سۇيىسپەنشىلىگىڭىزبەن وزگەلەردى نىعايتا بەرىڭىز
«سۇيىسپەنشىلىك رۋحاني نىعايتادى» (قورىنتتىقتارعا 1-حات 8:1).
اندەر: 109، 121
1. يسا شاكىرتتەرىمەن بولعان سوڭعى كەشىندە قانداي ماڭىزدى تاقىرىپتى قوزعادى؟
يسا ولەر الدىنداعى كەشتە شاكىرتتەرىمەن سويلەسىپ، سۇيىسپەنشىلىك قاسيەتىن شامامەن 30 رەت اتاپ ٶتتى. ول شاكىرتتەرىنە «ٴبىر-ٴبىرىن ٴسۇيۋدى» وسيەت ەتتى (جوحان 15:12، 17). ولاردىڭ سۇيىسپەنشىلىكتەرىنىڭ ەرەكشەلەنەتىنى سونشا — جۇرتتىڭ كوزىنە ٴتۇسىپ، ٴماسىحتىڭ شىنايى ٸزباسارلارى رەتىندە تانىلماق ەدى (جوحان 13:34، 35). ٴبىراق يسا سۇيىسپەنشىلىك دەۋىمەن قۇر سەزىم تۋرالى ايتقان جوق. بۇل — وزگەلەرگە جانقيارلىقپەن تانىتىلاتىن وتە كۇشتى قاسيەت. يسا بىلاي دەگەن: «دوستارى ٷشىن جانىن قيعان ادامنىڭ سۇيىسپەنشىلىگىنەن ارتىق سۇيىسپەنشىلىك جوق. ەگەر وسيەت ەتكەندەرىمدى ورىنداساڭدار، وندا مەنىڭ دوستارىمسىڭدار» (جوحان 15:13، 14).
2. ا) قازىرگى تاڭدا قۇداي قىزمەتشىلەرى نەسىمەن تانىمال؟ ٵ) وسى ماقالادا ٴبىز قانداي سۇراقتاردىڭ جاۋابىن تابامىز؟
2 ەحوبانىڭ قازىرگى تاڭداعى قىزمەتشىلەرى شىنايى دا جانقيار سۇيىسپەنشىلىكتەرىمەن جانە مىزعىماس بىرلىگىمەن تانىمال (جوحاننىڭ 1-حاتى 3:10، 11). قاي ۇلتتان نە رۋدان شىققانىنا، قاي تىلدە سويلەيتىنىنە، قاي جاقتان كەلگەنىنە، قانداي تاربيە العانىنا قاراماستان، دۇنيەجۇزىندەگى ەحوبانىڭ قىزمەتشىلەرى ٴبىر-ٴبىرىن شىن جۇرەكتەن جاقسى كورەدى. قازىرگى كۇندەرى نەگە سۇيىسپەنشىلىك قاسيەتى وتە قاجەت؟ ەحوبا مەن يسانىڭ سۇيىسپەنشىلىگى ٴبىزدى قالاي نىعايتادى؟ سونداي-اق قالايشا ٴبىز شىنايى سۇيىسپەنشىلىك تانىتۋ ارقىلى وزگەلەردى جۇباتىپ، نىعايتا الامىز؟ (قورىنتتىقتارعا 1-حات 8:1).
قازىرگى كەزدە سۇيىسپەنشىلىك قاسيەتى نەگە وتە قاجەت؟
3. قازىرگى «ەرەكشە قيىن» ۋاقىت ادامدارعا قانداي زاردابىن تيگىزۋدە؟
3 ٴبىز قازىر «ەرەكشە قيىن» ۋاقىتتا ٶمىر سۇرۋدەمىز، سوندىقتان ٶمىرىمىز «قايعى-قاسىرەتكە» تولى (تىموتەگە 2-حات 3:1—5؛ ٴزابۇر 90:10). كوپ ادامنىڭ قايعى-مۇڭعا باتاتىنى سونشا — ومىردەن كۇدەر ٷزىپ جاتادى. جىل سايىن 800000-نان اسا ادام ٶز-وزىنە قول جۇمسايدى، بۇل 40 سەكۋند سايىن 1 ادام ٶز ٶمىرىن قيادى دەگەن ٴسوز. وكىنىشكە قاراي، ٴتىپتى كەيبىر باۋىرلاستارىمىز دا وسىنداي كۇيگە دۋشار بولىپ، ومىرلەرىنە قول جۇمساعان.
