جاعدايىڭىز وزگەرسە دە، جانتىنىشتىعىنان ايىرىلماڭىز
«جانىمدى تىنىشتاندىرامىن، جۇباتامىن» (ٴزابۇر 131:2).
اندەر: 128، 129
1، 2. ا) تابان استىنان بولعان وزگەرىستەر بىزگە قالاي اسەر ەتۋى مۇمكىن؟ (ماقالانىڭ باسىنداعى سۋرەتتى قاراڭىز.) ٵ) ٴزابۇر 131 گە ساي، جانتىنىشتىعىن ساقتاۋعا بىزگە نە كومەكتەسەدى؟
بەتەلدە 25 جىلدان اسا ۋاقىت قىزمەت ەتكەننەن كەيىن للويد پەن الەكساندرا تاناپقا ٸزاشار رەتىندە تاعايىندالدى. العاشىندا ولاردىڭ بۇعان كوڭىلدەرى ٴتۇستى. للويد بىلاي دەيدى: «مەن بەتەلدەگى قىزمەتىمدى قاتتى جاقسى كورەتىنمىن. ٶزىمدى بەتەلدەن باسقا جەردە ەلەستەتە المايتىنمىن. بۇل وزگەرىستىڭ نە سەبەپتى بولعانىن ساناممەن تۇسىنسەم دە، سول كەزدەرى ٶزىمدى ٴجيى كەرەكسىز سەزىنەتىنمىن». للويد بىردە ٶزىن جاقسى سەزىنسە، بىردە ۇنجىرعاسى ٴتۇسىپ كەتەتىن.
2 ومىرىمىزدە ٴبىز كۇتپەگەن جايتتار ورىن الىپ تۇرادى. وسىندايدا بويىمىزدى ۋايىم بيلەپ، جانىمىز كۇيزەلۋى مۇمكىن (ناقىل سوزدەر 12:25). وزگەرىستەردى قابىلداۋ نە ولارعا بەيىمدەلۋ قيىن بولعان كەزدە، جانتىنىشتىعىن ساقتاۋ ٷشىن نە ىستەسەك بولادى؟ (ٴزابۇر 131:1—3 وقىڭىز). بۇل ماقالادا ەحوبانىڭ ەجەلدەگى جانە بۇگىندەگى قىزمەتشىلەرىنىڭ مىسالدارىن قاراستىرامىز. ومىرلەرى تابان استىنان وزگەرگەنىنە قاراماي، ولار جانتىنىشتىعىن ساقتاپ قالا العان.
«قۇداي تىنىشتىعىنىڭ» كومەگى
3. قالايشا ٴجۇسىپتىڭ ٶمىرى كۇرت وزگەردى؟
3 ٴجۇسىپ جايلى ويلانىپ كورەيىكشى. ول جاقىپتىڭ ەڭ سۇيىكتى ۇلى ەدى. سوندىقتان باۋىرلارى جۇسىپكە قىزعانىشپەن قاراپ، ونى 17 جاسىندا قۇلدىققا ساتىپ جىبەردى (مۇسانىڭ 1-جازباسى 37:2—4، 23—28). ٴجۇسىپ 13 جىلداي ۋاقىت مىسىردا جاپا شەكتى. العاشىندا ول قۇل بولدى، ال كەيىننەن تۇرمەدە وتىردى. ول جانىنداي جاقسى كورەتىن اكەسىنەن جىراقتا ٴجۇردى. ونىڭ قيىندىقتاردىڭ كەسىرىنەن ٷمىتسىز كۇي كەشىپ، قاتۋلانىپ كەتۋىنە بولار ەدى. ٴبىراق جۇسىپكە بۇنداي سەزىمدەرگە بوي الدىرماۋعا نە كومەكتەستى؟
4. ا) ٴجۇسىپ تۇرمەدە وتىرعاندا نە ىستەدى؟ ٵ) ەحوبا ٴجۇسىپتىڭ دۇعاسىنا قالاي جاۋاپ بەردى؟
4 ٴجۇسىپ تۇرمەدە وتىرعان كەزدە بار نازارىن ەحوبانىڭ وزىنە قالاي كومەكتەسىپ جاتقانىنا اۋدارعان بولسا كەرەك (مۇسانىڭ 1-جازباسى 39:21؛ ٴزابۇر 105:17—19). بالكىم، ول جاس كەزىندە كورگەن پايعامبارلىق ٴمانى بار تۇستەرى جايلى ويلانعان شىعار. ٴسۇيتىپ، ەحوبانىڭ وزىمەن بىرگە ەكەنىن تۇسىنگەندە، جانى جاي تاپقان بولار (مۇسانىڭ 1-جازباسى 37:5—11). ول ٴجيى ەحوباعا ىشىندەگىسىن اقتارىپ دۇعا ەتكەن بولۋى مۇمكىن (ٴزابۇر 145:18). ال ەحوبا ٴجۇسىپتىڭ دۇعاسىنا جاۋاپ بەرىپ، قانداي جاعداي ورىن الماسىن «وعان جار بولاتىنىنا» سەندىردى (ەلشىلەردىڭ ىستەرى 7:9، 10) *.
