1،‏ 2.‏ ا)‏ يسانىڭ ومىرىندەگى ەڭ ماڭىزدى ٸس قانداي بولدى جانە نەگە؟‏ ٵ)‏ قۇدايمەن جاقسى قىزمەتتەس بولۋ ٷشىن نە ىستەۋىمىز كەرەك؟‏

يسا ٴ‌ماسىح العاشىندا اعاش ۇستاسى،‏ كەيىن ۇستاز بولدى (‏مارقا 6:‏3؛‏ جوحان 13:‏13‏)‏.‏ ول بۇل ەكى ٸستى دە شەبەر اتقاردى.‏ ۇستا رەتىندە ول اعاشتان قاجەتتى زاتتار جاساپ شىعارۋ ٷشىن وزىندە بار قۇرالداردى قولدانۋدى ۇيرەندى.‏ ال ۇستاز رەتىندە ول جازبالارداعى ٴ‌بىلىمىن قولدانىپ،‏ قاراپايىم ادامدارعا قۇداي سوزىندەگى شىندىقتى ٴ‌تۇسىندىردى (‏ماتاي 7:‏28؛‏ لۇقا 24:‏32،‏ 45‏)‏.‏ يسا 30 جاسقا تولعاندا،‏ ۇستالىقتى تاستاپ،‏ ۇستازدىق قىزمەتىنە كىرىستى،‏ ويتكەنى بۇل ومىرىندەگى ەڭ ماڭىزدى ٸس ەكەنىن ٴ‌تۇسىندى.‏ ول جەرگە كەلۋىنىڭ ٴ‌بىر سەبەبى قۇداي پاتشالىعى جايلى ىزگى حاباردى ۋاعىزداۋ ەكەنىن ايتتى (‏ماتاي 20:‏28؛‏ لۇقا 3:‏23؛‏ 4:‏43‏)‏.‏ يسا ۋاعىز ٸسىن ومىرىندە ٴ‌بىرىنشى ورىنعا قويدى ٵرى وزگەلەردىڭ دە سولاي ەتكەنىن قالادى (‏ماتاي 9:‏35—‏38‏)‏.‏

² كوبىمىز اعاش ۇستاسى بولماساق تا،‏ بارلىعىمىز دا ىزگى حاباردى ۇيرەتەتىن تالىمگەرمىز.‏ بۇل ىستىڭ ماڭىزدى بولعانى سونشا —‏ بۇعان قۇدايدىڭ ٶزى قاتىسادى.‏ ٴ‌يا،‏ كيەلى كىتاپتا:‏ «ٴ‌بىز قۇدايمەن قىزمەتتەسپىز»،‏—‏ دەلىنگەن (‏قورىنتتىقتارعا 1-‏حات 3:‏9؛‏ قورىنتتىقتارعا 2-‏حات 6:‏4‏)‏.‏ ٴ‌بىز ٴ‌زابۇر جىرشىسىنىڭ:‏ «ۋا،‏ ەحوبا،‏.‏.‏ سەنىڭ سوزىڭ —‏ تۇپتامىرىمەن شىندىق»،‏—‏ دەگەن سوزدەرىمەن تولىقتاي كەلىسەمىز (‏ٴ‌زابۇر 119:‏159،‏ 160‏)‏.‏ سول سەبەپتى ٴ‌بىز قىزمەتىمىزدە «شىندىق ٴ‌سوزىن دۇرىس ۇيرەتىپ» جۇرگەنىمىزگە كوز جەتكىزگىمىز  كەلەدى ‏(‏تىموتەگە 2-‏حات 2:‏15 وقىڭىز)‏.‏ سوندىقتان كيەلى كىتاپتى قولدانۋ شەبەرلىگىن ارتتىرۋعا تىرىسامىز.‏ بۇل —‏ ەحوبا مەن يسا جانە پاتشالىق جايلى ٴ‌تالىم بەرۋدەگى نەگىزگى قۇرالىمىز.‏ قىزمەتىمىزدى جاقسى اتقارۋ ٷشىن ەحوبانىڭ ۇيىمى باسقا دا ٴ‌تيىمدى قۇرالدارمەن قامتاماسىز ەتىپ وتىر.‏ ٴ‌بىز سول قۇرالداردى دا قالاي قولدانۋ كەرەكتىگىن ٴ‌بىلۋىمىز قاجەت.‏ ولاردىڭ ٴ‌بارى «ٴ‌تالىم بەرۋ قۇرالدارى» دەپ اتالادى.‏

3.‏ قىزمەتتە نە نارسەگە باسا نازار اۋدارۋىمىز قاجەت جانە ەلشىلەردىڭ ىستەرى 13:‏48 گە ساي،‏ ٴ‌بىرىنشى كەزەكتە كىمدەردى ىزدەپ-‏تابۋىمىز كەرەك؟‏

