قۇداي ٴسوزىنىڭ اسەرى كۇشتى
«قۇدايدىڭ ٴسوزى ٴتىرى، اسەرى دە كۇشتى» (ەۆرەيلەرگە 4:12).
اندەر: 114، 113
1. نەگە قۇداي ٴسوزىنىڭ اسەرى كۇشتى ەكەنىنە سەنىمدىسىز؟ (ماقالانىڭ باسىنداعى سۋرەتتى قاراڭىز.)
ەحوبانىڭ حالقى ونىڭ ٴسوزىنىڭ، ياعني ادامزاتقا جولداعان حابارىنىڭ، «ٴتىرى، اسەرى دە كۇشتى» ەكەنىنە سەنىمدى (ەۆرەيلەرگە 4:12). ٴبىز كيەلى كىتاپتىڭ قانشالىقتى اسەرلى ەكەنىن ٶز ومىرىمىزدەن جانە باسقالاردىڭ دا ومىرىنەن كوردىك. ەحوبا كۋاگەرى بولماي تۇرىپ، باۋىرلاستاردىڭ كەيبىرى ۇرى، ناشاقور بولعان يا بولماسا ازعىن ٶمىر كەشكەن. ال وزگە بىرەۋلەرى اتاقتى نە وتە باي بولعانىمەن، ومىرلەرىندە بىردەڭە جەتپەي تۇرعانداي سەزىنگەن (ۋاعىزداۋشى 2:3—11). قۋانىشقا وراي، ٷمىتسىز نە ٴمان-ماعىناسىز ٶمىر سۇرگەن كوپ ادامنىڭ ەندى ومىردە ۇمتىلاتىن ماقساتتارى مەن ٷمىتى بار. ٴبىز وسىنداي كىسىلەردىڭ ٶمىرباياندارىن «كۇزەت مۇناراسىنداعى» «كيەلى كىتاپ ادامنىڭ ٶمىرىن وزگەرتەدى» دەگەن ايداردان وقىپ جىگەرلەندىك. ايتكەنمەن ادام ٴماسىحشى بولعاننان كەيىن دە كيەلى كىتاپتىڭ كومەگىمەن ەحوبامەن قارىم-قاتىناسىن نىعايتا بەرۋى ٴتيىس.
2. ٴبىرىنشى عاسىردا قۇداي ٴسوزىنىڭ كۇشى باۋىرلاستارعا قالاي اسەر ەتكەن؟
2 شىندىقتى بىلگەندە، ادامنىڭ ٶمىر سالتىنا ۇلكەن وزگەرىستەر جاسايتىنى ٴبىز ٷشىن جاڭالىق ەمەس. ٴبىرىنشى عاسىرداعى مايلانعان باۋىرلاستارىمىز وسىنداي وزگەرىستەر جاساعان (قورىنتتىقتارعا 1-حات 6:9—11 وقىڭىز). قۇداي پاتشالىعىنا كىمدەردىڭ كىرمەيتىنىن ايتقاندا، ەلشى پاۋىل: «كەزىندە كەيبىرەۋلەرىڭ سونداي بولدىڭدار»،— دەپ قوسقان. قۇداي ٴسوزى مەن كيەلى رۋحى سول ادامدارعا وزگەرۋگە كومەكتەسكەن. الايدا ٴماسىحشى بولعاننان كەيىن دە، ولاردىڭ كەيبىرى ەحوبامەن دوستىقتارىنا زيانىن تيگىزگەن كۇنالار جاساعان. مىسالى، جازبالاردا قاۋىمنان شىعارىلۋى ٴتيىس بولعان ٴبىر مايلانعان باۋىرلاس جايلى ايتىلعان. كەيىن ول قاجەتتى وزگەرىستەر جاساپ، قايتادان قاۋىمعا ورالدى (قورىنتتىقتارعا 1-حات 5:1—5؛ قورىنتتىقتارعا 2-حات 2:5—8). باۋىرلاستارىمىزدىڭ قۇداي ٴسوزىنىڭ اسەرىمەن ومىرلەرىن كوپ جاعىنان وزگەرتە العاندارى جىگەر بەرەدى.