5. «قۇداي تىنىشتىعى» بىزگە قالايشا قىزمەتىمىزدى جالعاستىرا بەرۋگە كومەكتەسەدى؟
5 جاعدايىمىز قانشالىقتى قيىن بولماسىن، «وي-سانامىزدى» قورعاپ، كوڭىلىمىزدى جايلاندىراتىن «قۇدايدىڭ تىنىشتىعىنا» يە بولا الامىز (فىلىپىلىكتەرگە 4:6، 7 وقىڭىز). بويىمىزدى ۋايىم بيلەپ، كوڭىلىمىز جابىرقاعان كەزدەرى «قۇدايدىڭ تىنىشتىعى» بىزگە كۇش بەرەدى. سوندا ٴبىز بەرىلمەي، ەحوباعا ٵرى قاراي دا قىزمەت ەتە بەرەمىز. ال قازىر وسىنداي جاعدايدى باستان وتكەرگەن كەيبىر باۋىرلاستاردىڭ وقيعالارىنا نازار اۋدارايىق.
ەحوبادان كومەك سۇراڭىز
6، 7. قالاي دۇعالارىمىز قايتادان جانتىنىشتىعىنا يە بولۋعا كومەكتەسەدى؟ مىسال كەلتىرىڭىز.
6 رايان مەن دجۋلەتتا ەندى ارنايى ٸزاشار بولمايتىندارىن بىلگەندە، كوڭىلدەرى ٴتۇستى. رايان بىلاي دەيدى: «ٴبىز بىردەن ەحوباعا دۇعا ەتتىك. بۇل جاعدايدى ٴبىز ەحوباعا سەنىم ارتۋدىڭ ەرەكشە مۇمكىندىگى دەپ قابىلدادىق. قاۋىمىمىزداعى كوپ باۋىرلاس شىندىققا جاڭادان كەلگەن ەدى. سوندىقتان ٴبىز سەنىم تانىتۋدا ولارعا جاقسى ۇلگى بولايىقشى دەپ دۇعا ەتتىك».
7 ەحوبا ولاردىڭ دۇعالارىنا قالاي جاۋاپ بەردى؟ رايان بىلاي دەيدى: «دۇعادان كەيىن بىردەن بويىمىزداعى ۋايىم مەن جاعىمسىز سەزىمدەردەن ارىلدىق. ەحوبانىڭ تىنىشتىعى جۇرەگىمىز بەن وي-سانامىزدى قورعادى. وڭ كوزقاراس تانىتا بەرەر بولساق، ەحوبا ٴبىزدى ٵرى قاراي دا قولدانا الاتىنىن تۇسىندىك».
