مەن 1934-‏جىلى دۇنيەگە كەلدىم.‏ بۇل كەزدە اتا-‏انامنىڭ كيەلى كىتاپ زەرتتەۋشىلەرى (‏ەحوبا كۋاگەرلەرى)‏ بولعانىنا 20 جىل بولعان ەدى.‏ ولاردىڭ ەسىمدەرى —‏ فرەد پەن ەدنا.‏ ولار مەنىڭ جۇرەگىمە ەحوباعا دەگەن سۇيىسپەنشىلىك ۇيالاتتى.‏ سول ٷشىن مەن ولارعا دان ريزامىن.‏ ٴ‌بىز كانزاس شتاتىنداعى پارسونس دەگەن شاعىن قالادا تۇردىق.‏ قاۋىمىمىزداعى ٵربىر باۋىرلاس دەرلىك مايلانعان بولاتىن.‏ ٴ‌بىز قاۋىمنان قالماي،‏ قىزمەتكە بەلسەندى اتسالىساتىنبىز.‏ ال سەنبى كۇندەرى تۇستەن كەيىن كوشەدە كۋالىك بەرەتىنبىز.‏ بۇگىندە بۇل قىزمەت ٴ‌تۇرى كوپشىلىك ورىنداردا ۋاعىزداۋ دەپ اتالادى.‏ كەيدە ٴ‌بىز قىزمەتتە ٴ‌جۇرىپ شارشاپ قالاتىنبىز،‏ ٴ‌بىراق اكەم بىزگە قىزمەتتەن كەيىن ۇنەمى بالمۇزداق الىپ بەرەتىن.‏

كىشكەنتاي قاۋىمىمىزدىڭ ۋاعىزدايتىن اۋماعى وتە ۇلكەن ەدى.‏ وعان بىرنەشە قالاشىقتار مەن كوپتەگەن فەرمالار كىرەتىن.‏ كەيبىر فەرمەرلەر بىزگە ادەبيەتتەرىمىز ٷشىن اقشا بەرۋدىڭ ورنىنا،‏ وزدەرى وسىرگەن كوكونىستەر،‏ جۇمىرتقا،‏ كەيدە ٴ‌تىپتى ٴ‌تىرى تاۋىق بەرەتىن.‏ اكەم ادەبيەتتەرىمىز ٷشىن الدىن الا ساداقا بەرىپ قوياتىندىقتان،‏ ٴ‌بىز ادامداردىڭ بەرگەندەرىن ازىق ەتە الاتىنبىز.‏

بالا كەزىمدە اتا-‏انام پاتەفونمەن ۋاعىزدايتىن.‏ مەن كىشكەنتاي بولعاندىقتان ونى قولدانا المايتىن ەدىم.‏ ٴ‌بىراق اتا-‏اناما ونى ويناتۋعا كومەكتەسكەنىمە ٴ‌ماز بولاتىنمىن.‏ ٴ‌بىز پاتەفوننىڭ كومەگىمەن ادامدارعا قايتا بارعاندا نە زەرتتەۋ ساباعىن وتكىزگەندە،‏ رۋتەرفورد باۋىرلاستىڭ باياندامالارىن ويناتاتىنبىز.‏

اكەم كولىگىنىڭ توبەسىنە داۋىس زورايتقىشىن ورناتىپ قويدى.‏ بۇل قۇرىلعى قىزمەتىمىزگە كوپ پايداسىن تيگىزدى.‏ ٴ‌بىز ادامداردىڭ نازارىن اۋدارتۋ ٷشىن الدىمەن اۋەن ويناتاتىنبىز،‏ سوسىن كيەلى كىتاپقا نەگىزدەلگەن بايانداما قوياتىنبىز.‏ سودان كەيىن قىزىعۋشىلىق تانىتقان ادامدارعا ادەبيەتتەر ۇسىناتىنبىز.‏

