تاماشا بىرلىك پەن ەسكە الۋ كەشى
«باۋىرلاردىڭ بىرلىكتە تۇرعاندارى قانداي يگى، قانداي جاعىمدى!» (ٴزابۇر 133:1).
اندەر: 149، 99
1، 2. 2018-جىلى قانداي وقيعا ٴبىزدى ەرەكشە جولمەن بىرىكتىرەدى جانە قالاي؟ (ماقالانىڭ باسىنداعى سۋرەتتى قاراڭىز.)
بيىل، 2018-جىلدىڭ 31-ناۋرىزىندا، بۇكىل الەم بويىنشا ميلليونداعان ادام جىلىنا ٴبىر رەت وتكىزىلەتىن جيىنعا بارادى. كۇن باتقان سوڭ، ەحوبا كۋاگەرلەرىمەن بىرگە باسقا دا كوپ كىسىلەر جينالىپ، يسانىڭ ادامزات ٷشىن جاساعان قۇرباندىعىن ەسكە الادى. باسقا بارلىق جيىنداردان ايىرماشىلىعى — ٴماسىحتىڭ ٶلىمىن ەسكە الۋ كەشى جىل سايىن ادامداردى ەرەكشە جولمەن بىرىكتىرەدى.
2 ەحوبا مەن يسا ميلليونداعان ادامنىڭ بۇكىل جەر بەتى بويىنشا وسى ەرەكشە جيىنعا بارا جاتقانىن كورگەندە، قاتتى قۋاناتىنى ٴسوزسىز. كيەلى كىتاپتا «ٵربىر ۇلتتان، رۋدان، حالىقتان جانە تىلدەن شىققان، ەشبىر ادام بالاسى ساناي المايتىنداي ۇلى جاماعاتتىڭ» قاتتى داۋىستاپ: «قۇتقارىلعانىمىز ٷشىن ٴبىز تاقتا وتىرعان قۇدايىمىز بەن توقتىعا بورىشتىمىز»،— دەپ جاتقانى الدىن الا ايتىلعان (ايان 7:9، 10). جىل سايىن سونشاما جاماعاتتىڭ ەسكە الۋ كەشىنە كەلىپ، ەحوبا مەن يسانى جاساعان كەرەمەت ىستەرى ٷشىن ماداقتايتىنى قانداي تاماشا!
3. بۇل ماقالادا قانداي سۇراقتاردىڭ جاۋابى بار؟
3 وسى ماقالادان ٴسىز مىنا ٴتورت سۇراققا جاۋاپ الاسىز: 1) بارىنشا پايداسىن كورۋ ٷشىن ەسكە الۋ كەشىنە قالاي دايىندالسام بولادى؟ 2) ەسكە الۋ كەشى بۇكىل قۇداي حالقىنىڭ بىرلىگىنە قالاي ىقپال ەتەدى؟ 3) مەن قۇداي حالقىنىڭ بىرلىگىنە قالاي اتسالىسا الامىن؟ 4) ەسكە الۋ كەشىن سوڭعى رەت وتكىزەتىن كەز بولا ما؟ بولسا، قاشان بولادى؟
ەسكە الۋ كەشىنە قالاي دايىندالامىز جانە وعان بارعانىمىز نەگە ماڭىزدى؟
4. ەسكە الۋ كەشىندە بولعانىمىز نەگە ماڭىزدى؟
4 ەسكە الۋ كەشىندە بولعانىمىز نەگە ماڭىزدى؟ ٴبىر سەبەبى، كەزدەسۋلەرگە بارۋ ارقىلى ٴبىز ەحوباعا عيبادات ەتەمىز. جىلدىڭ ەڭ ماڭىزدى كەزدەسۋىنە كەلۋ ٷشىن بارىن سالعان اركىمدى ەحوبا مەن يسا بايقايتىنىنا سەنىمدى بولساق بولادى. كەشكە بارۋعا ەش مۇمكىندىگىمىز بولمايتىن جاعدايلاردى الماعاندا، ەحوبا مەن يسا ٴبىزدىڭ سوندا بولعانىمىزدى كورسە ەكەن دەيمىز. قاۋىم كەزدەسۋلەرىن قىمبات تۇتاتىنىمىزدى ىسپەن دالەلدەسەك، ەحوبانىڭ ٴبىزدىڭ ەسىمىمىزدى «ەستەلىك كىتابىندا» ساقتاۋىنا تاعى ٴبىر نەگىز بەرەمىز. بۇل كىتاپ «ٶمىر كىتابى» دەپ تە اتالعان. وندا ەحوبا ماڭگى ٶمىر سىيلاعىسى كەلەتىن ادامداردىڭ بارلىعىنىڭ اتى جازىلعان (مالاحي 3:16؛ ايان 20:15).