4. كيەلى كىتاپتىڭ قاي كەيىپكەرلەرى ٴبىر كەزدەرى ٶمىر سۇرگىسى كەلمەگەن؟
4 ەجەلدە قۇدايدىڭ كەيبىر ادال قىزمەتشىلەرىنىڭ قايعى-مۇڭعا باتقانى سونشا — ٶمىر سۇرگىسى كەلمەگەن. مىسالى، جانىن قويارعا جەر تاپپاعان ٵيۇپ: «ومىردەن جيرەنەمىن، بۇدان ٵرى ٴتىرى جۇرگىم كەلمەيدى»،— دەگەن (ٵيۇپ 7:16؛ 14:13). ال ٴجۇنىس قاتتى ٴتۇڭىلىپ كەتىپ: «ۋا، ەحوبا، جانىمدى الا كور، ەندى ٴتىرى جۇرگەنشە، ولگەنىم ارتىق»،— دەدى (ٴجۇنىس 4:3). بار جاقسىلىقتان كۇدەر ۇزگەن ٸلياس پايعامبار بولسا: «ۋا، ەحوبا، وسى كورگەنىم دە جەتەر، ەندى جانىمدى الا كور!»— دەپ وزىنە ٶلىم تىلەدى (پاتشالار 1-جازبا 19:4). ٴبىراق ەحوبا بۇل ادال قىزمەتشىلەرىن جاقسى كورگەن، ٵرى ولاردىڭ ٶمىر سۇرگەنىن قالاعان. وزدەرىن سولاي سەزىنگەندەرى ٷشىن ەحوبا ولاردى جازعىرعان جوق. كەرىسىنشە، ولاردىڭ ومىرگە دەگەن قۇشتارلىعىن قايتادان جانداندىرىپ، ٵرى قاراي دا ادال قىزمەت ەتە بەرۋگە كومەكتەستى.
5. نەگە قازىر باۋىرلاستارىمىز ٴبىزدىڭ سۇيىسپەنشىلىگىمىزگە اسىرەسە ٴزارۋ؟
5 قازىرگى ۋاقىتتا دا كوپتەگەن باۋىرلاستارىمىز ٴتۇرلى قيىن جاعدايلاردى باستان كەشۋدە. سوندىقتان ولار ٴبىزدىڭ سۇيىسپەنشىلىگىمىزگە مۇقتاج. كەيبىرى كەلەكە-مازاققا ۇشىراۋدا نەمەسە قۋعىندالىپ جاتىر. وزگەلەرىنە بولسا ارىپتەستەرى ٴتيىسىپ سويلەيدى، يا ولار تۋرالى وسەك تاراتادى. ال كەيبىرى كۇنى بويى جۇمىس ىستەۋگە ٴماجبۇر بولعاندىقتان نەمەسە جۇمىستا كوپ سترەسكە ۇشىرايتىندىقتان كۇشتەرى سارقىلىپ، قاجىپ ٴجۇر. وتباسىندا ۇلكەن قيىندىقتارى بار باۋىرلاستار دا از ەمەس. مىسالى، ەحوباعا عيبادات ەتپەيتىن جۇبايى ۇنەمى تىرناق استىنان كىر ىزدەپ وتىراتىن شىعار. وسى سەكىلدى اۋىرتپالىقتاردىڭ سالدارىنان كوبىسى بۇدان ٵرى توزە المايتىنداي سەزىنىپ، ٴتىپتى وزدەرىن ەشكىمگە كەرەك ەمەسپىن دەپ ويلاي باستاۋى مۇمكىن. ولارعا كىم كومەكتەسە الادى؟
ەحوبانىڭ سۇيىسپەنشىلىگى بىزگە كۇش بەرەدى
6. ەحوبانىڭ سۇيىسپەنشىلىگى قىزمەتشىلەرىنە قالاي كۇش بەرەدى؟
