بارىنە يە بولسا دا، نەگە قۇدايعا بەرۋىمىز كەرەك؟
«ۋا، قۇدايىمىز، ٴبىز وزىڭە العىس ايتىپ، كەرەمەت ەسىمىڭدى ماداقتاپ تۇرمىز» (شەجىرەلەر 1-جازبا 29:13).
اندەر: 95، 58
1، 2. ەحوبا بىزگە قالاي جومارتتىق تانىتادى؟
ەحوبا — قولى اشىق قۇداي. بىزدە باردىڭ ٴبارىن ول بەرگەن. ول جەردەگى بۇكىل تابيعات بايىلىعنىڭ يەسى ٵرى سول ارقىلى ول تىرشىلىكتى قامتاماسىز ەتىپ وتىر (ٴزابۇر 104:13—15؛ حاگەي 2:8). كيەلى كىتاپتان ٴبىز ەحوبانىڭ كەيدە ٶز حالقىنا قامقورلىق ەتۋ ٷشىن وسى بايلىقتاردى كەرەمەت جولمەن قولدانعانىن بىلەمىز.
2 مىسالى، يسرايلدىكتەر 40 جىل بويى ٴشول دالادا ٶمىر سۇرگەندە، ەحوبا ولاردى ماننا جانە سۋمەن قامتاماسىز ەتتى (مۇسانىڭ 2-جازباسى 16:35). سونىڭ ارقاسىندا ولار ەش نارسەدەن تارىقپادى (نەحەميا 9:20، 21). كەيىنىرەك ەلىشە پايعامبار ەحوبا بەرگەن كۇش ارقىلى ٴبىر ادال جەسىر ايەلدىڭ از عانا مايىن كوبەيتتى. قۇدايدىڭ وسى سىيىنىڭ ارقاسىندا بۇل ايەل بۇكىل قارىزىنان قۇتىلدى، ٴتىپتى قالعان اقشاعا بالالارىمەن ارى قاراي كۇن كوردى (پاتشالار 2-جازبا 4:1—7). يسا بولسا ەحوبانىڭ قولداۋىمەن كەرەمەت جاساپ، قاجەت كەزدە تاماقپەن، ٴتىپتى اقشامەن دە قامتاماسىز ەتتى (ماتاي 15:35—38؛ 17:27).
3. بۇل ماقالادان نە بىلەمىز؟
3 جاراتىلىستارىنىڭ قامىن جاساۋ ٷشىن ەحوبا قالاعان نارسەسىن قولدانا الادى. دەسە دە ول ٶز قىزمەتشىلەرىن ۇيىمىنىڭ ىسىنە قولداۋ كورسەتۋلەرى ٷشىن قولدا بارىن بەرۋگە شاقىرادى (مۇسانىڭ 2-جازباسى 36:3—7؛ ناقىل سوزدەر 3:9 وقىڭىز). نەگە ەحوبا ودان العان قۇندى نارسەلەردى وعان قايتىپ بەرەمىز دەپ كۇتەدى؟ ەحوبانىڭ ەجەلدەگى قىزمەتشىلەرى ونىڭ ىسىنە قالاي قولداۋ كورسەتكەن؟ ۇيىم بۇگىندە ەرىكتى ساداقانى قالاي قولدانادى؟ وسى سۇراقتاردىڭ جاۋابىن بىلەيىك.
نەگە ٴبىز ەحوباعا قولدا بارىمىزدى بەرەمىز؟
4. ىسىنە قولداۋ كورسەتۋ ارقىلى ەحوباعا نەنى كورسەتەمىز؟
4 ٴبىز ەحوبانى سۇيگەندىكتەن جانە ريزا بولعاندىقتان وعان بەرەمىز. بىزگە جاساعان بۇكىل جاقسىلىعىن ويلاعاندا، ەت جۇرەگىمىز ەلجىرەمەي قويمايدى. ٴداۋىت عيباداتحانانى سوعۋ ٷشىن قانداي زاتتار قاجەت ەكەنىن ايتقاندا وسىنداي سەزىمدە بولعان. ول بىزدەگى باردىڭ ٴبارى دە ەحوبادان ەكەنىن جانە وعان بەرەتىن سىي-تارتۋىمىزدىڭ ٴبارى ودان كەلگەنىن ايتقان (شەجىرەلەر 1-جازبا 29:11—14 وقىڭىز).