5. «سەنىم جولىندامىز با، جوق پا»، سونى ەسكە الۋ كەشى الدىنداعى اپتالاردا قالاي تەكسەرە الامىز؟
5 ەسكە الۋ كەشىنىڭ الدىنداعى اپتالاردا قوسىمشا ۋاقىت ٴبولىپ، دۇعا ەتكەنىمىز ٴجون. سونداي-اق ەحوبامەن قارىم-قاتىناسىمىزدىڭ قانشالىقتى بەرىك ەكەنىن مۇقيات ويلانساق بولادى (قورىنتتىقتارعا 2-حات 13:5 وقىڭىز). ەلشى پاۋىل ماسىحشىلەرگە: «سەنىم جولىنداسىڭدار ما، جوق پا — سونى تەكسەرىپ تۇرىڭدار»،— دەگەن. ونى قالاي تەكسەرەمىز؟ بىلاي دەپ ويلانساق بولادى: «ەحوبا ٶز ەركىن ورىنداۋ ٷشىن تاڭداعان جالعىز ۇيىم وسى ەكەنىنە شىنىمەن سەنەمىن بە؟ ىزگى حاباردى ۋاعىزداۋ جانە ٴتالىم بەرۋ ٷشىن قولىمنان كەلگەننىڭ ٴبارىن جاساپ ٴجۇرمىن بە؟ سوڭعى كۇندەرى ٶمىر ٴسۇرىپ جاتقانىمىزعا جانە شايتاننىڭ بيلىگى اياقتالۋعا شاق قالعانىنا شىن سەنەتىنىم ٸس-ارەكەتىمنەن كورىنە مە؟ ەحوبا مەن يساعا دەگەن سەنىمىم العاش قىزمەت ەتە باستاعان كەزىمدەگىدەي مىزعىماس كۇيىندە مە؟» (ماتاي 24:14؛ تىموتەگە 2-حات 3:1؛ ەۆرەيلەرگە 3:14). وسى سۇراقتارعا قالاي جاۋاپ بەرەتىنىمىز جايلى ويلانساق، «كىم ەكەنىمىزگە كوز جەتكىزىپ» وتىرامىز.
6. ا) ماڭگىلىك ومىرگە يە بولۋدىڭ جالعىز جولى قانداي؟ ٵ) ٴبىر اقساقال ەسكە الۋ كەشىنە جىل سايىن قالاي دايىندالادى جانە ول سياقتى ٴسىز دە نە ىستەي الاسىز؟
6 ەسكە الۋ كەشىنە دايىندالۋدىڭ ٴبىر جولى — وسى كەشتىڭ نەلىكتەن وتە ماڭىزدى ەكەنىن تۇسىندىرەتىن ماقالالاردى وقىپ، وي قوزعاۋ (جوحان 3:16؛ 17:3 وقىڭىز). ماڭگى ومىرگە ٴبىز تەك ەحوبانى تانىپ-ٴبىلۋ جانە ونىڭ ۇلى يساعا سەنۋ ارقىلى عانا يە بولا الامىز. ەسكە الۋ كەشىنە دايىندالۋ ٷشىن، ولارعا جاقىنداي تۇسۋگە تالپىندىراتىن تاقىرىپتاردى زەرتتەسەك بولادى. ۇزاق ۋاقىتتان بەرى اقساقال بولىپ جۇرگەن ٴبىر باۋىرلاس وسىلاي ەتەدى ەكەن. كوپ جىلدان بەرى ول «كۇزەت مۇناراسىنداعى» ەسكە الۋ كەشى جايلى جانە ەحوبا