكىل جەر بەتىنە تىنىشتىق ورناتاتىن ۋاقىتى ٵلى كەلگەن جوق. ٴبىز سوڭعى كۇندەرى ٶمىر ٴسۇرىپ جاتىرمىز، سوندىقتان ۋايىمعا باتىراتىن قيىنشىلىقتار جەتىپ جاتىر. قوعامىمىزدا زۇلىم ادامدار وتە كوپ (تىموتەگە 2-حات 3:1—4). ونىڭ ۇستىنە، ٴبىز شايتانمەن جانە ونىڭ تاراتىپ جاتقان جالعان ىلىمدەرىمەن كۇرەسىپ ٴجۇرمىز (قورىنتتىقتارعا 2-حات 10:4، 5). ٴبىراق بارىنەن بۇرىن، ەحوباعا قىزمەت ەتپەيتىن تۋىستارىمىزدىڭ قارسىلىقتارى ٴبىزدى قاتتى ۋايىمعا سالۋى مۇمكىن. تۋىستارىمىزدىڭ كەيبىرى نانىمدارىمىزدى كۇلكى ەتۋى مۇمكىن، يا بولماسا وتباسىمىزدى اجىراتىپ جۇرسىڭ دەپ بىزگە ايىپ تاعاتىن شىعار. ٴتىپتى ەحوباعا قىزمەت ەتۋدى دوعارمايىنشا وتباسى مۇشەسى بولمايسىڭ دەۋى دە مۇمكىن. ەندەشە، ٷي ىشىندەگىلەردىڭ قارسىلىقتارىنا قالاي قاراۋىمىز كەرەك؟ سونداي جاعدايدا قالاي تىنىشتىق ساقتاۋعا بولادى؟
وتباسىمىزدىڭ قارسىلىقتارىنا قالاي قاراۋىمىز كەرەك؟
3، 4. ا) يسانىڭ تالىمدەرىنىڭ قانداي اسەرى بولۋى مۇمكىن؟ ٵ) يسانىڭ ىزىمەن ٴجۇرۋ اسىرەسە قاي كەزدە قيىن بولادى؟
3 يسا تالىمدەرىن جۇرتتىڭ ٴبارى بىردەي قابىلدامايتىنىن بىلگەن. سونداي-اق كەيبىر ادامدار شاكىرتتەرىنە قارسى شىعاتىندىقتان، ولارعا باتىل بولۋ كەرەكتىگىن دە ٴبىلدى. وسى قارسىلىقتار ولاردىڭ وتباسىنىڭ ىنتىماعىنا دا كەرى ىقپالىن تيگىزۋى مۇمكىن ەدى. يسا بىلاي دەدى: «مەنى جەر بەتىنە تاتۋلىق اكەلۋگە كەلدى دەپ ويلاماڭدار. مەن تاتۋلىق ەمەس، سەمسەر اكەلۋگە كەلدىم. ويتكەنى مەن ۇلىن اكەسىنەن، قىزىن شەشەسىنەن، ال كەلىنىن ەنەسىنەن اجىراتۋعا كەلدىم. ٴيا، ادامعا ٶز ٷي ىشىندەگىلەرى دۇشپان بولادى» (ماتاي 10:34—36).
4 «مەنى جەر بەتىنە تاتۋلىق اكەلۋگە كەلدى دەپ ويلاماڭدار»،— دەۋىمەن يسا نە ايتقىسى كەلدى؟ ول ٶزىنىڭ شاكىرتى بولۋدى شەشكەن ادامدار بۇنىڭ قانداي دا ٴبىر سالدارىن كورەتىنىن ٴبىلسىن دەدى. ارينە، يسانىڭ ماقساتى وتباسىلاردى ويرانداتۋ ەمەس، ادامدارعا قۇداي تۋرالى شىندىقتى ۇيرەتۋ ەدى (جوحان 18:37). ٴبىراق شاكىرتتەرى يسانىڭ ىزىمەن جۇرۋدىڭ وڭاي بولا بەرمەيتىنىن، اسىرەسە جاقىن دوستارى مەن ٷي ىشىندەگىلەرى شىندىقتى قابىلداماسا قيىنعا سوعاتىنىن بىلۋلەرى كەرەك ەدى.