³ بالكىم،‏ ٴ‌سىز «بۇل قۇرالدار نەگە «ٴ‌تالىم بەرۋ قۇرالدارى» دەپ اتالادى،‏ ولاردى نەگە «ۋاعىزداۋ قۇرالدارى» دەمەيمىز؟‏» دەپ ويلايتىن شىعارسىز.‏ نەگىزى،‏ «ۋاعىزداۋ» دەگەن ٴ‌سوز قانداي دا ٴ‌بىر حاباردى جاريا ەتۋ دەگەندى بىلدىرەدى.‏ ال «ٴ‌تالىم بەرۋ» دەگەنىمىز سول حاباردى ٴ‌تۇسىندىرۋدى بىلدىرەدى.‏ سونىڭ ارقاسىندا ادام ەستىگەن حاباردى ۇعىپ،‏ بىلگەنىنە ساي ارەكەت ەتۋگە تالپىنادى.‏ وسى دۇنيەنىڭ سوڭى تاياعاندىقتان،‏ قالعان از ۋاقىتتىڭ ىشىندە ادامدارمەن زەرتتەۋ ساباعىن باستاپ،‏ شىندىقتى ۇيرەتۋگە بار نازارىمىزدى تىگۋىمىز كەرەك.‏ وسىلايشا ولار ٴ‌ماسىحتىڭ ٸزباسارلارى بولا الادى.‏ بۇل ٷشىن ٴ‌بىز «ماڭگى ومىرگە ىڭعاي تانىتقانداردىڭ» بارلىعىن قۇلشىنىسپەن ىزدەپ-‏تاۋىپ،‏ ولارعا ٴ‌ماسىحشى بولۋعا كومەكتەسۋىمىز كەرەك ‏(‏ەلشىلەردىڭ ىستەرى 13:‏44—‏48 وقىڭىز)‏.‏

4.‏ ‏«ماڭگى ومىرگە ىڭعاي تانىتقان» ادامداردى قالاي انىقتاۋعا بولادى جانە ولاردى قالاي تابا الامىز؟‏

⁴ ٴ‌بىز «ماڭگى ومىرگە ىڭعاي تانىتقان» ادامداردى قالاي تابا الامىز؟‏ العاشقى ماسىحشىلەر ونداي ادامداردى تەك ۋاعىزداۋ ارقىلى عانا تابا العان.‏ يسا شاكىرتتەرىنە:‏ «قاي قالاعا،‏ قاي اۋىلعا كىرسەڭدەر دە،‏ وزدەرىڭدى جانە اكەلگەن حابارلارىڭدى قابىلداۋعا لايىق ادامدى ىزدەڭدەر»،‏—‏ دەپ ايتقان (‏ماتاي 10:‏11‏)‏.‏ بۇگىندە ٴ‌بىز دە سولاي ەتۋىمىز كەرەك.‏ ارينە،‏ ەگەر ادام اقجۇرەك بولماسا،‏ وركوكىرەك بولسا نە قۇداي تۋرالى مۇلدەم بىلگىسى كەلمەسە،‏ وندايلار ىزگى حاباردى تىڭدايدى دەپ كۇتپەيمىز.‏ ٴ‌بىز اقجۇرەك،‏ كىشىپەيىل جانە شىندىقتى بىلگىسى كەلەتىن ادامداردى ىزدەيمىز.‏ وسى ىزدەۋ جۇمىسىن يسانىڭ اعاش ۇستاسى بولعان كەزدەگى جۇمىسىمەن سالىستىرساق بولادى.‏ يسا قانداي دا ٴ‌بىر جي‍ھاز،‏ ەسىك،‏ مويىناعاش نە تاعى باسقا نارسە جاساماس بۇرىن،‏ جارامدى جاقسى اعاش تابۋى قاجەت ەدى.‏ سوسىن قۇرال-‏سايماندارىن الىپ،‏ ٶز قابىلەتتەرىن ىسكە قوسىپ،‏ الگى زاتتاردى جاساي الاتىن.‏ سول سياقتى،‏ ٴ‌بىز دە الدىمەن اقجۇرەك ادامداردى تابۋىمىز كەرەك.‏ كەيىن ولارعا شاكىرت بولۋعا كومەكتەسۋ ٷشىن قۇرالدارىمىزدى قولدانىپ،‏ قابىلەتتەرىمىزدى ىسكە قوسا الامىز (‏ماتاي 28:‏19،‏ 20‏)‏.‏

5.‏ ٴ‌تالىم بەرۋ قۇرالدارىمىز جايلى نەنى بىلگەنىمىز ابزال؟‏ مىسال كەلتىرىڭىز.‏ (‏ماقالانىڭ باسىنداعى سۋرەتتى قاراڭىز.‏)‏

