نەگە ارى قاراي دا «مول جەمىس بەرە» بەرۋىمىز كەرەك؟
«مول جەمىس بەرىپ، ٵرى مەنىڭ شاكىرتتەرىم ەكەندەرىڭدى دالەلدەسەڭدەر، اكەم ماداقتالادى» (جوحان 15:8).
اندەر: 145، 144
1، 2. ا) ولەر الدىنداعى ٴتۇنى يسا شاكىرتتەرىمەن نە جايلى سويلەستى؟ (ماقالانىڭ باسىنداعى سۋرەتتى قاراڭىز.) ٵ) نە ٷشىن ۋاعىزدايتىنىمىزدى ۇمىتپاۋ نەگە ماڭىزدى؟ ب) وسى ماقالادا نەنى تالقىلايتىن بولامىز؟
يسا ولەر الدىنداعى ٴتۇنى ەلشىلەرىمەن ۇزاق سويلەستى. سول كەزدە ولاردى قاتتى جاقسى كورەتىنىن ايتتى. سونداي-اق الدىڭعى ماقالادا ايتىلىپ كەتكەن ٴجۇزىم بۇتاسى تۋرالى مىسالىن كەلتىردى. وسىلاي يسا شاكىرتتەرىن «مول جەمىس بەرۋگە» تالپىندىرعىسى كەلدى. گرەك تىلىندە بۇل تىركەس يسانىڭ ولاردى ارى قاراي دا مول جەمىس بەرە بەرۋگە، ياعني پاتشالىق تۋرالى حاباردى تاباندىلىقپەن ۋاعىزداي بەرۋگە شاقىرعانىن بىلدىرەدى (جوحان 15:8).
2 ٴبىراق يسا شاكىرتتەرىنە نە ىستەۋ كەرەكتىگىن عانا ەمەس، نەلىكتەن ىستەۋ كەرەكتىگىن دە ٴتۇسىندىردى. ولارعا ارى قاراي دا ۋاعىزداي بەرۋدىڭ بىرنەشە سەبەبىن كەلتىردى. ٴبىزدىڭ دە نە ٷشىن ۋاعىزداي بەرۋىمىز كەرەكتىگىن ۇمىتپاعانىمىز ماڭىزدى. وسى جايلى ويلانعانىمىز بىزگە «بارلىق حالىقتارعا» تاباندىلىقپەن ۋاعىزداي بەرۋگە كومەكتەسەدى (ماتاي 24:13، 14). ٴبىز بۇل ماقالادا ۋاعىزداۋىمىزدىڭ جازبالارعا نەگىزدەلگەن ٴتورت سەبەبىن قاراستىرامىز. بۇعان قوسا، تاباندىلىقپەن ٶنىم بەرۋگە كومەكتەسەتىن ەحوبانىڭ ٴتورت سىيىن دا تالقىلاپ وتەمىز.
ەحوبانى ماداقتايمىز
3. ا) جوحان 15:8 گە ساي، ۋاعىزداۋىمىزدىڭ ەڭ باستى سەبەبى قانداي؟ ٵ) يسانىڭ مىسالىنداعى جۇزىمدەر نەنى بىلدىرەدى جانە بۇل نەگە ورىندى تەڭەۋ؟
3 ۋاعىزدايتىنىمىزدىڭ ەڭ باستى سەبەبى — ٴبىز ەحوبانى ماداقتاپ، ونىڭ ەسىمىنىڭ كيەلى تۇتىلۋىنا ۇلەس قوسقىمىز كەلەدى (جوحان 15:1، 8 وقىڭىز). ٴجۇزىم بۇتاسى تۋرالى مىسالىندا يسا ەحوبانى جۇزىمشىگە، ٶزىن ٴجۇزىم بۇتاسىنا، ال شاكىرتتەرىن ساباقتارعا تەڭەگەن (جوحان 15:5). دەمەك، بۇل مىسالداعى جۇزىمدەر يسانىڭ شاكىرتتەرى بەرەتىن ٶنىمدى، ياعني ولار اتقاراتىن ۋاعىز ٸسىن بىلدىرەدى. يسا ەلشىلەرىنە: «مول جەمىس بەرسەڭدەر،.. اكەم ماداقتالادى»،— دەگەن. ٴجۇزىم بۇتاسى جاقسى ٴجۇزىم بەرسە، بۇل جۇزىمشىگە ابىروي-اتاق اكەلەدى. سول ىسپەتتى، ٴبىز پاتشالىق حابارىن ۋاعىزداۋ ٷشىن بارىمىزدى سالساق، ەحوبانى اتاق-داڭققا بولەيمىز (ماتاي 25:20—23).
