ادامداردى اجىراتا ٴبىلىڭىز
«ٵدىل مەن زۇلىمنىڭ... اراسىنداعى ايىرماشىلىقتى كورەسىڭدەر» (مالاحي 3:18).
اندەر: 61، 53
1، 2. بۇگىندە قۇداي قىزمەتشىلەرىنىڭ ٶمىرىن نە قيىنداتۋى مۇمكىن؟ (ماقالانىڭ باسىنداعى سۋرەتتەردى قاراڭىز.)
كوپ مەديسينا قىزمەتكەرى جۇقپالى اۋرۋعا شالدىققان ادامداردىڭ اراسىندا جۇمىس ىستەيدى. ناۋقاستارىنا كومەكتەسكىسى كەلگەندىكتەن ولارعا كۇتىم جاسايدى. الايدا ولار اۋرۋدى ەمدەيمىن دەپ ٴجۇرىپ، وزدەرىنە جۇقتىرىپ الماس ٷشىن قورعانۋلارى قاجەت. قۇدايدىڭ قىزمەتشىلەرى رەتىندە ٴبىز دە وسىعان ۇقساس جاعدايدامىز. كوبىمىز قۇدايدىكىنەن مۇلدەم وزگەشە كوزقاراستى جانە قاسيەتتەردى جۇقتىرعان ادامدارمەن بىرگە تۇرامىز نە جۇمىس ىستەيمىز. بۇل ٴبىز ٷشىن قيىن بولۋى مۇمكىن.
2 وسى سوڭعى كۇندەرى قۇدايدى سۇيمەيتىن ادامدار ونىڭ جاقسى مەن جامانعا قاتىستى نورمالارىن ەش ەلەمەيدى. ەلشى پاۋىل تىموتەگە جازعان حاتىندا مۇنداي ادامداردىڭ بويىنداعى جاعىمسىز قاسيەتتەردى اتاپ وتكەن. پاۋىل سوڭعى كۇندەردىڭ اقىرى تاياعان سايىن، جاعىمسىز مىنەز-قۇلىقتىڭ جايلاعان ۇستىنە جايلاي تۇسەتىنىن دە جازعان (تىموتەگە 2-حات 3:1—5، 13 وقىڭىز). وسىنداي جامان قىلىقتاردى ەستىپ-كورگەندە توبە شاشىمىز تىك تۇراتىن شىعار، دەسە دە اينالامىزداعى ادامداردىڭ وي قالپىن، سوزدەرى مەن ارەكەتتەرىن جۇقتىرىپ الۋىمىز عاجاپ ەمەس (ناقىل سوزدەر 13:20). وسى ماقالادا بۇل جامان قاسيەتتەر مەن قۇدايدىڭ قىزمەتشىلەرى تانىتاتىن قاسيەتتەردىڭ ايىرماشىلىعىن كورەمىز. سونداي-اق ادامدارعا ەحوبا جايلى بىلۋگە كومەكتەسە ٴجۇرىپ جامان قاسيەتتەردى جۇقتىرىپ الماس ٷشىن، قالاي قورعانۋعا بولاتىنىن بىلەمىز.
3. تىموتەگە 2-حات 3:2—5 تارماقتاردا قانداي ادامدار سيپاتتالعان؟
3 پاۋىل سوڭعى كۇندەرى «ەرەكشە قيىن ۋاقىت بولاتىنىن» ايتقان. ارتىنان ٴبىزدىڭ كۇندەرىمىزدە بەلەڭ الاتىن 19 جاعىمسىز قاسيەتتىڭ ٴتىزىمىن كەلتىرگەن. بۇل قاسيەتتەر پاۋىل ريمدىكتەرگە 1:29—31 اتاپ وتكەن قاسيەتتەرگە ۇقسايدى. ٴبىراق تىموتەگە جازعان حاتتاعى تىزىمدە قولدانىلعان كەيبىر سوزدەر ماسىحشىلەردىڭ گرەك جازبالارىنىڭ باسقا ەش جەرىندە كەزدەسپەيدى. پاۋىل ٴتىزىمدى «ادامدار» دەگەن سوزبەن باستاپ، ولاردىڭ جاعىمسىز قاسيەتتەردى تانىتاتىنىن ايتقان. الايدا پاۋىل جازعان جاعىمسىز قاسيەتتەردى ادامداردىڭ بارلىعى بىردەي تانىتپايدى. ماسىحشىلەردىڭ تانىتاتىن قاسيەتتەرى مۇلدەم وزگەشە (مالاحي 3:18 وقىڭىز).