مەن يسانىڭ بىزگە تانىتقان سۇيىسپەنشىلىگى تۋرالى ماقالالاردى جيناپ كەلەدى. ەسكە الۋ كەشى الدىنداعى اپتالاردا ول وسى ماقالالاردى قايتادان وقىپ، نەگە وسى جيىننىڭ ماڭىزى زور ەكەنى تۋرالى بايىپپەن ويلانادى. ارا-تۇرا ول وسى ماقالالار جيناعىنا تاعى بىر-ەكەۋىن قوسىپ قويادى. سونداي-اق ول ەسكە الۋ كەشىنىڭ قارساڭىندا وقىلاتىن كيەلى كىتاپ تارماقتارىن وقىپ، تەرەڭىنەن وي قوزعايدى. ونىڭ ايتۋىنشا، وسىنىڭ ارقاسىندا ول ٵر جىلى جاڭا نارسە ٴبىلىپ وتىرادى. ال ەڭ باستىسى، ەحوبا مەن يسانى ودان بەتەر جاقسى كورە تۇسەدى. وسىلاي ىزدەنىس جاساساڭىز، ٴسىز دە ەحوبا مەن يسانى جاقسى كورە تۇسەسىز. ولاردىڭ جاساعان جاقسىلىعىنا دەگەن ريزاشىلىعىڭىز تەرەڭدەيدى ٵرى ەسكە الۋ كەشىنىڭ كوبىرەك يگىلىگىن كورەسىز.
ەسكە الۋ كەشى بىرلىكتە بولۋىمىزعا ىقپال ەتەدى
7. ا) يەمىزدىڭ كەشكى اسى العاش وتكىزىلگەن ٴتۇنى يسا نە جايلى دۇعا ەتتى؟ ٵ) ەحوبا يسانىڭ دۇعاسىنا جاۋاپ بەرگەنى نەدەن كورىنەدى؟
7 يەمىزدىڭ كەشكى اسى العاش وتكىزىلگەن ٴتۇنى يسا ەرەكشە دۇعا ەتتى. ول اكەسى مەن ٶزىنىڭ اراسىنداعى باعا جەتپەس بىرلىك تۋرالى ايتتى. تۋرا وسىلاي، بارلىق شاكىرتتەرىنىڭ دە بىرلىكتە بولۋىن سۇرادى (جوحان 17:20، 21 وقىڭىز). اسىل ۇلىنىڭ وسى دۇعاسىنا ەحوبا ٴسوزسىز جاۋاپ بەردى. بارلىق كەزدەسۋلەردىڭ ىشىندە ەسكە الۋ كەشى — ەحوبا كۋاگەرلەرىنىڭ بىرلىگىن انىق كورسەتەتىن بىردەن-ٴبىر كەزدەسۋ. سول كۇنى دۇنيە-ٴجۇزى بويىنشا ٵرتۇرلى ەل مەن ناسىلدىڭ وكىلدەرى بىرگە باس قوسىپ، ەحوبانىڭ ٶز ۇلىن جىبەرگەنىنە سەنەتىنىن پاش ەتەدى. كەيبىر جەرلەردە ٵرتۇرلى ناسىلدەن شىققان ادامداردىڭ نەمەسە ەر جانە ايەل كىسىلەردىڭ ٴدىني جيىندا وسىلاي باس قوسۋى وتە سيرەك. ال بىرگە جينالسا، بۇل سىرت كوزگە ەرسى كورىنەدى. ٴبىراق ەحوبا مەن يساعا ولاي كورىنبەيدى. ەسكە الۋ كەشىندەگى بىرلىگىمىز ولاردىڭ كوزىن قۋانتادى!