8—10. ا) ۋايىمعا سالىنعاندا قۇداي رۋحى بىزگە قالاي كومەكتەسە الادى؟ ٵ) بار نازارىمىزدى قىزمەتكە تىكسەك، ەحوبا بىزگە قالاي كومەكتەسۋى مۇمكىن؟
8 كيەلى رۋح ٴبىزدى جانتىنىشتىعىن ساقتاۋعا كومەكتەسەدى. سونداي-اق ول ٴبىزدى ومىردەگى ەڭ ماڭىزدى نارسەلەردى تۇسىنۋگە كومەكتەسەتىن كيەلى كىتاپ تارماقتارىنا جەتەلەيدى (جوحان 14:26، 27 وقىڭىز). بەتەلدە شامامەن 25 جىلداي قىزمەت ەتكەن فيليپ پەن مەريدىڭ مىسالىن قاراستىرىپ كورەيىك. ٴتورت ايدىڭ ىشىندە ەكەۋىنىڭ دە انالارى جانە فيليپتىڭ ٴبىر تۋىسى قايتىس بولدى. ونىڭ ۇستىنە ولار مەريدىڭ ناۋقاس اكەسىنە كۇتىم جاساۋلارى كەرەك ەدى.
9 فيليپ ٴسوزىن بىلاي دەپ جالعادى: «بىردە مەن «كۇزەت مۇناراسىنىڭ» زەرتتەۋگە ارنالعان سانىندا كەلتىرىلگەن قولوستىقتارعا 1:11 گە كوزىم ٴتۇستى. مەن قيىندىقتارعا توزۋگە تىرىسىپ جۇرسەم دە، ماعان ٴبىر نارسەنىڭ جەتىسپەيتىنىن ٴتۇسىندىم. مەن بارىنە جاي عانا ەمەس، «شىدامدىلىقپەن جانە قۋانىشپەن ٴتوزۋىم» كەرەك ەدى. بۇل تارماق ماعان قۋانىشتى بولۋىم قانداي دا ٴبىر جاعدايعا ەمەس، قايتا كيەلى رۋحتىڭ ومىرىمە قالاي اسەر ەتىپ جاتقانىنا بايلانىستى ەكەنىن ەسىمە سالدى».
10 فيليپ پەن مەري بار نازارلارىن قىزمەت ەتۋگە اۋدارعاندىقتان، ەحوبا ولاردى كوپتەگەن جولمەن جارىلقادى. بەتەلدەن كەتكەننەن كەيىن كوپ ۇزاماي ەكەۋى دە زەرتتەۋ ساباقتارىن باستاپتى. زەرتتەۋشىلەرى كيەلى كىتاپتى زور ىقىلاسپەن زەرتتەپ، رۋحاني قادامدار جاسادى. مەري بىلاي دەپ ٴبولىستى: «زەرتتەۋشىلەرىمىز ٴبىز ٷشىن زور باتا بولدى. ەحوبا بىزگە ٴبارى جاقسى بولادى دەپ جاتقانداي بولدى».
ەحوبانىڭ باتاسىنا كەنەلۋ ٷشىن ارەكەت ەتىڭىز
ومىرىمىزدە وزگەرىستەر ورىن العاندا، جۇسىپكە قاي جاعىنان ەلىكتەي الامىز؟ (11—13 ابزاستاردى قاراڭىز)
11، 12. ا) ەحوبانىڭ باتاسىنا كەنەلۋ ٷشىن ٴجۇسىپ نە ىستەدى؟ ٵ) ەحوبا ٴجۇسىپتى قالاي جارىلقادى؟
11 ٶمىرىمىز تابان استىنان وزگەرگەن كەزدە، ۋايىمعا قاتتى بەرىلىپ، پروبلەمالارىمىزدان باسقا ەش نارسەنى ويلاماي كەتۋىمىز مۇمكىن. ٴجۇسىپتىڭ دە سولاي ەتۋىنە بولار ەدى. ٴبىراق ول ٶز جاعدايىندا قولىنان كەلگەننىڭ ٴبارىن ىستەۋگە تىرىستى. ول پوتيفاردىڭ ۇيىندە ىنتى-شىنتىسىمەن جۇمىس ىستەدى. كەيىننەن تۇرمە باستىعى قانداي تاپسىرما بەرمەسىن ولاردى جان سالا اتقاردى (مۇسانىڭ 1-جازباسى 39:21—23).