وزىمىزگە قاتىستى قانداي كوزقاراستامىز؟
4. وركوكىرەك ادامدى قالاي سيپاتتار ەدىڭىز؟
4 پاۋىل كوپ ادامنىڭ تەك قارا باسىن ويلايتىنىن جانە اقشاقۇمار بولاتىنىن ايتقاننان كەيىن، ادامداردىڭ ماقتانشاق، تاكاپپار ٵرى وركوكىرەك بولاتىنىن دا ايتتى. وسىنداي مىنەز-قۇلىق تانىتاتىندار سىرت كەلبەتىنە، قابىلەتىنە، دۇنيە-مۇلكىنە جانە قوعامداعى بەدەلىنە بولا وزدەرىن باسقالاردان جوعارى سانايدى. ولار بارىنەن بۇرىن باسقالاردىڭ وزىنە تاڭداي قاعىپ، تامسانا قاراعانىن قالايدى. ٴبىر زەرتتەۋشى كوكىرەك ادام جۇرەگىندە قۇدايعا ەمەس، وزىنە تابىناتىنىن جازعان. كەيبىر ادامداردىڭ ايتۋىنشا، كوكىرەكتىكتىڭ جيركەنىشتىلىگى سونشا، ٴتىپتى تاكاپپار ادامنىڭ ٶزى وسى قاسيەتتى باسقالاردىڭ بويىندا كورگەندە، مۇنى جاقتىرمايدى.
5. ەحوبانىڭ كەيبىر ادال قىزمەتشىلەرىنىڭ ٶزى قالاي تاكاپپارلانىپ كەتتى؟
5 ەحوبا كوكىرەكتىكتى نە كيەلى كىتاپتا جازىلعانداي «مەنمەن كوزدى»، جەك كورەدى (ناقىل سوزدەر 6:16، 17). شىن مانىسىندە، كوكىرەكتىك ادامدى قۇدايدان الشاقتاتادى (ٴزابۇر 10:4). ول — ىبىلىسكە ٴتان قاسيەت (تىموتەگە 1-حات 3:6). وكىنىشكە قاراي، ەحوبانىڭ كەيبىر ادال قىزمەتشىلەرىنىڭ ٶزى مەنمەندىكتى جۇقتىرىپ العان. مىسالعا، ياھۋدانىڭ پاتشاسى ۇزياحتى الايىق. ول جىلدار بويى ادالدىق ساقتاپ كەلگەن. ٴبىراق كيەلى كىتاپتا: «ابدەن كۇشەيىپ العان سوڭ، ۇزياح ٶز سورىنا تاكاپپارلانىپ كەتتى. ول قۇدايى ەحوباعا قارسى وپاسىزدىق جاسادى»،— دەلىنگەن. ۇزياح عيباداتحاناعا كىرىپ، حوش ٴيىستى زاتتى تۇتەتىپ، قۇقىعى جوق نارسەنى ىستەدى. كەيىنىرەك ادال ەزەكيا پاتشانىڭ دا تاكاپپارلانىپ كەتكەن كەزى بولعان (شەجىرەلەر 2-جازبا 26:16؛ 32:25، 26).