بىردە كولىگىمىزدى كانزاس شتاتىنىڭ چەرري‍ۆەيل قالاسىنداعى ٴ‌بىر ساياباققا قويدىق.‏ ويتكەنى جەكسەنبى كۇندەرى ول جەرگە دەمالۋعا كوپ ادام كەلەتىن.‏ ٴ‌بىراق ارتىنشا ساقشىلار قىزمەتكەرلەرى كەلىپ،‏ كولىگىمىزدى ساياباقتىڭ سىرتىنا عانا قويا الاتىنىمىزدى ايتتى.‏ سوندا اكەم كولىكتى ساياباقتىڭ جانىنداعى كوشەگە قويدى.‏ ول جەردەن دە  ساياباقتاعى ادامدار باعدارلامانى جاقسى ەستي الدى.‏ اكەممەن جانە دجەرري اعاممەن بىرگە قىزمەتتە بولعان وسىنداي قىزىقتى وقيعالار ماعان قاتتى ۇنايتىن.‏

سول جىلدارى ىسىمىزگە قاتتى قارسى ادامدار تۇراتىن جەرلەردە ارنايى ناۋقاندار ۇيىمداستىردىق.‏ ماقالانىڭ باسىندا ٴ‌سوز ەتىلگەندەي،‏ ٴ‌بىز سول قالالارعا ٴ‌تۇن ورتاسىندا بارىپ،‏ ادامداردىڭ ەسىگىنە بايقاتپاي بۋكلەتتەر قالدىراتىنبىز.‏ سوسىن ەشكىمدى ساقشىلار قىزمەتكەرلەرى ۇستاپ الماعانىنا كوز جەتكىزۋ ٷشىن قالانىڭ سىرتىندا كەزدەسەتىنبىز.‏

قىزمەتىمىزگە بوياۋ قوسقان تاعى ٴ‌بىر ۋاعىز ٴ‌تۇرى —‏ اقپاراتتىق شەرۋلەر وتكىزۋ ەدى.‏ ٴ‌بىز ۇستىمىزگە جازۋى بار ۇلكەن پلاكاتتار كيىپ الىپ،‏ قالانى اينالىپ شىعاتىنبىز.‏ بىردە باۋىرلاستار قالامىزعا كەلىپ،‏ «ٴ‌دىن —‏ تور جانە الداۋ» دەگەن جازۋى بار پلاكاتپەن شەرۋ وتكىزدى.‏ ولار شەرۋدى ٴ‌بىزدىڭ ۇيدەن باستاپ ٴ‌بىر جارىم شاقىرىمداي جول ٴ‌جۇرىپ،‏ قايتادان ۇيگە ورالدى.‏ قۋانىشىمىزعا وراي،‏ ولارعا ەشكىم بوگەت بولمادى.‏ قايتا،‏ كوپ ادام بۇل جايتتى قىزىق كوردى.‏

ٴ‌بىز ٴ‌جيى تەحاس شتاتىندا وتەتىن كونگرەستەرگە باراتىنبىز.‏ اكەم تەمىرجول كومپانياسىندا جۇمىس ىستەگەندىكتەن،‏ كونگرەستەرگە پويىزبەن تەگىن باراتىنبىز.‏ سول كەزدە تۋىستارىمىزدى دا كورىپ قايتاتىنبىز.‏ انامنىڭ اعاسى فرەد ۆيسمار مەن جەڭگەسى ەۋلاليا وسى شتاتتىڭ تەمپل قالاسىندا تۇراتىن.‏ ناعاشى اعام فرەد 1900-‏جىلداردىڭ باسىندا شىندىقتى ٴ‌بىلىپ،‏ شومىلدىرۋ راسىمىنەن وتكەن.‏ مەنىڭ اناما جانە باسقا باۋىرلارىنا شىندىقتى ايتقان سول ناعاشى اعام ەكەن.‏ ورتالىق تەحاستا تۇراتىن باۋىرلاستار فرەد اعامدى وتە جاقسى بىلەتىن.‏ ويتكەنى ول بۇرىن ايماقتىق قىزمەتشى (‏قازىر اۋداندىق باقىلاۋشى دەپ اتالادى)‏ بولىپ قىزمەت ەتكەن.‏ ول وتە مەيىرىمدى،‏ اشىق-‏جارقىن جانە قۇلشىنىسى زور كىسى بولاتىن.‏ مەن ٷشىن ونىڭ ۇلگىسى ەرەكشە ەدى.‏