12 ٴبىر كۇنى تۇرمەگە تۇسكەن پەرعاۋىننىڭ ەكى قىزمەتشىسى ٴجۇسىپتىڭ قاراماعىنا ٶتتى. ٴجۇسىپ ولارعا مەيىرىمدىلىكپەن قارادى. ولار وزدەرىن ەركىن سەزىنگەندىكتەن، جۇسىپكە ۋايىمدارى مەن تۇندە كورگەن تۇسىنىكسىز تۇستەرى جايلى ايتىپ بەردى (مۇسانىڭ 1-جازباسى 40:5—8). سول كەزدە ٴجۇسىپ بۇل اڭگىمەنىڭ نەگە اكەلەتىنىن بىلگەن جوق. ٴبىراق سودان ەكى جىل وتكەننەن كەيىن ول بوستاندىققا شىعىپ، مىسىردىڭ بەدەلدى بيلەۋشىسىنە اينالدى. ودان تەك پەرعاۋىن عانا جوعارى تۇردى (مۇسانىڭ 1-جازباسى 41:1، 14—16، 39—41).
13. كەز كەلگەن جاعدايدا ەحوبانىڭ باتاسىنا يە بولۋ ٷشىن نە ىستەگەنىمىز ٴجون؟
13 ٴجۇسىپ سياقتى ٴبىز دە ٶزىمىز ىقپال ەتە المايتىن جاعدايلارعا تاپ بولۋىمىز مۇمكىن. ٴبىراق سونداي جاعدايدا شىدامدىلىق تانىتىپ، قولىمىزدان كەلگەندى ىستەي بەرەر بولساق، ەحوبانىڭ باتاسىنا يە بولامىز (ٴزابۇر 37:5). ٴتىپتى تۇسىنىكسىز كۇي كەشىپ، جاعدايىمىزدى ۋايىمداساق تا، ٷمىتسىز نە «دارمەنسىز كۇيدە» قالمايمىز (قورىنتتىقتارعا 2-حات 4:8، سىلتەمە). وسىنداي كەزدە بارىمىزدى سالىپ قىزمەت ەتسەك، ەحوبا جانىمىزدان تابىلادى.
بار نازارىڭىز قىزمەتتە بولسىن
14—16. ومىرىندە ٵرتۇرلى وزگەرىستەر بولسا دا، قالايشا ٴفىلىپ قىزمەتتەن قول ۇزبەدى؟
14 ىزگى حاباردى جاريالاۋشى ٴفىلىپ ومىرىندە كوپتەگەن وزگەرىستەر ورىن السا دا، بار نازارىن قىزمەتكە تىككەن. وسى جاعىنان ول بىزگە كەرەمەت ۇلگى قالدىردى. بىردە ول يەرۋساليمدە جاڭا قىزمەتكە تاعايىندالدى (ەلشىلەردىڭ ىستەرى 6:1—6). كەيىن جاعداي تولىعىمەن وزگەردى. ستەپان ولتىرىلگەننەن كەيىن ماسىحشىلەر اياۋسىز قۋعىن-سۇرگىنگە ۇشىراپ، يەرۋساليمنەن جان-جاققا بىتىراپ كەتتى. سول كەزدە ٴفىلىپ قىزمەتىنەن قول ۇزگىسى كەلمەگەندىكتەن، ساماريا قالاسىنا باردى. ويتكەنى ساماريادا ىزگى حاباردى ەستىمەگەن كوپ ادام بار ەدى (ماتاي 10:5؛ ەلشىلەردىڭ ىستەرى 8:1، 5).
15 ٴفىلىپ قۇدايدىڭ رۋحى قايدا جەتەلەسە، سول جەرگە بارۋعا دايىن بولدى. سوندىقتان ەحوبا ونى ىزگى حاباردى ٵلى ەستىمەگەن ادامدار بار جەرلەرگە جىبەردى. كوپتەگەن ياھۋديلەر ساماريالىقتارعا مەنسىنبەي قارايتىن. الايدا ٴفىلىپ الالاۋشىلىق تانىتپاي، ولارعا بار ىنتاسىمەن ىزگى حاباردى جەتكىزدى. ال ساماريالىقتار ونى «ۇيىپ تىڭدادى» (ەلشىلەردىڭ ىستەرى 8:6—8).