3. وسى ماقالادان نە بىلەمىز؟
3 قۇداي ٴسوزىنىڭ اسەرى وتە كۇشتى. ەحوبا ونى بىزگە بەرگەندىكتەن، ونى بارىنشا پايدالانعانىمىز ٴجون (تىموتەگە 2-حات 2:15). بۇل ماقالادان 1) ٶز ومىرىمىزدە، 2) قىزمەتىمىزدە، 3) مىنبەدەن ٴتالىم بەرگەندە قۇداي ٴسوزىنىڭ كۇشىن قالاي قولدانا الاتىنىمىزدى بىلەمىز. وسىنى بىلگەنىمىز بىزگە پايدالى ٴتالىم بەرەتىن كوكتەگى اكەمىزگە دەگەن سۇيىسپەنشىلىگىمىز بەن العىسىمىزدى بىلدىرۋگە كومەكتەسەدى (يشايا 48:17).
ٶز ومىرىمىزدە
4. ا) قۇداي ٴسوزى بىزگە اسەر ەتۋى ٷشىن نە ىستەۋىمىز قاجەت؟ ٵ) كيەلى كىتاپتى وقۋعا قالاي ۋاقىت تاۋىپ ٴجۇرسىز؟
4 قۇداي ٴسوزى بىزگە اسەر ەتۋى ٷشىن ونى ۇنەمى وقۋىمىز كەرەك. كۇن سايىن وقىعانىمىز ٴجون (ەشۋا 1:8). كوپشىلىگىمىزدىڭ ۋاقىتىمىز وتە تىعىز ەكەنى راس، دەسە دە كيەلى كىتاپتى وقۋعا ەشتەڭەنىڭ، ونىڭ ىشىندە مىندەتتەرىمىزدىڭ دە، كەدەرگى بولۋىنا جول بەرمەيىك (ەفەستىكتەرگە 5:15، 16 وقىڭىز). بالكىم، بۇعان تاڭ اتا، كۇننىڭ بارىسىندا نە كەشقۇرىم ۋاقىت تاباتىن شىعارمىز. ويتكەنى ٴبىز دە بىلاي دەگەن ٴزابۇر جىرشىسى سياقتى سەزىمدەمىز: «سەنىڭ زاڭىڭدى سونداي قاتتى سۇيەمىن، كۇنى بويى سول جايلى ويعا شومىپ جۇرەمىن» (ٴزابۇر 119:97).
كيەلى كىتاپتى وقۋعا ەشتەڭەنىڭ، ونىڭ ىشىندە مىندەتتەرىمىزدىڭ دە، كەدەرگى بولۋىنا جول بەرمەيىك
5، 6. ا) نەگە وي جۇگىرتۋىمىز كەرەك؟ ٵ) وي جۇگىرتۋدىڭ پايداسىن كورۋ ٷشىن نە ىستەسەك بولادى؟ ب) كيەلى كىتاپتى وقىپ، وي جۇگىرتكەنىڭىز سىزگە قانداي كومەگىن تيگىزدى؟
5 ٴبىراق قۇداي ٴسوزىن جاي وقىپ قويا سالۋ جەتكىلىكسىز. وقىعانىمىز جايلى وي جۇگىرتۋىمىز، ياعني مۇقيات ٵرى تەرەڭىنەن ويلانۋىمىز كەرەك (ٴزابۇر 1:1—3). سوندا عانا كيەلى كىتاپتىڭ دانالىعىنا ساي ٶمىر سۇرە الامىز. كيەلى كىتاپتى باسپا تۇرىندە نە ەلەكتروندى تۇردە وقىساق تا، قۇداي ٴسوزىن ٴبىزدى وزگەرتىپ، ٸس-ارەكەتكە تالپىندىراتىنداي ەتىپ وقيىق.
