«وسىلاردى ٴبىلىپ قانا قويماي، سوعان ساي ارەكەت ەتسەڭدەر، باقىتتىسىڭدار»
«مەنىڭ تاماعىم — ٶزىمدى جىبەرگەن قۇدايدىڭ ەركىن ورىنداۋ جانە ونىڭ تاپسىرعان ٸسىن اياقتاۋ» (جوحان 4:34).
اندەر: 80، 35
1. وسى الەمنىڭ ٶزىمشىل رۋحى بىزگە قانداي كەرى اسەرىن تيگىزۋى مۇمكىن؟
كەيدە ٴبىز قۇداي سوزىنەن العان بىلىمىمىزگە ساي ارەكەت ەتۋگە قينالىپ جاتامىز. نەلىكتەن؟ مۇنىڭ ٴبىر سەبەبى — كىشىپەيىلدىلىكتىڭ جەتىسپەۋشىلىگى. «سوڭعى كۇندەردە» ٶمىر ٴسۇرىپ جاتقاندىقتان، بىزگە كىشىپەيىلدىلىكتى ساقتاپ قالۋ قيىن، ويتكەنى ادامداردىڭ كوپشىلىگى «تەك قارا باسىن ويلايتىن، اقشاقۇمار، ماقتانشاق، تاكاپپار،.. ۇستامسىز» بولىپ كەتكەن (تىموتەگە 2-حات 3:1—3). قۇدايعا عيبادات ەتەتىندىكتەن، ٴبىز بۇلاردىڭ جامان مىنەز-قۇلىق ەكەنىن بىلەمىز. ايتكەنمەن وسىنداي مىنەز-قۇلىق تانىتاتىن ادامدار، كەرىسىنشە، تابىسقا جەتىپ جاتقانداي، ومىردىڭ راقاتىن كورىپ جۇرگەندەي كورىنەتىن شىعار (ٴزابۇر 37:1؛ 73:3). بىزگە ٴتىپتى مىنانداي ويلار كەلۋى مۇمكىن: «ٶزىمدى بىلاي قويىپ، باسقالاردىڭ قامىن ويلاعاننىڭ شىنىمەن دە پايداسى بار ما؟ كىشىپەيىل بولسام، باسقالاردىڭ الدىندا قادىرىم ٴتۇسىپ قالماي ما؟» (لۇقا 9:48). وسى الەمنىڭ ٶزىمشىل رۋحىنىڭ وزىمىزگە ىقپال ەتۋىنە جول بەرسەك، باۋىرلاستارمەن اراقاتىناسىمىزعا سىزات ٴتۇسىرۋىمىز مۇمكىن، ٵرى وسى دۇنيەلىك ادامداردان ٴماسىحشى رەتىندە ايرىقشالانباي قالامىز. ال ەگەر قۇدايدىڭ كىشىپەيىل قىزمەتشىلەرىنىڭ كورسەتكەن ۇلگىسىن وقىپ-زەرتتەپ، ولارعا ەلىكتەيتىن بولساق، جاقسى ناتيجەسىن كورەمىز.
2. قۇدايدىڭ بۇرىنعى ادال قىزمەتشىلەرىنەن نە ۇيرەنە الامىز؟
2 قۇدايدىڭ ەجەلدەگى ادال قىزمەتشىلەرى نەنىڭ ارقاسىندا ونىمەن دوس بولا العان؟ ولار نەلىكتەن قۇدايدىڭ ىقىلاسىنا بولەندى؟ دۇرىس ارەكەت ەتۋ ٷشىن قاجەتتى كۇشتى قايدان الدى؟ ولار جايلى كيەلى كىتاپتان وقىپ، وي جۇگىرتسەك، سەنىمىمىز قاتايا تۇسەدى.
سەنىمىمىزدى بەرىك ساقتاۋ ٷشىن نە ىستەۋىمىز كەرەك؟
3، 4. ا) ەحوبا بىزگە قالاي ٴتالىم بەرەدى؟ ٵ) سەنىمىمىزدى بەرىك ساقتاۋ ٷشىن، ٴبىلىم الۋدان بولەك، تاعى نە ىستەۋىمىز كەرەك؟
3 سەنىمىمىزدى بەرىك ساقتاۋعا نە كەرەك بولسا، ەحوبا سونىڭ ٴبارىن بەرىپ جاتىر. ٴبىز كيەلى كىتاپ، باسىلىمدار، org.jw سايتى، JW Broadcasting، قاۋىم كەزدەسۋلەرى مەن كونگرەستەر ارقىلى اقىل-كەڭەس پەن ٴتالىم الىپ وتىرامىز. ٴبىراق يسا ٴبىلىم الۋمەن عانا شەكتەلمەۋ كەرەكتىگىن ايتقان. ول: «مەنىڭ تاماعىم — ٶزىمدى جىبەرگەن قۇدايدىڭ ەركىن ورىنداۋ جانە ونىڭ تاپسىرعان ٸسىن اياقتاۋ»،— دەدى (جوحان 4:34).
