ەحوباعا ەلىكتەپ، وزگەلەردىڭ سەزىمىن ەسكەرىڭىز
«بەيشارانىڭ قامىن ويلايتىن ادام باقىتتى» (ٴزابۇر 41:1).
اندەر: 130، 107
1. ەحوبا كۋاگەرلەرىنىڭ ٴبىر-ٴبىرىن جاقسى كورەتىندەرى نەدەن بايقالادى؟
دۇنيەنىڭ تۇكپىر-تۇكپىرىندە تۇراتىن ەحوبا كۋاگەرلەرى ٴبىر ۇلكەن وتباسىن قۇرايدى. ولار ٴبىر-ٴبىرىن تۋعان باۋىرلارداي جاقسى كورەدى (جوحاننىڭ 1-حاتى 4:16، 21). ولار باۋىرلاستارىنا دەگەن سۇيىسپەنشىلىكتەرىن ٴجيى ۇلكەن ىستەرىمەن ەمەس، كۇندەلىكتى مايدا-شۇيدە ىستەرىمەن كورسەتەدى. ماسەلەن، ولار ٴبىر-بىرىنە جاقسى سوزدەر ايتىپ، مەيىرىمدىلىكپەن قارايدى. وسىلاي ادامداردىڭ سەزىمدەرىن ەسكەرۋ ارقىلى ٴبىز كوكتەگى اكەمىزگە ەلىكتەيمىز (ەفەستىكتەرگە 5:1).
2. يسا اكەسىنىڭ سۇيىسپەنشىلىگىنە قالاي ەلىكتەگەن؟
2 يسا ەحوباعا كەمەلدى تۇردە ەلىكتەگەن. ول ٵرقاشان دا ادامدارعا مەيىرىممەن قاراعان. يسا بىلاي دەگەن: «بەينەت شەككەندەر مەن ەڭسەلەرىن اۋىر جۇك باسقاندار، بارلىعىڭ دا ماعان كەلىڭدەر، مەن جاندارىڭدى سەرگىتەمىن» (ماتاي 11:28، 29). يساعا ەلىكتەپ، «بەيشارانىڭ قامىن ويلايتىن» بولساق، ەحوبانى دا قۋانتامىز، ٶزىمىز دە قۋانامىز (ٴزابۇر 41:1). وسى ماقالادان ٴبىز وتباسىمىزداعىلاردىڭ، قاۋىمداعى باۋىرلاستاردىڭ، قىزمەتتە كەزدەستىرەتىن ادامداردىڭ سەزىمىن قالاي ەسكەرە الاتىنىمىزدى بىلەمىز.
وتباسىندا
3. كۇيەۋى ايەلىنىڭ سەزىمىن قالاي ەسكەرە الادى؟ (ماقالانىڭ باسىنداعى سۋرەتتى قاراڭىز.)
3 كۇيەۋلەر وتباسىنا ۇلگى بولىپ، ولاردىڭ قامىن ويلايتىنىن كورسەتۋ كەرەك (ەفەستىكتەرگە 5:25؛ 6:4). كيەلى كىتاپقا ساي، كۇيەۋلەر ايەلدەرىنىڭ «سەزىمىن ەسكەرىپ، تۇسىنىكپەن قاراۋى» ٴتيىس (پەتىردىڭ 1-حاتى 3:7، سىلتەمە). ايەلىنە تۇسىنىكپەن قارايتىن كۇيەۋ ارالارىنداعى وزگەشەلىكتەر كوپ ەكەنىن بىلسە دە، ٶزىن ايەلىنەن ارتىق سانامايدى (مۇسانىڭ 1-جازباسى 2:18). ول ايەلىنىڭ سەزىمدەرىن ەسكەرەدى جانە ونىڭ قادىرىن تۇسىرمەي، قۇرمەت كورسەتەدى. كاناداداعى ٴبىر ايەل باۋىرلاس وزىنىڭ كۇيەۋى جايلى بىلاي دەيدى: «ول ەشقاشان مەنىڭ سەزىمدەرىمدى اياقاستى ەتىپ، ماعان «نە بولدى سونشا؟» دەپ ايتپايدى. ول مەنى جاقسى تىڭدايدى. كوزقاراسىمدى تۇزەتۋ كەرەك بولعاندا، ماعان مەيىرىممەن سويلەيدى».