6. ٴداۋىت نە سەبەپتى كوكىرەكتەنىپ كەتۋى مۇمكىن ەدى؟ ٴبىراق نەگە ول كىشىپەيىل بولىپ قالعان؟
6 كەيبىر ادامدار سىمباتتى، تانىمال، مۋزىكاعا قابىلەتى بار، قارا كۇشكە نە وزگەلەردىڭ سىي-قۇرمەتىنە يە بولعاندىقتان كوكىرەكتەنىپ كەتكەن. مۇنىڭ ٴبارى داۋىتتە بولعان، دەسە دە ول بار عۇمىرىندا كىشىپەيىل بولىپ قالعان. مىسالى، عولياتتى ولتىرگەننەن كەيىن، ساۋل پاتشا وعان قىزىن ايەلدىككە بەرمەكشى بولادى. ٴبىراق ٴداۋىت بۇعان: «پاتشانىڭ كۇيەۋبالاسى بولاتىنداي مەن كىممىن، يسرايلدە تۋىستارىم مەن اكەمنىڭ ٷي ٸشى كىم؟!»— دەپ جاۋاپ بەردى (سامۋيلدىڭ 1-جازباسى 18:18). داۋىتكە كىشىپەيىل بولىپ قالۋعا نە كومەكتەستى؟ ول وزىندە بار قاسيەت، قابىلەت پەن ارتىقشىلىقتىڭ بارىنە قۇداي كىشىپەيىلدىلىك تانىتىپ، وعان نازار اۋدارعاندىقتان يە بولعانىن بىلگەن (ٴزابۇر 113:5—8). ول وزىندەگى بار جاقسىنىڭ ەحوبادان كەلگەنىن ٴتۇسىندى (قورىنتتىقتارعا 1-حات 4:7 سالىستىرىڭىز).
7. كىشىپەيىل بولۋىمىزعا نە كومەكتەسەدى؟
7 داۋىتكە ۇقساپ، بۇگىندە قۇدايدىڭ قىزمەتشىلەرى كىشىپەيىل بولۋعا تىرىسادى. قۇداي تاعالا بولىپ تابىلاتىن ەحوبانىڭ ٶزى كىشىپەيىل ەكەنىن بىلگەنىمىز جانىمىزدى تەبىرەنتەدى (ٴزابۇر 18:35). ٴبىز مىنا سوزدەردى ومىردە قولدانعىمىز كەلەدى: «جاناشىرلىق، مەيىرىمدىلىك، كىشىپەيىلدىلىك، جۇمساقتىق، شىدامدىلىق سياقتى قاسيەتتەرگە بولەنىڭدەر» (قولوستىقتارعا 3:12). سونداي-اق سۇيىسپەنشىلىك «ماقتانبايتىنىن، مەنمەنسىنبەيتىنىن» دە بىلەمىز (قورىنتتىقتارعا 1-حات 13:4). اينالامىزداعى ادامدار كىشىپەيىل ەكەنىمىزدى كورگەندە، ولار دا ەحوبانى تانىپ-بىلگىسى كەلۋى مۇمكىن. سەنبەيتىن كۇيەۋى ٴماسىحشى ايەلىنىڭ جاقسى ٴجۇرىس-تۇرىسى ارقىلى قۇدايعا جاقىنداۋى مۇمكىن ەكەنىندەي، ادامدار دا قۇدايدىڭ قىزمەتشىلەرىنىڭ كىشىپەيىلدىلىگى ارقىلى وعان جاقىنداۋى مۇمكىن (پەتىردىڭ 1-حاتى 3:1).
باسقالارعا قاتىستى قالاي ارەكەت ەتەمىز؟
8. ا) بۇگىندە كەيبىر ادامدار بالالاردىڭ اتا-اناسىنا مويىنسۇنباۋىنا قالاي قارايدى؟ ٵ) كيەلى كىتاپتا بالالاردىڭ نە ىستەۋ كەرەكتىگى ايتىلعان؟
8 پاۋىل سوڭعى كۇندەرى ادامداردىڭ بىر-بىرىنە قالاي قارايتىنىن ايتىپ وتكەن. ول بالالاردىڭ «اتا-اناسىنا مويىنسۇنبايتىنىن» جازعان. بۇگىندە كوپ كىتاپتار، فيلمدەر مەن باعدارلامالاردا مۇنداي قىلىقتى كادىمگى نارسە جانە ەش وعاشتىعى جوق ەتىپ كورسەتەدى. ٴبىراق شىندىعىنا كەلگەندە، بالالاردىڭ اتا-اناسىنا مويىنسۇنباۋى وتباسى شاڭىراعىن شايقالتادى، ال وتباسى — قوعامنىڭ نەگىزى بولىپ تابىلادى. ادامدار بۇل شىندىقتى بۇرىننان بىلەدى. مىسالى، ەجەلگى گرەكيادا اتا-اناسىنا قول كوتەرگەن ادام ازاماتتىق قۇقىقتارىنان ايىرىلاتىن. ال ريم زاڭى بويىنشا، اكەسىنە قول كوتەرگەن بالا كىسى ٶلتىرۋشى رەتىندە جازالانۋى مۇمكىن بولعان. ەۆرەي جازبالارىندا دا، گرەك جازبالارىندا دا بالالارعا اتا-اناسىنا قۇرمەت كورسەتۋ بۇيىرىلعان (مۇسانىڭ 2-جازباسى 20:12؛ ەفەستىكتەرگە 6:1—3).