6 ەحوبا ٶز قىزمەتشىلەرىن قازىر جانە ماڭگىلىك بويى سۇيەتىنىن ۋادە ەتكەن. ەحوبا يسرايل حالقىنا: «سەن ماعان قىمباتسىڭ، قادىرلىسىڭ. سوندىقتان مەن سەنى جاقسى كورەمىن... قورىقپا، سەبەبى مەن قاسىڭدامىن»،— دەگەندە، ولاردىڭ قانشالىقتى رۋحتانىپ قالعانىن ەلەستەتىپ كورىڭىزشى! (يشايا 43:4، 5). ٴبىز بىلەتىنىمىزدەي، ەحوبا ٵرقايسىسىمىزدى قاتتى باعالايدى *. قۇداي سوزىندە مىناداي ۋادە بار: «قۇدىرەتتى قۇداي بولعاندىقتان، سەنى قۇتقارادى. ساعان ول قاتتى شاتتانادى» (سافونيا 3:16، 17).
7. قاي جاعىنان ەحوبانىڭ سۇيىسپەنشىلىگىن ٴسابيلى انانىڭ ماحابباتىنا تەڭەۋگە بولادى؟ (ماقالانىڭ باسىنداعى سۋرەتتى قاراڭىز.)
7 قىزمەتشىلەرى قانداي قيىندىققا ۇشىراسا دا، ەحوبا ولارعا كۇش بەرىپ، جۇباتۋعا ۋادە بەرەدى. كيەلى كىتاپتا ەحوبا تۋرالى: «ول سەندەردى ەمىزىپ، الپەشتەپ كوتەرىپ جۇرەدى، تىزەسىنە سالىپ الديلەيدى. اناسى بالاسىن قالاي جۇباتسا، مەن دە سەندەردى سولاي جۇباتامىن»،— دەلىنگەن (يشايا 66:12، 13). اناسىنىڭ قولىندا جاتقان نەمەسە اناسى ويناتىپ جاتقان ٴسابيدىڭ ەش الاڭسىز كۇيىن ەلەستەتىپ كورىڭىزشى! سول سياقتى، ەحوبا دا ٴسىزدى قاتتى جاقسى كورەدى جانە ۋايىم-قايعىسىز جۇرگەنىڭىزدى قالايدى. ەحوبا ٷشىن وزىڭىزدىڭ وتە قىمبات جان ەكەنىڭىزگە ەشقاشان كۇماندانباڭىز (ەرەميا 31:3).
8، 9. يسانىڭ سۇيىسپەنشىلىگى قالاي بىزگە كۇش بەرەدى؟
8 ەحوبانىڭ ٴبىزدى جاقسى كورەتىنىنىڭ تاعى ٴبىر دالەلى مىنا تارماقتا جازىلعان: «قۇداي ادامزاتتى سونداي قاتتى سۇيگەندىكتەن، وزىنىڭ جالعىز ۇلىن قۇربان ەتتى. ەندى وعان سەنگەن اركىم جويىلماي، ماڭگىلىك ومىرگە يە بولا الادى» (جوحان 3:16). ٶمىرىن قۇربان ەتۋىمەن يسا دا ٴبىزدى جاقسى كورەتىنىن پاش ەتتى. وسى سۇيىسپەنشىلىك بىزگە كۇش بەرىپ، العا جەتەلەيدى. كيەلى كىتاپتا ايتىلعانداي، ەشقانداي قيىنشىلىق تا، ازاپ تا ٴبىزدى ٴماسىحتىڭ سۇيىسپەنشىلىگىنەن ايىرا المايدى (ريمدىكتەرگە 8:35، 38، 39).