4. ا) قۇداي ەسىمىنىڭ كيەلى تۇتىلۋىنا ۇلەس قوسۋ نەنى بىلدىرەدى؟ ٵ) قۇداي ەسىمىنىڭ كيەلى تۇتىلۋىنا ۇلەس قوسۋ مارتەبەسىنە يە بولعانىڭىز ٴسىزدى قانداي سەزىمگە بولەيدى؟
4 قۇدايدىڭ ەسىمى كيەلى. ونى ودان سايىن كيەلى ەتە ٴتۇسۋ مۇمكىن ەمەس. ەندەشە، قالاي ٴبىز ۋاعىزداۋ ارقىلى ونىڭ ەسىمىن كيەلى تۇتىلۋىنا ۇلەس قوسامىز؟ يشايا پايعامباردىڭ سوزدەرىنە نازار اۋدارايىقشى. ول بىلاي دەگەن: «تەك اسكەرباسى ەحوبانى كيەلى دەپ ساناڭدار!» (يشايا 8:13). ٴبىز ەحوبانىڭ ەسىمىن بارلىق ەسىمدەردىڭ ىشىندەگى ەڭ ۇلىسى دەپ ساناۋ ارقىلى جانە ادامدارعا ونىڭ كيەلىلىگىن تۇسىنۋگە كومەكتەسۋ ارقىلى بۇل ەسىمدى كيەلى تۇتاتىنىمىزدى كورسەتەمىز (ماتاي 6:9). مىسالى، ادامدارعا ەحوبانىڭ كەرەمەت قاسيەتتەرى مەن ادامزات جۇماقتا ماڭگى ٶمىر ٴسۇرسىن دەگەن نيەتى جايلى ۇيرەتكەندە، شايتاننىڭ ەحوباعا جاپقان جالاسىنىڭ ٴبارى دە وتىرىك ەكەنىن تۇسىنۋگە كومەكتەسەمىز (مۇسانىڭ 1-جازباسى 3:1—5). ولارعا ەحوبانىڭ «داڭققا، قۇرمەت پەن كۇش-قۇدىرەتكە يە بولۋعا لايىق» ەكەنىن بىلۋگە كومەكتەسۋ ارقىلى دا ونىڭ ەسىمىنىڭ كيەلى تۇتىلۋىنا ۇلەس قوسامىز (ايان 4:11). 16 جىلدان بەرى ٸزاشارلىق قىزمەتتى اتقارىپ كەلە جاتقان رۋن باۋىرلاس بىلاي دەيدى: «ماعان بۇكىل عالامنىڭ جاراتۋشىسىنىڭ كۋاگەرى بولۋ مارتەبەسى بەرىلگەنىنە شەكسىز ريزامىن. بۇل ارى قاراي دا ۋاعىزداي بەرۋگە دەگەن ىقىلاسىمدى ارتتىرادى».
ەحوبا مەن يسانى جاقسى كورەمىز
5. ا) جوحان 15:9، 10 دا ۋاعىزداۋىمىزدىڭ قانداي سەبەبى جازىلعان؟ ٵ) يسا شاكىرتتەرىنە تاباندىلىق قاجەت بولاتىنىن تۇسىنۋگە قالاي كومەكتەستى؟
5 جوحان 15:9، 10 وقىڭىز. پاتشالىق حابارىن ۋاعىزدايتىنىمىزدىڭ ەكىنشى سەبەبى — ٴبىز ەحوبا مەن يسانى جاقسى كورەمىز (مارقا 12:30؛ جوحان 14:15). يسا شاكىرتتەرىنە: «مەنىڭ سۇيىسپەنشىلىگىمنەن ايىرىلماڭدار»،— دەگەن. ول نەگە بۇلاي دەدى؟ ويتكەنى ٸزباسارلارىنا شىنايى ٴماسىحشى رەتىندە ٶمىر ٴسۇرۋ ٷشىن تاباندىلىق قاجەت بولاتىنىن بىلگەن. جوحان 15:4—10 تارماقتاردان كورىنەتىندەي، شاكىرتتەرىنە وسىنى تۇسىنۋگە كومەكتەسۋ ٷشىن يسا وزىمەن بىرلىكتە بولا بەرۋدى جانە سۇيىسپەنشىلىگىنەن ايىرىلماۋدى قايتا-قايتا ايتقان.