8. ەحوبا ەزەكيەلگە قانداي حابار ايتتى؟
8 ەحوبانىڭ حالقى رەتىندە ٴبىز وسىنداي تاماشا بىرلىگىمىزدىڭ بارىنا تاڭعالمايمىز. ەزەكيەلگە بەرگەن حابارىندا ەحوبا وسى بىرلىك جايلى الدىن الا ايتىپ كەتكەن. ول ەزەكيەلگە ەكى تاياق الىپ، بىرەۋىنە «ياھۋداعا»، ەكىنشىسىنە «جۇسىپكە» دەپ جازۋدى جانە ەكەۋىن ٴبىر-بىرىمەن قوسىپ، ٴبىرتۇتاس ەتىپ ۇستاۋدى ايتتى (ەزەكيەل 37:15—17 وقىڭىز). 2016-جىلدىڭ شىلدەسىندە شىققان «كۇزەت مۇناراسى» جۋرنالىنداعى «وقىرمان ساۋالدارى» ايدارىندا بىلاي دەلىندى: «ەحوبا ەزەكيەل پايعامبار ارقىلى يسرايل حالقىنىڭ ۋادە ەتىلگەن جەرگە ورالىپ، قايتادان ٴبىر حالىق بولىپ بىرىگەتىنىن الدىن الا ايتقان. سونداي-اق بۇل پايعامبارلىق سوڭعى كۇندەردە قۇداي قىزمەتشىلەرىنىڭ دە ٴبىرتۇتاس حالىق بولاتىنىن ايان ەتەدى».
9. جىل سايىن ەسكە الۋ كەشىندە ٴبىز ەزەكيەلدىڭ پايعامبارلىعىندا ايتىلىپ كەتكەن بىرلىككە قالاي كۋا بولامىز؟
9 1919-جىلدان باستاپ، ەحوبا الدىمەن مايلانعانداردى بىرتە-بىرتە قايتا ۇيىمداستىرىپ، بىرىكتىردى. ولار «ياھۋداعا» ارنالعان تاياق سياقتى بولدى. كەيىننەن مايلانعاندارعا جەردە ماڭگى ٶمىر سۇرۋگە ۇمىتتەنەتىن ادامدار قوسىلىپ، كوبەيە بەردى. ولار بولسا «جۇسىپكە» ارنالعان تاياق ىسپەتتى بولدى. ەحوبا وسى ەكى تاياقتى بىرىكتىرۋگە جانە قولىنداعى «ٴبىرتۇتاس تاياق» ەتۋگە ۋادە بەردى (ەزەكيەل 37:19). ول مايلانعاندار مەن «باسقا قويلاردى» «ٴبىر وتار» قىلدى (جوحان 10:16؛ زاكاريا 8:23). بۇگىندە بۇل ەكى توپ ەحوباعا بىرىگىپ قىزمەت ەتۋدە. سونداي-اق ولاردىڭ پاتشاسى — ەزەكيەلدىڭ پايعامبارلىعىندا قۇدايدىڭ «قىزمەتشىسى ٴداۋىت» دەپ اتالعان يسا ٴماسىح (ەزەكيەل 37:24، 25). جىل سايىن يسانىڭ ٶلىمىن ەسكە الۋ ٷشىن جينالعاندا، ٴبىز ەزەكيەلدىڭ پايعامبارلىعىندا ايتىلعان وسى ەكى توپتىڭ بىرلىگىنە كۋا بولامىز. الايدا قۇداي حالقىنىڭ بىرلىگىن بۇزباي، نىعايتا ٴتۇسۋ ٷشىن ٵرقايسىسىمىز قالاي اتسالىسا الامىز؟
بىرلىكتى ساقتاۋعا ٵرقايسىسىمىز قالاي اتسالىسا الامىز؟
10. قۇداي حالقىنىڭ بىرلىگىنە قالاي اتسالىسا الامىز؟
10 قۇداي حالقىنىڭ بىرلىگىن نىعايتۋعا اتسالىسۋدىڭ ٴبىرىنشى جولى قانداي؟ كىشىپەيىل بولۋعا كۇش سالۋ. جەردە بولعان كەزدە يسا شاكىرتتەرىنە كىشىپەيىل بولۋلارى كەرەكتىگىن ايتقان (ماتاي 23:12). مىنا دۇنيەدە ٴجيى ادامدار وزدەرىن وزگەلەردەن ارتىقپىز دەپ سانايدى. الايدا ٴبىز كىشىپەيىلدىلىك تانىتساق، قاۋىمدا جەتەكشىلىك ەتەتىن ەر باۋىرلاستاردى قۇرمەتتەپ، باسشىلىقتارىنا مويىنسۇناتىن بولامىز. سول كەزدە عانا قاۋىمدا بىرلىك بولادى. ەڭ ماڭىزدىسى، كىشىپەيىلدىلىك ساقتاساق، ەحوباعا ۇنامدى بولامىز. ويتكەنى ول «تاكاپپارلارعا قارسى تۇرادى، ال كىشىپەيىلدەرگە راقىمىن توگەدى» (پەتىردىڭ 1-حاتى 5:5).