4 قۇداي ەركىن ورىنداۋ يساعا تاماق جەۋمەن تەڭ بولعان. پايدالى تاماق بويىمىزعا قۋات ٴبىتىرىپ، دەنەمىزگە ٴنار بولاتىنىنداي، قۇداي ەركىن ورىنداعانىمىز بىزگە قاناعات سيلاپ، سەنىمىمىزدى نىعايتا تۇسەدى. مىسالى، شارشاساڭىز دا ۋاعىزداۋعا ارنالعان كەزدەسۋگە بارىپ، قىزمەتكە شىققان سوڭ، ۇيگە ٴماز بولىپ، سەرگىپ قايتقان كەزىڭىز بولعان شىعار؟!
5. دانا بولۋدىڭ قانداي پايداسى بار؟
5 ەحوبانىڭ ايتقانىن ىستەسەك، بۇل دانالىققا جاتادى (جاقىپ 3:13). دانالىققا يە بولساق، مۇنىڭ كوپ پايداسىن كورەمىز. كيەلى كىتاپتا دانالىق جايىندا: «قۇمارتقان ەش نارسەڭ وعان تەڭ كەلمەس... يە بولعاندارعا ول — ٶمىر اعاشى، ونى بەرىك ۇستانعاندار باقىتتى سانالادى»،— دەلىنگەن (ناقىل سوزدەر 3:13—18). يسا: «وسىلاردى ٴبىلىپ قانا قويماي، سوعان ساي ارەكەت ەتسەڭدەر، باقىتتىسىڭدار»،— دەگەن (جوحان 13:17). يسانىڭ شاكىرتتەرى ونىڭ ايتقاندارىنا ساي ارەكەت ەتە بەرسە عانا باقىتتى بولماق ەدى. يسانىڭ ٴتالىمىن ٸس جۇزىندە ورىنداپ، ونى ۇلگى تۇتۋ ولاردىڭ ٶمىر سالتتارىنا اينالماق ەدى.
6. ٴبىز نەگە ٵرى قاراي دا بىلگەندەرىمىزگە ساي ارەكەت ەتە بەرۋىمىز كەرەك؟
6 بۇگىندە ٴبىز دە بىلگەندەرىمىزگە ساي ارەكەت ەتە بەرۋىمىز قاجەت. كولىك جوندەيتىن مەحانيكتى مىسالعا الايىق. ونىڭ قۇرال-سايمانى، قاجەتتى ماتەريالدارى مەن ٴبىلىمى دە بار دەلىك. ٴبىراق ول بۇلاردى قولدانسا عانا جاقسى مەحانيك بولا الادى. جۇمىستا جىلدار بويى تاجىريبە جيناسا دا، جاقسى مەحانيك بولىپ قالۋ ٷشىن ول ٴبىلىمىن ٸس جۇزىندە قولدانۋدى دوعارماۋ كەرەك. سول سياقتى، شىندىقتى العاش بىلگەندە، ٴبىز قاتتى قۋاندىق. ويتكەنى كيەلى كىتاپتان العان ٴبىلىمىمىزدى ٸس جۇزىندە قولداندىق. ٴبىراق قۋانىشىمىز ۇزاققا سوزىلۋ ٷشىن، ٴبىز ەحوبانىڭ ٴتالىمىن ٵرى قاراي دا كۇن سايىن ۇستانا بەرۋىمىز قاجەت.
7. كيەلى كىتاپتا جازىلىپ كەتكەن كىسىلەردىڭ ۇلگىسىنەن ۇيرەنۋ ٷشىن نە ىستەۋىمىز كەرەك؟
7 كەيبىر جاعدايلاردا بىزگە كىشىپەيىلدىلىك ساقتاۋ قيىن بولادى. بۇل ماقالادا ٴبىز قۇدايدىڭ كەيبىر ادال قىزمەتشىلەرى قالاي كىشىپەيىل بولىپ قالعاندارىن قاراستىرامىز. سول ارقىلى كىشىپەيىلدىلىك تانىتۋدىڭ ٴتورت جولىن بىلەمىز. ٴبىراق بۇل مالىمەتتى ٴبىلىپ قانا قويماي، سول جايلى وي جۇگىرتىپ، ومىردە قولدانۋىمىز كەرەك.