كۇيەۋى جارىنا ادالدىق ساقتايدى، ويتكەنى ونى جاقسى كورەدى، ال جاماندىقتى جەك كورەدى
4. جۇبايىنىڭ سەزىمىن ەسكەرەتىن كۇيەۋ وزگە ايەلدەرگە قالاي قارايدى؟
4 ايەلىنىڭ سەزىمىن ەسكەرەتىن كۇيەۋ ەشقاشان وزگە ايەلدەرگە قىرىندامايدى. يا بولماسا ولارعا جەكە بولسا دا، الەۋمەتتىك جەلى نە عالامتور ارقىلى بولسا دا، ورىنسىز قىزىعۋشىلىق تانىتپايدى (ٵيۇپ 31:1). سونداي-اق ول مازمۇنى تۇرپايى سايتتارعا كىرمەيدى. ول جارىنا ادالدىق ساقتايدى. ويتكەنى ايەلىن دە، ەحوبانى دا جاقسى كورەدى، ال جاماندىقتى جەك كورەدى (ٴزابۇر 19:14؛ 97:10 وقىڭىز).
5. ايەلى قالاي كۇيەۋىنىڭ سەزىمدەرىن ەسكەرەدى؟
5 كۇيەۋ يساعا، سۇيىسپەنشىلىكپەن ۇلگى قالدىرعان باسشىسىنا ەلىكتەسە، ايەلىنە وعان «زور قۇرمەت كورسەتۋ» وڭايىراق بولادى (ەفەستىكتەرگە 5:22—25، 33). كۇيەۋى قاۋىم ىستەرىنەن قولى بوساماي جاتقاندا يا قانداي دا ٴبىر قيىن ماسەلەگە كەزىككەندە، جۇبايىن قۇرمەتتەيتىن ايەل ونىڭ سەزىمدەرىن ٴتۇسىنىپ، مەيىرىمدى بولۋعا تىرىسادى. بريتانياداعى ٴبىر ەر باۋىرلاس بىلاي دەيدى: «كەيدە ايەلىم كوڭىل كۇيىمنەن-اق مەنى ٴبىر نارسە مازالاپ جۇرگەنىن بايقاپ قويادى. ول ناقىل سوزدەر 20:5 تەگى ٴپرينسيپتى قولدانىپ، مەنى مازالاعان نارسە قۇپيا بولماسا، ويىمدى «تارتىپ شىعارۋدىڭ» رەتىن ىزدەيدى. قاجەت بولسا، قولايلى ۋاقىتتى كۇتە تۇرادى».
6. بالالارعا باسقالاردىڭ قامىن ويلاپ، مەيىرىمدى بولۋدى ٵرقايسىسىمىز قالاي ۇيرەتە الامىز جانە ولار بۇنىڭ قانداي پايداسىن كورەدى؟
6 ەرلى-زايىپتىلار ٴبىر-ٴبىرىنىڭ سەزىمدەرىن ەسكەرەتىن بولسا، بالالارىنا جاقسى ۇلگى كورسەتەدى. بۇعان قوسا، ولار بالالارىنا وزگەلەردى قۇرمەتتەۋدى جانە مەيىرىمدى بولۋدى ۇيرەتۋلەرى كەرەك. مىسالى، اتا-انالار بالالارعا پاتشالىق سارايىندا جۇگىرۋگە بولمايتىنىن ايتىپ تۇسىندىرسە بولادى. يا بولماسا كوپشىلىك باس قوسقاندا، الدىمەن ۇلكەندەر تاماقتارىن سالىپ العانشا، كۇتە تۇرۋ كەرەكتىگىن ۇيرەتسە بولادى. وسى ورايدا قاۋىمداعى ٵربىرىمىز اتا-انالارعا قولعابىس ەتە الامىز. بالالار قانداي دا ٴبىر جاقسى ٸس ىستەسە، مىسالى بىزگە ەسىك اشىپ بەرسە، ونى ماقتاساق بولادى. بۇدان بالا ٴماز-مەيرام بولىپ، «العاننان گورى بەرگەن باقىتتى» ەكەنىن تۇسىنەتىن بولادى (ەلشىلەردىڭ ىستەرى 20:35).