5. يسانىڭ ٸزباسارلارى باستارىنان نە وتكىزگەن؟
5 يسا ٸزباسارلارىنا باسقا قيىندىقتارمەن قاتار، ٷي ىشىندەگىلەردىڭ تاراپىنان كورسەتىلەتىن قارسىلىققا دا توزۋگە دايىن بولۋ كەرەكتىگىن ايتتى (ماتاي 10:38). يساعا ۇنامدى بولۋ ٷشىن ونىڭ شاكىرتتەرى وتباسىلارى كۇلكى ەتسە دە، ولاردان باس تارتسا دا، ٴتوزىمدى بولا العان. ٴبىراق ولاردىڭ تاپقانى جوعالتقانىنان اناعۇرلىم كوپ بولدى (مارقا 10:29، 30 وقىڭىز).
6. تۋىستارىمىز قارسىلىق كورسەتسە، نەنى ەستە ۇستاۋىمىز قاجەت؟
6 تۋىستارىمىز ەحوباعا عيبادات ەتكەنىمىزگە بولا بىزدەن باس تارتسا دا، ٴبارىبىر ولاردى جاقسى كورەمىز. ٴبىراق مىنا جايتتى ەستەن شىعارماۋىمىز كەرەك: قۇداي مەن ماسىحكە دەگەن سۇيىسپەنشىلىگىمىز كەز كەلگەن ادامعا دەگەن سۇيىسپەنشىلىگىمىزدەن ارتىق بولۋى ٴتيىس (ماتاي 10:37). بۇعان قوسا، شايتان وتباسىمىزعا دەگەن سۇيىسپەنشىلىگىمىزدى پايدالانىپ، ادالدىعىمىزدان تايۋعا يتەرمەلەيتىنىن دە ٴبىلىپ جۇرگەيمىز. قازىر تۋىستارمەن تۋىندايتىن قيىن جاعدايلاردىڭ كەيبىرىن جانە ولارعا قالاي توزۋگە بولاتىنىن قاراستىرايىق.
جۇبايىمىز ٴماسىحشى بولماسا
7. ەگەر جولداسىڭىز ەحوباعا قىزمەت ەتپەيتىن بولسا، قانداي كوزقاراس ساقتاۋىڭىز كەرەك؟
7 كيەلى كىتاپ نەكەلەسكەن ادامنىڭ «جاڭا قيىندىقتارعا» كەزىگەتىنىن ەسكەرتەدى (قورىنتتىقتارعا 1-حات 7:28). ەگەر ٴسىز ەحوباعا قىزمەت ەتپەيتىن اداممەن نەكەدە بولساڭىز، قوسىمشا قيىندىقتار تۋۋى مۇمكىن. ايتكەنمەن ٶز جاعدايىڭىزعا ەحوبانىڭ كوزقاراسىمەن قاراعانىڭىز ٴجون. ونىڭ باسشىلىعى بويىنشا، وتباسىنداعى كۇيەۋى نە ايەلى سەنۋشى بولماعانىنا بولا ودان بولەك تۇرۋ نە اجىراسۋ دۇرىس ەمەس (قورىنتتىقتارعا 1-حات 7:12—16). ەحوباعا قىزمەت ەتپەيتىن كۇيەۋىڭىز شىنايى عيبادات ەتۋدە باسشىلىقتى قولىنا الماسا دا، ٴسىز ونى وتاعاسى رەتىندە قۇرمەتتەي بەرۋىڭىز كەرەك. ال ەگەر ايەلىڭىز ەحوباعا سەنبەيتىن بولسا، سوندا دا ونى ٴسۇيىپ، ايالاپ قامقورلاۋىڭىز قاجەت (ەفەستىكتەرگە 5:22، 23، 28، 29).