1941-‏جىلى ٴ‌بىز پويىزبەن ميسسۋريدەگى سەنت-‏لۋيستە وتكەن ۇلكەن كونگرەسكە باردىق.‏ كونگرەستە بارلىق بالالار ساحنانىڭ الدىڭعى قاتارىنا وتىرعىزىلدى.‏ ٴ‌بىز رۋتەرفورد باۋىرلاستىڭ «پاتشانىڭ بالالارى» دەپ اتالاتىن بايانداماسىن ۇيىپ تىڭدادىق.‏ باياندامادان كەيىن بارلىق 15 000 بالا ٴ‌بىر ەرەكشە توسىن سىي الدى.‏ رۋتەرفورد باۋىرلاس پەن ونىڭ كومەكشىلەرى ٵرقايسىسىمىزعا «بالالار» دەپ اتالاتىن جاڭا كىتاپتىڭ ٴ‌بىر-‏ٴ‌بىر داناسىن تارتۋ ەتتى.‏

1943-‏جىلدىڭ ساۋىرىندە كانزاستاعى كوففيۆيلل قالاسىندا وتكەن «ارەكەت ەتۋگە شاقىرۋ» دەپ اتالاتىن كونگرەسكە باردىق.‏ سول كونگرەستە بارلىق قاۋىمداردا ەندى تەوكراتيالىق قىزمەت مەكتەبى وتەتىنى حابارلاندى.‏ سونداي-‏اق وسى جاڭا مەكتەپكە ارنالعان 52 ساباقتان تۇراتىن بۋكلەت تە بەرىلدى.‏ سول جىلدىڭ اياعىندا مەن وسى مەكتەپتە العاشقى باياندامامدى ايتتىم.‏ اتالمىش كونگرەستە مەن ٷشىن تاعى ٴ‌بىر ەرەكشە جاعداي ورىن الدى.‏ مەن وسى كونگرەستە،‏ فەرماداعى مۇزداي توعاندا شومىلدىرۋ راسىمىنەن ٶتتىم.‏

مەن مەكتەپتى 1951-‏جىلى ٴ‌بىتىرىپ،‏ بولاشاعىم جايلى ويلاي باستادىم.‏ دجەرري اعام بەتەلدە قىزمەت ەتكەن بولاتىن.‏ مەنىڭ دە بەتەلدىك قىزمەتكە دەگەن ىقىلاسىم زور ەدى.‏ سودان ٶتىنىش قاعازىن تولتىرىپ،‏ كوپ ۇزاماي بەتەلگە شاقىرىلدىم.‏ ٴ‌سۇيتىپ،‏ 1952-‏جىلدىڭ 10-‏ناۋرىزىنان باستاپ سول جەردە قىزمەت ەتە باستادىم.‏ وسى دانا شەشىمنىڭ ارقاسىندا ٶمىرىمدى قۇدايعا تولىقتاي ارناي الدىم.‏

بەتەلگە بارعان سوڭ،‏ باسپادا قىزمەت ەتەمىن دەپ ۇمىتتەنگەن ەدىم.‏ ٴ‌بىراق بۇل ٷمىتىم ەشقاشان ورىندالمادى.‏ مەن داياشى بولدىم،‏ ال كەيىنىرەك اسحانادا قىزمەت ەتتىم.‏ جۇمىسىم ماعان قاتتى ۇنايتىن،‏ سول جەردە مەن كوپ نارسەگە ۇيرەندىم.‏ ٴ‌بىز كەزەك-‏كەزەك جۇمىس ىستەيتىنبىز،‏ سوندىقتان كۇننىڭ ورتاسىندا دەمالاتىن ەدىم.‏ مەن ٴ‌جيى بەتەلدىڭ كىتاپحاناسىنا بارىپ،‏ سونداعى كوپتەگەن كىتاپتاردىڭ كومەگىمەن جەكە زەرتتەۋ وتكىزەتىنمىن.‏ وسىنىڭ ارقاسىندا سەنىمىم مەن ەحوبامەن دوستىعىم اجەپتاۋىر نىعايدى.‏ سودان بەتەلدە مۇمكىندىگىنشە كوپ ۋاقىت قىزمەت ەتۋگە بەل بۋدىم.‏ دجەرري 1949-‏جىلى بەتەلدەن كەتىپ،‏ پاتريسياعا ۇيلەنگەن بولاتىن.‏ ٴ‌بىراق ولار برۋكليندە تۇرعاندىقتان،‏ بەتەلدە جاڭادان قىزمەت ەتىپ جۇرگەن جىلدارى ماعان دەمەۋ بەرىپ،‏ قولداۋ كورسەتتى.‏