قاۋىمدا
7. يسا ساڭىراۋ ادامنىڭ سەزىمىن قالاي ەسكەردى جانە ونىڭ ۇلگىسىنەن قانداي ساباق الامىز؟
7 بىردە يسا دەكاپوليس ايماعىندا بولعاندا، «ادامدار وعان ساڭىراۋ ٵرى ٴتىلى مۇكىس بىرەۋدى اكەلدى» (مارقا 7:31—35). ٴبىراق يسا ونى جۇرتتىڭ كوزىنشە ساۋىقتىرمادى. ول نەگە بۇلاي ىستەدى؟ بالكىم، الگى ادام ساڭىراۋ بولعاندىقتان، كوپشىلىكتىڭ ورتاسىندا ٶزىن ىڭعايسىز سەزىنگەن شىعار. يسا ونىڭ سەزىمدەرىن تۇسىنگەندىكتەن، ونى «جۇرتتان بىلايىراق الىپ شىعىپ»، وڭاشا جەردە ساۋىقتىردى. ارينە، ٴبىز كەرەمەت جاساي المايمىز. دەسە دە ٴبىز باۋىرلاستارىمىزدىڭ قاجەتتىلىكتەرى مەن سەزىمدەرىن ەسكەرىپ، ولارعا مەيىرىمدى بولۋىمىز كەرەك. ەلشى پاۋىل: «سۇيىسپەنشىلىككە جانە يگى ىستەرگە تالپىندىرۋ ٷشىن، ٴبىر-بىرىمىزگە كوڭىل بولەيىك»،— دەپ جازعان (ەۆرەيلەرگە 10:24). يسا ساڭىراۋ ادامعا تۇسىنۋشىلىكپەن قاراپ، وعان مەيىرىمدىلىك تانىتتى. نە دەگەن تاماشا ۇلگى دەسەڭىزشى!
سۇيىسپەنشىلىك ٴبىزدى قارت نەمەسە مۇمكىندىگى شەكتەۋلى باۋىرلاستارعا قولىمىزدان كەلگەنشە كومەكتەسۋگە تالپىندىرادى
8، 9. قارت جانە مۇمكىندىگى شەكتەۋلى باۋىرلاستارعا قالاي قامقور بولا الامىز؟ (مىسالدار كەلتىرىڭىز.)
8 قارتتار مەن مۇمكىندىگى شەكتەۋلى باۋىرلاستاردىڭ سەزىمدەرىن ەسكەرىڭىز. ماسىحشىلەر قاۋىمىنىڭ ەڭ باستى ەرەكشەلىگى — كوپ جەتىستىككە جەتەتىندەرى ەمەس، ولاردىڭ تانىتاتىن سۇيىسپەنشىلىكتەرى (جوحان 13:34، 35). سۇيىسپەنشىلىك ٴبىزدى قارت نەمەسە مۇمكىندىگى شەكتەۋلى باۋىرلاستارعا قولىمىزدان كەلگەنشە كومەكتەسىپ، ولاردى قاۋىمعا اپارۋعا جانە ۋاعىزعا الىپ شىعۋعا تالپىندىرادى. بۇل بىزگە ىڭعايسىز بولسا دا، يا بولماسا ولار باسقالار سياقتى كوپ نارسە ىستەي الماسا دا، ٴبىز ولارعا قول ۇشىن بەرۋدەن ايانبايمىز (ماتاي 13:23). مۇگەدەك ارباسىمەن جۇرەتىن مايكل باۋىرلاس وتباسىنداعىلاردىڭ جانە قاۋىمداعى باۋىرلاستاردىڭ كومەگىنە زور العىسىن بىلدىرەدى. ول بىلاي دەيدى: «ٴبارى جۇمىلىپ كومەكتەسكەنىنىڭ ارقاسىندا مەن كەزدەسۋلەردىڭ بارىنە دەرلىك قاتىسىپ، جۇيەلى تۇردە قىزمەتكە شىعا الامىن. مەن اسىرەسە كوپشىلىك ورىنداردا ۋاعىزداۋدى جاقسى كورەمىن».