8. جۇبايىڭىز عيباداتقا بايلانىستى شەكتەۋلەر قويىپ جاتسا، قانداي سۇراقتار جونىندە ويلانا الاسىز؟
8 ەگەر جۇبايىڭىز سىزگە عيباداتقا بايلانىستى شەكتەۋلەر قويسا شە؟ مىسالى، ٴبىر ايەل باۋىرلاسىمىزدىڭ كۇيەۋى وعان اپتانىڭ بەلگىلى ٴبىر كۇندەرى عانا ۋاعىزعا شىعۋعا رۇقسات بەرگەن ەكەن. ٴسىزدىڭ دە جاعدايىڭىز وسى ىسپەتتەس بولسا، بىلاي دەپ ويلانىپ كورىڭىزشى: «جولداسىم ماعان ەحوباعا مۇلدەم قىزمەت ەتپە دەپ جاتىر ما؟ ەگەر ولاي دەمەسە، ونىڭ ٶتىنىشىن ورىنداي الامىن با؟» ەستى بولساڭىز، نەكەدەگى قيىندىقتارىڭىزدى ازايتا الاسىز (فىلىپىلىكتەرگە 4:5).
9. ماسىحشىلەر ٶز بالالارىنا سەنبەيتىن اكەسىن يا شەشەسىن قۇرمەتتەۋدى قالاي ۇيرەتە الادى؟
9 نەكەلىك جارىڭىز ەحوباعا قىزمەت ەتپەيتىن بولسا، بالالاردى تاربيەلەۋ وڭايعا سوقپاۋى مۇمكىن. مىسالى، ٴسىز بالالارىڭىزعا كيەلى كىتاپتاعى «اكە-شەشەڭدى قۇرمەتتە» دەگەن سوزدەرگە قۇلاق اسۋدى ۇيرەتۋىڭىز كەرەك (ەفەستىكتەرگە 6:1—3). ٴبىراق جۇبايىڭىزدىڭ ٴجۇرىس-تۇرىسى كيەلى كىتاپقا قايشى كەلسە شە؟ مۇنداي جاعدايدا جۇبايىڭىزدى قۇرمەتتەۋ ارقىلى بالالارىڭىزعا ۇلگى كورسەتە الاسىز. كۇيەۋىڭىز نە ايەلىڭىزدىڭ بويىنداعى جاقسى قاسيەتتەر جايلى ويلانىپ، وعان ىستەپ جۇرگەن بارلىق يگى ىستەرى ٷشىن ريزا ەكەنىڭىزدى ايتىڭىز. بالالاردىڭ كوزىنشە جارىڭىز جونىندە جامان سويلەمەڭىز. مۇنىڭ ورنىنا، ەحوباعا قىزمەت ەتۋدى ٵربىر ادام ٶزى شەشۋ كەرەك ەكەنىن ٴتۇسىندىرىڭىز. ەگەر بالالارىڭىزعا سەنبەيتىن اكەسىن نە شەشەسىن قۇرمەتتەۋدى ۇيرەتسەڭىز، ولاردىڭ ۇلگىلى ٴجۇرىس-تۇرىسىنا قاراپ، سەنبەيتىن جۇبايىڭىز ەحوبا جايلى كوبىرەك بىلگىسى كەلۋى مۇمكىن.
ٵر مۇمكىندىكتى پايدالانىپ، بالالارىڭىزعا كيەلى كىتاپ جايلى ۇيرەتىڭىز (10-ابزاستى قاراڭىز)
10. ٴماسىحشى اتا-انالار بالالارىنا ەحوبانى ٴسۇيۋدى قالاي ۇيرەتە الادى؟
10 سەنۋشى ەمەس كەيبىر اكەلەر نە انالار ٶز بالالارىنىڭ جالعان دىننەن شىققان مەيرامداردى تويلاعانىن يا بولماسا جالعان ٴدىني ىلىمدەردى وقىپ-بىلگەنىن قالايتىن شىعار. كەيبىر كۇيەۋلەر ٴماسىحشى ايەلدەرىنە بالالارعا كيەلى كىتاپ جايلى ۇيرەتۋگە تىيىم سالۋى دا مۇمكىن. ٴتىپتى وسىنداي جاعدايدىڭ وزىندە ٴماسىحشى انا بالالارىنا شىندىقتى ۇيرەتۋ ٷشىن قولىنان كەلگەننىڭ ٴبارىن ىستەيدى (ەلشىلەردىڭ ىستەرى 16:1؛ تىموتەگە 2-حات 3:14، 15). مىسالى، سەنبەيتىن كۇيەۋى بالالارىنىڭ اناسىمەن كيەلى كىتاپتى زەرتتەۋ ساباعىن وتكەنىن نە قاۋىمعا بارعانىن قالامايدى دەلىك. مۇندايدا ايەلى كۇيەۋىنىڭ شەشىمىن قۇرمەتتەسە دە، مۇمكىندىك تۋعان كەزدەرى بالالارىنا ٶز نانىمدارى جايلى ايتىپ بەرسە بولادى. وسىلايشا بالالار ەحوبا تۋرالى جانە ونىڭ جاقسى مەن جامانعا قاتىستى ورناتقان نورمالارىن بىلە الادى (ەلشىلەردىڭ ىستەرى 4:19، 20). ال ۋاقىتى كەلگەندە، ەحوباعا قىزمەت ەتۋ-ەتپەۋدى بالالاردىڭ وزدەرى شەشۋ كەرەك بولادى * (مۇسانىڭ 5-جازباسى 30:19، 20).