11. ەسكە الۋ كەشىندە قولدانىلاتىن نان مەن شاراپ جايلى ويلانعانىمىز ٴبىزدى بىرلىككە اتسالىسۋعا قالاي تالپىندىرادى؟
11 بىرلىككە اتسالىسۋدىڭ ەكىنشى جولى قانداي؟ نان مەن شاراپتىڭ نەنى بىلدىرەتىنىن جاقسىلاپ ويلانۋ. بۇل جايىندا ەسكە الۋ كەشىنىڭ قارساڭىندا، اسىرەسە سول كەشتىڭ وزىندە ويلانۋىمىز كەرەك (قورىنتتىقتارعا 1-حات 11:23—25). اشىماعان نان يسانىڭ قۇربان ەتكەن كەمەلدى ٴتانىن بەينەلەيدى. قىزىل شاراپ بولسا قانىن بەينەلەيدى. دەسە دە وسى نەگىزگى شىندىقتى ٴبىلىپ قويعانىمىز جەتكىلىكسىز. يسانىڭ تولەم قۇرباندىعىندا ەكى تەڭدەسى جوق سۇيىسپەنشىلىكتىڭ ۇشتاسقانىن ەستەن شىعارماعانىمىز ٴجون: ەحوبا ٶز ۇلىن ٴبىز ٷشىن قيدى، ال يسا دايارلىقپەن ٶز ٶمىرىن بەردى. ولاردىڭ سۇيىسپەنشىلىگى جايلى ويلاساق، ٴبىزدىڭ دە ولارعا دەگەن سۇيىسپەنشىلىگىمىز جاندانا تۇسەدى. سوندا بارلىعىمىزدىڭ ەحوباعا دەگەن سۇيىسپەنشىلىگىمىز بىرلىگىمىزدى نىعايتا تۇسەدى.
وزگەلەردى كەشىرسەك، بىرلىكتى نىعايتامىز (12، 13-ابزاستى قاراڭىز)
12. ەحوبا ٴبىزدىڭ كەشىرىمشىل بولعانىمىزدى قالايتىنى يسانىڭ پاتشا مەن قۇلدارى جايلى اڭگىمەسىنەن قالاي انىق كورىنەدى؟
12 بىرلىككە اتسالىسۋدىڭ ٷشىنشى جولى قانداي؟ وزگەلەردى كەڭپەيىلمەن كەشىرۋ. سولاي ەتكەندە، يسانىڭ قۇرباندىعىنىڭ ارقاسىندا ەحوبا ٴبىزدىڭ كۇنالارىمىزدى كەشەتىنىنە العىسىمىز شەكسىز ەكەنىن كورسەتەمىز. كەشىرىمشىل بولۋدىڭ ماڭىزدىلىعىن كورسەتۋ ٷشىن، يسا پاتشا مەن قۇلدارى جايلى اڭگىمە ايتقان بولاتىن. ماتاي 18:23—34 تارماقتاردى وقىپ، ٶز-وزىڭىزدى بىلاي تەكسەرىپ كورىڭىزشى: «يسانىڭ وسى تالىمىنە قۇلاق اسۋعا تىرىسامىن با؟ باۋىرلاستارىما شىدامدى بولىپ، تۇسىنۋشىلىكپەن قارايمىن با؟ مەنى رەنجىتكەن ادامداردى كەشىرۋگە دايىنمىن با؟» راس، بىزگە جاسالعان كۇنالاردىڭ كەيبىرى بولماشى بولسا، كەيبىرى اۋىر بولىپ كەلەدى. بۇعان قوسا، كەيبىر كۇنالاردى كەمەلسىز بولعاندىقتان كەشىرۋگە قينالىپ جاتامىز. ٴبىراق يسانىڭ اڭگىمەسىنەن ەحوبا ٴبىزدىڭ نە ىستەگەنىمىزدى قالايتىنىن بىلە الامىز (ماتاي 18:35 وقىڭىز). شىن جۇرەكتەن وكىنسە دە، باۋىرلاستارىمىزدى كەشىرمەيتىن بولساق، ەحوبا ٴبىزدى دە كەشىرمەيتىنىن يسا انىق كورسەتكەن. بۇعان، البەتتە، مۇقيات دەن قويۋىمىز قاجەت. اسا باعالى بىرلىگىمىزدى قىزعىشتاي قورعاپ، ساقتاپ قالۋ ٷشىن يسا ۇيرەتكەندەي كەشىرىمشىل بولۋىمىز كەرەك.