 فيليالداعى باۋىرلاستار بەتەلدىك بايانداماشىلاردىڭ تىزىمىنە جاڭا بايانداماشىلاردى قوستى.‏ تىزىمدەگى باۋىرلاستار برۋكليننەن 320 شاقىرىم قاشىقتىققا دەيىن جول ٴ‌جۇرىپ،‏ قاۋىمداردا بايانداما ايتىپ،‏ باۋىرلاستارمەن ۋاعىزعا شىعۋى كەرەك ەدى.‏ ول ۋاقىتتا مەنىڭ بەتەلدە قىزمەت ەتىپ جاتقانىما كوپ ۋاقىت بولماعان.‏ مەن دە بۇل تىزىمگە ىلىكتىم.‏ قاۋىمدارعا ساپار جاساي باستاعاندا از-‏ماز قوبالجىدىم.‏ ول كەزدەرى كوپشىلىككە ارنالعان بايانداما ٴ‌بىر ساعاتقا سوزىلاتىن.‏ ادەتتە مەن قاۋىمدارعا پويىزبەن باراتىنمىن.‏ 1954-‏جىلدىڭ قىسى ەرەكشە ەسىمدە قالىپتى.‏ جەكسەنبى تۇستەن كەيىنگى ۋاقىت ەدى.‏ مەن پويىزبەن نيۋ-‏يورككە قايتقالى جاتقان ەدىم،‏ ٵرى بەتەلگە كەش تۇسپەي تۇرىپ جەتۋىم كەرەك ەدى.‏ ٴ‌بىراق قاتتى داۋىل تۇرىپ،‏ قار بوراپ كەتتى.‏ سودان پويىزدىڭ ەلەكتر قوزعالتقىشى ىستەن شىعىپ،‏ نيۋ-‏يورككە دۇيسەنبى تاڭعى بەستە ٴ‌بىر-‏اق جەتتىم.‏ سوسىن برۋكلينگە مەترومەن جەتىپ،‏ اسحاناداعى جۇمىسىما بىردەن كىرىستىم.‏ مەن جۇمىسقا ٴ‌سال كەشىگىپ كەلدىم.‏ تۇنىمەن ۇيىقتامادىم،‏ قاتتى شارشاعانىم دا بار ەدى.‏ ٴ‌بىراق بۇل العان قۋانىشىما قاراعاندا تۇك ەمەس ەدى.‏ ويتكەنى قاۋىمدارمەن قىزمەتتەسىپ،‏ كوپتەگەن جاڭا باۋىرلاسپەن تانىستىم.‏

بەتەلدە قىزمەت ەتكەن العاشقى جىلدارى راديوستانسىمىز (‏WBBR)‏ ارقىلى اپتا سايىن وتكىزىلەتىن كيەلى كىتاپ زەرتتەۋ باعدارلاماسىنا دا قاتىستىم.‏ بۇل راديوستانسى كولۋمبيا-‏حايتس كوشەسى،‏ 124 عيماراتتىڭ ەكىنشى قاباتىندا ورنالاسقان ەدى.‏ بەتەلدە كوپ جىلدان بەرى قىزمەت ەتىپ كەلگەن الەكساندر ح.‏ ماكميللان باۋىرلاس تا وسى باعدارلامانى وتكىزۋگە قاتىساتىن.‏ ٴ‌بىز ونى ماك باۋىرلاس دەپ اتايتىنبىز.‏ ول كىسى كوپتەگەن قيىندىقتى باستان وتكەرسە دە،‏ ەش بەرىلمەگەن.‏ ونىڭ اۋىز تولتىرىپ ايتار ادالدىعى بەتەلدەگى جاس ەر باۋىرلاستارعا تاپتىرماس ۇلگى بولدى.‏

1958-‏جىلى باسقا قىزمەتكە تاعايىندالىپ،‏ عالاقات مەكتەبىنىڭ تۇلەكتەرىمەن قىزمەتتەسە باستادىم.‏ سول قۇلشىنىستى باۋىرلاستارعا ۆيزالارىن الىپ،‏ تاعايىندالعان ەلدەرىنە جەتىپ الۋعا كومەكتەسەتىنمىن.‏ ۇشاقپەن جول ٴ‌جۇرۋ ول ۋاقىتتا قىمبات ەدى،‏ سوندىقتان ميسسيونەرلەردىڭ باسىم بولىگى افريكا مەن ازياعا جۇك كەمەسىمەن باراتىن.‏ جىلدار وتە ۇشاقپەن ۇشۋ ارزانداعاندا،‏ ميسسيونەرلەردىڭ كوبى تاعايىندالعان ەلدەرىنە ۇشاقپەن باراتىن بولدى.‏