9 كەيدە پروبلەمالارىمىزدىڭ كەسىرىنەن تاندىك نە ەموسيالىق جاعىنان قاجۋىمىز نە قىزمەتىمىزدى قۋانىشپەن اتقارماۋىمىز مۇمكىن. ٴبىراق ٴماسىحتىڭ ٴبىزدى قانشالىقتى جاقسى كورەتىنىن ەستە ۇستاعانىمىز بىزگە قيىندىقتارعا توزۋگە كۇش بەرەدى (قورىنتتىقتارعا 2-حات 5:14، 15 وقىڭىز). يسانىڭ سۇيىسپەنشىلىگى ٴبىزدىڭ ٶمىر سۇرۋگە، ەحوباعا قىزمەت ەتۋگە دەگەن قالاۋىمىزدى جانداندىرادى. بۇل ٴتىپتى تابيعي اپاتقا ۇشىراساق تا، قۋدالانساق تا، كوڭىلىمىز قالسا دا، ۇرەيگە بەرىلسەك تە، ەڭسەمىزدى تۇسىرمەۋگە كومەكتەسەدى.
باۋىرلاستار ٴبىزدىڭ سۇيىسپەنشىلىگىمىزگە مۇقتاج
يسانىڭ ۇلگىسىن زەرتتەسەك، بۇل ٴبىزدى وزگەلەردى جىگەرلەندىرۋگە قوزعاۋ سالادى (10، 11-ابزاستى قاراڭىز)
10، 11. ۇنجىرعاسى تۇسكەن باۋىرلاستاردى كىمدەر جىگەرلەندىرۋى ٴتيىس؟ ٴتۇسىندىرىڭىز.
10 ٴبىزدى نىعايتۋ ٷشىن ەحوبا وزىنىڭ سۇيىسپەنشىلىگىن قاۋىم ارقىلى دا تانىتادى. ٴبىز باۋىرلاستارعا سۇيىسپەنشىلىك تانىتۋ ارقىلى ەحوبانى جاقسى كورەتىنىمىزدى كورسەتەمىز. باۋىرلاستار وزدەرىنىڭ باعالى ەكەنىن جانە ەحوبا ولاردى جاقسى كورەتىنىن سەزىنۋ ٷشىن ٴبىز قولدان كەلگەننىڭ ٴبارىن ىستەيمىز (جوحاننىڭ 1-حاتى 4:19—21). ەلشى پاۋىل: «ٴبىر-ٴبىرىڭدى جۇباتىپ، نىعايتىپ جۇرگەندەرىڭدەي، ٵرى قاراي دا سولاي ەتە بەرىڭدەر»،— دەپ جازعان (سالونيكالىقتارعا 1-حات 5:11). بۇلاي ەتۋ اقساقالداردىڭ عانا مىندەتى ەمەس. قاۋىمداعى ٵربىرىمىز ەحوبا مەن يساعا ەلىكتەپ، باۋىرلاستاردى جىگەرلەندىرە الامىز (ريمدىكتەرگە 15:1، 2 وقىڭىز).
11 دەپرەسسيانىڭ اۋىر تۇرىنە نەمەسە ۇرەي مەن مازاسىزدىق دەرتىنە شالدىققان كەيبىر باۋىرلاستار كاسىبي ماماننىڭ كومەگىن قاجەت ەتۋى مۇمكىن (لۇقا 5:31). اقساقالدار مەن قاۋىمداعى وزگە دە باۋىرلاستاردىڭ مەديسينالىق ٴبىلىمى بولماسا دا، ولاردىڭ كومەگى مەن جۇباتاتىن سوزدەرى باۋىرلاستارعا وتە قاجەت. قاۋىمداعى كەز كەلگەن باۋىرلاس «جانى كۇيزەلىپ جۇرگەندەردى جۇباتىپ، السىزدەردى قولداپ، بارلىق ادامدارعا ٴتوزىمدى بولا» الادى (سالونيكالىقتارعا 1-حات 5:14). ٴبىز باۋىرلاستارىمىزدىڭ سەزىمىن تۇسىنۋگە تىرىسۋىمىز كەرەك. ۇنجىرعاسى تۇسكەن كەزدە ولارعا شىدامدى بولىپ، جىگەر بولاتىن سوزدەردى ايتۋىمىز قاجەت. باۋىرلاستاردى جۇباتىپ، جىگەرلەندىرىپ وتىراسىز با؟ وسى جاعىنان كوبىرەك كۇش سالۋ ٷشىن نە ىستەي الاسىز؟
12. قاۋىمنىڭ سۇيىسپەنشىلىگىنەن جىگەر العان باۋىرلاستىڭ مىسالىن ايتىپ بەرىڭىز.