6. ٴماسىحتىڭ سۇيىسپەنشىلىگىنەن ايىرىلعىمىز كەلمەيتىنىن قالاي كورسەتەمىز؟
6 ٴماسىحتىڭ سۇيىسپەنشىلىگى مەن قولداۋىنان ايىرىلعىمىز كەلمەيتىنىن قالاي كورسەتە الامىز؟ وعان مويىنسۇنۋ ارقىلى. يسا بىزدەن ٶزى ىستەگەن نارسەدەن ارتىق نارسە ىستەۋدى ٶتىنىپ جاتقان جوق. «مەن اكەمنىڭ وسيەتتەرىن ورىنداپ، ونىڭ سۇيىسپەنشىلىگىنەن ايىرىلمايمىن»،— دەدى ول (جوحان 15:10). يسا بىزگە جاقسى ۇلگى قالدىرعان (جوحان 13:15).
7. قالايشا مويىنسۇنۋشىلىق پەن سۇيىسپەنشىلىك ٶزارا بايلانىستى؟
7 «كىم مەنىڭ وسيەتتەرىمدى قابىلداپ، ورىنداسا، سونىڭ مەنى سۇيگەنى»،— دەگەن كەزدە، يسا مويىنسۇنۋشىلىقتىڭ سۇيىسپەنشىلىكپەن تىعىز بايلانىستى ەكەنىن انىق كورسەتتى (جوحان 14:21). يسانىڭ ايتقان بۇيرىعى ونىڭ اكەسىنىڭ دە بۇيرىعى بولىپ تابىلادى. دەمەك، يسانىڭ ۋاعىزداڭدار دەگەن بۇيرىعىنا مويىنسۇنۋ ارقىلى ٴبىز ەحوبانى دا جاقسى كورەتىنىمىزدى پاش ەتەمىز (ماتاي 17:5؛ جوحان 8:28). ال ەحوبا مەن يساعا دەگەن سۇيىسپەنشىلىگىمىزدى كورسەتەتىن بولساق، ولاردىڭ سۇيىسپەنشىلىگىنەن دە ايىرىلمايمىز.
ادامداردى ەسكەرتەمىز
8، 9. ا) ۋاعىزداۋىمىزدىڭ تاعى ٴبىر سەبەبى قانداي؟ ٵ) ەزەكيەل 3:18، 19 بەن 18:23 تەگى ەحوبانىڭ سوزدەرى ٴبىزدى ارى قاراي دا ۋاعىزداي بەرۋگە قالاي تالپىندىرادى؟
8 ۋاعىزداۋىمىزدىڭ ٷشىنشى سەبەبى — ٴبىز ەحوبانىڭ كەلە جاتقان كۇنى جايلى باسقالارعا ەسكەرتكىمىز كەلەدى. نۇح كيەلى كىتاپتا «ۋاعىزداۋشى» دەپ اتالعان (پەتىردىڭ 2-حاتى 2:5 وقىڭىز). توپان سۋدىڭ قارساڭىندا نۇح ادامدارعا ٴتونىپ تۇرعان اپات جايلى ەسكەرتكەن بولسا كەرەك. نەگە ولاي دەۋگە بولادى؟ ويتكەنى يسا بىلاي دەپ ايتقان: «توپان سۋدان بۇرىن، نۇح كەمەگە كىرگەن كۇنگە دەيىن، ادامدار ٸشىپ-جەپ، ايەل الىپ، قىز ۇزاتىپ ٶمىر كەشىپ جاتتى. توپان سۋ باسىپ، ٴبارىن الىپ كەتكەنشە، ولار ەش ويلانبادى. ادام ۇلى وسىندا بولعان كەزدە دە سولاي بولادى» (ماتاي 24:38، 39). جۇرت حابارىنا قۇلاق قويماسا دا، نۇح ەحوبانىڭ ەسكەرتۋ حابارىن ادالدىقپەن ايتا بەردى.