9. بالالارعا اتا-اناسىنا مويىنسۇنۋعا نە كومەكتەسەدى؟
9 اينالاسىنداعىلار تىلازارلىق تانىتسا دا، بالالارعا اتا-اناسىنىڭ ٴتىلىن الۋعا نە كومەكتەسەدى؟ بالالار اتا-اناسىنىڭ وزدەرى ٷشىن جاساعان بار جاقسىلىعى جايلى ويلاسا، ولارعا دەگەن ريزاشىلىقتارى ارتىپ، مويىنسۇنۋعا ىقىلاستى بولادى. بۇعان قوسا، جاستار مىنانى ٴتۇسىنۋ كەرەك: بارلىعىمىزدىڭ اكەمىز قۇداي ولاردان اتا-اناسىنا مويىنسۇنادى دەپ كۇتەدى. ولار اتا-اناسىنىڭ جاقسى جاقتارى تۋرالى ايتىپ جۇرەتىن بولسا، دوستارىن دا ٶز اتا-انالارىن سىيلاي تۇسۋگە تالپىندىرادى. ارينە، اتا-اناسى «باۋىرمالدىقتان جۇرداي» بولسا، ولارعا مويىنسۇنۋ بالالار ٷشىن الدەقايدا قيىن بولۋى مۇمكىن. ال ەگەر اتا-اناسى بالالارىن قاتتى جاقسى كورەتىنىن كورسەتسە، بالالارى قيىن بولسا دا ولاردىڭ ٴتىلىن الۋعا تىرىساتىن بولادى. وستين ەسىمدى ٴبىر جاس باۋىرلاس بىلاي دەيدى: «تەرىس قىلىق جاساۋعا بەيىم بولسام دا، اتا-انام اقىلعا قونىمدى ەرەجەلەر ورناتاتىن ٵرى ولاردى نە سەبەپتى ورناتقانىن ٴتۇسىندىرىپ وتىراتىن. ولار اشىق سويلەسۋگە ٵردايىم دايىن ەدى. بۇل ولارعا مويىنسۇنۋىما كومەكتەستى. اتا-انام قامىمدى ويلايتىنىن تۇسىنگەندىكتەن، ولاردىڭ كوڭىلىنەن شىققىم كەلەتىن بولدى».
10، 11. ا) قانداي جامان قاسيەتتەر ادامداردىڭ ٴبىر-ٴبىرىن جاقسى كورمەيتىنىن كورسەتەدى؟ ٵ) شىنايى ماسىحشىلەر وزگە ادامداردى قانشالىقتى جاقسى كورەدى؟
10 پاۋىل ادامداردىڭ ٴبىر-ٴبىرىن جاقسى كورمەيتىنىن كورسەتەتىن باسقا دا قاسيەتتەردى اتاپ وتكەن. ول ادامداردىڭ «اتا-اناسىنا مويىنسۇنبايتىنىن» اتاپ وتكەن سوڭ، ولاردىڭ العىستى بىلمەيتىنىن ايتتى. بۇلاردىڭ بىرىنەن كەيىن ٴبىرى اتالعانى قيسىندى، سەبەبى العىستى بىلمەيتىندەر وزگەلەردىڭ جاساعان جاقسىلىعىن باعالامايدى. بۇعان قوسا، پاۋىل جۇرتتىڭ وپاسىز بولاتىنىن دا ايتتى. ولار ىمىراعا كەلمەيتىن، ياعني وزگەلەرمەن تاتۋلاسقىسى كەلمەيتىن بولادى. ادامدار بالاعاتشىل ٵرى ساتقىن بولىپ، وزگە ادامدارعا، ٴتىپتى قۇدايعا ٴتىل تيگىزىپ، قورلىق سوزدەر ايتاتىن بولادى. سونداي-اق ولار جالاقور بولادى *. مۇندايلار وزگەلەردىڭ بەدەلىن ٴتۇسىرۋ ٷشىن زياندى وتىرىكتى تاراتادى.