وزگەلەردى وزىڭىزدەن كەم ساناماڭىز
8، 9. ەلشىلەردىڭ ىستەرى 14:8—15 تارماقتاردان پاۋىلدىڭ كىشىپەيىلدىلىگى قالاي كورىنەدى؟ (ماقالانىڭ باسىنداعى سۋرەتتى قاراڭىز.)
8 قۇداي «ٵرتۇرلى ادامداردىڭ قۇتقارىلعانىن جانە شىندىق جايلى تۋرا ٴبىلىم العانىن قالايدى» (تىموتەگە 1-حات 2:4). ازىرگە شىندىقتى بىلمەيتىن ادامدارعا ٴسىز قالاي قارايسىز؟ ەلشى پاۋىل ۋاعىزداعان ياھۋديلەر ەحوبا تۋرالى ٴبىرشاما بىلەتىن. ٴبىراق ول ۋاعىزداعان ادامداردىڭ ىشىندە جالعان تاڭىرلەرگە تابىناتىندار دا بولعان. سول كەزدە ونىڭ كىشىپەيىلدىلىگى سىنالدى. قالايشا؟
9 پاۋىل ٴبىرىنشى ميسسيونەرلىك ساپارىندا بارنابامەن بىرگە ليسترا قالاسىنا باردى. سول جەردە تۇراتىن ليكاوندىقتار پاۋىل مەن بارنابانى تىلسىم كۇشى بار قۇدايداي كورىپ، ەكەۋىن زەۆس پەن گەرمەس دەگەن جالعان قۇدايلارىنىڭ اتىمەن اتادى. بۇعان پاۋىل مەن بارنابا پاڭدانىپ كەتتى مە؟ وسىعان دەيىنگى ەكى قالادا قۋعىن كورىپ كەلگەن ولار «مىناۋ ٴبىر كەرەمەت بولدى عوي» دەپ ويلادى ما؟ جۇرتتىڭ وزدەرىنە وسىنشالىقتى نازار اۋدارعانى كوبىرەك ادامنىڭ ىزگى حاباردى ەستۋىنە جول اشادى دەپ پايىمدادى ما؟ جوق، ولار بۇلاي ويلامادى. ولار ىزا بولىپ، قاتتى داۋىسپەن: «بۇلارىڭىز نە؟ ٴبىز دە ٴسىزدەر سياقتى پەندەمىز عوي»،— دەدى (ەلشىلەردىڭ ىستەرى 14:8—15).
10. پاۋىل مەن بارنابا نەگە وزدەرىن ليكاوندىقتاردان ارتىق سانامادى؟
10 «ٴبىز دە ٴسىزدەر سياقتى پەندەمىز عوي»،— دەۋىمەن پاۋىل مەن بارنابا وزدەرىنىڭ دە كەمەلسىز ەكەنىن ايتقىسى كەلدى. ارينە، ولار ليكاوندىقتار سياقتى جالعان قۇدايلارعا تابىنبايتىن. قۇداي ولاردى ميسسيونەر رەتىندە ارنايى تاپسىرمامەن جىبەرگەن بولاتىن (ەلشىلەردىڭ ىستەرى 13:2). پاۋىل مەن بارنابا كيەلى رۋحپەن مايلانعان ٵرى تاماشا ۇمىتكە يە ەدى. ٴبىراق بۇل باسقالاردان ۇستەم بولىپ كەتۋگە نەگىز ەمەس ەدى. ولار سياقتى، ليكاوندىقتار دا ىزگى حاباردى قابىلداسا، كوكتە ٶمىر ٴسۇرۋ ۇمىتىنە يە بولا الاتىن. پاۋىل مەن بارنابا وسىنى تۇسىنگەن.