تۋىستارىمىز شىنايى عيباداتقا قارسى بولسا
11. ەحوباعا قىزمەت ەتپەيتىن تۋىستارمەن ارامىزدا قيىندىقتار تۋۋىنا نە سەبەپ بولۋى مۇمكىن؟
11 ەحوبا كۋاگەرلەرىمەن العاش زەرتتەي باستاعانىمىزدا، بۇل جايلى وتباسىمىزعا ايتپاعان شىعارمىز. ٴبىراق سەنىمىمىز نىعايا كەلە، ەحوباعا قىزمەت ەتكىمىز كەلەتىنى جايلى ايتۋ كەرەكتىگىن تۇسىندىك (مارقا 8:38). شەشىمىڭىزدە نىق تۇرعاندىقتان، كەيىن ٷي ىشىندەگىلەرمەن اراقاتىناسىڭىزدا قيىندىقتار تۋىنداعان شىعار. ولاي بولسا، تۋىستارمەن ىنتىماقتى ساقتاۋ ٷشىن جانە ەحوباعا دا ادال بولىپ قالۋ ٷشىن نە ىستەي الاتىنىمىزدى قاراستىرايىق.
12. تۋىستارىمىز بىزگە نەگە قارسى شىعۋى مۇمكىن؟ ٴبىز ولارعا تۇسىنۋشىلىكپەن قارايتىنىمىزدى قالاي كورسەتسەك بولادى؟
12 سەنبەيتىن تۋىستارىڭىزدىڭ وي-سەزىمىن تۇسىنۋگە تىرىسىڭىز. ٴبىز كيەلى كىتاپتاعى شىندىقتى تاپقانىمىزعا وتە قۋانىشتىمىز. ايتسە دە تۋىستارىمىز ٴبىزدى الدانىپ قالدى نەمەسە ٴبىرتۇرلى دىنگە كىرىپ كەتتى دەپ ۋايىمدايتىن شىعار. ولارمەن بىرگە مەيرامدار تويلامايتىندىقتان، «بۇل ەندى ٴبىزدى جاقسى كورمەيدى» دەپ پايىمداۋى مۇمكىن. يا بولماسا ولگەننەن كەيىن قاتتى ازاپقا ۇشىرايدى دەپ ٴبىز ٷشىن قورقۋى دا عاجاپ ەمەس. ٴبىزدى نەلىكتەن ۋايىمدايتىنىن ٴبىلۋ ٷشىن ولاردىڭ وي-سەزىمىن تۇسىنۋگە تىرىسىپ، ٴسوزدەرىن مۇقيات تىڭداۋىمىز قاجەت (ناقىل سوزدەر 20:5). مىسالى، ەلشى پاۋىل «ٵرتۇرلى ادامدارعا» ىزگى حاباردى جەتكىزۋ ٷشىن، ولاردى تۇسىنۋگە تىرىسقان. ەگەر ٶز تۋىستارىمىزدى تۇسىنۋگە تىرىسساق، ولارعا شىندىقتى جەتكىزۋدىڭ امالىن تاباتىن شىعارمىز (قورىنتتىقتارعا 1-حات 9:19—23).