⁵ ٵربىر قۇرال-‏سايماننىڭ ٶز ماقساتى بار.‏ كەزىندە يسا قولدانعان قۇرالداردى مىسالعا الايىق *‏.‏ وعان اعاشتى ولشەۋگە،‏ بەلگىلەۋگە،‏ كەسۋگە،‏ تەسۋگە جانە ونىڭ ٴ‌پىشىنىن كەلتىرۋگە،‏ سونداي-‏اق اعاشتىڭ بولىكتەرىن ٶزارا بىرىكتىرۋگە قۇرال-‏سايماندار قاجەت بولعان.‏ سول سياقتى «ٴ‌تالىم بەرۋ قۇرالدارىنىڭ» ىشىندەگى ٵر باسىلىمنىڭ ٶز ماقساتى بار.‏ ەندەشە سول قاجەتتى قۇرالداردى قالاي قولدانا الاتىنىمىزدى قاراستىرايىق.‏

6،‏ 7.‏ ا)‏ بايلانىس كارتالارى قانداي ماقساتپەن شىعارىلعان؟‏ ٵ)‏ شاقىرۋ قاعازىنىڭ قانداي ارتىقشىلىقتارى بار؟‏

⁶ بايلانىس كارتالارى.‏ بۇل قۇرالدىڭ ٴ‌پىشىنى شاعىن بولسا دا،‏ وتە ٴ‌تيىمدى.‏ وعان قاراپ ادامدار ٴ‌بىزدىڭ كىم ەكەنىمىزدى بىلەدى،‏ ٵرى بىردەن jw.org تور بەكەتىنە نازار اۋدارادى.‏ وسى سايتقا كىرىپ،‏ ادامدار ٴ‌بىز جايلى كوبىرەك بىلەدى،‏ ٴ‌تىپتى كيەلى كىتاپتى زەرتتەۋ ساباعىنا ٶتىنىش بەرە الادى.‏ وسى ۋاقىتقا دەيىن jw.org سايتى ارقىلى 400 000 نان اسا ادام زەرتتەۋ ساباعىنا ٶتىنىش بەرگەن.‏ مۇنداي ٶتىنىشتى كۇن سايىن جۇزدەگەن ادام تولتىرادى.‏ ٴ‌سىز دە بايلانىس كارتالارىنىڭ بىرنەشەۋىن قاسىڭىزدا الىپ ٴ‌جۇرىپ،‏ سويلەسكەن ادامدارعا بەرسەڭىز بولادى.‏

⁷ شاقىرۋ قاعازى.‏ باسپا جۇزىندە شىعارىلعان شاقىرۋ قاعازىندا مىناداي ٴ‌ماتىن بار:‏ «ٴ‌بىز ٴ‌سىزدى ەحوبا كۋاگەرلەرىمەن كيەلى كىتاپتى زەرتتەۋگە شاقىرامىز».‏ ٵرى قاراي قالاي زەرتتەۋگە بولاتىنىنا قاتىستى 2 ۇسىنىس بەرىلگەن:‏ «كوپشىلىككە ارنالعان كەزدەسۋلەرىمىزدە» جانە «ساباق جەكە وزىڭىزبەن دە وتكىزىلەدى».‏ سونىمەن شاقىرۋ قاعازى ٴ‌بىزدىڭ كىم ەكەنىمىزدى كورسەتەدى،‏ ٵرى «قۇدايدى تانىپ-‏بىلگىسى كەلەتىندەردى» بىزبەن بىرگە كيەلى كىتاپتى زەرتتەۋگە شاقىرادى (‏ماتاي 5:‏3‏)‏.‏ ارينە،‏ ادام زەرتتەۋ ساباعىن باستاسىن-‏باستاماسىن،‏ ولار ٷشىن قاۋىم كەزدەسۋىنىڭ ەسىگى اشىق.‏ قاۋىمعا كەلگەندە،‏ ولار كيەلى كىتاپ جايلى كوپ بىلۋگە بولاتىنىن كورەدى *‏.‏

8.‏ ادامنىڭ قاۋىمعا ٴ‌بىر رەت كەلگەنىنىڭ ٶزى قانداي ناتيجە بەرۋى مۇمكىن؟‏ مىسال كەلتىرىڭىز.‏

