مەن 1923-‏جىلى يوركشيردەگى (‏انگليا)‏ حەمسۆورت قالاشىعىندا دۇنيەگە كەلدىم.‏ وتباسىندا ەكى بالا بولدىق،‏ مەن جانە اعام.‏ اعامنىڭ ەسىمى —‏ بوب.‏ جاسىم 9 دا بولعاندا،‏ اكەمىز ٴ‌بىر كىتاپتاردى وقي باستادى،‏ وندا جالعان ٴ‌دىن ادامداردى قالاي الدايتىنى تۇسىندىرىلگەن بولاتىن.‏ وقىپ-‏بىلگەنى اكەمە قاتتى اسەر ەتتى.‏ ول ٴ‌دىنباسىلارىن وزدەرى ۇيرەتكەن نارسەلەرىن وزدەرى ۇستانبايتىنى ٷشىن جاقتىرمايتىن.‏ بىرنەشە جىل وتكەن سوڭ،‏ ۇيىمىزگە بوب اتكينسون ەسىمدى كىسى كەلىپ،‏ رۋتەرفورد باۋىرلاستىڭ ٴ‌بىر بايانداماسىن تىڭداتتى.‏ سوندا ٴ‌بىز بۇل بايانداما مەن بۇرىنىراق اكەم وقىعان كىتاپتاردىڭ ٴ‌بىر جەردەن ەكەنىن تۇسىندىك.‏ اكە-‏شەشەم اتكينسون باۋىرلاستى كۇن سايىن كەشكى اسقا شاقىرىپ،‏ كيەلى كىتاپقا قاتىستى كوپ سۇراقتار قوياتىن.‏ ول ٴ‌بىزدى بىرنەشە شاقىرىم جەردەگى ٴ‌بىر باۋىرلاستىڭ ۇيىندە وتەتىن كەزدەسۋگە شاقىردى.‏ سودان ٴ‌بىز كەزدەسۋلەرگە ۇزبەي باراتىن بولدىق.‏ ٴ‌سويتىپ،‏ حەمسۆورتتا ٴ‌بىر شاعىن قاۋىم قۇرىلدى.‏ كوپ ۇزاماي ٴ‌بىزدىڭ ۇيدە ايماقتىق قىزمەتشىلەر (‏بۇرىنعى كەزدە اۋداندىق باقىلاۋشىلار وسىلاي اتالاتىن)‏ توقتاپ تۇراتىن،‏ سونداي-‏اق جاقىن اراداعى قاۋىمدارداعى ٸزاشارلاردى بىرگە تاماقتانۋعا شاقىراتىنبىز.‏ سول باۋىرلاستار ماعان جاقسى جاعىنان ىقپال ەتتى.‏

سول كەزدەرى وتباسىمىز جەكە كاسىبىن اشتى.‏ ٴ‌بىراق اكەمىز اعاما:‏ «ەگەر سەن ٸزاشار بولعىڭ كەلسە،‏ بۇل ٸستى جابامىز»،‏—‏ دەدى.‏ بوب كەلىسە كەتتى.‏ ٴ‌سويتىپ،‏ ول 21 جاسىندا ۇيادان ۇشىپ،‏ ٸزاشار بولدى.‏ ەكى جىلدان كەيىن،‏ جاسىم 16 عا تولعاندا،‏ مەن دە ٸزاشارلىقتى باستادىم.‏ دەمالىس كۇندەرى باسقالارمەن ۋاعىزدايتىنمىن،‏ ال جۇمىس كۇندەرى ٴ‌جيى جالعىز قىزمەت ەتەتىنمىن.‏ پاتەفوندى،‏ كۋالىك بەرۋ پاراقشاسىن قولداناتىنمىن.‏ كۋالىك بەرۋ پاراقشاسى دەگەنىمىز كيەلى كىتاپ جايلى قىسقا دا نۇسقا حابار جازىلعان ٴ‌بىر جاپىراق قاعاز ەدى.‏ ەحوبانىڭ باتالارىنىڭ ٴ‌بىرى —‏ مەنىمەن زەرتتەگەن ٴ‌بىر ايەلدىڭ رۋحاني قادامدار جاساعانى بولدى.‏ كەيىنىرەك سول ايەلدىڭ كوپ تۋىسى دا شىندىققا كەلدى.‏ ال كەلەسى جىلى مەري حەنشەل ەسىمدى باۋىرلاسپەن بىرگە ارنايى ٸزاشار بولىپ تاعايىندالدىم.‏ ٴ‌بىزدى چەشير گرافتىعىنداعى تىركەلمەگەن ايماققا جىبەردى.‏