9 كوپتەگەن بەتەلدەردە قارت نەمەسە مۇمكىندىگى شەكتەۋلى ادال باۋىرلاستارىمىز بار. بەتەلدەگى قامقور باقىلاۋشىلار ولاردىڭ حات جانە تەلەفون ارقىلى ۋاعىزداۋىنا جاعداي جاساپ، سۇيىسپەنشىلىكتەرىن كورسەتۋدە. 86 جاستاعى بيلل باۋىرلاس الىس ايماقتارداعى ادامدارعا حات جازادى. ول بىلاي دەيدى: «ٴبىز ادامدارعا حات جازۋ ارقىلى ۋاعىزداۋ مۇمكىندىگىن قاتتى باعالايمىز». ال 90 عا كەلىپ قالعان نەنسي باۋىرلاسىمىز: «حات جازۋ مەن ٷشىن جاي ۋاقىت وتكىزۋدىڭ امالى ەمەس. بۇل — وتە ماڭىزدى قىزمەت ٴتۇرى. ادامدارعا شىندىقتى جەتكىزۋ كەرەك!»— دەيدى. 1921 جىلى تۋىلعان ەتەل باۋىرلاس: «اۋىرمايتىن كۇنىم جوق. كەي كۇندەرى كيىنۋگە دە ٵلىم جەتپەيدى»،— دەيدى. سوعان قاراماستان ول تەلەفونمەن ۋاعىزداعاندى قاتتى جاقسى كورەدى. ونىڭ سويلەسىپ تۇراتىن بىرنەشە ادامدارى بار. 85 جاستاعى باربارا باۋىرلاس: «دەنساۋلىعىم ناشار بولعاندىقتان، وزگەلەر سياقتى ۋاعىزعا شىعا المايمىن. ٴبىراق مەن تەلەفون ارقىلى ادامدارعا كۋالىك ەتە الامىن. وسى ٷشىن ەحوباعا راقمەتىمدى ايتامىن!»— دەيدى. سول بەتەلدەگى اياۋلى قارت باۋىرلاستارىمىز ٴبىر جىلعا جۋىق ۋاقىت ارالىعىندا قىزمەتكە 1228 ساعات جۇمسادى، 6265 حات جازدى، 2000 نان اسا ادامعا قوڭىراۋ شالىپ، 6315 ادەبيەت ۇلەستىردى! ولاردىڭ ەرەن ەڭبەكتەرىن كورىپ، ەحوبانىڭ قاتتى قۋانعانىندا ٴسوز جوق! (ناقىل سوزدەر 27:11).
10. باۋىرلاستار قاۋىم كەزدەسۋلەرىنىڭ بارىنشا پايداسىن كورۋ ٷشىن نە ىستەۋىمىز كەرەك؟
10 قاۋىم كەزدەسۋلەرىندە وزگەلەردىڭ سەزىمدەرىن ەسكەرىڭىز. باۋىرلاستاردىڭ سەزىمىن ەسكەرۋ ارقىلى ٴبىز ولارعا قاۋىم كەزدەسۋلەرىنىڭ بارىنشا پايداسىن كورۋگە كومەكتەسەمىز. قالايشا؟ مۇنىڭ ٴبىر جولى — باۋىرلاستاردى الاڭداتپاۋ ٷشىن كەزدەسۋلەرگە ۋاقىتىندا كەلۋ. ارينە، كەيدە كۇتپەگەن جاعدايلار بولىپ، كەشىگىپ قالۋىمىز مۇمكىن. دەسە دە ٴجيى كەشىگە بەرەتىنىمىزدى بايقاساق، بۇل باۋىرلاستارعا قالاي اسەر ەتەتىنىن جانە ولاردىڭ قامىن ويلاۋ ٷشىن قاي جاعىنان وزگەرە الاتىنىمىز تۋرالى ويلانعانىمىز ٴجون. ٴبىزدى قاۋىم كەزدەسۋلەرىنە شاقىرعان ەحوبا مەن يسا ەكەنىن دە ۇمىتپاۋىمىز كەرەك (ماتاي 18:20). كەزدەسۋگە ۋاقتىلى كەلۋ ارقىلى ولارعا قۇرمەت تانىتايىق!