11 ەحوبانىڭ قىزمەتشىلەرى وسى دۇنيەدەگى ادامداردىڭ باسىم بولىگىنەن ەرەكشەلەنەدى، ويتكەنى ولار باسقالارعا شىنايى سۇيىسپەنشىلىك تانىتادى. بۇل ۇنەمى سولاي بولعان. يسا ايتىپ كەتكەندەي، مۇسا زاڭىندا وزگە ادامدى ٴسۇيۋ زاڭىنان ماڭىزدىراق بولعان قۇدايدى ٴسۇي دەگەن زاڭ عانا ەدى (ماتاي 22:38، 39). بۇعان قوسا، يسا شىنايى ماسىحشىلەردىڭ ٶزارا سۇيىسپەنشىلىكتەرىمەن تانىمال بولاتىنىن ايتقان (جوحان 13:34، 35 وقىڭىز). شىنايى ماسىحشىلەر ٴتىپتى جاۋلارىن دا جاقسى كورەدى (ماتاي 5:43، 44).
12. يسا وزگەلەرگە دەگەن سۇيىسپەنشىلىگىن قالاي كورسەتتى؟
12 يسا ادامداردى شىن جاقسى كورەتىنىن كورسەتتى. ول قالادان-قالاعا ساپار شەگىپ، ادامدارعا قۇداي پاتشالىعى تۋرالى ىزگى حاباردى ايتتى. سوقىرلاردى، اقساقتاردى، الاپەستەر مەن ساڭىراۋلاردى ايىقتىردى. ولگەندەردى دە قايتا ٴتىرىلتتى (لۇقا 7:22). ونى جەك كورگەن ادامدار كوپ بولسا دا، ول ادامزاتتى قۇتقارۋ ٷشىن ٴتىپتى جانىن قۇربان ەتتى. يسا اكەسىنىڭ سۇيىسپەنشىلىگىنە كەمەلدى تۇردە ەلىكتەدى. دۇنيە-ٴجۇزى بويىنشا ەحوبا كۋاگەرلەرى يسانى ۇلگى تۇتىپ، وزگەلەرگە سۇيىسپەنشىلىك تانىتادى.
13. وزگەلەرگە سۇيىسپەنشىلىك تانىتقانىمىز قالاي ولاردى ەحوبانى تانىپ-بىلۋگە تالپىندىرۋى مۇمكىن؟
13 ادامدار ٴبىزدىڭ ولاردى سۇيەتىنىمىزدى كورگەندە، كوكتەگى اكەمىز جايلى بىلگىسى كەلۋى مۇمكىن. مىسالى، تايلاندتا تۇراتىن ٴبىر ەر كىسى ايماقتىق كونگرەسكە بارعاندا، باۋىرلاستاردىڭ ٶزارا سۇيىسپەنشىلىگىن كورىپ، قاتتى تاڭعالادى. ۇيىنە بارعان سوڭ، ەحوبا كۋاگەرلەرىنەن وزىمەن اپتاسىنا ەكى رەت كيەلى كىتاپتى زەرتتەۋ ساباعىن وتكىزۋدى سۇرايدى. سوسىن ول بۇكىل تۋعان-تۋىستارىنا ۋاعىزدايدى. نە ٴبارى جارتى جىل وتكەندە، بۇل كىسى پاتشالىق سارايىندا العاش رەت كيەلى كىتاپتى وقۋ تاپسىرماسىمەن شىعادى. ٴبىز شى، وزگەلەرگە سۇيىسپەنشىلىك تانىتامىز با؟ مىنا سۇراقتار جايلى ويلانايىق: «وتباسى مۇشەلەرىنە، قاۋىمداعىلارعا، قىزمەتتەگى ادامدارعا قول ۇشىن بەرۋ ٷشىن بارىمدى سالامىن با؟ وزگەلەرگە ەحوبا سياقتى قاراۋعا تىرىسامىن با؟»
قاسقىرلار مەن قوزىلار
14، 15. كوپ ادامنىڭ بويىندا قانداي جاعىمسىز قاسيەتتەر بار؟ كەيبىرەۋلەر بولمىسىن قالاي وزگەرتكەن؟
14 سوڭعى كۇندەرى ادامدار باسقا دا جامان مىنەز-قۇلىق تانىتادى. ٴبىز بۇدان اۋلاق بولۋىمىز كەرەك. مىسالى، كوپ ادام جاقسىلىقتى جەك كورەدى. ولاردىڭ جاقسى نارسەنى سۋقانى سۇيمەيدى، ٴتىپتى وعان قارسى شىعادى. مۇنداي ادامدار ۇستامسىز دا بۇزاقى. كەيبىرى قيقار. ولار ويلانباي ارەكەت ەتەدى، ىستەرى وزگەلەرگە قالاي ىقپال ەتەتىنىن دە ەش ويلامايدى.