13. وزگەلەرمەن تاتۋلىق ساقتاۋ ارقىلى بىرلىگىمىزگە قالاي ۇلەس قوسامىز؟
13 كەشىرىمدى بولساق، باۋىرلاستارمەن تاتۋلىق ساقتايمىز. ەلشى پاۋىل ٶزارا تاتۋ بولىپ، بىرلىكتى ساقتاۋعا بارىنشا ۇمتىلىڭدار دەگەن (ەفەستىكتەرگە 4:3). سوندىقتان وزگەلەرمەن قالاي قارىم-قاتىناس جاسايتىنىڭىز جايلى ەسكە الۋ كەشى تاياعاندا جانە اسىرەسە سول كەشتىڭ وزىندە مۇقيات ويلانىڭىز. ٶزىڭىزدى: «مەنى تانيتىندار كوڭىلىمە تيگەن ادامدارعا اشۋ-ىزا ساقتامايتىنىمدى انىق بىلە مە؟ وزگەلەر مەنىڭ تاتۋلىق ساقتاپ، بىرلىكتى نىعايتۋعا كۇش سالاتىنىمدى كورىپ ٴجۇر مە؟»— دەپ تەكسەرسەڭىز بولادى. بۇل ويلانۋعا تۇرارلىق سالماقتى سۇراقتار.
14. «سۇيىسپەنشىلىكپەن ٴبىر-بىرىمىزگە توزىمدىلىك تانىتاتىنىمىزدى» قالاي كورسەتە الامىز؟
14 بىرلىكتى نىعايتۋدىڭ ٴتورتىنشى جولى قانداي؟ سۇيىسپەنشىلىك كورسەتۋدە ەحوباعا ەلىكتەۋ (جوحاننىڭ 1-حاتى 4:8). ٴبىز: «باۋىرلاستارمەن تاتۋلىق ساقتاۋىم كەرەك شىعار، ٴبىراق ولارمەن جاقىن قارىم-قاتىناستا بولۋعا مىندەتتى ەمەسپىن»،— دەپ ويلاعىمىز كەلمەس ەدى. ولاي ويلاساق، پاۋىلدىڭ «سۇيىسپەنشىلىكپەن ٴبىر-بىرىڭە توزىمدىلىك تانىتىڭدار» دەگەن كەڭەسىنە قۇلاق اسپاعانىمىز (ەفەستىكتەرگە 4:2). پاۋىل جاي عانا «ٴبىر-بىرىڭە توزىمدىلىك تانىتىڭدار» دەگەن جوق، «سۇيىسپەنشىلىكپەن» سولاي ەتىڭدەر دەدى. بۇل ەكى ٴتۇرلى نارسە. قاۋىمىمىزدا ٵرتۇرلى ادامدار بار جانە ەحوبا ولاردىڭ ٴبارىن دە وزىنە جاقىنداتىپ تارتقان (جوحان 6:44). دەمەك، ەحوبا ولاردى سۇيۋدىڭ كوپتەگەن كەلەلى سەبەپتەرىن كورىپ تۇر. ەگەر باۋىرلاستارىمىز قۇدايدىڭ سۇيىسپەنشىلىگىنە لايىق بوپ تۇرسا، قالايشا ولار ٴبىزدىڭ سۇيىسپەنشىلىگىمىزگە لايىق ەمەس دەي الامىز؟ ەحوبا ولاردى قالاي جاقسى كورگەنىمىزدى قالاسا، سولاي جاقسى كورۋگە اسىق بولايىق (جوحاننىڭ 1-حاتى 4:20، 21).