1961-‏جىلى ەۋروپادا حالىقارالىق كونگرەستەر وتپەك ەدى.‏ مەن 1960-‏جىلى سول كونگرەستەرگە قۇراما شتاتتاردان باراتىن باۋىرلاستارعا ۇشاقتار جالداۋعا كىرىستىم.‏ ٶزىم گەرمانيانىڭ گامبۋرگ قالاسىندا وتكەن كونگرەسكە باردىم.‏ كونگرەستەن كەيىن بەتەلدىك ٷش باۋىرلاسپەن بىرگە كولىك جالداپ،‏ گەرمانيادان يتالياعا باردىق.‏ سوندا ريمدەگى بەتەلگە سوقتىق.‏ كەيىن فرانسياعا،‏ سوسىن پيرەنەي تاۋلارىنان ٶتىپ،‏ يسپانياعا باردىق.‏ ول كەزدە يسپانيادا ىسىمىزگە تىيىم سالىنعان ەدى.‏ بارسەلوناداعى باۋىرلاستارعا جولىعىپ،‏ ولارعا ادەبيەتتەر بەردىك.‏ قاعازعا ادەمىلەپ ورالعان ادەبيەتتەرىمىز تۋرا ٴ‌بىر سىيلىقتاي كورىندى.‏ بۇل ٴ‌بىر تاماشا باسقوسۋ بولدى!‏ سوسىن بۇل جەردەن امستەردامعا جول ٴ‌جۇرىپ،‏ ٵرى قاراي نيۋ-‏يورككە ۇشىپ كەتتىك.‏

1963-‏جىلى دۇنيەجۇزى بويىنشا وتەتىن «ماڭگىلىككە جالعاساتىن ىزگى حابار» دەپ اتالاتىن ٴ‌بىرقاتار حالىقارالىق كونگرەسكە 583 باۋىرلاس بارماق ەدى.‏ مەن 1962-‏جىلى سول باۋىرلاستاردىڭ كونگرەسكە بارىپ-‏قايتار جولىن ۇيىمداستىرۋعا تاعايىندالدىم.‏ ولار ەۋروپا،‏ ازيا مەن تىنىق مۇحيتىنىڭ وڭتۇستىك ەلدەرىنە،‏ كەيىن گاۆاييدىڭ گونولۋلۋ  قالاسىنا،‏ ال سوڭىندا كاليفورنياداعى پاسادينا قالاسىنا باراتىن ەدى.‏ سونداي-‏اق بۇل باۋىرلاستار كيەلى كىتاپ وقيعالارى ورىن العان جەرلەر —‏ ليۆان مەن يوردانيا ەلدەرىنە ەكسكۋرسيا جاساماق ەدى.‏ ٴ‌بىزدىڭ ٴ‌بولىم دەلەگاتتارعا ۇشاققا بيلەت الۋعا،‏ ۆيزالارىن جاساۋعا جانە قوناق‍ۇيلەرگە ورنالاسۋعا كومەكتەستى.‏