16 كەيىن قۇدايدىڭ رۋحى ٴفىلىپتى كوپتەگەن وزگە ۇلت ادامدارى تۇراتىن ازوت پەن كەساريا قالالارىنا باعىتتادى. ول سول جەرلەردە ۋاعىزداۋى كەرەك ەدى (ەلشىلەردىڭ ىستەرى 8:39، 40). سوسىن ٴفىلىپتىڭ ومىرىندە تاعى ٴبىر وزگەرىس ورىن الدى. ول ٴبىر جەردە تۇراقتاپ، وتباسىن قۇرىپ، بالالى-شاعالى بولدى. ٴفىلىپ ومىرىندە قانداي وزگەرىس ورىن السا دا، قىزمەتتەن قول ۇزبەدى. ال ەحوبا ٴفىلىپ پەن ونىڭ وتباسىن جارىلقاپ وتىردى (ەلشىلەردىڭ ىستەرى 21:8، 9).
17، 18. ومىرىمىزدە وزگەرىستەر ورىن العاندا، نازارىمىزدى قىزمەتكە تىككەننىڭ قانداي پايداسى بار؟
17 جاعدايىمىز وزگەرگەندە، نازارىمىزدى قىزمەتكە اۋدارعانىمىز قۋانىشتى ساقتاپ قالۋعا كومەكتەسەدى. بۇعان كوپتەگەن تولىق ۋاقىتتى قىزمەتشىلەردىڭ كوزدەرى جەتكەن. مىسالى، وڭتۇستىك افريكاداعى وسبورن جانە پولايت ەسىمدى ەرلى-زايىپتىنى الايىق. ولار بەتەلدەن كەتكەننەن كەيىن جارتى كۇندىك جۇمىس پەن تۇراتىن جەردى تەز تاۋىپ الامىز دەپ ويلاعان. ٴبىراق وسبورن بىلاي دەيدى: «وكىنىشكە قاراي، جۇمىس ٴبىز ويلاعانداي تەز تابىلا قويمادى». ال پولايت: «ٴبىز ٷش اي بويى جۇمىس تابا المادىق. جيعان-تەرگەن اقشامىز دا جوق ەدى. ٴبىراز قينالىپ قالدىق»،— دەپ قوستى.
18 وسىنداي قيىن شاقتا وسبورن مەن پولايتقا نە كومەكتەستى؟ وسبورن بىلاي دەيدى: «قاۋىممەن بىرگە قىزمەتكە شىققانىمىز ۋايىمعا بەرىلمەي، وڭ كوزقاراس ساقتاۋعا كومەكتەستى». ولار ۇيدە وتىرىپ ۋايىمداۋدىڭ ورنىنا قىزمەتكە بارىنشا اتسالىسۋدى ٴجون كوردى. بۇل ولارعا زور قۋانىش سيلادى! ولار جۇمىس تابۋعا بارىنشا تىرىستى، اقىرىندا ىزدەگەندەرىن تاپتى.
ەحوباعا تولىقتاي سەنىم ارتىڭىز
19—21. ا) بىزگە جانتىنىشتىعىن ساقتاۋعا نە كومەكتەسەدى؟ ٵ) كۇتپەگەن وزگەرىستەرگە بەيىمدەلۋدىڭ قانداي پايداسىن كورەمىز؟
وزگەرىستەرگە بەيىمدەلگەنىمىزدىڭ ارقاسىندا ەحوبامەن دوستىعىمىز نىعايادى
19 سونىمەن ٶز جاعدايىمىزدا قولىمىزدان كەلگەننىڭ ٴبارىن ىستەپ، ەحوباعا تولىعىمەن ارقا سۇيەسەك، قانداي جاعداي ورىن الماسىن جانتىنىشتىعىن ساقتاپ قالا الامىز (ميحا 7:7 وقىڭىز). وزگەرىستەرگە بەيىمدەلگەنىمىزدىڭ ارقاسىندا ەحوبامەن دوستىعىمىزدىڭ نىعايعانىن تۇسىنەمىز. جوعارىدا ايتىلعان پولايت بىلاي دەيدى: «بەتەلدەن تاناپقا تاعايىندالعاننىڭ ارقاسىندا قيىن جاعدايدا دا ەحوباعا ارقا سۇيەۋدىڭ نە ەكەنىن ٴتۇسىندىم. ەحوبامەن قارىم-قاتىناسىم شىنىمەن دە نىعايا ٴتۇستى».