13. سەنبەيتىن تۋىستارىمىزبەن قالاي سويلەسۋىمىز قاجەت؟
13 جۇمساقتىقپەن سويلەڭىز. كيەلى كىتاپتا: «سوزدەرىڭ ٵرقاشان جاعىمدى بولسىن»،— دەلىنگەن (قولوستىقتارعا 4:6). بۇل وڭاي ەمەس شىعار. سوندىقتان تۋىستارىمىزعا جۇمساقتىق پەن مەيىرىمدىلىك تانىتۋ ٷشىن، ەحوبادان كيەلى رۋح سۇراساق بولادى. ٴبىز ولاردىڭ نانىمدارى جايلى ٴسوز تالاستىرماۋىمىز كەرەك. ال ەگەر ولاردىڭ ٴسوزى مەن ارەكەتى جانىمىزدى جارالاسا، ەلشىلەرگە ەلىكتەي الامىز. پاۋىل بىلاي دەگەن: «ٴبىزدى قورلاعاندارعا باتا تىلەيمىز، قۋعىنداسا، توزەمىز، جالا جاپقاندارعا جىلى جاۋاپ بەرەمىز» (قورىنتتىقتارعا 1-حات 4:12، 13).
14. ۇلگىلى ٴجۇرىس-تۇرىستىڭ قانداي پايداسى بار؟
14 ٴجۇرىس-تۇرىسىڭىز ۇلگىلى بولسىن. بۇل نەگە ماڭىزدى؟ جۇمساقتىقپەن سويلەگەنىمىز تۋىستارىمىزبەن ىنتىماقتا بولۋعا كومەكتەسكەنىمەن، ٴبىزدىڭ ۇلگىلى ٴجۇرىس-تۇرىسىمىزدىڭ اسەرى اناعۇرلىم كۇشتىرەك (پەتىردىڭ 1-حاتى 3:1، 2، 16 وقىڭىز). سىزگە قاراپ، تۋىستارىڭىز ەحوبا كۋاگەرلەرىنىڭ نەكەدە باقىتتى ەكەنىن، بالالارىنا جاقسى قارايتىنىن، كيەلى كىتاپتاعى تالاپتارعا ساي ٶمىر سۇرەتىنىن، ومىرلەرى ٴمان-ماعىنالى ەكەنىن كورسىن. مەيلى، تۋىستارىمىز شىندىقتى قابىلداماسا دا، ٴجۇرىس-تۇرىسىمىز ەحوباعا ۇنامدى ەكەنىن بىلگەنىمىزگە قۋانامىز.
15. تۋىستارىمىزبەن داۋلاسىپ كەتپەس ٷشىن قانداي جوسپار قۇرۋعا بولادى؟
15 الدىن الا جوسپار قۇرىڭىز. تۋىستارىڭىزبەن پىكىرتالاس تۋدىرۋى مۇمكىن جاعدايلار جونىندە ويلانىڭىز. سوسىن نە ىستەيتىنىڭىزدى شەشىپ الىڭىز (ناقىل سوزدەر 12:16، 23). اۆستراليالىق ٴبىر ايەل باۋىرلاس ٴدال وسىلاي ەتەدى. ونىڭ قايىن اتاسى شىندىققا قاتتى قارسى بولاتىن ٵرى كەيدە اشۋلانىپ كەتەتىن. سوندىقتان وعان تەلەفون شالماس بۇرىن، كۇيەۋى ەكەۋى دۇعا ايتىپ، ول كىسىگە اشۋمەن جاۋاپ قايتارماۋ ٷشىن ەحوبادان كومەك سۇراپ الادى ەكەن. قانداي جاعىمدى تاقىرىپتا اڭگىمەلەسەتىنىن دە ويلاستىرىپ الادى. بۇعان قوسا، اڭگىمەلەرى ٴدىني داۋ-دامايعا ۇلاسىپ كەتپەۋ ٷشىن، ۇزاق سويلەسپەي، قانشا ۋاقىت سويلەسەتىندەرىن شەشىپ الادى ەكەن.