12 ەۋروپادا تۇراتىن ايەل باۋىرلاس بىلاي دەيدى: «ماعان كەيدە ٶز-وزىمە قول جۇمساۋ تۋرالى ويلار كەلەدى. ٴبىراق سوندايدا ماعان تىرەك بولاتىن جاناشىرلارىم بار. قاۋىمىمداعى باۋىرلاستار مەنىڭ ٶمىرىمدى ساقتاپ قالدى. ولار ٵرقاشان دا سۇيىسپەنشىلىگىن اياماي، جىگەرلەندىرىپ وتىرادى. دەپرەسسيادان قينالاتىنىمدى بىلەتىندەرى كوپ بولماسا دا، قاۋىمداعىلار قاشان دا جانىمنان تابىلىپ، كومەكتەسۋگە دايىن. ٴبىر ەرلى-زايىپتى باۋىرلاستار مەنىڭ رۋحاني اتا-انام سياقتى. ولار مەنىڭ قامىمدى ويلاپ جۇرەدى، كۇن دەمەي، ٴتۇن دەمەي، كومەككە كەلۋگە دايىن». ارينە، وسىنشالىقتى كومەكتەسۋگە بارلىق باۋىرلاستاردىڭ شاماسى كەلە بەرمەيدى. دەسە دە باۋىرلاستارىمىزعا تىرەك بولامىز دەسەك، قولىمىزدان كەلەرى وتە كوپ *.
سۇيىسپەنشىلىكپەن نىعايتۋدىڭ جولدارى
13. وزگەلەردى جۇباتۋ ٷشىن نە ىستەۋىمىز قاجەت؟
13 تىڭداي ٴبىلىڭىز (جاقىپ 1:19). ەڭسەسى تۇسكەن باۋىرلاستى جاناشىرلىقپەن تىڭداساق، ونى جاقسى كورەتىنىمىزدى كورسەتەمىز. ونى جاقسىراق ٴتۇسىنۋ ٷشىن جۇمساقتىقپەن سۇراقتار قويساڭىز بولادى. ٴسىز ٴتۇر-الپەتىڭىزبەن دە وعان شىنىمەن جانىڭىز اشىپ تۇرعانىن كورسەتە الاسىز. ونى تىڭداپ جاتقاندا شىدامدى بولىپ، ٴسوزىن بولمەڭىز. ادام ىشىندەگىسىن ايتىپ السىن. تىڭداي ٴبىلۋ ارقىلى ونىڭ جاعدايىن جاقسىراق تۇسىنە الاسىز، ٵرى ول ٴسىزگە سەنىم ارتاتىن بولادى. سوسىن ول دا ٴسىزدىڭ ٴسوزىڭىزدى دەن قويىپ تىڭداپ، كومەگىڭىزدى قابىل الۋعا دايىن بولادى. شىن جۇرەكتەن قامىن ويلاعانىڭىز ادامعا زور جىگەر مەن جۇبانىش بولادى.