11. ادامدارعا ۋاعىزداعاندا، پاۋىلدىڭ كىشىپەيىلدىلىگىنە قالاي ەلىكتەي الامىز؟
11 وسى وقيعادان پاۋىل سياقتى كىشىپەيىل بولۋدىڭ ٴبىر جولىن بىلەمىز. ەحوبانىڭ بىزگە ۋاعىز ٸسىن تاپسىرعانى ٷشىن نەمەسە ونىڭ كومەگىمەن اتقارىپ جۇرگەن باسقا دا ىستەر ٷشىن ٶزىمىزدى وزگەلەردەن ارتىق سانامايمىز. ٴبىز ٶزىمىزدى بىلاي دەپ تەكسەرسەك بولادى: «ۋچاسكەمدەگى ادامدارعا قالاي قارايمىن؟ كەيبىر ادامدارعا الالاۋشىلىق تانىتىپ جۇرگەن جوقپىن با؟» دۇنيەجۇزى بويىنشا ەحوبا كۋاگەرلەرى ىزگى حابارعا قۇلاق اساتىن ادامداردى ىزدەيدى. ال كەيبىر باۋىرلاستار ٴتىپتى كوپشىلىك مەنسىنبەي قارايتىن ۇلتتاردىڭ ٴتىلىن جانە مادەنيەتىن ۇيرەنۋگە كۇش سالۋدا. ٴبىراق ولار ەشقاشان وزدەرى ۋاعىزداپ جۇرگەن ادامداردان ارتىقپىز دەپ ويلامايدى. قايتا، پاتشالىق تۋرالى ىزگى حاباردى مۇمكىندىگىنشە كوپ ادامعا قابىلداۋعا كومەكتەسۋ ٷشىن، ولار ٵربىر ادامعا جەكە تۇلعا رەتىندە قاراپ، جاعدايىن تۇسىنۋگە تىرىسادى.
وزگەلەردىڭ ەسىمدەرىن اتاپ دۇعا ايتىڭىز
12. ەپافراس شىن پەيىلمەن وزگەلەردىڭ قامىن ويلايتىنىن قالاي كورسەتتى؟
12 كىشىپەيىلدىلىك تانىتۋدىڭ تاعى ٴبىر جولى — «بىزدىكىندەي اسا قۇندى سەنىمگە يە بولعاندار» ٷشىن، ياعني باۋىرلاستار ٷشىن دۇعا ايتۋ (پەتىردىڭ 2-حاتى 1:1). وسى ورايدا ەپافراس جاقسى ۇلگى قالدىرعان. ول كيەلى كىتاپتا ٷش-اق رەت اتالىپ وتكەن. پاۋىل ريمدە ٷي قاماۋىندا وتىرعاندا، قولوستاعى ماسىحشىلەرگە ەپافراس تۋرالى بىلاي دەپ جازعان: «ول [سەندەر] ٷشىن ۇنەمى جانىن سالىپ دۇعا ەتۋدە» (قولوستىقتارعا 4:12). ەپافراس باۋىرلاستاردىڭ جاعدايىن جاقسى بىلگەن جانە شىن كوڭىلدەن ولاردىڭ قامدارىن ويلاعان. پاۋىل ول جايلى «مەنىمەن قاماۋدا وتىر» دەگەنىنە قاراعاندا، ەپافراستىڭ ٶزى دە قيىن جاعدايدا بولعان (ٴفىلىمونعا 23). ٴبىراق سوعان قاراماي، ول وزگەلەردىڭ قامىن ويلاپ، قولىنان كەلگەنشە كومەكتەسۋگە تىرىستى. ول باۋىرلاستار ٷشىن دۇعا ەتتى. ٴبىز دە سولاي ەتىپ، ٴتىپتى ولاردىڭ ەسىمىن اتاپ دۇعا ەتسەك بولادى. مۇنداي دۇعالاردىڭ كۇشى زور (قورىنتتىقتارعا 2-حات 1:11؛ جاقىپ 5:16).
13. دۇعا ەتكەندە ەپافراسقا قالاي ەلىكتەي الاسىز؟
13 ٴسىز دۇعاڭىزدا كىمدەردىڭ اتىن اتاساڭىز بولادى؟ بالكىم، قاۋىمداعى دوستارىڭىز نەمەسە قيىندىققا كەزىگىپ جۇرگەن وتباسىلار ٷشىن دۇعا ەتە الارسىز. مۇمكىن، ولارعا قانداي دا ٴبىر شەشىم قابىلداۋ قيىن بولىپ جاتقان شىعار نەمەسە قانداي دا ٴبىر ازعىرۋلارمەن كۇرەسىپ جۇرگەن بولار. سونداي-اق ٴسىز org.jw سايتىنداعى «ٴتۇرلى جەرلەردە سەنىمدەرى ٷشىن تۇرمەدە وتىرعان ەحوبا كۋاگەرلەرى جايلى مالىمەت» (حانزۇشا) دەگەن ماقالالاردا ەسىمى اتالعان باۋىرلاستار ٷشىن دۇعا ەتسەڭىز بولادى. سونداي-اق جاقىندارى قايتىس بولعاندار، تابيعي اپاتتى نەمەسە سوعىستى باستان وتكىزگەندەر، قارجى جاعىنان تارشىلىق كورىپ جۇرگەندەر ٷشىن دۇعا ەتسەڭىز بولادى. بايقاعانىمىزداي، ٴبىزدىڭ دۇعامىزعا مۇقتاج باۋىرلاستار وتە كوپ. سولار تۋرالى دۇعا ەتكەندە، ٴبىز ٶز مۇددەمىزدى عانا ەمەس، وزگەلەردىڭ دە مۇددەسىن ويلايتىنىمىزدى كورسەتەمىز (فىلىپىلىكتەرگە 2:4). ەحوبا سونداي دۇعالاردى ەستيدى.