ەحوباعا دەگەن ادالدىعىڭىز وتباسىڭىزعا دەگەن سۇيىسپەنشىلىكتەن مىقتىراق بولۋ كەرەك
16. تۋىستارىڭىزدىڭ كوڭىلىنەن شىقپاعانىڭىز ٷشىن ٶزىڭىزدى كىنالى سەزىنبەۋگە نە كومەكتەسەدى؟
16 ارينە، كەيدە سەنبەيتىن تۋىستارمەن كەلىسپەۋشىلىكتەر بولىپ تۇرادى. بارلىق كەلىسپەۋشىلىكتىڭ الدىن الۋ مۇمكىن ەمەس. ال كەلىسپەۋشىلىك تۋىنداسا، ٴسىز ولاردى جاقسى كورگەندىكتەن جانە ولاردىڭ كوڭىلىنەن شىققىڭىز كەلەتىندىكتەن، ٶزىڭىزدى كىنالى سەزىنەتىن شىعارسىز. ٴبىراق ەحوباعا دەگەن ادالدىعىڭىز وتباسىڭىزعا دەگەن سۇيىسپەنشىلىكتەن مىقتىراق بولۋ كەرەكتىگىن ەستە ۇستاڭىز. تۋىستارىڭىز وسىنى كورگەندە، ەحوباعا قىزمەت ەتۋدىڭ قانشالىقتى ماڭىزدى ەكەنىن ٴتۇسىنۋى مۇمكىن. ٴسىز شىندىقتى ەشكىمگە كۇشتەپ قابىلداتا المايسىز. ٴبىراق ولارعا ەحوبانىڭ جولىمەن جۇرگەنىڭىز قانداي پايداسىن تيگىزىپ جاتقانىن كورسەتە الاسىز. ەحوبا بىزگە قاي جولدى تاڭدايتىنىمىزدى شەشۋگە مۇمكىندىك بەرگەنىندەي، ولارعا دا سونداي مۇمكىندىك بەرىپ وتىر (يشايا 48:17، 18).
وتباسىمىزدىڭ ٴبىر مۇشەسى ەحوبانى تاستاپ كەتسە
17، 18. وتباسىمىزدىڭ ٴبىر مۇشەسى ەحوبانى تاستاپ كەتسە، بىزگە نە كومەك بولا الادى؟
17 وتباسىمىزدىڭ ٴبىر مۇشەسى قاۋىمنان شىعارىلسا نە وزدىگىنەن باس تارتسا، بۇل بىزگە قىلىش سۇققانداي قاتتى اۋىر ٴتييۋى مۇمكىن. وسىنداي كەزدە ەڭسەمىزدى قالاي كوتەرە الامىز؟
18 رۋحاني ىستەرمەن اينالىسا بەرىڭىز. اتالمىش جاعداي قاتتى اۋىر ٴتيىپ، ەڭسەڭىزدى باسىپ تۇرسا، ٶز سەنىمىڭىزدى نىعايتۋىڭىز قاجەت. بۇل ٷشىن كيەلى كىتاپتى كۇنىگە وقىڭىز، قاۋىم كەزدەسۋلەرىنە دايىندالىپ بارىڭىز، ۋاعىزداڭىز جانە توزۋگە قاجەتتى كۇش سۇراپ ەحوباعا دۇعا ايتىڭىز (ياھۋدا 20، 21). ال ەگەر وسى ىستەردىڭ ٴبارىن ىستەسەڭىز دە، بويىڭىزدى باسقان ٴزىل ەش تاراماسا شى؟ ەش بەرىلمەڭىز! رۋحاني ىستەرمەن اينالىسا بەرىڭىز. ۋاقىت وتە كەلە بۇل ٴسىزگە وي-سەزىمدى جۇگەندەي بىلۋگە كومەكتەسەدى. 73-ٴزابۇردىڭ جىرشىسى دا ٶمىرىنىڭ ٴبىر كەزەڭىندە ويى مەن سەزىمىن جۇگەندەي الماي قالعان. ٴبىراق ەحوباعا عيبادات ەتكەنىنىڭ ارقاسىندا ول قايتادان دۇرىس كوزقاراس تانىتا الدى (ٴزابۇر 73:16، 17). بۇل سىزگە دە كومەك بولا الادى.