5. رياسىز بەرۋ شىنايى عيباداتتىڭ ماڭىزدى بولىگى ەكەنىن كيەلى كىتاپ قالاي ۇيرەتەدى؟
5 ەحوباعا بەرەتىنىمىزدىڭ تاعى ٴبىر سەبەبى — بۇل وعان عيبادات ەتۋدىڭ ٴبىر جولى. ەلشى جوحان اياندا ەحوبانىڭ كوكتەگى قىزمەتشىلەرى بىلاي دەپ جاتقانىن ەستىگەن: «قۇدايىمىز ەحوبا، سەن داڭققا، قۇرمەت پەن كۇش-قۇدىرەتكە يە بولۋعا لايىقسىڭ! ويتكەنى ٴبارىن جاراتقان — ٶزىڭسىڭ، ٴبارى دە سەنىڭ ەركىڭمەن بار بولدى ٵرى جاراتىلدى» (ايان 4:11). داڭق پەن قۇرمەت اتاۋلىعا لايىقتى بولعاندىقتان، ٴبىز ەحوباعا قولىمىزداعى ەڭ جاقسىنى بەرگىمىز كەلەدى ەمەس پە؟! ەحوبا مۇسا ارقىلى يسرايل حالقىنا جىلىنا ٷش مەيرام وتكىزىپ تۇرۋدى بۇيىرعان. وسى مەيرامدارداعى عيباداتتىڭ ٴبىر بولىگى رەتىندە ولار ەحوباعا قولدا بارلارىن بەرەتىن بولعان. حالىق «ەحوبانىڭ الدىنا قۇرالاقان كەلمەۋ» كەرەك ەدى (مۇسانىڭ 5-جازباسى 16:16). بۇگىنگى كۇنى دە رياسىز بەرۋ — ٴبىزدىڭ عيباداتىمىزدىڭ ماڭىزدى بولىگى. وسى ارقىلى ٴبىز ەحوبانىڭ ۇيىمى اتقارىپ جاتقان ٸستى باعالايتىنىمىزدى جانە ونى قولدايتىنىمىزدى كورسەتەمىز.
6. بەرۋدىڭ ٶزىمىز ٷشىن قانداي پايداسى بار؟ (ماقالانىڭ باسىنداعى سۋرەتتى قاراڭىز.)
6 تەك الا بەرمەي، جومارتتىقپەن بەرگەنىمىز وزىمىزگە دە پايدالى (ناقىل سوزدەر 29:21 وقىڭىز). اتا-اناسىنان تيىن-تەبەن الىپ تۇراتىن كىشكەنتاي بالانى ەلەستەتەيىكشى. ول جيناعان اقشاسىنان ٴبىراز الىپ، اتا-اناسىنا سىيلىق ساتىپ الدى دەلىك. ونىڭ سىيلىعى اكە-شەشەسىن قانداي سەزىمگە بولەيدى؟ يا بولماسا، اتا-اناسىمەن تۇرىپ جاتقان جاس ٸزاشار جالداعان ۇيىنىڭ اقسىن تولەۋ ٷشىن نە ۇيگە ازىق-تۇلىك الۋ ٷشىن ازدى-كوپتى قاراجات بەرەدى دەلىك. اتا-اناسى ودان اقشا بەرەدى دەپ كۇتپەسە دە، تارتۋىن قابىل الادى. نەگە؟ ويتكەنى وسىلايشا بالالارى جاساعان بۇكىل جاقسىلىعى ٷشىن ولارعا العىسىن بىلدىرە الادى. سول ىسپەتتى، ەحوبا قۇندى نارسەلەرىمىزدى وعان بەرگەنىمىز ٶزىمىز ٷشىن يگىلىكتى ەكەنىن بىلەدى.