⁸ ادامداردى قاۋىمعا،‏ ولار ٴ‌تىپتى ٴ‌بىر-‏اق رەت كەلسە دە،‏ شاقىرا بەرگەنىمىز دۇرىس.‏ مۇنىڭ قانداي پايداسى بار؟‏ جينالىسقا كەلگەندە ولار ٴ‌بىزدىڭ جالعان ٴ‌دىننەن ايىرماشىلىعىمىزدى،‏ ياعني ەحوبا كۋاگەرلەرى كيەلى كىتاپتاعى شىندىقتى ۇيرەتەتىنىن جانە قۇدايدى تانىپ-‏بىلۋگە كومەكتەسەتىنىن ٶز كوزدەرىمەن كورەدى (‏يشايا 65:‏13‏)‏.‏ وسىدان ٴ‌بىراز جىل بۇرىن قۇراما شتاتتاردا تۇراتىن رەي جانە ليندا ەسىمدى ٴ‌بىر ەرلى-‏زايىپتى سول ايىرماشىلىقتى بايقاعان.‏ ولار قۇدايعا سەنەتىن ٵرى ونى جاقسىراق تانىعىسى كەلگەن ەكەن.‏ سودان قالالارىنداعى بارلىق شىركەۋلەرگە بارىپ كورۋدى ۇيعارىپتى.‏ ولار مۇشەلىككە قوسىلماس بۇرىن ەكى جايتقا نازار اۋدارماقشى بولادى.‏ ٴ‌بىرىنشىسى،‏ شىركەۋدەن ٴ‌بىلىم الا الۋ كەرەك.‏ ەكىنشىسى،‏ شىركەۋ مۇشەلەرىنىڭ كيىمى قۇدايعا قىزمەت ەتەتىندەرگە لايىق بولۋ كەرەك.‏ وسىلاي شىركەۋلەردىڭ ٴ‌بارىن ارالاپ شىعۋعا ولاردىڭ بىرنەشە جىلى كەتەدى،‏ ويتكەنى ول قالادا شىركەۋلەر وتە كوپ ەدى.‏ ٴ‌بىراق بۇدان قاتتى كوڭىلدەرى قالادى.‏ ويتكەنى ماردىمدى ەشتەڭەگە ۇيرەنبەيدى،‏ شىركەۋ مۇشەلەرىنىڭ كيىمى دە لايىقسىز بولادى.‏ تىزىمدەرىندەگى ەڭ سوڭعى شىركەۋگە كىرىپ شىققان سوڭ،‏ ليندا جۇمىسقا كەتەدى دە،‏ ال رەي ۇيگە قايتادى.‏ ۇيىنە بارا جاتىپ،‏ ول پاتشالىق سارايىنىڭ جانىنان وتەدى.‏ سوندا ول:‏ «مىنا جاقتى دا كورە سالايىنشى»،‏—‏ دەپ ويلايدى.‏ سودان ىشىنە كىرگەندە،‏ ىزدەگەنىن تاپقانىن تۇسىنەدى!‏ ويتكەنى پاتشالىق سارايىنداعى ٵربىر ادامنان جىلۋلىق ەسىپ تۇردى،‏ كيىمدەرى دە ٵپ-‏ادەمى بولدى.‏ رەي الدىڭعى قاتارعا وتىرىپ،‏ العان بىلىمىنە كوڭىلى تولدى.‏ بۇل جاعداي ەلشى پاۋىلدىڭ سوزدەرىن ەسكە سالادى.‏ پاۋىل قاۋىمعا العاش كەلەتىن ادامنىڭ سەزىمىن سيپاتتاي كەلە،‏ ونىڭ:‏ «قۇداي شىنىمەن سەندەردىڭ ارالارىڭدا!‏»—‏ دەيتىنىن ايتقان (‏قورىنتتىقتارعا  1-‏حات 14:‏23—‏25‏)‏.‏ بۇدان كەيىن رەي ٵر جەكسەنبى سايىن كەزدەسۋلەرگە بارىپ تۇرادى.‏ كەيىن اپتا ىشىندەگى كەزدەسۋلەرگە دە بارا باستايدى.‏ سوسىن وعان ليندا دا قوسىلادى.‏ جاستارى 70 تەن اسسا دا،‏ ولار كيەلى كىتاپتى زەرتتەپ،‏ شومىلدىرۋ راسىمىنەن وتەدى.‏

9،‏ 10.‏ ا)‏ بۋكلەتتەردى قولدانۋ نەسىمەن ىڭعايلى؟‏ ٵ)‏ «قۇدايدىڭ ۇكىمەتى جايلى ەستىگەنسىز بە؟‏» دەگەن بۋكلەتتى قالاي قولدانۋعا بولادى؟‏ ٴ‌تۇسىندىرىڭىز.‏

⁹ بۋكلەتتەر.‏ ٴ‌تالىم بەرۋ قۇرالدارىنىڭ ىشىندە 8 بۋكلەت بار.‏ ولار قولدانۋعا جەڭىل ٵرى ولاردىڭ كومەگىمەن اڭگىمە باستاۋ وڭاي.‏ العاشقى بۋكلەتتەر 2013-‏جىلى جارىق كورگەننەن بەرى،‏ ولاردىڭ 5 ميللياردتاي داناسى باسىپ شىعارىلدى.‏ بۋكلەتتەردىڭ ٴ‌پىشىنى بىردەي.‏ ەگەر ولاردىڭ بىرەۋىن قولدانۋدى ۇيرەنىپ الساڭىز،‏ قالعاندارىن دا قولدانا الاسىز.‏ اداممەن اڭگىمە باستاۋ ٷشىن بۋكلەتتى قالاي قولدانۋعا بولادى؟‏