19. ەحوبانىڭ ٶز حالقىن تۇزەتۋ ٵدىسىن قۇرمەتتەيتىنىمىزدى قالاي كورسەتە الامىز؟
19 ەحوبانىڭ تۇزەتۋ شاراسىن قۇرمەتتەڭىز. قۇدايدىڭ تۇزەتۋى بارىنە، قاۋىمنان شىعارىلعان ادامعا دا، پايداسىن تيگىزەدى. جاقىن ادامىمىزعا وسىنداي تۇزەتۋ شاراسى قولدانىلعانى بىزگە اۋىر تيسە دە، سونىڭ ارقاسىندا ول بولاشاقتا ەحوباعا ورالۋى مۇمكىن (ەۆرەيلەرگە 12:11 وقىڭىز). ال ازىرشە ٴبىز قاۋىمنان شىعارىلعان ادامدارمەن «ارالاسۋدى دوعارىڭدار» دەگەن ەحوبانىڭ بۇيرىعىن قۇرمەتتەۋىمىز كەرەك (قورىنتتىقتارعا 1-حات 5:11—13). بۇل وڭاي ەمەس، ارينە. ٴبىراق ٴبىز ولارمەن تەلەفون، كەلتە حات، حات، ەلەكتروندى پوچتا، يا بولماسا بۇقارالىق اقپارات قۇرالدارى ارقىلى ارالاسۋدان اۋلاق بولۋىمىز كەرەك.
20. نەدەن ٷمىتىمىزدى ۇزبەۋ كەرەك؟
20 ٷمىتىڭىز ەش ۇزىلمەسىن! سۇيىسپەنشىلىك «ەش ٷمىتىن ۇزبەيدى»، سوندىقتان سۇيىكتى ادامىمىز ەحوباعا ورالادى دەپ ۇمىتتەنەمىز (قورىنتتىقتارعا 1-حات 13:7). ەگەر ٴسىز جاقىن تۋىسىڭىزدىڭ وي-كوزقاراسى شىنىندا دا جاقسارىپ جاتقانىن كورسەڭىز، وندا ول ٷشىن دۇعا ايتا الاسىز. دۇعادا كيەلى كىتاپتان كۇش السىن جانە ەحوبانىڭ «ماعان قايتا بەت بۇر» دەگەن شاقىرۋىن قابىل السىن دەپ سۇراساڭىز بولادى (يشايا 44:22).
21. ٴماسىحشى بولعانىڭىز ٷشىن وتباسىڭىز سىزگە قارسىلىق كورسەتسە، نە ىستەۋىڭىز قاجەت؟
21 يسا ايتقانداي، ٴبىز ونى كەز كەلگەن ادامنان ارتىق جاقسى كورۋىمىز كەرەك. شاكىرتتەرى ٷي ىشىندەگىلەرىنىڭ قارسىلىعىنا قاراماستان، باتىل بولىپ، وزىنە ادالدىق ساقتايتىنىنا يسانىڭ كۇمانى بولمادى. سونىمەن، ەگەر ٴسىزدىڭ دە وتباسىڭىز ٴماسىحشى بولعانىڭىزعا قارسى بولسا، ەحوباعا ارقا سۇيەڭىز. قيىندىقتارعا ٴتوزۋ ٷشىن قۇدايدان كومەك سۇراڭىز (يشايا 41:10، 13). ەحوبا مەن يسا سىزگە رازى، سوندىقتان ولار ٴسىزدىڭ ادالدىعىڭىز ٷشىن سىي بەرەدى. وسىنى بىلگەنىڭىز سىزگە قۋانىش سىيلاسىن!
^ 10-ابزاس وتباسىندا اتا-انانىڭ بىرەۋى عانا ەحوباعا قىزمەت ەتكەن جاعدايدا بالالاردى تاربيەلەۋگە قاتىستى كوبىرەك مالىمەتتى «وقىرمان ساۋالدارى» ايدارىنان تابۋعا بولادى: «كۇزەت مۇناراسى» (ور.)، 15-تامىز، 2002-جىل.