15 كەزىندە وزدەرىن جابايى اڭدار ىسپەتتى ۇستاعان كوپ ادام بولمىسىن وزگەرتكەن. مۇنداي كۇرت وزگەرىستىڭ بولاتىنى كيەلى كىتاپتا پايعامبارلىق ەتىلگەن (يشايا 11:6، 7 وقىڭىز). بۇل جازبا ورنىندا قاسقىر مەن ارىستان ىسپەتتى جابايى اڭداردىڭ قوزى مەن بۇزاۋ سياقتى ٷي جانۋارلارىمەن تاتۋ-ٴتاتتى تۇراتىنى ايتىلعان. بۇنىڭ سەبەبى نەدە؟ اتالمىش پايعامبارلىقتا ارى قاراي: «جەر بەتى ەحوبا تۋرالى بىلىمگە تولادى»،— دەلىنگەن (يشايا 11:9). اڭدار ەحوبا جايلى ٴبىلىم الا المايتىندىقتان، بەينەلى ماعىنادا بۇل پايعامبارلىق ادامداردىڭ بولمىسىنداعى وزگەرىستەرگە نۇسقاپ تۇر.
كيەلى كىتاپ پرينسيپتەرى ادامنىڭ ٶمىرىن وزگەرتە الادى! (16-ابزاستى قاراڭىز)
16. كيەلى كىتاپ ادامدارعا بولمىستارىن وزگەرتۋگە قالاي كومەكتەسەدى؟
16 باۋىرلاستارىمىزدىڭ كوپشىلىگى كەزىندە قاسقىر سياقتى بۇزاقى بولعان. ٴبىراق قازىر ولار جۋاس. كەيبىرىنىڭ وقيعالارىن jw.org تور بەكەتىندەگى «كيەلى كىتاپ ادامنىڭ ٶمىرىن وزگەرتەدى» ساناتىنان وقي الاسىز. ەحوبانى تانىپ، وعان قىزمەت ەتەتىندەر قۇدايشىل بولىپ كورىنگەنمەن، بۇنى ىستەرىمەن كورسەتپەيتىن ادامدار سەكىلدى ەمەس. مۇنداي ادامدار قۇدايعا عيبادات ەتەتىندەي سىڭاي تانىتقانمەن، ىستەرى مۇنى جوققا شىعارادى. ال ەحوبانىڭ حالقىنىڭ اراسىندا بۇرىن بۇزاقى بولعان كوپ ادام «قۇدايدىڭ ەركىنە ساي جاراتىلعان ٵرى شىنايى ادىلدىك پەن ادالدىققا ساي كەلەتىن جاڭا بولمىسقا يە بولعان» (ەفەستىكتەرگە 4:23، 24). ادامدار قۇداي جايلى بىلگەندە، ونىڭ تالاپتارىنا ساي ٶمىر ٴسۇرۋ كەرەكتىگىن تۇسىنەدى. بۇل ولاردىڭ نانىمدارىن، وي قالپىن جانە ىستەرىن وزگەرتۋىنە تۇرتكى بولادى. اتالمىش وزگەرىستەردى جاساۋ وڭاي ەمەس، ٴبىراق قۇدايدىڭ رۋحى وعان ۇنامدى بولعىسى كەلەتىندەرگە كومەكتەسەدى.