6 وي جۇگىرتۋدىڭ پايداسىن كورۋ ٷشىن، كيەلى كىتاپتى وقىپ جاتقان كەزدە كىدىرىپ، مىناداي سۇراقتار قويۋىمىز كەرەك: «بۇل جەردەن ەحوبا تۋرالى نە بىلۋگە بولادى؟ مەن وقىعانىمدى ٸس جۇزىندە قالاي ورىنداپ ٴجۇرمىن؟ قاي جاعىنان ٵلى وزگەرۋىم كەرەك؟» قۇداي سوزىنە وي جۇگىرتىپ، وقىعانىمىز تۋرالى دۇعا ەتكەنىمىزدە، سوعان ساي ٶمىر سۇرۋگە ىقىلاسىمىز دا پايدا بولادى. ناتيجەسىندە كيەلى كىتاپتىڭ اسەرى كۇشتى ەكەنىنە ٶز ومىرىمىزدە كوز جەتكىزەمىز (قورىنتتىقتارعا 2-حات 10:4، 5).
قىزمەتىمىزدە
7. قۇداي ٴسوزىن قىزمەتتە قالاي ٴتيىمدى قولدانا الامىز؟
7 ۋاعىزداعاندا جانە ٴتالىم بەرگەندە قۇداي ٴسوزىن ٴجيى قولدانعانىمىز ماڭىزدى. ٴبىر ەر باۋىرلاس ايتقانداي، «ەگەر ەحوبانىڭ وزىمەن ۇيمە-ٷي ۋاعىزداۋعا شىقساڭىز، تەك قانا ٶزىڭىز سويلەيسىز بە، الدە وعان دا ٴسوز بەرەسىز بە؟» ادامعا كيەلى كىتاپتان وقىپ بەرگەندە، ٴبىز ەحوبانىڭ سويلەۋىنە مۇرسات بەرەمىز. جاقسى تاڭدالعان تارماق ٴبىزدىڭ كەز كەلگەن سوزىمىزدەن دە كۇشتى اسەر ەتەدى (سالونيكالىقتارعا 1-حات 2:13). قىزمەتتە جۇرگەندە كيەلى كىتاپتان مۇمكىندىگىنشە ٴجيى وقىپ بەرۋگە تىرىساسىز با؟
ادامعا كيەلى كىتاپتان وقىپ بەرگەندە، ٴبىز ەحوبانىڭ سويلەۋىنە مۇرسات بەرەمىز
8. ۋاعىزداعاندا نەگە تارماقتى جاي وقىپ قويا سالماۋىمىز كەرەك؟
8 دەگەنمەن ادامعا جازبا ورنىن وقىپ بەرە سالۋ جەتكىلىكسىز. ٴبىرىنشى عاسىردا قالىڭ جۇرتشىلىق كيەلى كىتاپتى تۇسىنە بەرمەگەن، بۇگىن دە سولاي (ريمدىكتەرگە 10:2). ادام ٴبىز وقىعان تارماقتى ٶزى ٴتۇسىنىپ الادى دەپ ويلاماۋىمىز كەرەك. ولارعا كومەكتەسۋ ٷشىن ٴبىز ونداعى نەگىزگى سوزدەردى نە ويلاردى قايتالاپ، كەيىننەن ولاردىڭ ٴمان-ماعىناسىن تۇسىندىرسەك بولادى. سوندا قۇداي ٴسوزى ادامنىڭ ساناسى مەن جۇرەگىنە جەتەدى (لۇقا 24:32 وقىڭىز).
9. جازبا ورنىنا ايتاتىن العى ٴسوز ارقىلى قالاي ادامدى قۇداي ٴسوزىن قۇرمەتتەۋگە تالپىندىرا الامىز؟ مىسال كەلتىرىڭىز.
9 بۇعان قوسا، جازبا ورنىن وقىر الدىندا ايتقان العى ٴسوزىمىز دە ادامدى كيەلى كىتاپقا قۇرمەتپەن قاراۋعا تالپىندىرا الادى. مىسالى: «جاراتۋشىمىز وسى جايىندا نە دەيتىنىن كورەيىكشى»،— دەسەك بولادى. ال ەگەر يساعا سەنبەيتىن ادامدى جولىقتىرساق، وعان: «كيەلى جازبالاردا نە ايتىلعانىن قاراڭىزشى»،— دەۋگە بولاتىن شىعار. دىنگە ەش قىزىقپايتىن ادام بولسا، ودان: «مىنا ٴبىر كونەدەن جەتكەن ٴسوزدى ەستىگەنسىز بە؟»— دەپ سۇراساق بولادى. ٵربىر ادامنىڭ شىققان ورتاسى مەن نانىمدارى ٵرتۇرلى ەكەنىن ەستە ۇستاساق، العى ٴسوزىمىزدى قۇلاققا جاعىمدى ەتۋگە بارىنشا تىرىسامىز (قورىنتتىقتارعا 1-حات 9:22، 23).