14. نەگە ٴبىز سىناپ-مىنەۋدەن اۋلاق بولۋىمىز كەرەك؟
14 سىناپ-مىنەمەڭىز. جان كۇيزەلىسىنە ۇشىراعان ادامعا ٴبىز ونى سىناپ-مىنەپ جاتقانداي كورىنسەك، ول ٶزىن ودان بەتەر جامان سەزىنەدى. ناتيجەسىندە ول ٴبىزدىڭ كومەگىمىزدى قابىلداۋى ەكىتالاي. كيەلى جازبالاردا: «ويلانباي سويلەگەن سەمسەردەي جارالايدى، ال دانانىڭ ٴتىلى ساۋىقتىرادى»،— دەلىنگەن (ناقىل سوزدەر 12:18). جانى كۇيزەلگەن ادامدى سوزىمىزبەن ادەيى جارالامايتىن شىعارمىز، الايدا ويلانباي سويلەگەنىمىزدىڭ ٶزى وعان اۋىر ٴتييۋى مۇمكىن. ٴبىز ادامنىڭ جاعدايىن تۇسىنۋگە تىرىسىپ جاتقانىمىزدى انىق كورسەتۋىمىز قاجەت. سوندا عانا باۋىرلاسىمىزدى جىگەرلەندىرە الامىز (ماتاي 7:12).
15. باۋىرلاستاردى جىگەرلەندىرۋگە كومەكتەسەتىن باعا جەتپەس قۇرالىمىز قانداي؟
15 كيەلى جازبالاردىڭ كومەگىمەن جۇباتىڭىز (ريمدىكتەرگە 15:4، 5 وقىڭىز). كيەلى كىتاپ «تاباندىلىق پەن جۇبانىش بەرەتىن قۇدايدان» كەلگەن. سوندىقتان دا ونداعى سوزدەر زور جۇبانىش بەرەدى. سونداي-اق بىزدە «كۇزەت مۇناراسى باسىلىمدارىنىڭ كورسەتكىشى» جانە «ەحوبا كۋاگەرلەرىنىڭ ىزدەنىس قۇرالى» بار. وسى قۇرالدار ارقىلى ٴبىز قاجەتتى ادەبيەتتەر مەن تارماقتاردى تاۋىپ، كەيىن ولاردى باۋىرلاستاردى نىعايتىپ، جىگەر بەرۋ ٷشىن قولدانا الامىز.
16. جان كۇيزەلىسىنە ۇشىراعان ادامدى جىگەرلەندىرۋ ٷشىن قانداي قاسيەتتەر قاجەت؟
16 مەيىرىمدى ٵرى جۇمساق بولىڭىز. ەحوبا «قايىرىمى مول اكە جانە جۇبانىش اتاۋلىنىڭ قاينار كوزى»، سونداي-اق ول وزىنىڭ قىزمەتشىلەرىنە «زور جاناشىرلىق» تانىتادى (قورىنتتىقتارعا 2-حات 1:3—6 وقىڭىز؛ لۇقا 1:77، 78؛ ريمدىكتەرگە 15:13). ەحوباعا ەلىكتەگەندىكتەن، پاۋىل وسى جاعىنان جاقسى ۇلگى قالدىرعان. ول بىلاي دەپ جازعان: «سەندەردى بالاسىن ەمىزىپ، ماپەلەگەن اناداي ايالادىق. وزدەرىڭە اياۋلى سەزىمىمىز بولعاندىقتان، قۇدايدىڭ ىزگى حابارىن جەتكىزىپ قانا قويماي، جانىمىزدى بەرۋگە دايىن بولدىق، ويتكەنى وزدەرىڭدى جاقسى كورىپ كەتتىك» (سالونيكالىقتارعا 1-حات 2:7، 8). ەحوبا سياقتى ٴبىز دە مەيىرىمدى بولساق، باۋىرلاستار دۇعادا سۇراپ جۇرگەن جۇبانىشتى سيلاي الامىز.