20 الدىڭعى ابزاستاردا ايتىلعان مەري ٵلى دە وزىنىڭ قارت اكەسىنە كۇتىم جاساي ٴجۇرىپ، ٸزاشارلىق قىزمەتىن اتقارۋدا. ول بىلاي دەيدى: «مەن ٴبىر نارسەنى ۋايىمداعان كەزدە كىدىرىپ، دۇعا ەتىپ، سابىر ساقتاۋ كەرەكتىگىن ٴتۇسىندىم. ەڭ باستىسى، مەن بارلىق ۋايىمىمدى ەحوباعا تاپسىرۋدى ۇيرەندىم. ال بولاشاقتا ەحوباعا سەنىم ارتۋدىڭ ماڭىزدىلىعى ودان بەتەر ارتپاق.»
21 للويد پەن الەكساندرا وزگەرىستەر ورىن العاندا سەنىمدەرىنىڭ كۇتپەگەن جولمەن سىنالعانىن ايتتى. ٴبىراق ولار بۇل سىناقتاردىڭ ارقاسىندا ٴبىراز نارسەگە ۇيرەندى. ەندى ولار قيىندىققا كەزىككەندە، مىقتى سەنىمدەرىنىڭ ارقاسىندا جۇبانىشقا يە بولا الادى. سونداي-اق ولار وزدەرىنىڭ ادام رەتىندە دە جاقسارا تۇسكەندەرىن بايقادى.
كۇتپەگەن وزگەرىستەر بىزگە كۇتپەگەن باتالار اكەلۋى مۇمكىن! (19—21 ابزاستاردى قاراڭىز)
22. ٶز جاعدايىمىزدا قولىمىزدان كەلگەننىڭ ٴبارىن ىستەي بەرسەك، نە نارسەگە سەنىمدى بولساق بولادى؟
22 ٶمىرىمىز تابان استىنان وزگەرۋى مۇمكىن. مىسالى، ٴبىز باسقا قىزمەتكە تاعايىندالاتىن شىعارمىز، دەنساۋلىعىمىز ناشارلايتىن شىعار نەمەسە وتباسىمىزدا جاڭا جاۋاپكەرشىلىكتەر پايدا بولار. ٴبىراق قانداي جاعداي ورىن الماسىن، ەحوبا قامىڭىزدى ويلايتىنىنا جانە قاجەت كەزىندە كومەكتەسەتىنىنە سەنىمدى بولىڭىز (ەۆرەيلەرگە 4:16؛ پەتىردىڭ 1-حاتى 5:6، 7). ٶز جاعدايىڭىزدا قولىڭىزدان كەلگەننىڭ ٴبارىن ىستەي بەرىڭىز. كوكتەگى اكەڭىز ەحوباعا دۇعا ەتىپ، وعان تولىقتاي ارقا سۇيەۋدى ۇيرەنىڭىز. سوندا ومىرىڭىزدە قانداي جاعداي ورىن الماسىن، ەحوبادان كەلەتىن جانتىنىشتىعىنا يە بولا الاسىز.
^ 4-ابزاس ٴبىراز جىلدان كەيىن ٴجۇسىپ: «قۇداي مەنىڭ شەككەن بار ازابىمدى... ۇمىتتىردى»،— دەپ، تۇڭعىش ۇلىنا ماناسا دەگەن ەسىم بەردى. ٴجۇسىپ ۇلىن ەحوبانىڭ جۇبانىش رەتىندە بەرگەن سيى دەپ ٴتۇسىندى (مۇسانىڭ 1-جازباسى 41:51، سىلتەمە).