ەكىنشى دۇنيە جۇزىلىك سوعىس كەزىندە ايەلدەر سوعىستىڭ مۇددەسى ٷشىن جۇمىس ىستەۋ كەرەك بولدى.‏ كەيبىر ٴ‌دىن قىزمەتكەرلەرى سوعىسقا بارۋدان بوساتىلعاندىقتان،‏ ٴ‌بىز دە ارنايى ٸزاشار رەتىندە بوساتىلاتىن شىعارمىز دەپ ويلادىق.‏ ٴ‌بىراق سۋديالار بۇنىمەن  كەلىسپەدى،‏ سودان مەنى 31 كۇنگە تۇرمەگە قامادى.‏ ال كەلەسى جىلى 19 عا تولعانىمدا،‏ سوعىستى قولداۋعا ار-‏ۇجدانىم جىبەرمەگەندىكتەن،‏ سوتقا تاعى دا 2 رەت بارۋعا تۋرا كەلدى.‏ دەگەنمەن ەكى جاعدايدا دا بيلىكتەگىلەر مەنى جىبەرە سالدى.‏ وسىلاردى باستان وتكەرىپ جۇرگەندە،‏ ماعان كيەلى رۋحتىڭ كومەكتەسىپ جاتقانىن جانە ەحوبا وسى ارقىلى مەنى نىعايتىپ جاتقانىن ٴ‌بىلدىم (‏يشايا 41:‏10،‏ 13‏)‏.‏

ارتۋر مەتيۋزبەن 1946-‏جىلى تانىستىم.‏ ول سوعىسقا بارماعانى ٷشىن 3 اي تۇرمەدە وتىرىپ،‏ ەندى شىققان بولاتىن.‏ تۇرمەدەن شىعا سالا،‏ ول حەمسۆورتتا ارنايى ٸزاشار بولىپ قىزمەت ەتەتىن باۋىرى دەننيسكە بارادى.‏ اكەلەرى ولارعا كىشكەنتاي كەزدەرىنەن باستاپ ەحوبا جايلى ٴ‌تالىم بەرگەن ەكەن.‏ ٴ‌سويتىپ،‏ ولار جاس ٶسپىرىم كەزىندە شومىلدىرۋ راسىمىنەن ٶتىپتى.‏ كەيىن ەكەۋى بىرگە ٸزاشارلىق قىزمەتتى باستاعان.‏ ٴ‌بىراق كوپ ۇزاماي دەننيستى يرلاندياعا تاعايىنداپتى.‏ وسىلاي ارتۋر سەرىكسىز قالعان ەكەن.‏ وسى ەڭبەكقور ٸزاشاردىڭ ٴ‌جۇرىس-‏تۇرىسىنا قاراپ،‏ اكە-‏شەشەم ونى ۇناتىپ قالىپتى.‏ سودان ونى ۇيدە تۇرۋعا شاقىرعان ەكەن.‏ ۇيگە بارعان كەزدەرىمدە اس ٸشىپ بولعان سوڭ،‏ ارتۋر ەكەۋىمىز ىدىس جۋاتىنبىز.‏ كەيىن ٴ‌بىر-‏بىرىمىزگە حات جازا باستادىق.‏ 1948-‏جىلى ارتۋر تاعى ٷش ايعا تۇرمەگە قامالدى.‏ ال 1949-‏جىلدىڭ قاڭتارىندا وتاۋ قۇردىق.‏ ٴ‌بىزدىڭ ماقساتىمىز تولىق ۋاقىتتى قىزمەتتەن مۇمكىندىگىنشە قول ۇزبەۋ بولدى.‏ اقشامىزدى ۇنەمدەپ جۇمسايتىنبىز.‏ بۇعان قوسا،‏ دەمالىس كۇندەرىمىزدە جەمىس جيناپ ازىن-‏اۋلاق اقشا تاپتىق.‏ ەحوبانىڭ ارقاسىندا ٸزاشارلىعىمىزدى جالعاستىرا الدىق.‏