¹⁰ بالكىم،‏ ٴ‌سىز «‏قۇدايدىڭ ۇكىمەتى جايلى ەستىگەنسىز بە؟‏‏» دەگەن بۋكلەتتى قولدانعىڭىز كەلەر.‏ ول ٷشىن الدىمەن ادامعا مۇقاباسىنداعى سۇراقتى كورسەتىڭىز.‏ سوسىن سول بەتتەگى ٷش جاۋاپتىڭ بىرەۋىن تاڭداۋعا مۇمكىندىك بەرىڭىز.‏ ادامنىڭ جاۋابى قانداي بولماسىن،‏ بىردەن بۋكلەتتىڭ ىشىندەگى ‏«كيەلى كىتاپتا بۇل جايلى نە دەلىنگەن؟‏‏» دەگەن سۇراققا نازارىن اۋدارىپ،‏ دانيال 2:‏44 پەن دانيال 7:‏14 ٴ‌تى وقىپ بەرىڭىز.‏ اڭگىمەنىڭ سوڭىندا بۋكلەتتىڭ سوڭعى بەتىن اشىپ،‏ ونداعى «قۇدايدىڭ ۇكىمەتى بيلىك ەتكەندە،‏ ٶمىر قانداي بولادى؟‏» دەگەن سۇراقتى كورسەتىڭىز.‏ سول سۇراقتى كەلەسى اڭگىمەگە ارقاۋ ەتسەڭىز بولادى.‏ كەلەسى كەزدەسكەندە ‏«قۋانىشتى حابار» كىتاپشاسىنىڭ 7-‏ساباعىنا نازار اۋدارىڭىز.‏ بۇل كىتاپشا —‏ زەرتتەۋ ساباعىن باستاۋعا ارنالعان قۇرالداردىڭ ٴ‌بىرى.‏

11.‏ جۋرنالدارىمىز قانداي ماقساتپەن جاسالعان جانە ولار جايلى نەنى بىلگەنىمىز ٴ‌جون؟‏

¹¹ جۋرنالدار.‏ ‏«كۇزەت مۇناراسى» مەن «ويانىڭدار!‏» جۋرنالدارى دۇنيەجۇزى بويىنشا ەڭ كوپ باسىپ شىعارىلاتىن جانە ەڭ كوپ تىلگە اۋدارىلاتىن جۋرنالدار!‏ ولاردى ٵرتۇرلى ەلدەگى ادامدار وقيتىندىقتان،‏ ولاردىڭ مۇقاباسىنداعى تاقىرىپتار بارلىق جەردەگى ادامدارعا قىزىقتى بولاتىنداي ەتىپ جاسالعان.‏ ٴ‌بىز وسى جۋرنالداردى قولدانىپ،‏ ادامدارعا ومىردەگى ەڭ ماڭىزدى نارسەنىڭ نە ەكەنىن تۇسىنۋگە كومەكتەسۋىمىز قاجەت.‏ بۇل ٷشىن الدىمەن قاي جۋرنالدىڭ قانداي ادامدارعا ارنالعانىن ٴ‌بىلىپ الۋىمىز كەرەك.‏

12.‏ ا)‏ «ويانىڭدار!‏» جۋرنالى كىمدەرگە ارنالعان جانە قانداي ماقساتپەن شىعارىلعان؟‏ ٵ)‏ وسى قۇرالدى قولدانعانىڭىزدا قانداي قىزىقتى وقيعالار بولدى؟‏

¹² ‏«ويانىڭدار!‏» جۋرنالى كيەلى كىتاپ تۋرالى وتە از بىلەتىن نە مۇلدەم بىلمەيتىن ادامدارعا ارنالعان.‏ ونداي ادامدار كيەلى كىتاپتىڭ ىلىمدەرى جايلى مۇلدەم بىلمەۋى مۇمكىن،‏ دىنگە سەنىم ارتپاۋى نەمەسە كيەلى كىتاپتىڭ جەكە ومىرلەرىنە پايداسى جوق دەپ ويلاۋى مۇمكىن.‏ «ويانىڭدار!‏» جۋرنالىنىڭ باستى ماقساتتارىنىڭ ٴ‌بىرى —‏ سونداي ادامدارعا قۇدايدىڭ بار ەكەنىن تۇسىنۋگە كومەكتەسۋ (‏ريمدىكتەرگە 1:‏20؛‏ ەۆرەيلەرگە 11:‏6‏)‏.‏ سونداي-‏اق بۇل جۋرنال كيەلى كىتاپتىڭ شىنىمەن دە «قۇداي ٴ‌سوزى» ەكەنىنە وقىرماننىڭ كوزىن جەتكىزۋگە كومەكتەسەدى (‏سالونيكالىقتارعا 1-‏حات 2:‏13‏)‏.‏ 2018-‏جىلدا جارىق كورگەن «ويانىڭدار!‏» جۋرنالىنىڭ العاشقى ۇشەۋىنىڭ اتاۋلارى كەلەسىدەي:‏ «‏باقىتقا باستار جول‏»،‏ «‏وتباسى جاراسىمىنىڭ 12 قۇپياسى‏» جانە «‏جارالى جۇرەكتىڭ ەمى‏».‏