«مۇندايلاردان اۋلاق ٴجۇر»
17. جامان قاسيەتتەر تانىتاتىن ادامداردىڭ ىقپالىنان قالاي اۋلاق بولا الامىز؟
17 قۇدايعا قىزمەت ەتەتىندەر مەن قىزمەت ەتپەيتىندەردىڭ اراسىنداعى ايىرماشىلىق كۇننەن-كۇنگە ايقىن كورىنۋدە. قۇدايعا قىزمەت ەتپەيتىندەردىڭ جامان قاسيەتتەرى بىزگە جۇعىپ كەتپەۋىن مۇقيات قاداعالاۋىمىز قاجەت. تىموتەگە 2-حات 3:2—5 تارماقتاردا سيپاتتالعان ادامداردان اۋلاق جۇرۋگە قاتىستى ەحوبانىڭ باسشىلىعىنا قۇلاق اسقانىمىز ٴجون. ارينە، جامان قاسيەتى بار ادامداردىڭ بارىنەن بىردەي اۋلاق جۇرە المايمىز. ولارمەن جۇمىس ىستەۋگە، ٴبىر مەكتەپتە وقۋعا نە بىرگە تۇرۋعا تۋرا كەلەتىن شىعار. ٴبىراق بۇل ولار سياقتى ويلانىپ نە ارەكەت ەتۋىمىز كەرەكتىگىن بىلدىرمەيدى. بۇل ورايدا بىزگە نە كومەكتەسەدى؟ كيەلى كىتاپتى وقىپ-زەرتتەۋ جانە ەحوبانى سۇيەتىن ادامداردى جاقىن دوستار ەتۋ ارقىلى ەحوبامەن دوستىعىمىزدى نىعايتساق بولادى.
18. قالاي ٴبىزدىڭ ٴسوزىمىز بەن ٸسىمىز وزگەلەردىڭ ەحوبانى تانىپ-بىلۋگە دەگەن ىقىلاسىن وياتۋى مۇمكىن؟
18 بۇعان قوسا، باسقا ادامدارعا ەحوبانى تانىپ-بىلۋگە كومەكتەسۋىمىز كەرەك. كۋالىك بەرۋدىڭ مۇمكىندىكتەرىن ىزدەستىرىپ ٴجۇرىڭىز ٵرى دەر كەزىندە كەرەك ٴسوزدى ايتۋعا ەحوبادان كومەك سۇراڭىز. سونداي-اق وزگەلەرگە ەحوبا كۋاگەرى ەكەنىمىزدى ايتقانىمىز ٴجون. سوندا ۇلگىلى ٴجۇرىس-تۇرىسىمىز وزىمىزگە ەمەس، قۇدايعا ماداق اكەلەدى. ەحوبا «ٴبىزدى وعان ۇنامسىز ٴجۇرىس-تۇرىستان جانە وسى دۇنيەلىك قۇمارلىقتاردان باس تارتۋعا، سونداي-اق وسى زاماندا ەستى، ٵدىل ٵرى وعان شىن بەرىلىپ ٶمىر سۇرۋگە ۇيرەتەدى» (تيتكە 2:11—14). ەحوباعا ەلىكتەسەك جانە وعان ۇنامدى ارەكەت ەتسەك، بۇل وزگەلەردىڭ نازارىنان تىس قالمايدى. كەيبىرى ٴتىپتى: «ٴبىز سەنىمەن بارامىز، ويتكەنى قۇداي سەنىڭ حالقىڭمەن بىرگە ەكەنىن ەستىدىك»،— دەۋى مۇمكىن (زاكاريا 8:23).
^ 10-ابزاس گرەكتىڭ «ديابولوس» دەگەن ٴسوزى «جالاقور» نە «جالا جابۋشى» دەگەندى بىلدىرەدى. كيەلى كىتاپتا بۇل ٴسوز قۇدايعا جالا جاپقان زۇلىم شايتاننىڭ لاۋازىمى رەتىندە قولدانىلادى.