ٴ‌بىر جىلدان ٴ‌سال اسقاندا ٴ‌بىز سولتۇستىك يرلاندياعا تاعايىندالدىق.‏ الدىمەن ارما قالاشىعىنا،‏ سوسىن نيۋري قالاشىعىنا باردىق.‏ تۇرعىنداردىڭ باسىم بولىگى كاتوليكتەر بولاتىن.‏ بۇل ايماقتا ٴ‌دىني الالاۋشىلىق كەڭ تاراعاندىقتان،‏ ۋاعىز ايتقاندا اباي بولىپ،‏ پاراساتتىلىق تانىتۋىمىز كەرەك بولدى.‏ ال كەزدەسۋلەرىمىز ٴ‌بىز تۇرعان جەردەن 16 شاقىرىم جەردەگى ٴ‌بىر باۋىرلاستاردىڭ ۇيىندە ٶتىپ ٴ‌جۇردى.‏ كەزدەسۋگە سەگىز ادامداي كەلەتىن.‏ كەيدە سول ۇيدە تۇنەپ شىعاتىنبىز.‏ ەدەندە ۇيىقتايتىنبىز.‏ ال تاڭەرتەڭ ۇلكەن داستارقان باسىنا جيىلىپ،‏ ٴ‌ماز-‏مايرام بولاتىنبىز.‏ قازىر سول ايماقتا كۋاگەرلەردىڭ سانى كوپ ەكەنى زور قۋانىش سىيلايدى.‏

اعام بوب پەن جەڭگەم لوتتي سولتۇستىك يرلانديادا ارنايى ٸزاشار بولىپ قىزمەت ەتىپ جۇرگەنىنە ٴ‌بىراز بولاتىن.‏ 1952-‏جىلى تورتەۋمىز دە بەلفاستتا وتكەن وبلىستىق كونگرەسكە قاتىناستىق.‏ ٴ‌بارىمىز قوناقجاي ٴ‌بىر باۋىرلاستىڭ ۇيىندە توقتادىق.‏ سول ۇيدە بريتانيادا فيليال قىزمەتشىسى بولعان پرايس حيۋز باۋىرلاس تا تۇراقتادى.‏ ٴ‌بىر كەشتە ٴ‌بارىمىز جاڭادان شىققان «قۇدايدىڭ جولى —‏ سۇيىسپەنشىلىك» اتتى كىتاپشاسىن تالقىلادىق.‏ بۇل كىتاپشا يرلانديانىڭ تۇرعىندارىنا ارناپ شىعارىلعان بولاتىن.‏ حيۋز باۋىرلاس يرلانديا رەسپۋبليكاسىنداعى كاتوليكتەرگە ۋاعىزداۋ قيىن ەكەنىن ٴ‌تۇسىندىردى.‏ ول جاقتا باۋىرلاستاردى تۇرىپ جاتقان جەرلەرىنەن كەتۋگە ماجبۇرلەپ،‏ ٴ‌دىني قىزمەتكەرلەر ادامداردى باۋىرلاستارىمىزعا قارسى ايداپ سالعان ەكەن.‏ حيۋز باۋىرلاس بىلاي دەدى:‏ «بىزگە كولىگى بار ەرلى-‏زايىپتىلار قاجەت،‏ ولار وسى ەلدە ارنايى كىتاپشانى تاراتۋ ناۋقانىنا قاتىناسسا ەكەن دەيمىز»‏ *‏.‏ «ٴ‌بىز دايىنبىز!‏»—‏ دەپ جاۋاپ بەرگەنىمىز سول كەز ەدى.‏