«تىڭداۋعا جۇيرىك» بولىڭىز
14. ەحوبا تىڭداۋ جاعىنان قالاي ۇلگى كورسەتەدى؟
14 كىشىپەيىلدىلىك تانىتۋدىڭ كەلەسى جولى — ادامداردى مۇقيات تىڭداۋ. جاقىپ 1:19 دا «تىڭداۋعا جۇيرىك» بولۋىمىز كەرەكتىگى ايتىلعان. ەحوبا تىڭداۋ جاعىنان ەڭ كەرەمەت ۇلگى كورسەتەدى (مۇسانىڭ 1-جازباسى 18:32؛ ەشۋا 10:14). مىسالى، مۇسانىڭ 2-جازباسى 32:11—14 (وقىڭىز) تارماقتاردا جازىلعان وقيعانى الساق بولادى. ەحوباعا مۇنىڭ قاجەتى بولماسا دا، ول مۇساعا ٶز ويىن ايتۋعا مۇرسات بەردى. ٴسىز بۇرىندا قاتەلىك جاساعان ادامدى شىدامدىلىقپەن تىڭداپ، كەيىن ونىڭ سوزىنە قۇلاق اسار ما ەدىڭىز؟ ال ەحوبا وزىنە سەنىممەن دۇعا ەتكەن ٵربىر ادامدى شىدامدىلىقپەن تىڭدايدى.
15. باسقالاردى قۇرمەتتەۋ جاعىنان ەحوباعا قالاي ەلىكتەي الامىز؟
15 وزىڭىزدەن بىلاي دەپ سۇراپ كورىڭىز: «ەحوبا ىبىرايىم، راحيلا، مۇسا، ەشۋا، مانۇح، ٸلياس جانە ەزەكيا سياقتى قاراپايىم پەندەلەردى كىشىپەيىلدىلىكپەن تىڭداسا، مەن دە سولاي ەتۋىم كەرەك ەمەس پە؟ باۋىرلاستارىمنىڭ ۇسىنىستارىن تىڭداپ، مۇمكىن بولعاندا ولاردى قابىلداۋ ارقىلى كوبىرەك قۇرمەت تانىتا الامىن با؟ قاۋىمدا نەمەسە وتباسىمدا كىمگە كوبىرەك كوڭىل بولسەم بولادى؟ بۇل ٷشىن نە ىستەسەم ەكەن؟» (مۇسانىڭ 1-جازباسى 30:6؛ بيلەر 13:9؛ پاتشالار 1-جازبا 17:22؛ شەجىرەلەر 2-جازبا 30:20).
«بالكىم، ەحوبا كورگەن قورلىعىما نازار اۋدارار»
ٴداۋىت: «وعان تيمەڭدەر»،— دەدى. ال ٴسىز نە ىستەر ەدىڭىز؟ (16، 17-ابزاستى قاراڭىز)
16. شيمەي قارسى شىققاندا، ٴداۋىت پاتشا قالاي ارەكەت ەتتى؟
16 كىشىپەيىلدىلىك وزگەلەر بىزگە جاماندىق جاساعاندا ۇستامدى بولۋعا كومەكتەسەدى (ەفەستىكتەرگە 4:2). وسىنىڭ كەرەمەت ۇلگىسىن سامۋيلدىڭ 2-جازباسى 16:5—13 (وقىڭىز) تارماقتاردان وقيمىز. ساۋل پاتشانىڭ تۋىسى شيمەي ٴداۋىت پەن ونىڭ قىزمەتشىلەرىن قارعاپ-سىلەپ، ولارعا تاس لاقتىرعان. سول كەزدە ٴداۋىت شيمەيدى توقتاتا الار ەدى، ٴبىراق ول ونىڭ سوزدەرىن شىدامدىلىقپەن كوتەردى. قالايشا ٴداۋىت وسىنداي جاعدايدا ۇستامدىلىق تانىتا الدى؟ بۇنىڭ جاۋابىن زابۇر جىرىنىڭ 3-تاراۋىنان تابا الامىز.