10. ا) ٴبىر ەر باۋىرلاسپەن قانداي جاعداي بولدى؟ ٵ) قىزمەتىڭىزدە قۇداي ٴسوزىنىڭ اسەرىن كورگەنسىز بە؟
10 كوپ جاريالاۋشىلار قۇداي ٴسوزىن وقىپ بەرگەندە، بۇل ادامدارعا قاتتى اسەر ەتەتىنىن بايقاعان. مىسالى، ٴبىر ەر باۋىرلاس جۋرنالدارىمىزدى كوپ جىلدان بەرى وقىپ جۇرگەن قارت كىسىگە بارىپ تۇرادى. بىردە باۋىرلاس وعان سوڭعى شىققان «كۇزەت مۇناراسىن» بەرە سالماي، ٴبىر جازبا ورنىن وقىپ بەرەيىنشى دەپ ويلايدى. ٴسويتىپ، وعان قورىنتتىقتارعا 2-حات 1:3، 4 تەگى مىنا سوزدەردى وقىپ بەرەدى: «ول — قايىرىمى مول اكە جانە جۇبانىش اتاۋلىنىڭ قاينار كوزى. ول ٴبىزدى قيىندىق كورگەن كەزدىڭ بارىندە جۇباتادى». بۇل الگى قارت كىسىگە قاتتى اسەر ەتكەنى سونشا، سول تارماقتاردى قايتادان وقىپ بەرۋدى سۇرايدى. كەيىن ول ايەلى ەكەۋىنىڭ جۇبانىشقا ٴزارۋ بولعانىن ايتادى. وسى جازبا ورنىنىڭ ارقاسىندا ول كيەلى كىتاپ تۋرالى كوبىرەك بىلگىسى كەلەدى. شىنىندا دا، قۇداي ٴسوزىن قىزمەتتە قولدانۋدىڭ اسەرى وتە كۇشتى! (ەلشىلەردىڭ ىستەرى 19:20).
مىنبەدەن ٴتالىم بەرگەندە
11. مىنبەدەن ٴتالىم بەرەتىن ەر باۋىرلاستاردىڭ قانداي جاۋاپكەرشىلىگى بار؟
11 قاۋىم كەزدەسۋلەرى مەن كونگرەسكە بارعاندى ٴبارىمىز دە جاقسى كورەمىز. وندا ٴبىز ٴبىرىنشى كەزەكتە ەحوباعا عيبادات ەتۋ ٷشىن بارامىز. سونىمەن قاتار ٴبىز وندا پايدالى ٴتالىم الامىز. سوندىقتان مىنبەدەن ٴتالىم بەرەتىن ەر باۋىرلاستاردا زور مارتەبە ٵرى ۇلكەن جاۋاپكەرشىلىك بار (جاقىپ 3:1). ولار تالىمدەرىن قۇداي سوزىنە نەگىزدەۋى ٴتيىس. ەگەر سىزدە وسىنداي مارتەبە بولسا، تىڭدارماندارىڭىزدىڭ جۇرەگىنە جول تابۋ ٷشىن كيەلى كىتاپتىڭ اسەرىن قالاي قولدانا الاسىز؟
12. بايانداماشى ٶز بايانداماسىنىڭ جازبالارعا نەگىزدەلگەنىنە قالاي كوز جەتكىزە الادى؟
12 كيەلى جازبالار كەز كەلگەن باياندامانىڭ ەڭ ماڭىزدى بولىگى بولۋ قاجەت (جوحان 7:16). سوندىقتان باياندامانى قالاي ايتاتىنىڭىزعا جانە قولداناتىن مىسالدار مەن وقيعالارىڭىزعا ەمەس، كيەلى كىتاپقا كوبىرەك نازار اۋدارىڭىز. وعان قوسا، كيەلى كىتاپتى وقىپ بەرۋ مەن كيەلى كىتاپتان ٴتالىم بەرۋدىڭ ايىرماشىلىعى بار. وتە كوپ جازبا ورنىن