بۇرىن ەحوبانىڭ قىزمەتشىلەرى قالاي بەرگەن؟
7، 8. ا) ارنايى ٸس-شارالارعا؛ ٵ) ەحوبانىڭ ىسىنە قولداۋ كورسەتۋ ٷشىن ساداقا جاساۋدا ەحوبانىڭ ەجەلدەگى حالقى قانداي ۇلگى كورسەتتى؟
7 كيەلى كىتاپتان ەجەلدە ەحوبانىڭ حالقى ونىڭ ٸسىن قولداۋ ٷشىن ساداقا جاساعانىن بىلۋگە بولادى. كەيدە ولار قانداي دا ٴبىر ارنايى ٸس-شاراعا ساداقا بەرەتىن بولعان. مۇسانىڭ كەزىن الساق، ول يسرايلدىكتەردى كيەلى شاتىردىڭ سوعىلۋىنا سىي-تارتۋ بەرۋگە شاقىرعان. كەيىنىرەك ٴداۋىت پاتشا دا عيباداتحانانىڭ قۇرىلىسىنا وسىنداي سۇرانىس جاساعان (مۇسانىڭ 2-جازباسى 35:5؛ شەجىرەلەر 1-جازبا 29:5—9). جوعاستىڭ بيلىگى تۇسىندا ٴدىني قىزمەتكەرلەر عيباداتحانانى جۇرتتىڭ بەرگەن اقشاسىنا جوندەگەن (پاتشالار 2-جازبا 12:4، 5). ال 1-عاسىردا ماسىحشىلەر ياھۋدەيادا اشتىق جايلاپ، باۋىرلاستارىنىڭ كومەككە ٴزارۋ بولىپ قالعانىن ەستيدى. سوندا ٵربىر ٴماسىحشى سونداعى باۋىرلاستارىنا قولىنان كەلگەنشە جاردەم جىبەرۋدى شەشەدى (ەلشىلەردىڭ ىستەرى 11:27—30).
8 سونىمەن قاتار ەحوبانىڭ حالقى ونىڭ ىسىندە جەتەكشىلىك ەتەتىندەرگە جاردەم بولسىن دەپ قارجىلاي كومەك كورسەتكەن. مىسالى، مۇسا زاڭى بويىنشا، لەۋىلىكتەردىڭ باسقا رۋلار سياقتى مۇرالى يەلىگى بولماعان. سول سەبەپتى قالعان يسرايلدىكتەر ولارعا وزدەرىندە باردىڭ وننان ٴبىرىن بەرەتىن. سونىڭ ارقاسىندا لەۋىلىكتەر كيەلى شاتىرداعى قىزمەتتەرىن ەش الاڭسىز اتقارا العان (مۇسانىڭ 4-جازباسى 18:21). وسى سياقتى، يسا مەن ەلشىلەرىنە دە كوپتەگەن جومارت ايەلدەر قولدا بارلارىمەن جاردەم بەرىپ جۇرگەن (لۇقا 8:1—3).
وتە باي ادامنان باستاپ تاقىر كەدەيگە دەيىن ٵركىم قولدا بارىن بەرە العان
9. بۇرىن قۇدايدىڭ قىزمەتشىلەرى ساداقالاردى قانداي جولدارمەن جاساعان؟
9 قۇدايدىڭ قىزمەتشىلەرى اتالمىش ساداقالاردى ٵرتۇرلى جولمەن جاساعان. يسرايلدىكتەر كيەلى شاتىردى سوعۋ ىسىنە مىسىردان ولجالاعان قۇندى بۇيىمدارىن بەرگەن بولسا كەرەك (مۇسانىڭ 2-جازباسى 3:21، 22؛ 35:22—24). ال ٴبىرىنشى عاسىردا كەيبىر ماسىحشىلەر ٶز مەنشىكتەرىن، مىسالى تاناپتارى مەن ۇيلەرىن ساتىپ، سودان تۇسكەن اقشانى ەلشىلەرگە بەرگەن. ال ولار اقشانى مۇقتاجدىق كورگەن باۋىرلاستارعا ۇلەستىرگەن (ەلشىلەردىڭ ىستەرى 4:34، 35). وزگە ٴبىر ماسىحشىلەر قۇدايدىڭ ٸسىن قولداۋعا ٶز ۇلەستەرىن قوسۋ ٷشىن جۇيەلى تۇردە اقشا ٴبولىپ وتىرعان (قورىنتتىقتارعا 1-حات 16:2). وسىلايشا وتە باي ادامنان باستاپ تاقىر كەدەيگە دەيىن اركىم قولدا بارىن بەرە العان (لۇقا 21:1—4).