17. نەنىڭ ارقاسىندا ٴداۋىت ۇستامدى بولدى جانە ٴبىز ودان قانداي ساباق الامىز؟
17 داۋىت بۇل زابۇر جىرىن ٶز ۇلى ابەسسالوم ونى ولتىرمەك بولىپ جۇرگەندە جازعان. سول كەزدەرى شيمەي وعان قارسى شىقتى. ٴداۋىت سوندا دا سابىرلىق ساقتادى. وعان نە كومەكتەستى؟ ٴزابۇر 3:4 تە ول: «ەحوبانى داۋىستاپ شاقىرامىن، سوندا ول كيەلى تاۋىنان جاۋاپ بەرەدى»،— دەگەن. وزگەلەر بىزگە قارسى ارەكەت ەتىپ، جاماندىق جاساعاندا، ٴبىز دە ٴداۋىت سياقتى دۇعا ەتۋىمىز كەرەك. سوندا ەحوبا بىزگە توتەپ بەرۋگە كومەكتەسۋ ٷشىن كيەلى رۋحىن بەرەدى. بىرەۋ سىزگە جاماندىق جاساعاندا ادەتتەگىدەن ۇستامدىراق بولىپ، اناعۇرلىم كەشىرىمدى بولا الاسىز با؟ ٴسىزدىڭ قيىنشىلىقتارىڭىزعا ەحوبا بەيجاي قارامايتىنىنا، ٵرى سىزگە كومەكتەسىپ، جارىلقايتىنىنا نىق سەنىمدىسىز بە؟
«ەڭ ماڭىزدىسى — دانالىق»
18. ەحوبانىڭ ايتقاندارىنا ساي ارەكەت ەتۋدىڭ قانداي پايداسى بار؟
18 قانداي ارەكەتتىڭ دۇرىس بولاتىنىن ٴبىلىپ، سوعان ساي ارەكەت ەتسەك، دانا بولامىز، ٵرى ەحوبانىڭ باتاسىنا كەنەلەمىز. ناقىل سوزدەر 4:7 دە: «ەڭ ماڭىزدىسى — دانالىق»،— دەلىنگەن. دانالىق بىلىمگە نەگىزدەلەتىنى راس، ٴبىراق ول بىلگەنىمىزدى تۇسىنۋمەن عانا شەكتەلمەيدى. دانالىق ٴبىزدىڭ قانداي شەشىم قابىلداپ، قالاي ارەكەت ەتەتىنىمىزدەن كورىنەدى. ٴتىپتى قۇمىرسقانىڭ ٶزى قىسقا ازىق جيناپ، دانالىق تانىتادى (ناقىل سوزدەر 30:24، 25). كيەلى كىتاپتا «قۇدايدىڭ دانالىعى» دەپ اتالعان ٴماسىح ٵرقاشان دا اكەسىنە ۇنامدىنى ىستەيدى (قورىنتتىقتارعا 1-حات 1:24؛ جوحان 8:29). ٴبىز دە قۇدايدىڭ كوز الدىندا دۇرىس نارسەنى تاڭداپ، سوعان ساي ارەكەت ەتۋ ارقىلى كىشىپەيىلدىلىك پەن دانالىق تانىتا بەرسەك، قۇداي ٴبىزدى جارىلقايدى (ماتاي 7:21—23 وقىڭىز). ەندەشە، بويىڭىزدا ناعىز كىشىپەيىلدىلىك دامىتۋعا كۇش سالىڭىز. سوندا ٴسىز قاۋىمداعىلاردى دا ەحوباعا كىشىپەيىلدىلىكپەن قىزمەت ەتۋگە تالپىندىراسىز. ارينە، بىلگەندەرىمىزدى ومىردە قولدانۋ ٷشىن ٴبىراز ۋاقىت پەن تاباندىلىق قاجەت بولادى. سولاي ەتسەك، كىشىپەيىل ەكەنىمىزدى كورسەتەمىز. كىشىپەيىلدىلىك بولسا ٴبىزدى قازىر دە، بولاشاقتا دا باقىتقا بولەيدى!