1963-‏جىل مەن ٷشىن تاعى ٴ‌بىر سەبەپپەن ەرەكشە بولدى.‏ سول جىلدىڭ 29-‏ماۋسىمىندا مەن لايلا رودجەرس ەسىمدى باۋىرلاسقا ۇيلەندىم.‏ ول دا ميسسۋري شتاتىنان ەدى،‏ ٵرى 1960-‏جىلدان بەرى بەتەلدە قىزمەت ەتەتىن.‏ ۇيلەنگەنىمىزگە ٴ‌بىر اپتا بولعاندا،‏ لايلا ەكەۋمىز جوعارىدا اتالىپ كەتكەن كونگرەستەرگە بارماق بولدىق.‏ ٴ‌سۇيتىپ،‏ گرەكيا،‏ ەگيپەت پەن ليۆان ەلدەرىنە ساپار جاسادىق.‏ وسى جەرلەردەن كەيىن ۇشاقپەن يوردانياعا بەت الدىق.‏ بۇل جەردە ىسىمىزگە تىيىم سالىنعاندىقتان،‏ بيلىك وكىلدەرى ەحوبا كۋاگەرلەرىنە ۆيزا بەرمەيتىن.‏ سوندىقتان يوردانياعا كەلگەندە ٴ‌بىزدى نە كۇتىپ تۇرعانىن بىلمەدىك.‏ ٴ‌بىراق اۋەجايدا «باۋىرلاستار،‏ قوش كەلدىڭىزدەر!‏» دەگەن جازۋ ۇستاپ تۇرعان ٴ‌بىر توپ باۋىرلاستارىمىزدى كورگەندە،‏ تاڭعالىپ،‏ قاتتى قۋانىپ كەتتىك!‏ سونداي-‏اق ىبىرايىم،‏ ىسقاق پەن جاقىپ ٶمىر سۇرگەن،‏ يسا مەن ونىڭ ەلشىلەرى ۋاعىزداعان جەرلەردى كورىپ تاڭ-‏تاماشا بولدىق.‏ ماسىحشىلىك «جەردىڭ قيىر شەتىنە دەيىن» وسى جەرلەردەن باستاپ تاراعان ەدى (‏ەلشىلەردىڭ ىستەرى 13:‏47‏)‏.‏ وسىنداي كيەلى كىتاپ وقيعالارى ورىن العان جەرلەردى كورگەندە،‏ ەرەكشە سەزىمگە بولەندىك.‏

لايلا 55 جىلدان بەرى ماعان ادالدىقپەن قولداۋ كورسەتىپ كەلەدى.‏ يسپانيا مەن پورتۋگاليادا ىسىمىزگە تىيىم سالىنعان ۋاقىتتا سول جەردەگى قاۋىمدارعا بىرگە ساپار جاسادىق.‏ ونداعى باۋىرلاستارعا ادەبيەتتەر مەن باسقا دا قاجەتتى زاتتاردى جەتكىزىپ،‏ ولاردى جىگەرلەندىرىپ قايتتىق.‏ ٴ‌تىپتى يسپانياداعى كاديس قالاسىندا قاماۋدا وتىرعان باۋىرلاستارىمىزعا بارىپ قايتۋعا مۇمكىندىگىمىز بولدى.‏ سول باۋىرلاستارىما بايانداما ايتىپ،‏ جىگەر بەرە العانىما قاتتى قۋاندىم.‏

1963-‏جىلدان باستاپ مەن افريكا،‏ اۆستراليا،‏ وڭتۇستىك پەن ورتالىق امەريكا،‏ ەۋروپا،‏ ازيا،‏ گاۆايي،‏ جاڭا زەلانديا مەن پۋەرتو-‏ريكوداعى حالىقارالىق كونگرەستەرگە باراتىن باۋىرلاستاردىڭ بارىپ-‏قايتار جولدارىن ۇيىمداستىردىم.‏ لايلا ەكەۋمىز ەستەن كەتپەس كونگرەستەرگە قاتىستىق.‏ سولاردىڭ ٴ‌بىرى —‏ 1989-‏جىلى پولشاداعى ۆارشاۆادا وتكەن كونگرەسس.‏ كونگرەسكە رەسەيدەن كوپتەگەن باۋىرلاستار كەلدى.‏ بۇل ولاردىڭ قاتىسقان العاشقى كونگرەسى ەدى.‏ سول جەردە ٴ‌بىز كەڭەس وداعىندا سەنىمى ٷشىن كوپ جىل بويى قاماۋدا وتىرعان باۋىرلاستارمەن كورىستىك.‏

سونداي-‏اق مەن دۇنيەجۇزىندەگى بەتەل وتباسىلارىنا جانە ميسسيونەرلەرگە ساپار جاساۋعا تاعايىندالدىم.‏ بۇل قىزمەتىم ماعان قاتتى ۇنايتىن.‏ سوڭعى رەت ٴ‌بىز وڭتۇستىك كورەياعا ساپار جاساپ،‏ سۋۆون قالاسىندا تۇرمەدە وتىرعان 50 باۋىرلاستى كورىپ قايتتىق.‏ بۇل باۋىرلاستار وڭ كوزقاراس تانىتىپ،‏ ەحوباعا ەركىن قىزمەت ەتە الاتىن ۋاقىتتارىن تاعاتسىزدانا كۇتىپ ٴ‌جۇر ەكەن.‏ ولاردى كورىپ،‏ ٴ‌بىر مارقايىپ قالدىق (‏ريمدىكتەرگە 1:‏11،‏ 12‏)‏.‏