وقىعانىڭىزبەن، ولار كوبىسىنىڭ ەسىندە قالمايدى. سوندىقتان قولداناتىن تارماقتاردى مۇقيات تاڭداڭىز. سوسىن ولاردى وقىپ، ٴتۇسىندىرىپ، مىسال كەلتىرىپ، بايانداماعا بايلانستىرۋ ٷشىن ۋاقىت ٴبولىڭىز (نەحەميا 8:8). ەگەر سىزدە بايانداما جوسپارى بولسا، جوسپاردىڭ وزىنە جانە ونداعى جازبا ورىندارىنا زەرتتەۋ جۇرگىزىڭىز. بايانداما جوسپارى مەن تارماقتاردىڭ بايلانىسىن تۇسىنۋگە تىرىسىڭىز. سوسىن كەلتىرىلگەن تارماقتاردىڭ كەيبىرىن قولدانىپ، جوسپارداعى ويلاردى جەتكىزىڭىز. («تەوكراتيالىق قىزمەت مەكتەبىندە ٴبىلىم الامىز» كىتابىنىڭ 21—23 ساباقتارىنان جاقسى كەڭەستەر تابا الاسىز.) ەڭ باستىسى، ەحوبادان كيەلى كىتاپتاعى قۇندى ويلارىن جەتكىزۋگە كومەك سۇراڭىز (ەزرا 7:10؛ ناقىل سوزدەر 3:13، 14 وقىڭىز).
13. ا) ٴبىر باۋىرلاسقا قاۋىمدا ەستىگەن جازبا ورنى قالاي اسەر ەتتى؟ ٵ) كەزدەسۋلەرىمىزدە قولدانىلعان كيەلى كىتاپ تارماقتارى سىزگە قالاي اسەر ەتىپ ەدى؟
13 اۆستراليادا تۇراتىن ٴبىر ايەل باۋىرلاس بالا كەزىندە كوپ قاسىرەت كورگەن. كەيىننەن ەحوبانى تانىپ-بىلسە دە، ول ٴبارىبىر ەحوبانىڭ ٶزىن جاقسى كورەتىنىنە تولىقتاي سەنە المايدى. بىردە قاۋىم كەزدەسۋىندە ەستىگەن ٴبىر تارماق وعان قاتتى اسەر ەتەدى. ول بۇل تارماق جونىندە وي جۇگىرتىپ، ىزدەنىس جاسايدى دا، كيەلى كىتاپتان باسقا دا تارماقتاردى تابادى. سودان ەحوبانىڭ ٶزىن جاقسى كورەتىنىنە كوزى جەتەدى *. قاۋىم كەزدەسۋىندە نە كونگرەستە قانداي دا ٴبىر تارماقتىڭ سىزگە وسىلاي قاتتى اسەر ەتكەنى ەسىڭىزدە مە؟ (نەحەميا 8:12).
14. ەحوبانىڭ ٴسوزىن ٴسۇيىپ، باعالايتىنىمىزدى قالاي كورسەتەمىز؟
14 جازىلىپ قالدىرىلعان ٴسوزى ٷشىن ەحوباعا ريزا ەمەسپىز بە؟ ول ونىڭ ماڭگى قالاتىنىن ۋادە ەتتى، ٵرى سول ۋادەسىندە تۇردى (پەتىردىڭ 1-حاتى 1:24، 25). ەندەشە، كيەلى كىتاپتى جۇيەلى تۇردە وقىپ، وقىعاندارىمىزدى ومىردە ۇستانعىمىز جانە ونى وزگەلەرگە دە كومەكتەسۋ ٷشىن قولدانعىمىز كەلەدى. سولاي ەتسەك، وسى اسىل قازىناعا جانە، ەڭ باستىسى، ونىڭ اۆتورى ەحوبا قۇدايعا دەگەن سۇيىسپەنشىلىگىمىز بەن ريزاشىلىعىمىزدى كورسەتەمىز.
^ 13-ابزاس « بەتبۇرىستى ٴسات» دەگەن قورشاۋدى قاراڭىز.