11. قاۋىمدا تاپسىرمامەن شىعاتىن ەر باۋىرلاستار نەگە قورىنتتىقتارعا 1-حات 14:40 تاعى نۇسقاۋعا قۇلاق اسۋ قاجەت؟
11 ٴبىز باۋىرلاستاردىڭ سەزىمدەرىن ەسكەرۋ ارقىلى كيەلى كىتاپتاعى: «بارلىعى لايىقتى ٵرى تارتىپپەن بولسىن!»— دەگەن نۇسقاۋعا مويىنسۇناتىنىمىزدى كورسەتەمىز (قورىنتتىقتارعا 1-حات 14:40). قاۋىمدا ساحناعا شىعاتىن ەر باۋىرلاستار تاپسىرماسىن ۋاقتىلى اياقتاۋلارىمەن وسى نۇسقاۋعا قۇلاق اساتىندارىن كورسەتەدى. وسىلايشا ولار وزىنەن كەيىن شىعاتىن بايانداماشىنىڭ عانا ەمەس، بۇكىل قاۋىمنىڭ قامىن ويلايتىنىن كورسەتەدى. ەگەر كەزدەسۋ كەش بىتسە، بۇل باۋىرلاستارعا قالاي اسەر ەتۋى مۇمكىن؟ كەي باۋىرلاستار ۇيگە جەتۋ ٷشىن كولىكپەن ۇزاق جول ٴجۇرۋ كەرەك. وزگەلەرىنە اۆتوبۋسقا ۇلگەرۋ كەرەك نەمەسە ۇيگە دەيىن ٴبىراز جاياۋ ٴجۇرۋ كەرەك. ال كەيبىر باۋىرلاستاردىڭ سەنبەيتىن جۇبايلارى ۇيدە كۇتىپ وتىرادى.
12. اقساقالدار نەگە ٴبىزدىڭ قۇرمەتىمىز بەن سۇيىسپەنشىلىگىمىزگە لايىق؟ (« باسشىلىقتى قولعا العانداردىڭ سەزىمدەرىن ەسكەرىڭىز» دەگەن قورشاۋدى قاراڭىز.)
12 اقساقالدار قاۋىمدا جانە قىزمەتتە اۋىر ەڭبەك ەتەتىندىكتەن، ٴبىزدىڭ قۇرمەت پەن سۇيىسپەنشىلىك تانىتۋىمىزعا لايىق (سالونيكالىقتارعا 1-حات 5:12، 13 وقىڭىز). ولاردىڭ ٴسىزدىڭ يگىلىگىڭىز ٷشىن اتقارىپ جۇرگەن قىزمەتىنە ريزا ەكەنىڭىز ٴسوزسىز. ٴسىز ريزاشىلىعىڭىزدى ولارعا مويىنسۇنۋ جانە قولداۋ ارقىلى كورسەتە الاسىز. ويتكەنى ولار ٴسىزدىڭ «قامىڭىزدى ويلايدى، ٵرى بۇل ٷشىن ەسەپ بەرەدى» (ەۆرەيلەرگە 13:7، 17).