مەن ەحوبانىڭ جىلدار بويى ٶز حالقىنا باتاسىن توككەنىنە كۋا بولدىم.‏ 1943-‏جىلى شومىلدىرۋ راسىمىنەن وتكەنىمدە،‏  100 000 داي جاريالاۋشى بار ەدى.‏ قازىر 240 ەلدە 8 000 000 نان اسا ەحوبا كۋاگەرى بار.‏ وسىنداي وسىمنىڭ بولۋىنا عالاقات مەكتەبىنىڭ تۇلەكتەرى زور ۇلەس قوستى.‏ سول ميسسيونەرلەرمەن قىزمەتتەسە العانىما،‏ تاعايىندالعان ەلدەرىنە جەتۋلەرىنە كومەكتەسە العانىما قاتتى قۋانامىن.‏

جاس كەزىمدە ٶمىرىمدى ەحوباعا قىزمەت ەتۋگە ارناپ،‏ بەتەلگە ٶتىنىش قاعازىن تولتىرعانىما سونداي قۋانامىن.‏ ەحوبا وسى جىلداردىڭ بارىندە مەنى مولىنان جارىلقاپ كەلەدى.‏ بەتەلدىك قىزمەتىمىزدى ەسەپتەمەگەندە،‏ لايلا ەكەۋمىز 50 جىلدان استام ۋاقىت بويى برۋكليندە بىرنەشە قاۋىممەن بىرگە ۋاعىز ىسىنە قاتىسىپ،‏ كوپتەگەن شىنايى دوستار تاپتىق.‏ بۇل بىزگە زور باقىت اكەلدى.‏

مەن جۇبايىم لايلانىڭ دەمەۋىمەن بەتەلدە قىزمەت ەتىپ كەلەمىن.‏ مۇندا حاتتارمەن بايلانىستى جۇمىستاردى اتقارامىن.‏ 84 جاستان اسقانىما قاراماستان،‏ ٵلى دە كومەگىم ٴ‌تيىپ جاتقانىنا قۋانامىن.‏

ەحوبانىڭ كەرەمەت ۇيىمىنىڭ ٴ‌بىر مۇشەسى بولۋ نەتكەن مارتەبە!‏ سونداي-‏اق مالاحي 3:‏18 دەگى سوزدەردىڭ راستىعىنا كوزىمىز جەتۋدە.‏ وندا بىلاي دەلىنگەن:‏ «سول كەزدە ٵدىل مەن زۇلىمنىڭ،‏ قۇدايعا قىزمەت ەتەتىن مەن قىزمەت ەتپەيتىننىڭ اراسىنداعى ايىرماشىلىقتى تاعى دا كورەسىڭدەر».‏ راسىندا دا،‏ شايتاننىڭ دۇنيەسى كۇننەن كۇنگە ناشارلاپ بارادى.‏ ادامدار ەش ٷمىتسىز،‏ باقىتسىز كۇي كەشۋدە.‏ ٴ‌بىراق ەحوبانى جاقسى كورەتىن جانە وعان قىزمەت ەتەتىن ادامدار ەرەكشە قيىن ۋاقىتتا ٶمىر ٴ‌سۇرىپ جاتسا دا،‏ باقىتتى ٶمىر سۇرۋدە.‏ ولاردىڭ بولاشاققا دەگەن مىزعىماس ۇمىتتەرى بار.‏ وزگەلەرگە ىزگى حاباردى ايتۋ شىنىمەن دە مارتەبە!‏ (‏ماتاي 24:‏14‏)‏.‏ جاقىندا قۇداي پاتشالىعى زۇلىم دۇنيەنى جويىپ،‏ ورنىنا جۇماق ورناتادى.‏ ٴ‌بىز سول كەزدىڭ كەلۋىن اسىعا كۇتۋدەمىز!‏ سوندا جەر بەتىندەگى ٵربىر ادامنىڭ دەنساۋلىعى مىقتى بولىپ،‏ ماڭگىلىك بويى باقىتتى عۇمىر كەشەدى.‏