13.‏ ا)‏ «كۇزەت مۇناراسىنىڭ» كوپشىلىككە ارنالعان سانى كىمدەرگە ارنالعان؟‏ ٵ)‏ وسى قۇرالدى قولدانعاندا،‏ قانداي قىزىقتى وقيعالاردى باستان وتكىزدىڭىز؟‏

 ¹³ ‏«كۇزەت مۇناراسىنىڭ» كوپشىلىككە ارنالعان سانى قۇداي مەن كيەلى كىتاپقا قۇرمەتپەن قارايتىن ادامدارعا كيەلى كىتاپتىڭ ىلىمدەرىن تۇسىنۋگە كومەكتەسەدى.‏ ولاردىڭ كيەلى كىتاپتان قانداي دا ٴ‌بىر حابارى بولسا دا،‏ ونىڭ ىلىمدەرى جايلى تۋرا بىلىمدەرى بولماۋى مۇمكىن (‏ريمدىكتەرگە 10:‏2؛‏ تىموتەگە 1-‏حات 2:‏3،‏ 4‏)‏.‏ 2018-‏جىلى شىققان «كۇزەت مۇناراسىنىڭ» العاشقى ٷش سانى مىنا سۇراقتارعا جاۋاپ بەرەدى:‏ «‏كيەلى كىتاپ ەسكىرىپ قالدى ما؟‏‏»،‏ «‏بولاشاعىمىز قانداي بولماق؟‏‏» جانە «‏قۇدايعا ٴ‌بارىبىر مە؟‏‏».‏

14.‏ ا)‏ ٴ‌تالىم بەرۋ قۇرالدارىنداعى ٴ‌تورت بەينەروليك قانداي ماقساتپەن شىعارىلعان؟‏ ٵ)‏ بۇل بەينەروليكتەردى ادامدارعا كورسەتكەندە،‏ قانداي قىزىقتى وقيعالار بولعانىن ايتىپ بەرىڭىز.‏

¹⁴ بەينەروليكتەر.‏ يسانىڭ كۇندەرىندە اعاش ۇستالارى تەك قول ەڭبەگى قۇرالدارىن قولدانعان.‏ بۇگىندە اعاش ۇستاسى ەلەكتر كۇشىمەن جۇمىس ىستەيتىن قۇرالداردى دا پايدالانادى.‏ مىسالى،‏ ەلەكتر اراسى،‏ ەلەكتر بۇرعىسى مەن ەلەكتر اجارلاعىشىن.‏ سول سياقتى ٴ‌بىز دە ۋاعىزدا باسپا ادەبيەتتەرىمەن قاتار بەينەروليكتەردى دە قولدانامىز.‏ سولاردىڭ تورتەۋى «ٴ‌تالىم بەرۋ قۇرالدارىمىزعا» كىرەدى.‏ ولار ‏«‏كيەلى كىتاپتى وقۋدىڭ قانداي پايداسى بار؟‏‏»،‏ «‏كيەلى كىتاپ زەرتتەۋ ساباعى قالاي وتەدى؟‏‏»،‏ «‏پاتشالىق سارايىندا نە ٷشىن جينالامىز؟‏‏» جانە ‏«‏ەحوبا كۋاگەرلەرى دەگەن كىمدەر؟‏‏» اتتى بەينەروليكتەر.‏ ەكى مينۋتقا دا جەتپەيتىن بۇل بەينەروليكتەردىڭ قىسقا نۇسقاسىن ادامعا العاش رەت بارعاندا كورسەتۋ وتە ىڭعايلى.‏ ال تولىق نۇسقاسىن ادامعا قايتا بارعاندا نەمەسە ۋاقىتى بار ادامدارعا كورسەتۋگە بولادى.‏ بۇل بەينەروليكتەر كەرەمەت قۇرالدار.‏ ويتكەنى ادامدار ولاردى كورگەندە،‏ كيەلى كىتاپتى زەرتتەۋگە جانە قاۋىم كەزدەسۋلەرىنە كەلۋگە ىقىلاستارى ويانادى.‏

15.‏ بەينەروليكتەرىمىزدى ٶز انا تىلىندە كورگەندەرى ادامدارعا قالاي اسەر ەتۋى مۇمكىن؟‏ مىسالدار كەلتىرىڭىز.‏