قىزمەتتە
13. يسانىڭ ادامدارعا كورسەتكەن جاناشىرلىعىنا قالاي ەلىكتەي الامىز؟
13 يشايا يسا تۋرالى مىناداي پايعامبارلىق ايتقان: «مايىسقان قامىستى سىندىرمايدى، قوڭىرسي جانعان بىلتەنى دە سوندىرمەيدى» (يشايا 42:3). ادامداردى جاقسى كورگەندىكتەن، يسانىڭ ولارعا جانى اشىعان. «مايىسقان قامىس» پەن «قوڭىرسي جانعان بىلتە» سياقتى دارمەنسىز، جابىرقاعان ادامداردىڭ جان جاراسىن تۇسىنگەندىكتەن، يسا ولارعا مەيىرىمدىلىك پەن شىدامدىلىق تانىتقان. كىشكەنتاي بالالار دا ونى جاقسى كورگەن (مارقا 10:14). ارينە، ادامداردى ٴدال يسا سياقتى ٴتۇسىنىپ، ٴتالىم بەرۋ قولىمىزدان كەلمەيدى. ٴبىراق ۋاعىزدا ادامدارمەن قالاي سويلەسەتىنىمىز، ولارعا قاشان باراتىنىمىز جانە قانشا ۋاقىتتارىن الاتىنىمىز ولاردىڭ سەزىمىن ەسكەرەتىنىمىزدى كورسەتەدى. بۇل ٷشىن نە ىستەۋىمىز كەرەك؟
ادامدارعا ايتاتىن سوزدەرىمىزدەن جانە سويلەۋ مانەرىمىزدەن مەيىرىمدىلىك ەسىپ، ولارعا جاقسىلىق تىلەيتىنىمىز كورىنىپ تۇرۋ كەرەك
14. نەلىكتەن ادامدارمەن قالاي سويلەسەتىنىمىزگە ٴمان بەرۋىمىز كەرەك؟
14 ادامدارمەن قالاي سويلەسۋىمىز كەرەك؟ قازىرگى كەزدە ميلليونداعان ادام ساۋدا-ساتتىق الەمىنىڭ، ساياساتكەرلەردىڭ، ٴدىني جەتەكشىلەردىڭ جەمقورلىعى مەن قاتىگەزدىگىنىڭ كەسىرىنەن «ازىپ-توزىپ، بەيشارا كۇيگە» ۇشىراعان (ماتاي 9:36). اقىرىندا ولار بارىنەن كۇدەر ٷزىپ، ەشكىمگە سەنبەيتىن بولعان. سوندىقتان دا ٴبىزدىڭ ايتاتىن سوزدەرىمىزدەن جانە سويلەۋ مانەرىمىزدەن مەيىرىمدىلىك ەسىپ، ولارعا جاقسىلىق تىلەيتىنىمىز كورىنىپ تۇرۋ كەرەك. كوپ جاعدايدا كيەلى كىتاپتى شەبەر قولدانىپ قانا قويماي، ادامدارعا شىن پەيىلمەن كوڭىل ٴبولىپ، سىي-قۇرمەت تانىتقانىمىز ولاردىڭ حابارىمىزعا قۇلاق اسۋىنا تۇرتكى بولىپ جاتادى.
15. قىزمەتتە ادامداردىڭ سەزىمىن ەسكەرۋدىڭ قانداي جولدارى بار؟
15 ۋاعىزداعان كەزدە ادامداردىڭ سەزىمىن ەسكەرۋدىڭ جولدارى وتە كوپ. مىسالى، ولارعا سۇراق قويعاندا، ىزەتتىلىك پەن مەيىرىمدىلىك تانىتۋىمىز قاجەت. ادامداردىڭ كوبىسى ۇيالشاق كەلەتىن ايماقتا قىزمەت ەتەتىن ٴبىر ٸزاشار وسىلاي ەتەدى. ول ادامدار جاۋابىن بىلمەي، ىڭعايسىزدانىپ قالاتىن سۇراقتاردى قويمايدى ەكەن. «قۇدايدىڭ ەسىمىن بىلەسىز بە؟»، «قۇداي پاتشالىعى دەگەن نە ەكەنىن بىلەسىز بە؟» دەگەن سۇراقتاردىڭ ورنىنا، ول: «مەن كيەلى كىتاپتان قۇدايدىڭ ەسىمى بار ەكەنىن ٴبىلدىم. سىزگە دە كورسەتسەم بولا ما؟»— دەپ ايتادى. ٵر جەردىڭ مادەنيەتى مەن حالقى ٵرتۇرلى بولعاندىقتان، بۇل ٵدىس بارىنە تۋرا كەلە بەرمەيتىن شىعار. ايتسە دە ٴبىز ٵرقاشان دا ايماعىمىزداعى ادامدارعا مەيىرىمدى بولىپ، سىي-قۇرمەت تانىتۋعا ٴتيىسپىز. بۇل ٷشىن ولاردى جاقسىلاپ ٴبىلىپ العانىمىز ٴجون.