9 بۇگىندە ٴبىز قۇدايدىڭ بولاشاقتا ادامزات ٷشىن نە ىستەيتىنىن باسقالار دا ٴبىلۋ ٷشىن پاتشالىق حابارىن ۋاعىزدايمىز. ەحوبا سياقتى، ٴبىز دە ادامداردىڭ حابارىمىزعا قۇلاق اسىپ، ماڭگى ٶمىر سۇرگەندەرىن قاتتى قالايمىز (ەزەكيەل 18:23). ۇيدەن-ۇيگە جانە كوپشىلىك ورىنداردا ۋاعىزداعان كەزدە، ٴبىز مۇمكىندىگىنشە كوپ ادامعا قۇداي پاتشالىعى ورناپ، وسى زۇلىم دۇنيەنى جوياتىنىن ەسكەرتۋگە تىرىسامىز (ەزەكيەل 3:18، 19؛ دانيال 2:44؛ ايان 14:6، 7).
ادامداردى جاقسى كورەمىز
10. ا) ماتاي 22:39 دا ۋاعىزداۋدىڭ قانداي سەبەبى جازىلعان؟ ٵ) پاۋىل مەن سىيلاس فىلىپىدەگى تۇرمە باستىعىنا قالاي كومەكتەستى؟
10 ۋاعىزداۋدى دوعارمايتىنىمىزدىڭ ٴتورتىنشى سەبەبى — ٴبىز ادامداردى جاقسى كورەمىز (ماتاي 22:39). وسى سۇيىسپەنشىلىك ٴبىزدى ارى قاراي دا ۋاعىزداي بەرۋگە تالپىندىرادى، ويتكەنى جاعدايلارى وزگەرگەندە، ادامداردىڭ كوزقاراسى دا وزگەرۋى مۇمكىن ەكەنىن بىلەمىز. مىسالى، بىردە ٴفىلىپى قالاسىندا قارسىلاستارى پاۋىل مەن سىيلاستى تۇرمەگە قاماپ تاستايدى. ٴبىراق ٴتۇن ورتاسىندا جەر سىلكىنىپ، تۇرمەنىڭ ىرگەتاسى شايقالادى دا، ەسىكتەر اشىلىپ كەتەدى. سوندا تۇتقىندار قاشىپ كەتتى دەپ قورىققان تۇرمە باستىعى ٶزىن ولتىرمەك بولادى. ٴبىراق پاۋىل ونى توقتاتىپ: «وزىڭە قول جۇمساما!»— دەپ ايقايلايدى. كەيىن تۇرمە باستىعى ودان: «قۇتقارىلۋىم ٷشىن نە ىستەۋىم كەرەك؟»— دەپ سۇرايدى. پاۋىل مەن سىيلاس وعان: «يەمىز يساعا سەن. سوندا... قۇتقارىلاسىڭ»،— دەيدى (ەلشىلەردىڭ ىستەرى 16:25—34).
ٴبىز ەحوبانى، يسانى جانە ادامداردى جاقسى كورگەندىكتەن ۋاعىزدايمىز (5، 10-ابزاستاردى قاراڭىز)
11، 12. ا) تۇرمە باستىعىمەن بولعان وقيعادان ۋاعىز ىسىنە قاتىستى نەگە ۇيرەنەمىز؟ ٵ) نەگە ٴبىز ارى قاراي دا ۋاعىزداي بەرۋدى قالايمىز؟
11 تۇرمە باستىعىمەن بولعان وقيعادان ۋاعىز ىسىنە قاتىستى نەگە ۇيرەنەمىز؟ بايقاساق، جەر سىلكىنىسىنەن كەيىن عانا تۇرمە باستىعىنىڭ كوزقاراسى وزگەرىپ، ول كومەك سۇرادى. سول سياقتى، كيەلى كىتاپتاعى حاباردى تىڭداعىسى كەلمەيتىندەردىڭ كەيبىرى قايعىلى جاعدايعا ۇشىراعان كەزدە كوزقاراستارى وزگەرىپ، كومەك ىزدەي باستاۋى مۇمكىن. مىسالى، كەيبىرەۋلەر جۇمىستان شىعارىلعاندا نە جۇبايىمەن اجىراسقاندا، توبەلەرىنەن جاي تۇسكەندەي كۇي كەشەتىن شىعار. باسقالارى بولسا، اۋىر دەرتكە شالدىققانىن بىلگەندە، يا بولماسا جاقىن ادامى قايتىس بولعاندا، قاتتى جابىرقاۋى مۇمكىن. وسىنداي كەزدەرى ادامدار ٶمىر جايلى بۇرىن ويلانباعان سۇراقتاردى قويا باستاۋى ىقتيمال. ولار ٴتىپتى: «قۇتقارىلۋىم ٷشىن نە ىستەۋىم كەرەك؟»— دەپ تولعاناتىن دا شىعار. وسىلاي ادامدار ومىرلەرىندە ٴبىرىنشى رەت ٴبىزدىڭ ٷمىت بەرەتىن حابارىمىزدى تىڭداۋعا ىقىلاس ٴبىلدىرۋى مۇمكىن.