بۇگىندە ٴبىز قالاي بەرەمىز؟
10، 11. ا) ەجەلدە ٶمىر سۇرگەن ەحوبانىڭ قىزمەتشىلەرىنە قالاي ەلىكتەي الامىز؟ ٵ) پاتشالىق ٸسىن قولداي الاتىنىڭىز ٴسىزدى قانداي سەزىمگە بولەيدى؟
10 بۇگىندە ٴبىزدىڭ دە قانداي دا ٴبىر ارنايى ٸس-شاراعا ساداقا جاساۋىمىز قاجەت بولۋى مۇمكىن. بالكىم، قاۋىمىمىز پاتشالىق سارايىن جوندەۋدى نە جاڭاسىن سالۋدى جوسپارلاپ جۇرگەن بولار. يا بولماسا جەرگىلىكتى فيليالدا جوندەۋ جۇمىستارىن جۇرگىزۋ قاجەتتىلىگى بار شىعار. كونگرەسكە كەتكەن شىعىندى جابۋعا كومەكتەسە الاتىن دا بولارمىز. نە وزگە جەردە باۋىرلاستارىمىز تابيعي اپاتتان زارداپ شەگىپ، كومەگىمىزگە ٴزارۋ بولۋى مۇمكىن. سونداي-اق جاساعان ساداقالارىمىزبەن ميسسيونەرلەردىڭ، ارنايى ٸزاشارلاردىڭ، اۋداندىق باقىلاۋشىلاردىڭ جانە دۇنيە جۇزىلىك باس باسقارما مەن جەر-جەردەگى فيليالدارداعى باۋىرلاستاردىڭ قىزمەتىن قولدايمىز. قاۋىمىڭىز دۇنيە-ٴجۇزى بويىنشا كونگرەسس سارايلارى مەن پاتشالىق سارايلارىن سالۋ ىسىنە ۇزبەي ساداقا جىبەرىپ وتىراتىن دا بولار.
11 ٵرقايسىسىمىز ەحوبانىڭ ۇيىمى سوڭعى كۇندەرى اتقارىپ جاتقان ٸستى قولداۋ ٷشىن ٶز ۇلەسىمىزدى قوسا الامىز. ساداقالاردىڭ كوبىسى قۇپيا تۇردە جاسالادى. ٴبىز پاتشالىق سارايىنداعى ساداقا جاشىگىنە اقشا سالعاندا نە jw.org توربەكەتى ارقىلى ساداقا جاساعاندا، قانشا بەرگەنىمىزدى باسقالارعا ٴمالىم ەتپەيمىز. ال بەرگەن كىشىگىرىم ساداقامىزدى تىم ماردىمسىز دەپ ويلاساق شى؟ شىندىعىندا، ۇيىمعا تۇسەتىن ساداقالاردىڭ باسىم بولىگى بىرنەشە قوماقتى سومادان ەمەس، كوپتەگەن كىشىگىرىم تارتۋلاردان قۇرالادى. تۇرمىسى تومەن باۋىرلاستارىمىزدىڭ وزدەرى ماكەدونياداعى ەرتەدەگى ماسىحشىلەرگە ەلىكتەپ جاتادى. بۇل ماسىحشىلەر «تاقىر كەدەي» بولعاندارىنا قاراماستان، سىيلارىمەن بولىسۋگە مۇمكىندىك بەرۋدى سۇراپ جالىنعان جانە ارتىنان جومارتتىقپەن بەرگەن دە ەدى (قورىنتتىقتارعا 2-حات 8:1—4).