 دۋبليندە ٸزاشارلار جىلدار بويى ادال قىزمەت ەتىپ كەلە جاتقان رۋتلاند «مامامىزدىڭ» ۇيىندە توقتايتىن.‏ ٴ‌بىز دە ٴ‌بىرشاما ۋاقىت سوندا تۇردىق.‏ سول جەردە كەيبىر مۇلكىمىزدى ساتتىق.‏ سوسىن تورتەۋمىز بوبتىڭ موتوسيكلىنە وتىرىپ الىپ،‏ كولىك ىزدەۋگە شىقتىق.‏ ٴ‌سويتىپ،‏ قولدانىستاعى كۇيى جاقسى ٴ‌بىر كولىكتى تاپتىق.‏ ەشقايسىسىمىز كولىك ايداۋدى بىلمەگەندىكتەن،‏ ساتۋشى كىسىدەن ونى ۇيگە جەتكىزىپ بەرۋىن وتىندىك.‏ ارتۋر سول كەش بويى توسەكتە وتىرىپ،‏ كولىك جۇرگىزگەنسىپ دايىندالۋمەن بولدى.‏ ال كەلەسى كۇنى تاڭەرتەڭ ول كولىكتى گاراجدان شىعارامىن دەپ الەك بولىپ جاتقاندا،‏ ميلدرەد ۋيللەت (‏كەيىنىرەك جون بارر باۋىرلاسقا تۇرمىسقا شىققان)‏ ەسىمدى ميسسيونەر كەلىپ قالدى.‏ ول كولىك ايداي الاتىن.‏ سودان ول بىزگە كولىك ايداۋدى ۇيرەتتى دە،‏ جولعا شىعۋعا دايىن بولدىق.‏

ەندى بىزگە تۇراتىن جەر ىزدەۋ قاجەت بولدى.‏ باۋىرلاستار بىزگە كولىككە تيەلگەن ۇيشىككە تۇرماعاندارىڭ ٴ‌جون دەگەن ەدى،‏ ويتكەنى قارسىلاستار وعان ٶرت قويۋى مۇمكىن ەدى.‏ سوندىقتان ٴ‌بىز ٷي ىزدەي باستادىق،‏ ٴ‌بىراق بىردە-‏بىرەۋىن تاپپادىق.‏ سول كۇنى تورتەۋمىز كولىكتە تۇنەپ شىقتىق.‏ كەلەسى كۇنى بار تاپقانىمىز قولدان جاسالعان جىلجىمالى ۇيشىك بولدى،‏ ونىڭ ىشىندە كىشىگىرىم ەكى قاباتتى كىرەۆەت بار ەكەن.‏ سول ۇيشىك باس تىرەر ٷيىمىز بولدى.‏ ٴ‌بىر قىزىعى،‏ جىلحىمالى ۇيشىك قوياتىن جەر ىزدەپ باس قاتىرمادىق،‏ ويتكەنى جەرگىلىكتى ديقاندار بىزگە جىلى قاباق تانىتىپ ٶز جەرىنە قويۋعا رۇقسات بەرەتىن ەدى.‏ ٴ‌بىز ۇيشىكتى ٴ‌بىر ورىنعا قويىپ،‏ ودان 16—‏24 شاقىرىمداي جەردە ۋاعىزداپ جۇرەتىنبىز.‏ ال جاڭا جەرگە كوشكەندە،‏ بۇدان بۇرىن جىلجىمالى ۇيشىك تۇرعان جەرگە بارىپ ۋاعىزدايتىنبىز.‏

ٴ‌بىز يرلانديا رەسپۋبليكاسىنىڭ وڭتۇستىك-‏شىعىسىنداعى بارلىق ۇيلەردى ارالاپ شىقتىق.‏ اسا كوپ قارسىلىققا كەزىكپەدىك.‏ 20 000 نان استام كىتاپشا تاراتتىق،‏ ال قىزىعۋشىلىق بىلدىرگەن ادامداردىڭ اتى-‏ٴ‌جونىن بريتانياداعى فيليالعا جىبەرىپ وتىردىق.‏ قازىر يرلانديادا جۇزدەگەن كۋاگەردىڭ بولعانى نەتكەن باتا دەسەڭىزشى!‏

بىرەر جىل وتكەن سوڭ،‏ ٴ‌بىز وڭتۇستىك لوندونعا تاعايىندالدىق.‏ بىرنەشە اپتا وتكەننەن كەيىن،‏ بريتانيا فيليالىنداعى باۋىرلاستار ارتۋرعا حابارلاسىپ،‏ ەرتەسىندە-‏اق اۋداندىق قىزمەتتى باستاۋدى ايتتى!‏ ٴ‌بىر اپتانىڭ ىشىندە ارنايى دايىندىقتان وتە سالا،‏ شوتلاندياداعى اۋدانىمىزعا جول تارتتىق.‏ سوندىقتان ارتۋردىڭ بايانداما دايىندايتىن ۋاقىتى وتە از بولدى.‏ ٴ‌بىراق ول قۇدايعا دەگەن قىزمەتتە كەز كەلگەن تاپسىرمانى،‏ قانشا قيىن بولسا دا،‏ قۋانا-‏قۋانا ىستەيتىن.‏ ونىڭ ۇلگىسى مەنى قاتتى جىگەرلەندىرەتىن.‏ اۋداندىق قىزمەت ەكەۋمىزگە قاتتى ۇنادى.‏ قاۋىمعا تىركەلمەگەن ايماقتا جىلدار بويى قىزمەت ەتكەننەن كەيىن،‏ سونشاما كوپ باۋىرلاستىڭ اراسىندا جۇرگەنىمىز ٴ‌بىز ٷشىن زور باتا بولدى.‏