12 ەندەشە، ارى قاراي دا ادالدىقپەن ۋاعىزداي بەرەتىن بولساق، ادامدار حابارىمىزدان جۇبانىش تابۋعا دايىن بولعاندا، الدارىنان شىعامىز (يشايا 61:1). 38 جىل بويى ٸزاشار بولىپ كەلە جاتقان شارلوتتا بىلاي دەيدى: «بۇگىندە ادامدار ٶمىردىڭ ٴمانىن جوعالتقان. ولار قۋانىشتى حاباردى ەستۋى قاجەت». ال ٸزاشار بولعانىنا 34 جىل بولعان ەيۆور بىلاي دەيدى: «قازىر ادامداردىڭ كوبىسى بۇرىنعىعا قاراعاندا قاتتى كۇيزەلىپ ٴجۇر. مەن ولارعا كومەكتەسكىم كەلەدى، سوندىقتان ۋاعىزدايمىن». راسىندا دا، ادامدارعا دەگەن سۇيىسپەنشىلىك — ۋاعىزداۋدى دوعارماۋعا كەلەلى سەبەپ!
تاباندى بولۋعا كومەكتەسەتىن سىيلار
13، 14. ا) جوحان 15:11 دە قانداي سىي تۋرالى ايتىلعان؟ ٵ) يسانىڭ قۋانىشى بىزدە دە بولۋ ٷشىن نە ىستەۋىمىز كەرەك؟ ب) قۋانىش سەزىمى بىزگە قىزمەتىمىزدى اتقارۋعا قالاي كومەكتەسەدى؟
13 يسا ولەر الدىنداعى ٴتۇنى ەلشىلەرگە مول جەمىس بەرە بەرۋگە كومەكتەسەتىن سىيلار جونىندە دە ايتقان. بۇل قانداي سىيلار؟ بۇگىندە ولار بىزگە قالاي كومەكتەسە الادى؟
14 قۋانىش سەزىنەمىز. ۋاعىزداۋ ٴبىز ٷشىن اۋىرتپالىق پا؟ مۇلدەم ولاي ەمەس. يسا ٴجۇزىم بۇتاسى تۋرالى مىسالىن كەلتىرگەننەن كەيىن، ۋاعىزداعان كەزىمىزدە ونىڭ قۋانىشى بىزدە دە بولاتىنىن ايتقان (جوحان 15:11 وقىڭىز). سوندا بۇل نەنى بىلدىرەدى؟ ەسىمىزدە بولسا، مىسالىندا يسا ٶزىن ٴجۇزىم بۇتاسىنا، ال شاكىرتتەرىن ساباقتارعا تەڭەگەن. ساباقتار ٴجۇزىم بۇتاسىنان اجىراماي تۇرعان جاعدايدا عانا قاجەتتى سۋ مەن ٴناردى الا الادى. سول ىسپەتتى، ٴبىز دە يسامەن بىرلىكتە بولىپ، ىزىمەن تۋرا جۇرسەك قانا، ول سياقتى، قۇدايدىڭ ەركىن ورىنداۋدان كەلەتىن قۋانىشقا كەنەلەمىز (جوحان 4:34؛ 17:13؛ پەتىردىڭ 1-حاتى 2:21). 40 جىلدان اسا ٸزاشار بولىپ قىزمەت ەتىپ جۇرگەن حانني بىلاي دەيدى: «ۋاعىزدان كەيىن بويىمدى ۇنەمى قۋانىش كەرنەيدى. بۇل مەنى ەحوباعا دەگەن قىزمەتىمدى ارى قاراي دا جالعاستىرا بەرۋگە تالپىندىرادى». قۋانىش سەزىمى بىزگە ادامداردىڭ كوبىسى تىڭداماعان كەزدە دە، ۋاعىزداي بەرۋگە كۇش بەرەدى (ماتاي 5:10—12).