12. قالاي ۇيىم ساداقانى بارىنشا دۇرىس جۇمساۋعا تىرىسادى؟
12 باسقارۋشى كەڭەس ساداقانى جۇمساعاندا ادالدىقپەن ٵرى اقىلدىلىقپەن ارەكەت ەتەدى (ماتاي 24:45). ونىڭ مۇشەلەرى دۇرىس شەشىم قابىلداۋدى سۇراپ دۇعا ەتەدى جانە اقشانى قالاي جۇمسايتىندارىن مۇقيات قاراستىرادى (لۇقا 14:28). ەجەلدە جاۋاپتى ادال ەر كىسىلەر ساداقالاردىڭ تەك ەحوبانىڭ عيباداتى ٷشىن قولدانىلۋىن قاداعالاعان. مىسالى، پارسى پاتشاسى سىيلاعان قىمبات تارتۋلاردى يەرۋساليمگە تاسىمالداعان ەزرانى الايىق. بۇل تارتۋلاردىڭ ىشىندە بۇگىندە قۇنى 100 ميلليون اقش دوللارىنان اساتىن التىن، كۇمىس جانە باسقا دا بۇيىمدار بار ەدى. ەزرا بۇل ساداقالاردى ەحوباعا ارنالعان سىي-تارتۋ رەتىندە قاراستىرعان. سوندىقتان ولاردى قاۋىپتى ايماقتاردان امان-ەسەن وتكىزۋ ٷشىن ارنايى نۇسقاۋلار بەرگەن (ەزرا 8:24—34). كوپتەگەن جىلدان كەيىن ەلشى پاۋىل ياھۋدەياداعى مۇقتاجدىق كورگەن باۋىرلاستارعا كومەكتەسۋ ٷشىن قارجى جيناعان. ول وسى ساداقانى جەتكىزەتىن باۋىرلاستارعا «ەحوبانىڭ عانا ەمەس، ادامداردىڭ دا الدىندا بارلىق ىستە ادال بولۋعا» نۇسقاۋ بەرگەن (قورىنتتىقتارعا 2-حات 8:18—21 وقىڭىز). بۇگىندە ٴبىزدىڭ ۇيىم ەزرا مەن پاۋىلعا ەلىكتەپ، ساداقالاردى اسا ۇقىپتىلىقپەن جۇمساۋدا.
13. ۇيىمنىڭ جاقىندا وزگەرىستەر جاساۋىنىڭ سەبەبى نەدە؟
13 ادەتتە وتباسى كىرىستەن قاراعاندا شىعىس كوپ بولىپ كەتپەۋ ٷشىن اقشانى ورنىمەن جۇمساۋدى ويلاستىرادى. نە بولماسا ەحوباعا كوبىرەك قىزمەت ەتۋ ٷشىن ومىرلەرىن قاراپايىم ەتۋدىڭ جولىن ىزدەيدى. ەحوبانىڭ ۇيىمى دا وسىلاي ارەكەت ەتەدى. جاقىندا كوپتەگەن جاڭا جوبالار اتقارىلدى. سول ۋاقىتتارى تۇسكەن اقشادان قاراعاندا شىعىن اسىپ كەتەتىن كەزدەر بولدى. سول سەبەپتى ۇيىم، وتباسى سياقتى، قاراجاتتى ۇنەمدەۋدىڭ جانە جۇمىستى قاراپايىم ەتۋدىڭ جولىن قاراستىرۋدا. وسىنىڭ ارقاسىندا ۇيىم سىزدەردىڭ جومارتتىقپەن بەرىپ جاتقان ساداقالارىڭىزدى بارىنشا ٴتيىمدى جۇمساي الادى.