¹⁵ مىسالى،‏ ٴ‌بىر باۋىرلاسىمىز ميكرونەزيادان كوشىپ كەلگەن ٴ‌بىر ايەلدى كەزدەستىرەدى.‏ ونىڭ انا ٴ‌تىلى ياپ ٴ‌تىلى ەكەن.‏ ٴ‌سۇيتىپ،‏ وعان سول تىلدە «‏كيەلى كىتاپتى وقۋدىڭ قانداي پايداسى بار؟‏‏» دەگەن بەينەروليكتى كورسەتەدى.‏ بەينەروليك ويناي باستاعاندا،‏ الگى ايەل:‏ «مىناۋ مەنىڭ تىلىمدە عوي!‏ سەنە الار ەمەسپىن،‏ بۇل كىسى مەنىڭ تىلىمدە سويلەپ جاتىر.‏ قالاي سويلەگەنىنە قاراعاندا،‏ ٴ‌بىزدىڭ ارالدا تۇراتىن سياقتى!‏»—‏ دەيدى.‏ سوسىن ول jw.org تور بەكەتىنەن ٶز انا تىلىندەگى بارلىق ادەبيەتتەردى وقىپ،‏ بەينەروليكتەردى كورىپ شىعاتىنىن ايتادى (‏ەلشىلەردىڭ ىستەرى 2:‏8،‏ 11 سالىستىرىڭىز)‏.‏ ال قۇراما شتاتتاردا تۇراتىن ٴ‌بىر باۋىرلاسىمىز تۋىسقانىنا ٴ‌دال سول بەينەروليكتىڭ سىلتەمەسىن جىبەرەدى.‏ ول كىسى باسقا ٴ‌بىر كونتينەنتتە تۇرادى ەكەن.‏ ول ٶز انا تىلىندەگى سول بەينەروليكتى كورىپ بولعان سوڭ،‏ باۋىرلاسىمىزعا:‏ «بەينەروليكتەگى وسى دۇنيەنى زۇلىم كۇش بيلەپ وتىر دەگەن سوزدەر ماعان ەرەكشە اسەر ەتتى.‏ سودان مەن كيەلى كىتاپتى زەرتتەۋگە ٶتىنىش تولتىردىم»،‏—‏ دەپ جازىپ جىبەرىپتى.‏ ول كىسىنىڭ ىسىمىزگە تىيىم سالىنعان جەردە تۇراتىنىن ەسكەرسەك،‏ بۇل وقيعا شىنىمەن دە كوڭىل تولقىتارلىق!‏

16.‏ تومەندەگى كىتاپشالار قانداي ماقساتپەن شىعارىلعانىن ايتىپ بەرىڭىز:‏ ا)‏ «قۇدايدى تىڭداڭىز،‏ سوندا ماڭگى جاسايسىز»،‏ ٵ)‏ «قۇدايدان كەلگەن قۋانىشتى حابار»،‏ ب)‏ «بۇگىندە ەحوبا قۇدايدىڭ ەركىن كىم ورىنداۋدا؟‏»‏

¹⁶ كىتاپشالار.‏ ال ەگەر ادام جاقسى وقي الماسا نە ونىڭ انا تىلىندە ەشقانداي ادەبيەتتەرىمىز بولماسا شە؟‏ ونداي ادامدارعا شىندىقتى  قالاي ۇيرەتە الامىز؟‏ مۇنداي جاعدايدا ‏«‏قۇدايدى تىڭداڭىز،‏ سوندا ماڭگى جاسايسىز‏» دەگەن كىتاپشانى قولدانا الامىز.‏ ال ‏«‏قۇدايدان كەلگەن قۋانىشتى حابار‏» دەگەن كىتاپشا —‏ كيەلى كىتاپ زەرتتەۋ ساباعىن باستاۋعا كومەكتەسەتىن كەرەمەت قۇرال.‏ ادامعا بۇل كىتاپشانىڭ سوڭعى بەتىندە كورسەتىلگەن ون ٴ‌تورت ساباقتى كورسەتىپ،‏ ولاردىڭ قايسىسى كوبىرەك قىزىقتىراتىنىن سۇراساڭىز بولادى.‏ كەيىن سول ساباقتى اشىپ،‏ ونىمەن زەرتتەۋدى باستاساڭىز بولادى.‏ ادامدارعا قايتا بارعاندا،‏ وسىلاي ەتىپ كورگەنسىز بە؟‏ ٴ‌تالىم بەرۋ قۇرالدارىنىڭ ىشىنە ‏«‏بۇگىندە ەحوبا قۇدايدىڭ ەركىن كىم ورىنداۋدا؟‏‏» دەگەن كىتاپشا دا كىرەدى.‏ بۇل كىتاپشا زەرتتەۋشىلەردى ۇيىمىمىزبەن تانىستىرۋعا ارنالعان.‏ ونى اداممەن زەرتتەۋ بارىسىندا قالاي قولدانۋعا بولاتىنىن بىلگىڭىز كەلسە،‏ 2017-‏جىلعى «ماسىحشىلىك ٶمىرىمىز بەن قىزمەتىمىزدىڭ» ناۋرىز ايىنداعى سانىن قاراڭىز.‏