سوڭعى ەسكە الۋ كەشى قاشان بولادى؟
15. ەسكە الۋ كەشى سوڭعى رەت وتكىزىلەتىنىن قايدان بىلەمىز؟
15 كۇندەردىڭ كۇنىندە ەسكە الۋ كەشى سوڭعى رەت وتكىزىلەدى. مۇنى قايدان بىلەمىز؟ پاۋىل مايلانعان ماسىحشىلەرگە يسانىڭ ٶلىمىن جىل سايىن ەسكە العاندا، ولار «يەمىز كەلگەنشە، ونىڭ ٶلىمىن جاريالايتىندارىن» ايتقان (قورىنتتىقتارعا 1-حات 11:26). يسا دا سوڭعى كۇندەر جايلى پايعامبارلىعىندا ٶزىنىڭ «كەلۋى» جايلى ٴسوز قوزعاعان. جاقىندا زور الاپاتتىڭ بولاتىنىن ايتا كەلە ول بىلاي دەگەن: «اسپاندا ادام ۇلىنىڭ بەلگىسى پايدا بولادى جانە جەر بەتىندەگى بارلىق ۇلتتار وزدەرىن ۇرعىلاپ زار ەڭىرەيدى. ولار ادام ۇلىنىڭ قۇدىرەتپەن جانە سالتاناتتى ۇلىلىقپەن بۇلتتاردا كەلە جاتقانىن كورەدى. ول كەرنەيدىڭ زور ۇنىمەن پەرىشتەلەرىن جىبەرىپ، ولار دۇنيەنىڭ ٴتورت بۇرىشىنان — اسپان مەن جەردىڭ و شەتى مەن بۇ شەتىنەن — ونىڭ تاڭداپ الىنعاندارىن جيناپ الادى» (ماتاي 24:29—31). يسا «تاڭداپ الىنعاندارىن جيناپ الاتىن» كەز ول جەردەگى مايلانعاندار تامتىعىن تۇگەل كوككە الىپ كەتكەندە بولادى. بۇل زور الاپات باستالعاننان كەيىن، ٴبىراق ارماگەددون سوعىسى باستالماي تۇرىپ ورىن الادى. بۇل سوعىستا يسا بۇكىل 144 000 مەن بىرگە جەر بەتىندەگى پاتشالارعا قارسى شايقاسقا شىعىپ، جەڭىسكە جەتەدى (ايان 17:12—14). ٴبىز باراتىن سوڭعى ەسكە الۋ كەشى يسا مايلانعانداردى جيناۋ ٷشىن «كەلگەنگە» دەيىن بولادى.
16. ٴسىز نەگە وسى جىلعى ەسكە الۋ كەشىنە قاتىسۋعا بەل بۋدىڭىز؟
16 2018-جىلدىڭ 31-ناۋرىزىندا وتكەلى جاتقان ەسكە الۋ كەشىنە قاتىسۋعا بەل بۋىڭىز. سونداي-اق قۇداي حالقىنىڭ بىرلىگىنە ٶز ۇلەسىڭىزدى قوسۋ ٷشىن ەحوبادان كومەك سۇراڭىز (ٴزابۇر 133:1 وقىڭىز). ٴبىر كۇنى ەسكە الۋ كەشىنە ٴبىز سوڭعى رەت بارامىز. ەندەشە، سول كۇن كەلگەنشە، جىل سايىنعى ەسكە الۋ كەشىندەگى تاماشا بىرلىكتى قاتتى باعالايتىنىمىزدى كورسەتەيىك.