ساداقالارىڭىزدىڭ اكەلگەن پايداسى
ساداقا جاساۋىڭىزبەن دۇنيە جۇزىلىك ٸستى قولدايسىز (14—16 ابزاستاردى قاراڭىز)
14—16. ا) ساداقالارىمىز نە نارسەگە جۇمسالىپ جاتىر؟ ٵ) ٴسىز وسى ٸس-شارالاردىڭ قانداي پايداسىن كورىپ ٴجۇرسىز؟
14 كوپ جىلدان بەرى شىندىقتا جۇرگەن باۋىرلاستار ۇيىمنان بۇرىن-سوڭدى مۇنشالىقتى كوپ سىيلىق الماعانىن ايتادى. قازىر بىزدە jw.org توربەكەتى جانە JW Broadcasting ارناسى بار. كوپتەگەن تىلدە «كيەلى جازبالار. جاڭا دۇنيە اۋدارماسى» دا بار. ال 2014—2015 جىلدار ارالىعىندا «قۇداي پاتشالىعىن ٴبىرىنشى ورىنعا قويايىق!» دەپ اتالاتىن ٷش كۇندىك ايماقتىق كونگرەسس 14 قالانىڭ ەڭ ۇلكەن سپورت الاڭدارىندا وتكىزىلدى. وسى كونگرەسكە قاتىناسقانداردىڭ بارلىعى سوندا بولعاندارىنا شەكسىز قۋاندى.
15 كوپ باۋىرلاستار ەحوبانىڭ ۇيىمى بەرىپ جاتقان سىيلار ٷشىن العىسىن بىلدىرۋدە. مىسالعا، ازيادا قىزمەت ەتەتىن ٴبىر ەرلى-زايىپتى بىلاي دەپ جازدى: «ٴبىز كىشكەنتاي قالاعا تاعايىندالعانبىز. سوندىقتان كەيدە ٶزىمىزدى وقشاۋلانىپ قالعانداي سەزىنىپ، ەحوبانىڭ ٸسى قانشالىقتى كەڭ كولەمدە اتقارىلىپ جاتقانىن ۇمىتىپ كەتەتىنبىز. ٴبىراق JW Broadcasting ارناسىنان ٴتۇرلى باعدارلامالاردى كورگەندە، دۇنيە جۇزىلىك باۋىرلاستىقتىڭ مۇشەسى ەكەنىمىز ەسكە تۇسەدى. اياۋلى جەرگىلىكتى باۋىرلاستارىمىز دا وسى ارنانىڭ بولعانىنا ٴدان ريزا. ولار اي سايىنعى باعدارلامانى كورگەندە، باسقارۋشى كەڭەستىڭ مۇشەلەرىنە جاقىن سەزىنەتىندەرىن ٴجيى ايتىپ جاتادى. قازىر ولار قۇداي ۇيىمىنىڭ مۇشەسى بولعاندارىن بۇرىنعىدان دا ماقتان ەتەدى ەكەن».
16 قازىرگى تاڭدا جەر-جۇزى بويىنشا 2500 گە جۋىق پاتشالىق سارايى سالىنىپ نە جوندەۋ جۇمىستارى جاسالىپ جاتىر. گوندۋراستاعى ٴبىر قاۋىمنىڭ مۇشەلەرى ٶز پاتشالىق سارايلارى بولعانىن قاتتى ارماندايتىن. ٴبىراق قازىر ولاردىڭ ارماندارى ورىندالدى. ولار بىلاي دەپ جازدى: «ەحوبانىڭ بۇكىل الەمدىك وتباسىنىڭ مۇشەسى بولعانىمىز جانە دۇنيە جۇزىلىك باۋىرلاستىقتى سەزىنە العانىمىز ٷشىن سونداي باقىتتىمىز!» انا تىلىندە كيەلى كىتاپ پەن باسقا ادەبيەتتەردى العاندا، تابيعي اپاتتان كەيىن باۋىرلاستاردىڭ كومەگىن سەزىنگەندە نە ٸرى قالالاردا جانە كوپشىلىك ورىنداردا ۋاعىزداۋدىڭ جاقسى ناتيجەسىن كورگەندە، كوبىسى وسىنداي سەزىمدە بولاتىنى جايلى ايتىپ جاتادى.