15. ا) جوحان 14:27 دە قانداي سىي جايلى ايتىلعان؟ ٵ) تىنىشتىق بىزگە ۋاعىزداۋدى دوعارماۋعا قالاي كومەكتەسەدى؟
15 تىنىشتىققا يە بولامىز (جوحان 14:27 وقىڭىز). ولەر الدىنداعى كەشتە يسا ەلشىلەرىنە: «مەن وزدەرىڭە بەرگەن تىنىشتىقتى ارالارىڭدا قالدىرامىن»،— دەگەن. يسانىڭ تىنىشتىعى بىزگە ۋاعىزداۋدى دوعارماۋعا قالاي كومەكتەسەدى؟ ٴبىز تاباندىلىقپەن ۋاعىزداۋىمىزبەن ەحوبا مەن يسانى قۋانتاتىنىمىزدى بىلەمىز. ال بۇل جۇرەگىمىزگە تىنىشتىق ۇيالاتادى (ٴزابۇر 149:4؛ ريمدىكتەرگە 5:3، 4؛ قولوستىقتارعا 3:15). 45 جىل ٸزاشار بولىپ قىزمەت ەتىپ جۇرگەن ۋلف بىلاي دەيدى: «شارشايتىنىم راس، ٴبىراق ۋاعىزداۋ ٸسى ماعان ناعىز قاناعات سىيلاپ، ومىرىمە ٴمان-ماعىنا بەرەدى». سارقىلمايتىن تىنىشتىققا يە بولعانىمىزعا ٴبىز شەكسىز ريزامىز!
16. ا) جوحان 15:15 تە قانداي سىي جايلى ايتىلعان؟ ٵ) يسامەن دوس بولىپ قالۋ ٷشىن ەلشىلەر نە ىستەۋ كەرەك ەدى؟
16 يسامەن دوس بولامىز. يسا ەلشىلەرىنىڭ قۋانىشتى بولعاندارىن قالايتىنىن ايتقاننان كەيىن، ولارعا رياسىز سۇيىسپەنشىلىك تانىتۋدىڭ نەگە ماڭىزدى ەكەنىن ٴتۇسىندىردى (جوحان 15:11—13). سوسىن ول ەلشىلەرىنە: «مەن سەندەردى دوستارىم دەپ اتايمىن»،— دەگەن. يسامەن دوس بولۋ نەتكەن كەرەمەت سىي دەسەڭىزشى! ٴبىراق ەلشىلەر بۇل دوستىقتى قالاي ساقتاماق ەدى؟ يسا ولارعا: «ۇنەمى مول جەمىس بەرىڭدەر»،— دەدى (جوحان 15:14—16 وقىڭىز). باسقاشا ايتقاندا، ولار ۋاعىزداي بەرۋ كەرەك ەدى. بۇدان ەكى جىل بۇرىن يسا ەلشىلەرىنە بىلاي دەگەن بولاتىن: «كوك پاتشالىعى تاياپ قالدى!»— دەپ ۋاعىزداڭدار» (ماتاي 10:7). سول سەبەپتى ولەر الدىنداعى ٴتۇنى يسا شاكىرتتەرىن تاباندىلىقپەن ۋاعىزداۋعا تالپىندىردى (ماتاي 24:13؛ مارقا 3:14). ارينە، بۇل تاپسىرماسىن ورىنداۋ وڭاي بولمايتىنىن يسا بىلگەن. دەسە دە بۇل ولاردىڭ قولىنان كەلەتىن، وسىلايشا ونىمەن دوس بولىپ قالا الاتىن. بۇل رەتتە ولارعا كەلەسى ٴبىر سىيدىڭ كومەگى تيمەك ەدى.