ارتۋر 1962-‏جىلى عالاقات مەكتەبىنە شاقىرىلعاندا،‏ ۇلكەن شەشىم قابىلداۋ كەرەك بولدى.‏ مەكتەپ باعدارلاماسى ون ايعا ٴ‌سوزىلماق ەدى،‏ ال مەن شاقىرىلماعاندىقتان،‏ ونىمەن بىرگە بارا المايتىنمىن.‏ دەسە دە ٴ‌بىز ارتۋردىڭ مەكتەپكە بارعانى دۇرىس دەپ شەشتىك.‏ ٸزاشار سەرىكسىز قالعاندىقتان،‏ فيليال مەنى حەمسۆورتقا قايتا ارنايى ٸزاشار رەتىندە تاعايىندادى.‏ ٴ‌بىر جىلدان سوڭ ارتۋر قايتىپ كەلگەندە،‏ ٴ‌بىز وبلىستىق قىزمەتكە تاعايىندالدىق.‏ ٴ‌بىزدىڭ اۋماققا شوتلانديا،‏ انگليانىڭ سولتۇستىگى،‏ سولتۇستىك يرلانديا كىرەتىن.‏

1964-‏جىلى ارتۋر يرلانديا رەسپۋبليكاسىنداعى بەتەلگە فيليال قىزمەتشىسى بولىپ تاعايىندالدى.‏ ارالاۋشىلىق قىزمەتتى قاتتى جاقسى كورگەندىكتەن،‏ بەتەلگە بارار الدىندا ٴ‌بىراز ۋايىمدادىم.‏ وتكەن جىلدارعا قاراپ،‏ بەتەلدە قىزمەت ەتۋ مارتەبەسى بەرىلگەنىنە وتە ريزامىن.‏ جۇكتەلگەن تاپسىرمانى اسا ىستەگىڭ كەلمەسە دە،‏ ونى قولعا الساڭ،‏ ەحوبا ٵرقاشان دا باتاسىن توگەدى دەپ ويلايمىن.‏ بەتەلدە كەڭسەلىك جۇمىس ىستەدىم،‏ ادەبيەتتەردى قوراپقا جينادىم،‏ اس دايىندادىم،‏ تازالىق جۇمىسىن اتقاردىم.‏ سول ۋاقىت ارالىعىندا وبلىستىق قىزمەتتى دە اتقاردىق.‏ سونىڭ ارقاسىندا ەلدىڭ ٵر شەتىندەگى باۋىرلاستارمەن تانىستىق.‏ وسىنىڭ جانە كەزىندە بىزبەن زەرتتەپ،‏ رۋحاني قادامدار جاساعان زەرتتەۋشىلەرمەن كورىسكەننىڭ ارقاسىندا يرلاندياداعى باۋىرلاستارمەن ىنتىماعىمىز نىعايا ٴ‌تۇستى.‏ بۇل —‏ كەرەمەت باتا!‏

1965-‏جىلى يرلانديانىڭ دۋبلين قالاسىندا ٴ‌بىرىنشى رەت حالىقارالىق كونگرەسس ٶتتى *‏.‏ ول جاقتا قاتتى قارسىلىق بولسا دا،‏ كونگرەسس وتە كەرەمەت ٶتتى.‏ 3948 ادام كەلىپ،‏ 65 ٸ شومىلدىرۋ راسىمىنەن ٶتتى.‏ شەتەلدەردەن كەلگەن 3500 باۋىرلاس دۋبليندەگى ۇيلەردە توقتادى.‏ ٵر ۇيدىڭ قوجايىنىنا العىس حات جىبەرىلدى.‏ ولار دا ۇيلەرىندە توقتاعان باۋىرلاستاردىڭ ادەپتى ٴ‌جۇرىس-‏تۇرىسىن ماقتادى.‏ يرلاندياعا بۇل ەلەۋلى وزگەرىس جاقسى جاعىنان ىقپال ەتتى.‏