17. باۋىرلاستاردى جىگەرلەندىرگىمىز كەلسە، ولارعا دەگەن كوزقاراسىمىز قانداي بولۋ كەرەك؟
17 باۋىرلاستاردان مىنسىزدىكتى تالاپ ەتپەڭىز. ەگەر باۋىرلاستاردان مىنسىزدىكتى تالاپ ەتەتىن بولساق، كوڭىلىمىز قالارى انىق (ۋاعىزداۋشى 7:21، 22). ەحوبانىڭ بىزدەن شامامىزدان تىس نارسەنى كۇتپەيتىنىن ەستە ۇستاڭىز. سوندىقتان دا ٴبىز ٶزارا شىدامدى بولۋىمىز قاجەت (ەفەستىكتەرگە 4:2، 32). ٴبىز ەشقاشان دا باۋىرلاستاردىڭ وزدەرىن قىزمەتتە بارىنشا كۇش سالماي جۇرگەندەي سەزىنۋىنە تۇرتكى بولعىمىز كەلمەيدى، ٵرى ولاردى باسقالارمەن سالىستىرمايمىز. قايتا، ولارعا جىگەر بەرىپ، ماقتاۋعا تۇرارلىق جاقتارىن ايتىپ وتىرايىق. سوندا ولاردىڭ ەحوباعا قۋانىشپەن قىزمەت ەتۋىنە سەپتىگىمىزدى تيگىزەمىز (عالاتتىقتارعا 6:4).
18. نەگە ٴبىز وزگەلەردى سۇيىسپەنشىلىكپەن نىعايتقىمىز كەلەدى؟
18 ەحوبا ٷشىن ٵربىر قىزمەتشىسى قىمبات. يسا دا ولاردى قاتتى باعالايدى (عالاتتىقتارعا 2:20). ٴبىز دە باۋىرلاستارىمىزدى قاتتى جاقسى كورەمىز، سوندىقتان ولارعا جاناشىر دا جۇمساق بولۋىمىز قاجەت. «ٶزارا تاتۋ بولۋعا جانە ٴبىر-ٴبىرىمىزدى نىعايتۋعا ىقپال ەتەتىننىڭ ٴبارىن ىستەيىك» (ريمدىكتەرگە 14:19). ٴبىز جۇماق ورناپ، ەشكىمنىڭ دە كوڭىلىنە قاياۋ تۇسپەيتىن ۋاقىتتىڭ كەلگەنىن قاتتى اڭسايمىز! سول كەزدە ەشقانداي اۋرۋ دا، سوعىس تا بولمايدى. ادامدار ادام اتادان مۇرا ەتكەن كۇنانىڭ كەسىرىنەن ولمەيتىن بولادى، قۋعىن-سۇرگىن، وتباسىلىق قيىندىقتار نە كوڭىلدىڭ قالۋى دەگەن اتىمەن بولمايدى. مىڭجىلدىقتىڭ سوڭىندا بۇكىل ادامزات كەمەلدىلىككە جەتەدى. اقىرعى سىناقتا ادال بولىپ قالعان جەردەگى قىزمەتشىلەرىن ەحوبا بالالارى رەتىندە قابىلدايدى دا، ولار «قۇداي بالالارىنىڭ سالتاناتتى بوستاندىعىنا جەتەدى» (ريمدىكتەرگە 8:21). ەندەشە بارلىعىمىز ٴبىر-ٴبىرىمىزدى سۇيىسپەنشىلىكپەن نىعايتىپ، قۇدايدىڭ ۋادە ەتكەن جاڭا دۇنيەسىنە جەتكەنشە، ٴبىر-ٴبىرىمىزدى العا جەتەلەي بەرەيىك.
^ 6-ابزاس «ەحوباعا جاقىندا» كىتابىنىڭ 24-تاراۋىن قاراڭىز.
^ 12-ابزاس ٶز ومىرىنە قول جۇمساعىسى كەلەتىندەرگە قالاي كومەكتەسە الاتىنىڭىزدى ٴبىلۋ ٷشىن «ويانىڭدار!» (حانزۇشا) جۋرنالىندا شىققان مىنا ماقالالاردى قاراپ كورسەڭىز بولادى: «نەگە ٶمىر سۇرە بەرۋ كەرەك؟ كۇدەر ۇزبەۋگە ٷش سەبەپ» (ٴساۋىر، 2014-جىل)؛ «ٶمىر سۇرۋگە دەگەن ىقىلاسىڭ جوعالعاندا...» (قاڭتار، 2012-جىل)؛ «ٶمىرىڭىزدى قييۋعا اسىقپاڭىز!» (22 قازان، 2001-جىل).