17.‏ ا)‏ زەرتتەۋگە ارنالعان وسى ەكى كىتاپتىڭ ارقايسىسىنىڭ ماقساتى قانداي؟‏ ٵ)‏ ادام شومىلدىرۋ راسىمىنەن ٶتىپ قويسا دا،‏ نە ىستەۋى قاجەت جانە نەگە؟‏

¹⁷ كىتاپتار.‏ كىتاپشامەن زەرتتەۋ ساباعىن باستاعاننان كەيىن،‏ كەز كەلگەن ۋاقىتتا ‏«‏كيەلى جازبالاردان نە بىلەمىز؟‏‏» كىتابىنا كوشسەڭىز بولادى.‏ بۇل قۇرال زەرتتەۋشىگە كيەلى جازبالاردىڭ نەگىزگى ىلىمدەرىن جاقسىراق تۇسىنۋگە كومەكتەسەدى.‏ ەگەر زەرتتەۋشى رۋحاني العا باسىپ جاتسا،‏ بۇل كىتاپتى بىتىرگەن سوڭ،‏ ‏«‏قۇدايدىڭ سۇيىسپەنشىلىگىنەن ايىرىلماڭدار‏»‏ * دەگەن كىتاپپەن زەرتتەۋدى جالعاستىرساڭىز بولادى.‏ بۇل كىتاپ زەرتتەۋشىگە كيەلى كىتاپ قاعيدالارىن ٶز ومىرىندە قالاي قولدانۋعا بولاتىنىن ۇيرەتەدى.‏ ەسىڭىزدە بولسىن،‏ ٴ‌تىپتى زەرتتەۋشى شومىلدىرۋ راسىمىنەن ٶتىپ قويسا دا،‏ بۇل ەكى كىتاپتى سوڭىنا دەيىن زەرتتەۋى قاجەت.‏ وسىلاي ەتكەنى زەرتتەۋشىگە ەحوباعا دەگەن بەرىك سەنىم دامىتۋعا جانە وعان ادال بولىپ قالۋعا كومەكتەسەدى ‏(‏قولوستىقتارعا 2:‏6،‏ 7 وقىڭىز)‏.‏

18.‏ ا)‏ تىموتەگە 1-‏حات 4:‏16 عا ساي،‏ شىندىقتى ۇيرەتۋشى رەتىندە نە ىستەۋىمىز قاجەت جانە بۇنىڭ ناتيجەسى قانداي بولۋى مۇمكىن؟‏ ٵ)‏ ٴ‌تالىم بەرۋ قۇرالدارىن قولدانعاندا،‏ قانداي ماقساتتى كوزدەۋىمىز كەرەك؟‏

¹⁸ ەحوبا كۋاگەرى بولعاندىقتان،‏ بىزگە ماڭگىلىك ومىرگە جەتكىزەتىن «ىزگى حاباردىڭ شىنايى سوزدەرىن» ادامدارعا ۇيرەتۋ مىندەتى جۇكتەلگەن (‏قولوستىقتارعا 1:‏5؛‏ تىموتەگە 1-‏حات 4:‏16 وقىڭىز)‏.‏ بۇل ورايدا بىزگە كومەك بولاتىن ٴ‌تالىم بەرۋگە ارنالعان قۇرالدارىمىز بار (‏«‏ ٴ‌تالىم بەرۋ قۇرالدارى‏» دەگەن قورشاۋدى قاراڭىز)‏.‏ وسى قۇرالداردى قولدانۋدىڭ مايتالمانى بولۋعا تىرىسايىق.‏ ٵرقايسىسىمىز قاي كەزدە قانداي قۇرالدى قولدانۋدى ٶزىمىز شەشە الامىز.‏ ٴ‌بىراق ٴ‌بىزدىڭ ماقساتىمىز تەك ادەبيەت ۇسىنۋ ەمەستىگىن ەستەن شىعارمايىق.‏ سونداي-‏اق ادەبيەتتى ىزگى حابارعا قىزىقپايتىن ادامدارعا ۇسىنبايمىز.‏ ٴ‌بىزدىڭ ماقساتىمىز —‏ «ماڭگى ومىرگە ىڭعاي تانىتقاندارعا»،‏ ياعني قۇدايدى شىنىمەن تانىعىسى كەلەتىن اقجۇرەك تە كىشىپەيىل ادامدارعا يسانىڭ شاكىرتى بولۋعا كومەكتەسۋ (‏ەلشىلەردىڭ ىستەرى 13:‏48؛‏ ماتاي 28:‏19،‏ 20‏)‏.‏