1966-‏جىلى وڭتۇستىك جانە سولتۇستىك يرلاندياداعى تەوكراتيالىق ٸس بىرىگىپ،‏ دۋبلين فيليالىنىڭ قاراماعىنا ٶتتى.‏ ال ارالدىڭ وزىندە،‏ كەرىسىنشە،‏ ادامدار ٴ‌دىن مەن ساياساتقا بولا جىك-‏جىككە ٴ‌بولىنىپ كەتكەن ەدى.‏ كاتوليكتەردىڭ شىندىققا كوپتەپ كەلىپ جاتقانىن جانە كەزىندە پىروتەستانت دىنىندە بولعان باۋىرلاستارىمەن ەحوباعا يىق تىرەسە قىزمەت ەتىپ جۇرگەندەرىن كورىپ،‏ قايران قالدىق.‏

2011-‏جىلى بريتانيا مەن يرلانديا فيليالدارى بىرىگىپ،‏ ٴ‌بىز لوندونداعى بەتەلگە تاعايىندالعاندا ٶمىرىمىز تۇبەگەيلى وزگەردى.‏ سول كەزدەرى ارتۋردىڭ دەنساۋلىعى سىر بەرگەندىكتەن،‏ مەن ونى ۋايىمداي باستادىم.‏ ول پاركينسون اۋرۋىنا شالدىقتى.‏ وكىنىشكە وراي،‏ 2015-‏جىلدىڭ 20-‏مامىرىندا 66 جىل بويى سەرىگىم بولىپ كەلگەن جارىم قايتىس بولدى.‏

سوڭعى جىلدارى قاتتى قايعىرىپ،‏ جان كۇيزەلىسىنە ٴ‌تۇستىم.‏ بۇرىن ارتۋر ٵرقاشان جانىمنان تابىلۋشى ەدى.‏ ونى قاتتى ساعىندىم!‏ ٴ‌بىراق وسىنداي جاعدايلاردان وتكەندە،‏ ەحوباعا جاقىنداي تۇسەسىڭ.‏ ادامدار ارتۋردى قانشالىقتى جاقسى كورگەنىن بىلگەندە،‏ قۋانىپ كەتەمىن.‏ ماعان يرلانديا،‏ بريتانيا،‏ ٴ‌تىپتى قۇراما شتاتتارداعى باۋىرلاستاردان حاتتار كەلىپ جاتادى.‏ وسى حاتتارمەن قوسا،‏ ارتۋردىڭ باۋىرى دەننيس پەن ابىسىنىم مەۆيس،‏ ولاردىڭ قىزدارى رۋت پەن جۋدي ماعان زور دەمەۋ بولىپ كەلەدى.‏

مەنى يشايا 30:‏18 قاتتى جىگەرلەندىرەدى.‏ وندا بىلاي دەلىنگەن:‏ «ەحوبا سەندەرگە ىقىلاسىن ٴ‌تۇسىرۋ ٷشىن شىداممەن كۇتىپ وتىر.‏ ول سەندەرگە مەيىرىم تانىتۋ ٷشىن تۇرەگەلەدى.‏ ويتكەنى ەحوبا —‏ ادىلدىك ورناتاتىن قۇداي.‏ ونى تاعاتسىزدانا كۇتەتىندەردىڭ ٴ‌بارى باقىتتى».‏ ەحوبا بۇكىل قيىندىقتارىمىزدى شەشىپ بەرەتىن ۋاقىتتى كۇتىپ وتىرعانى جانە جاڭا دۇنيەدە بىزگە وتە قىزىقتى تاپسىرمالار بەرەتىنى كوڭىلىمە جاي بەرەدى.‏

وتكەندى ويلاسام،‏ ەحوبانىڭ يرلاندياداعى ۋاعىز ىسىندە جەتەكشىلىك ەتىپ،‏ جارىلقاعانىنا كوزىم جەتەدى!‏ وسى ىستە ۇلەسىمدى قوسا العانىم —‏ مەن ٷشىن اسقان مارتەبە.‏ راسىندا دا،‏ ەحوبانىڭ ايتقانىن ىستەسەك،‏ ٵرقاشان باتاسىن كورەمىز!‏