17، 18. ا) جوحان 15:7 دە قانداي سىي تۋرالى ايتىلعان؟ ٵ) بۇل سىي يسانىڭ شاكىرتتەرىنە قالاي كومەكتەستى؟ ب) بۇگىندە قانداي سىيلار بىزگە تاباندى بولۋعا كومەكتەسەدى؟
17 دۇعالارىمىزعا جاۋاپ الامىز. يسا: «قالاعاندارىڭدى سۇراڭدار، سوندا سەندەرگە بەرىلەدى»،— دەدى (جوحان 15:7، 16). بۇل ۋادەسى ەلشىلەرگە كۇش بىتىرگەنى ٴسوزسىز *! ولار يسانىڭ كوپ ۇزاماي قايتىس بولاتىنىن تولىق تۇسىنگەن جوق ەدى. سوندىقتان ول قايتىس بولعان كەزدە، ولار وزدەرى عانا قالىپ قويعانداي سەزىنگەن شىعار. ٴبىراق ەلشىلەر جالعىز ەمەس-تىن، ويتكەنى ەحوبا ولاردىڭ دۇعالارىن تىڭداپ، ۋاعىز ٸسىن اتقارۋعا كومەكتەسۋگە ٵزىر ەدى. ول شىنىندا دا ولارعا قولعابىس ەتتى. يسانىڭ ولىمىنەن كەيىن كوپ ۇزاماي ەلشىلەر ەحوبادان باتىلدىق سۇراپ جالبارىنعاندا، ەحوبا بۇل تىلەكتەرىن ورىندادى (ەلشىلەردىڭ ىستەرى 4:29، 31).
ەحوبا كومەك سۇراعان دۇعالارىمىزعا جاۋاپ بەرەتىنىنە سەنىمدى بولساق بولادى (18-ابزاستى قاراڭىز)
18 بۇگىنگى كۇنى دە سولاي. ۋاعىز ٸسىن تاباندىلىقپەن اتقارا بەرەر بولساق، يسانىڭ دوسى بولىپ قالامىز. سونداي-اق ۋاعىزداۋ قيىن بولعان كەزدە كومەك سۇراپ دۇعا ەتسەك، ەحوبا تىلەگىمىزدى ورىندايتىنىنا سەنىمدى بولساق بولادى (فىلىپىلىكتەرگە 4:13). ٴبىز ەحوبا دۇعالارىمىزعا جاۋاپ بەرەتىنىنە جانە يسا سياقتى دوسىمىزدىڭ بارىنا وتە ريزامىز. ەحوبانىڭ بۇل سىيلارى بىزگە ارى قاراي دا مول جەمىس بەرۋگە كۇش دارىتادى (جاقىپ 1:17).
19. ا) نەگە ٴبىز ارى قاراي دا ۋاعىزداي بەرەمىز؟ ٵ) قۇداي تاپسىرعان ٸستى اقىرىنا دەيىن جەتكىزۋىمىزگە نە كومەكتەسەدى؟
19 بۇل ماقالادان ٴبىز ارى قاراي دا ۋاعىزداي بەرۋىمىزدىڭ كەلەسىدەي ٴتورت سەبەبىن بىلدىك: ەحوبانى ماداقتاپ، ەسىمىنىڭ كيەلى تۇتىلۋىنا ۇلەس قوسامىز، ەحوبا مەن يساعا دەگەن سۇيىسپەنشىلىگىمىزدى كورسەتەمىز، ادامداردى ەسكەرتەمىز جانە ولاردى جاقسى كورەتىنىمىزدى كورسەتەمىز. بۇدان بولەك، ٴتورت سىيىمىزدى دا قاراستىردىق. ولار: قۋانىش، تىنىشتىق، يسامەن دوس بولۋ جانە دۇعالارىمىزعا جاۋاپ الۋ. بۇل سىيلار بىزگە قۇداي تاپسىرعان ٸستى اقىرىنا دەيىن جەتكىزۋگە كۇش بەرەدى. ەحوبا ٴبىزدىڭ ارى قاراي دا «مول جەمىس بەرە» بەرۋگە كۇش سالىپ جاتقانىمىزدى كورگەندە، شات-شادىمان بولادى!
^ 17-ابزاس يسا ەلشىلەرىمەن اڭگىمەلەسۋ بارىسىندا ەحوبا ولاردىڭ دۇعاسىنا جاۋاپ بەرەتىنىن بىرنەشە رەت ەستەرىنە سالدى (جوحان 14:13؛ 15:7، 16؛ 16:23).