16، 17. ادامدارعا مەيىرىمدىلىك تانىتۋ ٷشىن، ا) ولارعا قاي ۋاقىتتا بارعان دۇرىس؟ ٵ) ولارمەن قانشا ۋاقىت سويلەسۋىمىز كەرەك؟
16 ادامدارعا قاي ۋاقىتتا بارعان دۇرىس؟ ٴبىزدى ۇيلەرىنە شاقىرماعاندىقتان، ادامدار ٴبىزدى كەلەدى دەپ كۇتپەيدى. سول سەبەپتى ولار سويلەسۋگە كوبىرەك ىڭعاي تانىتاتىن ۋاقىتتا بارعانىمىز وتە ماڭىزدى (ماتاي 7:12). ماسەلەن، ٴسىز تۇراتىن جەردە ادامدار دەمالىس كۇندەرى كوبىرەك ۇيىقتاعاندى جاقسى كورەتىن شىعار. ولاي بولسا، تاڭەرتەڭ كوشەدە، كوپشىلىك ورىنداردا، نە بىزبەن سويلەسۋگە مۇمكىندىگى بولاتىن قىزىعۋشىلارعا ۋاعىزداعان دۇرىس بولار.
17 قانشا ۋاقىت سويلەسۋىمىز كەرەك؟ ادامداردىڭ ۋاقىتى وتە از بولعاندىقتان، باستاپقى كەزدەرى ولارمەن قىسقاشا سويلەسكەنىمىز ٴجون بولار. تىم ۇزاق وتىرىپ العاننان گورى، قىسقاشا اڭگىمەلەسكەنىمىز تيىمدىرەك بولادى (قورىنتتىقتارعا 1-حات 9:20—23). ادام قولى بوس ەمەس ەكەنىن ەسكەرىپ جاتقانىمىزدى بايقاسا، كەلەسى جولى بىزبەن اڭگىمەلەسۋگە كوبىرەك ىقىلاس تانىتۋى مۇمكىن. قىزمەتتە كيەلى رۋحتىڭ جەمىسىنە جاتاتىن قاسيەتتەردى تانىتساق، شىنىمەن دە «قۇدايمەن قىزمەتتەس» بولا الامىز. ٴتىپتى ٴبىز ارقىلى ەحوبا بىرەۋدى شىندىققا اكەلۋى مۇمكىن! (قورىنتتىقتارعا 1-حات 3:6، 7، 9).
18. وزگە ادامداردىڭ سەزىمىن ەسكەرسەك، قانداي باتاعا كەنەلەمىز؟
18 ەندەشە، وتباسىنداعىلاردىڭ، باۋىرلاستاردىڭ جانە قىزمەتتە كەزدەستىرەتىن ادامداردىڭ سەزىمدەرىن ەسكەرۋ ٷشىن بارىمىزدى سالايىق. مۇنىڭ باتاسىن قازىر دە، بولاشاقتا دا كورەمىز. ٴزابۇر 41:1، 2 دە بىلاي ايتىلعان: «بەيشارانىڭ قامىن ويلايتىن ادام باقىتتى، باسىنا كۇن تۋعاندا، ەحوبا ونى قۇتقارادى. ەحوبا ونى قورعاپ، امان ساقتايدى. ول باقىتتى ادام دەپ جاريالانادى».