17. ەحوبانىڭ ٶز ۇيىمىن قولداپ جاتقانىن ٴبىز قايدان بىلەمىز؟
17 ەحوبا كۋاگەرلەرى بولىپ تابىلمايتىن كوپ ادام ٸسىمىزدىڭ بارلىعى تەك ەرىكتى ساداقانىڭ كومەگىمەن اتقارىلىپ جاتقانىن تۇسىنە المايدى. بىردە ٸرى سەرىكتىكتىڭ باسقارۋشىسى باسپاحانالارىمىزدىڭ بىرىنە ەكسكۋرسياعا بارادى. ول بارلىق جۇمىستىڭ تەك ەرىكتى قىزمەتشىلەردىڭ كۇشىمەن، ەرىكتى ساداقانىڭ كومەگىمەن، اقشا جيناۋ شارالارىن وتكىزبەي-اق جاسالىپ جاتقانىنا قايران قالىپ، بۇلاي بولۋى مۇمكىن ەمەستىگىن ايتتى. ونىڭ ايتقانى راس! ويتكەنى بار جۇمىس ەحوبانىڭ قولداۋىنىڭ ارقاسىندا عانا اتقارىلىپ جاتىر (ٵيۇپ 42:2).
ەحوباعا قايتارىپ بەرگەندە الاتىن باتالارىمىز
18. ا) پاتشالىقتى قولداۋ ٷشىن قولىمىزدا باردى بەرگەندە قانداي باتالارعا كەنەلەمىز؟ ٵ) بالالارىمىز بەن شىندىققا جاڭادان كەلگەندەرگە وسىنى قالاي ۇيرەتە الامىز؟
18 ەحوبا بىزگە پاتشالىق ٸسىن قولداۋعا مارتەبە دە، مۇمكىندىك تە بەرىپ وتىر. ونىڭ ٸسىن قولداساق، باتاسىن توگەتىنىنە كەپىلدىك بەرەدى (مالاحي 3:10). ەحوبا جومارتتىقپەن بەرگەنىمىز ٶزىمىز ٷشىن پايدالى بولاتىنىن ۋادە ەتەدى (ناقىل سوزدەر 11:24، 25 وقىڭىز). سونداي-اق بەرگەندە باقىتتى بولاتىنىمىزدى ايتادى، سەبەبى «العاننان گورى بەرگەن باقىتتى» (ەلشىلەردىڭ ىستەرى 20:35). بالالارىمىزعا جانە شىندىققا جاڭادان كەلگەندەرگە پاتشالىق ٸسىن قالاي ولار دا قولداپ، كوپ باتالارعا كەنەلە الاتىنىن سوزىمىزبەن ٵرى ىسىمىزبەن كورسەتە الامىز.
19. وسى ماقالا ٴسىزدى نەگە تالپىندىردى؟
19 ٴبىز ٴبارىن دە ەحوبادان الدىق. قولىمىزدا باردى وعان قايتىپ بەرگەندە، ونى سۇيەتىنىمىزدى جانە بىزگە جاساعاندارىنىڭ ٴبارىن دە باعالايتىنىمىزدى كورسەتەمىز (شەجىرەلەر 1-جازبا 29:17). عيباداتحانانىڭ سوعىلۋىنا ٶز ۇلەستەرىن قوسقاندا، يسرايلدىكتەر «ەرىكتى سىي-تارتۋلارىن قۋانا اكەلدى، ويتكەنى مۇنى ەحوباعا ارناپ بار جۇرەكتەرىمەن بەرىپ جاتتى» (شەجىرەلەر 1-جازبا 29:9). ەندەشە، ەحوبانىڭ بىزگە بەرگەن نارسەلەرىن وعان قايتارىپ بەرۋ ارقىلى قۋانىش پەن قاناعات سەزىمىنە بولەنە بەرەيىك.
